Month: April 2022

Далайц гарцгүй манай улсын хувьд өнөөгийн хил, гаалийн хязгаарлалттай нөхцөлд төр, засгаас тээвэр-логистикийн байдлыг нэг бодлогоор зангидаж дэмжих шаардлагатай байна. Тодруулж хэлбэл, ЗТХЯ, ГХЯ шаардлагатай зохицуулалтыг олон улсын гэрээнд тусгаж дэмжлэг үзүүлэх хэрэгтэй.

Энэ талаар Далайд гарцгүй хөгжиж буй орнуудын Олон улсын судалгааны төвийн гүйцэтгэх захирал Д.Дөлгөөн өчигдөр болсон Монголын Бизнесийн зөвлөлийн хурал дээр онцолсон юм. Дээрх хурал нь “Монгол Улсын худалдаа, тээвэр-логистикийн салбарт тулгарч буй хүндрэлтэй байдал” гэсэн сэдвээр болж, түүнээс гарах гарц шийдлийн талаар худалдаа, тээврийн холбогдох байгууллагын төлөөллүүд хэлэлцэв.

Энэ талаар хурлыг зохион байгуулагч байгууллагын нэг Далайд гарцгүй хөгжиж буй орнуудын Олон улсын судалгааны төвийн гүйцэтгэх захирал Д.Дөлгөөнөөс тодруулахад, “Бидэнд төр-хувийн хэвшлийн хооронд мэдээллийн сүлжээ бий болгох, тээвэр зууч, логистикийн байгууллагуудын үйл ажиллагааг нэгтгэх, Гадаад харилцааны сайдын даргалж буй Худалдааг хөнгөвчлөх Үндэсний хороо гадаад худалдаатай холбоотой бүх санал хүсэлт, гомдол, мэдээллийг хүлээн авах “Нэг цонх”-ны механизмыг бүрдүүлэх хэрэгтэй. Хөрш орнуудтай дамжин өнгөрөх тээврийн хэлэлцээрийг дахин шинэчлэх шаардлагатай байна” гэсэн гарц гаргалгааны талаарх саналаа хэлж байв.

Энэ талаар мөн ГХЯ-ны Хөрөнгө оруулалтын судалгааны төвийн захирал Э.Есүхэйгээс тодруулахад, “Бид хилийн хязгаарлалт, олон улсын хорио цээрийн нөхцөлд БНХАУ-тай худалдааны чиглэлд өөрсдийн боломжоор ажиллаж байна. Нөхцөл байдал хүнд, зөвхөн Монголд төдийгүй дэлхий дахинд тулгамдаж байна. Манай улс БНХАУ-тай иж бүрэн стратегийн түншлэлийн харилцаатай. Энэ хүрээнд урд хөрш манай улсын экспортыг аль болох хамгийн боломжтой хувилбараар нэвтрүүлэхэд бүх талаар дэмжлэг үзүүлж байна.

Өнөөдөр Европоос Монгол руу татаж байгаа бараа, худалдаа ОХУ, Украины нөхцөл байдалтай холбоотой бага зэргийн гацалт үүссэн. Иймд ОХУ, Украин, Польш улсад сууж буй Монгол Улсын Элчин сайд нар хил дээр очиж, газар дээр нь ажиллаж байна. Бид тээвэр зуучийн компаниудыг сүүлийн үеийн мэдээллээр ханган, дэмжин ажиллаж байна.

ГХЯ-ны чиг үүрэгт хамаарах арга хэмжээг шуурхай хэрэгжүүлж байна. Жишээ нь, тээвэрлэлтийг сайжруулах зорилгоор гуравдагч улсуудтай тээврийн хэлэлцээр нэмж байгуулах, улс орнуудтай тээврийн зөвшөөрлийн тоог нэмэгдүүлэх, ногоон даатгалын асуудлыг хөнгөвчлөх, тээвэр зуучдын компаниудыг хүртээмжтэй болгох, тээврийн шинэ маршрут нээх зэрэгт анхаарч байна. Эдийн засгийн коридорыг нэмэгдүүлэхэд санал дэвшүүлэн ажиллаж байна” гэв.

ЗТХЯ-ын Бодлого төлөвлөлтийн газрын дарга Д.Гэрэлням, “Тулгамдаж буй нөхцөл байдал нь зөвхөн манай улсын Засгийн газар буюу Монгол Улсын талаас хамаарах асуудал биш, олон улстай хамтын ажиллагаа, үйл ажиллагааны хүрээнд мөн олон асуудал үүсэж байна. Гэхдээ бид БНХАУ-ын талтай хил, гааль дээрх тээврийг эрчимжүүлэх талаар ярилцаж, хоёр хоногийн өмнө Гашуунсухайт боомтоор 300 тонн нүүрс экспортлоод байгаа”-г дуулгалаа. Энэ нь сүүлийн 2 жилд гараагүй үзүүлэлт гэдгийг тэрээр тодотгож байв.

Төв, орон нутгийн Онцгой байдлын байгууллагын алба хаагчдад хачгаар дамжин халдварлах халдварт өвчнөөс урьдчилан сэргийлэх дархлаажуулалтыг хийж байна.

Энэ хүрээнд Онцгой байдлын ерөнхий газрын алба хаагчдад өнөөдөр дархлаажуулалтыг Сүхбаатар дүүргийн “Өөдрөг-Энх” өрхийн эрүүл мэндийн төвтэй хамтран зохион байгуулсан байна.

Дархлаажуулалтад бүтцийн нэгжийн 27 алба хаагч хамрагдсан юм гэж Онцгой байдлын ерөнхий газраас мэдээллээ.

Цаг уурын байгууллагын ирүүлсэн мэдээллээр ирэх тавдугаар сард Алтайн уулархаг нутгаар олон жилийн дунджаас хүйтэн байх бөгөөд Алтайн өвөр говь болон говийн бүс нутгаар олон жилийн дунджаас ахиу хур тунадас орох төлөвтэй байгаа тул болзошгүй аюулаас сэрэмжтэй байхыг анхааруулж байна.

Харин зүүн аймгуудын ихэнх нутгаар агаарын температур олон жилийн дунджаас дулаан байх ба хур тунадас дунджаас бага байх төлөвтэй. Сарын хоёрдугаар арав хоногийн туршид ихэнх нутгаар сэрүүсэх бөгөөд нэгдүгээр арав хоногийн дунд болон гуравдугаар арав хоногийн сүүлчээр ихэнх нутгаар хур тунадас орох төлөвтэй байна. Мөн дурдсан үеүдэд салхины хурд ширүүсч, цасан болон шороон шуурга шуурах төлөвтэй байгааг анхааруулж байна.

Баруун аймгуудын нутгаар: Энэ сард агаарын дундаж температур Баян-Өлгийн нутаг, Увсын баруун, Ховдын ихэнх, Говь-Алтайн төв хэсэг болон Баянхонгорын өмнөд хэсгээр олон жилийн дунджаас хүйтэн, бусад нутгаар дунджийн орчим , хур тунадас Ховд, Говь-Алтай, Баянхонгорын өмнөд хэсгээр олон жилийн дунджаас ахиу, бусад нутгаар дунджийн орчим байна. Нэгдүгээр арав хоногийн эхэн болон дунд, гуравдугаар арав хоногийн дунд үеэр агаарын температур өмнөх үеэсээ 3-5°С-аар дулаарна. Харин нэгдүгээр арав хоногийн сүүлч, хоёрдугаар арав хоног болон гуравдугаар арав хоногийн эхэн үеэр ихэнх нутгаар бага зэрэг сэрүүснэ. Нэгдүгээр арав хоногийн дунд буюу сүүлч, гуравдугаар арав хоногийн сүүлчээр ихэнх нутгаар хур тунадас орно. Энэ үеэр салхи зарим газраар 14-16 м/с, зарим үед түр зуур 16-18 м/с хүрч ширүүсч болзошгүй.

Төвийн аймгуудын нутгаар: Энэ сард агаарын дундаж температур болон хур тунадас нийт нутгаар олон жилийн дунджийн орчим байна. Нэгдүгээр арав хоногийн эхэн болон дунд үе, гуравдугаар арав хоногийн сүүлчээр агаарын температур өмнөх үеэсээ 4-6°С-аар дулаарна. Харин нэгдүгээр арав хоногийн сүүлч, хоёрдугаар арав хоног болон гуравдугаар арав хоногийн эхэн үеэр ихэнх нутгаар бага зэрэг сэрүүснэ. Нэгдүгээр арав хоногийн дунд буюу сүүлч, хоёрдугаар арав хоногийн дунд болон гуравдугаар арав хоногийн сүүлчээр ихэнх нутгаар хур тунадас орно. Энэ үеэр салхи зарим газраар 12-14 м/с, зарим үед түр зуур 14-16 м/с хүрч ширүүсч болзошгүй.

Зүүн аймгуудын нутгаар: Энэ сард агаарын дундаж температур Хэнтийн зүүн, Дорнодын нутаг болон Сүхбаатарын хойд хэсгээр олон жилийн дунджаас дулаан, бусад нутгаар дунджийн орчим, хур тунадас Хэнтийн ихэнх, Дорнод, Сүхбаатарын хойд хэсгээр олон жилийн дунджаас бага, бусад нутгаар дунджийн орчим. Нэгдүгээр арав хоногийн эхэн болон дунд, хоёрдугаар арав хоногийн дунд үе болон гуравдугаар арав хоногийн сүүлчээр агаарын температур өмнөх үеэсээ 3-5°С-аар дулаарна. Харин хоёрдугаар арав хоногийн эхэн болон сүүлч, гуравдугаар арав хоногийн эхэн болон дунд үеэр ихэнх нутгаар сэрүүснэ. Хоёрдугаар арав хоногийн сүүлч, гуравдугаар арав хоногийн эхэн болон сүүлчээр ихэнх нутгаар хур тунадас орно. Энэ үеэр салхи ширүүсч, зарим газраар 13–15 м/с, зарим үед түр зуур 15–17 м/с хүрч ширүүсч болзошгүй.

Говийн аймгуудын нутгаар: Энэ сард агаарын дундаж температур ихэнх нутгаар олон жилийн дунджийн орчим, хур тунадас Өмнөговийн ихэнх, Дорноговийн өмнөд хэсгээр ОЖД-аас ахиу, бусад нутгаар дунджийн орчим байна. Нэгдүгээр арав хоногийн эхэн болон дунд үе, хоёрдугаар арав хоногийн дунд үе болон гуравдугаар арав хоногийн сүүлчээр агаарын температур өмнөх үеэсээ 4-6°С-аар дулаарна. Харин хоёр болон гуравдугаар арав хоногийн эхэн үеэр ихэнх нутгаар сэрүүснэ. Нэгдүгээр арав хоногийн дунд болон сүүлчээр ихэнх нутгаар бороо орно. Энэ үеэр салхи ширүүсч 14-16 м/с хүрэх буюу зарим үед 18-20 м/с хүрч ширүүсч болзошгүй.

Нийслэлийн Засаг даргын зөвлөлийн хурал боллоо.

Хурлын эхэнд Ерөнхий боловсролын сургууль, цэцэрлэгийн сургалтын орчинд хийсэн эрсдэлийн үнэлгээний дүгнэлт, цаашид авч хэрэгжүүлэх арга хэмжээ болон хамран сургах тойргийн асуудлыг Нийслэлийн Засаг даргын Нийгмийн хөгжил, боловсрол, эрүүл мэндийн асуудал хариуцсан орлогч З.Төмөртөмөө танилцуулав.

2021 оны байдлаар нийслэлд 6-17 насны 353,308 хүүхэд байна. 2021-2022 оны хичээлийн жилд төрийн өмчийн 152, төрийн бус өмчийн 129, нийт 281 сургуульд 340,069 хүүхэд суралцаж буй.

Сүүлийн таван жилийн хугацаанд ерөнхий боловсролын сургууль 40-өөр, сурагчид 100 мянгаар нэмэгджээ. Төрийн өмчийн сургуулийн нэг бүлэгт 36, төрийн бус өмчийн сургуулийнхад 20 сурагч суралцаж байгаа юм. Нийт 10.256 бүлэг хичээллэж байгаагаас 40-50 хүүхэдтэй 2376 бүлэг, 50-60 хүүхэдтэй 627 бүлэг, 60-аас дээш хүүхэдтэй 33 бүлэг хичээллэж байна. Бүлэг дүүргэлт өндөртэй есөн сургууль байгаагаас 23, 1, 24, 14 дүгээр сургууль тэргүүлжээ. Хамран сургах тойргийн бус сургуульд 131,739 сурагч буюу 38.7 хувь нь суралцаж байна.

Мөн нийслэлийн хэмжээнд сургуульгүй 50 хороо байгаа бөгөөд эдгээрт сургуулийн насны 77,581 хүүхэд амьдарч байна. Сонгинохайрхан дүүрэгт хамгийн олон буюу 18 хороо сургуульгүй байгаа юм.

Энэ жил улс, нийслэл, дүүргийн төсөв, гадаадын зээл, тусламжийн хөрөнгөөр нийслэлд өмнөх онуудаас он дамжин хэрэгжиж буй болон 2022 онд шинээр хэрэгжихээр батлагдсан 51 сургууль, 92 цэцэрлэг, 27 бага сургууль, цэцэрлэгийн цогцолбор, дөрвөн спорт заал, хоёр дотуур байр, нийт 176 боловсролын байгууллагын хөрөнгө оруулалтын төсөл, арга хэмжээ хэрэгжинэ.

Зөвлөлийн гишүүд хотын төвийн сайн сургуулийн салбарыг хотын зах руу байгуулах, багш, удирдлагуудыг сэлгэн ажиллуулах, мөн гэр хороололд ажиллах багш, боловсон хүчний асуудалд анхаарах, сургалтын хүртээмжийг нэмэгдүүлэх зэрэг санал гаргаж байлаа. Түүнчлэн сургууль, цэцэрлэгийн хүртээмжийг нэмэгдүүлэхэд бүх талаас анхаарах ёстойг онцолж, асуудлыг шийдэх хэрэгтэй байгааг хэлж байв.

Зөвлөлийн хурлаас тэмдэглэл гарч, Нийслэлийн Судалгаа, шинжилгээний хүрээлэнд сургууль, цэцэрлэгийн хамран сургах тойрог, түгжрэлд нөлөөлж байгаа хүчин зүйлүүдийн нөлөөллийг багасгах судалгаа хийхийг үүрэг болголоо. Мөн

• Ерөнхий боловсролын сургууль, цэцэрлэгийн сургалтын гадна орчны эрсдэлийн үнэлгээг бууруулах, орчныг сайжруулах ажлыг зохион байгуулах, хяналт тавьж ажиллах,
• Сургууль, цэцэрлэгийн орчны аюулгүй байдлыг хангах, эрсдэлээс урьдчилан сэргийлэх чиглэлээр сургалт, сурталчилгаа, зохион байгуулалтын арга хэмжээ авах, хяналт тавьж ажиллах,
• Улс, нийслэл, дүүргийн төсөв, гадаадын хөрөнгө оруулалтаар хэрэгжиж буй шинээр болон өргөтгөн барьж байгаа сургууль, цэцэрлэгийн барилгын төсөл, арга хэмжээг эрчимжүүлж ажиллах,
• Шинээр барьж буй хороолол, хотхон дунд ерөнхий боловсролын сургууль, цэцэрлэг төлөвлөх, ерөнхий болон хэсэгчилсэн төлөвлөгөөнд тусгаж ажиллах,
• Нийслэл дэх төрийн өмчийн ерөнхий боловсролын сургуулийн 2022-2023 оны хичээлийн жилийн элсэлтийн хамран сургах тойргийг хүн амын тоо, сургуулийн хүчин чадалтай уялдуулан шинэчлэн тогтоох, хяналт тавьж ажиллахыг холбогдох албан тушаалтнуудад үүрэг болгов.

БОАЖЯ-наас олгодог 20 тусгай зөвшөөрлийг цахимжуулаад байна. Ингэхдээ улсын хэмжээнд хууль эрх зүйн хүрээнд шийдэх асуудал байгааг БОАЖ-ын сайд Б.Бат-Эрдэнэ мэдээлэв.

Тухайн хүсэлт гаргасан иргэн миний зөвшөөрөл хэн гэдэг хүн дээр хэд хонож байгааг өөрөө харах боломжтой. Удахгүй Засгийн газраас ан агнуурын тусгай зөвшөөрлийн квотыг тогтооно. БОАЖЯ бүх мэдээллээ ил тод болгоно гэдгийг тэрбээр хэлж байлаа.

Тусгай хамгаалалттай болон дархан цаазат газрын тухайд хаана байрлалтай, хэдэн га газрыг ямар регистрийн дугаартай аж ахуйн нэгж эзэмшиж байгаа, анх хэзээ зөвшөөрөл авсан зэрэг мэдээлэл багтсан байна. Төрийн үйлчилгээг иргэдэд хүргэхдээ нэгдсэн санд тусгай зөвшөөрлийн хүсэлтийн мэдээлэл төвлөрүүлэх, шийдвэрийн хугацааг богиносгох, гар ажиллагааг автомажуулахаар тусгай зөвшөөрлийг цахимд шилжүүлжээ.

Үүнд:

1. Aмьтан, тэдгээрийн гаралтай түүхий эд, зүйлийг гадаадад гаргах тухай

2. Амьтан, тэдгээрийн гаралтай түүхий эд зүйлийг гадаадаас оруулах

3. Ан агнах тусгай зөвшөөрөл

4. Ан амьтны мэргэжлийн байгууллагын эрх

5. CITES-ийн Зэрлэг амьтан, ургамлын ховордсон зүйлийг олон улсад худалдаалах тухай конвенцийн зөвшөөрөл

6. Байгалийн ховор ургамлыг түүж бэлтгэх

7. Байгалийн ургамал, тэдгээрийн гаралтай эд, зүйлийг гадаадад гаргах

8. Байгалийн ургамлын мэргэжлийн байгууллагын эрх олгох

9. Ургамал тэдгээрийн, гаралтай түүхий эд зүйл, ойн дагалт баялгийг гадаадаас оруулах зөвшөөрөл олгох

10. Усны мэргэжлийн байгууллагын эрх олгох, сунгах, цуцлах

11. Газар ашиглах эрхийн хугацаа сунгах

12. Байгаль орчинд нөлөөллийн нарийвчилсан үнэлгээ хийх эрх олгох

13. Газрын хэвлийн нөхөн сэргээлт хийх мэргэжлийн байгууллага Байгаль орчны аудит хийх эрх бүхий мэргэжлийн байгууллагын эрх олгох

14. Озон задалдаг бодис болон бусад орлуулах бодис, тэдгээрийг агуулсан бүтээгдэхүүн тоног төхөөрөмжийг импортлох, худалдах, ашиглах

15. Озон задалдаг бодис болон бусад орлуулах бодис импортлох, худалдах, ашиглах зөвшөөрөл олгох

16. Аюултай хог хаягдал экспортлох

17. Нэн ховор ургамлыг судалгаа шинжилгээний зориулалтаар түүж бэлтгэх

18. Байгалийн ургамал судалгаа шинжилгээний зориулалтаар гадаад улсад гаргах

19. Байгаль орчны аудит хийх эрх бүхий мэргэжлийн байгууллагын эрх авах, зөвшөөрөл

20. Тусгай хамгаалалттай газар ашиглах зөвшөөрөл-үүд багтсан байна.

Уур амьсгалын өөрчлөлт нь 2050 он гэхэд дэлхийн ДНБ-ийг дөрвөн хувиар бууруулж, дэлхийн ядуу буурай олон бүс нутгийг хамарч болзошгүйг 135 орны дунд явуулсан судалгааны дүн харуулжээ.

Тус судалгааг “S&P Global” мягмар гарагт нийтэлсэн бөгөөд далайн түвшин нэмэгдэх болон хэт халалт, ган гачиг, шуурганы сөрөг нөлөөг судласан байна.

Судалгаагаар хэрэв ихэнх орны Засгийн газрууд уур амьсгалын өөрчлөлтийн эсрэг шинээр томоохон хэмжээний бодлогыг хэрэгжүүлэхээс зайлсхийсэн тохиолдолд бага болон дунд орлоготой улс орнуудад учрах эдийн засгийн хохирол хөгжингүй орнуудынхаас 3.6 дахин их байна гэсэн дүн гарчээ.

Бангладеш, Энэтхэг, Пакистан, Шри-ланка зэрэг улсууд ой хээрийн түймэр, үер, хүчтэй шуурга, усны хомсдолд өртөж байгаа нь Өмнөд азийн ДНБ-ий 10-18 хувь нь эрсдэлд орж байна гэсэн үг юм.

Мөн Төв ази, Ойрхи дорнод, Хойд африк, Сахарын цөлөөс өмнөх Африкийн бүс нутгуудад цаг уурын өөрчлөлтөөс болж ихээхэн хохирол учирч байна.

Дэлхийн Цаг уурын байгууллагын мэдээлснээр, сүүлийн 50 жилийн хугацаанд өдөр бүр дэлхийн хаа нэгтээ цаг агаар, уур амьсгал, устай холбоотой гамшиг тохиолдож, өдөрт дунджаар 115 хүн амиа алдаж, 202 сая ам.долларын хохирол учирч байна гэв.

Улсын бүртгэлийн ерөнхий газраас нэр бүхий иргэдийн гэрлэлтийн гэрчилгээг хүчингүй болгосон гэх асуудал олны анхаарлыг татаад байна.

УИХ-ын чуулганы үдээс хойших хуралдаанаар Засгийн газраас өргөн мэдүүлсэн Төрийн хэмнэлтийн тухай хуулийн төслийг хэлэлцэж байна.

Тус хуульд улсын төсвөөс санхүүжүүлэх төсөл, арга хэмжээний жагсаалтад дараах зүйлсийг тусгахыг хориглосон. Үүнд:

• Орон нутгийн нийтийн эзэмшлийн зам, талбай, олон нийтийн соёл амралтын хүрээлэн, ногоон байгуулам, хаягжуулалт, гэрэлтүүлэг, тохижилт,
• Орон нутгийн хог хаягдлын асуудал,
• Орон нутгийн авто замын засвар, шинэчлэл хийх,
• Нийтийн эзэмшлийн талбайд хүүхдийн тоглоомын талбай байгуулах, шинэчлэх, засварлах, тоног төхөөрөмж худалдан авах,
• Багийн төв, хорооны засаг захиргааны зориулалттай барилга барих, тохижуулах,
• Айл өрхийн ариун цэврийн байгууламж, гудамжны тохижилт,
• Нийтийн эзэмшлийн байр, орон сууцны засвар

Гэтэл хуулийн төслийг байнгын хороодоор хэлэлцэх үеэр УИХ-ын гишүүн М.Оюунчимэг, Б.Жаргалмаа нар “Айл өрхийн ариун цэврийн байгууламж, гудамжны тохижилт” гэдэг хэсгийг хасах санал гаргасан байна.

Энэ талаар УИХ-ын гишүүн М.Оюунчимэг “Нийслэлийн хүн амын 70 гаруй хувийг бүрдүүлдэг гэр хорооллын иргэдийг нүхэн жорлон, яндангаас салгаж, амьдрах нөхцөлийг сайжруулахыг зорьж байгаа. Гэтэл төсвийн болон орон нутгийн төсвийн хөрөнгө оруулалтгүйгээр уг асуудлыг шийдэх ямар ч боломжгүй. Тиймээс гишүүдээс энэхүү саналыг дэмжиж өгөхийг хүсэж байна” гэв.

Харин Сангийн сайд Б.Жавхлан: Төрийн хэмнэлтийн тухай хуулийг бараг буцааж татахаар болж байна. Ийм хэмнэлтийн хууль гаргаад ч хэрэггүй болж байх шиг байна. М.Оюунчимэг гишүүний хэлж байгаагаар улсын төсвөөр айлын хашаанд жорлон бариад тухайн айлд нь бэлэглээд яваад байх юм байна л даа. Тийм байж болохгүй. Улсын төсвөөр тийм хөрөнгө оруулалт хийж болохгүй.

Тэгэхээр М.Оюунчимэг гишүүн та энэ саналаа буцааж татах нь зүйтэй.

Төсвийн байнгын хорооны дарга Ч.Хүрэлбаатар: Засгийн газраас оруулж ирсэн их олон асуудлыг унагаагаад байна. Гэр хороолол руу явж байгаа дэд бүтцийг улсын төсвөөр хийх нь нээлттэй. Харин айлын хашаан доторхыг төсвөөс битгий хий гэдэг зүйлийг хуульд тусгасан. Тэгвэл улсын төсвөөс айлын хашаанд жорлон бариад өглөө. Гэр нь өөрийнх нь, жорлон нь улсынх байх нь. Ийм зүйл хийж болохгүй.

УИХ-ын дарга Г.Занданшатар: Хуулийн төслийг ойлгомжгүй, салаа утгатай бичсэнээс болж гишүүдийн дунд үл ойлголцож гарч байна. Хэмнэлт ярьж байхад айлын жорлон руу орно гэдэг чинь юу гэсэн үг вэ. Популист популист гэхэд энэ арай хэтэрнэ шүү. Энэ асуудлыг эцсийн найруулга дээр ойлгомжтой болгох хэрэгтэй. Айл өрхийн цэвэрлэх байгууламжийг айлын жорлон гэж ойлгохгүй шүү.

УИХ-ын гишүүн Т.Доржханд: Хэмнэлтийн бодлого гэж оруулж ирж байгаа юм бол хэмнэсэн шиг хэмнэх хэрэгтэй. Оруулж ирсэн хуулийн төслөөс дэмжиж байгаа заалт алга. Тэгээд юу хэмнэсэн гэж ярих гээд байгаа юм. Гишүүд нь хот, хөдөөгөөрөө хуваагдаж Төсвийн байнгын хорооны даргатайгаа үзэлцээд, үр дүнд нь хэмнэсэн юм алга.

Энд сууж байгаа хүмүүс ичих хэрэгтэй. Бодлого ярьдаг парламенттай болъё гэж ярьж байж тойргийн төсвөөсөө гарч чадахгүй, жорлон яриад байх юм.

Эдийн засгийн онол судал л даа. Олон улсын жишгийг мэддэг болчхоод шийдвэр гарга л даа. Олуулаа суучхаад дэмжье эсвэл үгүй гэчхэж байна. Засгийн газрынхаа бодлогоо дэмжихгүйгээр УИХ-ын гишүүд нь баг болж бүх заалтыг нь унагаад байна. Ийм мэдлэггүй, мэдээлэлгүй байж болохгүй.

Ийнхүү гишүүд маргалдсаны эцэст санал хураалт явуулахад ““Айл өрхийн ариун цэврийн байгууламж, гудамжны тохижилтыг улсын төсвөөс санхүүжүүлэхгүй” гэдэг заалтыг хасах санал дэмжигдлээ.