Month: April 2022

Categories
мэдээ соёл-урлаг

“Паяцы” эмгэнэлт дуурийг анх удаа толилуулна DNN.mn

Италийн хөгжмийн зохиолч Руджеро Леонкаваллогийн бүтээл, хоёр үзэгдэлт “Паяцы” (Pagliacci) эмгэнэлт дуурийг С.Баттулгын найруулгаар Дуурь бүжгийн эрдмийн театрын тайзнаа анх удаагаа тоглох гэж байна. “Паяцы” дуурь хүн төрөлхтний мөнхийн сэдэв болсон хайр дурлалаас гадна хардалт, хүчирхийлэл, мэхлэлт, хорсол, өшөө авалт, нийгмийн гадуурхалт, даган дууриалт гээд өнөөгийн нийгэмд бидний дунд өдөр тутамд өрнөж байдаг амьдралыг харуулах юм. “Паяцы” дуурийг энэ амралтын өдрүүдэд буюу дөрөвдүгээр сарын 30, тавдугаар сарын 1-нд толилуулна.

Categories
гадаад мэдээ цаг-үе

Шийдвэрлэх тулалдаан чимээгүйхэн эхэлж долоо хонов DNN.mn

Оросын зэвсэгт хүчин Украины нийслэлийг эзлэн төр, засгийг нь солих зорилгоо орхиж зөвхөн Донбассын бүсийг бүрэн чөлөөлөх болно гэж зарласан. Украины Донбассын бүс гэгдэх Луганск, Донецк мужийн газар нутгийн 3/1 нь 2014 оноос оросуудын мэдэлд байгаа билээ. Тэгвэл олон улсад Орос-Украины энэ дайныг авлига-ардчилал, дарангуйлал-эрх чөлөөний үхэх сэхэхээ үзэх тэмцэл гэж нэрлээд байгаа бөгөөд аль тал нь ялахыг шийдвэрлэх Донбассын төлөөх их тулалдаан эхэлснийг Украины ерөнхийлөгч Владимир Зеленский энэ сарын 18-19-нд шилжих шөнө албан ёсоор зарлав. Тэрээр “Бидэнд бусдын юу ч хэрэггүй. Харин бид Украины гэсэн бүхнийг хамгаална” гэж мэдэгдсэн.

Энэ удаа оросууд урьд нь гаргасан “бэлэн ам, шалдан гуя” алдаанаасаа сургамж авч тулалдаан эхэлснийг ерөнхийлөгч нь төдийгүй Батлан хамгаалах яам нь ч албан ёсоор зарлаагүй юм. Харин маргааш өдөр нь ОХУ Украинд явуулж буй цэргийн ажиллагааныхаа дараагийн үе шатыг эхлүүлж байгааг тус улсын Гадаад хэргийн сайд Сергей Лавров “India Today” телевизийн сувагт ярилцлага өгөхдөө мэдэгдсэн. Тэрээр “Энэ ажиллагаа үргэлжлэх болно, энэ ажиллагааны дараагийн үе шат эхэлж байна. Анх зарласанчлан “Донецк, Луганск ард улсуудыг бүрэн чөлөөлөхөд чиглэгдсэн” гэж мэдэгдсэн.

Оросууд эхний өдөр 480 км фронтын бүх хэсгээр довтолсон болов ч тийрэлтэт сум, их бууны галаар дайсны 1200 байлдааны цэгийг устгасан гээд Изюм хотын орчим хоёр тосгон эзлэн авснаа зарлав. Энэ удаад оросууд дээд командлалын шийдвэр хүлээлгүй газар дээр нь өөрсдөө шийдвэр гаргах зориулалттай жижиг хэсэг болох бие даасан ротуудаар довтолж байгаа нь шинэ зүйл байв. Барууны шинжээчид үүнийг 3-5 хүний бүрэлдэхүүнтэй бие даан амжилттай байлдаж буй Украины армийн аргыг хуулбарлах гэсэн явдал гэж үзэж байна. Харин Украины зэвсэгт хүчин Харьков хотын зүүн өмнөдөд сөрөг довтолгоо өрнүүлж хэд хэдэн хот тосгоныг чөлөөлөв. Энэ нь эсрэг талд ялалтын ямар ч найдлага төрүүлэхгүй байх байлдааны маш чухал тактик юм. Тэд эхний өдөр дайсны 10 довтолгоог няцааж 12 танк, 28 хуягт тээвэрлэгч, хоёр автомашин, нэг тийрэлтэт пуужингийн суурь, нисдэг тэрэг, онгоц, дрон, далавчит пуужин гээд агаарын нийт есөн бай устгасан байна. Тулааны дөрөв дэх өдөр Украины цэргийнхэн Оросын армийн удирдлагын 50 гаруй дээд тушаалын офицерууд цугларсан хуралдаанд цохилт өгч хоёр генерал амь үрэгдсэн нь тодорхой болов. Харин Оросын Батлан хамгаалах яамны мэдээлэлд итгэвэл украинчууд аль хэдийнэ ганц ч танк, хуягт тээвэрлэгч, их буу, пуужин харвагч, нисэх онгоц, нисдэг тэрэг, дронгүй болох ёстой байв. Хэдийгээр дайрч буй тал илүү их хохирол хүлээдэг ч мэдээж украинчууд техникийн хохирол хүлээж, цэргүүд нь амь үрэгдэж байгаа нь ойлгомжтой.

Германы бундесверын бэлтгэл хурандаа, Берлиний “Шинжлэх ухаан ба улс төр” сангийн байлдааны шинжээч Вольфганг Рихтер “Оросуудын гол дөрөв, туслах хоёр гэсэн нийт зургаан чиглэлээр довтолсон эхний зорилго дампуурсан. Киевийг эзлэн Украинд өөрийн нөлөөллийн төр, засаг бий болгохын оронд Оросын нийт байлдааны бие бүрэлдэхүүний 1/4 нь бүрэн устсан. Оросууд бүх украинчууд ингэж нэгдэн тэдний эсрэг тэмцэнэ гэж санаагүй. 2014 он давтагдсангүй. Одоо тэд эхний алдаагаа ойлгож нэгдсэн удирдлагатай болж, хотын гудамжийг бодвол танкийн хөдөлгөөн хийх боломжтой Харьков хотоос урд зүгт Изюм болон Луганск хотын завсрын элдэв саад тотгоргүй өргөн уудам, тэгш талд гол тулалдаанаа хийж байна. Энд Оросын хил ойрхон тул ар талын хангамжаар армийг хангахад оросуудад илүү дөхөмтэй байх болно. Эдгээр шалтгаан нь Донбассын дайны эхний шатанд оросууд амжилт олох магадлалтай гэсэн үг. Тэд эндээсээ нийт Донбассын газар нутгийг бүр өмнөд Украиныг чөлөөлнө гэж мэдэгдсэн. Гэхдээ Украинд оросууд бүх армийнхаа 3/2-ыг оруулаад дууссан, бусад нь буюу 3/1 нь НАТО-той хиллэж буй Балтийн тэнгис хавь, хойд болон өмнөд Кавказ, исламын босогчдыг барьж буй Сири гэх мэт төв Азийн бүс нутгууд, Хятадтай хиллэдэг уудам хэсгүүдэд байрлаж байна. Мөн Алс Дорнодод япончууд оросуудад хууль бусаар алдсан арлуудаа буцаан авна гэж мэдэгдээд байгааг мартаж болохгүй. Энэ бүхэн ОХУ нэмэлт нөөц хүчгүй болсныг баталж байгаа юм. Иймээс энэ тулалдааны үр дүн хоёр талыг ямар хэлэлцээ хийхийг шийднэ. Укрианчууд 450-500 километр үргэлжилсэн тэгш талд Оросын довтолгоог хэрхэн барихаас бүх зүйл хамаарна. Хамгийн гол нь хойд, өмнөд гэсэн хоёр чиглэлээр довтлох Оросын цэргүүдийг нийлүүлж өөрсдөө бүслэгдэж болохгүй. Ер нь энэ тулалдаан дэлхийн II дайнд эргэлт гаргасан “Курскийн цүлхэн” хэмээх тулалдаантай бүх талаар ихээхэн адилхан байгаа нь онцлог юм. Украичууд оросуудаас хамгаалж чадах нь чухал. Харин тэд орчин үеийн довтолгооны зэвсэггүй байгаа учраас довтлох тухай одоогоор ярихад эрт байна. Гэхдээ укрианчууд тактикийн сөрөг довтолгоонуудыг маш амжилттай хийж байна. Үүнийгээ ч үргэлжлүүлэх байх. Украинчууд оросуудыг дайрахаас өмнө 250 000 цэрэгтэй, 1000 давсан танктай, Туркийг тооцохгүй бол Европын хоёр дахь том арми байсан гэдгийг мартаж болохгүй. Өнөөдөр украинчууд байлдах чадвараар, оросууд хүн хүчээр эсрэг талаасаа илүү байна. Энэ тулалдаанд аль тал нь амжилтай байлдаж, дайсанд хэр зэрэг хохирол учруулахаас цаашдын бүх зүйл шалтгаална” гэжээ. АНУ-ын Арлингтон хотын Орос судлалын “CNA” хүрээлэнгийн захирал Майкл Кофман “Оросын арми туйлдан нөөц, хүчгүй болоод байна. Тэд довтолгооны эхний өдөр дэлхийн II дайнд оросуудын хэрэглэж байсан “тагнах давшилт” хийлээ. Энэ тактик нь эртнээс бэлдэж суурин бэхлэлт хийсэн дайсны хамгаалалтыг мэдэхэд тустай арга. Харин байнгын хөдөлгөөнт хамгаалалт хийж байгаа Украины армийн хамгаалалтыг энэ аргаар мэдэх боломжгүй. Харин ч бүр украинчуудын тавих занганд орж устгагдах аюултай” гэсэн байна. АНУ-ын Харвардын Их сургуулийн дэргэдэх Белферийн олон улсын судалгааны төвийн эрдэм шинжилгээний ахлах ажилтан, бэлтгэл бригадын генерал Кевин Райан “ОХУ-д байсан 160 байлдааны тактикийн батальоны 120-130 нь Украины байлдаанд орсон. Тэд Киевээс ухрахдаа 70-80 тактикийн батальонтой үлдсэн. Энэ бол хэтэрхий их хохирол. Оросууд Донбассын төлөөх шийдвэрлэх тулалдаанд ялагдах магадлал өндөр байгаа бөгөөд үүний дараа тэдэнд дахин дайрах арми гэхээр юм үлдэхгүй. Учир нь тэдэнд энэ алдагдлаа нөхөх гэрээт болон сайн дурын цэргийн нөөц байхгүй” гэж мэдэгдэв.

Украины цэргийн шинжээч, бэлтгэл хурандаа Олег Жданов “Оросууд эхний довтолгоонд 170-180 мянган цэрэг оруулсан бол өнөөдөр Донбассын хоёр чиглэлд үүнийхээ тал хувьтай тэнцэх тооны цэрэг хуримтлуулаад байна. Украины цэргийн гол зорилго зууралдан тулалдахгүй, дайсны дайралтыг гэнэдүүлэн цохиж, өөрийн байршлыг хамгаалан Оросын цэргийн хүчийг сульдаах явдал. Хэрэв ингэж чадвал оросуудад нөөц хүч байхгүй болсон учраас энэ сарын сүүл гэхэд эзлэн түрэмгийлэгчид бүрэн ялагдах нь хүн бүрд ойлгомжтой болно. Аль ч дайнд эхний дайралтаар эсрэг талын бэхлэлтийг сэтлэн үүгээр нөөц хүч орж цааш өргөжин тэлдэг. Энэ удаа Оросын арми довтолгооны хамгийн гол зүйл болох Украины хамгаалалтыг сэтэлж чадахгүй байна. Иймээс оросууд 7-10 хоногийн дараа довтлох хүчгүй болно. Үүний дараа энэхүү байлдааны гурав дахь үе шат болох Украины довтолгоо эхэлж Донбассыг бүрэн чөлөөлнө. Хэр олон манай цэрэг амь үрэгдэх вэ гэдгийг үнэлж байж Крымыг хэдийд, яаж чөлөөлөх вэ гэдэг асуудал шийдэгдэнэ. Оросууд дахин довтлох хүч хуримтлуулах гэвэл ядаж Украинтай хил залгаа нутгууддаа хэсэгчилсэн дайны байдал зарлаж байж цэрэг татах учир 3-6 сар шаардагдана. Энэ нь хэдэн сарын дараа дайн дуусна гэсэн үг” гэв. Дайн дуусах гэдэг дээр Их Британийн ерөнхий сайд Борис Жонсон “Хэрэв оросууд үй олноор хөнөөх зэвсэг ашиглах гэвэл бид холбоотнуудтайгаа зөвшилцөж цаг алдахгүйгээр бие даан шийдвэр гаргаж шууд цохилт өгнө” гэж саяхан мэдэгдсэн бол АНУ-ын ерөнхийлөгч Жо Байдан “ОХУ цөмийн бөмбөг ашиглах шинж тодорхой болох аваас Pentagon түрүүлж цохилт хийх болно” гэдгээ Москвад ойлгуулаад байгаа билээ. Энэ нь В.Путин цөмийн бөмбөг ашиглах гэвэл хэдхэн өдөрт дайн дуусна гэсэн үг.

Олон улсын цэргийн шинжээчид Оросын энэхүү хоёр дахь довтолгоон эхнийхээсээ ч амжилтгүй өрнөж байгааг Оросын арми авлигад нэрвэгдэн ямар ч зохион байгуулалт, байлдах чадваргүй болсон буюу дайсны хамгаалалтыг сэт цохих “зангидсан нудрага” мэт хүч төвлөрүүлж чадахгүй болчихсон гэдэг дээр бүгд санал нэгдэж байна. Оросын өөрийнх нь цэргийн судлаач хүртэл “ОХУ-ын генералууд шууд улаан халз дайрч өөрийн цэрэг, офицеруудынхаа хүүрээр дайснаа дарж алаад дараа нь тэд нараа баатар болгодог аль II дайны үеийн “лобовая атака” гэх хуучирсан, ямар ч явуургүй болсон арга хэрэглэж байгаа учир ялах ямар ч найдлага алга” гэж байна. Ийнхүү дэлхийн II дайнд эргэлт гаргасан “Курскийн цүлхэн” хэмээх их тулалдаан XXI зуунд дахин чимээгүйхэн давтагдаж, аль тал ялах нь эхний долоо хоногтоо бараг л тодорхой болоод байна.



Г.АМАРСАНАА

Categories
мэдээ нийгэм

ОБЕГ: Хүчтэй салхи, шороон шуурга шуурахыг анхааруулж байна DNN.mn

Энэ сарын 25-нд буюу өнөөдөр нутгийн хойд хэсгээр нойтон цас, цас орж, цасан шуурга шуурч нутгийн өмнөд хэсгээр хүчтэй салхи, шороон шуурга шуурахыг онцгойлон анхааруулж байна.

Иймд цаг агаарын мэдээ, мэдээллийг цаг тухай бүр сонсон, мэргэжлийн байгууллагаас өгч буй сэрэмжлүүлэг, анхааруулгыг дагах,

Тээврийн хэрэгслийн жолооч нар хол, ойрын замд гарахдаа тээврийн хэрэгслийн найдвартай байдлыг хангаж бензин, шатахууны нөөцтэй, дулаан хувцастай зорчих,

Иргэд, малчид болзошгүй эрсдэлээс урьдчилан сэргийлж, салхи шуурганд төөрөх, малтайгаа уруудах эрсдэлээс урьдчилан сэргийлж, малаа ойрын бэлчээрт хариулах, бага насны хүүхдийг малд явуулахгүй байх,

Ой, хээрт явахдаа галын аюулгүй байдлыг сайтар хангаж, болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Categories
мэдээ нийгэм

Улаанбаатарын дэвжээнд 21 жилийн дараа Азийн шилдэг бөхчүүд өрсөлдөв DNN.mn

Бөхийн төрлүүдийн 2022 оны насанд хүрэгчдийн Ази тивийн аварга шалгаруулах тэмцээн 4 дүгээр сарын 19-24-нд Монгол Улсын нийслэлд амжилттай болж шилдгүүдээ тодрууллаа.

Энэхүү сонгомол бөхийн 31 дэх, чөлөөт бөхийн эрэгтэйчүүдийн 35, эмэгтэйчүүдийн 24, удаагийн тэмцээнд Монгол, Бахрейн, БНСУ, Иран, Ирак, Йордан, Киргиз, Катар, Казахстан, Кувейт, Пакистан, Палестин, Тажикистан, Туркменистан, Сингапур, Сири, Узбекистан, Шри-Ланка, Энэтхэг, Япон гэсэн 20 орны 250 гаруй тамирчин бөхийн гурван төрөлд өрсөлдөв. Тивийн АШТ-ийг 21 жилийн дараа эх орондоо хүлээж авсан Монголын баг тамирчдаас эмэгтэйчүүд 4 мөнгө, 5 хүрэл, эрэгтэйчүүд 2 мөнгө, 1 хүрэл медальтай тэмцээнээ өндөрлүүлэв.

Тэмцээний сүүлийн өдөр чөлөөт бөхийн эрэгтэйчүүдийн 61, 74, 86, 92, 125 кг-ын жингийн барилдаан болж 92 кг-д “Хасу-Мегастарс” клубийн тамирчин, спортын мастер Д.Оргилох мөнгө, 125 кг-д “Алдар” спорт хороо, Баянхонгор аймгийн тамирчин, спортын мастер Э.Батмагнай хүрэл медалийн эзэн боллоо.

Чөлөөт бөхийн төрөлд Иран улсын баг 10 жингээс 6 жинд нь алт, 1 мөнгө, 1 хүрэл медаль хүртэж, 201 оноогоор тасархай тэргүүллээ. Харин Энэтхэг улс 1 алт, 3 мөнгө, 3 хүрэл медальтай 152 оноогоор 2 дугаар, Казахстан 1 алт, 3 мөнгө, 4 хүрэлтэй 151 оноогоор 3 дугаар байрыг тус тус эзэллээ.

Ази тивийн АШТ-ий чөлөөт бөхийн эрэгтэйчүүдийн дүнг танилцуулахад:

57 кг-д:

1. Рави Кумар (Энэтхэг)

2. Рахат Калжан (Казахстан)

3. Алмаз Сманбеков (Кыргызстан)

3. Рикүто Арай (Япон)

61 кг-д:

1. Рей Хигүчи (Япон)

2. Дароуш Задех Тансеван (Иран)

3. Акбар Курбанов (Казахстан)

3. Улукбек Жолдошбеков (Кыргызстан)

65 кг-д:

1. Рахман Амузадхалили (Иран)

2. Бажранг Пуния (Энэтхэг)

3. Кайки Ямагүчи (Япон)

3. Аббос Рахманов (Узбекистан)

70 кг-д:

1. Тайши Нарикүни (Япон)

2. Эрназар Ахматалиев (Кыргызстан)

3. Сырбаз Талгат (Казахстан)

3. Навеен Навеен (Энэтхэг)

74 кг-д:

1. Йонас Эмамичогай (Иран)

2. Нуркожа Кайпанов (Казахстан)

3. Исламбек Орозбеков (Кыргызстан)

3. Дайчи Такатани (Япон)

79 кг-д:

1. Али Савадкоухи (Иран)

2. Балиан Гоурав (Энэтхэг)

3. Арсалан Будажапов (Кыргызстан)

3. Юдай Такахаши (Япон)

86 кг-д:

1. Азамат Даулетбеков (Казахстан)

2. Деепак Пуния (Энэтхэг)

3. Мохсен Мостафави Аланах (Иран)

3. Бобур Исломов (Узбекистан)

92 кг-д:

1. Амирхоссейн Фирeзпeрбандпей (Иран)

2. Дагвадоржийн Оргилох (Монгол)

3. Вики Вики (Энэтхэг)

3. Адилет Давлумбаев (Казахстан)

97 кг-д:

1. Мохаммадхоссейн Мохаммадиан (Иран)

2. Өлзийсайханы Батзул (Монгол)

3. Мамед Ибрагимов (Казахстан)

3. Сатавиарт Кадиан (Энэтхэг)

125 кг-д:

1. Ядоллах Мохеби (Иран)

2. Алишер Ергали (Казахстан)

3. Энхтүвшингийн Батмагнай (Монгол)

3. Жун Йы Хюн (БНСУ)

Categories
мэдээ нийгэм онцлох-нийтлэл туслах-ангилал

Уйгаржин хэмээх чөдөр Монголын ирээдүйн IT инженерүүдийг заазалж байна DNN.mn

Их, дээд сургуульд элсэн суралцахаар Элсэлтийн ерөнхий шалгалт өгсөн хүүхдүүд заавал “монгол хэл, бичгийн шалгалтад хамрагдсан байх” Засгийн газрын тогтоол байдаг. Хэрэв энэ шалгалтад хамрагдаагүй, хамрагдсан ч 400 оноо авч чадаагүй бол их, дээд сургуульд суралцах боломжгүй юм. Өнөө жилийн хувьд дөрөвдүгээр сарын эхээр дээрх шалгалтыг орон даяар авсан бөгөөд нийт 30 гаруй мянган сурагч хамрагджээ. Үүнээс хамгийн дээд буюу 800 оноо авсан 45 хүүхэд байна. Харин 5000 гаруй хүүхэд босго оноо болох 400 оноо авч чадалгүй шалгалтын гадаа үлдлээ. Шалгалтад унасан хүүхдүүд дахиж өгнө. Хэрэв дахиад унавал эдгээр хүүхдүүдийн их, дээд сургуульд суралцах боломж, хүсэл мөрөөдөл нь үүгээр хаагдаж байна гэсэн үг.

Зөвхөн монгол хэл, уйгаржин бичигтээ тааруу байсныхаа төлөө дээрх 5000 гаруй залуус Элсэлтийн шалгалт өгч чадахаа боливол дэндүү харамсалтай юм. Магадгүй, тоо, физиктээ сайн тэдэн дунд олон хүүхэд байгаад эргэлзэх юм алга. Яагаад гэвэл энэ чиглэлийн хүүхдүүд монгол хэлэндээ, түүн дундаа уйгаржин бичигтээ тааруу байх нь олон. Тэр хүүхдүүдэд ирээдүйд англи хэл, тоо, IT чигийн хичээл, инженерчлэлийн программууд л хэрэг болохоос биш уйгаржин бичиг түй ч хэрэг болохгүй. Бидний аав, ээжийн амьдарч байсан социализмын үед ч маш ухаалгаар шалгалт авч байсан юм шүү. Тоондоо сайн хүүхдүүд тэр хичээлээрээ л шалгалтаа өгнө. Монгол хэл, бичгээрээ цаашдаа гүнзгийрүүлж судалж мэргэшнэ гэсэн бол энэ чиглэлээрээ шалгалт өгч, их дээд сургуульд орно. Тийм болохоор ахлах ангидаа яг мэргэших чиглэлийн хичээлээ сонгоод судлаад явчихдаг байсан нь хэн хэндээ туйлын амар, шалгалт шүүлгэнд ч өндөр оноо авахад эергээр нөлөөлдөг байж.

Харин одоо бүх хүүхдүүд уйгаржин бичиг үзэж, цагаа барах болж байна. Бүгд тэрийг уншиж ойлгож, бичихгүй бол цаашид суралцах боломжгүй. Нэг төгсөлтөд бүх хичээлдээ тасархай сайн ганц хоёр л хүүхэд байдаг. Тоо, монгол хэл, уран зохиол, хими, физик гээд бүгдийг нь мэддэг, тэд бүх хичээлийн шалгалт шүүлгээ түүртэлгүй сайн өгдөг. Харин дийлэнх хүүхдүүд өөрийн сонирхдог чиглэлийн хичээлээ л анхаарч, илүү судалдаг. Ирээдүйн инженерүүдэд англи хэл л хамгийн түрүүнд хэрэг болно уу гэхээс тэд уйгаржин бичгээр хуучин эх сурвалж, судар ном ухаж унших шаардлага байхгүй. Харин монгол хэл, уйгаржин бичгээр цааш судлах, сурах сонирхолтой хүүхдүүдийн тухайд өөр хэрэг. Тэд л ийм шалгалт өгч, чансаагаа үзэх хэрэгтэй.

Бодит амьдрал дээр ийм л байдаг. Гэтэл монгол хэл, уйгаржин бичгийн шалгалтыг нийт төгсөгчдөөс ийн хавтгайруулан авч, олон мянган хүүхдийн сурах боломжийг хааж байгаа нь монголчуудыг хорлох хорон бодлого хэрэгжээд байна уу гэж хардахад хүргэж байна. Монголын сортоотой болгоныг толгой дараалж хядсан уйт он жилийг бид мартах болоогүй. Түүн шиг байгалийн ухааны хичээлд сонирхолтой, инженер сэтгэлгээтэй залуусыг уйгаржин бичиг мэдэхгүй, монголоор алдаатай бичдэг гэдгээр далимдуулан гудамжинд хөөж гаргах, дуучин хуурчин, утга уянга бүхнийг дээш нь татдаг, Монголыг хөгжүүлэхгүй энэ хэвээр нь байлгах бодлого л яваад байх шиг. Гэхдээ энэ бодлогыг маш нарийн, хүмүүст огт анзаарагдахгүй хийж байна. Хүмүүсийн сэтгэлийн хөөрөл дээр хүссэн болгоныг нь биелүүлж байгаа мэтээр энэ бүхнийг үйлддэг. Үүнийг мэдэрч, нарийн ухаанаар сөргүүлж тавих монгол төрийн холч бодлого хаана байна вэ?

Уйгаржин бичгийг энд муулах, доош нь хийх, ад үзэх санаа ер агуулсангүй. Зүгээр л нүдээ нээгээд дэлхий ертөнцийг хар даа. Технологийн эрин зуунд улс орнууд үсрэнгүй хөгжиж, хүн ард нь баян тансаг, аз жаргалтай амьдарч байна. Техник сэтгэлгээтэй, бүхий л салбарын инженерүүд, эрдэмтэн мэргэд дэлхий ертөнцийг шинээр бүтээж, урьд өмнө огт мэддэггүй байсан цоо шинэ нээлтүүдийг өдөр бүр хүн төрөлхтөнд бэлэг болгон барьж байна. Бид ч үр шимийг нь хүртсээр байгаа. Монголчууд бид ч энэ хөгжилд ойртохын тулд, ядах нь ээ IT инженерүүдээ олноор сургаж, шинжлэх ухаанаа хөгжүүлэх хэрэгтэй гэдгийг санах сэрэх хүн байна уу. Улс орныг инженерүүд удирдаж авч явдаг. Монголын сүүлийн 30 жилийн хөгжил, яг одоогийн байгаа байдлаа харахад урлаг, уран сайханчид, хуульчид, эдийн засагчид улс орныг удирдаад авч явж чаддаггүйг бэлээхэн харчихаж болно. Тэд өнөө маргаашаа аргацаасан поп улстөрчид болж хөгждөг болохоос улс орноо хөгжүүлэх оролдлого ч хийдэггүйг 30 жил харлаа.

Юм л бол уйгаржин бичгээ сэргээнэ гэж уйлагнаж суухын оронд англи хэлийг хоёр дахь хэл болгож зарлах хэрэгтэй. Сургалт судалгаа, шинжилгээндээ уйгаржин хэрэглэдгээрээ хэрэглээд явах нь зайлшгүй. Чингис хаан, социализмын үеэ магтан шагшихын оронд урагшаа нэг алхах оролдлого хийх нь чухал. Мэдээж, түүхэн бахархалт хүмүүсээ, чухал он жилүүдээ бид алдаа оноотой нь тээсээр явах нь ойлгомжтой.

Монголд жил бүр 40 шахам мянган залуус дунд сургуулиа төгсдөг. Ядаж тэдний талыг нь инженер болгоход төр бодлогоор анхаарах ёстой байтал монгол хэл, уйгаржин бичиг мэддэггүй гээд албаар их, дээд сургуульд сурах боломжийг нь хааж байна. Монгол Улс, Монголын ард түмэн байгаа цагт монгол хэл хэзээ ч устахгүй нь тодорхой үнэн. Сая сая хэрэглэгч нь байгаа болохоор цаашид бүр ч илүү хөгжөөд явна. Яахав, ирээдүйд улс орныг нуруундаа үүрч дүүрэх хэдэн инженерүүд нь бага сага алдаатай бичдэг байг л дээ. Тэглээ гээд хэнд ч гай болохгүй. Юу гэх гээд байна гэхээр, төгсөгчдөөс нийтээр нь авдаг монгол хэл, бичгийн шалгалт гэдгийг болиод өгмөөр байна. Нэгэн цагт монголчууд нийтээрээ идэвхтэй хэрэглэж байсан уйгаржин бичиг өдгөө нэгэнт өөрийн түүхэн үүргээ гүйцэтгээд, сургалт судалгааны хүрээнд л хэрэглэгддэг болсон. Үүнийг ойлгож ухаарахгүй, уйгаржин хэмээх чөдрөөр Монголын ирээдүйн IT инженерүүдийг заазалмааргүй байна. Хиймэл оюун ухааны хөгжил өндрөө авч, шинжлэх ухаан физик амьдралд ийм ойрхон ирж байсан үе хэзээ ч урьд өмнө ирж байгаагүй. Одоо яг тийм үед огт хэрэг болохгүй уйгаржин үсэг нүдлэн суугаа цаг хайран биш үү. Уйгаржин үсэгтэйгээ ноцолдсоор суувал бид дэлхийн хөгжлөөс ямар хойш хаягдах вэ гэдгийг нийтээрээ ойлгох хэрэгтэй байна. Одоо л яг шинжлэх ухааны хэл болох англи хэл, түүний үсэг болох латин үсэг, бүр ядахдаа түүнтэй маш ойролцоо крилл үсгээр сурч боловсрох цаг. Түүнээс орчин үед шинжлэх ухаанд онц хэрэг болохгүй уйгаржин үсэг гэдэг хийрхлээсээ болж буцаж ухрах нь үндэстнийг устгах бодлого гэж та нар ойлгохгүй байна гэж үү дээ. Энэ хийрхлийг бидэнд зориудаар гаднаас тулгаад байгаа юм биш үү гэж бодож үзсэн үү. Шинжлэх ухаан ямар хүчтэйг бид Украин Оросын дайнаас харж байна. Тэд цөөхүүлээ ч орчин үеийн зэвсэг техникээр ялалт байгуулж ч магадгүй болоод байна. Тэд орчин үежээгүй байсан бол өдийд аль хэзээний арчуулаад, алуулаад дуусах байсан. Энэ жишээ бол соёлжсон, хиймэл оюун ухаан, шинжлэх ухаанаа хөгжүүлсэн, ухаалаг ард түмэн байж тэсч үлдэнэ гэдгийг харуулаад байна. Ийм боломжийг уйгаржин үсгийн шалгалт, монгол хэлний шалгалт гэсэн нарийн хонгилоор оруулж хааж боогоод байгаа юм биш үү. Тэгүүлэх гэж ч ийм шалгалтыг бодож олж бидний мунхаг оюун ухаанд суулгаад байгаа юм биш үү гэж хардах боллоо.

Монголчуудын цөсийг хөөргөх юутай амархан, XIII зуун яриад л, та нар дэлхийг эзэлж байсан, хэрэв тийм болох гэж байгаа бол яг тэр үе шиг морь, уйгаржин үсгээ шүтээд яв гэхэд л болно. Гэвч харамсалтай нь одоо XIII зуун биш, XXI зуун хиймэл оюун ухааны зуун шүү дээ. Бид XIII зуунд яагаад хүчирхэг байсан юм, тэр үеийнхээ шилмэл технологи болох морь, нум сум, сэлмийг чадварлаг эзэмшиж байсан. Тэгвэл XXI зууны шилдэг технологи болох хиймэл оюун ухааныг Монголын баатрууд шигээ эзэмшье. Үүнийг эзэмшихэд уйгаржин үсэг огтхон ч хэрэггүй зүйл гэдгийг захын тэнэг ч мэднэ.

Д.ГЭНДЭНДАРАМ

Categories
мэдээ цаг-үе

НӨАТ-ын буцаалтыг өнөөдрөөс эхлэн олгоно DNN.mn

НӨАТ-ын энэ оны эхний улирлын буцаан олголтыг өнөөдрөөс эхлүүлэн энэ 7 хоногт иргэдийн дансанд шилжүүлэхээр болжээ. Иргэдийн худалдан авалтад төлсөн НӨАТ-ын 2 хувийн буцаан олголтыг ажлын 30 хоногт багтаан иргэдийн дансанд шилжүүлдэг журамтай юм.

Өнгөрсөн оны IV улиралд нийт 1,153,999 иргэнд 64.4 тэрбум төгрөгийг буцаан олгожээ. НӨАТ-ын буцаан олголтыг улирал тутамд нэг удаа олгож байгаа. Иргэдийн хувьд НӨАТ-ын 2 хувийн буцаан олголтоос дунджаар 200 мянга хүртэл төгрөг авдаг гэх судалгаа гарчээ. Татварын ерөнхий газрын мэдээллээр энэ оны I улирлын статистикаар нийт иргэдийн 90 хувь нь 100 хүртэл мянган төгрөг авдаг байна. Иймд өндөр орлоготой өрхүүдийг ч бас судлах хэрэгтэй гэсэн саналыг гаргажээ.

НӨАТ-ын буцаан олголтоос автотээврийн хэрэгслийн, үл хөдлөх хөрөнгийн албан татвар, газрын төлбөр зэргийг төлөх боломжтой болсон юм.

Categories
мэдээ цаг-үе

УИХ дахь намын бүлгүүд хуралдана DNN.mn

Өнөөдөр УИХ дахь МАН болон АН-ын бүлгийн хуралдаан болно. Өнгөрөгч долоо хоногт МАН-ын бүлгийн хурлаар төсөвт тодотгол хийхийг дэмжсэн. Харин АН-ын бүлгийн хурлаар Төрийн албан хаагчдын орон тоо ихэдсэн учраас ямар ч хэрэггүй олон албан тушаалыг арилгаж, шаардлагагүй сумдыг нэгтгэх хэрэгтэй гээд энэ тухай зөвлөмжийг Засгийн газарт хүргүүлэхээ мэдэгдсэн юм. Мөн өнөөдөр дараах байнгын хороод хуралдах товтой байна.

Ёс зүй, сахилга хариуцлагын байнгын хорооны хуралдаанаар

  • Монгол Улсын 2022 оны төсвийн тухай хуульд өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай, Ирээдүйн өв сангийн 2022 оны төсвийн тухай хуульд өөрчлөлт оруулах тухай хуулийн төслүүд /Засгийн газар 2022.04.20-ны өдөр өргөн мэдүүлсэн, хоёр дахь хэлэлцүүлэг, санал, дүгнэлтээ Төсвийн байнгын хороонд хүргүүлнэ/
  • Монгол Улсын 2022 оны төсвийн тухай хуульд өөрчлөлт оруулах тухай хуулийн төсөлтэй хамт өргөн мэдүүлсэн Төрийн хэмнэлтийн тухай хуулийн төсөл /Засгийн газар 2022.04.20-ны өдөр өргөн мэдүүлсэн, анхны хэлэлцүүлэг, санал, дүгнэлтээ Төсвийн байнгын хороонд хүргүүлнэ/

Инновац, цахим бодлогын байнгын хорооны хуралдаанаар

  • Монгол Улсын 2022 оны төсвийн тухай хуульд өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай, Ирээдүйн өв сангийн 2022 оны төсвийн тухай хуульд өөрчлөлт оруулах тухай хуулийн төслүүд /Засгийн газар 2022.04.20-ны өдөр өргөн мэдүүлсэн, хоёр дахь хэлэлцүүлэг, санал, дүгнэлтээ Төсвийн байнгын хороонд хүргүүлнэ/
  • Монгол Улсын 2022 оны төсвийн тухай хуульд өөрчлөлт оруулах тухай хуулийн төсөлтэй хамт өргөн мэдүүлсэн Төрийн хэмнэлтийн тухай хуулийн төсөл /Засгийн газар 2022.04.20-ны өдөр өргөн мэдүүлсэн, анхны хэлэлцүүлэг, санал, дүгнэлтээ Төсвийн байнгын хороонд хүргүүлнэ/

Аюулгүй байдал, гадаад бодлогын байнгын хорооны хуралдаанаар

  • Монгол Улсын 2022 оны төсвийн тухай хуульд өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай, Ирээдүйн өв сангийн 2022 оны төсвийн тухай хуульд өөрчлөлт оруулах тухай хуулийн төслүүд /Засгийн газар 2022.04.20-ны өдөр өргөн мэдүүлсэн, хоёр дахь хэлэлцүүлэг, санал, дүгнэлтээ Төсвийн байнгын хороонд хүргүүлнэ/
  • Монгол Улсын 2022 оны төсвийн тухай хуульд өөрчлөлт оруулах тухай хуулийн төсөлтэй хамт өргөн мэдүүлсэн Төрийн хэмнэлтийн тухай хуулийн төсөл /Засгийн газар 2022.04.20-ны өдөр өргөн мэдүүлсэн, анхны хэлэлцүүлэг, санал, дүгнэлтээ Төсвийн байнгын хороонд хүргүүлнэ/
  • Ази, Номхон далайн хил дамнасан цаасгүй худалдааг хөнгөвчлөх тухай ерөнхий хэлэлцээрийг соёрхон батлах тухай хуулийн төслийг хэлэлцэх товтой байна.

Categories
мэдээ цаг-үе

Элсэлтийн Ерөнхий Шалгалтын бүртгэл өнөөдөр 18:00 цагт дуусна DNN.mn

2022 оны Элсэлтийн Ерөнхий Шалгалтын бүртгэл eyesh.eec.mn цахим хаягаар явагдаж байна.

Бүртгэл өнөөдөр буюу 2022 оны дөрөвдүгээр сарын 25-ны өдрийн 18:00 цагт дуусна. Бүртгэл хаагдсан тохиолдолд нэмэлт бүртгэл хийхгүй, хичээл нэмэхгүйг анхаарна уу.

Хэрэв шалгуулагч та бүртгэлийн дугаар, нууц үгээ авсан хэдий ч шалгалт өгөх хичээлээ сонгоогүй байгаа бол дурдсан хугацаанд хичээл сонголтоо хийж, төлбөр төлснөөр бүртгэл баталгаажна.

Шалгуулагчид

  • Математик
  • Монгол хэл
  • Нийгэм судлал
  • Англи хэл
  • Физик
  • Хими
  • Биологи
  • Газарзүй
  • Орос хэл
  • Түүх гэсэн 10 хичээлээс хоёроос дээш хичээл сонгох боломжтой.
Categories
мэдээ онцлох-нийтлэл туслах-ангилал улс-төр

Б.Пүрэвдорж: НӨАТ-ын сугалааг зогсоовол татварын орлого багасна DNN.mn

УИХ–ын гишүүн Б.Пүрэвдоржтой ярилцлаа.

– Бүх төсвөө тануулчихаад цалингаараа ажиллана гэвэл УИХ-ын гишүүд хэн нэгнээс хамааралгүй ажиллаж чадахгүй –

-НӨАТ-ын сугалааг зогсоож, буцаан олголтыг хоёр хувьд барина гэдгээ Сангийн сайд илэрхийлсэн. Үүнд та ямар дүгнэлттэй байна?

-НӨАТ бол бүртгэлийн татвар юм. Өөрөөр хэлбэл, компани, аж ахуйн нэгжүүдийн борлуулалт болон үйлчилгээний орлогыг бүртгэх зориулалттай татвар гэсэн үг. 2012 оноос өмнө татварын орлогод НӨАТ жинтэй хувь нэмэр оруулдаггүй байсан. НӨАТ-ын сугалааг бий болгож буцаан олголттой болж иргэдийн оролцоог идэвхжүүлж өгснөөр татварын орлогод НӨАТ-аас оруулах хувь хэмжээ байнга нэмэгдэж ирсэн. Өнгөрсөн оны гүйцэтгэлээс харахад нийт татварын 30 хувийг НӨАТ-ын орлого бүрдүүлж байгаа юм. Ингээд орлогын татвараасаа илүү гарч төсөвт хамгийн өндөр татвар бүрдүүлэгч татварын төрөл болж хувирсан. Энэ бол НӨАТ-ын буцаан олголттой холбоотой.

Иргэд бүрэн буцаан олголтоо авахын тулд НӨАТ-ын баримтаа аж ахуйн нэгж, иргэдээс нэхдэг болсон. НӨАТ-ын сугалаа бол иргэдийг идэвхжүүлэх зорилготой. Өөрөөр хэлбэл, НӨАТ-ын сугалаанд оролцож азтан болох боломжийг бүрдүүлснээр иргэд их идэвхтэй оролцож эхэлсэн. Аль аль нь НӨАТ-ын татварыг иргэдээр өөрсдөөр нь хянуулах системийг сайн бүрдүүлсэнтэй холбоотой. Сангийн сайд НӨАТ-ын сугалааг зогсооно гэж байгаа нь иргэдийн идэвх оролцоог багасгах зорилготой байна. Өөрөөр хэлбэл, татварын байцаагч НӨАТ-ыг хянадаг байсан бол аль хэдийнэ НӨАТ-ын орлого өндөр хэмжээнд байх байсан. Харамсалтай нь ингэж чадахгүй. Тиймээс иргэдээрээ хянуулж хийсэн нь энэ татварыг тогтмол өсөлттэй болгох гол үндэс болсон.

Хэрвээ НӨАТ-ын буцаан олголт, сугалааг зогсоовол бүх худалдаа үйлчилгээ НӨАТ-гүй болох эрсдэл рүү орно. Өөрөөр хэлбэл, НӨАТ-ын хоёр хуваа буцааж авахгүй бол аж ахуйн нэгжүүд иргэдэд НӨАТ-гүй бараа, үйлчилгээ үзүүлье гэдэг болно. Ингээд НӨАТ-гүй авчихъя гэсэн хандлага тогтвол борлуулалт, үйлчилгээг бүртгэдэг үндсэн үүргээсээ хазайж татварын орлого багасана.

-НӨАТ-ын сугалааг зогсоохгүйгээр авч хэрэгжүүлэх гарц, шийдлийг та хэрхэн харж байна вэ?

-НӨАТ-ыг таван хувь болгох, буцаан олголтыг 40 хувьд хүргэх хуулийн төслийг миний бие хоёр жил гаруйн өмнө өргөн барьсан.

НӨАТ-ыг нэмэгдүүлье гэж өнөөдөр яриад байгаа УИХ-ын гишүүдэд өргөн барьсан хууль байхгүй.

Яг өнөөдрийн байдлаар энэ чиглэлийн хуулийн төслийг би ганцхан өргөн барьсан байгаа. Үндсэн хуулийн нэмэлт өөрчлөлтөөр татвар, төсөв, эрүү, иргэн, зөрчлийн хуультай холбоотой анхдагч хууль болон нэмэлт өөрчлөлтийн төслийг зөвхөн Засгийн газар өргөн барихаар хуульчилсан. Би Үндсэн хуулийн нэмэлт, өөрчлөлтөөс өмнө энэхүү хулиа өргөн барьсан учраас энэ шалгуурыг давж байгаа юм. Тухайн үед УИХ-ын гишүүн З.Нарантуяа, А.Оюундарь нар НӨАТ-ын 10 хувь хэвээр байлгаж, долоон хувийг нь буцаан олгодог байх хуулийн төслийг өргөн барьсан боловч хууль санаачлагч нь УИХ-д дахин сонгогдоогүй учраас тэрхүү хууль хэлэлцэх асуудлын дарааллаас хасагдсан. Тиймээс НӨАТ-ын чиглэлээр өргөн барьсан ганцхан хууль байгаа нь минийх.

-Таны өргөн барьсан хууль хэрэгжсэнээр гарах үр дүн юу байх вэ?

-Үндсэндээ иргэн, аж ахуйн нэгж гурван хувийн л НӨАТ-ыг төлдөг байя гэсэн агуулгатай. Өөрөөр хэлбэл, НӨАТ-ыг таван хувь, буцаан олголтыг 40 хувь буюу хоёр хувь болгоё гэж байгаа юм. Гэхдээ НӨАТ-ын 10 хувийг таван хувь болгож бууруулахыг Засгийн газар эсэргүүцэж байгаа. Учир нь төсвийн орлого багасна гэж үзээд байгаа юм. Би энэ хуулийг боловсруулахдаа судалгаа хийсэн. 130 мянган аж ахуйн нэгж идэвхтэй үйл ажиллагаа явуулж байна. Үүний 80 мянга нь НӨАТ төлөгч байгаа юм. Хэрвээ таван хувь болчихвол үлдсэн 50 мянга нь НӨАТ төлөгчөөр бүртгүүлнэ. Үүнээс гадна гуравхан хувийн татвар төлөх учраас зах, худалдааны төвийн худалдагчид янз бүрийн байдлаар худалдаа үйлчилгээгээ нууж байхаар хэл амгүйгээр НӨАТ төлөгчөөр бүртгүүлэх боломжийг бүрдүүлнэ. Ингэснээр татварын бааз суурь нэмэгдэнэ гэж үзэж байна. Ер нь ямар нэгэн аж ахуйн нэгж НӨАТ төлөгчөөр бүртгүүлэхдээ хамтарч ажилладаг аж ахуйн нэгжээ заавал НӨАТ төлөгч болох нөхцөл рүү оруулдаг. Жишээ нь, би НӨАТ төлөгчөөр бүртгүүлэхээр хамтарч ажилладаг байгууллага НӨАТ төлөгч биш бол НӨАТ-аа авахын тулд НӨАТ төлөгчөөр заавал бүртгүүл гэдэг шаардлагыг тавьж эхэлнэ. Хоёрдугаарт, шинээр НӨАТ төлөгчөөр бүртгүүлсэн байгууллага НӨАТ төлөгчийн статустай ч худалдаа, үйлчилгээгээ нууж байгаа өөр нэг аж ахуйн нэгжийн орлогыг ил болгодог. Тиймээс татварын бааз суурь их хэмжээгээр нэмэгдэнэ.

-НӨАТ-ын 10 хувь бол өндөр тоо биш. Дэлхийн сонгодог тогтолцоо нь ийм байдаг гэж Сангийн сайд ярьж байна лээ. Та хууль боловсруулахдаа бусад улс орнуудын жишээг судалсан болов уу. Сангийн сайд Монгол Улсыг өндөр хөгжилтэй улсуудын түвшинд авч жишээд байна уу, эсвэл үнэхээр манайх шиг потенциалтай орнууд ийм өндөр татвар төлж байна уу?

-Хүн амын орлого нь өндөр байдаг орнуудын НӨАТ-ын хувь хэмжээ өндөр байгаа юм. Учир нь цалингаа хангалттай хэмжээнд авдаг учраас тэдэнд НӨАТ амьдралд нь тийм ч их нөлөөлдөггүй. Гэтэл цалин, тэтгэвэр бага мөртлөө 10 хувийн НӨАТ төлөх нь иргэдийн амьдралд маш их дарамт болохоос гадна бараа бүтээгдэхүүний үнэ өсөх үндсэн шалтгаан болж байгаа юм. Жишээ нь, үйлдвэрээс мянган төгрөгийн үнэтэй гарч байгаа ундаа Улаанбаатар хотод борлуулагдахад багахан тээврийн зардал нэмэгдэж 1100 төгрөгөөр хэрэглэгчдэд хүрч байна. Гэтэл Ховд аймагт борлуулбал 200 төгрөгийн зардал нэмэгдэнэ. Үүн дээр НӨАТ-ын 10 хувь нэмэгдэж 1220 төгрөг болж Ховдын зах зээлд борлуулагдаж байна. Өөрөөр хэлбэл, Улаанбаатар хотын иргэнээс 110 төгрөгөөр илүү үнээр Ховд аймгийн иргэд бараа бүтээгдэхүүн хэрэглэх болж байгаа юм. Тиймээс борлуулалтын нэмэгдэл бүрээс авдаг НӨАТ алслагдмал бүсэд амьдарч байгаа иргэдэд дарамт болж байна гэж ойлгож болно.

-Энэ жил төсвөө хоёр ч удаа тодотгох гэж байна. Та үүнд ямар байр суурьтай байгаа вэ?

-2021 онд 2022 оны төсвийг хэлэлцэж байх үед би УИХ-ын индэр дээрээс “290 төсөл, арга хэмжээг царцаавал 575 тэрбум төгрөгийн хэмнэлт гаргах боломжтой” гэж хэлж байсан. Төсвийн зарлагын дэд хорооны дүгнэлтээ олон нийтийн анхаарлын төвд хүргэхийн тулд УИХ-ын индэр дээрээс зургаан минутын илтгэлээ цээжээр тавьж байсан. Харамсалтай нь иргэд ч үүнд анхаарлаа хандуулаагүй. Засгийн газар, УИХ ч миний шаардлагыг хүлээж аваагүй. Өнөөдөр үнэнд гүйцэгдэж төсвийн тодотголыг оруулж ирж байна. 312 төсөл, арга хэмжээний заримыг нь зогсоож, заримыг нь хойшлуулах замаар нийт 520 орчим тэрбум төгрөгийн хэмнэлт хийх гэж байна гэдэг нь Засгийн газар иргэдийн хүсээд байгаа хэмнэлтийн горим руу шилжиж байна. Тиймээс энэ удаагийн тодотголыг дэмжинэ.

-Зарим яам, гишүүд том оврын автомашинаасаа татгалзах ч гэдэг юмуу ямар нэгэн байдлаар хэмнэлтийг дор бүрнээ өөрсдийнхөө хэмжээнд хийж байна. Таны хувьд хэмнэлтийг хэрхэн хийж байна?

-Гишүүд УИХ-аас тойрогт ажиллах тодорхой хэмжээний төсөв авдаг. Цагаан сарын өмнөх төсвийн тодотголоор үүнийг 18 хувиар танасан. Дахиад энэ удаагийн тодотголоор тодорхой хувиар танана гэж ойлгосон. Би дахиж нэмж тануулахгүй. Учир нь УИХ-ын гишүүн орон нутагт ажиллах төсвөө бүгдийг нь тануулчихаад зөвхөн өөрийнхөө цалингаар ажиллана гэж ярьж байгаа бол тухайн УИХ-ын гишүүн нэг бол ардаа том бизнестэй. Тэр бизнесээ хамгаалах гэж УИХ-д орж ирсэн байна. Үгүй бол төрөөс хулгай хийдэг нөхөр байна.

Хэрвээ би төсвөө тануулчихаад үйл ажиллагааныхаа зардлыг ямар компани, аж ахуйн нэгжээс нэхвэл тухайн компани, аж ахуйн нэгжийн халаасанд орчихно шүү дээ. Тиймээс УИХ-ын гишүүн хэнээс ч хамааралгүй үйл ажиллагаа явуулах төсөвтэй байх ёстой. Тэр төсвөөрөө чанартай үйл ажиллагаа явуулах ёстой. Хэн нэгэн хүний санхүүгийн дарамтад орохгүйгээр үйл ажиллагаа явуулбал тухайн УИХ-ын гишүүн төр түмнийхээ төлөө хамгийн зөв шийдвэрийг гаргана гэж би үздэг.

Categories
зурхай мэдээ цаг-үе

ЗУРХАЙ: Өдрийн сайн цаг нь хулгана, үхэр, луу, могой, хонь, нохой DNN.mn

2022.4.25, ДАВАА ГАРИГ / БИЛГИЙН ТООЛЛЫН: 25

ХАВРЫН АДАГ ХӨХ ЛУУ САР
ТАВАН ШАР МЭНГЭТЭЙ ШАР БИЧ ӨДӨР

  • Аргын тооллын: 2022.4.25, Даваа гариг
  • Наран ургах шингэх: 05.45-19.56
  • Үс засуулбал: Нүд бүрэлзэн улцайна
  • Барилдлага: Рашаан
  • Шүтэн барилдлага: Хурьцахуй
Тухайн өдөр нохой, хонь жилтнээ аливаа үйлийг хийхэд эерэг сайн. Өдрийн сайн цаг нь хулгана, үхэр, луу, могой, хонь, нохой болой. Эл өдөр насны хүч дэлгэрнэ. Эм найруулах, угаал үйлдэх, бэр авах, насны авшиг, насны бүтээл хийх зан үйл хийгээд төрөл садан бололцох, худалдаа наймааны үйлнээ сайн болой, бурханы үйл, хувцас хийхэд сайн. Зүүн нүд татвал хувцас олох, баруун чих цангинавал үзэсгэлэн болох, зүүн нь бол үхэл болсныг сонсох, нохой уливал сонсголонтой үг сонсох, тагнай загатнавал гэр арвидах, бие татвал 1-2 хүн ирэх, хөл татвал гомдол аюул болно.