Нийслэлийн удирдах ажилтнуудын шуурхай зөвлөгөөн өнөөдөр боллоо.

Энэ үеэр өвөлжилтийн хугацаанд инженерийн шугам сүлжээний хэвийн найдвартай ажиллагаа болон машин механизм, техник тоног төхөөрөмжийн бэлэн байдал, цаг үеийн нөхцөл байдлын талаар нийслэлийн Засаг дарга тодрууллаа.

Улаанбаатар хотын Ерөнхий менежер бөгөөд Захирагчийн ажлын албаны дарга Д.Ганболд хоёр удаа их хэмжээний цас ороход бэлтгэл ажлыг сайтар хангаж ажилласны хүчинд хүндрэл бэрхшээл гараагүй гэдгийг онцлоод, бодисын 2,414 тонн, давсны 4,720 тонны нөөцтэй байгааг хэлсэн.

Нийслэлийн ССОНХГ

Орон сууц нийтийн аж ахуйн удирдах газрын дарга Ч.Мэндбаяр “Халаалтын улирал эхэлснээс хойш шугамын гэмтэл 225 удаа гарсан бөгөөд тухай бүр гэмтлийг засварласан. Манай байгууллага 1125 км шугам хариуцан ажилладгаас 65 хувь нь насжилтын хугацаа дууссан. Ажилчид 24 цагаар ээлжлэн жижүүрлэн ажиллаж байна” хэмээлээ.

Улаанбаатар дулаан сүлжээ ТӨХК-ийн захирал Г.Баярсайхан “Дөрвөн дулааны станц хэвийн ажиллаж байгаа. Хотын хэмжээнд 13200 орчим барилга объектын дулаан хангамжийг хэвийн хангаж байна. Байгууллагын харьяанд 370 км дулааны төв шугам байгаагаас гэмтэл, саатал гараагүй” гэв.

Эх сурвалж: Нийслэлийн Сургалт, судалгаа, олон нийттэй харилцах алба

Авлигатай тэмцэх газрын Мөрдөн шалгах хэлтэс 2022 оны 11 дүгээр сарын 28- наас 12 дугаар сарын 2-ны өдрүүдэд гэмт хэргийн шинжтэй 49 гомдол, мэдээлэл хүлээн авч, нийт 121 гомдол, мэдээллийг шалгав. Үүнээс 8 гомдол, мэдээлэлд хэрэг бүртгэлтийн хэрэг нээж, 25 гомдол, мэдээлэлд хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бөгөөд одоогоор 88 гомдол, мэдээллийг хянан шалгаж байна. Түүнчлэн эрүүгийн 768 хэрэгт мөрдөн байцаалтын ажиллагаа явуулснаас өнгөрсөн долоо хоногт 14 хэргийг шүүхэд шилжүүлэх, 11 хэргийг хаах, 4 хэргийг харьяаллын дагуу шилжүүлэх саналтай прокурорт хүргүүлж, 6 хэргийг нэгтгэн шалгаж байна. Мөрдөн шалгах ажиллагаанд одоогоор 733 хэрэг шалгагдаж байна. Өнгөрсөн долоо хоногт гэмт хэрэг гарахад нөлөөлсөн шалтгаан, нөхцөлийг арилгуулахаар мөрдөгчийн 4 мэдэгдэл бичиж холбогдох байгууллагуудад хүргүүлсэн. Шүүхэд шилжүүлэх саналтайгаар прокурорын байгууллагад хүргүүлсэн хэргүүдийг дурдвал:

• Хэнтий аймаг дахь Цагдаагийн газрын албан тушаалтан “Э” нь зөрчил шалган шийдвэрлэх ажиллагаа явуулахдаа хохирогч нарын мэдүүлгийг хуурамчаар үйлдсэн гэх;
• Сүхбаатар аймгийн Наран сумын Засаг даргын Тамгын газраас зарласан Хогны машин худалдаж авах тендерт “О” компанийг хууль бусаар шалгаруулсан гэх;
• Налайх дүүргийн 208-р цэцэрлэгийн эрхлэгч “Ө”өөртөө давуу байдал бий болгосон гэх;
• Хил хамгаалах ерөнхий газрын албан тушаалтан “Т”, “С” нар нь бусдад давуу байдал бий болгож хуурамч бичиг баримтыг үндэслэн хилийн лавлагаа гаргасан гэх;
• Автотээврийн үндэсний төвийн удирдах албан тушаалтан “М” нь албан тушаалын байдлаа урвуулан ашиглаж, өөртөө давуу байдал бий болгосон гэх.
• БНХАУ-ын иргэн “Ф П” нь өөртөө давуу байдал бий болгох зорилгоор нийтийн албан тушаалтан “Н”-д хахууль өгсөн гэх;
• “Г” нь Сүхбаатар аймгийн Дарьганга сумын удирдах албан тушаалтнаар ажиллаж байхдаа бусдад давуу байдал олгосон гэх;
• ШШГЕГ-ийн албан тушаалтан “У”, “О”, “Л” нар нь албан тушаалын байдлаа урвуулан ашигласан гэх;
• Баянзүрх дүүргийн Хөдөлмөр, халамжийн үйлчилгээний хэлтсийн эрх бүхий албан тушаалтнууд нь бусдад болон өөртөө давуу байдал бий болгосон гэх;
• АШУҮИС-ийн албан тушаалтан “Т” нь эрх мэдэл албан тушаалын байдлаа урвуулан ашиглаж хахууль авсан гэх;
• Сэлэнгэ аймгийн Мандал сумын Нийгмийн даатгалын тасгийн албан тушаалтан “Э” нь албан үүрэг, бүрэн эрхээ урвуулан ашиглаж ажилгүйдлийн болон тэтгэмжийн даатгалын сангаас 2019 оны 03 дугаар сарын 07-ны өдрөөс 2021 оны 04 дүгээр сарын 20-ны өдөр хүртэлх хугацаанд өөрийн хамаарал бүхий этгээдүүдийн Хаан банк дахь харилцах дансаар дамжуулан 200,527,213 төгрөгийг хувьдаа ашиглан өөртөө давуу байдал бий болгосон гэх;
• “М” нь нийтийн албан тушаалтнаар ажиллаж байхдаа бусдаас хахууль авсан гэх;
• Нийслэлийн газрын албаны удирдах албан тушаалтан “Б”, “Ш” нар албан үүрэг, бүрэн эрхээ урвуулан ашиглаж бусдад давуу байдал бий болгосон гэх.