Month: January 2022

Казахстанд тайван жагсаалаар эхэлсэн эсэргүүцлийн хөдөлгөөний улмаас 225 хүн амиа алдсан. Цагдаа нар жагсаалд оролцсон иргэдийг эрэн хайх ажлаа үргэлжлүүлсээр байна. Цагдаа нарыг баривчилсан иргэдийг тамласан, зүй бусаар харьцсанд буруутгаж байна. Харин эрх баригчид иргэдэд тайван байхыг уриалсаар байгаа юм.

57 настай Асел бэртсэн тул эмнэлэгт хэвтэн эмчлүүлж байжээ. Цагдаа нар түүнийг авч явахыг хүссэн ч Асел алхаж чадаагүй тул түүнийг үлдээжээ. Нэг цагдаа түүнд “Дахин эсэргүүцлийн жагсаалд оролцвол ална шүү” хэмээн сүрдүүлсэн талаар сэтгүүлчид ярьсан байна.

1991 онд ЗХУ задарч, Казахстан тусгаар тогтнолоо зарласан юм. Үүнээс хойших хамгийн их цус асгаруулсан үйл явдал энэ сарын эхээр болов. Дэлхийд эрдэс баялгаараа дээгүүрт орох тус улсын иргэд байгалийн хийн үнийн өсөлтийг эсэргүүцэн жагссан юм.

Жагсаалын дараа цагдаа нар 10 мянга орчим иргэнийг баривчилжээ. Тус улсын прокурорууд 700 хүнийг алан хядах үйл ажиллагаа, хүн амины хэрэг, төрийн эргэлт гэсэн хэрэгт буруутган ял оноожээ. Иймд хүний эрхийн байгууллагууд эрх баригчдыг жагсаалд оролцсон хүн бүрд дарамт шахалт үзүүлж байна хэмээн буруутгаж байна. Учир нь фэйсбүүкээр үзэл бодлоо илэрхийлж, жагсаалыг дэмжсэн иргэдийг ч баривчилжээ.

Алматы хотын хүний эрхийг дэмжигч Бахытзан Торегозина “Хүчний байгууллагууд иргэдийг хэргээ хүлээ хэмээн дарамталж байна.” гэсэн бол нэг өмгөөлөгч үйлчлүүлэгчийнхээ хөлийн хөхөрсөн зургийг харуулж, цагдаа нар байцаах явцдаа үйлчлүүлэгчийг нь зодсон гэжээ.

Харин Алматы хотын цагдаа Салтанат Азирбек “Баривчилсан иргэдийг зодоогүй, тамлаагүй. Бүх зүйл тодорхой болсны дараа тэднийг суллана. Жагсаалын үеэр цагдаа нар руу дайрсан этгээдүүд мэргэжлийн хүмүүс байсан” гэжээ.

Энэ сарын 4-нд тайван байдалтай эхэлсэн жагсаал 5, 6-ны өдөр үргэлжилж, цагдаа нар иргэдийг тараах зорилгоор нулимс асгаруулагч хий хэрэглэсний дараа эмх замбараагүй байдал үүсжээ. Нүүрээ халхалсан хэсэг этгээдүүд хотын захиргааны байр руу дайрч, зам дагуух машинуудыг дэлбэлсэн. Тэдний нэрийг одоог хүртэл тогтоогоогүй байна.

Эх сурвалж: BBC

ДЭМБ–ын хамгийн том санхүүжүүлэгч АНУ тус байгууллагын шинэчлэлийг эсэргүүцэж байна. АНУ-ын засгийн газраас мэдэгдэхдээ, ДЭМБ нь ирээдүйн болзошгүй аюул, халдварт өвчин, цар тахлыг эсэргүүцэх чадвар сул байгаа учраас тус байгууллагыг санхүүжүүлэгч, “тусгай сан” байгуулсан нь дээр гэж үзжээ.

ДЭМБ–ын тогтвортой санхүүжилтийн ажлын хэсгээс гишүүн улсууд жил бүр төлөх шимтгэлийг нэмэгдүүлнэ гэж тус байгууллагын энэ оны нэгдүгээр сарын 4-ний тайланд дурджээ. Энэхүү төлөвлөгөө нь ДЭМБ-т цар тахлын үеэр хөндлөнгөөс нөлөөлөх, эрх мэдлийг нь хязгаарлах гэсэн оролдлогуудыг таслан зогсоох өргөн хүрээтэй шинэчлэлийн үйл явцын нэг юм гэж тайлбарлажээ.

Гэвч АНУ-ын засгийн газар энэхүү шинэчлэлийг эсэргүүцэж байна. Үүний оронд хандивлагчдын шууд хяналтад байдаг, тусдаа сан байгуулах нь зүйтэй гэж үзжээ. ДЭМБ–аас нийтлэгдсэн тайланд гишүүн орнуудын заавал төлөх шимтгэлийг 2024 оноос эхлэн аажмаар нэмэгдүүлэх шаардлагатай.

Ингээд 2028 он гэхэд ДЭМБ–ын үндсэн төсөв буюу 2 тэрбум долларын тал хувийг бүрдүүлнэ гэж тус баримт бичигт дурдсан байна. ДЭМБ–ын үндсэн төсөв нь дэлхий даяар тахал өвчинтэй тэмцэх, эрүүл мэндийн тогтолцоог бэхжүүлэхэд чиглэгддэг. Мөн халуун орны өвчин, томуу зэрэг дэлхий даяар тулгарах тодорхой сорилтуудыг даван туулахаар жил бүр нэг тэрбум орчим доллар нэмж цуглуулдаг байна. ДЭМБ нь гишүүн орнуудаас гадна Билл Мелинда Гейтс сан зэрэг буяны байгууллагуудаас санхүүжилт авдаг нь ДЭМБ–ыг санхүүжүүлэгчдийн дэвшүүлсэн тэргүүлэх чиглэлд анхаарлаа төвлөрүүлж, асуудал буруу тийш эргэхэд санхүүжүүлэгчдээ шүүмжлэх чадваргүй болж байна гэж АНУ буруутгажээ.

ДЭМБ–ын шинэчлэлийн талаар зөвлөгөө өгөхөөр томилогдсон хэсгээс, ДЭМБ–ын “хараат бус байдал алдагдсан тул төсвийг нь 75 хувь хүртэл нэмэгдүүлэхийг уриалсан юм. Тэгвэл Герман, Африк, Өмнөд Ази, Өмнөд Америк, Арабын ихэнх орнууд ДЭМБ–ын уг төлөвлөгөөг дэмжиж байгаа тухай Ройтерс агентлаг мэдээлжээ.

Уг саналыг ирэх долоо хоногт ДЭМБ–ын гүйцэтгэх зөвлөлийн хурлаар хэлэлцэх тодорхой тохиролцоонд хүрэх магадлал бага байгаа аж. Тэгвэл ДЭМБ–ын шийдвэр гаргах дээд байгууллага болох Дэлхийн эрүүл мэндийн ассамблейн хурлаар уг асуудал үргэлжлэн яригдах төлөвтэй байна.

Номхон далай дахь алслагдсан Кирибати арал дээр цар тахал эхэлснээс хойш анх удаа хөл хорио тогтоолоо. Учир нь тус арал дээр олон улсын нислэгээр ирсэн зочдоос “Covid-19”-ийн тохиолдол илэрчээ. Тодруулбал, нэгдүгээр сарын 14-нд Фижи улсаас ирсэн нислэгийн 54 зорчигчоос 36 нь эерэг гарсан байна. Бүх зорчигч бүрэн тунт вакциндаа хамрагдсан байжээ.

Өнгөрсөн долоо хоногийг хүртэл Кирибати арал дээр халдварын тохиолдол ердөө хоёрхон байсан.

Кирибати нь 122.391 хүн амтай бөгөөд Хойд Америкаас 5000 ткм зайд, Номхон далайн тэг дунд оршдог гэхэд болно. Нийт хүн амын хэдэн хувь нь вакцинд хамрагдсан нь одоогоор тодорхойгүй.

Хөл хориог Бямба гаригаас эхлэн тодорхойгүй хугацаагаар тогтоосон байна. Хөл хорионы журмын дагуу иргэд онц шаардлагагүй бол гэрээс гарахгүй, гарсан 06:00-14:00 цагийн хооронд гарна гэв.