Month: October 2023

Уул уурхайн улмаас эвдэрч орхигдсон Налайх дүүргийн 8 дугаар хорооны 10 га талбайд нөхөн сэргээлт хийхээр болжээ. Уг талбайд ухаалаг хүлэмж, мод үржүүлгийн газар бүхий цэцэрлэгт хүрээлэн байгуулах юм байна.

Эл ажлыг манай улсын талаас БОАЖЯ БНСУ-ын талтай хамтарч хийж байгаа ажил ажээ. Энэ төслийг БНСУ-ын Олон улсын хамтын ажиллагааны байгууллага (КОЙКА)-ын санхүүжилтээр хийх юм байна.

БНСУ-ын талаас таван жилийн хугацаатай 10 орчим сая ам.долларын санхүүжилттэй уг төслийг хэрэгжүүлнэ. Нөхөн сэргээлт хийж ухаалаг хүлэмж, мод үржүүлгийн газар бүхий цэцэрлэгт хүрээлэн байгуулж, хүлээлгэн өгөх бөгөөд цаашид ашиглалт үйлчилгээ, менежментийг ямар байгууллага хариуцахыг тодорхой тогтох, саналыг БОАЖЯ-наас гаргажээ. Улмаар төслийн нэгжийг байгуулах юм байна.

Бүтээн байгуулалтын ажлыг 2024-2029 оны хооронд хийх юм.

Өчигдөр буюу 2023 оны аравдугаар сарын 19-ний өдөр Сонгинохайрхан дүүргийн 2 дугаар хороонд 31 настай эмэгтэй, Чингэлтэй дүүргийн 18 дугаар хороонд 37 настай эмэгтэй 13-15 насны 2 хүүхдийн хамт угаартсан гэх дуудлага иржээ.

Мэдээллийн дагуу эмнэлгийн тусламж, үйлчилгээнд хамруулж, мэргэжлийн байгууллагаар шинжилгээ хийлгэх зорилгоор шахмал түлшнээс дээж авч, холбогдох ажиллагааг хийж байна.

Иймд иргэд Та бүхэнд дараах сэрэмжлүүлгийг хүргэж байна.

• Гэр, байшин, орон сууцандаа агаарын сэлгэлтийг тогтмол хийх
• Зуух, яндангийн бүрэн бүтэн байдлыг тогтмол шалгах, пийшин зуухны онгорхой, цоорхой цууралтыг шалгаж бөглөх
• Хүйтний эрч чангарахаас өмнө яндангаа хөөлөх (яг одоо)
• Шахмал түлш бүрэн шаталт дуустал яндангийн сойлтыг хаахгүй байх, үнсний савыг тогтмол цэвэрлэх
• Угаарын хий мэдрэгч дохиоллыг гэр, сууцандаа суурилуулах (Монгол гэрт тоононоос доош 30см орчим зайд, байшинд унтлагын өрөөний таазны голд, олон өрөөтэй бол өрөө бүрд), уг төхөөрөмжийн хэвийн ажиллагааг тогтмол шалгах, сард нэг удаа тоос шороог нь зөөлөн даавуугаар цэвэрлэх, дохиоллыг салгаж унтраахгүй байх
• Галлагаа хийхдээ нунтаг түлш хэрэглэхгүй байх
• Хүүхдийг гэрт үлдээх үедээ зуух, пийшин шахмал түлшээр хэт дүүргэхгүй байх
• Автомашины граж зэрэг битүү орчинд автомашины хөдөлгүүр асаалттай орхихгүй байх, хажууд нь унтахгүй байх
• Ямар ч тохиолдолд гал түлсэн л бол яндангаа сугалж өрхөө бүтээхгүй байх зэргээр мэргэжлийн байгууллагуудаас өгч буй зөвлөмж, сэрэмжлүүлгийг тогтмол дагаж мөрдөхийг зөвлөж байна.

УГААРЫН ХИЙН ХОРДЛОГЫН ҮЕД АНХНЫ ТУСЛАМЖ ХЭРХЭН ҮЗҮҮЛЭХ ВЭ?

• Угаартай орчноос яаралтай гаргах
• Унтуулахгүй байх
• Ам, хамар, залгиурыг чөлөөлж, цэвэрлэх (шаардлагатай үед хиймэл амьсгал, цээж шахалтыг яаралтай хийх)
• Эмчид яаралтай хандах

Энэ сарын 12-ны өдөр Баянзүрх дүүргийн орчимд болон хотын төвөөр газ, угаарын үнэр үнэртэж, тухайн үнэр юунаас үүдэлтэй болохыг тодруулахаар алба хаагчид багагүй хугацаанд ажилласан.

Улмаар 20 орчим тонн тос масло асгасаны улмаас үнэр агаарт тархсан гэх урьдчилсан дүгнэлтийг гаргасан юм. Тэгвэл тус хэргийг Баянзүрх дүүргийн цагдаагийн гуравдугаар хэлтэс шалгаж байгаа бөгөөд өнөө ч химийн дүгнэлт нь гараагүй байгаа юм. Харин усанд агуулагдаж байгаа хүнд металийн агууламжийг тодорхойлоход шинжилгээгээр стандартыг даваагүй гэж гарсан байна. Гэхдээ салбар яам дахин давтан шинжилгээ авахыг үүрэг болгожээ.

Шинжилгээний дүгнэлтийн талаар БОАЖЯ-ны Усны бохирдол хариуцсан мэргэжилтэн Э.Ууганзаяа “10 дугаар сарын 12-ны өдөр уснаас гурван дээж авсан. Энэ дээжлэлтийг цэвэрлэх байгууламжийн оролт, гаралтын цэг, Туул гол руу нийлүүлж буй био орчмын цэгүүдээс авсан. Урьдчилсан байдлаар, химийн үзүүлэлт нь стандарт хэмжээг даваагүй байсан. Давтан дээжлэлтийг авч байна. Өчигдөр нийт дөрвөн дээж авсан. Шинжилгээний дүн эцэслэн гараагүй байна” гэлээ.

Нийгмийн сэтгэл зүйн тогтвортой байдлыг бий болгоход хувь нэмэр оруулж, сэтгэл зүйн дархлааг дэмжих зорилго бүхий “Эрүүл Монгол хүн – Бүтэн гэр бүл” төслийн хүрээнд орон гэргүй иргэдийн өнөөгийн нөхцөл байдлыг хэлэлцэх зөвлөгөөн боллоо. Уг зөвлөгөөнд Нийслэлийн Хөдөлмөр, халамжийн газар, Цагдаагийн удирдах газар, Гэр бүл, хүүхэд, залуучуудын газар, Нийгмийн хамгааллын тусгай төв зэрэг нийгмийн салбарын 30 гаруй байгууллагын 100 гаруй төлөөлөл оролцож, орон гэргүй иргэдэд үзүүлж буй үйлчилгээнд тулгамдсан асуудал, шийдэх боломжийн талаар хэлэлцэж, тодорхойлсон юм.

Орон гэргүй, зорилтот бүлгийн иргэдийн 90 хувь нь архины хамааралтай, үүний 80 хувийг эрэгтэй, 20 хувийг эмэгтэйчүүд эзэлдэг. Тус иргэдийн архинд донтох болсон гол шалтгаануудын нэг нь гэр бүл салалт байдаг аж.

Монгол Улс зах зээлийн нийгэмд шилжих үед олон үйлдвэр үүд хаалгаа хааж, тухайн үед ядуурал, ажилгүйдэл, архины хамааралтай игэдийн тоо нэмэгдсэн байдаг. Гудамж, орц хонгил, траншейнд хоноглох, архидан согтуурах явдлыг таслан зогсоох, нөгөө талаас иргэдийн амгалан тайван байдлыг хангах үүднээс 2003 онд Засгийн газрын тогтоолоор “Амьдрах ухаан” сургалт үйлдвэрлэлийн төвийг байгуулсан нь өдгөө Нийслэлийн Засаг даргын дэргэд Нийгмийн хамгааллын тусгай төв нэртэйгээр ажиллаж буй. Тус төв нь өөрийн гэсэн орон гэргүй, орлого хязгаарлагдмал, эрхэлсэн тодорхой ажилгүй, харж хандах хүнгүй, нийгмийн эмзэг бүлгийн иргэдийг нийгэмшүүлэх, бие даасан амьдралд шилжихэд нь туслах зорилгоор 20 жилийн турш үйл ажиллагаа явуулж байна.

Нийгмийн хамгааллын тусгай төв нь сүүлийн найман жилийн хугацаанд нийт 3014 иргэнийг төвд байрлуулан, зохих үйлчилгээнд хамруулж, 634 иргэнийг бичиг баримтжуулан, 1000 иргэнийг ажлын байранд зуучилж, 251 иргэнийг бие даасан амьдралд шилжүүлээд байна. Мөн энэ хугацаанд 1686 иргэн орон гэргүй гэж шинээр бүртгэгджээ. Үүнтэй холбоотойгоор цаашид орон гэргүй иргэдэд үзүүлж буй үйлчилгээний чанар, хүртээмжийг нэмэгдүүлэх, мэргэжлийн багтай хамтран ажиллах хэрэгцээ, шаардлагыг бий болгож байгаа юм.

Зам, тээврийн хөгжлийн яам 2023 оныг бүрэн цахимжсан, бүтээмжийг нэмэгдүүлж, хариуцлага, үр дүнг тооцох жил болгон зарлаж, “Авто замын салбарт чанартай зам, чансаатай засвар арчлалт” зорилт тавьсан.

Тэгвэл 2023 оны аравдугаар сарын 20-ны өдрийн байдлаар олон улс, улсын чанартай 14.891.5 км авто замын урсгал засвар арчлалтын ажил 87 хувьтай хийгдсэн байна.

Улсын чанартай авто зам, гүүрийн завсар арчлалтын гүйцэтгэлийг бүсчлэн танилцуулъя.

-Төвийн бүс буюу Төв, Өвөрхангай аймгуудад хийгдсэн авто замын ажил 90 хувь

-Хангайн бүс нутаг буюу Архангай, Завхан, Увс аймагт 88 хувьтай,

-Хойд бүс буюу Дархан-Уул, Сэлэнгэ, Булган, Орхон, Хөвсгөл аймагт 70 хувь,

-Говийн бүс нутаг буюу Дундговь, Өмнөговь аймаг 89 хувь, Говьсүмбэр, Дорноговь аймаг 94 хувь,

-Баруун бүс буюу Ховд, Баянхонгор, Говь-Алтай, Баян-Өлгий аймаг 91 хувь,

-Зүүн бус буюу Хэнтий, Дорнод, Сүхбаатар аймаг 96 хувийн тус тусын гүйцэтгэлтэй байна гэж ЗТХЯ-наас мэдээллээ.