Австралийн Холбооны Улсад ажлын айлчлал хийж буй Монгол Улсын Шадар сайд С.Амарсайхан айлчлалын эхний өдөр АХУ-ын Гадаад хэргийн сайд Пэнни Вонгтой уулзаж, хоёр болон олон талт хамтын ажиллагааны талаар өргөн хүрээнд ярилцав.

Өнөөдөр Монгол брахми бичиг судлаач, хэлний эрдэмтэн мэргэд, эх хэлнийхээ төлөө сэтгэл зүрхээ зориулдаг хүн бүхний баярын өдөр байлаа.

Солонгод Л.Хурцбаатар багш Хүйс толгойн бичээсийг тайлснаар монголчуудын бичиг үсгийн түүхийг даруй 600 жилээр урагшлуулсан билээ. Ингэснээр монголчууд нүүдэлчдийн дундаа хамгийн анх бичиг үсэгтэй байсан соёлт ард түмэн гэгдэж байгаа юм. Л.Хурцбаатар багш одоогоор 4 удаагийн сургалтаар нийт 90 гаруй эрдэмтэн, хэлний мэргэжилтэн, судлаачдад монгол брахми бичгийг заагаад байна.

Өнөөдөр Гандантэгчэнлин хийдийн Батцагаан дуганд “Монгол Брахми бичгийн Олон улсын Эрдэм шинжилгээний нийгэмлэг”-ийн бүх гишүүдийн анхдугаар хурал боллоо. Уг хуралд хэл, түүх, шашин, археологийн чиглэлийн томоохон эрдэмтэн, судлаачид мөн Монгол брахми бичгийн сургалт төгсөгчид буюу Л.Хурцбаатар багшийн шавь нар оролцсон юм.
Хурлын үеэр шавь нар нь багшдаа хүндэтгэл үзүүлж, эрдмийн ажилд нь амжилт хүслээ.

Д.САРУУЛ

УИХ-аар батлагдсан “Алсын хараа 2050” Монгол Улсын хөгжлийн урт хугацааны бодлогыг иргэдэд сурталчлан таниулах зорилгоор төрийн албан хаагчдыг сургалтад хамруулах чиглэлийг Засгийн газраас өгчээ.

Энэ хүрээнд есдүгээр сарын 9, 10-нд Батлан хамгаалах яам болон Барилга, хот байгуулалтын яамны албан хаагчид тус сургалтад хамрагдах хуваарьтайгаар Удирдлагын академи дээр зохион байгуулсан байна. Гэвч БХЯ-аас 90 албан хаагч хамрагдах байсны 70%, БХБЯ-ны 100 албан хаагчид оролцохоос 37 хувийн ирцтэй байжээ.

“Иймд Засгийн газрын өнөөдрийн хуралдаанаар сургалтын арга хэмжээнд оролцоогүй албан тушаалтнуудад цалингийн 10%-ийн торгуулийн арга хэмжээ авах чиглэл өгсөн. Хэрэв эдгээр албан хаагчид Засгийн газраас гаргасан бодлогыг хэрэгжүүлэх боломжгүй байгаа тохиолдолд дараагийн удаад ажил, албан тушаалаас нь чөлөөлөх арга хэмжээ авах тогтолцоотойг сануулж байна” хэмээн ЗГХЭГ-ын дарга Д.Амарбаясгалан хэллээ.

Мөн цаашдаа Засгийн газрын хэрэгжүүлэгч Удирдлагын академийн үүрэг чиглэлд илүү тодотгол хийж, мэргэжлийн зэрэг олгодог сургалтаас аль болох татгалзаж, Засгийн газрын хэрэгжүүлж ажиллаж байгаа бодлого зарчмыг төрийн албан хаагчдад бүх шатанд нь богино хугацааны сургалт хэлбэрээр өгүүлдэг чиглэлийг баримталж ажиллахаар болж байгаа гэдгийг мөн танилцуулав.

Ахуйн гал түймрийн улмаас бага насны хоёр хүүхэд өртөж амиа алдсан харамсалтай явдал өчигдөр болжээ.

Тодруулбал, Дархан-Уул аймаг, Дархан сумын нутаг, … гудамжинд байшин шатаж байна гэсэн дуудлагыг есдүгээр сарын 14-ний 02:41 цагт Онцгой байдлын газар хүлээн авсан байна.

Энэ дагуу тус аймгийн Онцгой байдлын газрын Гал түймэр унтраах, аврах 22 дугаар ангийн алба хаагчид 02:49 цагт очиход 8х12 метрийн хэмжээтэй байшин, таван ханатай гэр шатаж байсныг 03:20 цагт гал түймрийн тархалтыг зогсоож, 04:38 цагт бүрэн унтраажээ.

Харамсалтай нь уг гал түймэрт найм болон гурван настай хоёр хүү өртөж нас барсан гэж Онцгой байдлын ерөнхий газраас мэдээллээ.

ГЭРТЭЭ БАЙГАА ХҮҮХДИЙГ БОЛЗОШГҮЙ ОСОЛ, ГЭМТЛЭЭС СЭРГИЙЛЭХ ЗӨВЛӨМЖ

Түлэгдэхээс сэргийлэх

• Хүүхэд авч байхдаа халуун хоол болон уух зүйлс хэрэглэхгүй байх,
• Халуун хоол болон цайг хүүхэд хүрэхээргүй газар болон ширээний ирмэгээс хол зайд тавих,
• Хүүхдээ тэвэрч байх үедээ халуун плитка болон зуухан дээр хоол хийхгүй байх,
• Тогоо болон хувингийн бариулыг зуухны цаад тал руу харуулж тавих,
• Зуухны тагийг заавал түгжиж байх,
• Халуун зуух болон индүүнээс хүүхдийг хол байлгах, очиж хүрэхээс сэргийлээрэй.

Тогонд цохиулахаас сэргийлэх

• Цахилгааны залгуурыг зориулалтын тагаар таглах, эсвэл хэрэглээгүй үедээ салгаж байх,
• Цахилгааны утсыг сайтар далдлах, тавилгын араар эсвэл доогуур оруулах,
• Индүү, шарагч зэрэг гэр ахуйн цахилгаан хэрэгслүүдийг хүүхдийн гар хүрэхээргүй газарт байлгах

Галын аюулаас сэргийлэх

• Гэртээ галын дохиолол суурилуулах, зай нь дууссан эсэхийг шалгаж шаардлагатай бол шинэ зай хийгээрэй.
• Хэрэв танайд хийн түлш, бензин зэрэг галын аюул үүсгэж болзошгүй зүйлс байвал холдуулах.
• Чүдэнз, асаагуур зэргийг хүүхдийн гар хүрэхээргүй газар хадгалах
• Хүүхдийг зууханд хүрэхээс сэргийлэх, хэрэв танайх камин зуухтай бол тогтмол хөөлж галын болон угаарын аюулаас сэргийлэх

Авлигатай тэмцэх газрын Хяналт шалгалт, дүн шинжилгээний хэлтэс нь 2022 оны 9 дүгээр сарын 5-9-ний өдрүүдэд нийтийн албанд томилогдохоор нэр дэвшсэн 365 иргэний хувийн ашиг сонирхлын урьдчилсан мэдүүлгийг шалган, 155 мэдүүлгийг хянан шийдвэрлэжээ. Одоогоор ажиллагаанд 210 нэр дэвшигчийн урьдчилсан мэдүүлэг хянагдаж байна.

Тухайн хугацаанд иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 66 гомдол, мэдээллийг хүлээн авч шалгаснаас 11 гомдол, мэдээллийг хянан шийдвэрлэсэн талаар АТГ-аас мэдээллээ.

Төлөвлөгөөт хяналт шалгалтын хүрээнд 32 албан тушаалтны хувийн ашиг сонирхлын болон хөрөнгө, орлогын мэдүүлгийг шалгажээ.

Сүхбаатар дүүргийн 4 дүгээр хороонд байрлах Хүрээ амаржих газрын эрсдэлтэй жирэмсний тасаг, дутуу төрөлтийн тасаг, хүлээн авах тасаг, түргэний тасгууд болон тусгаарлах коридорт их засвар, дотор засал, сантехникийн ажлыг гүйцэтгэж дууслаа.

Их засварын ажлын хүрээнд төрөх өрөө, хүлээн авах, эмч ажилтнуудын өрөө болон ариун цэврийн өрөө тасалгаа коридорт хана, тааз, шал, сантехникийн их засвар, дотор засал, тохижилт хийжээ. Мөн жирэмсэн ээжүүдийн тасалгаа, түргэн тусламж, төрөх тасагт тус бүр холбогдох төхөөрөмж суурилуулан ашиглаж эхлээд байна.

Хүрээ амаржих газар нь 1959 онд ашиглалтад орсон бөгөөд барилгад нь хэсэгчилсэн засварууд орж байсан ч иж бүрэн капитал засвар хийж байгаагүй. Иймд уг их засварыг хийж гүйцэтгэснээр эрүүл мэндийн тусламж, үйлчилгээг тав тухтай орчинд үзүүлэх боломж бүрдэн, эмнэлгийн эмч, ажилтнуудын ажиллах орчин нөхцөл сайжирч буй юм.

Их засварыг улсын төсвийн хөрөнгө оруулалтаар “Гарден сити” ХХК гүйцэтгэж, Нийслэлийн Хөрөнгө оруулалтын газар захиалагчийн техникийг хэрэгжүүлэн ажилласан байна.

Эх сурвалж: Нийслэлийн Сургалт, судалгаа, олон нийттэй харилцах газар