Month: August 2021

Categories
мэдээ нийгэм

​Нийслэлийн 171 хорооны Засаг дарга нарыг төрийн албаны ёс зүйн сургалтад хамруулав


Улаанбаатар хотын Захирагчийн 2020-2024 оны үйл ажиллагааны хөтөлбөрт “Төрийн албаны хүний нөөцийг чадваржуулах, төрийн албан хаагчийн сургалтын байгууллагын материаллаг орчныг сайжруулах, орчин үеийн шаардлагад нийцсэн сургалтын орчин, дэд бүтэц бий болгох”, “НЗДТГ-ын дэргэдэх Сургалт, судалгааны төвийн үйл ажиллагааг бэхжүүлнэ” хэмээн тусгасан.

Түүнчлэн нийслэлийг 2021-2025 онд хөгжүүлэх таван жилийн үндсэн чиглэлд “Мэргэшсэн, чадварлаг, иргэндээ үйлчилдэг, тогтвортой төрийн албыг бэхжүүлж, төрийн үйлчилгээний үр дүн, үр нөлөөг дээшлүүлнэ” гэсэн байдаг.

Энэ дагуу нийслэлийн Сургалт, судалгааны төвөөс алба хаагчдын сургалтын хэрэгцээг тодорхойлж, агуулга боловсруулан, сургалтуудыг үе шаттай зохион байгуулж буй.

2017 оноос хойш нийслэлийн нутгийн захиргааны байгууллагын алба хаагчдад зориулан үндсэн болон сэдэвчилсэн сургалтын нийт 25 төрлийн гарын авлага, сургалтын агуулга боловсруулсан. Ийнхүү давхардсан тоогоор 7,000 гаруй алба хаагчийг сургалтад хамруулсан байна.

Харин өчигдөр “Монголчуудын ёс суртахууны өгөгдлийг танин мэдэх, төрийн алба хаагчийн ёс зүйг тогтоон хэвшүүлэх” сэдэвт сургалтыг зохион байгуулж, нийслэлийн 171 хорооны Засаг дарга нарыг хамруулжээ.

Сургалтаар Монгол Улсын шинжлэх ухааны гавьяат зүтгэлтэн, хууль зүйн шинжлэх ухааны доктор, профессор, академич С.Нарангэрэл монголчуудын ёс суртахууны өгөгдөл, үнэт зүйл болоод төрийн албан хаагчийн ёс зүйн тухай сонирхолтой илтгэл танилцуулж, хэлэлцүүлэв.

Оролцогчид дараагийн сургалтуудаар шинэчлэн баталсан хууль болон албан хэрэг хөтлөлтийн талаар мэдээлэл авах хүсэлтэй байгаагаа илэрхийлсэн юм гэж НЗДТГ-ын Хэвлэл мэдээлэлтэй харилцах хэлтсээс мэдээллээ.

Categories
мэдээ нийгэм

Тайм тауэр хотхоны орц, гарцыг хааж, хашаа барьж байсан үйл ажиллагааг зогсоожээ

Баянзүрх дүүргийн 26 дугаар хороонд байрлах Тайм тауэр хотхоны орц, гарцыг хааж, нийтийн эзэмшлийн авто зам дээр хашаа барих гэж байгаа талаар тус хотхоны оршин суугчид өчигдөр мэдээлэл хийсэн.

Үүнтэй холбоотойгоор нийслэлийн Газар зохион байгуулалтын албанаас нийслэлийн Баянзүрх дүүргийн 26 дугаар хороонд байрлах “Тайм тауэр” хотхоны орц гарц, нийтийн эзэмшлийн зам талбайг хааж зөвшөөрөлгүйгээр хашааны суурийн бетон цутгаж байгаа “Камдер” ХХК-ийн үйл ажиллагааг зогсоож, барьсан суурийг албадан буулгаж газар чөлөөлөх ажлыг гүйцэтгэж байна.

Categories
амьдралын-өнгө мэдээ

Үер усны аюулаас сэрэмжлүүлж байна

Энэ амралтын өдрүүд буюу наймдугаар сарын 21-22-нд нутгийн хойд хэсгээр үргэлжилсэн бороо орох тул үерийн болон аюултай түвшин даван үерлэж буй Хөвсгөлийн уулсаас усжих Дэлгэрмөрөн, Эг, Бэлтэс, Бүгсий, Үүр болон Сэлэнгэ мөрний эхээр усны түвшин тухайн хугацаанд орсон хур борооны эрчимшил хэмжээнээс хамааран огцом нэмэгдэх хандлагатай байна.

Иймд дээрх голуудын сав дагуу нутаглаж буй ард иргэд, аялж зугаалж яваа хүмүүсийг үерийн аюулаас урьдчилан сэргийлэхийг онцгойлон анхааруулж байна.

Түүнчлэн үерийн ус зайлуулах суваг шуудуу татах, далан хашлага барих зэргээр өөрийн болон бусдын амь нас, эрүүл мэнд, эд хөрөнгийг болзошгүй гамшиг ослоос урьдчилан сэргийлэх, хот суурин газрын үерийн далангийн ус зайлуулах хоолойгоор ус чөлөөтэй урсах нөхцөлийг бүрдүүлэхийг орон нутгийн холбогдох байгууллага анхааралдаа авч урьдчилан арга хэмжээ авахыг зөвлөж байна.

Categories
мэдээ нийгэм

НӨАТ-ын сугалааны тохирол маргааш болно

НӨАТ-ын урамшууллын 2021 оны наймдугаар сарын сугалааны тохирлын нэвтрүүлэг наймдугаар сарын 22-ны ням гаригт Боловсрол телевизээр орон даяар шууд явагдана.

Иргэн та 2021 оны долдугаар сарын 1-31-ний өдөр хүртэлх хугацаанд худалдан авалт хийсэн цахим төлбөрийн баримтаа 2021 оны наймдугаар сарын 21-ний өдрийн 23 цаг 59 минутаас өмнө Цахим төлбөрийн баримтын системд бүртгүүлснээр НӨАТ-ын урамшууллын сугалаанд хамрагдан азтан болох боломжтой.

Categories
мэдээ нийгэм цаг-үе

УОК: Энэ сарын 21-нээс хойш аймаг, сумдад хурдан морины уралдаан, бөхийн барилдааныг хориглолоо

Өвөлжилтийн бэлтгэл ажлыг хангах, намрын ургац хураалтын ажлыг зохион байгуулах, хичээл сургуулийн үйл ажиллагааг эхлүүлж, тасралтгүй зохион байгуулах зэрэг чухал үйл явдал тулгамдсан энэ үед морь уралдуулах, бөх барилдуулах зэрэг халдварын эрсдэлтэй олон нийтийг хамарсан үйл ажиллагааг наймдугаар сарын 21-нээс хойш зохион байгуулахгүй байх үүрэг бүхий албан бичгийг аймгуудын засаг дарга нарт УОК-оос хүргүүлжээ.

Categories
мэдээ нийгэм цаг-үе

БҮТ: Хими болон нийгэм судлал хичээлийн шалгалтын сэдэв задарсан гэх мэдээлэл нь худал

БҮТ-өөс шалгалтын материал задарсан, шалгалт эхлэхээс өмнө шалгалтын материал нийгмийн сүлжээнд зураг хэлбэрээр байршсан гэсэн мэдээллийн хариуд мэдэггдэл аргасныг бүрэн эхээр нь хүргэж байна.

МЭДЭГДЭЛ

Их дээд сургууль, коллежид элсэн суралцах хүсэлтэй иргэдээс авдаг “Элсэлтийн ерөнхий шалгалт”-ыг 2021 оны наймдугаар сарын 19, 20, 21, 22- ны өдрүүдэд орон даяар нэгэн зэрэг зохион байгуулж байна.

Эдгээр өдрүүдэд шалгалттай холбоотой буруу ташаа ойлголт төрүүлсэн, иргэдийг төөрөгдүүлсэн зарим мэдээлэл олон нийтийн дунд гарч байна. Тухайлбал, 2021 оны наймдугаар сарын 20-ны өдөр зохион байгуулсан хими болон нийгэм судлал хичээлийн шалгалтын материал задарсан, шалгалт эхлэхээс өмнө шалгалтын материал нийгмийн сүлжээнд зураг хэлбэрээр байршсан гэсэн мэдээлэл гарсан байна.

Элсэлтийн ерөнхий шалгалтын сэдэв, даалгавар нь Боловсрол, шинжлэх ухааны яамны албаны нууцын жагсаалтад хамаарагддаг бөгөөд сэдэв задрах, нууцлал алдагдах боломжгүй бөгөөд сэдэв, даалгавартай холбогдох ажил Нийслэлийн цагдаагийн газрын нийтийн хэв журам хамгаалах газар, Тагнуулын ерөнхий газрын тусгай шуудангийн албаны бүрэн хяналт, хамгаалалт дор хийгддэг.

Хими болон нийгэм судлал хичээлийн шалгалтын сэдэв задарсан гэх мэдээлэл нь худал бөгөөд зарим нэг ашиг хонжоо хайгч этгээдүүд шалгалт өгч байгаа иргэдийн сэтгэл зүйг ашиглаж, зохион байгуулалттайгаар нийгэмд бухимдал үүсгэх, өөр зорилго агуулан мэдээлэл түгээж байна.

Харин “Элсэлтийн ерөнхий шалгалт зохион байгуулах журам”-д шалгалтын үеэр ашиглахыг хориглосон эд зүйлс тухайлбал, гар утас нууж авч ороод шалгалтын материалын зураг авч шалгалтын дэг зөрчсөн шалгуулагчдын дүн оноог журамд заасны дагуу хүчингүй болгох арга хэмжээ авах болно.

Иймд нийт шалгуулагч, эцэг эх, асран хамгаалагчдад анхааруулахад дээр дурдсан худал ташаа мэдээлэлд итгэж өөрийн итгэл үнэмшил болоод бие, сэтгэл санаагаар хохирохгүй байхыг сануулж, шалгуулагчид зөвхөн өөрөө өөртөө итгэж мэдлэг чадвараа бодитой үнэлүүлж шалгалтад амжилттай дүн үзүүлэхийг хүсье.

Categories
мэдээ үндэсний-бөx

Хэнтий, Увс аймгуудын цол олгох бөхийн барилдаанд Б.Баянмөнх, О.Эрдэнэбат нар түрүүлжээ

Хэнтий, Увс аймгуудын цол олгох, эрэмбэ тогтоох 128 бөхийн барилдаан өчигдөр/2021.08.20/ боллоо. Засгийн газрын өгсөн чиглэл, УОК-ын шийдвэрээр гадаа талбайн спортын арга хэмжээ, тэмцээн уралдааныг үзэгчгүй, халдвар хамгааллын дэглэм дор, холбогдох хүмүүсийн зөвшөөрлөөр зохион байгуулахаар болсон билээ.

  • Хэнтий аймаг: Баян-Адарга сумын харьяат аймгийн харцага О.Эрдэнэбат түрүүлж, “Аймгийн арслан” цол хүртсэн бол мөн тус сумын харьяат сумын заан Б.Түвшинтөгс үзүүрлэж, “Аймгийн заан” цол хүртлээ. Их шөвөгт Баянхутаг сумын харьяат аймгийн хурц арслан С.Ариунбилэг, Жаргалтхаан сумын харьяат аймгийн арслан Ш.Отгонтөгс нар үлджээ.

Шинээр цолны болзол хангасан бөхчүүдэд ирэх цагаан сараар цолыг нь олгоно.

  • Увс аймаг: Тэс сумын харьяат аймгийн харцага Б.Баянмөнх түрүүлж, “Аймгийн арслан” цол хүртсэн бол Давст сумын харьяат аймгийн арслан Б.Сэр-Од үзүүрлэжээ. Их шөвөгт Малчин сумын харьяат цэргийн начин Т.Батсүрэн, Тэс сумын харьяат аймгийн заан О.Түмэн нар үлджээ.

Categories
мэдээ нийгэм цаг-үе

Ялалтын талбай дээрх ногоочид түрээсгүйгээр худалдаа эрхлэхээр боллоо

Ялалтын талбай дээр ногоочид өдрийн 60 мянган төгрөгийн түрээсээр зогсдог байсан. Харин үүнийг больж ногоочдод түрээсгүйгээр талбай гаргаж өгөхөөр эцэслэн шийдвэрлэлээ хэмээн ШӨХТГ-ын дарга Б.Бат-Эрдэнэ мэдээллээ.

ШӨХТГ-аас хүнсний ногоо тариалагч иргэд, өрх, ААН-үүдийн бизнесийн үйл ажиллагааг дэмжиж ногоочдод тулгараад буй талбайн асуудал, чөлөөт худалдаа, цагийн хязгаарлалтад уян хатан байж сонгох боломжийг олгох тухай саналыг Нийслэлийн засаг дарга бөгөөд Улаанбаатар хотын захирагч Д.Сумъяабазарт 2021 оны долдугаар сарын 23-ны өдөр хүргүүлсэн юм.

Categories
гадаад мэдээ

“​Тесла” компани ирэх онд хүн дүрст робот гаргахаар болсноо зарлажээ

“Tesla Bot” нэртэй хүн дүрст роботыг ирэх онд зах зээлд танилцуулахаар бэлдэж байгаагаа тэрбумтан Илон Маск өчигдөр зарлажээ.

Elon Musk says Tesla likely to launch humanoid robot prototype next year - ABC News

1.7 метр өндөр, 56 кг жинтэй уг робот нь “нэгэн хэвийн давтамжтай, аюултай” ажлыг хүний өмнөөс гүйцэтгэх үүрэгтэй байхыг Тесла компанийн “AI Day” арга хэмжээний үеэр Маск хэлсэн байна.

Робот нь “Тесла” компанийн автомат жолоодлогын системтэй нэг ижил технологитой, ижил чиптэй зохион бүтээгдэж байгааг тэр бас мэдээлжээ.

Гэхдээ Маск өчигдрийн арга хэмжээний үеэр ямар нэг бодитой зүйл үзүүлээгүй байна. Харин туршилтын загварын оронд роботын өмсгөлтэй хүнийг бүжиглүүлж үзүүлсэн нь үзэгчдийг гайхшруулжээ.

Шинэ бүтээгдэхүүн бүрээ хэтрүүлж сурталчилдгаараа Илон Маск алдартай.

“Тесла” компани жолоочгүйгээр өөрөө явдаг автомат удирдлагын системийг автомашинууддаа нэвтрүүлсэн байдаг. Гэвч сүүлийн үед автомат жолоодлогын систем алдаатай ажиллаж, осол гаргасан олон тохиолдол бүртгэгдсэн тул АНУ-ын эрх баригчид шалгаж эхэлсэн юм.

“Autopilot” нэртэй энэхүү системийн ажиллагааг мөрдөн шалгах ажил энэ долоо хоногийн Даваа гарагт эхэлжээ. Шалгалтад Теслагийн үйлдвэрлэсэн 765,000 автомашиныг хамруулахаар төлөвлөсөн нь 2014 оноос хойших бараг бүх загвар гэсэн үг юм.

2018 оноос хойш “Тесла”-ийн автомат жолоодлогын системийн гаргасан 11 ослын улмаас 17 хүн бэртэж, нэг хүн амиа алдсан тухай АНУ-ын Үндэсний Замын Хөдөлгөөний Аюулгүй Байдлын Алба мэдээлжээ.

Categories
мэдээ нийгэм

“Өдрийн сонин”-ы цахим хувилбарыг нэг өдрөөр ч захиалж унших боломжтой

Цахим Өдрийн сонины нэг өдрийн захиалгын төлбөр 1000 төгрөг боллоо. Хэрвээ та “Өдрийн сонин”-д нийтлэгдсэн хөрөг, ярилцлага, сурвалжлага, зарлал, тендерийн зар зэрэг өөрт хэрэгтэй мэдээ мэдээллээ уншихыг хүсвэл ЦАХИМ ӨДРИЙН СОНИН-ыг нэг өдрөөр захиалахад л хангалттай. Цахим Өдрийн сонины архивт Өдрийн сонины 2009 оны нэгдүгээр сараас хойших бүх дугаарууд хадгалагдаж байгаа юм. Мөн “Covid-19” цар тахлын өндөржүүлсэн бэлэн байдал үргэлжилж буй энэ үед та бүхэнд өдөр тутмын “Өдрийн сонин”-ыг эх орныхоо аль ч сум, багаас цаашилбал дэлхийн ямар ч улсаас захиалан уншиж, бодитой эх сурвалжаар хангагдах боломж бүрдэнэ.

Цахим Өдрийн сониныг захиалахын тулд www.admin.dnn.mn сайт руу ороод ЦАХИМ ӨДРИЙН СОНИН гэсэн товчлуур дээр дарахад “Төлбөрөө хэрхэн төлөх вэ”, “Сонин захиалах заавар” гэсэн хоёр сонголт гарч ирнэ. “Төлбөрөө хэрхэн төлөх вэ” сонголт дээр дарахад дараах боломжуудыг санал болгоно.

• Хэрэглэгчийн нэр, нууц үгээрээ нэвтэрч орон Голомт, Худалдаа хөгжлийн банк, Хаан банкны аль нэгээр картын гүйлгээ хийж шууд захиалан авах

• “Өдрийн сонин”-ы 1102028377 (Хүлээн авагчийн нэр: ӨДРИЙН МЭДЭЭ ХХК гэж бичих) гэсэн Голомт банкны данс руу төлбөрөө шилжүүлээд захиалан авах (Ингэхдээ төлбөр төлсөн баримтаа udriinsonin@admin.dnn.mn мэйл хаяг руу явуулах, эсвэл 70134164 дугаар руу факсаар илгээхийг сануулъя)

• Сонины редакци дээр өөрийн биеэр ирж төлбөрөө тушаан захиалан авах.

Үүний дараа “Сонин захиалах заавар” хэсэг дээр дарахад цахим сонин захиалах заавар, гарын авлага бусад шаардлагатай мэдээлэл дэлгэрэнгүй гарч ирнэ.

Нэг өдрийн захиалгын төлбөр 1000 төгрөг, нэг сарын захиалгын төлбөр 6000, жилийн 72000 төгрөгийн үнэтэй. Цахим сонинтой холбоотой мэдээллийг 99726725, 99130850, 91035588, 99115924 дугаарын утсуудаар холбогдож авч болно. Уншигчдын хувьд манай сонины архиваас мэдээ шүүх, аав, ээж, өвөө эмээ, удам судар, нутаг устайгаа холбоотой гарсан нийтлэл, сурвалжлагыг хувилж авах, тухайн үед өрнөж байсан үйл явдалтай холбоотой мэдээ сэлтийг эрдэм шинжилгээний ажилд ашиглах, түүхийн материал бэлдэхийн тулд “Өдрийн сонин”-ы тухайлсан өдрийн дугаарыг олж унших хүсэлт ихээр тавьдаг. Энэ бүх хүсэлтийг тань Цахим Өдрийн сонин биелүүлэх болно. “Өдрийн сонин” өглөө бүр тантай хамт.

www.admin.dnn.mn,

Twitter:DNN_MN, Facebook:DNN.MN

E-mail:udriinsonin@admin.dnn.mn

Лавлах утас: 99726725, 99130850