Month: September 2023

Энэ оны эхний зургаан сарын байдлаар нохойд хазуулсан 2,486 тохиолдол бүртгэгдсэнийг Нийгмийн Эрүүл Мэндийн Үндэсний Төв (НЭМҮТ)-өөс мэдээллээ.

Эдгээр иргэний 57.1 хувь нь гудамж, зам талбайд явахдаа нохойд хазуулж, гэмтжээ. Насны ангиллаар харвал

• 0-9 насны хүүхэд 26.2 хувь
• 10-19 насныхан 19.2 хувь нохойд хазуулсан байна.

Нийслэлийн хэмжээнд гол, усны ослоос урьдчилан сэргийлэх чиглэлээр хийсэн ажлын үр дүн болон галлагааны улирал эхэлсэнтэй холбогдуулан гал түймрийн эрсдэл, хохирлыг бууруулах чиглэлээр хэрэгжүүлж буй арга хэмжээний талаар Нийслэлийн Онцгой байдлын газраас мэдээлэл хийлээ.

Тус газраас гол усны ослоос урьдчилан сэргийлэх, эрсдэлийг бууруулах зорилгоор Туул, Тэрэлж, Хэрлэн гол дагуу 13 дахь жилдээ завьт болон хөдөлгөөнт, явган эргүүлийг Нийслэлийн Цагдаагийн удирдах газар, Гэр бүл, хүүхэд, залуучуудын хөгжлийн газартай хамтран зохион байгуулсан.

Өнгөрсөн жил гол усны ослоос урьдчилан сэргийлэх эрсдэлийг бууруулах “Анхаарахад л болно” нөлөөллийн аяныг зохион байгуулсан бол энэ жил “Эрсдэлгүй аялал-Эндэлгүй зун” аяныг зургаадугаар сарын 29-нөөс есдүгээр сарын 15-ны хооронд амжилттай зохион байгууллаа.

Энэ хугацаанд нийслэлийн хэмжээнд гол усны ослын нийт 46 дуудлага бүртгэгдсэн. Голын усанд автомашинтай суусан болон голын салаанд боогдсон 350 том хүн, 120 хүүхэд, нийт 470 иргэний аюулгүй байдлыг хангаж, 32 автомашиныг татаж гаргасан. Голын усанд живж 10 иргэн нас барсан, үүнээс том хүн найм, хүүхэд хоёр байна. Завьт эргүүлээр 36 том хүн, таван хүүхдийг голын усанд осолдохоос авран хамгаалж, голоос дөрвөн цогцос гаргаж цагдаагийн байгууллагад хүлээлгэн өгч ажиллалаа.

“Эрсдэлгүй аялал-Эндэлгүй зун” нөлөөллийн аян, завьт болон хөдөлгөөнт явган эргүүлийн ажлын үр дүнд 2023 онд голын усны ослын дуудлагын тоо өмнөх оны мөн үетэй харьцуулахад 16.3 хувь, голын усанд осолдсон иргэдийн тоо 2.8 дахин буурсан үзүүлэлттэй байна.

Нийслэлийн Онцгой байдлын газрын завьт эргүүл нь 2010 оноос эхлэн тасралтгүй ажиллаж байгаа. Энэ 13 жилийн хугацаанд нийслэлийн хэмжээнд нийт 695 удаагийн дуудлага мэдээллээр ажилласан бөгөөд 406,163 том хүн, 201,898 хүүхэд, нийт 608 мянга гаруй иргэний эрдэнэт амийг гол усны ослоос авран хамгаалж, 314 буцалтгүй нэрвэгдэгчийг цагдаагийн байгууллагад хүлээлгэн өгч ажиллажээ

Нийслэлийн Онцгой байдлын газрын дарга, хурандаа А.Дашням, Улаанбаатар хотод үерийн нөхцөл байдал гурван удаа үүсэж, бид холбогдох байгууллагатай хамтран хохирлыг бууруулах, сэргээн босгох ажиллагааг зохион байгуулсан. Энэ жил голын усны дуудлага багассан нь зохион байгуулсан арга хэмжээ үр дүнтэй байсны илрэл. Мөн “Мандал даатгал” компаниас голын эрэг дагуу камер байршуулсан, түүнчлэн НИТХ-д санал тавьж, 16 байршилд иргэдийн аюулгүй байдлыг хангах дуут камерыг байршуулж байгаа.

Цаашид албан хаагчдыг биетээр явуулах бус, дрон болон цахим цамхгуудаар дамжуулан иргэдийнхээ аюулгүй байдлыг хангах, орчин үеийн дэвшилтэт технологийн ашиглан урьдчилан сэргийлэх ажлуудыг зохион байгуулахаар ажиллаж байна. Хүйтний улирал эхэлж байгаатай холбогдуулан угаарын хийн хордлого болон объектын гал түймрийн эрсдэлээс сэргийлэхээр “Эрсдэлгүй-Улаанбаатар” аяныг хэрэгжүүлж, эрсдэлтэй хороодод алба хаагчдыг ажиллуулна гэлээ.

Нийслэлийн Онцгой байдлын газраас ахуйн гал түймэр, ослоос урьдчилан сэргийлэх, эрсдэлийг бууруулах зорилгоор “Эрсдэлгүй-Улаанбаатар” нөлөөллийн аяныг өнөөдрөөс эхлүүллээ. Өнгөрсөн жил ахуйн гал түймэр, ослоос урьдчилан сэргийлэх эрсдэлийг бууруулах “Мартаж болохгүй”, “Гал ганц хоромд” нөлөөллийн аяныг зохион байгуулсан бол “Эрсдэлгүй-Улаанбаатар” нөлөөллийн аяныг есдүгээр сарын 15-наас аравдугаар сарын 25-ныг дуустал 40 хоногийн хугацаанд зохион байгуулна.

Нийслэлийн хэмжээнд 2023 он гарснаас хойш аюулт үзэгдэл, ахуйн болон техникийн холбогдолтой нийт 1503 удаагийн ослын дуудлага бүртгэгдсэний 1108 буюу 73.7 хувийг ахуйн гал түймэр, 395 буюу 26.3 хувийг эрэн хайх, аврах ажиллагааны дуудлага эзэлж байгаа юм. Дээрх дуудлагыг өнгөрсөн оны мөн үетэй харьцуулахад нийт дуудлага таван хувиар өсөж, ахуйн гал түймэр 14.1 хувиар буурсан байна.

Аяныг Нийслэлийн Онцгой байдлын газар, дүүргийн Онцгой байдлын хэлтэс, Сууц өмчлөгчдийн холбоо, гэр хорооллын хороодын Засаг дарга, зохион байгуулагч, хэсгийн ахлагч нар, “Таван толгой түлш” ХХК-ийн Хэрэглэгчдэд үйлчлэх алба, “Цахилгаан түгээх сүлжээ” ТӨХК хамтран зохион байгуулж байгаа юм.

 НОБГ-аас энэ жил “Эрсдэлгүй аялал-Эндэлгүй зун” аяныг зургаадугаар сарын 29-нөөс энэ сарын 15-ны хооронд зохион байгуулахад Улаанбаатар хотод гол усны ослын 46 дуудлага бүртгэгджээ. Мөн голын усны ослын дуудлагын тоо өмнөх оны мөн үеийнхээс 16.3, усанд осолдсон иргэдийн тоо 2.8 дахин буурсан байна.

Голын усанд автомашинтай суусан, голын салаанд боогдсон 350 хүн, 120 хүүхэд, нийт 470 иргэний аюулгүй байдлыг хангаж, 32 автомашиныг татаж гаргасан байна. Голын усанд живж 10 иргэн нас барснаас 2 хүүхэд бусад нь насанд хүрсэн иргэн байв. Завьт эргүүлээр 36 хүн, таван хүүхдийг голын усанд осолдохоос авран хамгаалж, голоос дөрвөн цогцос гаргаж цагдаагийн байгууллагад хүлээлгэн өгчээ. НОБГ-ын завьт эргүүл 2010 оноос тасралтгүй ажиллаж байгаа. Энэ хугацаанд нийслэлийнд 695 удаагийн дуудлагаар ажиллаж, 406,163 хүн, 201,898 хүүхэд, нийт 608 мянга гаруй иргэний амийг усны ослоос авран хамгаалсан байна.

НОБГ-ын дарга, хурандаа А.Дашням, “Улаанбаатар хотод үерийн нөхцөл байдал 3 удаа үүсэж, холбогдох байгууллагатай хамтран хохирол бууруулах, сэргээн босгох ажиллагааг зохион байгуулсан. Цаашид дрон болон цахим цамхгуудаар дамжуулан иргэдийнхээ аюулгүй байдлыг хангах, орчин үеийн дэвшилтэт технологи ашиглан урьдчилан сэргийлнэ” гэлээ.

АНУ-ын Засгийн газраас АНУ-ын Олон улсын хөгжлийн агентлаг (ОУХА)-аар дамжуулан Монгол Улс дахь иргэдийн оролцоо, мэдээллийн олон нийтэд хүртээмжтэй байдлыг дэмжих зорилгоор Азийн сантай шинэ хамтын ажиллагааг эхлүүлэв. 10 сая ам.долларын (34 тэрбум төгрөг) санхүүжилт бүхий таван жилийн хугацаанд хэрэгжих төсөл нь мэргэжлийн, хараат бус хэвлэл мэдээллийн байгууллагууд, иргэний нийгмийн байгууллагуудын оролцоотойгоор Монголын ардчилсан тогтолцоог улам бэхжүүлж, уян хатан болгоход чиглэгдэх юм.

Энэхүү шинэ төслийг нээх үеэр, АНУ-ын ОУХА-ийн Бүсийн захирал Райан Уашберн сэтгүүлчид болон иргэний нийгмийн байгууллагуудын төлөөлтэй уулзаж, мэдээллийн ил тод байдал, иргэдийн оролцоо, хэвлэл мэдээллийн салбарт тулгарч буй сорилт, боломжуудын талаар яриа өрнүүлэв.

Захирал Уашберн: “Улс орныхоо ардчиллын үйл явцад иргэдийг идэвхтэй татан оролцуулахын тулд тэднийг мэдээллээр ханган ажиллаж байдаг хүмүүстэй биечлэн ярилцаж тэдний хүсэл тэмүүллийн талаар сонслоо” гээд, “сонсох, суралцах, хамтран ажиллах нь ОУХА-ийн хөгжлийн хандлагын гол цөм нь юм” хэмээн хэлсэн байна.

АНУ-ын ОУХА-аас ардчиллын чухал элемент болох иргэдийн орон нутгийн болон төвийн засаг захиргааны нэгжтэй харилцах механизмыг бэхжүүлэхэд Улаанбаатар хотоос илүүтэй хөдөө орон нутагт үйл ажиллагаа явуулж буй төрийн бус байгууллагуудад дэмжлэг үзүүлнэ. Мөн сэтгүүлчид болон хэвлэл мэдээллийн байгууллагуудын чанартай, өргөн цар хүрээтэй, олон нийтэд хүртээмжтэй мэдээ мэдээлэл бэлтгэх, хуурамч мэдээлэлтэй тэмцэх ур чадварыг нэмэгдүүлэх санаачилгыг ОУХА-аас дэмжин ажиллах юм.

“Бидний өнөөдөр эхлүүлж буй шинэ хөтөлбөрөөр АНУ-ын Олон улсын хөгжлийн агентлаг болон Азийн сан орон нутгийн хэвлэл мэдээлэл, иргэний нийгмийн байгууллагуудтай гар нийлэн хамтран ажиллаж, Монголын ардчилсан нийгэмд иргэдийг мэдээллээр хангах, тэдний оролцоог улам бэхжүүлэхэд чиглэсэн хүчин чармайлтыг дэмжих болно” гэж Азийн сангийн Монгол дахь суурин төлөөлөгч Марк Кэйниг хэлэв.

Уг төсөл нь олон жилийн турш иргэдийн оролцоо, ардчилсан засаглалын төлөө гэсэн ОУХА-ийн хүчин чармайлтад тулгуурласан юм. Өмнө хэрэгжүүлсэн хөтөлбөрүүдээр сонгууль зэрэг улс төрийн үйл явцад залуус, эмэгтэйчүүд болон бусад цөөнх бүлгүүдийн дуу хоолойг нэмэгдүүлэх, мөн нийгмийн эерэг өөрчлөлтөд хувь нэмэр оруулж буй ардчиллын төлөөх залуу манлайлагчдад дэмжлэг үзүүлэн ажилласан билээ.

Захирал Уашберн Улаанбаатар хотын гэр хороололд зочлон, АНУ-ын ОУХА-ийн хэрэгжүүлж буй эрчим хүчний хөтөлбөрийн талаар, мөн Хэнтий аймагт ажиллан малчид зудын хүндрэл бэрхшээлийг хэрхэн даван туулсан талаар иргэдтэй ярилцав. Зудын хор уршиг, хүндрэл бэрхшээлийн талаар малчдаас сонсож, ОУХА-ийн тусламж тэдний ажил амьдрал, аж ахуйд хэрхэн үр өгөөжөө өгсөн талаар ярилцав. Үйл ажиллагаагаа өргөжүүлэх зээл авахад нь АНУ-ын ОУХА-аас дэмжлэг үзүүлснээр борлуулалтын орлого 30 хувиар өсгөж, орон нутагтаа гурван шинэ ажлын байр бий болгосон жижиг бизнес эрхлэгчтэй ноён Уашберн Чингис хотод уулзаж танилцлаа.

Ардчилал, зах зээлийн шинэчлэлийн эхэн үед Улаанбаатар хотыг дулаан, эрчим хүчээр хангаж байсан гуравдугаар цахилгаан станцад нэн шаардлагатай байсан засварын ажилд тусламж дэмжлэг үзүүлснээр эхэлж байсан АНУ-ын Олон улсын хөгжлийн агентлаг, Монгол Улс хоорондын түншлэл өдгөө гуч гаруй жилийн турш үргэлжилж байна. АНУ-ын ОУХА нь мөн ардчиллыг хөгжүүлэх, байгалийн гамшигт тэсвэртэй орон нутгийг  бэхжүүлэх, тогтвортой, хүртээмжтэй эдийн засгийн өсөлтийг нэмэгдүүлэх чиглэлээр Монгол Улстай хамтран ажиллаж ирсэн. АНУ-ын Засгийн газраас ОУХА-аараа дамжуулан Монгол Улсад хөгжлийн зорилтоо хэрэгжүүлэхэд нь туслах зорилгоор өнөөг хүртэл 130 гаруй сая ам.долларын (450 тэрбум төгрөг) хөрөнгө оруулалт хийгээд байна.

АНУ-ын ОУХА-ийн ТУХАЙ: ОУХА нь хүний амь насыг аврах, ядуурлыг бууруулах, ардчилсан засаглалыг бэхжүүлэх олон улсын хөгжлийн болон хүмүүнлэгийн хүчин чармайлтыг удирдан чиглүүлэгч байгууллага бөгөөд улс орнуудад тусламж үзүүлэхээс илүүтэйгээр дэвшин хөгжихөд нь туслалцаа үзүүлдэг. Монгол Улсад, АНУ-ын Олон улсын хөгжлийн агентлагаас ил тод, хариуцлагатай засаглалыг дэмжих, зах зээлд илүү тулгуурласан, төрөлжсөн эдийн засгийг дэмжин ажиллаж байна. АНУ-ын ОУХА болон хэрэгжүүлж буй хөтөлбөрүүдийн талаар дэлгэрэнгүй мэдээлэл авахыг хүсвэл https://www.usaid.gov/Mongolia цахим хуудсаар зочилж, Facebook, Twitter хуудсуудаар биднийг дагаарай.

Үндэсний номын баяр 34 дэх удаагаа өнөөдөр/2023.09.15/ эхэллээ. Энэ удаагийн номын баярын үндсэн үйл ажиллагаа Д.Сүхбаатарын талбайд гурван өдөр үргэлжилнэ. Мөн энэ удаагийн номын баяр нь өнгөрсөн жилүүдээс өргөн хүрээнд, арвин онцлогтой болох гэнэ.  Тухайлбал, онцлох зочид, гадаадын олон төлөөлөгчидтэй болохоор хөтөлбөр гарчээ.

 Номын баярыг 240 мянган хүн үзэж сонирхдог аж.

Онцлох зочдын тухайд, 

• Оросын утга зохиол судлаач, шүүмжлэгч Павел Басинский /Зөвлөлийн үеийн сонгодог зохиолчдын зохиол бүтээлд бичсэн шүүмж, нийтлэлээрээ утга зохиол сонирхогчдын анхаарлыг татдаг/
• Халимагийн түүхч Захаров Басан /халимагийн түүх соёл, үндэсний өв соёлд шимтэгч/
• Оросын түүхч, соёл судлаач Анна Эспарса /Дэлхийн хөгжмийн ертөнц дэх Оросын хөгжмийн зохиолч Сергей Рахманиновын баримтат кино, төслийг танилцуулагч/
• Оросын зохиолч, сурган хүмүүжүүлэгч Екатерина Барбаняга /олон улсын “Ясная Поляна” шагналын ажлын хэсгийн гишүүн/
• ОХУ-ын төрийн шагналт Павел Басинский /оросын утга зохиол, түүх ба орчин үе үзэсгэлэн/
• Оросын улс төрийн триллер зохиолч Дмитрий Захаров
• ОХУ-ын түүхч, соёл судлаач Анна Эспарса зэрэг 10 гаруй хүндэт зочид төв талбайд болон бусад заасан байршлуудад уулзалт, хэлэлцүүлэг зохион байгуулж, нээлттэй үзэсгэлэнгүүд гаргах аж.

УИХ-ын чуулганаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төслийн хэлэлцүүлгийг хийн баталсан.  Нийтээр тэмдэглэх баярын болон тэмдэглэлт өдрүүдийн тухай хуулийн 5.1.17-д “Үндэсний бичиг соёл, номын өдрүүд: тав болон есдүгээр сарын гурав  дахь долоо хоногийн Бямба, Ням гариг” гэж тусгасны дагуу энэхүү өдрүүд албан ёсны тэмдэглэлт өдөр болсон юм.