Month: June 2022

Үндэсний статистикийн хороо нийгэм, эдийн засгийн тавдугаар сарын статистик үзүүлэлтийг танилцуулж байна.

Малын зах зээлийн дундаж үнийн мэдээллээр 2022 оны 5 дугаар сард атны үнэ 1.5 сая төгрөг болж, өмнөх сараас 33.1 мянган төгрөгөөр, соёолон үрээнийх 1.1 сая төгрөг болж, өмнөх сараас 7.8 мянган төгрөг, хязаалан гунынх 1.4 сая төгрөг болж, өмнөх сараас 37.8 мянган төгрөгөөр, эр хонины үнэ 237.1 мянган төгрөг болж, өмнөх сараас 9.2 мянган төгрөгөөр, эр ямааны үнэ 161.3 мянган төгрөг болж, өмнөх сараас 600 төгрөгөөр тус тус өссөн байна.

Эр хонины үнэ 2022 оны 5 дугаар сард Ховд аймагт хамгийн их буюу 283.5 мянган төгрөг болж, өмнөх сараас 27.6 мянган төгрөгөөр өссөн байна. Хэнтий аймагт хамгийн бага буюу 185.6 мянган төгрөг болж, өмнөх сараас 1.1 мянган төгрөгөөр буурсан байна.

Сэлэнгэ аймгийн Орхонтуул сумын нэгдүгээр багийн Рашаант тосгон /аймгийн төвөөс баруун урд зүгт 274 км, сумын төвөөс хойд зүгт 5 км, Сайхан сумаас баруун урд зүгт 60 км/-т Иргэн М “Орхон” голд осолдсон байж болзошгүй тусламж хэрэгтэй байна гэсэн дуудлагыг Цагдаагийн байгууллагаас зургадугаар сарын 15-ны өдрийн 08:28 цагт хүлээн авчээ.

Тус аймгийн Онцгой байдлын газрын Гал түймэр унтраах, аврах 61 дүгээр ангийн алба хаагчид, Эрэн хайх, аврах анги, Цагдаагийн хэсгийн алба хаагчид, сумын Засаг даргын Тамгын газрын ажилтнууд, орон нутгийн иргэд М /14 настай, эрэгтэй/-ыг тус сумын Рашаант тосгоны “Цуу тайж” гэдэг газраас урд зүгт 17 км-т “Орхон” голоор завиар урсаж, 3 метрийн гүнд 6 удаа шумбаж, голын эргээр автомашинтай болон явганаар эрэн хайх ажиллагааг зохион байгуулж үр дүнд хүрээгүй тул мөн өдрийн 22:25 цагт түр зогсоосон. зургадугаар сарын 16-ны өдрийн 06:00 цагт эхлүүлжээ.

Монгол Усын нийгэм, эдийн засгийн статистик мэдээллийг Үндэсний статистикийн хорооноос танилцууллаа.

Аюулт үзэгдэл, ослын тохиолдол энэ оны эхний таван сарын байдлаар 1,948 болсныг энэ үеэр онцоллоо.

Энэ нь өмнөх оны мөн үеэс 186 (10.6% )-гаар өссөн үзүүлэлт болжээ.

Газар хөдлөлт энэ оны эхний таван сарын байдлаар 29 удаа бүртгэгдэж, өмнөх оны мөн үеэс 208 (87.8 %)-аар буурчээ.

Аюулт үзэгдэл, ослын улмаас эхний таван сарын байдлаар нийт 58 хүн амь насаа алдаж, өмнөх оны мөн 36 (38.3% )-гаар мөн буурсан бөгөөд 8.2 тэрбум төгрөгийн хохирол учирч, 2.1 тэрбум төгрөг зарцуулжээ.

2022 оны эхний таван сард манай улсын 7.4 мянган хүн нас барж, өмнөх оны мөн үеэс 736-гаар буюу 11.1 хувиар өссөнийг Үндэсний статистикийн хороо мэдээллээ.

100,000 амьд төрөлтөд ногдох эхийн эндэгдлийн түвшин 40 байна.

График. Нийт нас баралт болон эхийн эндэгдлийн харьцаа (100,000 амьд төрөлтөд ногдох) жил бүрийн эхний таван сарын байдлаар

Түүнчлэн халдварт өвчнөөр өвчлөгчид энэ оны эхний таван сард 251.1 мянга болж, өмнөх оны мөн үеэс 4.3 дахин нэмэгджээ. Нийт халдварт өвчнөөр өвчлөгчдийн 96.8 хувь буюу 243.1 мянга нь КОВИД-19-өөр өвчлөгчид аж.

Хүснэгт. Халдварт өвчин, зарим өвчний төрлөөр, жил бүрийн эхний таван сарын байдлаар

Дээрх хүснэгтээс харвал энэ оны эхний таван сарын байдлаар ХДХВ/ДОХ-ын 5 тохиолдол бүртгэгдсэн байна.

2021 онд улсын хэмжээнд ХДХВ/ДОХ-ын 16 тохиолдол илэрч, нийт 327 болж байв. Тэгвэл он гарснаар таван тохиолдол нэмэгдэж, 332 болсон байна.

Хөвсгөл аймгийн Тосонцэнгэл сумын “Ногоон-Арал” гэдэг газар /аймгийн төвөөс зүүн урд зүгт 84 км, сумын төвөөс урд зүгт 20 км/-т зургаадугаар сарын 15-ны өдрийн 20:00 цагийн үед “Сэлэнгэ” голд 130 ямаа урссан тухай мэдээлэл ОБЕГ-т иржээ.

Тус сумын Засаг даргын Тамгын газрын даргаар ахлуулсан ажилтнууд, Б-ын 130 ямаа “Сэлэнгэ” голын усанд урсаж хорогдсон тул сэг зэмийг гаргаж ажилласан талаар мэдээллээ.

Өнгөрсөн хоногт төвийн аймгуудын ихэнх нутаг, зүүн аймгуудын нутгийн хойд хэсгээр 0.0-30.0мм аадар бороо орсон байна.

Үүнээс хамгийн их нь Хэнтийн Жаргалтхаанд 30,0мм, Хөвсгөлийн Тариалан, Ханх, Хатгал, Булганы Бугат, Сэлэнгэ сум орчмоор 14,3-16,0мм, Дорнодын Чулуунхороот сумдын нутгаар 10.0 мм, бусад нутгаар 0.1-8.0 мм бороо ороод байгаа юм. Тиймээс малчид, иргэдийг гол мөрний усыг туулахдаа анхаарал болгоомжтой байхыг сануулж байна.

Монгол Улсын Засгийн газраас хэрэгжүүлж буй “Шинэ сэргэлтийн бодлого”-ын Эрчим хүчний сэргэлтийн хүрээнд Улаанбаатар хотын өсөн нэмэгдэж буй цахилгаан, дулааны хэрэглээг хангах томоохон арга хэмжээ, хөгжлийн төслүүдийг хэрэгжүүлж эхлээд байна.

– ХӨГЖЛИЙН БАНКНЫ ЭРГЭН ТӨЛӨЛТ САЙЖИРЧ БАЙГАА НЬ ТӨСӨЛ ХӨТӨЛБӨРҮҮД УРАГШЛАХ БОЛОМЖ БОЛЖ БАЙНА –

Амгалан дулааны станцыг өргөтгөж, Улаанбаатар хотын Баянзүрх дүүрэг, Улиастай орчимд бий болох орон сууцны шинэ хорооллуудыг дулааны эрчим хүчээр хангах төслийн нээлт өнөөдөр болж, Монгол Улсын Ерөнхий сайд Л.Оюун-Эрдэнэ оролцлоо. Ерөнхий сайд Л.Оюун-Эрдэнэ” Манай улс 1986 онд дулааны IV цахилгаан станц баригдсанаас хойш эрчим хүчний нэг ч шинэ эх үүсвэр төрийн зүгээс байгуулж чадалгүй ирсэн юм.
Бид эрчим хүчний импортод жил бүр дунджаар 400 гаруй тэрбум төгрөг зарлагадаж байна. Дулааны станцуудын насжилт 35-60 жил, цахилгаан дамжуулах, түгээх сүлжээний насжилт 32-62 жил болж, 40 гаруй хувийнх нь ашиглалтын хугацаа дууссан.
Гэтэл жил бүр Улаанбаатар хотын хүн ам нэг аймгийн хүн амтай тэнцэхүйц хэмжээгээр нэмэгдэж, нэмэлт эх үүсвэрүүдийг шаардаж байна” гэлээ.

Мөн Хөгжлийн банкны эргэн төлөлт сайжирч байгаа нь Монгол Улс олон улсад тавьсан өрөө хугацаандаа төлөх, нэн шаардлагатай төсөл хөтөлбөрүүдээ цаг алдалгүй урагшлуулах боломж гарч байна. Засгийн газрын өчигдрийн хуралдаанаар “Шинэ сэргэлтийн бодлого”-ын хүрээнд Амгалангийн дулааны станцын өргөтгөлийн санхүүжилтийн 85 хувийг Хөгжлийн банкнаас олгохоор шийдвэрлэлээ.
Өнөөдөр эхлүүлж буй энэхүү төсөл хэрэгжсэнээр цагт 116 мегаватт эрчим хүч үйлдвэрлэх хүчин чадал нэмэгдэж, Улаанбаатар хотын хүн амын 30 гаруй хувь амьдардаг Баянзүрх дүүрэг болон Улиастай орчмыг найдвартай дулааны эх үүсвэрээр хангаж, улмаар нийслэлийн хэт төвлөрлийг сааруулах бүтээн байгуулалт, хөгжлийн төслүүд хэрэгжих суурь нөхцөл бий болно.
Амгалангийн дулааны станцын өргөтгөл хийгдсэнээр Улаанбаатар хотын дулаан хангамжийн 31 хувийг хангадаг Дулааны III цахилгаан станцын ачааллыг хуваалцаж, тус станцын хоёрдугаар үе шатны өргөтгөлийн ажлыг эхлүүлэх боломж бүрдэх юм.
Цаашид Монгол Улсын Засгийн газраас “Шинэ сэргэлтийн бодлого”-д дэвшүүлсэн Эрчим хүчний сэргэлтийн хүрээнд сэргээгдэх эрчим хүчний эх үүсвэрүүд, түүний дотор усан цахилгаан станцыг нэн тэргүүний зорилт болгож, Эрдэнэбүрэнгийн усан цахилгаан станцын бүтээн байгуулалтыг дуусгаж, Эгийн голын усан цахилгаан станцыг эхлүүлэхийн төлөө бүх боломжоо дайчлан ажиллана аа.
Эрчээ алдсан эрчим хүчний салбарыг эргэн сэргэхэд чухал ач холбогдолтой хүчин чадлыг нь 75 мегаваттаар өргөтгөж, 250 мегаваттаар шинэчлэх Дулааны III цахилгаан станцын өргөтгөл, Тавантолгойн 450 мегаваттын дулааны цахилгаан станц, Багануурын 400 мегаваттын Цахилгаан станц, 50 мегавттатаар хүчин чадлыг нь өргөтгөх Чойбалсангийн Дулааны цахилгаан станц зэрэг бүтээн байгуулалтын төслүүдийг цаг алдалгүй эхлүүлж, ашиглалтад оруулах зорилтын эхний томоохон төсөл нь Амгалангийн 116 мегаваттын дулааны станц болж байна гэж Ерөнхий сайд хэллээ.

-ТӨСЛИЙН НИЙТ ӨРТӨГ 65,6 ТЭРБУМ ТӨГРӨГ

Төслийн ерөнхий гүйцэтгэгч БНХАУ-ын “Хунан индустриал экүйпмент инсталэйшн” ХХК-тай гэрээ байгуулж, ажил эхлээд байна. Төслийн барилга угсралтын ажил 16 сарын хугацаанд хийгдэж дуусах бөгөөд төслийн нийт өртөг 65.6 тэрбум төгрөг байна.
Амгалан дулааны станцын өргөтгөл, шинэчлэлтийн ажил хийгдэж суурилагдсан хүчин чадал 100 Гкал/ц-аар нэмэгдсэнээр долоон сургууль, долоон цэцэрлэгийг төвлөрсөн дулаан хангамжид холбоно. Мөн Улаанбаатар хотын Баянзүрх дүүрэг, Улиастай орчмын дахин төлөвлөлтийн хүрээнд бий болох орон сууцны шинэ хорооллуудыг дулааны эрчим хүчээр хангах бөгөөд эх үүсвэр хооронд ачаалал шилжүүлэх боломж бүрдэнэ. Ингэснээр хотын сүлжээг оновчтой схемээр ажиллуулж, “ДЦС-3” ТӨХК-ийн 250 МВт-ын өргөтгөлийн ажлыг хэрэгжүүлэх техникийн боломж бүрдэх юм. Үүнээс гадна Амгалан дулааны станцын өргөтгөлтэй уялдан хотын зүүн хэсгийн 40 гаруй халаалтын зуухыг зогсоож, түүнээс хангагддаг барилга, байгууламжийг төвлөрсөн дулаан хангамжид холбох техникийн боломж бүрдэж, агаарын бохирдлыг бууруулна. Амгалан ДЦС ТӨХК-ийн үйлдвэрлэлийн хэмжээ 1.1 сая Гкал/ц хүртэл нэмэгдэнэ.

Засгийн газрын Хэвлэл мэдээлэл, олон нийттэй харилцах газар

Ардчилсан намаас цаг үеийн асуудлаар мэдээлэл хийлээ.

АН-ын гишүүн С.Эрдэнэ “Ардчилсан намд хууль эрхзүйн чиглэлийн маргаан үлдээгүй. Өөрөөр хэлбэл, бүх зүйл ном журам, хуулийн дагуу шийдэгдсэн. Нэн тэргүүнд Үндэсний бодлогын хорооны бүтэц зохион байгуулалтыг боловсронгуй болгохоор ажиллаж байна. Бид сөрөг хүчний байдлаар идэвхтэй, олон асуудалд анхаарлаа хандуулан ажиллах шаардлагатай байгаа.1990-ээд оноос хойш манай нам олонх болж, эрх барьж үзээгүй ч ач холбогдолтой шийдвэр гаргаж, арга хэмжээг авч өөрчлөлт, бүтээн байгуулалтыг хийж чадсан. Одоо гурван аймагт нөхөн сонгууль явагдах бөгөөд СЕХ-ноос АН-д ямар нэгэн мэдээлэл ирүүлээгүй, бид өөрсдөө хөөцөлдөж мэдээлэл авч байна” гэв.