Month: May 2022

Categories
мэдээ нийгэм

Америк, Монголын зэвсэгт хүчнийхэн хамтарсан “Зэв-22” дадлага сургуулилт хийлээ DNN.mn

Өнгөрсөн хоёр сарын хугацаанд АНУ-ын Зэвсэгт хүчний Аюулгүй байдлын дэмжлэгийн V бригад болон Монгол Улсын Зэвсэгт хүчний Хуурай замын цэргийн командлалын бүрэлдэхүүн хамтарсан дадлага сургуулилтыг зохион байгуулжээ. Америк, Монголын инженер цэргүүд тэсрэх бодис болон гар хийцийн тэсрэх зүйлийг хайн илрүүлж, аюулгүй болгох техник, тоног төхөөрөмжийн дадлага хийсэн бол эмнэлгийн ажилтнууд талбар дээрх эмнэлгийн тусламж үзүүлэх арга техникээс суралцлаа. Эдгээр хүчин чармайлт нь Хуурай замын цэргийн командлалын цэргүүдийг НҮБ-ын Энхийг сахиулах ажиллагаанд бэлтгэх зорилготой билээ. 2021 оноос эхэлсэн тус “Зэв-22″ дадлага сургууль нь энэ жил гурав дахь удаагаа зохион байгуулсан байна.

3 хүн, цэргийн дүрэмт хувцас ба гадаа нарын зураг байж магад


2 хүн ба цэргийн дүрэмт хувцас нарын зураг байж магад

5 хүн, зогсож буй хүмүүс ба цэргийн дүрэмт хувцас нарын зураг байж магад

Categories
мэдээ эдийн-засаг

Монгол Улс 134 орноос гадаад худалдаа хийж байна DNN.mn

Монгол улсын гадаад худалдаа оны эхний дөрвөн сарын байдлаар, экспорт өмнөх сараас 138.1 (18.7%) сая америк доллароор, импорт 5.7 (0.9%) сая америк доллароор тус тус өслөө.

Монгол Улс 2022 оны эхний 4 сард нийт 134 улстай худалдаа хийж, гадаад худалдааны нийт бараа эргэлт 5.1 тэрбум америк доллар, үүнээс экспорт 2.8 тэрбум америк доллар, импорт 2.3 тэрбум америк доллар байна. Нийт бараа эргэлтийн хэмжээ өмнөх оны мөн үеэс 690.8 (15.5%) сая америк доллароор, экспорт 302.7 (12.1%) сая америк доллароор, импорт 388.1 (19.8%) сая америк доллароор тус тус өсчээ.

Categories
гадаад мэдээ

Хятадын удирдагч Си Жиньпин өвдсөн үү? DNN.mn

Хятадын удирдагч Си Жиньпин тархины аневризм буюу тархины судас цүлхийх өвчнөөр өвдсөн тул уламжлалт анагаах ухаанаар эмчлүүлэх хүсэлтэй байгаа тухай “Dai­ly mail” мэдээлэв. Тэрээр өвчнөө эмчлүүлэх мэс засалд орохыг хүсэхгүй байгаа аж. Өдгөө 68 настай удирдагч уламжлалт анагаах ухааныг илүүд үздэг тул тархины мэс засал хийлгэхээс татгалзаж магадгүй байна. Өнгөрсөн оны сүүлээр эмч нар түүний тархины судас цүлхийснийг илрүүлсний дараа яаралтай эмнэлэгт хүргэгдсэн гэж “ANI” агентлаг урьд нь мэдээлж байсан. “Ковид-19” цар тахлын эхэн үед Хятад улс уламжлалт анагаахын эмчилгээг экспортлохоор ажиллаж байсан. Си энэ кампанит ажлыг дэмжигчдийн гол төлөөлөгчдийн нэг байсан ажээ.Путины нэгэн адил Си Жиньпиний эрүүл мэнд үргэлж нууцлагдмал байсаар ирсэн. Цар тахлын анхны давлагааны үеэр Шэньжэнь хотод цугласан олонд хандаж үг хэлэхдээ түүний яриа удаан байсан бөгөөд ханиалгаж байсан гэж ажиглагчид хэлжээ. Түүнээс өмнө 2019 онд Италид айлчлах үеэрээ Си Жиньпин илт доголсон тохиолдол ч байсан гэнэ.

“The Washington post” сонины энэ сарын 11-ний дугаарт Си Жиньпин өөрийн хүсэлтээр албан үүргээ ерөнхий сайддаа шилжүүлэн гүйцэтгүүлж байгаа бөгөөд ХКН-ын ирэх их хурлаар суудлаасаа буухаар болоод байна хэмээн бичсэн байна. Ирэх аравдугаар сард Хятадын коммунист намын ээлжит их хурлаар Си Жиньпинийг улираан сонгох эсэхийг шийдэх бөгөөд сүүлийн үед ковидын хөл хорио тогтоох үр дүнгүй шийдвэр гаргасан хамгийн гол нь Хятадыг барууны улсуудын эсрэг байр сууринд аваачсан буруу бодлого явуулсан учир түүнийг дахин сонгохгүй байх магадлал өндөр болсон хэмээн үзэгчид цөөнгүй болоод байгаа билээ.

Categories
мэдээ нийгэм цаг-үе

Хэрэглээний бараа, үйлчилгээний үнэ өмнөх сараас 2.3 хувиар өсчээ DNN.mn

Хэрэглээний бараа, үйлчилгээний үнэ 2022 оны дөрөвдүгээр сард улсын хэмжээнд өмнөх оны мөн үеэс 14.4 хувь, өмнөх оны эцсээс 6.4 хувь, өмнөх сараас 2.3 хувиар өссөн байна.

Ийнхүү 14.4 хувиар өсөхөд

  • Хүнсний бараа, ундаа, усны бүлгийн үнэ дүнгээрээ 16.8 хувь (мах, махан бүтээгдэхүүн 7.9 хувь, согтууруулах бус ундааны дэд бүлгийн үнэ 18.1 хувь),
  • Согтууруулах ундаа, тамхины бүлгийн үнэ дүнгээрээ 8.7 хувь,
  • Хувцас, бөс бараа, гутлын бүлгийн үнэ дүнгээрээ 12.9 хувь,
  • Орон сууц, ус, цахилгаан, хийн болон бусад түлшний бүлгийн үнэ дүнгээрээ 10.4 хувь,
  • Эм тариа, эмнэлгийн үйлчилгээний бүлгийн үнэ дүнгээрээ 15.2 хувь,
  • Тээврийн бүлгийн үнэ дүнгээрээ 25.6 хувиар тус тус өссөн нь голлон нөлөөлжээ.

Инфляцын түвшин буюу хэрэглээний бараа, үйлчилгээний үнэ 2019 оны дөрөвдүгээр сард 7 хувь, 2020 оны дөрөвдүгээр сард 4.7 хувь, 2021 оны 4 дүгээр сард 5.6 хувь гарсан бол 2022 оны дөрөвдүгээр сард 14.4 хувь болж, өмнөх оны мөн үеэс 8.8 нэгж хувиар нэмэгдсэн байна.

Хэрэглээний бараа, үйлчилгээний үнэ 2022 оны дөрөвдүгээр сард улсын хэмжээнд 14.4 хувь гарсны 4.9 нэгж хувь буюу 34 хувь нь хүнсний бараа, ундаа, усны бүлгийн үнийн өсөлтөөс шалтгаалжээ.

Categories
мэдээ нийгэм

НМХГ: Маханд хугацаа нь дууссан, хятад шошготой нунтаг бодис хольдог байсныг тогтоолоо DNN.mn

Өнөөдөр буюу 2022.05.17-ны өдөр Нийслэлийн Мэргэжлийн хяналтын газраас цаг үеийн асуудлаар мэдээлэл хийлээ.

Энэ үеэр Эмээлтэд үйл ажиллагаа явуулдаг махны үйлдвэрийн асуудлаар зарим мэдээллийг өглөө. “Эм ди си пи” хэмээх БНХАУ-ын хөрөнгө оруулалттай эл компани олны анхаарлыг татаад байгаа юм.

Тэгвэл, энэ талаар НМХГ-аас “Манай байгууллагад “Эм ди си пи” ХХК-д холбогдох гомдол шуурхай дуудлагын утсаар ирсэн. Хяналт шалгалтаар зөрчлүүд илэрсэн.

Тухайлбал:

  • Эрүүл ахуйн шаардлага хангахгүй
  • Агуулахын бүртэлгүй
  • БНХАУ-д үйлдвэрлэсэн хятад шошготой, хугацаа дууссан нунтаг бүтээгдэхүүнийг зааваргүй хэрэглэж байсан.

Иймд бид үйлдвэрлэлийн орчинд байсан ямааны махнаас болон хольсон ус, бодисоос дээж авч лабораторууд руу явуулсан. Сэврээж байсан, усанд хийж сойсон, сойгоод гаргасан, нунтаг бодистой хольсон, агуулахад хадгалагдаж байсан гэх мэт зургаан төрлийн ямааны махнаас дээж авсан. Мөн ундны ус болон нунтаг бодис хэрэглэсэн уснаас дээж авсан. Шинжилгээний хариу өнөөдөр гарна. Байцаагч дээр хариу ирээгүй байна. хяналт шалгалтын үйл ажиллагаа явагдаж байгаа” гэлээ.

Түүнчлэн “НМХГ бол тухайн компани хэний эзэмшилд байдгийг шалган тогтоох чиг үүрэггүй. Махыг БНХАУ руу экспортлох гэж байсан гэх мэдээлэл байгаа. Харин мэдүүлэг авахад тийм зүйл яриагүй” гэж онцоллоо.

Categories
мэдээ цаг-үе эдийн-засаг

Иргэдийн цалин хөлсний орлого өмнөх оны мөн үеэс 0.2 хувиар буурчээ DNN.MN

Монгол Улсын нийгэм, эдийн засгийн 2022 оны эхний дөрвөн сарын статистик үзүүлэлтүүдийг Үндэсний статистикийн хорооноос танилцууллаа.

Тус хорооны Нийгмийн Статистикийн хэлтсийн дарга С.Тодгэрэл “Нийгмийн даатгалын сангийн орлого 1.2 тэрбум төгрөг болж, өмнөх оны мөн үеэс 156.7 тэрбум төгрөгөөр өссөн үзүүлэлттэй байна.

Харин тус сангийн зарлага нь 1.2 тэрбум төгрөг болж, өмнөх оны мөн үеэс 172.3 тэрбум төгрөг буюу 16.9 хувиар өссөн.

Өрхийн орлого, зарлагын 2022 оны нэгдүгээр улирлын мэдээг авч үзвэл, үнийн өртгийг арилган тооцсон бодит мөнгөн орлого 1.1 сая төгрөг болж, өмнөх оны мөн үеэс 78 мянган төгрөг буюу 7.5 хувиар өссөн үзүүлэлттэй гарсан.

Тэтгэвэр, тэтгэмжийн орлого 16.6 хувиар өсөхөд өндөр настны тэтгэвэр, тэтгэмжийг нэмэгдүүлсэн, цар тахлын үед өрхийн амьжиргааг дэмжсэн нь нөлөөлсөн байна.

Өрхийн зарлагын хувьд сүүлийн таван улирал дараалан буурч байсан бол 2022 оны нэгдүгээр улиралд өмнөх онтой харьцуулахад өссөн. Бодит зарлага 37 мянга буюу 3.5 хувиар өсөөд байгаа юм.

Хөдөлмөр эрхлэлтийн тоон мэдээллийг танилцуулъя. Ажиллагчдын тоо 1.1 сая болж, өмнөх оны мөн үеэс 73.6 мянгаар өссөн. Хөдөлмөр эрхлэлтийн түвшин 53.1 хувь болж, өмнөх онтой харьцуулахад гурван нэгжээр өсөөд байна.

Ажилгүйдлийн түвшин энэ оны нэгдүгээр улиралд 8.5 хувьтай байгааг өмнөх оны мөн үетэй харьцуулахад 0.3 нэгжээр буурсан үзүүлэлттэй байна.

Цалин хөлсний орлого өмнөх оны мөн үетэй харьцуулахад 0.2 хувиар буурсан” гэлээ.

Categories
гадаад мэдээ

Швед улс НАТО-д элсэх шийдвэрээ зарлажээ DNN.mn

Швед улсын засгийн газар Умард Атлантын Цэргийн эвсэл буюу НАТО-д гишүүнээр элсэх шийдвэрээ зарлажээ. Үүнээс хэдхэн цагийн өмнө хөрш Финланд улс мөн шийдвэрээ эцэслэн зарлаад байсан юм. Эрх баригч Социал Демократ нам болон сөрөг хүчин, ард түмэн НАТО-д элсэхийг дэмжиж буй тул ойрын өдрүүдэд албан ёсны хүсэлтээ гаргахаар болсон гэж мэдэгдсэн байна.

Швед улс дэлхийн хоёрдугаар дайнаас хойш төвийг сахих байр суурь баримталж ирсэн ба сүүлийн хоёр зуун жилийн турш ямар нэг цэргийн эвсэлд нэгдэж байгаагүй юм. Гэвч ОХУ-ын зүгээс Украинд халдан довтолсон явдал энэхүү уламжлалт бодлогоос нь татгалзахад хүргэжээ. Финланд улс ОХУ-тай 1,300 км шугамаар хиллэдэг бол Швед улс шууд хил залгадаггүй. Гэхдээ Шведийн засгийн газар өөрийн улсын газар нутагт цөмийн зэвсэг байрлуулахгүй, цэргийн бааз байгуулахгүй гэсэн нөхцөлтэйгөөр НАТО-д элсэхээр төлөвлөжээ. НАТО-д гишүүнээр элсэх нь Швед улс болон Шведийн ард түмний аюулгүй байдлыг хангах хамгийн зөв шийдэл” гэж тус улсын ерөнхий сайд Магдалена Андерссон өчигдөр болсон хэвлэлийн хурлын үеэр мэдэгдсэн байна. “Эвсэлд үл нэгдэх бодлого нь Швед улсад үүргээ сайн гүйцэтгэсэн, харин ирээдүйд ийм байх боломжгүй гэж манай Социал Демократ нам үзэж байна” гэж тэр хэлжээ. Андерссон бас Балтийн тэнгисийн бүс нутагт Швед улс ганцаараа НАТО-гийн гадна үлдэх нь “сул тал” болно гэж үзэж буйгаа илэрхийлсэн юм.

НАТО-д гишүүнээр элсэх үйл явц жил хүртэлх хугацаанд үргэлжилнэ. Энэ завсрын хугацаанд Швед, Финланд улсуудын аюулгүй байдалд баталгаа өгөхөө Берлинд уулзаж буй НАТО-гийн гишүүн орнуудын гадаад хэргийн сайд нар амласан байна. Тухайлбал, Герман улсын Гадаад хэргийн сайд Анналена Бэрбок дээрх улсуудын хувьд “шилжилтийн, статус тодорхойгүй үе шат” гэж байх ёсгүйг мэдэгджээ. НАТО-гийн гишүүн орнуудаас ганцхан Турк улс дээрх хоёр улсыг гишүүнээр элсүүлэх асуудалд шүүмжилсэн байр суурьтай байгаа. Учир нь Турк улсын зүгээс террорист байгууллагад тооцдог Курдистаны Ажилчны Намыг дээрх хоёр улс дэмждэг нь үүнд нөлөөлжээ. Туркийн Гадаад хэргийн сайд Мевлют Чавушоглу дээрх хоёр улсыг гишүүнээр элсэхээсээ өмнө өөрийнх нь газар нутагт үйл ажиллагаа явуулдаг террористуудыг дэмжихээ зогсоох ёстой гэж мэдэгджээ.

Гэхдээ тэр ингэснээрээ Турк улс хэн нэгнийг сүрдүүлээгүй, уг асуудлыг хөшүүрэг болгон ашиглах санаагүйгээ тайлбарласан байна.

АНУ-ын төрийн нарийн бичгийн дарга Энтони Блинкен, НАТО-гийн ерөнхий нарийн бичгийн дарга Йенс Столтенбэрг нар Финланд, Швед улсуудыг гишүүнээр элсүүлэхэд Турк улс саад хийхгүй гэдэгт итгэлтэй байгаагаа илэрхийлцгээжээ. НАТО-д аль нэг улс гишүүнээр элсэхийн тулд бүх гишүүн орнуудын дэмжлэгийг авах ёстой юм.

Г.АМАРСАНАА

Categories
мэдээ нийгэм

АНУ-ын ОУХА эрчим хүчний засаглалын шинэ хөтөлбөр эхлүүллээ DNN.mn

АНУ-ын Засгийн газраас АНУ-ын Олон улсын хөгжлийн агентлаг (ОУХА)-аар дамжуулан Монгол Улсын эрчим хүчний засаглалыг хөгжүүлэх таван жилийн хугацаатай, 12 сая ам.долларын санхүүжилт бүхий хөтөлбөрийг эхлүүллээ. Найдвартай цахилгаан эрчим хүчээр хангах боломжийг бүрдүүлж, эдийн засгийн тогтвортой, хүртээмжтэй өсөлтийг хангахад чиглэсэн уг хөтөлбөрийг АНУ-ын Олон улсын хөгжлийн агентлагийн Филиппин, Номхон далайн арлууд, Монгол Улсыг хариуцсан захирал Райан Уашбөрн өнгөрөгч долоо хоногт Монгол Улсад хийсэн анхны айлчлалынхаа үеэр албан ёсоор нээсэн бөгөөд ёслолын ажиллагаанд АНУ-аас Монгол Улсад суугаа Элчин сайд Майкл Клечески, Монгол Улсын Эрчим хүчний сайд Н.Тавинбэх, Эрчим хүчний зохицуулах хорооны дарга А.Тлейхан болон бусад албаны хүмүүс оролцов.

Уг төсөл нь орчин үеийн цэвэр эрчим хүчний технологийг нэвтрүүлэхэд дэмжлэг үзүүлэх зорилготой бөгөөд дүрэм журмын хүрээнд төлөвлөлт, үйл ажиллагааны гүйцэтгэлийг сайжруулах, шинэ дэд бүтцийн төлөвлөлтийг чиглүүлэх, зах зээлд өрсөлдөх чадварыг нэмэгдүүлж, хувийн хөрөнгө оруулалтыг урамшуулах зэргийг дэмжихийн тулд ОУХА Монгол Улсын Засгийн газар болон хувийн хэвшлийн гол түншүүдтэй хамтран ажиллах болно.

Монгол Улсыг хариуцсан захирал Уашбөрн “ОУХА нь 1990-ээд оны эхээр Улаанбаатар хотын цахилгаан станцуудын нэгд яаралтай засвар хийснээс эхлэн төвлөрсөн төлөвлөгөөт системээс зах зээлд суурилсан системд шилжих бүхий л үед Монголын эрчим хүчний салбарыг дэмжсээр ирсэн урт түүхтэй” гэдгийг дурдаад “Бие даах чадвараа нэмэгдүүлэх, хувийн хөрөнгө оруулалтыг дэмжих орчныг бүрдүүлэх, эрчим хүчний цэвэр эх үүсвэрт шилжихэд тус дөхөм үзүүлэх зорилгоор энэхүү үр бүтээлтэй түншлэлээ Монгол Улстай үргэлжлүүлж байгаагаараа бид бахархаж байна” гэж хэлжээ.

Монгол Улсын цахилгаан эрчим хүчний 20 орчим хувь нь хөрш орнуудын импортоос хамааралтай байдаг. Өрсөлдөх чадвартай, санхүүгийн хувьд тогтвортой эрчим хүчний салбар нь Монгол Улсын эдийн засгийн өрсөлдөх чадварыг нэмэгдүүлж, дотоодын эрчим хүчний илүү найдвартай хангамжийг бий болгох юм. Төсөл нь илүү тогтвортой, бие даасан эрчим хүчний салбарыг хөгжүүлэхэд тус дөхөм болж, засгийн газарт ирэх төсвийн дарамтыг багасгах болно.

АНУ-ын ОУХА мөн Монгол Улсын агаарын чанарыг сайжруулахад дэмжлэг үзүүлэхийн тулд эрчим хүчний салбарыг шинэчлэн цэвэр хувилбарын хэрэглээг нэмэгдүүлэх болно. Өдгөө Улаанбаатар хот нүүрснээс эрчим хүч гарган авч, хотын захын гэр хороололд түүхий нүүрс түлдэг зэргээс үүдэн агаарын чанар муу байна. Энэхүү үйл ажиллагаа нь мөн дөрөвдүгээр сарын 22-нд буюу “Эх дэлхийн өдөр” зарласан ОУХА-ийн Уур амьсгалын өөрчлөлтийн стратеги-д хувь нэмрээ оруулах болно. Abt Associates компани нь ОУХА-ийн энэхүү үйл ажиллагааг хэрэгжүүлэгч түнш юм.

АНУ-ын Олон улсын хөгжлийн агентлаг ардчилсан хөгжлийг ахиулах, тогтвортой, хүртээмжтэй эдийн засгийн өсөлтийг дэмжих, тусгаар тогтнол, бие даах чадварыг нь бэхжүүлэх чиглэлээр 30 гаруй жилийн турш Монгол Улстай хамтран ажиллаж ирсэн билээ.

Categories
арын-нүүр булангууд мэдээ

СОНИНЫ АРЫН НҮҮР: Сониноор далимдуулж оноо авах зарим аргаас… DNN.mn

Оюунлаг нийгэмд аливаа байгууллагуудын ажил өглөө сонин эргүүлэхээс эхэлдэг. Албан хаагчид нь ажилдаа орж ирэнгүүтээ кофе оочлонгоо шинэ сониноо гарчигладаг. Үүдний хүлээлгийн хэсэгтээ хэвлэлийн булантай, даргынх нь өрөөний үүдэнд, нарийн бичгийн даргынх нь хажууд эвхээтэй сонингууд, дарга нарынх нь ширээн дээр дэлгээтэй сонинтой албан газрууд бол ямар ч түншид найдвартай сэтгэгдэл төрүүлдэг олон улсын хэл бий шүү.

Өглөө, үдшийн гэж хоногт хоёр удаа сониноо олон саяар хэвлэж уншдаг япончууд бол сониноос л баттай мэдээллээ авдаг гэж итгэдэг уншигч ард түмэн.

Жишээ нь, та Японы түншээ байгууллага дээрээ хүлээн авч ажил хэрэг ярихаар болсон бол нүдэнд нь харагдах газарт сонин хэвлэл тавиарай даа.

Барууны өндөр соёлт орнуудын бизнесмэн, томоохон харилцагчид чинь ч бас сонин уншиж өглөөг эхлүүлдэг хүмүүс. Гэрээ хэлцэл, ажил хэрэг ярих гэж байгаа бол, албан тасалгаандаа нэр хүндтэй эрхмийг урьсан бол эрхэм дарга, удирдлага таны ширээн дээр өдөр тутмын сонин байгууштай. “За даа, энэ хүн цаг үеийн мэдээллээ сониноос хардаг, сонин, цаас шагайдаг, юм уншдаг байрын сэхээтэн хүн бололтой” гэдэг сэтгэгдэл төрүүлж, оноо авч ч болох юм шүү.

Categories
мэдээ нийгэм

Японд суралцах 16 төрийн албан хаагчийн тэтгэлгээр суралцах гэрээг баталлаа DNN.mn

ЖАЙКА-ийн Монгол дахь Төлөөлөгчийн газрын дарга Танака Шиничи, Монгол Улсын Сангийн сайд Б.Жавхлан нар тавдугаар сарын 13-нд 263 сая иений буцалтгүй тусламжийн “Хүний нөөцийг хөгжүүлэх JDS тэтгэлэгт хөтөлбөр” -ийн гэрээнд гарын үсэг зурлаа.

“Хүний нөөцийг хөгжүүлэх JDS тэтгэлэгт хөтөлбөр” нь хөгжиж буй орнуудын залуу төрийн албан хаагчдыг Япон улсад магистр, докторт суралцуулах тэтгэлэгт хөтөлбөр бөгөөд гэрээнд гарын үсэг зурснаар энэ жил 16 оюутан суралцах боломжтой болох юм.

Тус хөтөлбөр нь Монгол Улсад 2001 оноос хэрэгжиж эхэлсэн ба өнөөг хүртэл нийт 384 оюутан Япон улсад суралцан магистр, докторын зэрэгтэй төгсөж ирээд, Сангийн Яам, Боловсрол, Шинжлэх Ухааны Яам, Барилга, Хот Байгуулалтын Яам, Зам, тээврийн хөгжлийн Яам, Монгол банк зэрэг нийгмийн олон салбарт үр бүтээлтэй ажиллаж байна.

Япон улс нь Монгол улсыг ардчилсан нийгэмд шилжсэн 1990 оноос хойш хамгийн том хандивлагч орон байсаар ирсэн төдийгүй Эдийн засгийн түншлэлийн хэлэлцээр байгуулснаар эдийн засгийн харилцаа өргөжиж буйн зэрэгцээ 2022 онд Монгол-Японы дипломат харилцаа тогтоосны 50 жилийн ой тохиож буй зэрэг хоёр улс хоорондын харилцаа улам бүр хөгжиж байна.

Хөтөлбөр хэрэгжсэнээр Японд суралцаж төгссөн боловсон хүчин тухайн салбарын тулгамдсан асуудлыг шийдвэрлэхэд бодитой хувь нэмэр оруулахын зэрэгцээ хоёр улсын харилцан ойлголцол, найрамдалт харилцааг бэхжүүлэхэд мөн хувь нэмэр оруулна гэдэгт найдаж байна.

Эх сурвалж: ЖАЙКА-ийн Монгол дахь Төлөөлөгчийн газар