Month: June 2022

Categories
мэдээ онцлох-нийтлэл туслах-ангилал улс-төр

Б.Пүрэвдорж: НД-ын сангаас нэг га газрыг 14 тэрбум төгрөгөөр худалдаж авсан газраас хэвлэлийн хурал хийнэ шүү DNN.mn

УИХ-ын чуулганы баасан хуралдааны эхэнд УИХ-ын дарга Г.Занданшатар хэлэлцэх асуудлын дарааллыг танилцуулсны дараа Засгийн газраас өргөн мэдүүлсэн Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийн эцсийн хэлэлцүүлгийг явуулав.

Асуудал хэлэлцэхээс өмнө УИХ-ын гишүүн О.Цогтгэрэл: -УИХ-ын тухай хуульд нэмэлт, өөрчлөлт оруулсан хуулийн төсөл энэ долоо хоногийн чуулганы хуралдааны хэлэлцэх асуудлын дараалалд орчихсон байсан. Гэтэл хэлэлцэх асуудалд алга байна. Энэ хууль хааччихсан бэ, УИХ-ын дарга аа. Парламент өөрөө олонхоороо шийдвэр гаргадаг. Тэр утгаараа УИХ дахь бүлгийн шийдвэр олонхын зарчмаар явдаг. Тиймээс манай бүлгээс өргөн барьсан хуулийн төсөл хаачив. АН-ын бүлгийн асуудлыг зохицуулах асуудлаар хууль өргөн бариад УИХ-ын даргаас хэлэлцүүлж өгөхийг бүтэн жил шаардлаа. Өнгөрсөн хоёр жилийн хугацаанд сөрөг хүчний зүгээс өргөн барьсан хуулийн төслүүд хэлэлцэгдсэнгүй ээ.

УИХ-ын дарга Г.Занданшатар: -УИХ-ын гишүүн Ш.Адьшаа, Б.Пүрэвдорж нар хуулийн төслөө өргөн бариад хэлэлцүүлж байгаа шүү. Ганц ч хуулийн төсөл хэлэлцүүлээгүй гэж худлаа ярьж болохгүй. УИХ-ын тухай хуулийн төсөл яагаад орж ирээгүйг Төрийн байгуулалтын байнгын хороо хариулах байх аа.

ТББХ-ны дарга, УИХ-ын гишүүн Ж.Мөнхбат: -Та бүгдийн өргөн барьсан хууль УИХ-ын даргын зөвлөлөөр гурван удаа орсон. Ингээд хэлэлцэх асуудлын дараалалд оруулах эсэх санал хураалтаар хоёр удаа дэмжигдээгүй, нэг удаа тэнцсэн. Тэнцсэн тохиолдолд санал унадаг, буцаагддаг дэгтэй. Гэхдээ ирэх долоо хоногийн хэлэлцэх асуудалд оруулж байгаа шүү.

УИХ-ын гишүүн Д.Ганбат: -Өчигдөр манай намын тамганы асуудал нэг талдаа гарч шийдэгдсэн. Хоёр жилийн хугацаанд тамга тэмдэггүй юм шиг, хоёр тал болсон юм шигээр явж ирлээ. Одоо энэ байдал нэг талдаа гарсан шүү. Тэр тамгатай албан ёсны АН-ын төлөөлөл би өөрөө сууж байна. УИХ-ын гишүүд, нам эвсэл хамтран УИХ дахь бүлгээс өөр зохион байгуулалттайгаар аливаа хэлбэр үүсгэхийг хориглоно гэсэн заалт бий. О.Цогтгэрэл нарын өргөн барьсан УИХ-ын тухай хуульд нэмэлт, өөрчлөлт оруулах хуулийн төсөл дээрх хуулийн заалтыг зөрчөөд байгаа шүү. Өнөөдөр УИХ-аар хэлэлцэх маш олон чухал асуудал байна. Гадаа гудманд амьдрал хэцүү байна. Ийм үед бид эндээ иймэрхүү аахар шаахар зүйл хэлэлцээд маргалдаад суугаад байж болохгүй ээ.

УИХ-ын гишүүн Б.Пүрэвдорж: -Миний өргөн барьсан тэтгэврийн дунджийг тогтоох долоон жилийг таван жил болгох хуулийн төслийг хэлэлцэх асуудалд оруулж өгөхгүй, хэлэлцэхгүй байна. УИХ-ын гишүүн С.Чинзориг даргатай ажлын хэсгийг хуралдуулах боломжийг УИХ-ын даргын зөвлөл гаргаж өгөхгүй байна. Хэрвээ энэ хуулийн төслийг ирэх долоо хоногт хэлэлцэхгүй бол Нийгмийн даатгалын сангаас нэг га газрыг 14 тэрбум төгрөгөөр худалдаж авсан тэр газар нь очиж хэвлэлийн бага хурал хийнэ шүү. Тэр 14 тэрбум төгрөг бол долоон жилээр тэтгэврээ бодуулж гаргасан зөрүүг нөхөх хэмжээний хөрөнгө.

Хэлэлцэж буй асуудалтай холбогдуулан УИХ-ын гишүүн Ц.Даваасүрэн: -Зайлшгүй маш хурдан хугацаанд шийдэх ёстой хууль гэж бодож байгаа. Барилгын ажил бол улирлын шинж чанартай. Гол ажил нь бол тендер. Тэгээд энэ асуудлаараа маргалдчихдаг. Маргалдаад хоёр, гурван жилээр шүүхдээд явчихдаг. Улмаар ажил нь бүтдэггүй. Ийм буруу жишиг гараад удаж байна.

Ингээд Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг эцэслэн батлуулах бэлтгэл хангуулахаар Төсвийн байнгын хороонд шилжүүллээ.

ТӨРИЙН АЛБАНЫ ЗӨВЛӨЛ ДЭЭР НАМЧИРХАЛ, УЛСТӨРЖИЛТ ЗАМАА АЛДСАН. НАМЫН ХАРьЯАЛЛААР АЖЛААС ХАЛСАН, ЧӨЛӨӨЛСӨН АСАР ИХ АСУУДАЛ ГАРСАН

Үргэлжлүүлэн УИХ-ын гишүүн Ж.Мөнхбат, Ё.Баатарбилэг, Б.Баярсайхан, Б.Бат-Эрдэнэ нарын санаачлан боловсруулж өргөн мэдүүлсэн Төрийн албан хаагчийн ёс зүйн тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцэв. Төслийн танилцуулгыг УИХ-ын гишүүн, Ёс зүй, сахилга хариуцлагын байнгын хорооны дарга Б.Бат-Эрдэнэ хийлээ.

Хэлэлцэж буй асуудалтай холбогдуулан гишүүд асуулт асуув.

УИХ-ын гишүүн Б.Жаргалмаа: -Төрийн албанд томилогдож байгаа хүмүүст ёс зүйн ямар шалгуур тавигдах вэ.

Төрийн албаны зөвлөлийн дарга Б.Баатарзориг: -Төрийн албан хаагчдын ёс зүйн алдаа дутагдлаас урьдчилан сэргийлэхэд хуулийн төслийг чиглүүлж боловсруулсан. Хуулийн төслийн долдугаар зүйлд төрийн албан хаагчдын ёс зүйн нийтлэг хэм хэмжээг зохицуулна. Жишээлбэл, албан үүргээ эс гүйцэтгэвэл хариуцлага ногдуулахаар тусгасан. Төрийн албаны зөвлөлд 2022 оны нэгдүгээр сарын 1-ний байдлаар 2524 хууль бус томилгоо байсан. Нийт 326 үүрэг гүйцэтгэгч байгаагаас 79 нь шаардлага хангагдаагүй анхааруулга аваад ажиллаж байгаа.

УИХ-ын гишүүн С.Бямбацогт: -Чухал асуудал. Ёс зүй, төрийн бүтээмж, төрийн түгжрэлийн асуудал. Анх сонгогдохдоо ард түмнийхээ төлөө хичээн зүтгэнэ гэдэг. Томилогдсон хойноо дарамталдаг, авлига хээл хахууль авдаг. Ийм л төрийн албан хаагчтай болчихоод байгаа юм. Төрийн бүтээмж гэдэг асуудал байхгүй болсон. Данхар төртэй болсон. Цагаа бүртгүүлээд, цалин авдаг болсон. Энэхүү хууль батлагдсанаар энэ бүх асуудал шийдэгдэх үү. Цагаа бүртгүүлээд, цалингаа аваад, гараас нь гардаггүй хүмүүс байдаг. Шударга ёсны, зарчимч, үнэнч шударга хүмүүс байдаг. Юу ч хийдэггүй хүмүүс нь мундаг харагдаад байдаг. Энийг хэрхэн шийдэх вэ. Аль нь ёс зүйтэй хүн бэ.

Хууль санаачлагч, УИХ-ын гишүүн Б.Бат-Эрдэнэ: -Таны асууж байгаатай санал нэг байна. Үнэхээр төрийн хүнд суртал, авлига, ашиг сонирхлын зөрчил, төрийн албаны чанар хүртээмж, түргэн шуурхай үйлчилгээ, цаашилбал, төрийн алба сонгуулиас сонгуулийн хооронд данхайгаад, бүтэц нь нэмэгдээд байгаатай санал нэг байна. Энийг Төрийн албан хаагчийн Ёс зүйн хуулийн төслийн хүрээнд бүрэн шийдэх боломжгүй. Суурь томоохон хууль болно гэж бодож байна. Төрийн албанд тулгамдаж буй олон асуудлыг шийдэх бодлого шийдвэр гарах байх.

УИХ-ын гишүүн Ц.Туваан: -Хуулийн төслийг дэмжиж байна. Орж ирэх цаг хугацаа нь болсон. Манай ард түмэн төрөө дээдэлдэг уламжлалтай ард түмэн. Гэхдээ харьцангуй багасаад байна. Төрд зүтгэдэг ноён нуруутай төрийн “хар” хүн цөөдлөө. Ихэнх нь авлига, албан тушаалын гэмт хэрэгт холбогдсон нэр зүүснээс болоод төрийн албаны нэр хүнд шалан дээр унаад байна. Төрийн албан хаагчид ёс зүй муутай, ажлын ур чадвар асар муутай, мэдлэг муутай, их зантай. Ямар ямар хүн ёс зүйн зөвлөлд орох вэ гэдэг эхэнд яригдах байх. Өөрөө уучлал гуйгаад хариуцлагаа хүлээж буй хүн харагдахгүй байна. Төрийн албаны зөвлөл дээр намчирхал, улстөржилт замаа алдсан. Намын харьяаллаар ажлаас халсан, чөлөөлсөн асар их асуудал гарсан. Төрийн алба хаах хүн олдохоо болилоо. Авч буй цалинг нь ам.долларт шилжүүлээд үзэхээр ямар ч цалин аваад байгаа юм бэ. Энэ мэт асуудлууд байна.

УИХ-ын гишүүн Б.Бат-Эрдэнэ: -Төрийн албаны зөвлөлд тусдаа бие даасан зөвлөлтэй тэнцэхүйц хэмжээний хороо байгуулагдахаар яригдаж байсан. Явцын дунд Төрийн албаны зөвлөлийн дэргэд, бие даасан хараат бус байдлаар ажиллах эрх хэмжээг нь олгож өгье гэж шийдсэн. Өмнөх практикаас үзвэл төрийн бүх шатанд алба хааж буй ажилтантай гэхээс албан тушаалтантай ямар хариуцлага тооцох вэ гэдгийг энэ хуулийн төсөлд тусгасан. 25-аас дээш хүнтэй байгууллага Ёс зүйн зөвлөлтэй байна. Ёс зүйн зөрчилд хариуцлагаас мултрах зүйл үлдээхгүй байхыг зорьсон. Мэдлэг ур чадварын зэрэгцээгээр ёс зүй, хариуцлагын асуудлыг давхар авч үзэхгүй бол болохгүй байгаа юм. Улс орнуудын жишгийг харвал төрийн албанд хулгай хийх, худал хэлэхгүй, хууран мэхлэхгүй гэсэн зарчим байна. Бидний дунд ийм үйлдэл хэрхэвч гаргаж болохгүй гэсэн соёл тогтолцоо бий болгох ёстой.

Categories
мэдээ нийгэм онцлох-нийтлэл туслах-ангилал

Ч.Эрдэнэбат: Барилгын гол нэрийн бүтээгдэхүүн дээр дэлхийн хамгийн өндөр үнийн жишгээр татвар ногдуулдаг DNN.mn

Замын-Үүдийн жолооч нар барилгын гол нэрийн бараа бүтээгдэхүүн болох арматурын гаалийн татварын тухай тодруулж өгөхийг хүссэн юм. Энэ талаар бид сурвалжиллаа.

Зуун айл барилгын материалын захаар явж лангуун дээр зарагдаж байгаа үнийг судлав. Цагаан замаск 30 кг-тай нь 12000 төгрөг. Пильта нэг ширхэг нь 5000, обой 13000 мянгаас эхлээд 18000, 20000, 25000, 28000 гэх мэтээр өснө. Хямдарсан обой 10000 төгрөг. Нэг бүтэн обойг 5 м.кв талбайд наана. Хуулга 1 м.кв нь 22000-30000 төгрөг. Будаг 20 литртэй нь 75000-115000 төгрөг хүртэл үнэтэй. 20 литртэй нэг будгаар 54 м.кв талбайг будна. Будаг шингэлэгч ширхэг нь 4500 төгрөгийн үнэтэй зарагдаж байна. Манай барилгын салбарынхны хамгийн өргөн хэрэглэдэг цонхны шил нь 4 мм зузаантай гэнэ. Энэхүү шил Зуун айлын барилгын материалын захаар 45000-60000 төгрөгөөр зарагдаж байна.

Харин арматур нийлүүлдэг томоохон компаниуд болох “Бетон арматур”, “Агь трейд”, “Цамхаг гүүр”, “Металл опт” зэрэг компаниуд арматураа 3.1-3.15 сая төгрөгөөр дотооддоо борлуулж байна. Нэг ширхэг нь 12 метрийн урттай, 0.676 кг жинтэй. Нэг боодол нь 2.2 тонн жинтэй байдаг ажээ. 10 см-ийн голчтой нарийн арматур 3.15 сая төгрөг бол 14-өөс дээш голчтой бүдүүн нь 3.1 сая төгрөгөөр зарагддаг байна.

Тэгвэл Эрээний хилээр барилгын хамгийн гол нэрийн бүтээгдэхүүн болох арматур нь 500 мянган төгрөгөөр орж ирдэг боловч гаалийн татвар нь тухайн барааны 15.5 хувь байх ёстой атал өөрийнх нь үнийг дахин нэмдэг тухай Замын-Үүдийн жолооч нар хэлж буй юм. Энэ тухай “Борхойн тал” авто тээвэрчдийн нэгдлийн төлөөлөн удирдах зөвлөлийн гишүүн Ч.Эрдэнэбат ярихдаа “Хүмүүсийн хамгийн өргөн хэрэглэдэг 4 мм-ийн зузаантай шилний үнэ урдаас 1 м.куб нь 200 мянгаар орж ирдэг. Гэтэл гаалийн татвар нь тавин хувь шахуу нэмэгддэг. Дээрээс нь барилгын хамгийн гол түүхий эд болох арматур байна. Арматур төмөргүй ямар ч барилга босохгүй. Эрээнээс наашаа 500 мянган төгрөгөөр орж ирдэг. Гэтэл эндхийн гаалийнхан хуулиндаа тухайн барааны үнийн 15.5 хувийг гаалийн татварт авна гэчихсэн байтал Европын ч юмуу, дэлхийн хамгийн өндөр үнийн жишгээр татвар ногдуулдаг. Тэр нь Монголд хамаагүй Хятадын үнээр ч юмуу, өөр стандартын дэлхийн үнийг тавьж байгаад татвар аваад байна. Уг нь бол бодит үнээс авах ёстой шүү дээ. Би барилгын материал оруулж ирдэг. Тэр тусмаа арматурын төмөр. Миний худалдаж авсан үнийн дүнтэй гэрээ байгаа шүү дээ. Жишээбэл, хамгийн хямддаа 1 тн арматурыг би 4500 юаниар худалдаж авдаг. Тухайн авсан барааны гэрээ хэлэлцээр бичиг баримт бүх зүйл бий. Гэтэл бичиг баримтаа үзүүлээд байхад л тийм зүйл байхгүй. Ерөнхий газраас ийм ханш тогтоосон гээд маш өндөр дүнтэй татвар авч байна. Улаанбаатарт яаж байна гэхээр танил талтай, мөнгө төгрөг, хээл хахууль өгч авдаг зарим хүмүүс нь бага татвартай гаргачихаад байгаа. Тэгэхээр нөгөө шударга өрсөлдөөн гэж юм чинь байхгүй болно. Адилхан л бараа зөөж мөнгө олж байгаа хүмүүс. Танил талтай нь бага татвар төлөөд, танил талгүй нь өндөр татвар төлдөг ийм байдал үүсчихсэн.

Хил гааль нээгдэх сураг ажиг алга. Хилийн цаана үлдсэн 300 контейнероо зөөж байна. Түүнийгээ өнөө маргаашгүй зөөгөөд дуусчихвал манай энүүгээр хөл хөдөлгөөнгүй нам зогсоно. Хятадын талаас ч ямар нэгэн хариу байхгүй. Хятадууд урьд нь авч байсан арга хэмжээгээ л авч байна. Уг нь бол Замын-Үүдийн боомт экспорт импортын 70 хувийг оруулж гаргадаг тоомоохон боомт. Гэтэл манай төрийнхөн яриа хэлэлцээрээ хийж чадахгүй байна. Үүнээс болж бараа материалын үнэ тэнгэрт хадаж монголчууд ямар байдалд орж байгааг бэлхнээ харж байгаа биз дээ. Манайхан ажлаа хийж чадахгүй ийм байдалд хүргэлээ” гэв.

Харин гаалийн татварын талаар Гаалийн ерөнхий газрын Татвар, орлогын газраас тодруулахад “Бид ямар нэгэн гаалийн татварын үнийг нэмсэн зүйл байхгүй. Гаалийн тариф, татварын тухай хуулийн 10 дугаар зүйлд зааснаар тухайн бараа бүтээгдэхүүний үнийн 15.5 хувьтай тэнцэх хэмжээний мөнгийг татварт ногдуулан авдаг. Үүний 10 хувь нь нэмэгдсэн өртгийн албан татвар, 5 хувь нь гаалийн татвар нийлээд 15.5 хувь болдог” хэмээв.

С.ОТГОНБАЯР Б.ОТГОНЗАЯА

Categories
зурхай мэдээ цаг-үе

ЗУРХАЙ: Улаан бич өдөр DNN.mn

2022.6.12, НЯМ ГАРАГ / БИЛГИЙН ТООЛЛЫН: 13

ЗУНЫ ИЛҮҮ ТЭРГҮҮН САР
ХОЁР ХАР МЭНГЭТЭЙ УЛААН БИЧ ӨДӨР

  • Аргын тооллын: 2022.6.12, Ням гараг
  • Наран ургах шингэх: 04.53-20.51
  • Үс засуулбал: Жаргал ирнэ
  • Барилдлага: Арвидах
  • Шүтэн барилдлага: Сэрэхүй
Тухайн өдөр луу жилтнээ аливаа үйлийг хийхэд эерэг сайн. Өдрийн сайн цаг нь хулгана, үхэр, луу, могой, хонь, нохой болой. Эл өдөр идээ, хувцас хунар олдох, худалдаа наймаа хийх, эд зүйлс өгөлцөж авах, өглөг өгөх, хөрөнгө цацах, эдийн тэнгэр тахиулах, шид бүтээл үйлдэхэд сайн, амраг лугаа золгох, авшиг авах, ус гатлах, угаах зэрэгт сайн. Баруун нүд татвал садан ирэх, зүүн нүд татвал баярлах, баруун чих хангинавал гутамшиг болох, зүүн хангинавал завхарсныг сонсож цочих, бие татвал өмнө зүгээс зочин ирэх, хөл татвал хэрүүл гомдол болно.
Categories
мэдээ нийгэм цаг-үе

Улаанбаатарт өдөртөө 22 хэм, бага зэргийн бороо орно DNN.mn

УЛААНБААТАР ХОТ ОРЧМООР: Шөнөдөө үүлэрхэг, бага зэргийн бороо орно. Өдөртөө үүл багасна, бороо орохгүй. Салхи баруун хойноос секундэд 6-11 метр. Шөнөдөө 7-9 градус, өдөртөө 20-22 градус дулаан байна.

Хур тунадас: Нутгийн зүүн хагаст үүлэрхэг, бусад нутгаар багавтар үүлтэй. Төв болон говийн аймгуудын нутгийн зүүн хэсэг, зүүн аймгуудын ихэнх нутгаар бороо, дуу цахилгаантай аадар бороо орно.

Салхи: Нутгийн баруун хэсгээр баруун өмнөөс, бусад нутгаар хойноос секундэд 6-11 метр, говь, тал, хээрийн нутгаар секундэд 13-15 метр хүрч ширүүснэ.

Агаарын температур: Шөнөдөө Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр 1 градус хүйтнээс 4 градус дулаан, Их нууруудын хотгор болон говийн бүс нутгийн өмнөд хэсгээр 11-16 градус, бусад нутгаар 5-10 градус, өдөртөө Хангай, Хөвсгөл, Хэнтийн уулархаг нутаг, Туул, Тэрэлж, Онон, Улз голын хөндий, Дарьгангын тал нутгаар 15-20 градус, Их нууруудын хотгор болон Алтайн өвөр говиор 27-32 градус, бусад нутгаар 20-25 градус дулаан байна.

БАГАНУУР ОРЧМООР: Үүлэрхэг. Шөнөдөө бороо, өдөртөө бага зэргийн бороо орно. Салхи баруун хойноос секундэд 7-12 метр. Шөнөдөө 7-9 градус, өдөртөө 18-20 градус дулаан байна.

ТЭРЭЛЖ ОРЧМООР: Шөнөдөө үүлэрхэг, бага зэргийн бороо орно. Өдөртөө үүл багасна, бороо орохгүй. Салхи баруун хойноос секундэд 6-11 метр. Шөнөдөө 5-7 градус, өдөртөө 17-19 градус дулаан байна.

Categories
гадаад мэдээ

Жастин Бибер нүүрний саажилттай болсноо мэдээлжээ DNN.mn

Канадын поп од Жастин Биберийн энэ оны хоёрдугаар сард эхэлсэн Justice World Tour аялан тоглолтын удахгүй болох гурван концерт цуцлагдсан тухай зохион байгуулагчид нь энэ долоо хоногт мэдэгдсэн юм.

Тэгвэл өчигдөр 28 настай дуучин маань Инстаграм хуудсандаа яагаад тоглолтоо цуцлах болсныг тайлбарлажээ.

Тэрбээр “Ramsay Hunt syndrome” гэгддэг өвчинтэй болсон юм байна. Ийм өвчин хүний чихний ойролцоох нүүрний мэдрэлийн системд нөлөөлдөг гэнэ.

“Миний нэг нүд анивчихгүй байгааг та нар харж байгаа байх. Нүүрний энэ хэсгээрээ би инээж чадахгүй байна. Тэгэхлээр миний нүүрний нэг тал бүрэн саажсан гэсэн үг” гэж тэр Инстаграм хуудсандаа нийтэлсэн гурван минутын урт видео мэдэгдэлдээ ярьсан байна.

Ийм шалтгаанаар тоглолтуудаа цуцлах болсныг Бибер 240 сая дагагчдаа тайлбарлажээ.

“Энэ бол нэлээд ноцтой асуудал. Миний бие махбод намайг жаахан амсхийх хэрэгтэй болсныг хэлж байх шиг байна. Залуус та нарыг ойлгосон гэдэгт найдаж байна. Би амарч, тайвширч, зуун хувь сэргэхэд цагийг зарцуулах хэрэгтэй боллоо. Ингэснээр би хийх гэж төрсөн зүйлээ дахин хийж чаддаг болно” гэж тэр ярьсан байна.

Бибер энэ долоо хоногт АНУ-ын нийслэл Вашингтон болон Канадын Торонто хотуудад тоглох хуваарьтай байсан юм. Бас ойрын өдрүүдэд Нью-Йорк, Лос-Анжелес хотуудад тоглох төлөвлөгөөтэй байжээ.

зураг

Categories
гадаад мэдээ

Мариуполь хотод гэдэсний халдварт холер өвчин дэгдлээ DNN.mn

Украины Мариуполь хотод гэдэсний халдварт холер өвчний халдвар дэгдээд байгаа талаар тус хотын захирагч Вадим Бойченко мэдэгдлээ.

“Хотод холер, дизентери болон бусад халдварт өвчин дэгдээд байна. Гэтэл /хотыг эзлэгсэд/ нуун дарагдуулж байна. Хотод хөл хорио тогтоохоор хаасан. Тэндээс хэнийг ч гаргахгүй, бас оруулахгүй байна” гэж хотын захирагч ВВС агентлагт ярьжээ.

Түүний тооцоолсноор олон арван хүн холероор өвчилсөн бөгөөд энэ тоо өсөх хандлагатай байгаа аж. “Халдвар маш хурдан тархаж байна. Зогсоох ямар ч нөхцөл алга. Эмч ч байхгүй, халдварын эмнэлэг ч байхгүй. Манай халдвартын эмнэлэг бүх тоног төхөөрөмжтэйгөө сүйрсэн, эмч нарыг нь хөнөөсөн” гэж хотын захирагч хэлжээ.

Тэрээр энэ халдвараас болж олон мянган хүн амиа алдаж болзошгүй байна гэв. Мөн тус хотод олон хүний цогцос байгаа бөгөөд тэдгээрийг хурааж цэвэрлэхгүй байгаагийн дээр хэт халж бас аадар бороо орж байна гэлээ.

Мариуполийн ус хангамжийн систем сүйджээ

“Аадар бороо орж, оршуулгын газруудыг сүйтгэж байна. Мариуполь хотын оршин суугчид дайны туршид хүмүүсийг хашаа хороо, цэцэрлэгт хүрээлэн, уул толгодоор оршуулж байна. Дээр нь усан хангамжийн систем ажиллахгүй, бохир усны шугам эвдэрсэн. Улмаар хүмүүсийн ус авдаг гол мөрөн, худгийн ус бохирдож байна” гэж Бойченко хэлжээ. Хотын ундны ус уухад тохиромжгүй, харин зөөврийн ус хүрэлцэхгүй байна. Усанд хэдэн хоногоор ч дугаарлаж байна” гэлээ.

Тиймээс хотыг хаажээ. Бид Мариупольд эм бэлдмэл авсан ч тийшээ хүргэх шаардлагатай байна. Хүмүүнлэгийн гарц нээж, Мариупольд эм бэлдмэл хүргэх шаардлагатай байна гэв.

Categories
мэдээ нийгэм

Сэрэмжлүүлэг: Хур борооны улмаас үер бууж болзошгүй DNN.mn

Хэдийгээр зургаан сар гараад арав хонож буй ч цаг агаар хүйтэн сэрүүн байна. Цаг агаарын урьдчилсан мэдээгээр зургадугаар сард салхи ихэнх хугацаанд 5–10 м/с, хугацааны эхэн болон дунд үеэр зарим газраар 12–14 м/с, зарим үед түр зуур 18–20 м/с хүрч ширүүсч болзошгүй. Мөн нэгдүгээр арав хоногийн эхэн болон сүүлч, хоёр болон гуравдугаар арав хоногийн дунд үеэр ихэнх нутгаар бороо, зарим газраар дуу цахилгаантай түр зуурын бороо орох төлөвтэй байна.

Сүүлийн өдрүүдэд Монгол орны нийт нутгаар хур бороотой байгаа билээ. Тиймээс хур борооны эрчимшил хэмжээнээс шалтгаалан гол мөрөн богино хугацаанд үерлэх, жижиг голууд болон хуурай сайраар уруйн үер буух нөхцөл бүрдэх тул дээр дурдсан голуудын сав дагуу суурьшиж, нутаглаж буй ард иргэдийг үерийн аюулаас болгоомжтой байхыг онцгойлон анхааруулж байна. Баруун аймгуудын нутгийн зүүн хэсэг, төвийн аймгуудын ихэнх нутаг, говийн аймгуудын нутгийн хойд болон зүүн аймгуудын нутгийн баруун хэсгээр өчигдөр бороо хур, нойтон цас оржээ.

Categories
гадаад мэдээ

БНАСАУ: Цөмийн салбарын гол төлөөлөгчийг Гадаад хэргийн сайдаар томилов DNN.mn

БНАСАУ: Цөмийн салбарын гол төлөөлөгчийг Гадаад хэргийн сайдаар томилов

БНАСАУ-ын эрх баригч Хөдөлмөрийн намын төв хорооны хурал Лхагва гаригаас Баасан гариг хүртэл үргэлжиллээ. Энэ хурал өндөрлөх үеэр удирдагч Ким Жон Ун тус улсын цөмийн салбарын гол төлөөлөгч Чое Сон Хуйг Гадаад хэргийн сайдаар томилжээ.

Хойд Солонгосын тусгаар тогтнолыг хамгаалахын тулд цэргийн хүч, батлан хамгаалахын судалгааг нэмэгдүүлэх зорилтуудыг мөн хурлаар танилцуулжээ. Энэ талаар төрийн мэдээллийн “KCNA” агентлаг өнөөдөр /2022.06.11/ мэдээллээ.

Хойд Солонгос долоо дахь удаагаа цөмийн туршилт хийхээр бэлтгэж буйтай холбогдуулан хэрвээ ийм туршилт хийвэл НҮБ-аас дахин хориг арга хэмжээ авна гэж анхааруулаад буй. Шинэ Гадаад хэргийн сайдын томилгоо энэхүү анхааруулгатай холбоотой гэж үзэж байна. АНУ-ын Үндэсний аюулгүй байдлын зөвлөх Жейк Салливан хэлэхдээ, “Хойд Солонгос цөмийн туршилт хийх эсэхийг АНУ маш анхааралтай ажиглаж байна” гэсэн.

Дашрамд дурдахад, Өмнөд Солонгос болон АНУ-ын Батлан хамгаалахын сайд нар өнөөдөр Сингапурт болох Шангри-Ла хэлэлцээний үеэр уулзах юм байна.

Categories
мэдээ үндэсний-бөx

Аймгийн арслан Б.Түмэндэмбэрэл хоёр дахиа түрүүллээ DNN.mn


Бөх судлаач, бөхийн зүтгэлтэн, улсын хүндэт гарын даа Шагдарын Батжаргалын “Манлайн баясгалан” номын нээлтэд зориулсан аймаг, цэргийн цолтой болон залуу 224 бөхийн хаалтын барилдаанд Булган аймгийн Орхон сумын харьяат, “Хилчин” СХ, “Кардеш” ХХК, “Түшиг багана” ХХК, “Булганхан” дэвжээний бөх, аймгийн арслан Булган-Эрдэнийн Түмэндэмбэрэл түрүүлж, Сүхбаатар аймгийн Наран сумын харьяат, “Сүлд” СХ, “Баян Өндөр Гарьд Констракшн” ХХК, “Орон сууц нийтийн аж ахуй удирдах газар”, “Жавхлант” дэвжээний бөх, аймгийн харцага Батцэнгэлийн Сайнбаяр үзүүрлэв.
Их шөвөгт Өмнөговь аймгийн Булган сумын харьяат, “Алдар” СХ, “Өмнөд бүс ЦТС” ТӨХК, “Говийн Хүчтэн” дэвжээний бөх, аймгийн хурц арслан Б.Мижидсүрэн, Увс аймгийн Тэс сумын харьяат, “Хүч” СХ, “Кровн Брос” ХХК, “Увснуур” дэвжээний бөх, аймгийн арслан Х.Оргилболд нар шалгарлаа.
Дунд шөвгийн долоод аймгийн арслан М.Бямбадорж, Э.Сумъяабат, аймгийн харцага Н.Ширчинхүү нар үлдэв.
Маргааш буюу зургаадугаар сарын 12-ны Ням гарагийн 12:00 цагаас Булган аймгаас төрөн гарсан дөрвөн аваргын нэрэмжит улс аймгийн алдар цолтой 128 бөхийн барилдаантай.
Categories
мэдээ спорт

Шигшээ баг хоёр дахь удаа тоглолтын төгсгөлд хожигдлоо DNN.mn

Азийн хөл бөмбөгийн холбооноос зохиодог Азийн цомын тэмцээний урьдчилсан шатны B хэсэгт багтсан Монголын шигшээ баг өнөөдөр талбайдаа Филиппиний шигшээ багтай тоглолоо.

Шигшээ багийн үндсэн арга барил болох хамгаалалт маш сайн хэрэгжсэн бөгөөд Палестинтай хийсэн тоглолтой харьцуулахад олон довтолгоо зохион байгуулсан.

Тоглолтын төгсгөлд Филиппиний шигшээ баг торгуулийн цохилтын эрх авсан ч Монголын шигшээ багийн хаалгач Э.Мөнх-Эрдэнэ амжилттай хаасан. Улмаар тоглолт тэнцүү үргэлжилж байсан ч шүүгчийн мэдлийн нэмэлт цагт Филиппиний шигшээ багийн довтлогч, Германы Бохум клубт тоглодог Холтман гоолдож 1-0 харьцаагаар Филиппин хожлоо.

Монголын шигшээ баг ийнхүү хоёр тоглолт дараалан, тоглолтын төгсгөлд гоол алдаж тун харамсалтайгаар хожигдлоо.

Хэсгийн эхний тоглолтод торгуулийн цохилт алдаж Палестинд 1-0 харьцаагаар хожигдоод байсан Монголын шигшээ баг сүүлийн тоглолтоо энэ сарын 14-ний мягмар гаргийн 17:00 цагт Йементэй хийнэ. Харин Филиппиний шигшээ баг тус өдрийн 12:30 цагт Палестинтай тоглох юм.

Хэсгийн нөгөө багууд болох Палестин, Йемений багууд өнөөдөр 17:00 цагаас Монголын хөл бөмбөгийн холбооны талбайд тоглоно. Өмнөх тоглолтод Филиппинтэй 0-0 харьцаагаар тэнцсэн Йемен нэг оноотой яваа бол Монголыг хожсон Палестин 3 оноотой хэсгээ тэргүүлж байна.