Month: February 2023

Categories
мэдээ цаг-үе

БНХАУ руу зорчих, оршин суух иргэдийн анхааралд DNN.mn

БНХАУ-ын хилийн боомтын зорчигч тээврийн хөдөлгөөн сэргэснээр Монгол Улсаас тус улс руу зорчих иргэдийн хөдөлгөөн нэмэгдэж байгаатай холбогдуулан дараах болзошгүй эрсдэлүүдээс урьдчилан сэргийлэхийг Консулын газраас сэрэмжлүүлж байна. Үүнд:

Нэг. БНХАУ руу зорчиход анхаарах зүйлс:

  • Хар тамхи, мансууруулах бодис, сэтгэцэд нөлөөлөх эм, бэлдмэл, галт зэвсэг, сум, ан амьтны түүхий эд, түүх, дурсгал, соёлын үнэт зүйлс зэргийг БНХАУ-ын хилээр нэвтрүүлэхийг хориглодог бөгөөд энэ төрлийн гэмт хэрэгт оногдуулах ялын хэмжээ өндөр байдаг. Иймд, бусдын эд зүйлсийг авахгүй байх, өөрсдийн гар цүнх, ачаа тээшийн бүрэн бүтэн байдлыг нягталж, сайтар шалгах,
  • Хил, гаалийн мэдүүлгийн хуудсыг урьдчилан үнэн, зөв бөглөх. Ачаа тээшээ алдаж гээгдүүлэхээс урьдчилан сэргийлж, ачаа тээшиндээ нэр, утсаа тодорхой бичих, таних тэмдэг тавих,
  • Согтууруулах төрлийн бүх ундаа, тамхи, хүнсний бүтээгдэхүүн зэрэг тодорхой хязгаарлалттай нэвтрүүлдэг бараа, бүтээгдэхүүн, эд зүйлсийг зөвшөөрөгдсөн тоо, хэмжээнээс хэтрүүлэхгүй байх,
  • 5,000 ам.доллар болон 20,000 юаньтай тэнцэх хэмжээний бэлэн мөнгө эсхүл үүнтэй тэнцэх хэмжээний үнэт цаас (personal or cashier’s check, traveler’s checks, money orders, stocks, bonds) биедээ авч яваа тохиолдолд гаалийн мэдүүлэгт заавал мэдүүлэх.

Хоёр. БНХАУ-д оршин суух хугацаанд анхаарах зүйлс:

  • Суугаа улсын хууль, журмыг даган мөрдөж, гэмт хэрэг, зөрчилд холбогдохооc урьдчилан сэргийлж, улс, бүс нутгийн соёл, ёс заншилд хүндэтгэлтэй хандах. Өндөр хатуулгатай архи, согтууруулах ундаа хэтрүүлэн хэрэглэхээс болгоомжлох,
  • Гадаад паспорт болон суугаа улсын виз, оршин суух зөвшөөрлийн хүчинтэй хугацааг шалгах, аливаа шаардлагатай баримт бичгийг хугацаа дуусахаас өмнө сунгуулах, шинээр захиалах. Бусдад дамжуулж ашиглуулахгүй байх. Шаардлагатай үед ашиглах зориулалтаар өөрсдийн баримт бичгүүдийг хуулбарлан авч хадгалах,
  • Утасны дугаар болон оршин суугаа хаягаа ар гэртээ мэдэгдэж, байнгын холбоотой байх. Өөрчлөлт орох, удаан хугацаагаар оршин суугаа газраасаа явах тохиолдолд ар гэртээ заавал мэдэгдэх,
  • Үл таних хүмүүстэй танилцах, олон нийтийн сүлжээгээр харилцахдаа анхаарал болгоомжтой байх. Цахим худалдаа, арилжаа наймаа хийхдээ баталгаат эх үүсвэрээс мэдээлэл, зөвлөгөө авах зэрэг болно.

Консулын асуудлаар Монгол Улсаас БНХАУ-д суугаа ДТГ-уудтай дараах шуурхай утас болон цахим шуудангаар холбогдох боломжтой.

  • Бээжинд суугаа ЭСЯ: +861065321203, +8617600787323 beijing@mfa.gov.mn,
  • Хөххотод суугаа ЕКГ: +8617678002262 huhhot@mfa.gov.mn,
  • Шанхайд суугаа ЕКГ: +8613122656261 shanghai@mfa.gov.mn,
  • Манжуурт суугаа КГ: +8615734851884, +8615648081299 manjuur@mfa.gov.mn,
  • Эрээнд суугаа КГ: +8615647964334 ereen@mfa.gov.mn
Categories
мэдээ нийгэм онцлох-нийтлэл туслах-ангилал

Бусдад зодуулж амиа алдсан охины ангийн багш Баасансүрэн: Талийгаач сэргэлэн цовоо хүүхэд байсан DNN.mn

Ховд аймагт нэгдүгээр сарын 28-ны өдөр 15 настай охин нас барсан хэрэг гарсан. Энэ талаар сурвалжиллаа. Эхлээд бид Ховд аймаг дахь цагдаагийн хэлтсийн хэвлэл мэдээллийн ажилтан ахмад Батсайхантай холбогдсон юм. Тэрбээр “Бид ямар нэгэн мэдээлэл өгөх боломжгүй. ЦЕГ-ын хэвлэл мэдээллийн албанаас тодруулна уу” гэв. Ингээд ЦЕГ-ын хэвлэл мэдээллийн төвийн дарга, цагдаагийн хошууч Г.Мөнхбаяраас тодруулахад “Нэгдүгээр сарын 29-ний өдөр Ховд аймаг дахь бүсийн оношилгоо эмчилгээний төвөөс толгойдоо оёдол тавиулсан шархтай 15 настай эмэгтэй хүүхэд нас барлаа гэсэн дуудлага мэдээлэл бүртгэгдсэн. Тус хэрэгтэй холбоотой хэрэг бүртгэлт нээгдсэн. Ховд.мн сайтаар олон эх сурвалжтай мэдээллүүд явж байна. Түүн дотор талийгаач охины үеэл найзаас цагдаа нар мэдүүлэг авахдаа ёс бус үг хэрэглэх, согтуу байсан гэх зэрэг мэдээлэл байсан. ЦЕГ-аас ажлын хэсэг гаргаад тус мэдээлэл үнэн үү, цагдаагийн албан хаагчтай холбоотой ямар нэгэн асуудал гарсан уу гэдгийг олж тогтооно. Үнэхээр тухайн цагдаагийн ажилтан хариуцлага алдсан бол дараагийн шатны арга хэмжээг авна. Үүнээс өөр мэдээлэл өгөх боломжгүй” гэв.

Ховд аймгийн ерөнхий боловсролын Хоёрдугаар сургууль руу мэдээлэл авахаар холбогдоход “Тухайн үед сурагчид амарч байсан. Тэр хэргийг харсан гэрч манай сургууль хавиар байсан эсэхийг мэдэхгүй. Амиа алдсан хүүхэд манай сургуульд сурдаггүй Зургадугаар сургуулийн сурагч байх. Тэр хэрэг манай сургуулийн орчимд үйлдэгдсэн гэсэн. Харин манай сургуулийн сурагч биш” гэлээ. Энэ мэдээллийн дагуу Зургадугаар сургууль руу холбогдоход “Манайд бага ангиа төгсөөд Хоёрдугаар сургууль руу шилжсэн хүүхэд байна лээ. Мэдэхгүй байна” гэсэн юм. Ингээд Ховд аймаг дахь бүсийн оношилгоо эмчилгээний төвийн чанарын албаны дарга Оюунцэцэгтэй холбогдоход “Хууль, цагдаагийн байгууллагаар шалгагдаж байгаа хэрэгт ямар нэгэн мэдээлэл өгөх боломжгүй” гэв. Харин Эмчилгээ эрхэлсэн орлогч дарга Баясгалмаа “Ховд.мн сайтад мэдээлэл өгсөн. Түүнээс дэлгэрэнгүйгээр өгөх боломжгүй” гэлээ. Ингээд охины сурч байсан Насан туршийн боловсролын төвийн захирал Бат-Эрдэнэтэй холбогдов. Тэрбээр “Тухайн хүүхэд манай сургуульд шилжиж ирээд удаагүй байсан. Хэргийн талаар надад нарийн мэдээлэл байхгүй. Цагдаагийн байгууллагаас шалгагдаж байгаа хэргийн талаар мэдээлэл өгөхгүй байхыг сануулсан. Тиймээс хүүхдийн зан төлвийн талаар ангийнх нь багшаас асуу” гэлээ. Ангийн багш Баасансүрэн ярихдаа “Талийгаач охин шилжиж ирээд удаагүй ч ангийнхандаа хурдан дассан. Сэргэлэн цовоо хүүхэд. Эрсдэлт бүлгийн хүүхдийн тоонд ордог учраас манай төвд сурч байсан. Амь насаа алдахаас өмнө ямар нэгэн байдлаар дээрэлхүүлсэн тухай хэлж байгаагүй. Хэргийн талаар мэдэхгүй учраас ярих боломжгүй байна. Яг үеийнхэндээ дээрэлхүүлсэн үү, яагаад ийм явдал болов гэдгийг цагдаагийн байгууллага тогтоох байх” гэсэн мэдээллийг өглөө.

Охины амьдардаг байсан хороонд Хүүхэд хамгааллын багт ажиллаж байсан иргэнтэй ярилцлаа. Тэрбээр нэрээ нууцлахыг хүсэв.

-Та охинтой хамгийн сүүлд хэзээ уулзсан бэ. Хэр сайн мэдэх вэ?

-Талийгаач охины амьдардаг хороонд би хэдэн жилийн өмнө ажлын хэсгийн хамтарсан багт ажилладаг байсан юм. Тэр хүрээндээ хэдэн жилийн өмнөх мэдээллийг өгч чадна, сүүлийн үеийн мэдээллийг мэдэхгүй юм. Хүүхэд хамгааллын багт ажиллаж байхдаа хамгийн сүүлд жил гаруйн өмнө уулзаж байсан.

-Хүүхэд хамгааллын багт ажиллаж байхдаа байнга тэднийхээр очдог байсан уу. Ар гэр нь ямархуу айл вэ?

-Манай хорооны эрсдэлт бүлгийн айлуудын тоонд багтдаг байсан. Тиймээс аав, ээж хоёр нь охиныг сургуулиас нь гаргаад дүү нарыг нь харуулдаг байсан. Аав нь төрсөн аав нь биш хойд эцэг нь. Тухайн үед нэг дүү нь нялх. Аав нь ажил хийдэг учраас дүү нарыг нь харах хүнгүй гээд сургуульд нь явуулахгүй, зөндөө удчихсан байсан. Сургуулиас нь манай баг руу сургуульдаа явахгүй байна гэж нийгмийн ажилтан нь ярьдаг байсан. Сургууль, багаас төлөөлөл гаргаад бид гэр орноор нь очиж уулзаж, тухайн үедээ хүүхдийн байгууллагаар дамжуулан эрсдэлт бүлгийн хүүхэд гэдгийг мэдсэн. Би энэ багийнхаа ажлыг өгөөд жил гаруй болж байгаа болохоор сүүлд юу болсныг мэдэхгүй байна.

-Талийгаач охин айлын том хүүхэд байсан уу. Хэдэн дүүтэй юм бол?

-Тэр охин маань ээжийгээ дагаж ирсэн дагавар хүүхэд байсан. Миний мэдэхийн хоёр дүү байсан. Тухайн үед ээж нь төрөөд удаагүй нялх биетэй. Нөгөө дүү нь ой гарантай байсан санагдаж байна. Тэгээд сургуулиас нь гаргачихсан. Сүүлдээ тэр хүүхэд гэртээ байхаа болиод нагац эгчийндээ байдаг байсан. Тэр эгч нь бас тухайн үед жаахан архины хамааралтай хүн байсан. Эгчийнх нь сургийг сонсоход энэ жил нас барсан гэж дуулдсан.

-Таныг ажиллаж байх үед тухайн хүүхэдтэй холбоотой өөр мэдээлэл гарч байв уу?

-Коронагийн хөл хорионы үеэр Ховд аймгийн Хүүхэд хамгаалах байранд нэг хэсэг байлгасан. Тухайн үедээ охин гэртээ байх аргагүй, хамгаалах байранд байлгахаас өөр аргагүй болчихоод хамгаалах байранд оруулах гэтэл заавал коронагийн шинжилгээ өгөөд, эерэг гарч байж оруулна гээд аваагүй. Тэгээд бид нэг буудалд мөнгө төгрөгийг нь өөрсдөөсөө төлж байлгасан. Тэгж байтал шинжилгээ нь эерэг гараад хамгаалах байранд оруулж байсан.


Categories
мэдээ нийгэм онцлох-нийтлэл туслах-ангилал

Хөгжлийн банкны удирдлагад байсан Г.Дөлгөөн Монголбанкны Тэргүүн дэд ерөнхийлөгчөөр дэвшин ажиллаж байгаа нь зөв үү? DNN.mn

УИХ-ын гишүүн асан Н.Ганбямбын хүү Г.Дөлгөөний намтарт Хөгжлийн банкны Э рсдэлийн удирдлагын захирлаар ажиллаж байсан гэх өгүүлбэр бий. Хөгжлийн банк тойрсон асуудлууд өндрөө авч, энэ банктай холбоотой улстөрч, бизнес эрхлэгчид бужигнаж, авсан зээлээ чанаргүйдүүлэгчид байцаагдсан өдрүүд үргэлжилж байна. Нөлөө бүхий улстөрчдийн ойрын хүмүүст зээл өгсөн хэргээр энэ банкны удирдлагуудаас шоронд хоригдсон нь ч бий. Г.Дөлгөөнийг гэхэд өнгөрсөн жил АТГ-аас яллагдагчаар татаж байсан удаатай.

Гэтэл МАН-ын хуучцуулын нэг Н.Ганбямбын хүү өнөөдөр төв банкны Т эргүүн дэд ерөнхийлөгч хийчихсэн данайж сууна. Хөгжлийн банкны удирдлагаар ажиллаж байсан тэрбээр чанаргүй зээлүүдийн шийдвэрт гар бие оролцсон байж таарна. Тэгээд бүр Эрсдэлийн удирдлагын захирал гэхээр чанаргүй зээлийн гол буруутнуудын нэг баймаар. Төрийн хулгайчидтай дайн зарлана гээд сэлэм эргүүлж байгаа Ерөнхий сайд Л.Оюун-Эрдэнэ ийм хүнийг тийм өндөр суудалд томилсон нь яалт ч үгүй гайхширал төрүүлээд байна. Эсвэл энэ хачин томилгоо танай намын бодлого юм уу, Ерөнхий сайд аа.
Гүйцэтгэх засаглалын тэргүүн саяхан төрийн өндөр албан тушаал хашдаг, хашиж байсан хүмүүсийн хүүхдүүд дандаа дарга хийгээд явах юм гэсэн утгатай шүүмжлэл хэлж байсан нь тод санагдаж байна. Төрийн өндөр албан тушаал хашиж явсан, хашиж байгаа улстөрчдийн хүүхдүүдийг удам дамжуулж эрх мэдэл бүхий суудалд залруулахгүй, тэгж даврахыг нь хориглосон хууль оруулж ир гэсэн үүрэг өгснийг нь олон хүн олзуурхаж хүлээж авсан. Тэр хуулийн төсөл нь боловсруулах шатандаа яваа байх. Төрд дарга хийж явсан хүмүүсийн хүүхдүүд өндөр албан тушаал хашиж байгаа жишээ Н.Ганбямбын хүүхдээр тогтохгүй. Ц.Нямдоржийн Н .Анхбаяр гэх мэтээр жагсаавал өчнөөн нэрс гарч ирнэ.
Төрийн өндөр албан тушаал хашиж явсан хүмүүсийн хүүхдүүд төрийн том дарга болох ёстой гэсэн намынхаа бичигдээгүй хуулийг сөрж чадахгүй яваа бол тэрийгээ ил тод мэдэгдчихсэн нь шулуухан санагдах юм. Ерөнхий сайд үнэхээр өөрийнхөө өгсөн үүрэгт үнэнч яваа бол ядаж л Г.Дөлгөөнийг өндөр суудлаас нь буулгах хэрэгтэй. “Хөгжлийн банкны Э рсдэлийн удирдлагын захирлаар ажиллаж байсан хүн ийм албан тушаал хашиж болохгүй” гэсэн тайлбар хийвэл Л.Оюун-Эрдэнэ олон түмэнд хэлсэн ярьснаараа ажиллаж байгаа Ерөнхий сайд гэж харагдана.
Эцэст нь нэг зүйл хэлэхэд Монголын төр, Монгол Улс, Монголын ард түмэн том дарга нарын хүүхдүүдэд ямар ч өргүй билээ.
М.МӨНХ
Categories
мэдээ нийгэм онцлох-нийтлэл туслах-ангилал

С.Чинзориг: Дөрөвдүгээр эмнэлгийг төр худалдаж авбал хавдрыг эмчлэхэд хугацаа хожно DNN.mn

Эрүүл мэндийн сайд С.Чинзоригтой ярилцлаа.

-Манай улсад хавдрын өвчлөл замаа алдлаа. Хавдрын эмнэлэг ч ачааллаа дийлэхээ болиод удаж байна. Та өнгөрсөн долоо хоногт Хавдар судлалын үндэсний төв(ХСҮТ)-ийн нөхцөл байдалтай танилцах үеэрээ тус эмнэлгийг шинэ байртай болгох асуудлыг Засгийн газарт оруулна гэж байсан. Хамгийн ойрын хугацаанд биелэх боломжтой ямар хувилбар байна вэ?

-Ер нь хавдрын эмнэлгийг шинээр барих, өргөтгөх асуудал олон жил яригдаж байгаа. Шийдэл нь хүлээгдсээр л байна. Сүүлийн жилүүдэд хавдрын өвчлөл эрчимтэй нэмэгдсэн. Маш ноцтой нь, Монгол Улс хавдрын өвчлөлийн нас баралтаар дэлхийд тэргүүлдэг боллоо. Ийм цаг үед бид хавдрын эмнэлгийн асуудлыг яаралтай шийдэх ёстой. Хавдрын өвчлөл ихэссэнтэй холбоотойгоор ХСҮТ-ийн ачаалал маш хүнд байдалтай байна.

Миний хувьд Эрүүл мэндийн сайдын ажлыг авамагцаа энэ салбарт тулгамдаж байгаа асуудлууд тэр дундаа хавдрын эмнэлгийн барилгыг шийдэх нь зүйтэй гэсэн байр суурийг илэрхийлсэн. Ерөнхий сайд энэ саналыг дэмжсэн бөгөөд судалж ажиллах чиглэл өгсөн. Ингэхдээ нэгдүгээрт, УИХ-ын гишүүн асан М.Билэгтийн Хөгжлийн банкны зээлээр барьсан хоёр блок барилгыг төр худалдан авч хавдрын эмнэлгээр авч ашиглах боломж байна уу.

Хоёрдугаарт, Сангийн сайд бид хоёрыг гадаадын зээл тусламжийн хүрээнд хавдрын эмнэлгийн шинэ барилгын асуудлыг шийдэх боломжуудыг судалж, танилцуулах чиглэл өгсөн л дөө. Энэ дагуу миний бие өнгөрсөн долоо хоногт ХСҮТ-д очиж, нөхцөл байдалтай танилцсан.

Хавдар цаг хугацаа хүлээхгүй. Өдрөөс өдөрт эмнэлгийн ачаалал нэмэгдэж байгаа энэ үед цаг хожихын тулд дээрх хоёр шийдлээс хамгийн ойрын хугацаанд биелэх боломжит хувилбарыг сонгох нь зөв. Шинэ эмнэлэг барья гэвэл багадаа 3-4 жилийн ажил болно. Тиймээс ХСҮТ-ийн хашаанд баригдсан Дөрөвдүгээр эмнэлгийг шинээр баригдаж буй өргөтгөлийнх нь хамт худалдаж авах хувилбарыг судалсан. Хөгжлийн банкны өрөнд байгаа уг хоёр барилгыг хавдрын эмнэлгийн зориулалтаар ашиглах бүрэн боломжтой гэж үзвэл улсын төсөвт дарамт болохооргүй хэлбэрээр худалдан авбал хугацаа хожиж чадна.

-Хэрэв гишүүн асан М.Билэгт зөвшөөрвөл шүү дээ…

-Тэр мэдээжийн асуудал. Дөрөвдүгээр эмнэлгийн барилгыг бариулсан М.Билэгт маань өөрөө Засгийн газарт худалдахыг зөвшөөрөх юм бол хууль журмын дагуу асуудал шийдэгдэнэ. Дөрөвдүгээр эмнэлгийн барилга Хөгжлийн банкны барьцаанд байгаагаас гадна АТГ-т шалгагдаж байгаа. Тэгэхээр тэндээс шинжээч томилоод барилгын үнэ өртгийг нь тогтсон байх. Дөрөвдүгээр эмнэлгийг төр худалдаж авбал 5-6 жилийн хугацаатай график гаргаад Хөгжлийн банкинд төсвөөс өр авлагыг нь барагдуулаад явах боломж бий. Гэхдээ энэ бол шүүхийн шатанд байгаа учраас бас шууд оролцоод авч болох эсэх дээр асуудал гарах байх. Барилгыг худалдаж авахдаа тулбал Хөгжлийн банкныхантай ярилцаж, ойлголтоо нэгтгэх асуудлууд байна. Нөгөөтэйгүүр энэ барилгыг бариулсан хүн нь хувийн хэвшлийнхэнтэй эмнэлгийн чиглэлээр ашиглана гээд гэрээ байгуулаад үйл ажиллагаа явуулж байгаа юм байна. Иймд гэрээг нь цуцлах боломж бидэнд олдох уу, түрээслэгч, түрээслүүлэгч хоёр учраа яаж олох нь уу гээд жаахан ярвигтай зүйл байгаа. Энэ бүгдийг хууль номынх нь дагуу зөв шийдээд гарц гаргалгааг нь олчих юм бол төсөвт өндөр ачаалал өгөхгүйгээр хавдрын эмнэлэгтэй болж, хугацаа хожих давуу талтай. Өнөөдөр Засгийн газрын хуралдаанд энэ асуудлыг танилцуулна.

-Дөрөвдүгээр эмнэлэг хагалгааны оргүй юм биш үү?

-Хөгжлийн банкны зээлээр баригдсан хоёр блокийн нэг нь Дөрөвдүгээр эмнэлэг нэртэй ашиглалтад орчихсон байгаа шүү дээ. Хэвтэн эмчлүүлэх 100 ортой гэсэн. Шахвал 150 ортой болгох боломжтой гэж танилцуулж байсан. Нөгөө блок нь бүрэн баригдаж дуусаагүй. Барилгын ажил нь 50 хувийн гүйцэтгэлтэй байгаа юм билээ. Хагалгааны өрөөнүүд болоод оношилгоо шинжилгээний зориулалттай байр сав нь тэнд бий.

-ХСҮТ одоо байгаа хагалгааны найман ороо 20 болгоход энэ их ачаалал мэдэгдэхүйц буурна гэж Ж.Чинбүрэн гишүүн ярьж байсан. Үүнийг эхний ээлжинд шийдэх боломж байна уу?

-Ер нь хавдрын шинэ эмнэлэг барих юм бол 600 ортой байна гэж төлөвлөж байгаа. Ингэж чадвал хавдрын өвчлөл, эмнэлгийн ачаалал буурах боломжтой. Хэрэв хугацаа хожиж Дөрөвдүгээр эмнэлгийг худалдаж аваад ашиглах юм бол 500-550 ортой болно гэсэн тооцоо байгаа. шинэ эмнэлэг барьсан, одоогийн баригдсан байгаа хоёр блок барилгыг аваад ашиглана гэх юм бол ийм хэмжээний орны нөөц боломж гараад ачаалал буурна.

-Хэрэв шинэ эмнэлэг барих бол хөрөнгө санхүүгийн асуудлыг нь яаж шийдэх вэ?

-Улсын төсөв, гадны зээл тусламжийн алинаар нь ч шийдэх гэж хичээсэн хугацаа их орно. Өртөг ч их гарна. Нэг давуу тал нь Улаанбаатар хотоос зүүн тийш Чулуутын аманд газрын асуудал нь шийдэгдсэн юм билээ. Манай яаман дээр зураг төсөл нь хийгдэж байгаа. Урьдчилсан байдлаар 140 тэрбум төгрөгөөр баригдах тооцоотой. Үүн дээр тоног төхөөрөмжүүд нэмэгдээд нийтдээ 170-180 тэрбум төгрөгөөр хавдрын шинэ эмнэлэгтэй болох урьдчилсан прогноз байна. Гэхдээ үүнийг ирэх жилийн төсөвт тусгаад явах юм бол дахиад 3-4 жилийн хугацаа шаардана.

-ХСҮТ-д шаардлагатай тоног төхөөрөмж дутмаг байдгаас болж иргэд хувийн эмнэлэгт өртөг өндөртэй оношилгоо шинжилгээ хийлгэдэг. Сүүлийн үеийн оношилгооны тоног төхөөрөмжөөр хангагдах боломж байна уу?

-Австрийн засгийн газраас хавдрын өвчлөлийг бууруулах чиглэлээр дэмжлэг үзүүлэх зорилттой 10 сая ам.долларын төсөл хэрэгжиж байгаа. Энэ төслийнхөө хүрээнд хавдрын эмнэлэгт шаардлагатай байгаа MRI, компьютер томограф, ангиограф зэрэг дөрвөн төрлийн тоног төхөөрөмж худалдан авч нийлүүлэх асуудлыг шийднэ. Мөн химийн эмчилгээний шинэ технологи оруулж ирж байгаа. Өөрөөр хэлбэл, шугаман хурдасгуур гээд яг хавдартай цэгийг оношлоод тэнд нь химийн туяа эмчилгээ хийдэг шинэ технологи. Иргэдийн зүгээс ХСҮТ улсын эмнэлэг байж зарим оношилгоо шинжилгээг хувийн эмнэлгээр хийлгэдэг гэсэн шүүмжлэл ирдэг. ХСҮТ-ийн амбулаторит 2019 оноос “Медпортал” гэдэг хувийн оношилгооны эмнэлэг 190 ам.метр талбайд түрээсийн гэрээ байгуулан үйл ажиллагаа явуулсаар ирсэн. ХСҮТ компьютер томографаар оношилгоо шинжилгээ хийх боломжгүй учраас иргэд бүх төлбөрөө хувиасаа гаргаж дээрх эмнэлгээр үйлчлүүлдэг. Төр нэгэнт тоног төхөөрөмжийн асуудлыг шийдэх учраас хавдрын урдаа барьдаг ганц төв нь оношилгоо, шинжилгээгээ өөрөө хийгээд эмнэлгийн тусламж үйлчилгээгээ үзүүлээд явах ёстой. Дээрээс нь эмнэлгийн байр сав хүрэлцээгүй, ачаалал ихтэй байгаа учраас “Медпортал” эмнэлэгтэй байгуулсан гэрээгээ цуцалж, зай талбайгаа чөлөөлж ав гэдэг үүргийг ХСҮТ-ийн удирдлагуудад өгсөн.

-Оношилгооны тоног төхөөрөмжүүд бэлэн болсны дараа талбайгаа суллах асуудал яригдана биз дээ?

-Тэгэлгүй яахав. Өнөө маргаашдаа хувийн эмнэлгийг гаргачихгүй. Манай төслийн хүрээнд ирэх тоног төхөөрөмж тендер зарлагдаад ямар хугацаанд эмнэлэг MRI-тай болохоор байна вэ, тэр хугацаатайгаа уялдуулаад хувийн эмнэлэгтэй байгуулсан гэрээг цуцалж, өрөө тасалгааг суллана.

-Тусгай сангийн тухай хуульд өөрчлөлт оруулах тухай яригдаж эхэллээ. Энэ тухай дэлгэрүүлэхгүй юу?

-Монгол Улс дотооддоо оношилж, эмчилж чадахгүй 26 төрлийн өвчний жагсаалтыг Эрүүл мэндийн сайдын тушаалаар баталчихсан байдаг юм байна. Гэсэн атлаа тэдгээр өвчнөөр шаналж байгаа иргэддээ үзүүлдэг тусламж үйлчилгээ дэмжлэг гэж үндсэндээ байхгүй. Гадаадад эмчлүүлээд ирэхээр нь бичиг баримтыг нь үзэж байгаад эмчилгээний зардлынх нь гүйцэтгэлийн ердөө тавхан хувийг Эрүүл мэндийн сайдын багцаас өгдөг юм байна. Нэгэнт дотооддоо оношилж, эмчилж чадахгүй гээд төр өөрөө шийдвэр гаргачихаж байгаа бол тэдгээр өвчнөөр шаналж буй иргэддээ тодорхой хэмжээгээр дэмжлэг туслалцаа үзүүлдэг байх шаардлагатай. Би ажлаа авмагцаа яамны харьяанд ажилладаг томоохон төрөлжсөн эмнэлгүүдийн дарга нарт үүрэг өгсөн. Дотооддоо оношилж, эмчилж чадахгүй байгаа 26 төрлийн өвчнийг эмчлэх технологи, эмнэлзүйг нь оруулж ирвэл туршилтын хугацааны зардлыг ЭМДС-гаас гаргана. Нутагшаад үр дүнгээ баталгаатай өгдөг болсон нөхцөлд санхүүжилтийг ЭМД руу шилжүүлдэг байх юм. Тиймээс тусгай сангийн тухай хуульд өөрчлөлт оруулъя гэж байгаа. Одоогийн мөрдөгдөж буй Тусгай сангийн тухай хуульд архи, тамхи, эмийн импортын гаалийн татварын 1-2 хувийг ЭМДС-д төвлөрүүлдэг. Энэ сангаасаа нийгмийн эрүүл мэндийн чиглэлээр сургалт, судалгаа хийхэд зориулж болно гэсэн заалт бий. Тэгэхээр ЭМДС-д жилд 11-12 тэрбум төгрөг төвлөрөхөөр байгаа. Гэтэл Сангийн яам жилд ердөө хоёр тэрбум төгрөг баталж суулгаж өгдөг юм байна. Өнөө жилийн төсөвт бас ЭМДС-д хоёр тэрбум төгрөг хуваарилсан. Энэ тухай Сангийн сайдтай уулзаж, нөхцөл байдлыг танилцуулахдаа “Монголдоо 26 төрлийн өвчнийг оношлох технологи, эмнэлзүйн аргыг оруулж ирэх шаардлагатай байгаа зардлыг ЭМДС-гийн зарцуулалтад нь өөрчлөлт оруулах замаар шийдэх хэрэгтэй байна. Харин та нар онцгой татварынхаа хуулийн дагуу ЭМДС-д 11-12 тэрбум төгрөгийг бүтнээр нь суулгадаг байх асуудлыг шийдэж өгөх хэрэгтэй байна” гэж хэлсэн. Сангийн сайд энэ саналыг дэмжсэн. Тиймээс бид Тусгай сангийн тухай хуульд өөрчлөлт оруулж, ЭМДС-гаас 26 төрлийн өвчнийг оношлох технологи, эмнэлзүйг Монголд нутагшуулахад шаардлагатай зардлыг нь ЭМДС-гийн хөрөнгөөс зарцуулъя гэж байгаа юм.

-Нийгмийн эрүүл мэндийн чиглэлээр ажилладаг зарим улсууд ЭМДС-гийн хөрөнгийг эмнэлгийн тусламж үйлчилгээнд зарцуулж болохгүй гэсэн байр суурь илэрхийлж байгаа харагдсан?

-Үүнийг буруу ч гэж хэлэхгүй. Гэхдээ эрүүл мэнд гэдэг бол нийгийн эрүүл мэнд болон урьдчилан сэргийлэх, эмнэлгийн тусламж үйлчилгээний асуудал цогцоороо багтана. Тэгэхээр ЭМДС-гийн хөрөнгийг ганцхан нийгмийн эрүүл мэндийн асуудалд чиглүүлнэ гэсэн ойлголт байж болохгүй. Нөгөө талдаа эмнэлэгт тусламжийнхаа тодорхой хэсгийг зарцуулахад болохгүй юм байхгүй. Ер нь нийгмийн эрүүл мэндийн асуудал бол эрүүл мэндийн салбарын суурь асуудал. Бид өвчилсөн хойно нь оношилж, эмчлэх биш. Харин өвчлөхөөс нь өмнө урьдчилан сэргийлэх, эрт илрүүлэх арга хэмжээ авах ёстой. Манайд нийгмийн эрүүл мэндийн асуудал хамгийн их орхигдож байгаа гэдэгтэй санал нэг байна. Тиймээс Нийгмийн эрүүл мэндийн тухай цоо шинэ анхдагч хууль боловсруулж, хаврын чуулганд оруулахаар ажиллаж байна. Ер нь иргэн хүн өөрийнхөө эрүүл мэндэд анхаарал тавьж чадах юм бол урт удаан наслах боломж бий. Тэр утгаараа Нийгмийн эрүүл мэндийн тухай хууль бол манай яам дангаар хариуцах асуудал ч биш. Боловсрол, соёл шинжлэх ухааны яам, Спортын яаманд ч хамаатай. Нийгмийн эрүүл мэндийн асуудалд орчны болоод агаарын бохирдол зэрэг асуудлууд ч орно шүү дээ. Салбар хоорондын зохицуулалт шаардсан суурь хуулийг хаврын чуулганд оруулахаар ажиллаж байна. Хоёрдугаарт, иргэний эрүүл мэндийн боловсролыг дэмжихэд нэлээд анхаарал хандуулах шаардлагатай байна. Тиймээс салбар хоорондын уялдаа холбоог зохицуулсан, иргэний эрүүл мэндийн боловсролыг дэмжих хөтөлбөр боловсруулж хэрэгжүүлье. Хүүхдэд аль багаас нь эрүүл мэндийн боловсрол олгодог байх асуудалд онцгой анхаарах бодолтой байна. Манай салбарт үгүйлэгдэж буй бас нэг чухал асуудал бол эрүүл мэндийн тусламж үйлчилгээний стандарт. Иймд эрүүл мэндийн салбарт баримтлах үйлчилгээний стандартыг боловсруулж, нэн даруй батлуулж мөрдүүлэх хэрэгтэй байна.

М.МӨНХЦЭЦЭГ

Categories
мэдээ цаг-үе

Өнөөдөр нохой өдөр DNN.mn

Аргын тооллын хоёрдугаар
сарын 9, Бархасвадь гариг.
Билгийн тооллын 19, харцага
одтой, шар нохой өдөр. Өдрийн
наран 8:09 цагт мандан, 18:04
цагт жаргана. Тухайн өдөр бар,
морь жилтнээ аливаа үйлийг хийхэд эерэг
сайн ба үхэр, луу, хонь, нохой жилтнээ
сөрөг муу нөлөөтэй тул элдэв үйлд хянамгай
хандаж, биеэ энхрийлүүштэй. Эл өдөр найз
нөхдийг түшиж элдэв үйлийг түргэн бүтээх,
бүтээл туурвил эхлэх, бизнес эхлэх, цар
ихтэй үйлийг эхлэх, бясалгал хийх, доодсыг
асран өглөг, хандив өргөх, лус тахих, хүүхэд
үрчлэн авах, гэр, байшингийн суурь тавихад
сайн. Нүүдэл суудал хийх, хэрүүл тэмцэл
хийх, цөөрөм байгуулахад муу.
Өдрийн сайн цаг нь бар, луу, могой, бич,
тахиа, гахай болой. Хол газар яваар одогсод
баруун урагш мөрөө гаргавал зохистой.
Үс шинээр үргээлгэх буюу засуулбал
“Сайн нөхөртэй учирах” хэмээх сайн

Categories
мэдээ нийгэм онцлох-нийтлэл туслах-ангилал

ТОЙМ: Нэрт нийтлэлч Б.Цэнддоогийн “Сээр”-ийн бөхөөс Сирийн бөх ” хэмээх нийтлэл хэвлэгдлээ DNN.mn

Өглөө бүр тантай хамт байдаг “Өдрийн сонин”-ы пүрэв гаригийн дугаар 8 нүүрээр хэвлэгдэж, та бүхний гарт хүрч байна.

“Өдрийн сонин”-ы тэргүүн нүүрт Ерөнхийлөгч асан
Х.Баттулга “Б.Энхбаяр аа, чи сургаар
их ярьдаг хүн байна, залуу хүн
алдаа гаргаж байгаа байх л даа” гэснийг V нүүрээс үргэлжлүүлэн уншаарай.

Дорноговь аймгийн засаг
дарга О.Батжаргал “Манай аймаг
төсвөө өөрчлөх, тэлэх дээр
бодлого баримтлан ажилладаг“ гэв.

“Өдрийн сонин”-ы нийтлэлийн бодлогыг тодорхойлогч, ард түмний дуу хоолой болдог “Баримт, үзэл бодол” нүүрт нэрт нийтлэлч Б.Цэнддоогийн “Сээр”-ийн бөхөөс Сирийн бөх ” хэмээх нийтлэл хэвлэгдлээ.

Ерөнхийлөгч асан Ц.Элбэгдоржийн өдрийн тэмдэглэл нийтлэгдлээ.

Хөгжлийн банкны хэргийн шүүх хуралд 80 яллагдагч
102 өмгөөлөгчтэй оролцоно.

Дэлгэрэнгүй мэдээллүүдийг уншихыг хүсвэл дараах линкээр бүртгүүлж уншина уу. https://admin.dnn.mn/plugi ns/news/login

Эдгээр болон бусад цаг үеийн мэдээ мэдээлэл, ярилцлага, сурвалжлагыг “Өдрийн сонин”-ы пүрэв гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудангийн салбаруудаас болон сонин борлуулах цэгүүд, Хэвлэлийн биржээс худалдан авах боломжтой. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдан авч болохыг дуулгая. Түүнчлэн “Өдрийн сонин”-ы өөрийн байранд ирж худалдан авч болно.

Уншигч та “Өдрийн сонин”-ыг захиалан уншихыг хүсвэл 9911-2954, 8811-1375 дугаарт холбогдоно уу.

Цахим хэлбэрээр нь захиалахыг хүсвэл 88111375 дугаарт холбогдож дэлгэрэнгүй мэдээллийг аваарай.

“Өдрийн сонин”-той холбоотой мэдээ мэдээллийг 19001987-гоос лавлана уу




“ӨДРИЙН СОНИН” ӨГЛӨӨ БҮР ТАНТАЙ ХАМТ

Categories
мэдээ нийгэм

Вакцинжуулалтын үеэр 5.5 сая үхрээ ээмэгжүүлнэ DNN.mn

ДОРНОД: 457 мянган толгой мал амьтанд шүлхийн вакцин хийнэ

Малын гаралтай түүхий эдийн гарал үүслийг тодорхойлох зорилгоор нийт үхэр сүргийг ээмэгжүүлэх шийдвэрийг Засгийн газрын хуралдааны үеэр шийдвэрлэв.

Энэ хавар 4, 5 дугаар сард 5.5 сая үхрээ вакцинжуулах үеэр бүгдийг нь ээмэгжүүлнэ. Ингэснээр үхрээ цахим бүртгэлд оруулж, аль сумын, ямар айлын хотноос ирсэн үхэр гэдэг гарал үүсэл нь тодорхой болох юм. Үүнийг дагаад малын хулгай ч багасна гэдгийг ХХААХҮ-ийн сайд Х.Болорчулуун мэдээлэв.

Генетик нөөцийн тухай хуулийг 2018 онд баталж, ээмэгжүүлэх, бүртгэлжүүлэх, цахимжуулах асуудлыг тусгасан ч цар тахлын нөхцөл байдлын улмаас хэрэгжээгүй байсан юм.

Categories
гадаад мэдээ

Сирийн шоронд хоригдлууд бослого гаргав DNN.mn

Турк, Сирийн хил залгаа бүс нутагт болсон 7,8 магнитудын хүчтэй газар хөдлөлтийн дараа Сирийн баруун хойд хэсгийн шоронд хоригдлууд бослого гаргасан байна. Энэ үеэр Исламын улс бүлэглэлийн 20 гаруй хоригдол шоронгоос оргожээ. Туркийн хилийн ойролцоох Ражо хот дахь цэргийн шоронд 2000 гаруй хоригдол хоригдож байгаагийн 1300 орчим нь Исламын Улс бүлэглэлийн дайчид аж. Туркийг дэмжигч бүлэглэлийн хяналтад байдаг тус шорон газар хөдлөлтөд өртсөний дараа хоригдлууд нь бослого гаргаж, шоронгийн нэг хэсэгт хяналтаа тогтоосонбайна. Хүчтэй газар хөдлөлтөд зөвхөн Сири улсад 1500 орчим хүн амь эрсдээд байгаа юм. Амь үрэгдэгсдийн 733 нь босогчдын хяналтад байдаг бүс нутгийн иргэд аж.

Г.АМАРСАНАА

Categories
мэдээ нийгэм эдийн-засаг

Нүүрсний 50-60 хувийг ирэх онд багтаан биржээр арилжина DNN.mn

Нүүрс алтнаас ч “үнэтэй” юү? | News.MN

Засгийн газрын өнөөдрийн ээлжит хуралдаанаар Уул уурхайн бүтээгдэхүүний биржийн арилжааг Монголын Хөрөнгийн бирж ХК-иар гүйцэтгүүлэх тухай Засгийн газрын тогтоолын төслийг хэлэлцлээ. Гарсан шийдвэрийн талаар УУХҮ-ийн сайд Ж.Ганбаатар танилцуулав.

Тэрбээр, “Биржийн тухай хууль батлагдсан. Энэ оны 7 дугаар сарын 1-нээс хэрэгжиж эхэлнэ. Тус хуулийн 5 дугаар зүйлийн 5.8-д биржийг бие дааж, эсвэл Монголын Хөрөнгийн биржийн дор байгуулна хэмээн заасан. Энэ шийдвэрийг Засгийн газар гаргана гэсэн хуулийн агуулгаар Засгийн газар өнөөдөр албан ёсны шийдвэрээ гаргаж, Монголын Хөрөнгийн биржийг түшиглэн нүүрсээ худалдахаар боллоо. “Эрдэнэс Монгол” компани маргаашнаас гурван удаагийн дуудлага худалдаагаар 21 харилцагч компанид 130-140 мянган тонн нүүрсийг биржээр арилжина” хэмээн мэдээллээ.

Энэ нь нэг сарын хугацаанд худалдах нүүрс аж. Монгол Улсын нийт нүүрс 36 сая тонн гэж үзвэл 7 дугаар сарын 1 гэхэд үүний 12 сая тонныг биржээр худалдах зорилт тавин ажиллаж байна. 2024 онд багтаад 50-60 хувьд хүргэх, 2025 онд бүх нүүрсээ биржээр худалдахаар төлөвлөжээ.

“Манай боомтын хүчин чадлаас шалтгаалж ийнхүү шат дараатай арилжиж, бусад улсын жишгээр ил тод чөлөөт өрсөлдөөний дагуу биржээр худалдаж байна. Цаашид зэс, жонш, төмөр зэрэг бүх металлын худалдааг биржээр цахимаар хийх боломж байгаа. Үүнийг ирэх гурван жилдээ багтааж хэрэгжүүлнэ. Нүүрсийг авлига, түүнээс үүсдэг хардалт дагалддагийг бүгд мэдэж байгаа.

Тиймээс бид олон улсын жишигт нийцүүлж Хөрөнгийн биржийг түшиглэн нүүрсээ зарна. Хэрэв тусдаа бирж байгуулбал урьдчилсан тооцооллоор 30 гаруй тэрбум төгрөгийн хөрөнгө санхүү, боловсон хүчин шаардлагатай байсан. Тиймээс бэлэн байгаа дэд бүтэц, боловсон хүчин зэрэгтэй Хөрөнгийн биржийг түшиглэсэн нь давуу талтай. Нүүрсээ худалдах компани өөрөө үнээ тогтоож, зарлах ба 7 дугаар сарын 1-нээс хууль хэрэгжиж эхлэхэд бирж өөрөө үнээ тогтоодог болно” гэв.

Тэрбээр, энэ сарын 27-нд манай улсад БНХАУ-аас нүүрсний 150 харилцагч буюу худалдан авагч ирэхээр болсныг мэдээллээ. Монгол Улс нүүрсээ Хөрөнгийн биржийг түшиглэн худалдах талаар гаргасан шийдвэрийн хүрээнд БНХАУ-ын нүүрсний худалдан авагчдыг ийнхүү урьж цаашдаа зөвхөн биржээр нүүрсээ худалдах, биржийн хуулийн давуу талыг танилцуулах аж.

Categories
гадаад мэдээ

Амиа алдсан хүний тоо 7000 даваад байна DNN.mn

Туркийн зүүн өмнөд болон Сирийн хойд нутагт болсон хүчтэй газар хөдлөлтийн улмаас амиа алдсан хүний 7000 даваад байна. Туркийн Онцгой байдлын газрын мэдээгээр, тус улсад амиа алдсан хүний тоо 3419-д хүрч, 20 426 хүн гэмтэж бэртэн, 5775 байшин барилга нурсан байна. Сирийн Идлиб, Алеппо, Хама, Латакиа, Ракка мужуудад 1 600 гаруй хүн амиа алджээ.

Туркийн түүхэнд тохиосон хамгийн хүчтэй газар хөдлөлтүүдийн нэгд тооцогдож буй байгалийн гамшигт энэ үзэгдэлд 13.5 сая хүн нэрвэгдсэн гэж тус улсын Байгаль орчин, уур амьсгалын өөрчлөлтийн асуудал эрхэлсэн сайд Мурат Курум мэдээлжээ. Тэрбээр байшин барилгын нурангинд дарагдсан хүмүүсийг эрэн хайх, аврах ажиллагаа үргэлжилсээр байгааг мэдээлээд, ийм ажиллагаанд эхний 72 цагчухал болохыг цохон тэмдэглэв. Байгалийн гамшигт нэрвэгдсэн хүмүүсийг аврах, эрэн хайх ажиллагаанд 65 орны 2660 алба хаагч оролцож байна гэж тус улсын Онцгой байдлын газраас мэдээлжээ.

Туркийн аврах албаныхантай хамтран 13 740 хүн байгалийн гамшигт өртсөн бүсэд үүрэг гүйцэтгэж байгаа бөгөөд аврах, эрэн хайх ажиллагаанд 629 өргүүр кран, 360 тээврийн хэрэгсэл ашиглаж байгаа аж. Гамшгийг арилгах ажиллагаатай холбогдуулан Туркийн Батлан хамгаалахын нисэх хүчний тээврийн онгоцнуудыг дайчлан тусламжийн ажиллагаанд оролцуулж байгаагаас гадна, Кахраманмараш, Газиантеп хотуудын нисэх онгоцны буудлуудын иргэний агаарын тээврийн нислэгийг цуцалжээ. Онцгой байдлын газрын мэдээлснээр, тусламж хүргэх 146 нислэг үйлдэж, нийтдээ 300 мянган хөнжил, 41 504 майхан болон халаагуур, гал тогооны хэрэгслийг хүргэсэн байна. Түүнчлэн Туркийн Улаан хавирган сар нийгэмлэгээс газар хөдлөлтөд гэмтэж бэртсэн хүмүүст зориулж цус сэлбэлтийн нөөц илгээн, улс орон даяар цусаа хандивлах аян зарлаад байна.

Турк, Сирийн засгийн газарт тусламж үзүүлэхээ Европын Холбоо, НАТО болон бусад олон улсын байгууллагуудаас гадна дэлхийн олон улс орон мэдэгдээд байна.

НҮБ-ын байгууллагууд газар хөдлөлтийн бүсэд үйл ажиллагаагаа үргэлжлүүлж байгаа бол АНУ, Франц, Их Британи, Итали, Нидерланд, Австри, Чех, Беларусь, Гүрж, Япон, Тайвань, Алжир, Мексик, Казахстан, ОХУ, БНСУ болон бусад олон орны эрх баригчид гамшгийн бүсэд аврагчдаа илгээгээд байна.

Олон улсын Улаан загалмай, Улаан хавирган сар нийгэмлэгүүдийн холбоо Турк, Сирийн гамшигт нэрвэгдсэн хүмүүст 75.6 сая орчим ам.долларын хэмжээтэй тусламж үзүүлэхийг дэлхийн хамтын нийгэмлэгт уриалжээ.

Швед улс 657 000 ам.доллар, Ирланд улс 2 сая еврогийн тусламжийг Турк, Сирийн засгийн газарт үзүүлэхээр болжээ.Мөн Австралийн Засгийн газар 10 сая австрали.долларын хүмүүнлэгийн тусламж, Шинэ Зеландын Засгийн газар 1.5 сая шинэ зеланд.долларын тусламж үзүүлэхээр болсон гэж “BBC” мэдээлэв.