Ардчилсан шинэ Үндсэн хууль батлагдсаны 30 жилийн ойг тохиолдуулан парламентат ёсыг төлөвшүүлэн хөгжүүлэхэд хувь нэмрээ оруулсан, эрхэлсэн салбартаа тууштай ажиллаж, амжилт гаргасан эрхмүүдэд Ерөнхийлөгч У.Хүрэлсүхийн зарлигаар Монгол Улсын Гавьяат цол олгож байна.
Тухайлбал, Улсын Их Хурлын гишүүн асан Төгсжаргалын Ганди өнөөдөр Соёлын гавьяат зүтгэлтэн боллоо. Тэрбээр өмнө нь Нийгмийн хамгаалал, хөдөлмөрийн сайдаар мөн ажиллаж байв.
“Олон улсын Шага Монгол”- ын холбоо шагайн харвааны улсын аварга шалгаруулах анхны тэмцээнээ өчигдөр зохион байгуулагдсан. Тэмцээнд 47 тамирчин эрэгтэй, эмэгтэй ганцаарчилсан, пара, багийн төрөлд өрсөлдсөн юм. Энэ удаагийн тэмцээний онцлог нь анх удаа эмэгтэйчүүд шагай харваан тэмцээнд оролцсон явдал байсан юм. “Эмэгтэй хүн шагай харваж болохгүй” гэж шагай харвааны дүрмэнд тодорхой тусгаагүй ч тэмцээнд оролцох боломж хаалттай байсаар ирсэн нь ийнхүү эцэс болжээ.
ТЭМЦЭЭНИЙ ДҮН:
Эрэгтэй: 1. Д.Рэнчиндорж 2.Е.Номин-Эрдэнэ 3.Г.Энх-Амгалан
Эмэгтэй: 1.Ц.Оюунсайхан 2.Б.Равжир 3.Э.Ариунцэцэг
Пара, эрэгтэй: 1.А.Дөлгөөн 2.Ж.Бүрэнтөгс 3.Н.Булган
Пара, эмэгтэй: 1.С.Оюундарь 2.Л.Гэрэлцэцэг 3.Ц.Оюунтуул
Баг, эрэгтэй: 1.E.Номин-Эрдэнэ ахлагчтай “Аграват” баг 2.Б.Батзолбоо ахлагчтай Brainstorm баг 3.Ш.Анхбаяр ахлагчтай “Нэгдэл” баг
Баг, эмэгтэй: 1.X.Онолбаатар ахлагчтай Завхан аймгийн баг 2.Б.Шижиртуяа ахлагчтай “Brainstorm” баг 3.Б.Гэрэлээ ахлагчтай “Ubpassport” баг.
Алслагдсан багийн иргэдэд уушгины эмгэг илрүүлэх үзлэг хийнэ
Дорнод аймгийн Хэрлэн сумын алслагдсан багийн иргэдэд уушгины эмгэг илрүүлэх үзлэг хийхээр болжээ.
Үзлэг нэгдүгээр сарын 13-25-ны өдрүүдэд үргэлжилнэ. Ковидын дараах уушгины эмгэг илрүүлэх рентген, сүрьеэгийн хавьтлын илрүүлэг үзлэг болон коронавируст халдварын эсрэг урьдчилан сэргийлэх вакцинжуулалтын ажлыг зохион байгуулж Хэрлэн сумын 1, 2, 3, 5, 8 дугаар багийн иргэдэд үйлчлэх юм.
Хоёрдугаар багийн иргэдийг 13,14-ний өдрүүдэд Жуковын музейн хажууд хоёрдугаар цэцэрлэгийн салбарт хүлээн авч үйлчлэх аж.
Увс аймгийн Ховд сумын харьяат бөх, даян аварга Н.Батсуурь Шинэ үндсэн хуулийн 30 жилийн ойн барилдаанд оролцохоор очсон нь маргаан дагуулав.
Учир нь тэрбээр тус барилдааны бүртгэл дуусахаас өмнө бүртгүүлээгүй. Цахим хуудсаараа дамжуулан барилдахаа илэрхийлээд байсан юм.
Н.Батсуурь барилдах гээд МҮБХ-той удтал маргалдав. Энэ бүхний эцэст МҮБХ-ноос түүнийг барилдуулахгүй байхаар шийдвэрлэлээ.
Ховд аймгийн Онцгой комиссын дэргэдэх “Шуурхай штаб” энэ сарын 12-ны өдөр хуралдаж, цаг үеийн асуудлаар хэд хэдэн шийдвэр гаргалаа.
Тодруулбал, коронавирусний халдварын тархалтаас сэргийлэх үүднээс аймаг, сумдын удирдлагуудад “Цагаан сарын баяр”-ыг зөвхөн гэр бүлийн хүрээнд тэмдэглэх үүрэг чиглэл өгөв. Мөн олон нийтийг хамарсан арга хэмжээ, соёл урлаг, спортын тэмцээн, уралдаан зохион байгуулахыг ирэх хоёрдугаар сарын 7-ны өдөр хүртэлх хугацаанд хориглосон байна.
Үүнээс гадна иргэн, аж ахуйн нэгж, төрийн байгууллагууд халдвар хамгааллын дэглэмийг сайтар баримталж ажиллах, шинжилгээ авах нэг цэгийн үйлчилгээний үйл ажиллагааг эрчимжүүлэх, халаалт дулаан хангамжийг сайжруулах талаар холбогдох байгууллага, мэргэжилтнүүдэд үүрэг чиглэл өглөө гэж Ховд аймгийн ЗДТГ-аас мэдээллээ.
Meditalk x MyColorLab-ын цахим хурлын үеээр.
Монголд анх удаа Солонгосоос хувийн өнгө оношилгоог цахимаар хийлээ.
Хувийн өнгө гэдэг нь тухайн хүний арьсны өнгө, дүр төрхтэй нийцсэн, илүү дур булаам дүр төрхийг бий болгоход тусалдаг өнгийг хэлдэг. K-beauty дэлхий даяар алдартай болохын хэрээр Солонгос дахь гоо сайхны чиг хандлагад “Хувийн өнгө” буюу “Personal Color” гэх нэр томьёо эрчимтэй хэрэглэгдэж, хамгийн тохиромжтой хувцасны өнгө, уруулын будаг, нүдний тень, үсний өнгө зэргийг тухайн хүнд нь зориулан тодорхойлж өгөхөд ашигладаг чухал хүчин зүйл болжээ.
Хувийн өнгө загварын ертөнцийг дагуулж, Швед профессор Иохан Иттен (1888-1967) өнгийг улирлуудаар илэрхийлсэн бүтээлээ танилцуулсны дараа 1981 онд АНУ-ын иргэн Кэрол Жексон “Color Me Beautiful” номоо хэвлүүлснээр Европ, Японд дэлгэрчээ.
Зургийг transformwithcolor.com -оос.
Солонгост улс төрчид төдийгүй олон алдартнууд хувийн өнгөний зөвлөгөө авч, мөн олон нийт ч хувийн өнгө оношилгоо хийлгэдэг болсон.
Солонгосын гоо сайхан, анагаах ухааны Unthink компанийн Meditalk багийнхан хувийн өнгө дасгалжуулалтын MYCOLORLAB брэндтэй хамтран Солонгос улсаас анх удаа онлайн хувийн өнгөний зөвлөгөөг өглөө. Энэхүү онлайн зөвлөгөөнд Монголоос эмч, мэргэжлийн нүүр будагч, загвар зохион бүтээгч, дизайнер мэргэжилтэй эмэгтэйчүүд оролцож, урьдчилан явуулсан зургуудаас нь MYCOLORLAB-ын мэргэжилтэн өнгөний шинжилгээ хийж, хувь хүний өнгөний тухай ойлголт, оношилгооны аргуудын тухай санал бодлоо солилцож амжилттай зохион байгуулагдлаа.
MyColorLab-ын захирал хатагтай Хан Жи Вон. Ph.D компанийн танилцуулга видео.
Цахимаар явагдсан хувийн өнгөний зөвлөгөө нь MYCOLORLAB туршлагын дагуу оролцогчдын зураг, арьсны өнгийг төрөл бүрийн өнгүүдтэй нэгэн зэрэг харьцуулж урьдчилан шинжилснээрээ давуу талтай байв. Энэхүү систем нь хувийн өнгөний тухай ойлголтгүй байсан хүмүүст өөрсдийн арьсны шинж чанарыг бодитойгоор харах боломжийг олгосон. Ярилцлагадаа өөрт зохидог болон сонирхож буй өнгөнүүдийн талаар асуулт хариултын цагийг мөн гаргалаа.
Цахим хурлын үеээр.
Хувийн өнгө танигдаагүй Монгол улсад анхны хувийн өнгөний цахим шинжилгээ хийсэн нь оролцогчдод өөрийн дүр төрхөө тодорхойлох, өнгийг бодитойгоор харах боломжийг олголоо. Зөвлөгөө өгөх явцад оролцогчид зөвхөн би болон өнгө хоорондын хамаарлыг ойлгоод зогсохгүй, хүссэн дүр төрхөө бүтээхэд туслах өнгөний зөвлөгөөг хүлээн авсан бөгөөд энэ нь тэдэнд их таалагдсан.
Оролцогчдын сэтгэгдлээс:
Make Up Artist Нямцэцэг “Анх удаа өнгөөр тодорхойлуулж үзсэн нь их сонирхолтой байсан бөгөөд өөртөө итгэх итгэлийг нэмэгдүүлсэн.”
Эмч Үнэнгэрэл “Миний хувьд өөрийн арьсны өнгөө тодорхойлуулаад өөрт тохирох өнгөө олсон маань их сонирхолтой байлаа. Мөн өөрийн дуртай өнгө маань надад тохирох өнгө байсан уу гээд олон зүйлийг энэхүү цахим сургалтаас мэдэж авлаа.”
Дизайнер Баярмаа “Яг өөрийн арьсанд тохирсон өнгөө олох нь хүн бүр өөрөө чадах зүйл биш юм байна гэж бодлоо. Өмнө нь ийм өнгө зохидог энэ зохидоггүй гэж боддог байсан бол цахимаар оношлуулаад тэрхүү өнгөнүүдээ бататгаж авахаас гадна дүр төрх бүтээх тал дээр зөвлөгөө авсан нь их таалагдсан.”
MYCOLORLAB-ийн онлайн хувийн өнгө оношилгоонд гадаадад амьдардаг солонгосчууд хүртэл ордог нь заавал нүүр тулж уулзах бус цахим зөвлөгөө амжилттай хэрэгжүүлж байгаагийн нэг жишээ юм. MYCOLORLAB Ази хүмүүст чиглэн зөвлөх үйлчилгээгээ улам өргөжүүлэхээр төлөвлөж байна.
Хан Жи Вон. Ph.D
MyColorLab-ын Гүйцэтгэх захирал
Хувийн өнгө дасгалжуулагч
Ардчилсан намын төлөөллүүд цаг үеийн асуудлаар мэдээлэл хийлээ.
Тус намын дэд дарга Б.Гарамгайбаатар “Ардчилсан нам бодлогын шинжтэй, сөрөг хүчний үйл ажиллагаа явуулахаар төлөвлөж байна. АН-ын төрийн зүтгэлтнүүдийг гутаан доромжилж буй үйл ажиллагаанд цэг тавих зорилгоор ажлын хэсэг байгуулж байгаа.
30 гаруй жилийн хугацаанд намын гишүүдийн санаачилж хийсэн олон ажлыг үгүйсгэж байна. Залуу, дунд үеийнхэн түүхийг үнэн бодитоор нь мэдэх боломж цаг үргэлж хязгаарлагдаж эвгүй байдалд шилжлээ гэж үзэж байгаа. Тиймээс түүхийг үнэнээр нь бичиж иргэдэд хүргэх ажлыг хийнэ” гэлээ.
Нэг нам дангаараа ноёлсон үед Үндсэн хуулийн зүйл, заалт тунхаг болж үлддэг юм байна
АН-ын Ерөнхий нарийн бичгийн дарга Ч.Өнөрбаяр “Монгол Улсын бодлогыг хэн нэгэн гадна, дотноос заадаг биш дэлхийн бусад орнуудтай эн тэнцүү харьдаг бие даасан, энхийг эрхэмлэсэн гадаад бодлого явуулах суурь зарчмуудыг бид зарлан тунхагласан. Манай улс Ардчилсан үндсэн хуулиа баталснаар дэлхийтэй ойртсон байна.
Үндсэн хуулийг дээдлэх гэдэг нь төрийн ордонд залаатай байх, Ерөнхийлөгч болоод тангараг өргөхдөө ашигладаг зүйл биш. Ардчилсан Үндсэн хуультай байна гэдэг УИХ-ын гишүүн болоод тангараг өргөхөд ширээн дээр тавьдаг зүйл ч бас биш. Энэ бол төрийн хамгийн өндөр албан тушаалтнууд үйл ажиллагаандаа өдөр бүр мөрдлөг болгож байдаг, ард түмний оюуны үнэ зүйл юм.
Үндсэн хуулийг дээдлэх санаа хөсөрдөж, дээгүүр нь алхдаг болсон. Сонгогдож гарсны дараа хуулийг үгүйсгэдэг. Үндсэн хуульд төрийн эрх мэдэл харилцан хяналт тэнцвэртэй байна гэдгээр асуудал шийдэгддэггүй. Нэг нам дангаараа ноёлсон үед Үндсэн хуулийн зүйл, заалт тунхаг болж үлддэг юм байна.
Цаашид Үндсэн хуулийн тэнцвэр парламентад суудалтай улс төрийн бодит хүчний харилцаан дээр оршин тогтноно. Үүний тулд сонгуулийн тогтолцоог эргэж харах ёстой. 1,500 хүрэхгүй хүнтэй сум руу зардал гаргаад зам тавьж, хөрөнгө оруулалт хийдэг, УИХ-ын гишүүд тойрогтоо гээд хэдэн тэрбум төгрөгийг хуваарилдаг нь сонгуулийн тогтолцоотой холбоотой. Жалга довны улс төрөөс гарахгүй бол бид урагшаа том алхахгүй.
Парламентын гишүүдийн тоог хэн нэгэн тэнгэр харж байгаад тавьдаггүй. Энэ нь нийт сонгогчийн төлөөлөх чадвараар хэмжигддэг. 1992 онд Үндсэн хууль баталж байсан аргачлалаар бодох юм бол парламентын гишүүдийн тоо 120 орчим байх ёстой. Дэлхий нийтийн жишиг 130-140. Манай парламент давжаа байна.
Ингэхээр идэж, уух нь ихэснэ гэж ярьдаг. УИХ-ын гишүүнийг дарга гэж ойлгодог. Тэд бол ард түмний элч бөгөөд нийтийн ашиг сонирхлын төлөөлдөг. Төрийг цомхон байлгах тухай ярих гэж байгаа бол яамдын тоог цөөлөх хэрэгтэй. Өмнө нь есөн яамтай ажил хийж болоод байсан. Ашиггүй ажилладаг төрийн өмчит компаниудыг хувьчилмаар юм. Ер нь төр нь өөрөө компани, үйлдвэр бариад иргэдтэйгээ бизнес хийх гээд уралдаад байж таарахгүй. Олон яам, агентлаг бүгд том байшинтай байж биш бүгдийг нь нэг байшинд байж болно. Асуудлыг илүү ухаалгаар шийдэх олон санаа бий.
Харамсалтай нь энэ 30 жилийн хугацаанд Үндсэн хуулийн үзэл санааг бид бодитой амьдруулж чадсангүй” гэв.
|
|
Их Британийн хэвлэлүүд тус улсын Ерөнхий сайд Борис Жонсон 2020 оны тавдугаар сард буюу Англи улсад ковидын хатуу хөл хорио тогтоосон үед гэртээ олон хүн цуглуулж, хувийн үдэшлэг зохион байгуулсан талаарх баримтыг дэлгэсэн.
Тодруулбал, Ерөнхий сайдын нарийн бичиг Мартин Рейнольдс Засгийн газрын гишүүд болон ажилчдыг үдэшлэгт урьсан цахим шуудан илгээсэн нь баримтаар илчлэгдсэн. Цахим шууданд тэрээр үдэшлэг эхлэх цагийг тодорхой бичээд зочдыг “өөрийн уухыг хүссэн ямар ч алкоголиа авч ирж болно” гэдгийг дурдсан байжээ.
Тэгвэл Борис Жонсон лхагва гаригт “Даунинг-стрит №10” буюу Ерөнхий сайдын өргөөнд үдэшлэг зохион байгуулсан гэдгээ хүлээн зөвшөөрч, ковидын хатуу хөл хорионы журам зөрчиж, үдэшлэг зохион байгуулсандаа уучлалт хүссэн байна.
Борис Жонсон энэ талаар “Олон сая хүн сүүлийн 18 сарын хугацаанд маш их зүйлс золиосолсныг би мэднэ. Иргэд намайг болон миний удирдаж байгаа Засгийн газар дүрэм журмыг зохих ёсоор дагаж мөрддөггүй гэдгийг мэдээд бухимдаж байгааг ойлгож байна” гэсэн юм. Гэвч тэрээр өөрийнхөө үйлдлийг “Би үдэшлэгийг дүрэм журам, халдвар хамгааллыг сахисны үндсэн дээр зохион байгуулагдаж байгаа ажлын арга хэмжээ гэж бодсон” гэж өмгөөлсөн байна.
Улмаар Их Британийн хөдөлмөрийн намын дарга Кейр Стармер тэргүүтэй сөрөг хүчний улстөрчид Ерөнхий Сайд Борис Жонсоныг хийсэн үйлдэлдээ ёс зүйн хариуцлага хүлээж, огцрохыг шаарджээ. Ийнхүү Их Британийн улс төрийн хүрээнд Борис Жонсоныг Ерөнхий сайд болон эрх баригч Консерватив намын даргын албан тушаалаас огцруулах тухай асуудал хүчтэй яригдаж эхлээд байна.
Тухайлбал, парламент дахь Консерватив намын нөлөө бүхий гишүүн болох Сэр Рожер Гейл “Борис Жонсон улс төрийн хувьд аль хэдийн алхаж яваа үхсэн хүн болсон” гэжээ.
Эх сурвалж: The Guardian, Huffingtonpos
Энэ нэгдүгээр сарын 10-ны өдөр /2022.01.10/ Төв аймгийн нутаг дэвсгэрт хуш модноос нэг иргэн унаж нас барсан хэрэг гарчээ.
Тодруулбал, Булган аймгийн харьяат 29 настай эрэгтэй М нь Төв аймагт самар түүж яваад хуш модноос унаж, Мөнгөнморьт сумын эрүүл мэндийн төвд эмчлэгдэж байгаад нас барсан байна. Эх сурвалжийн мэдээллээр, “Өнгөрөгч 2021 оны арваннэгдүгээр сарын 25-ны өдөр /2021.11.25/ самар ирсэн байсан. Одоогоор Төв аймгийн цагдаагийн газар хэргийг шалгаж байна” гэжээ. Иймд иргэд самар унах цаг болоогүй үед самар түүх гэж явахгүй байх, болзошгүй аюулаас сэргийлэхийг анхааруулж байна.
Коронавируст халдварын цар тахлын нөхцөл байдал, хэрэгжүүлж буй хариу арга хэмжээний талаар Монгол Улсын Шадар сайд С.Амарсайхан Засгийн газрын ээлжит хуралдаанд танилцуулсан байна. Танилцуулгатай холбоотойгоор Засгийн газраас Улсын онцгой комисст зарим үүрэг даалгавар өгчээ.
Тодруулбал, гадаад орнуудаас ирж буй иргэдийг тусгаарлах байранд гурав хоног тусгаарлах шийдвэрийг цуцалж, гэрийн тусгаарлалтад гурав хоног байлгах. Мөн 0-5 насны хүүхэдтэй эцэг, эхэд гэрээсээ, цахимаар ажиллах нөхцөлийг бүрдүүлэх зэргийг Улсын онцгой комисст үүрэг болгосон байна.
2022 оны нэгдүгээр сарын 11-ний байдлаар нийт хүн амын 70 хувь нь нэгдүгээр тунд, 67 хувь нь хоёрдугаар тунд, 30 хувь нь гуравдугаар тунд тус тус хамрагджээ. Дөрөвдүгээр тунг 10247 хүн хийлгэсэн байна. Энэ сарын 7-ноос Монгол Улсын болон гадаадын 18-аас дээш насны иргэнийг сайн дурын үндсэн дээр коронавируст халдварын эсрэг вакцины дөрөвдүгээр тунд хамруулж эхэлсэн, иргэдийн вакцинд хамрагдах идэвх сайн байгааг Эрүүл мэндийн яам мэдэгдэж байна.