Month: April 2022

Categories
мэдээ спорт

Монголын сагсан бөмбөгийн шигшээ багт 25 тоглогчийг дууджээ DNN.mn

Монголын сагсан бөмбөгийн холбооны Удирдах зөвлөл хуралдаж шигшээ багийн бүрэлдэхүүн болон бусад асуудлаар шийдвэр гаргажээ. Үндэсний шигшээ багт 25 тоглогчийг дуудсан бөгөөд тамирчдыг өнөөдөр буюу дөрөвдүгээр сарын 29-ний баасан гаригт 19:00 цагаас Уран Ган спорт танхимд цуглуулахаар болсон байна.

Үндэсний шигшээ багийн даргаар М.Отгонбаяр ажиллах бол Ерөнхий дасгалжуулагчаар Ч.Ижилболд, туслах дасгалжуулагчаар Ц.Чинзоригт, н.Алтан-Очир нар ажиллана.

Шигшээ багийн бүрэлдэхүүн:

  1. Б.Билгүүн /Хасын Хүлэгүүд/
  2. О.Сэргэлэн /Хасын Хүлэгүүд/
  3. Ц.Азбаяр /Хасын Хүлэгүүд/
  4. Г.Насанжаргал /Хасын Хүлэгүүд/
  5. Т.Санчир /Эрдэнэтийн Уурхайчид/
  6. О.Очирбат /Эрдэнэтийн Уурхайчид/
  7. Г.Ган-Эрдэнэ /Эрдэнэтийн Уурхайчид/
  8. Ч.Ихбаяр /Архангай Алтандорнодын Дайчид/
  9. Б.Сүхбат /Тэнүүн Өлзий Металл/
  10. Т.Ууганбаяр /Тэнүүн Өлзий Металл/
  11. Э.Цэрэнбаатар /IHC Apes/
  12. Ц.Сэргэлэнбаатар /IHC Apes/
  13. Ц.Отгонжаргал /Завхан Brothers/
  14. О.Эрдэнэцогт /Алдар Танан Гарьд/
  15. А.Тэмүүжин /Алдар Танан Гарьд/
  16. Б.Болдбаатар /Алдар Танан Гарьд/
  17. А.Энхбаясгалан /Этүгэн Баянгол Ирвэсүүд/
  18. Д.Дөлгөөнмөрөн /Этүгэн Баянгол Ирвэсүүд/
  19. Г.Баттөр /Этүгэн Баянгол Ирвэсүүд/
  20. М.Өлзий-Орших /Багануур Тулнууд/
  21. Н.Ганбаатар /Багануур Тулнууд/
  22. Х.Мөнхтөр /Налайх Bison/
  23. Ш.Энхийн-Од /Dayton Flyers/
  24. Н.Батбаяр /Seoul Samsung Thunders/
  25. Д.Баясгалан /Тайванийн лиг/

Монголын шигшээ баг 2025 оны Азийн цомын тэмцээний урьдчилсан шатны тоглолтоо зургаадугаар сарын эхээр хийх учиртай. Шигшээ баг Тайланд, Малайз, Вьетнам, Таитигийн шигшээ багуудтай D хэсэгт багтсан.

Categories
мэдээ улс-төр

М.Оюунчимэг: Буруу ойлголт төрүүлсэндээ хүлцэл өчье DNN.mn


УИХ-ын чуулганы нэгдсэн хуралдаан 14.00 цагаас эхэллээ.

Хуралдааны эхэнд 2022 оны төсвийн тодотголтой хамт өргөн мэдүүлсэн хуулийн төслүүдийн эцсийн хэлэлцүүлгийг хийж байна.

Энэ үеэр УИХ-ын гишүүн М.Оюунчимэг дараах байр суурийг илэрхийллээ.

Тэрбээр “Цэцэрлэгийн асуудал зоригтой оруулж ирсэнд юуны өмнө талархаж байна. Хоёрдугаарт, буруу ойлголт төрүүлсэндээ хүлцэл өчье. Айл бүр лүү орж, жорлон байгуулах юм шиг буруу ойлголт явсныг бид өчигдөр залруулсан. Дундын шугамын дэд бүтцийг бол төсвөөс гаргуулдаг жишиг бий. Иймд айл бүр лүү оруулж, жорлон барина гэдэг үгийн алдаа гарч бичигдсэн асуудлыг засаж, Улаанбаатар хотын төсөвт дундын шугамын дэд бүтцийг суулгах нь зүйтэй” гэлээ.

Categories
мэдээ нийгэм

​ Дөрөвдүгээр сарын 25-нд болсон Солонгос хэлний түвшин тогтоох шалгалтын бүртгэлийг цуцаллаа DNN.mn

Хөдөлмөр Халамжийн Үйлчилгээний Ерөнхий Газраас БНСУ-д хөдөлмөрийн гэрээгээр ажиллах хүсэлтэй иргэдийн Солонгос хэлний түвшин тогтоох шалгалтын бүртгэлтэй холбоотойгоор мэдэгдэл гаргасан байна.

Мэдэгдэл:

“Уг бүртгэлийг 2022 оны дөрөвдүгээр сарын 25-ны өдөр зохион байгуулсан ч программ хэт ачаалсны улмаас бүртгэлийн систем доголдсонд иргэдээс хүлцэл өчье.

Иргэдийн тавьсан шаардлагын дагуу Бүртгэл зохион байгуулах ажлын хэсэг дөрөвдүгээр сарын 25 ны өдрийн бүртгэлийг бүрэн цуцлан хүчингүйд тооцох шийдвэр гаргалаа. Тухайн өдөр бүртгэлийн хураамж төлсөн иргэдийн төлбөрийг буцаан шилжүүлээд байна.

Солонгос хэлний түвшин тогтоох шалгалтын бүртгэлийг дахин зохион байгуулахаар бэлтгэл ажлаа ханган ажиллаж байна. Хэрхэн бүртгүүлэх заавар мэдээллийг тодорхой болсон даруйд Хөдөлмөр, халамжийн үйлчилгээний ерөнхий газрын албан ёсны вэб сайт, пэйж хуудсаар дамжуулан хүргэнэ” гэжээ.

Categories
мэдээ нийгэм

​ Хөвсгөл нуур хүртэлх 37.5 км авто замыг тавдугаар сарын 15-наас хаана DNN.mn


Байгаль орчин, аялал жуулчлалын яамны захиалгаар Азийн хөгжлийн банкны зээлийн санхүүжилтээр “Тогтвортой аялал жуулчлалыг хөгжүүлэх төсөл” хэрэгжиж буй.

Төслийн хүрээнд Хөвсгөл аймаг баригдах 37.9 км хатуу хучилттай авто зам, 7 байршлын авто зогсоол барих ажлын гүйцэтгэгчээр “Бээжин Юни-Констракшн Групп” ХХК гэрээ байгуулан ажиллаж байна.

Хөвсгөл аймгийн Алаг-Эрдэнэ сумын Хатгал тосгон, Хатгал-Жанхай-Тойлогт чиглэлийн 32.5 километр авто зам; Хатгал-Хүзүүвчийн шил-Ашихай чиглэлийн 5.5 км авто зам, нийт 37.5 км авто замын барилгын ажил эхэлж байгаатай холбогдуулан тавдугаар сарын 15-ны өдрөөс эхлэн тус авто замыг ашиглалтад оруулах хүртэл хугацаанд уг замуудыг тодорхой хугацаанд хэсэгчлэн хаахаар боллоо.

Мөн тээврийн хэрэгслийн хөдөлгөөнийг холбогдох түр замын маршрутаар зохицуулалттайгаар зорчуулах болсныг мэдэгдэж байна. Түр замын маршрутыг доорх зургаас харах боломжтой.

Categories
мэдээ цаг-үе

НДШ-ийн 50 хувийг он дуустал буцаан олгох эцсийн шийдвэр гарлаа DNN.mn

УИХ-ын чуулганы нэгдсэн хуралдаанаар Нийгмийн Даатгалын Шимтгэлээ өөрөө хариуцсан төлсөн зарим даатгуулагчийн шимтгэлийн 50 хувийг буцаан олгох тухай хуулийн төслийг эцэслэн батлав.
Ингэснээр нэг сая төгрөг болон түүнээс доош орлоготой иргэн өөрийн төлдөг 9.5 хувийн шимтгэлийн 50%-ийг тавдугаар сараас эхлэн он дуустал буцаан авахаар боллоо. Хувиараа НДШ төлөгч нарт мөн адил буцаан олголт өгнө.
Энэхүү буцаан олголт газрын тос болон уул уурхайн салбарт ажилладаг иргэдэд хамаарахгүй аж.
Categories
мэдээ нийгэм

Ж.Болд: Өндөгний үнийг 30 төгрөгөөр бууруулах боломжтой DNN.mn

Ерөнхий сайд Л.Оюун-Эрдэнэ хүнсний худалдааны салбарын аж ахуйн нэгжийн төлөөлөлтэй уулзав.

Энэ үеэр “Түмэн шувуут” компанийн захирал Ж.Болд “Жилд манайх 390 сая ширхэг өндөгний хэрэглээтэй. Үүний 50 хувийг дотоодоос хангаж, үлдсэнийг нь импортоор авдаг. Шувууны аж ахуй эрхлэхэд тоног төхөөрөмж хэрэгтэй, үүний гааль болон НӨАТ-ыг чөлөөлбөл хэрэгтэй байна.

Импортын хямд үнэтэй өндөг зуны улиралд их орж ирдэг. Үйлдвэрлэгчид үүнтэй өрсөлдөх хэцүү. Жилд импортоор орж ирэх өндөгний тоог зохицуулбал шувууны аж ахуй манайд хөгжих боломжтой” гээд өндөгний үнийг энэ цаг үед 30 төгрөгөөр бууруулах боломжтой” гэдгээ хэллээ.

Categories
мэдээ нийгэм

Реппер Orice буюу М.Алтан-оргилыг дээрэмдсэн этгээдэд 3 жилийн ял ногдууллаа DNN.mn

Өнөөдөр буюу дөрөвдүгээр сарын 29-нд реппер Orice буюу М.Алтан-Оргилын шүүх хурал Баянгол дүүргийн эрүүгийн анхан шатны шүүхэд болж өнгөрлөө.

2020 оны долоодугаар сарын 24-нд “Orice” нэрээр олонд танигдсан реппер М.Алтан-Оргил өндрөөс унаж, гэмтсэн байдалтай эмнэлэгт хүргэгдэн очсон байдаг. Улмаар Гэмтэл, согог судлалын үндэсний төвийн сэхээн амьдруулах тасагт дөрөв хоног хэвтэн эмчлүүлж байгаад гэмтлээ даалгүй нас барсан юм.

Шүүх хуралаар хохирогчийг дээрэмдсэн үйлдэл нь гэм буруутайд үзэж Реппер Orice буюу М.Алтан-оргилыг дээрэмдсэн этгээдэд 3 жилийн ял ногдууллаа.

Энэ үйлдэл зургаадугаар сарын 24-ноос өмнө үйлдэгдэж өршөөлийн хуульд орох үндэслэлтэй гэж үзсэн бөгөөд уг этгээдийн зорчих эрхийг хязгаарлажээ. Хэрэв гэм буруутан Баянзүрх дүүргийн нутаг дэвсгэрээс гарах юм бол гэм буруутайд тооцогдон хорих ялаар солигдоно гэв.

Categories
мэдээ эдийн-засаг

Төсвийн тодотголын талаарх хуулийн төслүүд болон хамт өргөн мэдүүлсэн хууль, тогтоолын төслүүдийг эцэслэн баталлаа DNN.mn

УИХ-ын чуулганы өнөөдрийн /2022.04.29/ нэгдсэн хуралдаан 14.16 цагт эхэлж, Монгол Улсын нэгдсэн төсвийн 2022 оны төсвийн хүрээний мэдэгдэл, 2023-2024 оны төсвийн төсөөллийн тухай хуульд өөрчлөлт оруулах тухай хуулийн төслийн эцсийн хэлэлцүүлгийг хийлээ.

УИХ-ын гишүүн Д.Өнөрболор хуулийн төслийн эцсийн хэлэлцүүлэг хийсэн талаарх Төсвийн байнгын хорооны танилцуулгыг хийлээ.

Төсвийн төслийн хоёр дахь хэлэлцүүлгээр олонхын дэмжлэг авсан саналуудтай холбогдуулан дунд хугацааны төсвийн хүрээний мэдэгдлийн эдийн засгийн үзүүлэлтэд тусгагдсан Нэгдсэн төсвийн хөрөнгийн зардлын хэмжээ 2022 онд “4,280.3 тэрбум төгрөг” гэснийг “4,296.3 тэрбум төгрөг” гэж өөрчлөх санал гаргасныг Байнгын хорооны хуралдаанд оролцсон гишүүдийн 85.7 хувийн саналаар дэмжсэн гэлээ.

Танилцуулгатай холбогдуулан УИХ-ын гишүүдээс асуулт гараагүй бөгөөд Байнгын хороогоор дэмжигдсэн зарчмын зөрүүтэй саналын нэг томьёоллоор санал хураалт явуулан, хуулийн төслийг эцэслэн батлах бэлтгэл хангуулахаар Төсвийн байнгын хороонд шилжүүллээ.

Дараа нь Монгол Улсын 2022 оны төсвийн тухай хуульд өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай, Ирээдүйн өв сангийн 2022 оны төсвийн тухай хуульд өөрчлөлт оруулах тухай хуулийн төслүүдтэй хамт өргөн мэдүүлсэн хууль, тогтоолын төслүүдийн эцсийн хэлэлцүүлгийг хийв.

Төсвийн байнгын хороо 2022 оны 04 дүгээр сарын 28-ны өдрийн хуралдаанаараа дээрх хууль, УИХ-ын тогтоолын төслүүдийн эцсийн хэлэлцүүлгийг Монгол Улсын Их Хурлын чуулганы хуралдааны дэгийн тухай хуулийн 42 дугаар зүйлд заасны дагуу нэгдсэн хуралдааны олонхын дэмжлэг авсан саналыг төсөлд нэмж тусган хууль, тогтоолын төслийн эцсийн хувилбарыг бэлтгэн Байнгын хорооны хуралдаанаараа хэлэлцлээ хэмээн УИХ-ын гишүүн Д.Өнөрболор танилцууллаа.

Байнгын хорооны хуралдаанаар хууль, тогтоолын төслүүдийг хэлэлцэх үед нэгдсэн хуралдаан даргалагчаас чиглэл өгсөн болон Байнгын хорооны хуралдаанд оролцсон гишүүдийн гуравны хоёроос доошгүй нь дахин санал хураалгах шаардлагатай гэж үзсэн саналуудаар нэг бүрчлэн санал хурааж, санал хураалтын дүнд үндэслэн эцсийн хэлэлцүүлэгт бэлтгэсэн гэлээ.

Танилцуулгатай холбогдуулан УИХ-ын гишүүд асуулт асууж, байр сууриа илэрхийлсэн бөгөөд үргэлжлүүлэн Төсвийн байнгын хорооны хуралдаанаар дэмжигдсэн саналын томьёоллуудаар санал хураалт явууллаа.

Нэгдсэн хуралдаанд оролцсон гишүүдийн олонх зарчмын зөрүүтэй саналын томьёоллуудыг дэмжсэнээр төрийн тусгай чиг үүрэг хэрэгжүүлдэг Засгийн газрын агентлаг, Засгийн газрын ажлын алба, Улсын Их Хуралд ажлаа шууд хариуцан тайлагнадаг байгууллага, эмнэлэг, төрийн өмчийн оролцоотой нээлттэй компаниас бусад этгээдийг тэргүүн дэд, дэд, орлогч даргатай байхыг хориглолоо. Мөн Нийслэлийн Засаг дарга хоёр, аймаг, дүүрэг, сумын Засаг дарга нэгээс илүү орлогч даргатай байхыг Төрийн хэмнэлтийн тухай хуулиар хориглов.

Түүнчлэн Төсвийн захирагч, Төрийн хэмнэлтийн тухай хуулийн 3.1.3, 3.1.4-т заасан этгээдийн гүйцэтгэх удирдлага болон холбогдох албан тушаалтан үйл ажиллагаандаа санхүүгийн сахилга бат, хэмнэлтийн горимыг мөрдөж ажиллагаагүй нь тогтоогдсон бол ажлаас халах үндэслэл болох юм байна.

“Хүүхдийн цэцэрлэгийн хүртээмжийг нэмэгдүүлэх талаар авах зарим арга хэмжээний тухай” УИХ-ын тогтоолоор цэцэрлэгийн хүртээмж багатай, төрийн өмчийн цэцэрлэгт нэмэлт элсэлт авах боломжгүй байршилд төрийн бус өмчийн цэцэрлэг ажиллуулж, хамран сургах тойргийн хүүхдийг элсүүлсэн тохиолдолд нэг хүүхдэд ногдох хувьсах зардлыг хоёр дахин нэмэгдүүлсэн дүнгээр хүүхдийн хоолны зардлын хамт санхүүжилт олгохоор боллоо.

Ингээд хуулийн төслүүдийг эцэслэн батлуулах бэлтгэл хангуулахаар Төсвийн байнгын хороонд шилжүүлэв.

Мөн хуралдаанаар Монгол Улсын 2022 оны төсвийн тухай хуульд өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай, Ирээдүйн өв сангийн 2022 оны төсвийн тухай хуульд өөрчлөлт оруулах тухай хуулийн төслүүдийн гурав дахь хэлэлцүүлгийг хийлээ.

Төсвийн байнгын хороо 2022 оны 04 дүгээр сарын 28-ны өдрийн хуралдаанаараа дээрх хуулийн төслүүдийг гурав дахь хэлэлцүүлэгт бэлтгэж, Монгол Улсын Их Хурлын чуулганы хуралдааны дэгийн тухай хуулийн 71 дүгээр зүйлийн 71.1 дэх хэсэгт заасны дагуу нэгдсэн хуралдааны хоёр дахь хэлэлцүүлгээр олонхын дэмжлэг авсан саналыг төсвийн төсөлд нэмж тусган төсвийн төслийн эцсийн хувилбарыг бэлтгэн Байнгын хорооны хуралдаанаараа хэлэлцлээ.

Засгийн газрын өргөн мэдүүлсэн төсвийн төсөлд Шүүхийн сахилгын хорооны урсгал зардлыг 425.5 сая төгрөгөөр нэмэгдүүлэх, Гадаадын зээл, тусламжийн ашиглалтын зардлыг 16,400.2 сая төгрөгөөр бууруулах, улсын төсвийн хөрөнгөөр 2022 онд хэрэгжүүлэх төсөл, арга хэмжээний жагсаалтад холбогдох өөрчлөлтийг хийснээр хөрөнгийн зардал 15,974.6 сая төгрөгөөр нэмэгдэхээр боллоо.

Монгол Улсын Засгийн газраас өргөн мэдүүлсэн төсвийн төсөлд дээрх өөрчлөлтүүдийг тусгаснаар зарлагын болон алдагдлын дүнг нэмэгдүүлэхгүй байх хуулийн шаардлагыг хангасан болно хэмээн УИХ-ын гишүүн Д.Өнөрболор танилцуулав.

Төслийн гурав дахь хэлэлцүүлэгтэй холбогдуулан УИХ-ын гишүүдээс асуулт, санал гараагүй бөгөөд Монгол Улсын Их Хурлын чуулганы хуралдааны дэгийн тухай хуульд заасны дагуу төслийн дөрөв дэх хэлэлцүүлгийг үргэлжлүүлэн явууллаа.

Нэгдсэн хуралдаан даргалагч хуулийн төслүүдийн зүйл, заалт бүрийг уншин сонсгож, зүйл тус бүрээр нь санал хураалт явуулж нэгдсэн хуралдаанд оролцсон гишүүдийн олонхын саналаар Монгол Улсын 2022 оны төсвийн тухай хуульд өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай, Ирээдүйн өв сангийн 2022 оны төсвийн тухай хуульд өөрчлөлт оруулах тухай хуулийн төслүүдийг эцэслэн баталлаа.

Дараа нь УИХ-ын нийт гишүүдийн олонхын саналаар Монгол Улсын нэгдсэн төсвийн 2022 оны төсвийн хүрээний мэдэгдэл, 2023-2024 оны төсвийн төсөөллийн тухай хуульд өөрчлөлт оруулах тухай хуулийн төсөл, Монгол Улсын 2022 оны төсвийн тухай хуульд өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай, Ирээдүйн өв сангийн 2022 оны төсвийн тухай хуульд өөрчлөлт оруулах тухай хуулийн төслүүдтэй хамт өргөн мэдүүлсэн 10 хууль, УИХ-ын хоёр тогтоолын төслийг эцэслэн баталлаа хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ

Categories
мэдээ нийгэм

Л.Оюун-Эрдэнэ: Би жолоочтой, жолоочгүй гэсэн хандлагаа өөрчилмөөр байна DNN.mn

УИХ-ын чуулганы нэгдсэн хуралдаанаар Төсвийн тодотгол болон дагалдах хуулиудын эцсийн хэлэлцүүлгийг хийж байна.

Хуулийн төслийн зарчмын зөрүүтэй саналуудаар санал хураалт явууллаа.

Хуульд тусгайлан заагаагүй бол төрийн тусгай чиг үүргийг хэрэгжүүлдэг Засгийн газрын агентлаг, ажлын алба УИХ-д ажлаа хариуцан тайлагнадаг эмнэлэг, төрийн өмчийн оролцоотой нээлттэй компаниас бусад этгээд тэргүүн, дэд, орлогч даргатай байхыг хориглоно гэсэн Төсвийн байнгын хорооны саналтай холбогдуулан Ерөнхий сайд Л.Оюун-Эрдэнэ үг хэлэв.

Тэрбээр “Энэ саналаар хэлэлцүүлгийн явцад гишүүд олон талаас мэтгэлцсэн. Гэхдээ Засгийн газрын саналаар дэмжих зайлшгүй шаардлагатай гэж үзэж байгаа. Яагаад гэвэл нэг уут үлдээхээр тэр нь цаашаа буруу жишиг болж тогтдог байдлыг болиулах зүйлийг Төсвийн хуулиар хийж байгаа. Өөрчлөлт өвдөлт өгнө.

Зарим агентлагийн дэд дарга нар, төрийн өмчит компанийн орлогч дарга нар УИХ-ын гишүүдэд ханддагаа болих хэрэгтэй. Засгийн газрын харьяа байгууллагууд ёс суртахуун дэг жаягтай байх ёстой. Ерөнхий сайдын хувьд энэ саналаас ухрахгүй. Санал унавал төсвийн хүрээний мэдэгдлийн хүрээнд дахиж оруулж ирнэ. Төрийн өмчит үйлдвэрийн газар гээд 200 орчим хүн бий. Том агуулгаар нь хүлээгээд авах нь зөв.

Машин дээр ч гэсэн адил. Цахим систем рүү оруулаад ашиглалтыг сайжруулах гэж байгаа зүйл. Тэр машинтай байна, би жолоочтой, жолоочгүй гэсэн хандлагаа өөрчилмөөр байна. Ил, далд лоббигоо болимоор юм. Тэгш зарчмын дагуу реформоо хийх нь зүйтэй. Үнэхээр болохгүй байвал цаашид хуульд нэмэлт өөрчлөлт оруулж болно” гэлээ.

Categories
мэдээ нийгэм

“BARILGA EXPO 2022” үзэсгэлэн өнөөдөр нээлтээ хийлээ DNN.mn

Барилгын салбарын шилдэг ААН, байгууллагуудын бүтээгдэхүүн, дэвшилтэт техник, технологи, хаус болон шинэ орон сууцны шилдэг төслүүдийг танилцуулдаг “BARILGA EXPO 2022” үзэсгэлэн 15 дахь жилдээ зохион байгуулагдаж байгаа бөгөөд өнөөдөр нээлтээ хийлээ.

Нээлтийн арга хэмжээнд Барилга, хот байгуулалтын сайд Б. Мөнхбаатар, Барилгын хөгжлийн төвийн захирал Ц. Амарсанаа болон холбогдох албан тушаалтнууд оролцов.

Тус үзэсгэлэн яармаг нь Барилгын материал, техник технологи чиглэлээр дөрөвдүгээр сарын 29-нөөс тавдугаар сарын 1-ний өдрүүдэд үргэлжлэх юм. Харин шинэ орон сууц, хаус дизайны чиглэлээр тавдугаар сарын 6-8-ны өдрүүдэд Мишээл экспо” төвд зохион байгуулагдах аж.

Үзэсгэлэнгээс барилгынматериал, техник технологийн үзэсгэлэн, яармагаас барилгын салбарт хамгийн сүүлийн үед нэвтэрсэн шинэ техник, технологи, албан ёсны дистрибьютер компаниуд болон дотоодын үйлдвэрлэгч нарын бүтээгдэхүүн, барилгын материалтай танилцах боломжтой бол Шинэ орон сууц, хаус дизайны үзэсгэлэн, яармагаас ипотек, компанийн болон хувь лизингээр худалдан авах боломж бүхий хаус болон шинэ орон сууцны 60 орчим шилдэг төслүүдтэй танилцах, амины орон сууцны хамгийн сүүлийн үеийн загвар дизайн, оновчтой шийдлуудийг үзэж сонирхох боломжтой.

Уг үзэсгэлэнд барилгын салбарын ЖДҮ эрхлэгчид, дотоодын үйлдвэрлэгчид, импортын худалдаа эрхлэгчид, шинэ орон сууцны төсөл хэрэгжүүлэгчид гэх мэт 250 орчим ААН оролцож байгаа аж.