Month: August 2023

Хичээлийн шинэ жил эхлэхтэй холбогдуулан Тээврийн Цагдаагийн Алба (ТЦА), Цагдаагийн Ерөнхий Газар (ЦЕГ)-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсээс зам тээврийн осол хэргээс урьдчилан сэргийлэх чиглэлээр мэдээлэл хийлээ.

ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн ахлах мэргэжилтэн, цагдаагийн дэд хурандаа Г.Золжаргал “Сургууль, цэцэрлэгийн үйл ажиллагаа эхэлж буйтай холбогдуулан энэ жил цагдаагийн байгууллагаас “Хичээл эхэллээ” арга хэмжээг зохион байгуулж байна. Уг арга хэмжээний гол зорилго нь хүүхдийг гэмт хэрэг, зөрчлөөс урьдчилан сэргийлэх, эцэг эхчүүдийн үүрэг оролцоог нэмэгдүүлэх, төрийн болон төрийн бус байгууллагуудын хамтын ажиллагааг өргөжүүлэх зорилготой.

Зам тээврийн хөгжлийн яамнаас тээврийн хэрэгслийн шинэчилсэн тооллого хийсэн талаар мэдээлэл хийлээ.

“Монгол Улсын хэмжээнд тээврийн хэрэгслийн шинэчилсэн тооллого хийлээ. Тээврийн хэрэгслийн бүртгэлийн санд өнөөдрийн байдлаар 1 сая 79 мянган тээврийн хэрэгсэл бүртгэлтэй байна. Үүний 70 орчим хувь нь суудлын машин, 18.5 хувь нь ачааны машин, бусад хувийг нь автобус зэрэг машин эзэлж байна. Нийт тээврийн хэрэгслийн 78.3 хувь нь 10-аас дээш жилийн насжилттай байгаа бол 11.3 хувь нь долоогоос дээш жилийн насжилттай байна.

Монгол Улсын албан татварын тухай хуулийн хэрэгжилтийг хангах, авто тээврийн хэрэгслээс ялгарах бохирдлыг бууруулах тухай хуулийг хэрэгжүүлэх зорилгоор тээврийн хэрэгслийн шинэчилсэн бүртгэлийг хийлээ. Шинэчилсэн бүртгэлд нийт 1540 орчим алба хаагч ажилласан. Улмаар бүртгэлтэй автомашинаас 204 мянгыг нь хассан. Учир нь тэдгээр автомашин сүүлийн 4 жил техникийн хяналтын үзлэгт ороогүй, 5-аас дээш жил татвар даатгалаа төлөөгүй байсан. Түүнчлэн зарим иргэн хүсэлтээрээ хасалт хийлгэсэн. Ингэснээр 12 орчим тэрбум төгрөгийн татварын өр үүсдэг асуудлыг цэгцэлсэн” хэмээн мэдээллээ.

Нийслэлийн Сонгинохайрхан дүүргийн 32 дугаар хороо Эмээлт, 22-ын Товчоо, Баруун туруун орчмын хэрэглэгчдийн цахилгаан хангамжийн найдвартай байдлыг дээшлүүлэх зорилгоор одоо ашиглагдаж буй 35 кВ-ын “Эмээлт” цахилгаан дамжуулах агаарын шугамыг өргөтгөж, шинэчлэх ажил есдүгээр сарын 5-11-ний өдрүүдэд хийгдэх гэж байна.

Эрчим хүчний сайдын 2023 оны худалдан авах ажиллагааны төлөвлөгөөнд тусгагдсан АНУ-ын Мянганы сорилтын сангийн тусламжийн хөрөнгөөр “Улаанбаатар хотын ус хангамжийг нэмэгдүүлэх төсөл”-өөр хэрэгжих энэхүү ажлын хүрээнд 35 кВ-ын 2 хэлхээт 10.6 км урттай цахилгаан дамжуулах агаарын шугамыг шинээр барих, 8.7 км урттай 35 кВ-ын “Эмээлт” цахилгаан дамжуулах агаарын шугамын өргөтгөл, шинэчлэлийн барилга угсралтын ажлууд тус тус хийгдэх юм.

Дээрх ажлыг тухайн байршил дахь аж ахуйн нэгж хэрэглэгчдийн цахилгаан хангамжийг 7 хоногийн хугацаанд 24 цагийн турш хүчдэлээс бүрэн тасалж гүйцэтгэх тул эдгээр аж ахуйн нэгжүүд зайлшгүй шаардлагатай цахилгаан эрчим хүчний хэрэглээгээ бусад нөөц эх үүсгэврээр шийдвэрлэх шаардлагатай. Мөн өөрсдийн эзэмшлийн шугам, дэд станц, тоноглолд хийгдэх ёстой засвар үйлчилгээг эрх бүхий компаниудаар гүйцэтгүүлэн аюулгүй, найдвартай байдлаа хангахыг зөвлөж байна.

Нийслэлийн Баянгол дүүргийн 5 дугаар хороо III эмнэлгийн автобусны буудал дээр үйл ажиллагаа явуулдаг ТҮЦ-ийн худалдагчийг үл таних 4 этгээд зодож, бэлэн мөнгө, бусад эд зүйлийг дээрэмдсэн хэрэг энэ сарын 28-29-нд шилжих шөнө гарчээ.

Хэргийг 15-23 насны нэр бүхий 4 этгээд үйлдсэн болохыг Нийслэлийн Цагдаагийн Удирдах газрын Мөрдөн шалгах газрын Хүнд гэмт хэрэгтэй тэмцэх хэлтсийн ЭЦТ, Баянгол дүүргийн цагдаагийн газрын хоёрдугаар хэлтсийн ЭЦТ-ийн алба хаагчид хамтран шуурхай эрэн сурвалжлан тогтоожээ. Улмаар Баянгол дүүргийн 10 дугаар хорооны нутаг дэвсгэрээс дайчлан баривчилсан байна.

Дээрх этгээдүүд урьдчилсан байдлаар Баянгол дүүргийн нутаг дэвсгэрт шөнө оройн цагаар ганцаараа явж буй иргэдийг зодож, айлган сүрдүүлж эд зүйлийг дээрэмдсэн хоёр үйлдлийг тогтоов.

Иймд иргэд та бүхэн хувийн аюулгүй байдалдаа анхаарч гэрэлтүүлэггүй гудамж, талбай, газраар шөнө оройн цагаар ганц нэгээрээ зорчихгүй байх, архи согтууруулах ундааны зүйл хэтрүүлэн хэрэглэхгүй байх зэргээр болзошгүй аюулаас урьдчилан сэргийлэхийг цагдаагийн байгууллагаас сэрэмжлүүлж байна.

Эх сурвалж: ЦЕГ