Month: December 2022

Categories
мэдээ цаг-үе

Энэ онд нийт 238 баг 4G сүлжээнд холбогджээ DNN.mn

Цахим хөгжил, харилцаа холбооны яам, үүрэн холбооны оператор компаниуд орон даяар оршин суугаа ард иргэддээ харилцаа холбооны үйлчилгээг тэгш хүртээмжтэй хүргэхээр сүлжээгээ өргөтгөсөөр байна.

2022 онд ЦХХХЯ улсын төсөв болон Бүх нийтийн үйлчилгээний үүргийн сангийн хөрөнгөөр алслагдсан 37 багт 4G сүлжээ нэвтрүүлсэн. Мөн үүрэн холбооны оператор компаниуд хөдөөгийн 201 багт 4G сүлжээ нэвтрүүлжээ. Энэ нь сүүлийн таван жилийн хамгийн өндөр үзүүлэлт юм. Ингэснээр 300 мянга орчим иргэн өндөр хурдны интернэтэд холбогдох, мэдээ, мэдээлэл шуурхай авах, аялагч амрагчид харилцаа холбооны бусад үйлчилгээг саадгүй, шуурхай авах боломжийг бүрдүүлж байна.

ЦХХХЯ-ны Харилцаа холбооны бодлогын хэрэгжилтийг зохицуулах газрын дарга Х.Энхманлай: Монгол улс өргөн, уудам нутаг дэвсгэртэй, хүн ам нь тархан суурьшсан учраас нийт хүн амаа харилцаа холбоогоор хангах нь том сорилт. Хөдөөгийн алслагдсан багийн иргэд, малчдаа цаг алдалгүй мэдээ, мэдээллээр хангах, өндөр хурдны интернэтийн үйлчилгээ хүргэхэд хөрөнгө оруулалт ихээр шаарддаг.

Өнөөдрийн байдлаар нийт сумдын 97 хувь нь өндөр хурдны шилэн кабелын сүлжээнд холбогдсон. Одоо бид алслагдсан багуудаа анхаарч байна. Хөдөөгийн алслагдсан багуудад 4G сүлжээ нэвтрүүлснээр нийгмийн ялгаатай хөгжил буюу цахим хуваагдлыг багасгах, мөн аялал жуулчлалын үйл ажиллагаанд дэмжлэг үзүүлэхээс зэрэг ач холбогдолтой. Бид 2023 онд хөдөөгийн 25 багийг үүрэн холбооны сүлжээнд холбохоор төлөвлөж байна

Categories
мэдээ онцлох-нийтлэл туслах-ангилал эдийн-засаг

Р.Даваадорж: Төр оролцсон том дүнтэй хулгайг илрүүлэхэд зохион байгуулсан сонсгол нь жулдлаа DNN.mn

Эдийн засагч Р.Даваадоржтой ярилцлаа.

-УИХ-аас нүүрсний хулгайн асуудлаар иргэдийн дунд нээлттэй сонсгол зохион байгууллаа. Нээлттэй сонсголын үйл явцыг та хэрхэн дүгнэж байна?

-Улсын Их Хурлын Эдийн засгийн байнгын хорооноос 2022 оны арванхоёрдугаар сарын 21-ний өдөр зохион байгуулсан “Нүүрсний экспорт, тээвэрлэлттэй холбоотой асуудлаар холбогдох эрх бүхий байгууллагуудын тайлан, мэдээлэлтэй танилцах” ерөнхий хяналтын сонсгол эхнээсээ бужигнаантай эхэлсэн. Тус сонсголд оролцохоор ирсэн иргэд бухимдаж “Сонсголд оролцогчдыг хэд хэдэн танхимд хуваасан”, “Дарга нар нэг өрөөнд цугларсан”, “Иргэдийн оролцоог огт хангасангүй” гэх зэргээр тус арга хэмжээний зохион байгуулалттай холбоотой шүүмжлэл гарсан тул хэсэг завсарлаад 13:00 цагт Төрийн ордны Их танхимд эхэлсэн.

Ийм сонсгол урьд өмнө ганц хоёр удаа хийсэн төдий болохоор одоохондоо хүссэн үр дүн авчирч чадсангүй. Хэвлэл мэдээллээр явж буй мэдээллийн хүрээнд л бужигнаад өнгөрлөө. Эрх баригчид нь иргэдээ сонссон дүр эсгэсэн, ямар ч ач холбогдолгүй шахам сонсгол болсон гэж дүгнэж байна. Учир нь УИХ-ын гишүүдээс цөөн хүн оролцсон. Монгол Улсын түүхэнд байгаагүй данхар төрөөс хэдхэн сайд, тэр бүү хэл, төрийн агентлагуудынх нь дарга нар үзэгдсэн болоод газар, хэлтсийн даргаа үлдээгээд явсан. Тиймээс сонсголд оролцсон хүмүүсийн асуулт хариултгүй үлдэж байна лээ. Эрх баригчдын зүгээс өгч буй хариулт ч бүрхэг, хоёрдмол утга санаатай, тэр бүү хэл басамжилсан, дорд үзсэн өнгө аяс нэвт ханхалж байсныг нуугаад яахав.

-Сонсголд талуудын оролцоог бүрэн хангаж чадав уу?

-Тус сонсголын зохион байгуулалтыг хариуцсан УИХ-ын тамгын газрын албан хаагчид бүх оролцоог хангахын төлөө ажилласан нь анзаарагдаж байсан. Гэвч жагсагчдын зүгээс тэс өөр байр суурь илэрхийлж байгаа харагдсан. Миний хувьд “Бодь-Интернэшнл” ХХК болон М-Си-Эс группийн удирдлагаас илтгэл тавихыг хүлээж байсан. Харамсалтай нь ийм илтгэл тавигдсангүй. Нөгөө л эрх баригчдын улиг болсон хэдэн тоо баримт ярьж, “нүүрсний хулгай” гэх асуудлаа тойрч “давхисан”, тодорхой ямар нэгэн шийдэлд хүрэх нь бүү хэл тус асуудлыг нийтэд ойлгомжтой тайлбарлаж ч чадсангүй.

Харин УИХ-ын гишүүн С.Одонтуяа, С.Чинзориг, Т.Доржханд нар тус сонсголыг дуусан дуустал идэвхтэй оролцсон гэдгийг хэлэхгүй өнгөрч болохгүй байх.

-Ер нь иргэдийн дунд ийм нээлттэй сонсгол явуулсан нь ямар ач холбогдолтой юм бэ. Үнэхээр нүүрсний хулгайн хэргийг илрүүлэхэд энэ сонсгол дэмжлэг болж чадах уу?

-Уул нь ерөнхий хяналтын сонсгол бол Улсын Их Хурлын хянан шалгах бүрэн эрхээ хэрэгжүүлэх арга хэрэгслүүдийн нэг. Гэвч одоохондоо ач холбогдол багатай санагдсан. Миний хувьд, ийм том дүнтэй төр оролцсон хулгайг илрүүлэхэд УИХ-аас зохион байгуулж буй сонсгол жулдаж байсан.

-Нээлттэй сонсгол зохион байгуулснаар нүүрсний хулгайч нарыг шууд зарлах, илчлэх боломжийг бүрдүүлж чадсан болов уу?

-Огт үгүй гэж хэлье. Хууль хяналтынхан олон хүний асуултад “шалгаж байгаа хэргийн талаар ярих ёсгүй” гэдэг ганц үгээр ам таглаж байсан. Тиймээс би тэдэнд хоёр зөвлөгөө өгсөн. Нэгдүгээрт, “Эрх мэдэл, нууц хоёр сүлбэлдэж ард түмний өмч гэж энхрийлсэн төрийн өмч дээр сандайлсан учраас ийм хэрэг гарсан. Та нар хаа хамаагүй хоёр компанийн мөргөцгийн маргааныг шалгах шаардлагагүй, олон мянган жолооч нарыг шалгах шаардлагагүй. Тиймээс эрх мэдэл хэнд байсныг шалга, нууц гэрээ хэн үзэглэснийг шалга, төрийн өмч дээр хэн сандайлсныг шалга. Энэ хэргийн гол буруутныг сүүлийн зургаан жил хэт олонх болсон МАН-ын удирдлага дотроос хай” гэж хэлсэн.

Хоёрдугаарт, “Надад 2012 оноос хойш нүүрсний дэлхийн зах зээл дээрх ханшийн судалгаа байна. Эндээс харвал 2012-2016 онуудад 30 орчим ам.доллар болж унасан үед нууц гэрээ хийх битгий хэл нүүрс сонирхох бизнесмэн цөөрсөн. Харин 2021 оноос 300-400 ам.долларт хүрсэн үеийг онил. Энэ үед нууц гэрээнүүд хийгдсэн байх учиртай” гэж тодруулсан.

-Нүүрсний хулгайд холбогдолтой гэх 17 хүний нэрийг зарлаад байна.Эдгээрийг нэр хэр бодитой гэж харж байна?

-Би дээр хэлсэн, нүүрсний хулгайд холбогдолтой гэж зарласан 17 хүн дотор эрх мэдлээс хол хүн байна, нууц гэрээнд огт хамаагүй хүн байна, төрийн өмчит компаниудтай огт холбоогүй хүмүүс байна. МАН-ын үед гарч буй жигшүүрт хэрэг хил даваад одоо дэлхий нийтийн сонорт хүрчихлээ. Эх орноосоо хулгай хийх нь хамгийн шившигт явдал юм. Хэрэв МАН ЖДҮ хулгайч нартаа хариуцлага тооцож чадсан бол ийм хэрэг гарахгүй байв. Хэрэв МАН Хөгжлийн банкны хулгайч нартаа хариуцлага тооцож чадсан бол ийм хэрэг гарахгүй байлаа. Оффтейк гэрээнүүдийг бүгдийг нь ил болго. Оффтейк гэрээ гэдэг нь компанийн үйлдвэрлэж хараахан амжаагүй байгаа бүтээгдэхүүнийг урьдчилан борлуулах гэрээ юм. Үүний гол утга санаа нь хөнгөлөлттэй нөхцөлөөр урт хугацаанд найдвартай санхүүжилт татах замаар бизнесийн тогтвортой байдлыг хангахад л чиглэгддэг.

-Өмнө нь ийм төрлийн гэрээг хэн хэн, хэзээ хийж байсан талаар мэдээлэл бий юү?

-Бүр 2011 онд сонгуулийн амлалтаа биелүүлэх зорилгоор Сү.Батболдын Засгийн газар, ЗГХЭГ-ын дарга Чимэдийн Хүрэлбаатар нар ажиллаж байх үед “Эрдэнэс Таван толгой” ХК БНХАУ-ын “Чалко” компаниас “Дараа нүүрсээр төлж барагдуулах нөхцөлтэй”-гөөр 350 сая ам.долларын зээлийн урьдчилгаа төлбөр авч байсан. Мөн энэ үед анх 600 сая ам.долларын Евро бондыг босгож байсан түүхтэй.Монгол Улсын Засгийн газар 2008 оны улстөрчдийн амлалт сонгогч бүрд 1.5 сая төгрөг бэлнээр тараахын тулд “Эрдэнэс-Таван толгой”-н нэрээр 350 сая ам.доллар, “Оюу толгой”-н нэрээр 250 сая ам.доллар, “Эрдэнэт”-ээс 200 тэрбум төгрөг гээд нийтдээ нэг тэрбум ам.долларыг зээлж бэлэн мөнгө хэлбэрээр тарааж өнөөгийн эдийн засгийн хямрал, өрийн эх үүсвэрийг Монгол Улсын эдийн засаг нэн таатай үед тавьж байжээ.

-Энэ гэрээ яагаад ил болов?

-2022 оны есдүгээр сард ОУВС-гийн гаргасан тайланд маш тодорхой зарласан юм. Тэрхүү тайланд, “Төрийн өмчит компаниуд БНХАУ-ын зарим компанитай, ажил гүйцэтгүүлэх гэрээ байгуулсан байна. Ингэснээр Монгол Улсад орж ирэх байсан экспортын орлого буурсан. Эдгээр нь дэд бүтцийн төслүүд бөгөөд гэрээ улсын нууцад хамаарах тул бид илүү дэлгэрэнгүй мэдээлэлгүй байна. Эндээс мөнгө орж ирнэ гэж хүлээх хэрэггүй болжээ. Мөн эдгээр дэд бүтцийн төслүүд импортыг өсгөнө. Олон нийтэд эдгээр төслийн талаар дэлгэрэнгүй мэдээлж, яг одоо хэрэгжүүлэх ямар шаардлага байгааг сайтар тайлбарлах шаардлагатай” гэсэн байсан.

-Оффтейк гэрээ байгуулснаар эдийн засагт учруулсан бодит хохирол юу байна?

-Нэгдүгээрт, дэлхийн зах зээлийн нүүрсний ханшаас хэд дахин бага үнээр гэрээ хийж, хэт өндөр үнээр бүтээн байгуулалт хийсэн. Хоёрдугаарт, бизнест шударга бус өрсөлдөөнийг төрийн нууцад оруулах замаар бий болгосон. Гуравдугаарт, дэлхий нийтэд ил болсноор манайхыг зорих гадаадын хөрөнгө оруулагчид үгүй болно. Түүнчлэн валютын ханш чангарч, өргөн хэрэглээний бараа, хүнсний үнэ өсөж иргэдийн амьдралд аж ахуйн нэгжийн үйл ажиллагаанд туйлын сөргөөр нөлөөлөөд зогсохгүй гадаад өрийн дарамтыг улам их болгосон.Оффтейк гэрээний хохирол нэг хоёр биш арван жилээр яригдаж, ард иргэдийн амьдрал, аж ахуйн нэгжүүдийн үйл ажиллагаанд асар их сөрөг нөлөө үзүүлнэ.

-Ер нь цаашид нүүрсний болоод бусад төрлийн хулгай гаргахгүй байхын тулд юу хийх ёстой вэ?

-Эрх мэдлийг улс төрийн аль нэг нэг хүчинд хэт ихээр бүү өг, хяналтгүй болдог юм. Төрийн нууцыг аж ахуйн нэгжүүдийн хооронд хийгддэг гэрээнд бүү тавь, завхрал гардаг юм. Төрийн өмчийг цүнх баригчдаар бүү удирдуул, улсын чинь эдийн засаг дампуурдаг юм. Тиймээс төрийн өмчит компаниудаа хараа хяналттай болго. Нийтэд нээлттэй болго. Хувьчил гэж хэлмээр байна.

Categories
мэдээ цаг-үе

Энэ сарын 5-нд Төрийн ордны хаалгыг эвдсэн 7 иргэнийг саатуулжээ DNN.mn

Төрийн ордны хаалгыг эвдсэн долоон иргэнийг өчигдөр баривчилж, ШШГЕГ-ын харьяа урьдчилан хорих 461 дүгээр ангид саатуулжээ.

Энэ тухай ЦЕГ-ын Хэвлэл мэдээллийн төвийн дарга Г.Мөнхбаяраас тодруулахад “Өчигдөр долоон иргэнийг 461 дүгээр хорих ангид саатуулсан нь үнэн. Гэхдээ тэднийг үзэл бодлоо илэрхийлснийх төлөө саатуулаагүй гэдгийг ойлгох ёстой.

Тодруулбал, тухайн долоон иргэн нь Эрүүгийн хуулийн тусгай ангийн 17.8 буюу эд хөрөнгө устгах, гэмтээх гэдэг зүйл заалтаар хэрэг бүртгэлтийн хэрэг нээгээд, шалгагдаж байгаа хүмүүс.

Арванхоёрдугаар сарын 5-ны өдрийн үйл ажиллагаатай холбоотойгоор буюу иргэдийн үзэл бодлоо илэрхийлэх нийгмийн дэг журмыг алдагдуулах, эд хөрөнгө устгаж гэмтээх гэсэн заалтаар хэрэг бүртгэлтийн хэрэг нээгээд өчигдөр 461 дүгээр ангид 48 цагийн хугацаатай саатуулах ажлыг зохион байгуулсан.

Ингэхдээ үзэл бодлоо илэрхийлээд байж байхад нь эсвэл Төв талбайгаас баривчилж саатуулсан асуудал байхгүйг хэлье.

Нэмж хэлэхэд, үзэл бодлоо илэрхийлсэн хүн бүрийн зөв биш. Тухайлбал, үзэл бодлоо илэрхийлэх нэрийдлээр гэмт хэрэг үйлдэх, хүний биед халдах, гэмтэл учруулах, эд хөрөнгө устгах зэрэг үйлдэл хийж болохгүй. Энэ чинь өөрөө эрүүгийн хуулийн зүйл заалттай. Цагдаагийн байгууллага гэмт хэргийн шинжтэй зүйлд хэрэг

Categories
мэдээ онцлох-нийтлэл туслах-ангилал улс-төр

Д.Мөнхбат: Үзэл бодлоо илэрхийлэхээр цагддаг, хорьдог, эрхэд нь халддаг жишиг тогтлоо DNN.mn

АН-ын Үндэсний бодлогын хорооны гишүүн, залуусын “Нээлттэй ардчилал” клубийн удирдах зөвлөлийн гишүүн Д.Мөнхбаттай ярилцлаа.

-Иргэн Д.Мөнх-Эрдэнийг ямар үндэслэлээр хорьсон юм бэ?

-Д.Мөнх-Эрдэнийг 2022 оны арванхоёрдугаар сарын 19-ний өдөр Сүхбаатар дүүргийн эрүүгийн хэргийн анхан шатны шүүхээр цагдан хорих, таслан сэргийлэх арга хэмжээ авах прокурорын саналыг үндэслэн цагдан хорих, таслан сэргийлэх хурал болсон. Энд нэг сонирхол татаж буй зүйл нь нэгдүгээрт, дүүргийн прокуророос санал орж ирсэн. Түүнтэй зэрэгцээд Нийслэлийн прокуророос бас санал ирсэн байдаг. Нэгдүгээрх нь, Сүхбаатар дүүргийн хяналтын прокурор, хууль цаазын зөвлөх Н.Пүрэвтогтох гэдэг прокурор сэжигтнийг шүүхийн зөвшөөрөлгүй баривчилсан тухай мөрдөгчийн шийдвэрийг шүүхээр хүчинтэйд тооцуулах саналыг оруулсан юм билээ. Д.Мөнх-Эрдэнэ 2022 оны арванхоёрдугаар сарын 13-ны өдөр Сүхбаатар дүүргийн нэгдүгээр хороонд байрлах Гадаад харилцааны яамны байранд хүмүүстэй очиж, Төрийн нарийн бичгийн дарга Н.Анхбаяртай уулзах нэрийдлээр яамны байр руу нэвтрэхийг завдсан.

Мөн төрийн тусгай албан хаагчдыг үг хэлээр доромжлон биед нь халдаж, орилж хашгичин, Н.Анхбаярыг цохихоор завдсан. Талбай явъя гэж хувцсанаас нь татсан, өдөөн хатгасан, байгууллагын үйл ажиллагааг алдагдуулсан, танхайрсан гэх үндэслэлээр, мөрдөгчийн тогтоолоор, шүүхийн зөвшөөрөлгүйгээр цагдан хорьсон асуудал байгаа. Энэ асуудалтай холбоотойгоор шүүхээр мөрдөгчийн саналыг хүчинтэйд тооцуулах, зөвшөөрөлгүйгээр цагдан хорьсон. 2022 арванхоёрдугаар сарын 18-ны өдөр иргэн Д.Мөнх-Эрдэнэ амралтын өдөр өөрийн ажлын байр дээрээ байхад арав гаруй цагдаа ирж баривчилсан. Тэр үед иргэн Д.Мөнх-Эрдэнийг согтуу байна гэх үндэслэлээр шууд эрүүлжүүлсэн. Ингээд 2022 оны арванхоёрдугаар сарын 19-ний 05:53 цагт шүүхийн зөвшөөрөлгүйгээр шууд хорих 461 дүгээр ангид цагдан хорих таслан сэргийлэх арга хэмжээ авсан. Үүнтэй холбоотойгоор уг мөрдөгчийн шийдвэрийг Сүхбаатар дүүргийн эрүүгийн хэргийн анхан шатны шүүхэд хууль зүйн үндэслэл нь Эрүүгийн хэрэг хянан шийдвэрлэх тухай хуульд зааснаар хойшлуулашгүй тохиолдол гэдэг үндэслэлээр цагдан хорьсон гэх нэрийдлээр прокурорт санал хүргүүлсэн юм билээ. Тус саналын тухайд Сүхбаатар дүүргийн эрүүгийн хэргийн анхан шатны шүүхээс иргэн Д.Мөнх-Эрдэнийг хойшлуулашгүй тохиолдол гэдэг үндэслэлээр буюу эрүүгийн хэрэг хянан шийдвэрлэх тухай хуулийн 31.5-д заасан шүүхийн зөвшөөрөлгүйгээр цагдан хорих хууль зүйн үндэслэл хангагдаагүй байна. Өөрөөр хэлбэл, хүний эрхийг зөрчиж шүүхийн шийдвэргүйгээр, мөрдөгчийн тогтоолоор шууд цагдан хорих хууль зүйн үндэслэлгүй. Тиймээс нэн даруй суллах шийдвэрийг гаргасан байдаг.

-Нийслэлийн прокуророос ямар санал ирсэн юм бэ?

-Дүүргийн прокурорын саналыг шүүхээс хүчингүй болгосны дараа Нийслэлийн прокурорын хяналтын прокурор, хууль цаазын зөвлөх Ганхүлэг гэдэг прокурор Мөнх-Эрдэнэд авагдсан таслан сэргийлэх арга хэмжээг цагдан хорих урьдчилан сэргийлэх арга хэмжээ болгож өөрчлөх, тэрхүү саналаа 30 хүртэлх хоногоор үргэлжлүүлэх ёстой гэсэн саналыг шүүхэд оруулсан. Үүний үндэслэл нь Д.Мөнх-Эрдэнэ гэмт хэрэг үйлдэж болзошгүй талаар үндэслэл бүхий баримт мэдээлэл байгаа тул Эрүүгийн хэрэг хянан шийдвэрлэх тухай хуулийн 14.9.1 дэх хэсгийн 1.3-т заасан үндэслэлээр урьд авагдсан таслан сэргийлэх арга хэмжээг өөрчлөн урьдчилан сэргийлэх, цагдан хорих арга хэмжээг авах шаардлагатай гэсэн саналыг оруулсан. Мөнх-Эрдэнийн тухайд хязгаар тогтоох таслан сэргийлэх арга хэмжээ буюу хилийн хориг авагдсан байсан. Хязгаар тогтоох таслан сэргийлэх арга хэмжээ авснаас хойш хоёр удаа хэрэг бүртгэлтийн хэрэг нээгдсэн байна. Өөрөөр хэлбэл, нэгдүгээрт төрийн өндөр дээд албан тушаалтанд халдахыг завдсан, танхайрсан. Хууль сахиулагчийн хууль ёсны шаардлагыг биелүүлээгүй гэх хоёр үндэслэлээр хэрэг бүртгэлтийн хэрэг Сүхбаатар дүүрэгт нээгдсэн тул үүнтэй холбогдуулан цагдан хорих, таслан сэргийлэх арга хэмжээ зайлшгүй авах ёстой гэсэн үндэслэлийг тайлбарласан. Үүнтэй холбогдуулан иргэн Д.Мөнх-Эрдэнийг 30 хоногоор цагдан хорих таслан сэргийлэх арга хэмжээг авч 461 дүгээр ангид үргэлжлүүлэх нь зүйтэй гэсэн шийдвэрийг шүүхээс гаргасан.

-Та бүхэн энэхүү шүүхийн шийдвэртэй санал нийлэхгүй байгаа хэмээн мэдэгдэл гаргасан шүү дээ. Энэ талаар тайлбарлах уу?

-Энэ шийдвэр хүний эрх зүйн байдлыг дордуулсан үйл явдал боллоо гэж бидний зүгээс үзэж байгаа. Яагаад гэхээр Д.Мөнх-Эрдэнэд хоёр хэрэг бүртгэлийн хэрэг нээчихсэн. Тэр нь хөнгөн Зайлшгүй 30 хоног цагдан хорьж, шалгах шаардлагагүй. Үнэхээр холбогдсон гээд байгаа тэр хоёр хэрэг нь гэм буруутай эсэх нь шүүхээр эцэслэгдэн тогтоогдоогүй. Ийм байхад түүний эрхийг 30 хоног хязгаарлаж байгаа үйлдэл нь Д.Мөнх-Эрдэнийн үзэл бодлоо илэрхийлэх, үг хэлэх эрхийг боон хязгаарлалт тогтоох гэсэн санаархал. Түүнийг хорьж цагдаж байгаа нь эрүүдэн шүүж, түүний эрхэд халдаж байгаа нэг хэлбэр гэж бид хардаж байна. Нөгөөтэйгүүр улс төрийн өндөр албан тушаалтанд халдсан гэх үндэслэлээр иргэний эрхийг хязгаарлаж байгаа үйлдэл хэмээн дүгнэхэд хүрч байна.

-Тэрбээр лайваар олон нийтэд мэдээлэл дамжуулдаг нь ийм байдалд хүргэлээ гэх хардлага бас нийтэд байна шүү дээ?

-Улс төрчдийн, өнөөдрийн төрийн өндөр дээд албан тушаалтнуудын үнэн дүр төрхийг, ялангуяа төрөөс их хэмжээний хохирол учруулж байгаа нүүрсний хулгайчдыг, авлигачдыг эсэргүүцэн, зарлаж, илэрхийлж, шүгэл үлээж байгаа нь хувь хүнийх нь хувьд маш их зориг гаргаж байгаа үйлдэл. Энэ үйлдлийг таслан зогсоохгүй бол маш олон албан тушаалтнуудын булхайтай үйлдлийг илчлээд байх, цаашилбал төрийн өндөр дээд албан тушаалтнууд энэ хүний хэлэх ярихыг хязгаарлая гэсэн зохион байгуулалттай зүйл байхыг үгүйсгэхгүй.

-Та бүхний харж байгаагаар түүнийг эрүүдэн шүүх, ял тулгах магадлалтай юу?

-Бидний харж буйгаар Д.Мөнх-Эрдэнэ хардах эрхтэй. Үндсэн хуулиар заагдсан үзэл бодлоо илэрхийлэх эрхтэй. Үндсэн хуулиар олгогдсон хүн бүр тэгш эрхтэй байх, үзэл бодлоо илэрхийлсний төлөө түүнийг шүүхийн зөвшөөрөлгүйгээр цагдан хорих ёсгүй. Хуульд заагдсан бүх л эрх Д.Мөнх-Эрдэнэд ч гэсэн хамааралтайгаар үйлчлэх учиртай. Заавал түүний эрхийг 30 хоногоор хорих шаардлагагүй гэж бидний зүгээс харж байгаа. Энэ нь санаатайгаар түүний эрхэд халдсан үйлдэл л гэж харж байна.

-Ар гэр, өмгөөлөгчтэй нь уулзуулсан уу?

-Бид өмгөөлөгчидтэй нь холбогдож мэдээлэл авсан. Одоогоор 461 дүгээр ангид хоригдож байгаа. Өмгөөлөгчдийн зүгээс үйлчлүүлэгчтэйгээ уулзах эрх нь нээлттэй. Д.Мөнх-Эрдэнийн зүгээс өмгөөлөгчидтэйгөө уулзахдаа хөдөлгөөнт камерын хяналт дор уулзана гэдгээ илэрхийлсэн юм байна лээ. Одоогоор ар гэрийнхэнтэй нь уулзах зөвшөөрлийг шүүхээс өгөөгүй байгаа.

-Таслан сэргийлэх арга хэмжээ авснаас хойш түүнд шахалт дарамт үзүүлсэн зүйл байгаа болов уу. Биеийн байдал нь ямар байгаа бол?

-Түүний эрүүл мэнд сайн гэсэн мэдээлэл авсан. Таслан сэргийлэх арга хэмжээ авснаас хойш ямар нэгэн дарамт шахалт үзүүлсэн тухай мэдээлэл одоогоор бидэнд алга. Шүүхээс 30 хоногийн хугацаатай таслан сэргийлэх арга хэмжээ авсан шийдвэртэй холбоотойгоор гурав хоногийн дотор ерөнхий шүүгчид гомдол гаргах эрх нь нээлттэй. Үүний дагуу ар гэр, өмгөөлөгчдийн зүгээс прокурорын санал хууль зүйн үндэслэлтэй эсэх дээр гомдол гаргаж байгаа гэсэн мэдээллийг авсан. Бидний зүгээс харахад хүний эрх зөрчиж байгаа үйл баримт харагдаж байна. Үзэл бодлоо илэрхийлэхдээ нийтээр дагаж мөрдөх хэм хэмжээг зөрчиж, зөрчил үүсгэсэн. Эсвэл эрүүгийн гэмт хэргийн шинжтэй үйлдэл гаргасан эсэхийг шүүх тогтооно. Гэтэл хэрэг хянан шийдвэрлэх үйл ажиллагаанд заавал цагдан хорьж хүний эрхэд давхар халдаж байгаад нь бидний зүгээс Хүний эрхийн комисст хандаад байна. Шүгэл үлээж, үзэл бодлоо илэрхийлэхээр цагддаг, хорьдог, эрхэнд нь халддаг жишиг тогтлоо. Бид үүнд гомдолтой, шүүмжлэлтэй хандаж байна.

Categories
мэдээ нийгэм цаг-үе

Үс шинээр үргээлгэх буюу засуулахад тохиромжгүй DNN.mn

Аргын тооллын арванхоёрдугаар сарын 23, Сугар гариг. Билгийн тооллын битүүн, гар одтой, цагаан нохой өдөр. Өдрийн наран 8:40 цагт мандан, 17:02 цагт жаргана. Тухайн өдөр морь жилтнээ аливаа үйлийг хийхэд эерэг сайн ба бар, туулай жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эе эвээ ололцох, хамтын хөдөлмөр эхлэх, гэрээ хэлцэл байгуулах, найр хурим хийх, бэр гуйх, инж өгөх, авах, үнэт эрдэнийн зүйл авах, угаал үйлдэх, хүүхэд үрчлэн авах, гэр, байшингийн суурь тавихад сайн. Нүүдэл суудал хийх, хэрүүл тэмцэл хийхэд муу.

Өдрийн сайн цаг нь бар, луу, могой, бич, тахиа, гахай болой. Хол газар яваар одогсод баруун урагш мөрөө гаргавал зохистой.

Үс шинээр үргээлгэх буюу засуулахад тохиромжгүй.

Categories
мэдээ нийгэм цаг-үе

Улаанбаатарт өдөртөө -13 хэм хүйтэн DNN.mn


УЛААНБААТАР ХОТ ОРЧМООР: Багавтар үүлтэй. Цас орохгүй. Салхи баруун өмнөөс секундэд 3-8 метр. Шөнөдөө Яармаг-Сонгины орчмоор -27…-29 градус, бусад хэсгээр -20…-22 градус, өдөртөө -11…-13 градус хүйтэн байна.

Хур тунадас: Нутгийн баруун хэсгээр үүлшинэ, бусад нутгаар багавтар үүлтэй. Шөнөдөө баруун аймгуудын нутгийн баруун хэсгээр, өдөртөө баруун аймгуудын зарим нутаг болон төвийн аймгуудын нутгийн баруун хойд хэсгээр цас орно.

Салхи: Нутгийн зүүн хэсгээр баруун хойноос, бусад нутгаар баруун өмнөөс секундэд 5-10 метр, Алтайн уулархаг нутгаар секундэд 14-16 метр хүрч ширүүснэ.

Агаарын температур: Шөнөдөө Тэс, Эг-Үүр, Хэрлэн, Онон, Улз, Халх голын хөндий болон Дарьгангын тал нутгаар -31…-36 градус, Их нуурууд болон Дархадын хотгор, Хүрэнбэлчир орчим, Завхан голын эх, Хангай, Хөвсгөл, Хэнтийн уулархаг нутаг, Орхон, Хараа, Ерөө, Туул, Тэрэлж голын хөндийгөөр -25…-30 градус, Хангайн нурууны өвөр бэл болон говийн бүс нутгийн баруун өмнөд хэсгээр -8…-13 градус, говийн бүс нутгийн зүүн өмнөд хэсгээр -17…-22 градус, бусад нутгаар -20… -25 градус, өдөртөө Увс нуур болон Дархадын хотгор, Алтай, Хангай, Хөвсгөлийн уулархаг нутаг, Завхан голын эхээр -21…-26 градус, Эг-Үүр, Хараа, Ерөө, Туул, Онон, Улз, Хэрлэн, Халх голын хөндийгөөр -14…-19 градус хүйтэн, говийн бүс нутгийн баруун өмнөд хэсгээр +3…-2 градус, говийн бүс нутгийн хойд хэсгээр -3…-8 градус, бусад нутгаар -9…-14 градус хүйтэн байна.

БАГАНУУР ОРЧМООР: Багавтар үүлтэй. цас орохгүй. Салхи баруун хойноос секундэд 5-10 метр. Шөнөдөө -27…-29 градус, өдөртөө -15…-17 градус хүйтэн байна.

ТЭРЭЛЖ ОРЧМООР: Багавтар үүлтэй. Цас орохгүй. Салхи баруун өмнөөс секундэд 5-10 метр. Шөнөдөө -27…-29 градус, өдөртөө -12…-14 градус хүйтэн байна.

Categories
мэдээ нийгэм онцлох-нийтлэл туслах-ангилал

ТОЙМ: “Монголын төрд хулгай хийгээгүй нь тунаж үлдэх хэрэгтэй байна” хэмээн өгүүллээ DNN.mn

Өглөө бүр тантай хамт байдаг “Өдрийн сонин”-ы баасан гаригийн дугаар 8 нүүрээр хэвлэгдэж, та бүхний гарт хүрч байна.

“Өдрийн сонин”-ы тэргүүн нүүрт АН-ын дарга С.Эрдэнэ “УИХ
дахь АН-ын
бүлгийн даргыг
хуйвалдааны
аргаар өөрчлөх
оролдлогыг эрх
баригчид хийж
ирсэн” хэмээснийг III нүүрээс үргэлжлүүлж уншаарай.

Эдийн засагч Р.Даваадорж “Төр оролцсон том
дүнтэй хулгайг илрүүлэхэд зохион
байгуулсан сонсгол нь жулдлаа” гэв.

“Өдрийн сонин”-ы нийтлэлийн бодлогыг тодорхойлогч, ард түмний дуу хоолой болдог “Баримт, үзэл бодол” нүүрт “Монголын төрд хулгай хийгээгүй нь тунаж үлдэх хэрэгтэй байна” хэмээн өгүүллээ.

Талбайн тайван жагсаал үр дүнд хүртлээ үргэлжилнэ гэв.

Иргэн Ж.Одонгоо “Эрх баригчдыг
хулгайчаар нь дуудсанаасаа болж
сонсголоос хөөгдсөн” хэмээн ярилаа.

Дэлгэрэнгүй мэдээллүүдийг уншихыг хүсвэл дараах линкээр бүртгүүлж уншина уу. https://admin.dnn.mn/plugi ns/news/login

Эдгээр болон бусад цаг үеийн мэдээ мэдээлэл, ярилцлага, сурвалжлагыг “Өдрийн сонин”-ы баасан гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудангийн салбаруудаас болон сонин борлуулах цэгүүд, Хэвлэлийн биржээс худалдан авах боломжтой. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдан авч болохыг дуулгая. Түүнчлэн “Өдрийн сонин”-ы өөрийн байранд ирж худалдан авч болно.

Уншигч та “Өдрийн сонин”-ыг захиалан уншихыг хүсвэл 9911-2954, 8811-1375 дугаарт холбогдоно уу.

Цахим хэлбэрээр нь захиалахыг хүсвэл 88111375 дугаарт холбогдож дэлгэрэнгүй мэдээллийг аваарай.

“Өдрийн сонин”-той холбоотой мэдээ мэдээллийг 19001987-гоос лавлана уу




“ӨДРИЙН СОНИН” ӨГЛӨӨ БҮР ТАНТАЙ ХАМТ

Categories
мэдээ цаг-үе

Тохижилт, үйлчилгээний ажилчид уртасгасан цагаар ажиллаж байна DNN.mn

Сүхбаатарын талбайд жагсаал, цуглаан эхэлснээс хойш иргэдийн аюулгүй байдал, эрүүл мэндийг хамгаалах болон нийтийн эзэмшлийн зам, талбайг цэвэрлэх ажлыг нийслэлийн холбогдох газрын албан хаагчид гүйцэтгэж байна.

Хот тохижилтын газар ОНӨААТҮГ-ын Тохижилт үйлчилгээний албаны дарга Г.Дөлгөөнмөрөн “Хүмүүс олон, хөл хөдөлгөөн их учир төв талбайн хогийг цэвэрлэх 18 хүнтэй бригад хоёр ээлжээр 06:00-22:00 цагийн хооронд ажиллаж байгаа. Үүссэн нөхцөл байдлаас шалтгаалан хог хаягдал их байна. Мөн халтиргаа гулгаа үүсэхээс сэргийлэн цас цэвэрлэх ажилд бага зэргийн хүндрэл учирсан. Гэхдээ бид шаардлагатай арга хэмжээг шуурхай авч ажиллаж байна. Талбай дахь нийтийн бие засах газар өчигдрөөс эхлээд 24 цагаар ажиллаж, үйлчлэгч, холбогдох ажилчид нь хоёр ээлжээр цэвэрлэгээ хийж байна” гэлээ.

Төв талбайн цэвэрлэгээг хийж буй Хот тохижилтын газар ОНӨААТҮГ-ын зам талбайн үйлчлэгч Ц.Төмөр “Би 06:00 цагаас эхлээд ажиллаж байна. Ер нь жирийн өдрүүдтэй харьцуулахад ачаалал ихэссэн. Жагсаал цуглаантай холбоотойгоор хог хаягдал их болохоор бид уртасгасан цагаар ажиллаж байгаа. Мөн гарсан хог хаягдлыг өдөрт гурван удаа тээвэрлэж байна. Гэхдээ жагсаж байгаа хүмүүс хогоо бөөгнүүлээд тавих зэргээр ухамсартай хандаж байгаа учир хүндрэл учрах нь бага” хэмээв.

Мөн нийтийн эзэмшлийн талбайн цасыг цэвэрлэж байгаа Хот тохижилтын газар ОНӨААТҮГ-ын зам талбайн үйлчлэгч Б.Буяндалай “Талбайн цасыг уг нь камаз машинаар хусаж арилгадаг. Гэхдээ жагсаал болж байгаа, бас сүлд мод зассан учир тэгэх боломж алга. Олон хүний хөлд дагтаршаад эхэлж байгаа цасыг төмөр шүүртэй машинаар цэвэрлэж байна” гэж онцолсон юм.

НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

Categories
мэдээ нийгэм

Сурагчдын амралтаар хүүхдүүдийг осол, гэмтлээс урьдчилан сэргийлж ажиллахыг үүрэг болгов DNN.mn

Нийслэлийн удирдах ажилтнуудын шуурхай зөвлөгөөн өнөөдөр боллоо. Зөвлөгөөнийг Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн удирдан явуулав. Хотын дарга өмнөх шуурхай зөвлөгөөнөөр нийт 10 чиглэлээр үүрэг даалгавар өгснөөс хэрэгжилт 88 хувьтай байжээ. Тухайлбал, инженерийн шугам сүлжээний хэвийн найдвартай ажиллагааг хангаж, ус, дулаан, цахилгаан хангамжаар байгууллага, иргэдийг тасалдуулахгүй, гэнэтийн гэмтэл, саатал гарахаас урьдчилан сэргийлэх, шуурхай ажиллагааны бригад, жижүүрийн хуваарь гарган хяналт тавьж, болзошгүй осол, аливаа эрсдэлээс урьдчилан сэргийлэхийг үүрэг болгосон. Энэ дагуу нийт 303 хүн 86 машин, техниктэй ажиллаж байна.

Мөн сайжруулсан шахмал түлшний баруун, зүүн бүсийн үйлдвэрийн хэвийн ажиллах нөхцөлийг бүрдүүлэхэд онцгойлон анхаарч, түлшний чанар, стандартад хяналт тавьж, айл өрхүүдийг сайжруулсан түлшээр тасалдуулахгүй хангах арга хэмжээ авч ажиллах чиглэл өгсөн. Өдгөө баруун, зүүн үйлдвэрт 14 шугам хэвийн ажиллаж, өдөрт 2000 тонн гаруй шахмал түлш үйлдвэрлэж байна. Нийслэлийн Мэргэжлийн хяналтын газраас түлшний чанарт тогтмол хяналт тавьж, ажиллаж байгаа бөгөөд агуулах, борлуулалтын цэг, үйлдвэрлэж буй шахмал түлш, түүхий эдүүдээс дээж авч, шинжлүүлж байгаа юм.

99 иргэнийг аварч, 3.1 тэрбум төгрөгийн өмч хөрөнгийг хамгаалав

Өнгөрсөн 14 хоногийн нөхцөл байдлын талаар Нийслэлийн Онцгой байдлын газрын дарга, хурандаа Л.Дашням танилцуулав. Тэрбээр “Гал түймэр болон аврах ажиллагааны 86 удаагийн дуудлагаар үүрэг гүйцэтгэж, 99 иргэнийг аварч, 3.1 тэрбум төгрөгийн өмч хөрөнгийг хамгаалан ажилласан. 2022 он гарсаар нийт 2031 удаагийн дуудлагатай байгаа нь өнгөрсөн оны мөн үетэй харьцуулахад 17.8 хувиар өссөн үзүүлэлт. Гамшгаас хамгаалах сургалтыг 19 удаа зохион байгууллаа” хэмээв.

Тээврийн цагдаагийн албаны Нийслэлийн Замын цагдаагийн газрын дарга, хурандаа С.Баасанжав “Нийслэлийн гудамж, замд өдөр болон шөнийн цагаар 191 цэгт 557 алба хаагч хяналт тавьж ажиллаж байна. Хяналт шалгалтаар 23,852, хяналтын камераар 21,329 зөрчил илрүүлж, согтуугаар тээврийн хэрэгсэл жолоодсон 401 зөрчлийг таслан зогсоосон. Мөн дээрх хугацаанд 28 жолооч согтуугаар тээврийн хэрэгсэл жолоодож, осол гаргасан байна. Өнгөрсөн 14 хоногийн хугацаанд Тээврийн цагдаагийн албанд 5008 дуудлага ирж, эд материалын хохиролтой 4936 осол бүртгэгдэж, 72 хүн бэртсэн. Ослын улмаас нэг иргэн нас барсан” гэлээ.

Нийслэлийн Цагдаагийн удирдах газрын дэд бөгөөд Нийтийн хэв журам хамгаалах газрын дарга, хурандаа Б.Оюутболд “14 хоногийн хугацаанд 15,559 гомдол, мэдээлэл ирсэн нь 74 нэгжээр өссөн үзүүлэлт. Гэмт хэргийн 2657 гомдол, мэдээлэл бүртгэгдсэн нь өмнөх 14 хоногтой харьцуулахад 12.1 хувиар буурсан. Хүний амьд явах эрхийн эсрэг гэмт хэрэг өссөн. Бусад гэмт хэргийн тухайд буурсан үзүүлэлттэй байна. Гэр бүлийн хүчирхийллийн дуудлага мэдээлэл мөн багассан” гэлээ. Тэрбээр мөн жагсаалтай холбоотойгоор Сүхбаатарын талбайд өдөрт 50-60 иргэн хонож байгааг танилцуулав.

Сайжруулсан түлшний 95 мянган тонн нөөцтэй байна

Нийслэлийн Агаар, орчны бохирдолтой тэмцэх газрын дарга Ц.Ганболд шахмал түлшний 95 мянган тонны нөөцтэй. Түүхий эд, шуудайн нөөц хангалттай бий. Өдөрт түлшний 3500 тонн захиалга ирж байгаа. 31 компанийн 310 машинаар тээвэр хийж байна. Тавдугаар сараас нөөцийг бэлдсэн гэдгийг танилцууллаа.

Улаанбаатар хотын Ерөнхий менежер бөгөөд Захирагчийн ажлын албаны дарга Д.Ганболд “1157 тонн бодис, 1341 тонн давс цацаад байна. Нөөц хангалттай байгаа хэдий ч гэр хорооллын зам, гудамжинд халтиргаа, гулгаа их үүсэж байгаа учраас ачаалал дийлэхгүй байх үе бий. 2023 оноос дүүргүүдтэйгээ шинэ менежментээр ажиллана. Машин, техникийг шинэчлэх ажил эрчимжиж байгаа” гэлээ.

Нийслэлийн Эрүүл мэндийн газрын дарга Б.Бямбадорж “Томуугийн өвчлөл нийт амбулаторийн үзлэгийн 10-12 хувийг эзэлж байна. Ковид хоёр орон тоонд орсон. Жагсаалтай холбоотойгоор нэг ээлжид гурван баг ажиллаж байна. Өдрийн цагаар дуудлагаар, шөнийн цагт хоёр цаг тутамд үзлэг хийж байгаа. Мөн давхардсан тоогоор 340 хүнд үзлэг хийгээд байна” гэлээ.

Жагсагчдын эрүүл мэнд, аюулгүй байдлыг хангаж ажиллахыг үүрэг болголоо

Шуурхай зөвлөгөөний төгсгөлд дараах үүрэг, даалгаврыг өглөө.

  • Сайжруулсан шахмал түлшний чанар болон борлуулалтад тавих хяналтыг сайжруулах, айл, өрхүүдийг сайжруулсан түлшээр тасалдуулахгүй байхад анхаарч ажиллах.
  • Инженерийн шугам сүлжээний хэвийн найдвартай ажиллагааг хангаж, машин механизм, техник тоног төхөөрөмж, бодис, давсны бэлэн байдлыг хангах, хэрэгжилтэд хяналт тавьж ажиллах.
  • Нийслэлийн 2023 оны худалдан авах ажиллагааны төлөвлөлтийг боловсруулж, батлуулан холбогдох дээд шатны байгууллагад хүргүүлж, хөрөнгө оруулалт, бүтээн байгуулалтаар хийгдэх ажлуудыг олон нийтэд мэдээлэх, зар хүргэх ажлуудыг зохион байгуулах.
  • Баярын өдрүүдэд ажиллах эргүүл, жижүүр томилон ажиллуулж, Захирагчийн ажлын албанаас хяналт тавьж ажиллах.
  • Жагсаал, цуглаантай холбогдуулан жагсагчдын эрүүл мэнд, аюулгүй байдлыг хангах ажлыг хуулийн хүрээнд анхаарч, чиг үүргийн дагуу ажиллах.
  • Нийгмийн хэв журам, гэмт хэрэг зөрчлөөс урьдчилан сэргийлэх, сэрэмжлүүлэх, олон нийтийн амгалан тайван, аюулгүй байдлыг хангах, хяналт шалгалтын ажлыг эрчимжүүлж ажиллах.
  • Ерөнхий боловсролын сурагчдын амралт эхэлсэнтэй холбогдуулан хүүхдүүдийг гэнэтийн осол, гэмтлээс урьдчилан сэргийлэх, сэрэмжлүүлэх, аюулгүй байдлыг хангах чиглэлээр тодорхой ажлуудыг зохион байгуулахыг тус тус үүрэг болгов.

НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

Categories
гадаад мэдээ

Ерөнхийлөгч асан Дональд Трампыг шүүх ёстой гэв DNN.mn

2021 оны 1-р сарын 6-ны өдөр АНУ-ын Капитолын ордонд болсон халдлагыг шалгаж буй Төлөөлөгчдийн танхимын хороо ерөнхийлөгч асан Дональд Трампыгдөрвөн зүйл ангиар яллахыг зөвлөж байна гэж тус хорооны гишүүдийн нэг Ардчилсан намын Жэйми Раскин мэдэгдэв.Тус хорооны гишүүдийн үзэж байгаагаар экс ерөнхийлөгчийг улсын үйл ажиллагаанд саад учруулсан, холбооны засгийн газрыг залилан мэхэлсэн, худал мэдүүлэг өгсөн, зэвсэгт бослого гаргасан гэсэн зүйл ангиар яллах ёстой гэнэ. Угзөвлөмж нь Хууль зүйн яаманд зориулагдсан бөгөөд заавал биелүүлэх үүрэггүй юм.Учир нь эрүүгийн хариуцлага хүлээлгэх нь хууль тогтоогчид бус гүйцэтгэх засаглалын бүрэн эрх юм. Иймээс тус хорооны шийдвэрийн талаар Хууль зүйн яам одоогоор ямар нэгэн тайлбар хийгээгүй байна.

Г.АМАРСАНАА