Month: November 2022

Categories
мэдээ нийгэм цаг-үе

НӨАТ-ын сугалааны тохирол энэ сарын 16-нд болно DNN.mn

НӨАТ-ын сугалааны аравдугаар сарын тохирол энэ сарын 16-нд буюу лхагва гаригийн 13:00 цагт явуулахаар товложээ.

Сугалааны тохирлыг Боловсрол ТВ болон Ebarimt аппликэйшнээр шууд үзэх боломжтой.Энэ удаагийн тохиролд 2022 оны аравдугаар сарын 1-31-ний хооронд худалдан авалт хийж, цахим системд бүртгэгдсэн бүх баримт оролцоно.

НӨАТ-ын сугалааны шинэ журмаар олон баримт бүртгүүлэх тусам азтан болох боломж өндөр хэмээн мэдэгдээд буй. Тодруулбал

  • 1-10 баримт бүртгүүлээд 3-8 орон таарвал 30,000-5 сая төгрөг,
  • 11-50 баримт бүртгүүлээд 3-8 орон таарвал 40,000-10 сая төгрөг,
  • 51-ээс дээш баримт бүртгүүлээд 3-8 орон таарвал 60,000-30 сая төгрөгийн урамшуулал авна.
Categories
мэдээ нийгэм онцлох-нийтлэл туслах-ангилал

​Манай 30 жилийн түүхтэй ардчиллыг Казахстан улс гүйцэж түрүүлэв үү DNN.mn

Монголыг Азидаа ардчиллын загвар улс гэж хөөргөдөг. Энэ үүднээс харвал ардчиллын 30 жилийн түүхтэй улсын хувьд бид бусдадаа загвар болохоос гадна араасаа дагуулах хэмжээний хөгжил дэвшилтэй болчихсон байх ёстой. Гэтэл энэ олон жил өнгөрөхөд ардчиллаа хамгаалах, бэхжүүлэх, хөгжүүлэхэд нэмэр болох олигтой хууль боловсорсонгүй, тушаал шийдвэр ч гарсангүй. АН-ын үед ч тэр, МАН-ын үед ч тэр нэг нь нөгөөгөөсөө дээрдсэнгүй явсаар Монгол дахь ардчиллын гэрэл өнөөдөр улам л бүүдийсээр байгааг бид харж байна. Өнөөдөр Монголын хүн амын 30 орчим хувь нэн ядуу, энэ хэмжээний хүн ам нэн ядуу ангилалд ороход бэлэн болчихсон талаар мэдээлж байгаа. Чинээлэг дундаж давхаргагүй, дийлэнх нь ядуу, багахан хэсэг нь баян гэсэн ангилалд багтах хэмжээнд бодитоор хүрвэл бид дахин ардчиллын талаар ярих ч хэрэггүй болно. Учир нь ард түмэн ажил орлого, өмч хөрөнгөтэй байж л эрх чөлөө, ардчиллын үнэ цэнийг мэдэрч ойлгодог, түүнийхээ төлөө тэмцдэг. Харин ядууст бол алдах зүйл байдаггүй учраас тэд мөнгө өгсөн хүнийг л сонгодог.

Ардчиллын загвар улс гэгддэг Монголд ардчилал ийм байдалтай байхад 30 жил Н.Назарбаевын удирдлага дор коммунист дэглэмтэй байсан Казахстан улсын шинэ ерөнхийлөгч К.Токаев сүүлийн хоёр гурван жилийн дотор гайхалтай сайн өөрчлөлтүүдийг хийж байна. Гучин жилийн түүхтэй Монголын ардчилал гурван жилийн түүхтэй Казахстаны ардчиллаас хол хоцорч эхэллээ.

2019 онд Казахстаны ерөнхийлөгч болсон К.Токаев энэ богино хугацаанд нийгмийн амьдралын олон салбарыг хамарсан шинэчлэлийг эхлүүлж байна. Ажиглагчид түүнийг улс орноо зөв зүгт залж байна хэмээн үнэлсэн байх юм. К.Токаев энэ богино хугацаанд ямар ямар өөрчлөлт хийв гэдгийг анзаарч нэг харъя.

Токаевын шинэчлэлийн зорилго нь улс орондоо ардчиллыг бий болгох. Үүний тулд тэрбээр Казахстаны улс төрийн тогтолцоог өөрчлөх алхмуудыг хийж байна. Өнгөрсөн зургадугаар сард бүх нийтийн санал асуулгаар Үндсэн хуулиндаа өөрчлөлт оруулсан нь түүний шинэчлэлийнх нь хамгийн чухал алхам болж байна. Тухайлбал:

-Супер ерөнхийлөгчийн засаглалын загвараас эрх мэдлээ шилжүүлэх замаар парламентын үүргийг бэхжүүлнэ.

-Тусгаар тогтносон Казахстан улсыг үндэслэгч хэмээх анхны ерөнхийлөгчийн статусын тухай заалтуудыг Үндсэн хуулиас хасах,

-Ерөнхийлөгчийн хамаатан, ойр дотны хүмүүс улс төрийн албан тушаал болон төрийн оролцоотой салбаруудад удирдах албан тушаал хаших эрхгүй гэсэн шинэ заалтыг Үндсэн хуульд оруулж өгчээ. Мөн цаазын ялыг халсан зэрэг маш том өөрчлөлтүүдийг зоригтой хийсэн байна.Токаевын хийж буй ардчилсан шинэчлэл нь Казахстанд хүний эрхийг хамгаалах, иргэний нийгмийн хөгжлийг цоо шинэ түвшинд гаргах боломжийг олгох нь тодорхой юм.

Казахстанд өдгөө ийм өөрчлөлтүүд үргэлжилж байна. Иргэд нь хүссэн үедээ жагсаал цуглаан хийж, төр нь тэднийгээ хүндэтгэн сонсохыг хичээж эхэлжээ. Гэтэл Монголд юу болж байна вэ. Үг хэлж, үзэл бодлоо илэрхийлэх гэсэн залуусыг баривчлан хорьж байна. Шүүхээр яллаж байна. Цахим орчинд ч үг хэлэхээсээ хүмүүс айж эхэлж. Учир нь хэн хурц дуугарч, хэн эрх баригчдыг шүүмжилж байна түүнд цагдаагийн зарлан дуудах ирж, илт болон илт бусаар зоригийг нь мохоох ямар нэгэн үйлдлийг тасралтгүй хийж байна.

Казахстанд ах дүү, амраг саднаараа сүлбэлдэн төрийн эрх барьж байсан тогтолцоог нураан, ингэж болохгүй хэмээн Үндсэн хуулиндаа суулгаж өгч байхад манай дарга нар зөвхөн ах дүү, танил талаа генерал болгон, хамаг л эрх мэдэл, албан тушаалыг өгч байх жишээтэй. Даргын хүүхэд, даргын эхнэр, нөхөр, ах дүү, ангийн хүүхдүүд л албан тушаалд очиж, энэ нь үе дамжин дархлагдах хандлагатай болоод хэвшиж тогтох нь.

Манай улстөрчид Үндсэн хуулийг өөрчлөхдөө зөвхөн өөрсдөдөө ашигтай нөхцөл байдлыг л тусгахыг хичээдэг. Хар л даа, дөнгөж сая Үндсэн хуулиа өөрчлөөд “давхар дээл”-тэй болж санаа нь амраад сууж байгаа. Гэтэл улс орноо боддог, арай холыг хардаг удирдагч бол улс оронд нь дахин нэг дарангуйлагч гарч ирэхээс болгоомжилж,

удирдаж байдаг хэсэг бүлэг хүмүүс бий. Ерөнхийлөгчийн засаглал, эрх мэдэл хэт нэг хүн дээр төвлөрөхөөр улс орноо хэрхэн уруудуулж болдгийг биеэрээ мэдэрсэн Казахстаны ард түмэн парламентаа бэхжүүлэхээр чармайж байна.

Гучин жилийн хугацаанд Монголд хэн ч Токаев шиг шийдвэр гаргаж чадсангүй. Хэн ч холыг харсан, дорвитой өөрчлөлт хийсэнгүй, хийхийг ч хичээсэнгүй. Улстөрчид улс орноо бодохоосоо илүүтэй зөвхөн амин хувиа хоохойлж өдий хүрчээ.

Азийн ардчиллын загвар хэмээн хөөрцөглөдөг, 30 жилийн түүхтэй Монголын ардчилал гуравхан жилийн дотор Казахстаны ард орчихсон байна.

Categories
гадаад мэдээ цаг-үе

Агаарын шоуны үеэр хоёр онгоц мөргөлджээ DNN.mn

АНУ-ын Техас мужид болсон агаарын шоуны үеэр Дэлхийн II дайны үеийн хоёр онгоц мөргөлджээ.

Осолдсон хоёр онгоцонд хэдэн хүн байсан, амьд үлсэн хүн байгаа эсэх мэдээлэл одоогоор тодорхойгүй байна.

Дэлхийн II дайны үеийн онгоцнуудын анхны агаарын шоу гэж тодорхойлсон АНУ-ын “Wings Over Dallas Airshow”-ын үеэр гарсан уг ослыг Холбооны Нисэхийн Захиргаанаас мөрдөн шалгаж буй аж.

Мөргөлдсөн хоёр онгоцны нэг нь “Нисдэг цайз” хэмээн нэрлэгддэг Боинг В-17 байжээ. Ахмад дайчдын баярт хэмээн тодотгосон агаарын шоуг баасан гарагт 4000-6000 мянган хүн үзжээ. Гурван өдөр үргэлжлэх хөтөлбөртэй шоуны үеэр онгоц осолдсонд Даллас хотын дарга Эрик Жонсон эмгэнэл илэрхийлсэн байна.

Тэрбээр “Ослын бичлэгүүд зүрх шимшрүүлж байна. Олон гэр бүлд баяр баясал бэлэглэж, түүхийг танин мэдүүлэх зорилгоор тэнгэрт хөөрсөн тэдгээр эрхмүүдийн дурсгалд зориулж бүгд залбирцгаая” хэмээн твиттер хуудаснаа бичжээ.

В-17 бөмбөгдөгч онгоц дэлхийн II дайнд Германы эсрэг хийсэн агаарын дайнд ялалт байгуулахад чухал үүрэг гүйцэтгэж байв. Харин хоёр дахь онгоц болох P-63 Kingcobra нь мөн дэлхийн II дайнд ашиглагдаж байсан сөнөөгч онгоц байжээ.

Categories
мэдээ спорт цаг-үе

Монголын шигшээ Вьетнамын багийг 88:77 харьцаагаар хожлоо DNN.mn

Азийн аварга шалгаруулах “FIBA ASIA CUP” сагсан бөмбөгийн тэмцээний урьдчилсан шатны тоглолтууд энэ сарын 10-14-ны өдрийн хооронд зохион манай улсад зохион байгуулагдаж байгаа билээ.

Монголын шигшээ баг өчигдөр гурав дахь тоглолтоо Вьетнам улсын шигшээ багтай хийсэн бөгөөд 88:77 харьцаагаар хожлоо.

Шигшээ баг уржигдар Малайзыг хүндхэн тоглолтын эцэст 94-92 харьцаагаар, өчигдөр Таитиг 62:91 харьцаагаар илүүрхэн хожоод байв. Ийнхүү өнөөдөр хэсэгтээ гурван хожилтой болж дараагийн шатанд шалгаран тоглох болзлоо хангалаа. Тэд маргааш хэсгийг тэргүүлэгч Тайландын шигшээ багтай тоглож хэсгийн хэддүгээр байраар шалгарахаа шийднэ.

Categories
мэдээ онцлох-нийтлэл туслах-ангилал улс-төр

И.Мөнхжаргал: УДШ цаг хожихын тулд улс төрийн захиалга биелүүлж байна DNN.mn

АН-ын генсек И.Мөнхжаргалтай ярилцлаа.

-Ардчилсан намын нэхэмжлэлтэй Улсын дээд шүүх(УДШ)-д холбогдох захиргааны хэргийг давж заалдах шатны шүүх хянан хэлэлцэх байсан. Гэтэл УДШ өмгөөлөгч авах үндэслэлээр хойшлуулсан гэх юм. Энэ үнэн үү, юу болоод байгаа юм бэ?

-Үнэн. Монгол Улсад хуулийн хамгийн сүүлийн шатанд хэргийг хянан шийдвэрлэдэг, хууль тайлбарладаг байгууллага бол УДШ гэдгийг бүгд мэднэ. Тэгвэл энэ байгууллага захиргааны маргаанд орохдоо гэрчилгээний ард гурван өгүүлбэр сольж бичихийн тулд төсвийн мөнгөөр өмгөөлөгч авна гэнэ. Иргэдийг хэлмэгдүүлээгүй гэдэг баталгаа алга. Яагаад гэвэл ур чадваргүй, хууль зүйн мэдлэггүй хүмүүс УДШ-ийн Тамгын газарт ажилладаг юм байна. Энэ бол хуулийн байгууллагын ялзрал дээд цэгтээ хүрсний нотолгоо.

-УДШ улс төрийн намтай шүүхдэлцдэг тохиолдол өмнө гарч байсан уу?

-Монгол Улсад бүү хэл, дэлхийд ч ийм тохиолдол гарч байгаагүй.

-Гэрчилгээн дээр гурван өгүүлбэр сольж бичихийн тулд УДШ өмгөөлөгч авсан гэж та хэллээ. Гэтэл Ардчилсан намын бүртгэлтэй холбоотой асуудал үүсээд хоёр жил болох гэж байна. Үүний цаана ямар улс төр яваад байна вэ?

-УДШ нь улс төрийн намын бүртгэлийг л хөтөлдөг. УДШ-ийн гаргасан шийдвэрийг Тамгын газар нь биелүүлэх ёстой. Гэтэл шүүхээс гарсан 4-5 удаагийн шийдвэрийг Тамгын газар нь биелүүлээгүй. Тамгын газрын ажилчид гэрчилгээний ард бичилт хийх л ёстой юм. Энэ нь ямар нэгэн шүүх үйл ажиллагааны процесс биш, улсын бүртгэлийн чиг үүргийг хэрэгжүүлж байгаа ажил. Энэ ажлаа хий гэж бид олон удаа шаардсан. Биелүүлээгүй учир Захиргааны хэргийн Анхан шатны шүүхэд хандсан. Захиргааны хэргийн анхан шатны шүүхээр уг асуудлыг хэлэлцээд УДШ гэрчилгээн дээр бичилт хийх нь зүйтэй гэж үзсэн. Гэрчилгээнд хийх ёстой бичилт бол маш энгийн. “Иргэн С.Эрдэнийг Ардчилсан намын бүртгэлд бүртгэхээс татгалзав. Ц.Тувааныг бүртгэлд бүртгэв, хасав” гэх мэт процессын тэмдэглэлийг хийх ёстой юм. Харамсалтай нь УДШ үүнийг ойлгохгүй, эсвэл эсэргүүцэж улс төрийн намтай шүүхийн маргаан үүсгэсэн. Сүүлдээ энэ гуравхан өгүүлбэрийг бичих нь зөв эсэхийг хариуцсан ажилтан нь хүртэл ойлгохоо байж өмгөөлөгч авахыг хүссэн.

Өмгөөлөгч гэдэг бол тухайн иргэнд эрх зүйн тусламж үзүүлэх үүрэгтэй. Өөрөөр хэлбэл, УДШ-ийн дарга өөрөө ажлаа хийж чадахгүй байгаа учраас улсын төсвөөс мөнгө гаргуулж өмгөөлөгч авах гэж байна. Энэ хүний хувийн эрх ашиг зөрчигдөөгүй. Зөвхөн ажлаа хийх чадваргүй, хийж чадахгүй байгаа учир эрх зүйн туслалцаа хүсэж байгаа нь маш том эмгэнэл. Эсвэл энэ албан хаагч улс төрийн даалгавар биелүүлж байна. Өөр ямар нэгэн ойлголт байхгүй.

-Хэрэв тийм бол 2024 оны сонгуулиас өмнө танай нам учир зүйгээ олохгүй бол энэ шүүхийн асуудал чинь дуусахгүй юм биш үү?

-УДШ-ийн дээрх албан тушаалтан ажил мэргэжилдээ тэнцэхгүй хүн. Тийм учраас өмгөөллийн үйлчилгээ авч байна гэж ойлгож байна. Эсвэл цаг хожих гэж байгаа улс төрийн захиалга биелүүлэгч.

-УДШ дээр үүсээд байгаа эл асуудал АН-д өнөөдрийг хүртэл хэдий хэмжээний хохирол учруулаад байна вэ?

-Ардчилсан нам өнөөдөр ямар нөхцөл байдалтай байгааг нийгэм харж байна. Үүнийг ярихаар хүмүүс Ардчилсан намын дотоод асуудал мэтээр ойлгодог . Гэхдээ би намын хохирол гэхээс илүү нийгмийн хохирлын тухай яримаар байна. Нэгдүгээрт, өнөөдрийн байдлаар Монгол Улсын 2023 оны төсвийг хамгийн их зарлагатайгаар баталлаа. 20.5 их наяд төгрөг. Харамсалтай нь энэ асуудалд Ардчилсан нам хяналт тавих, сөрөг хүчний дуу хоолойг хүргэх бололцоо байсангүй. Хоёрдугаарт, Монгол Улс бол ардчилсан орон. Гэтэл хүний эрхийн асуудал хөсөр орхигдож, хүний эрхийн зөрчлүүд дээд цэгтээ хүрсэн. Үг хэлж, үзэл бодлоо илэрхийлсэн хүн яллагдагч болдог боллоо. Гуравдугаарт, нэг намын тогтолцоо руу хазайж эхэллээ. Энд сөрөг хүчний дуу хоолой дутагдаж байна. Ард түмэн “АН сөрөг хүчний үүргээ биелүүл” гэж байгаа. Гэвч одоогийн нөхцөл байдлаас хамааран МАН-ын зүгээс бидний хэлсэн бүхнийг АН-ын дотоод асуудал мэтээр гуйвуулж нийгэмд ойлгуулж, Ардчилсан намыг хүчгүй, сүргүй мэт харагдуулах гэж хичээж байна. Монгол Улс цаашдаа парламентын тогтолцооноосоо буцах аюул заналхийлж байна. Энэ бол нийгэмд учирч болох асар том хохирол. МАН-ыг хазайлгах хүч зөвхөн АН-д л байсан. Учир нь АН олон намын нэгдэл, олон хүний тэнцвэрийг 30 гаруй жил хадгалж ирсэн. Гэтэл тэд энэ том сөрөг хүчнийг үгүй хийж, өнөөдрийг хүртэл Ардчилсан нийгмийг босголцож ирсэн нэг хөлөө хөрөөдөж хаяхыг хүсч байна. Хэрэв тэд хүссэндээ хүрвэл Монгол Улс нэг намын тогтолцоо буюу дарангуйллын нийгэмд шилжинэ.

-Ер нь танай нам яавал эв цавандаа орох юм бэ. Брюссельд уулзсан төлөөллүүд ажлын хэсэг байгуулсан гэл үү. Бас Х.Баттулга, С.Эрдэнэ хоёр эвлэрэх ажлын хэсэг байгуулсан гэж байсан. Тал талд уулзалтууд хийгээд яваа гэж дуулдах юм. Үр дүн байна уу?

-2022 оны наймдугаар сарын 14-нд Үндэсний бодлогын хороо хуралдаж АН-ын Ерөнхий нарийн бичгийн дарга И.Мөнхжаргал миний биед намын гишүүдийг эвлэрүүлэх, цаашид АН эв нэгдэлтэйгээр ажлаа явуулах тухай үүрэг өгсөн. Үүний дагуу миний бие Ардчилсан намын шат шатны бүх гишүүдтэй янз бүрийн хэлбэрээр уулзаж намын эв нэгдлийн тухай, АН-ынхаа цаашдын ирээдүйн тухай санал солилцож байна. Одоогоор энэ тухай дэлгэрэнгүй мэдээлэл өгөх боломжгүй.

-С.Баярцогт хурдан ирж намаа цэгцлээсэй гэсэн хүлээлт АН-ын жирийн гишүүд дэмжигчдэд байгаа бололтой. Явж, явж намын даргын асуудал, ах нарын эрх ашгийн зөрчилдөөнөөс танай нам тархай бутархай болсон шүү дээ. Тэд байгаа цагт энэ нам хэзээ ч эвэндээ орохгүй юм биш үү?

-Улс төрийн нам хүнд нөхцөлд орлоо гэхэд нэг гишүүн ирээд намаа авардаг тухай ойлголт байхгүй. Мэдээж энэ хүн бол намаа аврахын тулд намынхаа эв нэгдлийн төлөө идэвхтэй зүтгэж буй АН-ын нэгэн гишүүн. АН-ыг өнөөгийн нөхцөл байдлаас нэг биш нийт 200 мянган гишүүн хамтдаа зүтгэж байж гаргаж чадна. Эндээс хэн нэгнийг нь онцолж, хэн нэгнийг үгүйсгэж ярих аргагүй. АН гурван үеийн хэлхээгээ хадгалж явах учиртай. Одоогоор үүссэн нөхцөл байдалд аль нэг үеийг буруутгаж, үгүйсгэх биш бид тойрч суугаад ярилцаж шийдэлд хүрэх нь чухал байна. Мэдээж улс төрд хэн нь манлайлагч байх вэ гэдгийг намын гишүүд шийднэ.

-АН хурдан нэгдэж нийлэхгүй бол дараагийн сонгууль хаяанд ирлээ. Мэдээж шүүх дээр танай асуудал сунжирсаар сонгуультай золгох нь тодорхой. Сөрөг хүчингүй энэ улс яаж доройтож байгаагийн горыг ард түмэн амсаж байна шүү дээ?

– Хамгийн их хохирч байгаа нь ард түмэн. Сөрөг хүчингүй эрх баригчид, дарангуйллын тогтолцоо, дураараа дургисан төсвийн захиран зарцуулалт гэх мэтчилэн маш их сөрөг үр дүн гарч байна. 2024 оны УИХ-ын сонгуульд Ардчилсан нам нэгдэж орох болно.

Categories
мэдээ нийгэм цаг-үе

Цагаагчин хонь өдөр DNN.mn

Аргын тооллын арваннэгдүгээр сарын 14, Сумъяа гариг. Билгийн тооллын 21, найралт эх одтой, цагаагчин хонь өдөр. Өдрийн наран 7:56 цагт мандан, 17:17 цагт жаргана. Тухайн өдөр гахай, туулай жилтнээ аливаа үйлийг хийхэд эерэг сайн. Эл өдөр элдэв үйлд хянуур хандах хэрэгтэй ба ан гөрөө хийх, мал адгуус муулах, хишиг даллага дуудуулах, насан бүтээл хийлгэх, мал худалдан авах, мал түгээх, сахил санваар авах, хануур төөнүүр хийлгэх, хийморийн дарцаг хатгахад сайн. Эрдэнийг гадагш өгөх, уул овоо тахихад муу.

Өдрийн сайн цаг нь бар, туулай, могой, бич, нохой, гахай болой. Хол газар яваар одогсод зүүн хойш мөрөө гаргавал зохистой.

Үс шинээр үргээлгэх буюу засуулахад тохиромжгүй.

Categories
мэдээ нийгэм цаг-үе

ЦАГ АГААР: Улаанбаатарт өдөртөө 2 хэм хүйтэн DNN.mn

УЛААНБААТАР ХОТ ОРЧМООР: Багавтар үүлтэй. Цас орохгүй. Салхи баруунаас секундэд 3-8 метр. Шөнөдөө Яармаг-Сонгины орчмоор -18…-20 градус, бусад хэсгээр -12…-14 градус, өдөртөө 0..-2 градус хүйтэн байна.

Хур тунадас: Нутгийн хойд хэсгээр солигдмол үүлтэй, бусад нутгаар багавтар үүлтэй. Шөнөдөө Хангай, Хөвсгөлийн уулархаг нутгаар, өдөртөө Хөвсгөлийн уулсаар цас орно. Бусад нутгаар цас орохгүй.

Салхи: Ихэнх нутгаар баруунаас секундэд 5-10 метр.

Агаарын температур: Шөнөдөө Дархадын хотгор, Хэнтийн уулархаг нутаг, Завхан голын эх, Хүрэн бэлчир орчмоор -24…-29 градус, Монгол-Алтай, Хангай, Хөвсгөлийн уулархаг нутаг, Идэр, Тэс, Туул, Тэрэлж голын хөндийгөөр -19…-24 градус, Их нууруудын хотгор болон говийн бүс нутгийн өмнөд хэсгээр -3…-8 градус, бусад нутгаар -10…-15 градус хүйтэн, өдөртөө Дархадын хотгор болон Завхан голын эхээр -10…-15 градус, Хөвсгөл, Хэнтийн уулархаг нутаг, Хүрэнбэлчир орчим, Идэр, Тэс, Туул, Тэрэлж, Хэрлэн голын хөндийгөөр -5…-10 градус хүйтэн, Их нууруудын хотгор болон говийн аймгуудын нутгийн өмнөд хэсгээр +4…+9 градус дулаан, бусад нутгаар -2 …+3 градус дулаан байна.

БАГАНУУР ОРЧМООР: Багавтар үүлтэй. Цас орохгүй. Салхи баруунаас секундэд 4-9 метр. Шөнөдөө -22…-24 градус, өдөртөө -8…-10 градус хүйтэн байна.

ТЭРЭЛЖ ОРЧМООР: Багавтар үүлтэй. Цас орохгүй. Салхи баруунаас секундэд 4-9 метр. Шөнөдөө -20…-22 градус, өдөртөө -5…-7 градус хүйтэн байна.

Categories
мэдээ нийгэм онцлох-нийтлэл туслах-ангилал

ТОЙМ: “МАН баячуудыг дарамталбал ядуус баярлана гэж бодож татвар нэмж байгаа нь алдаатай бодлого юм” гэв DNN.mn

Өглөө бүр тантай хамт байдаг “Өдрийн сонин”-ы даваа гаригийн дугаар 12 нүүрээр хэвлэгдэж, та бүхний гарт хүрч байна.

“Өдрийн сонин”-ы тэргүүн нүүрт АН-ын генсек И.Мөнхжаргал “УДШ цаг
хожихын тулд улс төрийн
захиалга биелүүлж байна” гэснийг “Улс төр” нүүрээс үргэлжлүүлж уншаарай.

Төмөр замын инженер О.Сүрэн “БНХАУ манай
хил рүү өргөн царигаар төмөр
зам тавьчих, нүүрс авъя гэх
гэрээ бидэнтэй хийхгүй байх” гэв.

“Өдрийн сонин”-ы нийтлэлийн бодлогыг тодорхойлогч, ард түмний дуу хоолой болдог “Баримт, үзэл бодол” нүүрт “МАН баячуудыг дарамталбал ядуус баярлана гэж бодож татвар нэмж байгаа нь алдаатай бодлого юмзохицуулалт” гэв.

Япон улсын Каназава
Их сургуулийн профессор,
АШУҮИС-ийн зочин
профессор АУ-ны доктор Д.Нямбаяр “Дотооддоо
оношлуур
хийж эхэлснээр
импортын
оношлуурын үнэ
20 мянга болтол
буурсан” хэмээснийг I болон IV нүүрээс уншаарай

ШИНЭ намын ерөнхий
зөвлөлийн гишүүн Б.Мөнхжаргал “Д.Батзандан Хөгжлийн банктай холбоогүй,
холбогдсон асуудал нь гэмт хэрэг ч биш” хэмээн ярилаа.

“Баримт, үйл явдал”-ын VII нүүрт Түгжрэлийн асуудлыг
гурван жил судалсан,
автобустай явуулын
хоолны газрын санаачлагч С.Даяар “Жинхнээсээ
Хархоринг хот болгоно
гэдэгт итгэхгүй байна” гэлээ.

Дэлгэрэнгүй мэдээллүүдийг уншихыг хүсвэл дараах линкээр бүртгүүлж уншина уу. https://admin.dnn.mn/plugi ns/news/login

Эдгээр болон бусад цаг үеийн мэдээ мэдээлэл, ярилцлага, сурвалжлагыг “Өдрийн сонин”-ы даваа гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудангийн салбаруудаас болон сонин борлуулах цэгүүд, Хэвлэлийн биржээс худалдан авах боломжтой. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдан авч болохыг дуулгая. Түүнчлэн “Өдрийн сонин”-ы өөрийн байранд ирж худалдан авч болно.

Уншигч та “Өдрийн сонин”-ыг захиалан уншихыг хүсвэл 9911-2954, 8811-1375 дугаарт холбогдоно уу.

Цахим хэлбэрээр нь захиалахыг хүсвэл 88111375 дугаарт холбогдож дэлгэрэнгүй мэдээллийг аваарай.

“Өдрийн сонин”-той холбоотой мэдээ мэдээллийг 19001987-гоос лавлана уу




“ӨДРИЙН СОНИН” ӨГЛӨӨ БҮР ТАНТАЙ ХАМТ

Categories
гадаад мэдээ

АНУ Украинд 400 сая ам.долларын шинэ багц цэргийн тусламж үзүүлнэ DNN.mn

АНУ Украинд 400 сая ам.долларын шинэ багц цэргийн тусламж үзүүлэхээр болсныг тус улсын Батлан хамгаалах яам пүрэв гарагт мэдэгджээ.

“Өнөөдөр Батлан хамгаалах яам аюулгүй байдал, батлан хамгаалах салбарт Украины хэрэгцээг хангах зорилгоор ерөнхийлөгчийн 400 сая ам.долларын аюулгүй байдлын багц тусламжийг хуваарилсныг зарлаж байна” гэж Пентагоны хэвлэлийн мэдээнд дурдсан байна.

Энэхүү багц тусламжийн хүрээнд “Hawk” агаарын довтолгооноос хамгаалах системд зориулсан пуужин, түүнчлэн “Stinger” пуужингаар тоноглогдсон “Avenger” зенитийн пуужингийн дөрвөн цогцолбор, “HIMARS” пуужингийн системд зориулсан нэмэлт сум, 155 мм-ийн их бууны сум 21 мянгыг, өндөр нарийвчлалтай 155 мм-ийн их бууны сум 500-г, хүйтэн цаг агаарын хэрэгсэл болон бусад цэргийн техникийг Киевт илгээх юм.

Энэ нь 2021 оны наймдугаар сараас эхлэн АНУ-аас Украинд үзүүлж буй 25 дахь багц тусламж гэдгийг хэвлэлийн мэдээнд онцолжээ.

Ерөнхийлөгч Жо Байдены засаг захиргааны бүрэн эрхийн хугацаа эхэлснээс хойш АНУ Украинд нийтдээ 19.3 тэрбум гаруй ам.долларын цэргийн тусламж үзүүлжээ.

Categories
мэдээ нийгэм

Энэ сард бүх нийтээрээ хоёр өдөр амарна DNN.mn

Нийтээр тэмдэглэх баярын болон тэмдэглэлт өдрүүдийн тухай хуульд заасны дагуу энэ арваннэгдүгээр сарын 24 болон 26-ны өдрүүдэд бүх нийтээр амарна.

Тодруулбал, өвлийн тэргүүн сарын шинийн 1-нийг Их Эзэн Чингис хааны мэндэлсэн өдөр болгон тэмдэглэдэг бөгөөд энэ сарын 24-ний өдөр тохиож байгаа юм. Харин арваннэгдүгээр сарын 26-ны ням гарагт Улс тунхагласны өдөр тохиож байгаа юм.