Гэр бүл, хүүхэд, залуучуудын газар, ЦЕГ, ОБЕГ, Нийгмийн эрүүл мэндийн хүрээлэн хамтран унаач хүүхдийг осол гэмтлээс урьдчилан сэргийлэх, хамгаалах асуудлаар өнөөдөр мэдээлэл хийлээ.

Гэр бүл хүүхэд залуучуудын хөгжлийн газрын Хүүхдийн эрхийн хэрэгжилтийн газрын дарга Г.Саранхүү “Таван байгууллага хамтран Нэгдүгээрт хүүхэд нөлөөллийн ажлыг төлөвлөн хэрэгжүүлж буй. Энэ хүрээнд хүүхдийг болзошгүй эрсдэлээс сэргийлэх, эрсдэлт нөхцөлд байгаа хүүхдийг ирлүүлэх, хамгаалах чиглэлээр ажиллаж байна.

Гэр бүл хүүхэд залуучуудын хөгжлийн газраас таван газартай хамтран зургаадугаар сарын 9-нөөс эхлэн хүүхдийг хөдөлмөр эрхлүүлэхгүй байх талаар зөвлөн туслах ажлыг хийгээд дууслаа.

Хүүхдийн болзошгүй эрсдэлээс урьдчилан сэргийлэх ажлыг хийж байна. Яах аргагүй эцэг, эхчүүд хүүхдээ хамгаалж болох эрсдэлд учруулаад байгаа тохиолдлууд нэмэгдэж байна. Тухайлбал, Баяр наадмын үйл ажиллагаа сүүлийн 2-3 жил цар тахлын улмаас зохион байгуулагдаагүйтэй холбоотойгоор энэ жил нэлээд олон баяр наадмын үйл ажиллагаа товлогдсон төдийгүй таван бүсэд хурдан морины бүсийн уралдаан зохион байгуулагдахаар болжээ. Мөн хурдан морины уралдаанд оролцох морьдын тоо ч нэмэгдсэн гэх мэдээлэл байна.

Үүнтэй зэрэгцэн бүртгэлгүй хурдан морины уралдаан зохион байгуулах тохиолдол гарсаар байгаа тул аймаг, орон нутгийн Засаг дарга нар болон хүүхдийн төлөө зөвлөлийн дарга нар хуульд заасан чиг үүргийнхээ хүрээнд орон нутагтаа зохион байгуулагдаж буй хурдан морины уралдаан, сунгааг заавал бүртгэлжүүлж холбогдох мэргэжлийн байгууллагатай хамтран ажлын хэсэг гарган тодорхой хяналт дор ийм үйл ажиллагааг зохион байгуулах шаардлагатай байна.

Учир нь бүртгэлтэй уралдаанд хүүхдийн эрсдэл арай бага байдаг бол бүртгэлгүй уралдаанд хүүхэд унаж гэмтэх нь илүүтэйгээс гадна хүүхдийг хамгаалалтын хувцас хэрэглэлгүй хурдан морь унуулах тохиолдол байна” гэлээ.

Монгол Улсын гавьяат тамирчин П.Сүхбат агсанд Үндэсний бөхийн арслан цолыг нь нөхөж олгохгүй байгаа нь хууль бус болохыг Нийслэл дэх Захиргааны хэргийн анхан шатны шүүхээс тогтоожээ.

Тодруулбал, Ховд аймгийн Буянт сумын уугуул, Баянхонгор аймгийн Баян-Овоо сумын харьяат Монгол Улсын гарди П.Сүхбат агсанд Монгол Улсын арслан цол олгохгүй байгаа Үндэсний бөхийн холбоо, Үндэсний их баяр наадмыг зохион байгуулах хорооны эс үйлдэхүй нь хууль бус болохыг тогтоож, түүнд арслан цолыг нөхөж олгох эсэх тухай хуульч Н.Эрхэмбаяр болон П.Сүхбат агсны гэргий Д.Сарангэрэлийн нэхэмжлэлтэй шүүх хурал Нийслэл дэх Захиргааны хэргийн анхан шатны шүүхэд 2022 оны зургаадугаар сарын 13-нд болсон байна.

Шүүх хуралдаанаар Монгол Улсын Үндсэн хуулийн 14.2, Үндэсний их баяр наадмын тухай хуулийн 3.1, 12.4.1 дэх заалтад заасныг баримтлан нэхэмжлэгч Д.Сарангэрэлийн нэхэмжлэлийн шаардлагыг бүхэлд нь хангаж, Монгол Улсын гарди П.Сүхбат агсанд Монгол Улсын арслан цол олгохгүй байгаа үйлдэл нь хууль бус болохыг тогтоож, түүнд арслан цол олгох асуудлыг шийдвэрлэхийг хариуцагч нарт даалгаж шийдвэрлэжээ.

Энэ нь шүүхийн шийдвэрээр нас барсан хүнд цолыг нь нөхөж олгуулах асуудлыг шийдвэрлэхээр даалгасан анхны тохиолдол болж байна. Хуульч Н.Эрхэмбаяр нь П.Сүхбат агсны цолыг нөхөж олгуулах тухай санаачилж, улмаар түүний гэргийтэй хамт хуулийн итгэмжлэлийн дагуу шүүхэд хандсан аж.

Сануулахад, Монгол Улсын гавьяат тамирчин, улсын гарди П.Сүхбат агсан нь Үндэсний бөхөөр

• 1984 онд Аймгийн арслан цол
• 1988 онд Улсын баяр наадамд зургаа давж, “Улсын өсөх идэр начин” цол
• 1990 онд Улсын баяр наадамд долоо давж, “Улсын заан” цол
• 1991 онд Улсын баяр наадамд найм давж үзүүрлэн, “Үлэмж бадрах” чимэг
• 1992 онд Улсын баяр наадамд долоо давж,”Саруул сайжрах” чимэг
• 1993 болон 1994 онд онд Улсын баяр наадамд зургаа давж, “”Хуурнин шуугигч” чимэг
• 1997 онд Услын баяр наадамд тав давж “Хурдан шаламгай” чимэг
• 2001 онд Улсын баяр наадамд тав давж, “Үнэн зоригт” чимэг
• 2003 онд дээрх амжилтаар “Улсын гарьд” цол тус тус хүртэж байсан төдийгүй 1990 онд Япон улсын Токио хотноо болсон чөлөөт бөхийг дэлхийн аварга шалгаруулах тэмцээнд хүрэл медаль, Ази тивийн чөлөөт бөхийн аварга шалгаруулах тэмцээнд аваргаар шалгарч 1991 онд Монгол Улсын Гавьяат тамирчин цол хүртэж байв.

Улсын хэмжээнд өнгөрсөн хоногт хийсэн коронавирусийг илрүүлэх PCR шинжилгээгээр 54 тохиолдол шинээр батлагджээ.

Илэрсэн халдварын

• 33 нь Улаанбаатар хотод,
• 21 нь орон нутагт бүртгэгдсэн байна.

Ингэснээр нийт бүртгэгдсэн халдварын тоо 928,862 болж нэмэгдэв.

Мөн сүүлийн 24 цагийн хугацаанд 123 хүн эдгэрсэн бол одоогоор 703 хүн хяналтад байгаа гэж Эрүүл мэндийн хөгжлийн төвөөс мэдээллээ.

Хөдөлмөрийн аюулгүй байдал, эрүүл ахуйн Үндэсний хороо цаг үеийн асуудлаар хуралдлаа. Хурлаар Мэргэжлийн хяналтын ерөнхий газраас барилгын салбарт сүүлийн сард гарсан ослуудын талаар болон Барилга, хот байгуулалтын яамнаас “Барилгын салбарт мөрдөгдөж байгаа дүрэм, журам, стандарт”-ын талаарх мэдээлэл танилцууллаа.

Дээрх мэдээллүүдтэй холбогдуулан Хөдөлмөрийн аюулгүй байдал, эрүүл ахуйн Үндэсний хорооны хурлаас дараах чиглэл, арга хэмжээг хэрэгжүүлж ажиллахаар болов.

Үүнд:

1. Барилга, хот байгуулалтын яамны хөдөлмөрийн аюулгүй байдал, эрүүл ахуйн салбар хорооны үйл ажиллагааг идэвхжүүлэх, төлөвлөгөө гарган ажиллах, мөн барилгын салбарт гарсан ослын шалтгаан, нөхцөлийг судлах үүрэг бүхий ажлын хэсэг байгуулах, ХАБЭА-н Үндэсний хорооноос мэргэжил, арга зүйн дэмжлэг үзүүлж ажиллах

2. Ковид-19 цар тахлаас үүдэлтэй аж ахуйн нэгж, байгууллагын үйл ажиллагаа зогсонги байдалтай байсан ба үйл ажиллагаа эхлэх үед ажлын зохион байгуулалт хангалтгүй байгаа зэрэгтэй холбогдуулан мэргэжлийн хяналтын байгууллага, салбарын яамд болон холбогдох байгууллагууд урьдчилан сэргийлэх зорилгоор хамтарсан, дагнасан байдлаар хянах, зөвлөн туслах, дэмжих арга хэмжээг зохион байгуулах, мөн аж ахуйн нэгж, байгууллага бүр дотоод хяналт, шалгалтыг зохих түвшинд сайжруулах

3. Хөдөлмөрийн аюулгүй байдал, эрүүл ахуйн сургалтыг хөдөлмөрийн аюулгүй ажиллагааны ажилтан, ажил олгогч эзэд, ажилчин, туслах ажилчинд чанартай, тогтмол, хүртээмжтэй, үр дүнтэй зохион байгуулах

4. Хөдөлмөрийн аюулгүй байдал, эрүүл мэндийн талаар иргэн бүрийг соён гэгээрүүлэх, дадал, төлөвшил олгох, мөн гэр бүлийн ойлголт, хандлагыг нэмэгдүүлэхэд шат шатны байгууллагууд анхаарч ажиллах

5. Сургалтын байгууллагын үйл ажиллагаа, сургалтын чанар, зохион байгуулалтын талаар зарим асуудлууд гарч байгаа тул энэ жил хяналт-шалгалтыг зохион байгуулах, ажлын хэсэгт Үндэсний хорооны гишүүд саналаар оролцох, цаашид сургалт зохион байгуулах талаарх дүрэм, журмыг судлан шинэчилж, тогтолцоог өөрчлөх, сайжруулах

6. Төр, хувийн хэвшлийн байгууллагуудын хөдөлмөрийн аюулгүй ажиллагааны талаарх “Сайн туршлага”-ыг түгээх

7. Хөдөлмөрийн аюулгүй байдал, эрүүл ахуйн Үндэсний хорооны 2022 оны төлөвлөгөөнд холбогдох нэмэлт, өөрчлөлт оруулах

8. Барилгын салбарт үйл ажиллагаа эрхэлж байгаа аж ахуйн нэгж, байгууллага, ажиллагчид болон олон нийтэд зориулан хөдөлмөрийн аюулгүй байдал, эрүүл мэндийн чиглэлээрх ойлголт, мэдлэг, дадал, төлөвшлийг нэмэгдүүлэх чиглэлээр “Уриалга” гарган түгээх

9. Хөдөлмөр, нийгмийн хамгааллын асуудлаар Засгийн газрын 11-11 төвөөр дамжуулан бодлого, хэрэгжилт, үйл ажиллагааны талаар иргэд, байгууллагуудаас санал, гомдол, хүсэлтийг авч байгаа тул салбарын яамд, мэргэжлийн байгууллагууд Үндэсний хорооны гишүүд санал, хүсэлтээ ирүүлэх

Хөдөлмөрийн аюулгүй байдал, эрүүл ахуйн Үндэсний хорооны дарга, дэд сайд С.Зулпхар дээрх арга хэмжээнүүдийг тус яамны холбогдох газар, хэлтэс, харьяа газар болон холбогдох байгууллагууд хамтран, үйл ажиллагаагаа уялдуулан ажиллах талаар чиглэл өглөө.

Засгийн газраас БНХАУ-ын хоёр хот руу агаарын хилээ нээж байгааг нийтэд мэдээлсэн. Нислэг сэргэж буйтай холбогдуулан МИАТ ТӨХК Улаанбаатар-Гуанжоу-Улаанбаатар чиглэлд нислэг үйлдэх хуваарь болон коронавирусийн халдвараас сэргийлэх шаардлагыг олон нийтэд танилцууллаа.

Гуанжоу хот руу нисэх иргэдэд тавигдах шаардлага:

БНХАУ-ын хилээр нэвтрэхэд тавигдах шаардлага болон тусгаарлалтын хугацаатай холбоотой БНХАУ-аас Монгол Улсад суугаа Элчин сайдын яамнаас ирүүлсэн мэдээллийг хүргэж байна.

Виз болон эрүүл мэндийн шаардлага

1. БНХАУ руу нэвтрэн ороход нэгдсэн ажиглалтад байх шаардлагатай тул БНХАУ-ын харьяалалтай бус иргэн нь хүчинтэй визтэй эсэхийг шалгаж тийз бичнэ.
2. Монгол Улсад гуравдагч орноос ирсэн иргэдэд Эрүүл мэндийн код олгох боломжгүй тул Монгол Улсаар дамжин өнгөрч БНХАУ руу нэвтрэх тохиолдолд тийз бичиж олгохгүй.
3. Нислэгээс өмнө https://mp.weixin.qq.com/s/vBSwfThbAHQH-NoGHRkCDQ хаягаар нэвтэрч “Аялагчдын эрүүл мэндийн код, эрүүл мэндийн байдлын мэдүүлэгт өргөдөл гаргахад тавигдах сүүлийн шаардлага” хэсгээс мэдээлэл авсан байх
4. Гадаад иргэд https://hrhk.cs.mfa.gov.cn/H5/ хаягаар эрүүл мэндийн код авсан байх,
5. Монгол Улсын хил нэвтрэхтэй холбоотой асуудлыг БНХАУ-ын Элчин сайдын яамнаас заавал тодруулах шаардлагатай. Виз болон бусад шаардлагатай мэдээллийг дараах линкээс авна уу. http://mn.china-embassy.gov.cn/…/t20220617_10705582.htm

Шинжилгээний шаардлага

2022 оны зургаадугаар сарын 24-ний өдрөөс эхлэн БНХАУ-ын болон гадаадын бүх зорчигчид нуклейн хүчлийн шинжилгээнд /PCR/ хамрагдах ёстой.

Онгоцонд суухаас 48 цаг, 24 цагийн өмнө нийт хоёр удаа PCR шинжилгээ, мөн онгоцонд суухаас 12 цагийн дотор эсрэг биетийг илрүүлэх ковидын түргэвчилсэн шинжилгээ хийлгэсэн сөрөг хариутай байх.

Бүх шинжилгээг Элчин сайдын яамнаас томилсон дараах шинжилгээний байгууллагад өгнө.

1. Халдварт өвчин судлалын үндэсний төв /National Research Center for Infectious Diseases/
2. Зоонозын өвчин судлалын үндэсний төв /Zoonotic Disease Research Center/
3. Нийгмийн эрүүл мэндийн үндэсний төв /National Center for Public Health/
4. Интермед эмнэлэг

Гуанжоу дахь тусгаарлалт:

• Хилийн чанадаас ирсэн Гуанжоу хотод байнга оршин суудаг иргэдийг 7 хоног буудалд, 3 хоног гэрээр нь тусгаарлана.
• Гуанжоу хотоор дамжин бусад муж, хотуудад зорчих иргэдийг 7 хоног буудалд тусгаарлаж, тусгаарлалтын хугацаа дуусмагц хүлээн авах муж, хот зөвшөөрсөн тохиолдолд 24 цагийн дотор тус хотоос гарсан байх, мөн хэрвээ зөвшөөрөөгүй тохиолдолд дурын буудалд 3 хоног тус тус тусгаарлах шаардлагатай.
• Тусгаарлалтын зардал нь тухайн нислэгт хуваарилагдсан буудлаас хамаарч, 1 хүний хоногийн 500-600 /хоол багтсан/ юань байна. Тусгаарлагдах буудлыг захиалах, сонгох боломжгүй.

Хилээр нэвтэрсний дараа шинжилгээний хариу эерэг гарсан тохиолдолд

Хилийн чанадаас ирсэн иргэдийн PCR шинжилгээний хариу эерэг гарвал Гуанжоу хотын 8 дугаар эмнэлэгт шилжүүлэн эмчлэх бөгөөд өвчний шинж тэмдэг хөнгөн, бусад өвчингүй тохиолдолд өвчтөний эмчилгээний зардал 3,000-10,000 юанийн хооронд байна.

Хэрэв өвчний шинж тэмдэг ихтэй, бусад өвчинтэй хавсарсан тохиолдолд эмчилгээний зардал 10,000 юаниас дээш байна. Эмнэлгээс гарах хугацааг эмч нарын хурлаар шийдвэрлэх бөгөөд эмнэлгээс гарсны дараа 14 хоног буудалд үргэлжлүүлэн тусгаарлаж хянах ба 14 хоногийн хугацаанд PCR шинжилгээний хариу сөрөг гарсан тохиолдолд тусгаарлалтаас гаргана. Үүнтэй холбогдуулан үүссэн зардлыг тухайн иргэн бүрэн хариуцна.