Month: September 2023

Хүн худалдаалах гэмт хэрэгт хүүхэд өртөхөөс урьдчилан сэргийлэх, соён гэгээрүүлэх, олон нийтийн мэдлэг ойлголтыг нэмэгдүүлэх зорилготой “Мэддэг, мэдээлдэг байя” сарын аян өнөөдрөөс эхэллээ.

Монгол Улс болон АНУ хооронд хүүхдийн эсрэг үйлдэгдэж буй хүн худалдаалах гэмт хэрэгтэй (ХХГХ) тэмцэх чиглэлээр хамтарсан тодорхой зорилгод хүрэх амлалтыг баримтжуулан “Хүүхэд хамгааллын түншлэлийн компакт гэрээ”-нд 2020 оны дөрөвдүгээр сард гарын үсэг зурсан юм. Энэ гэрээний хүрээнд “Хүүхэд хамгааллын түншлэлийн компакт: Хүн худалдаалахаас хүүхдийг хамгаалах нь” төслийг Дэлхийн Зөн Монгол болон Азийн Сан ОУ-ын байгууллагууд хамтран хэрэгжүүлж байна. Төслийн зорилго нь ХХГХ мөрдөн шалгах, хянан шийдвэрлэхдээ хохирогч төвтэй арга барилд тулгуурлах, хохирогч хүүхдэд учирсан бие махбод, сэтгэцийн гэмтлийг харгалзан цогц үйлчилгээ үзүүлэх, гэмт этгээдүүдэд зохих ял шийтгэл оногдуулах болон ХХГХ-т хүүхэд өртөхөөс урьдчилан сэргийлэхэд төр, иргэний нийгэм, хувийн хэвшлийн уялдаа холбоо хамтын ажиллагааг сайжруулах, чадавхыг бэхжүүлэхэд оршино.

Энэ гэрээний хүрээнд хүн худалдаалах гэмт хэрэгт хүүхэд өртөхөөс урьдчилан сэргийлэх “Мэддэг мэдээлдэг байя” аяныг АНУ-ын Төрийн департаментын санхүүжилтээр ХЗДХЯ, ХНХЯ, Дэлхийн зөн Монгол олон улсын байгууллага, Азийн сан, “Монгол Контент” ХХК хамтран хэрэгжүүлж байна.

Аяны нээлт нийслэлийн Сонгинохайрхан дүүргийн ЕБС-ын 65 дугаар сургуулин гадна талбайд болов. Нээлтэд Гэмт хэргээс урьдчилан сэргийлэх ажлыг зохицуулах зөвлөлийн ажлын албаны дарга Л.Нямгэрэл, АНУ-ын Элчин сайдын Яамны дэд тэргүүн Мэтю Фэрэнс, Дэлхийн Зөн Монгол ОУ-ын байгууллагын Хүүхэд хамгаалал Компакт төслийн захирал Б.Дарьханд нар болон бусад төрийн болон төрийн бус байгууллагуудын албаны хүмүүс болон багш, сурагч, эцэг эхийн төлөөлөл оролцлоо.

Хүн худалдаалах гэмт хэрэг аль ч улсад үйлдэгдэх боломжтой бөгөөд Монгол Улс илгээгч, дамжуулагч, хүлээн авагч орон гэдгээр олон улсын тайлан, илтгэлд дурдагдаж байна. Уг гэмт хэргийн дийлэнх тохиолдол бэлгийн мөлжлөг болон албадан хөдөлмөр эрхлүүлэх, хөдөлмөрийн мөлжлөгийн хэлбэрээр үйлдэгддэг ба хүүхэд, эрчүүд ч өртдөг.

Монгол Улсын хувьд хүн худалдаалах гэмт хэргээр сүүлийн 3 жилийн хугацаанд 49 хүүхэд хохирогчоор илэрч бүртгэгдсэн байна.

Энэ гэмт хэрэгт ихэвчлэн эмэгтэйчүүд өртдөг ба 10 хохирогч тутмын тав нь насанд хүрсэн эмэгтэй, хоёр нь охид байгаа бол нийт хохирогчдын гуравны нэг буюу 34 хувь нь хүүхэд байна гэж ХХГХ-ийн дэлхийн төлөв байдлын тайлан 2020-д дурджээ.

Иймд эрсдэлтэй тохиолдлыг мэдээлдэг, эрсдэл өндөр хүүхэд, хохирогчийг илрүүлэх, тэднийг үйлчилгээ үзүүлэгч байгууллагад хандуулах, хамгаалах хандлагыг түгээн дэлгэрүүлэх зорилгоор “Мэддэг, мэдээлдэг байя” аяныг эхлүүлж, хүүхдүүд, эцэг эх асран хамгаалагч нарт контентоор дамжуулан мэдээллийг хүргэх юм.

Монголын үндэсний олимпын хороо болон Дундговь аймгийн Засаг даргын тамгын газраас хамтран гадаа талбайд эрүүл агаарт хичээллэх боломжтой спортын төрлүүдийг сурталчлах, олимпизмын үзэл санааг түгээн дэлгэрүүлэх зорилгоор 2023 оны 9 дүгээр сарын 16,17-ны өдрүүдэд Мандалговь хотноо Монголын элсний анхдугаар наадмыг зохион байгуулахаар бэлтгэл ажлаа хангаад байна.

Түүхэндээ анх удаагаа болох уг элсний наадамд Дундговь, Өвөрхангай, Увс, Архангай аймаг, МУБИС, ШУТИС, ҮБТДС, Алдар спорт хороо, Хилчин спорт хороо, Хангай бөхийн клуб, Анхдагч клуб, Дэрэн клуб, Цаст тайга клуб, SRP клубийн нийт 130 гаруй тамирчид бадминтон, волейбол, бөх, текбол, нийт 4 спортын төрлөөр ур чадвараа сорих юм.

МҮОХ-ноос олон нийтэд спорт, олимпизм, эрүүл идэвхтэй амьдралын хэв маяг, хүрээлэн буй орчиндоо ээлтэй байх үзэл баримтлалыг сурталчлах үйл ажиллагааны хүрээнд цаашид уг элсний наадмыг илүү өргөн хүрээтэйгээр тогтмол зохион байгуулахыг зорин ажиллах болно.

Монгол Улсын шүүхийн тухай хуулийн 20 дугаар зүйлийн 20.1-д бүх шатны шүүхийн нийт шүүгчээс бүрдсэн нийт шүүгчийн чуулганыг хоёр жил тутам зохион байгуулахаар заасны дагуу ээлжит хоёрдугаар чуулганыг есдүгээр сарын 28-29-ний өдөр хуралдуулахаар болжээ.

Нийт шүүгчийн чуулган нь тус хуулийн 20 дугаар зүйлийн 20.2-т зааснаар Ерөнхий зөвлөл, Сахилгын хорооны шүүгч гишүүнийг сонгох, огцруулах, тэдгээрийн үйл ажиллагааны тайланг сонсох, хууль тогтоомжийг боловсронгуй болгох саналыг Улсын дээд шүүхэд уламжлах, хэрэг, нэхэмжлэл, гомдол, хүсэлт хүлээн авах, хуваарилах болон хэрэг, маргааныг хянан шийдвэрлэх шүүгч, шүүх бүрэлдэхүүнийг сугалаагаар томилох нийтлэг журмыг батлах, шүүхийн үйл ажиллагаатай холбоотой бусад асуудлыг авч хэлэлцдэг бөгөөд тодорхой хэрэг маргаантай холбоотой асуудлыг хэлэлцдэггүй.

Ээлжит хоёрдугаар чуулганаар Ерөнхий зөвлөл, Сахилгын хорооны тайланг сонсож, “Хэрэг, нэхэмжлэл, гомдол, хүсэлт хүлээн авах, хуваарилах болон хэрэг маргааныг хянан шийдвэрлэх шүүгч, шүүх бүрэлдэхүүнийг сугалаагаар томилох нийтлэг журам”-д нэмэлт өөрчлөлт оруулж, шүүхийн үйл ажиллагаатай холбоотой зарим асуудлаар зөвлөмж гаргах юм байна.

БХБЯ-ны Салбарын хяналтын газраас төлөвлөгөөт бус хяналт шалгалтыг явуулж байна. Энэ хүрээнд Нийслэлийн Чингэлтэй, Сүхбаатар дүүргийн нутаг дэвсгэр дээрх одоо ашиглагдаж байгаа 40, 50 мянгатын нийт 64 барилгын судалгааг гаргаад байгаа аж. 

Тус барилгуудын ашиглалтын төлөв байдалд Төрийн хяналт шалгалтын тухай, Газрын тухай, Хот байгуулалтын тухай, Барилгын тухай хууль болон бусад холбогдох хуулиудад заасан норм, стандартын дагуу үнэлэлт дүгнэлт гаргах, мэргэжлийн заавар зөвлөмжөөр хангаж, эрсдэлээс урьдчилан сэргийлэх зорилгоор ийнхүү хяналт шалгалтыг явуулж байгаа юм байна.

Шалгалтыг 2023.08.29-ний өдрөөс эхлүүлсэн бөгөөд өдрийн байдлаар 18 барилгын 76 өргөтгөлийн барилгад 94 иргэн, хуулийн этгээдэд хяналт шалгалт хийж, холбогдох баримт бичиг шалгуулах тухай мэдэгдэх хуудас хүргүүлжээ.

Шалгалтаар үндсэн хийц бүтээцийг өөрчилсөн, 2 өрөө болон 3 өрөө байрыг нийлүүлж, өрөө тусгаарласан ханыг буулгаж, заал хэлбэртэй болгосон, газрын болон барилгын зөвшөөрөлгүй өргөтгөл барьсан зэрэг нийтлэг зөрчил дутагдлууд илэрчээ. Хяналт шалгалтын үйл ажиллагаа үргэлжлэн явагдаж байгаа аж.