Month: July 2022

Үндэсний их баяр наадмыг тохиолдуулан Монгол Улсын Ерөнхийлөгч зарлиг гаргаж дараах хүмүүст төрийн дээд одон медаль гардууллаа.

Хөдөлмөрийн баатар цолоор

1. Архангай аймгийн Хайрхан сумын малчин, гавьяат малчин Отгоны Дорж,
2. АШУИС-ийн зөвлөх багш, анагаах ухааны доктор, ардын эмч Жамьянжавын Баасанхүү нарыг шагналаа.

Ардын багш цолоор

1. Баянхонгор аймгийн “Өлзийт” МСҮТ-ийн захирал Сүхбатын Бямбадорж,
2. Санхүү, эдийн засгийн их сургуулийн зөвлөх профессор Нямын Бадамрагчаа,
3. ХААИС-ийн Эдийн засаг, бизнесийн сургуулийн зөвлөх, доктор, профессор, гавьяат багш Пунцагийн Санжид,
4. Зурхайч, шинжлэх ухааны доктор, профессор, Шинжлэх ухааны гавьяат зүтгэлтэн Лхасрангийн Тэрбиш,

Байгаль орчны гавьяат ажилтан цолоор

1. “Танайд мод тарья” ТББ-ын тэргүүн Баяраагийн Батболд,

Гавьяат уурхайчин цолоор

1. “Энержи ресурс” ХХК-ийн гүйцэтгэх захирал Готовын Батцэнгэл,

Хөдөө аж ахуйн гавьяат ажилтан цолоор

1. Шинжлэх ухаан үйлдвэрлэлийн “Анхны анжис” ХХК-ийн захирал, төслийн удирдагч Чоглонгийн Нанжаа,

Худалдааны гавьяат ажилтан цолоор

1. “Боса холдинг” ХХК-ийн ерөнхий захирал Цэвэгмэдийн Батбаяр,

Эрүүлийг хамгаалахын гавьяат ажилтан цолоор

1. ЭМЯ-ны Эмнэлгийн тусламжийн газрын дарга асан, Эх нярай эмэгтэйчүүдийн үндэсний төв эмнэлгийн зөвлөх эмч Ядамсүрэнгийн Буянжаргал,

Гавьяат жүжигчин цолоор

1. Үндэсний урлагийн их театрын гоцлол бүжигчин Жамсрангийн Мандухай,

Аж үйлдвэрийн гавьяат ажилтан цолоор

1. “Витафит” ХХК-ийн захирал Содномын Жаргалсайхан,
2. “Өсөх зоос” компанийн ерөнхий захирал Чойжамцын Чинбат,

Үйлчилгээний гавьяат ажилтан цолооо

1. Төр захиргааны байгууллагын ахмад ажилтан Түшигцоодолын Дашдэлэг,

Гавьяат барилгачин цолоор

1. “Мото блок” ХХК-ийн зөвлөх инженер Тогоочийн Тогтох,

Соёлын гавьяат зүтгэлтэн цолоор

1. Соёлын яамны Урлаг, уран бүтээлийн газрын дарга Болдын Сэргэлэн,
2. “Непко” ХХК-ийн зөвлөх Бат-Амгалангийн Болдбаатар,

Хөдөлмөрийн гавьяаны улаан тугийн одонгоор

1. Дархан-Уул аймгийн 15 дугаар цэцэрлэгийн эрхлэгч Сумъяасүрэнгийн Энхцэцэг,
2. Үндэсний урлагийн их театрын цордон бүрээ хөгжимчин Төмөрхүүгийн Бадамсэрээжид,
3. Төр захиргааны ахмад ажилтан Гомбосүрэнгийн Төмөр-Очир,

Алтангадас одонгоор

1. Өвөрхангай аймгийн “Дэлгэрэх хүнс” ХХК-ийн худалдааны ахмад ажилтан Өөдөсийн Цэцэгмаа,
2. “Жүр үр” ХХК-ийн ерөнхий технологич Ганболдын Сарангэрэл,
3. Дорногрвь аймгийн Дэлгэрхангай сумын ЕБС-ийн ахмад ажилтан Дамбын Уламбаяр,
4. Хөгжлийн бэрхшээлтэй иргэдийн “Тулга тавилан” студийн найруулагч Төрбатын Баярхүү,
5. Төрийн тусгай хамгаалалтын газрын ажилтан Сүхээгийн Отгонцэцэг,

Хөдөлмөрийн хүндэт медалиар

1. “Очир дагинас” ХХК-ийн ерөнхий технологич Норовын Гүрдорж,
2. МУИС-ийн багш, профессор Очирын Алтансүх,

Цэргийн хүндэт медалиар

1. Төрийн тусгай хамгаалалтын газрын ажилтан Жаргалсайханы Энхтүвшин,
2. Хилийн цэргийн 0218 дугаар ангийн орлогч дарга, хошууч Даваасамбуугийн Мөнхсайхан.

УИХ-ын гишүүн Ж.Бат-Эрдэнэ нарын 22 гишүүн зургаадугаар сарын 17-нд өргөн мэдүүлсэн Хүнсний хангамжийг нэмэгдүүлэх, чанар аюулгүй байдлыг хангах, хөдөө аж ахуй үйлдвэрлэлийг дэмжих түр хороо байгуулах тухай тогтоолын төслийг батллаа.

Ж.Бат-Эрдэнэ гишүүн төслөө танилцуулахдаа “Манай улсын хүн амын хүнсний хэрэгцээг дотоодын үйлдвэрлэсэн мах, махан бүтээгдэхүүнээр 97, төмсөөр 100, гурилаар 98.3, хүнсний ногоогоор 60.7 хувийг хангаж байна. Сүүлийн жилүүдэд дотоодын үйлдвэрлэлийн хүчин чадал сайжирч, хүнсний хангамж нэмэгдэж байгаа боловч хүнсний аюулгүй байдал алдагдаж, хүнснээс хамаарсан өвчлөл, хүнсний хорлогод өртөгсдийн тоо ихээхэн нэмэгдэж байна. Мэргэжлийн хяналтын ерөнхий газрын хяналтын итгэмжлэгдсэн лабораториудын нэгдсэн сүлжээний хэмжээгээр 2020 оны байдлаар хүнсний хими, нян судлал, хор судлал, ургамал хорио цээр, цацрагийн бохирдлын чиглэлээр 310.5 мянган үзүүлэлтээр шинжилгээ хийснээс 6.7 мянган сорьц Монгол Улсын стандартын шаардлага хангаагүй, бохирдлын түвшин 2.1 хувь байна. Төрийн аудитын газраас хийсэн Хүнсний аюулгүй байдлыг хянах өнөөгийн тогтолцоо, төсвөөс зарцуулсан хөрөнгийн үр дүнд хийсэн гүйцэтгэлийн тайлангаас үзвэл Төрөөс хүнс, хөдөө аж ахуйн талаар баримтлах бодлого, урт болон дунд хугацааны хөгжлийн баримт бичиг, үндэсний хөтөлбөрүүдэд зорилт, арга хэмжээг хэсэгчлэн тусгасан боловч шалгуур үзүүлэлт, суурь түвшин, хүрэх түвшнийг оновчтой тодорхойлоогүйгээс зорилт, арга хэмжээ бүрэн хэрэгжээгүй, үр дүнд хүрээгүй байна. Мөн гол нэрийн зургаан төрлийн хүнсний бүтээгдэхүүнийг дотоодын үйлдвэрлэлээр бүрэн хангаж байгаа боловч импортын хамаарал 42.1 хувь буюу хүнсний бие даасан байдал алдагдсан хэвээрээ байна” гэсэн юм.

Г.Занабазарын нэрэмжит Дүрслэх урлагийн музейн сан хөмрөгөөс Б.Шаравын алдарт бүтээл ”Монголын нэг өдөр” тусгай үзэсгэлэнг маргааш нээнэ.

Тулгар төрийн 2231 жил, Их Монгол Улс байгуулагдсаны 816 жил, Үндэсний эрх чөлөө, тусгаар тогтнолоо сэргээн мандуулсны 111 жил, Ардын хувьсгалын 101 жилийн ойн баяр наадамд зориулсан тус үзэсгэлэн монгол өв соёлоо өвлүүлэн үлдээх, хүүхэд залуус хойч үедээ таниулан сурталчлах, үзмэр бүтээлийг эрдэм шинжилгээ, судалгааны эргэлтэд оруулах зорилготой.

Үзэсгэлэнд 1995 онд Засгийн газрын 241 дүгээр тогтоолоор Монгол Улсын түүх соёлын хосгүй үнэт дурсгалт зүйлийн зэрэглэлд бүртгэгдсэн олноо Марзан хэмээн алдаршсан зураач Балдуугийн Шаравын “Монголын нэг өдөр” бүтээлийг эх хувиар нь дэглэн үзүүлэх юм.

Үзэсгэлэнд “Монголын нэг өдөр” бүтээлийн зарим нэг өгүүлэмж, дүр дүрслэлийг орчин үеийн гэрэл зургийн хальсанд хэрхэн буусныг МОНЦАМЭ агентлагийн гэрэл зурагчин Б.Чадраабалын 20 орчим гэрэл зураг, уг бүтээлийн анимэйшн, бүтээлд нийт хэчнээн тооны дүр дүрслэл багтаасан эсэх, түүнээс хэд хэчнээн хүн, мал, адгуус амьтад, угсаатны зүйн эд өлгийн зүйлс, зан үйл зэрэг тоо баримттай танилцах боломжтой.

УИХ-ын хаврын чуулган завсарлахаасаа өмнө буюу өчигдөр орой Газрын тосны бүтээгдэхүүний тухай хуульд нэмэлт оруулах тухай хуулийн төслийн хэлэлцэн дэмжлээ. Ингэснээр уг хуулийн төслийг анхны хэлэлцүүлэгт бэлтгүүлэхээр Эдийн засгийн байгын хороонд шилжүүлэв.

Уул уурхай, хүнд үйлдвэрийн сайд Г.Ёндон Газрын тосны бүтээгдэхүүний тухай хуульд нэмэлт оруулах ямар шаардлага үүссэн талаар танилцуулахдаа “Монгол Улс өнөөдрийн байдлаар газрын тосны бүтээгдэхүүний хэрэглээгээ 100 хувь гаднаас импортоор хангаж байгаа бөгөөд дотоодод борлуулж буй газрын тосны бүтээгдэхүүний жижиглэнгийн борлуулалтын үнэ нь дэлхийн зах зээл дээрх газрын тосны үнэ, валютын ханш, ОХУ болон бусад орноос нийлүүлж буй бүтээгдэхүүний импортын үнэ буюу хил үнэ зэргээс шууд хамааралтай байдаг. Манай улсад агаарын хөлгийн түлшний үнэ бусад оронтой харьцуулахад дунджаар 28.8 хувиар илүү үнэтэй байгаагаас шалтгаалж дотоодын иргэний агаарын тээвэрлэгчид нийт түлшний хэрэглээний 43 хувийг дотоодод, 57 хувийг гадаад улсад сумладаг бөгөөд гадаад улсын агаарын тээвэрлэгч компаниуд өөрийн онгоцоо зайлшгүй тохиолдолд л манай улсад сумлаж байна.

Түүнчлэн “Агаарын тээврийн либералчлал, иргэний нисэхийн салбарын шинэчлэлийн зөвлөгөөн”-өөс гаргасан зөвлөмжид Аялал жуулчлалын чиглэлээр улирал харгалзахгүйгээр жуулчдын урсгалыг тогтвортой өсгөх, агаарын тээврийн компанийн хуваарьт нислэгийн үйл ажиллагаатай уялдаатай төлөвлөж, аялал жуулчлалын захиалгат нислэгийн зохицуулалтыг өргөжүүлнэ гэж тусгагдсан. Үүнтэй холбоотойгоор “Чингис хаан” олон улсын нисэх буудлын онгоцны түлшний хэрэглээ цаашид өсөн нэмэгдэх хандлагатай байна. “Чингис хаан” олон улсын нисэх буудлын төсөлтэй холбогдуулан Засгийн газрын 2020 оны 01 дүгээр сарын 08-ны өдрийн “Шинэ нисэх онгоцны буудлын шатахуун хангамжийн талаар авах зарим арга хэмжээний тухай” 14 дүгээр тогтоолын 1 дэх хэсэгт “Монгол газрын тос боловсруулах үйлдвэр” төрийн өмчит хязгаарлагдмал хариуцлагатай компанийн үйл ажиллагааг өргөжүүлж, шинэ нисэх онгоцны буудлын шатахуун хангамжтай холбоотой үйл ажиллагаа эрхлэх зорилгоор охин компани байгуулах арга хэмжээ авахыг Уул уурхай, хүнд үйлдвэрийн сайдад даалгасан. Тус тогтоолын дагуу Уул уурхай, хүнд үйлдвэрийн сайдын 2020 оны А/81 тушаалаар “Монгол газрын тос боловсруулах үйлдвэр” төрийн өмчит ХХК-ийн охин компани болох “Эрчис ойл” төрийн өмчит ХХК-ийг байгуулсан.

“Эрчис ойл” компани нь “Чингис хаан” олон улсын нисэх буудлын онгоцны түлшний хангамжийн үйл ажиллагааг эрхлэх, бүтээгдэхүүн нийлүүлэх, хамтран ажиллах сонирхлоо илэрхийлсэн гадаадын хөрөнгө оруулагч нартай хэлэлцээ хийх ажлыг зохион байгуулах явцад ОХУ-ын “Роснефть” НХН-иас өөрийн охин компани болох “РН-Аэро” компаниар дамжуулан хамтран ажиллах санал ирүүлсэн. Газрын тосны бүтээгдэхүүний тухай хуулийн 7 дугаар зүйлийн 7.2-т “Монгол Улсад газрын тосны бүтээгдэхүүний 30-аас дээш хувийг дангаараа нийлүүлж байгаа гадаадын хуулийн этгээд дотоодын зах зээлд өөрийн хөрөнгө оруулалт бүхий хуулийн этгээд болон өөрийн харьяалал, хяналтад байдаг нэгжээрээ дамжуулан бүтээгдэхүүнээ борлуулахыг хориглоно” гэж заасан. Хуулийн энэхүү заалт нь “Эрчис Ойл” төрийн өмчит ХХК нь “Чингис хаан” олон улсын нисэх буудлын агаарын хөлгийн түлшний хангамжийн байгууламжийн үйл ажиллагааг гадаадын нийлүүлэгч, хөрөнгө оруулагч талтай хамтран хэрэгжүүлэх боломжийг хязгаарлаж байгаа юм. Иймд “Чингис хаан” олон улсын нисэх буудлын үйл ажиллагааг өргөжүүлэх, манай улсад агаарын тээвэрлэлт хийж буй дотоод, гадаадын агаарын хөлөг болон дайран өнгөрч буй агаарын хөлгүүдийг өрсөлдөхүйц үнэтэй шатахуунаар цэнэглэх үйл ажиллагааг дэмжих хүрээнд Газрын тосны бүтээгдэхүүний тухай хуульд нэмэлт оруулах саналыг боловсруулсан” гэлээ.

Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101, Монгол Улс, Америкийн Нэгдсэн Улс хооронд дипломат харилцаа тогтоосны 35 жилийн ойг тохиолдуулан Чикаго хотын төв талбайд Монгол Улсын төрийн далбааг мандуулах, Монголын соёл урлагийг сурталчлах арга хэмжээ долдугаар сарын 6-ны өдөр боллоо.

Арга хэмжээг нээж Консул Т.Батцэцэг үг хэлэв. АНУ, Монгол Улсын төрийн далбааг мандуулж, хоёр улсын төрийн дуулал эгшиглэсний дараагаар Чикаго хотод ажиллаж, амьдарч буй уран бүтээлчид монгол дуу, хөгжим, бүжгийн дээжээс сонирхуулсан байна.

Чикаго хот дахь монголчууд долдугаар сарын 10-нд наадмаа хийнэ.

Үүнээс гадна өнгөрсөн долоо хоногт тус Консулын газар 60 гаруй иргэнд итгэмжлэлийн үйлчилгээ үзүүлж, шинээр төрсөн таван хүүхдэд төрсний гэрчилгээ олгожээ.

40 гаруй иргэн, иргэний үнэмлэх, үндэсний гадаад паспорт захиалах, шинээр хүлээж авах, бичиг баримтаа орчуулах, УБЕГ-аас лавлагаа хүсэх үйлчилгээ авсан байна.

Консулын байранд ирж зөвлөгөө авах үйлчилгээг 95 иргэн авсан бол утсаар болон цахимаар хандсан 50 гаруй хүнд консулын үйлчилгээний мэдээллийг хүргэж ажиллажээ.

Эх сурвалж: АНУ-ын Чикаго хот дахь Монгол Улсын Консулын газар