Month: May 2021

Categories
мэдээ нийгэм цаг-үе

А.Амарбат: Хоёр цагдаа коронавирусийн халдвар болон вакцинд хамрагдсанаас болж нас бараагүй


Увс аймгийн цагдаагийн газрын алба хаагчид коронавирусийн эсрэг вакцинд хамрагдсаны дараа амь насаа алдсан гэх мэдээлэл цахим орчинд тархсан. Бид энэ хэргийн талаар холбогдох хүмүүсээс тодруулсан юм. Увс аймаг дахь цагдаагийн газрын дарга, цагдаагийн хошууч А.Амарбатаас зарим зүйлийг тодрууллаа.

-Увс аймгийн цагдаагийн газрын алба хаагчид коронавирусийн эсрэг вакцинд хамрагдсанаас болж нас барсан гэх мэдээлэл зарим хэвлэл мэдээллийн байгууллагаар гарсан. Энэ талаар мэдээлэл өгөхгүй юү?

-Увс аймгийн цагдаагийн газрын алба хаагчид өнгөрсөн дөрөвдүгээр сарын 7-ны өдрөөс эхлэн коронавирусийн халдварын эсрэг вакцинд хамрагдаж эхэлсэн. Уг дархлаажуултанд нийт алба хаагчдын 96.5 хувь нь хамрагдаж, үлдсэн 3.5 хувь эрүүл мэндийн шалтгааны улмаас хамрагдаагүй. Манай цагдаагийн газрын хоёр ч алба хаагч өвчний улмаас таалал төгссөнд ар гэрийнхэнд нь гүн эмгэнэл илэрхийлье. Манай хамт олны хувьд ч ард иргэдийнхээ төлөө хоёргүй сэтгэлээр зүтгэж байсан эрэлхэг залуучуудаа алдсандаа харамсаж байна.Эхнийх нь манай Мөрдөн байцаах тасгийн мөрдөгч, цагдаагийн ахлах дэслэгч П нь биеийн байдал тааруу шалтгаанаар дөрөвдүгээр сарын 21-ний өдөр аймгийн нэгдсэн эмнэлэгт цөс, нойр булчирхайн архаг үрэвсэлтэй гэсэн оношоор хэвтэн эмчлүүлсэн. Хэвтэн эмчлүүлж байхдаа эмч нарын зөвлөгөөнөөр хоёр удаа оруулж, компьютер томографийн шинжилгээ хийлгэхэд онош тогтоогдоогүй, хоёр удаа коронавирус илрүүлэх PCR шинжилгээ авахад сөрөг гарсан.

-Аймгийн төвийн эмнэлэгтээ хэвтэн эмчлүүлж байгаад хот руу ирсэн юм уу?

-Аймгийн Нэгдсэн эмнэлэгт хэвтээд бие нь сайжраагүй тул дөрөвдүгээр сарын 28-ны өдөр Улаанбаатар хот руу эмчилгээ хийлгэхээр УНТЭ-рүү явсан. УНТЭ-т PCR шинжилгээ өгөхөд сөрөг гарсан. Улаан бүсээс ирсэн халуурч, бөөлжиж байсан шинж тэмдэгтэй учраас УНТЭ-т тусгаарлалтад орсон. Улмаар тавдугаар сарын 2-д УНТЭ-т байж байгаад нас барсан. Эрүүл мэндийн шалтгаанаар нас барсан тул задлан шинжилгээ хийгдсэн. Одоо шинжилгээний хариу хүлээж байна.

-Тэгвэл хоёр дахь талийгаачийн хувьд эрүүл мэндийн ямар шалтгаантай байсан юм бол?

-Хоёр дахь алба хаагч болох Л нь зүрх судасны өвчний улмаас зүрхэндээ “Стент” /тэлэгч/ тавиулах хагалгаа хийлгэж эмчийн байнгын хяналтанд байсан.Тус алба хаагч маань энэ сарын 4-ний өдөр гэртээ эрүүл мэндийн шалтгааны улмаас нас барсан харамсалтай явдал болсон. Тиймээс дээрх хоёр талийгаач нь коронавирусийн халдвар болон коронавирусийн эсрэг вакцинд хамрагдсаны улмаас нас бараагүй гэдгийг албан ёсоор мэдэгдье. Хэрэв ковидын улмаас нас барсан байсан бол шууд чандарлах ёстой байдаг. Харин талийгаачдыг ном ёсоор нь нутаглуулж байгаа.

-Талийгаачдын ар гэрийнхэнтэй холбоотой байгаа юу?

-Бид талийгаачийн ар гэрийнхэнтэй холбоотой байгаа. Одоо ажил явдал нь болоод хүнд хэцүү байхад нь буруу ташаа мэдээлэл явж байгаад их эмзэглэж байгаа. Тиймээс цар тахлын үед аливаа мэдээ, мэдээллийг нягтлахгүйгээр бусдад мэдээллэхгүй байхыг хүсье.

-Танай цагдаагийн газраас алба хаагчдаа вакцинд хамрагдахгүй бол ажлаас нь хална гэж сүрдүүлсэн гэх мэдээлэл гарсан байсан. Та энэ талаар тайлбар өгөхгүй юү?

-Тийм зүйл байхгүй. Манай цагдаагийн алба хаагчид бүгд сайн дурын үндсэн дээр дархлаажуулалтанд хамрагдаж байгаа. Ямар ч сүрдүүлсэн зүйл байхгүй гэдгийг албан ёсоор хэлье. Цар тахлын үед манай алба хаагчид ачааны хүндийг үүрч, хариуцлагатай ажиллаж байгаа гэю.

Н.Энхзаяа: Цагдаагийн алба хаагчийн биеийн байдал, амин үзүүлэлтүүдхэвийн байсан учир өөрийнх нь хүсэлтээр вакцинжуулалтад хамруулсан

Увс аймаг дахь цагдаагийн газрын вакцинжуулалтыг хариуцсан “Бат-Үржихүй” өрхийн эрүүл мэндийн төвийн эмч Н.Энхзаяагаас тодрууллаа.

-Танай өрхийн эрүүл мэндийн төв Увс аймаг дахь цагдаагийн алба хаагчдын дархлаажуулалтыг хариуцсан байна. Тус газарт ажиллаж байсан талийгаач Б.л-ийн хувьд вакцины нэгдүгээр тундаа хамрагдахад биеийн байдал нь хэр байсан бэ?

-Манай төвөөс Увс аймгийн цагдаагийн алба хаагчдын дархлаажуулалтыг хариуцсан. Тухайлбал, би 2021 оны дөрөвдүгээр сарын 7, 8-ны өдрүүдэд цагдаагийн газар дээр алба хаагч нарт коронавирусийн эсрэг Веросел вакцин хийсэн. Ингээд эхний өдөр буюу дөрөвдүгээр сарын 7-ны өдөр талийгаач Б.Л гэх хүн ирээд “Зүрхэндээ стент тавиулсан юм. Вакцин хийлгэж болох уу” гэж асуусан. Тухайн үед би түүнд “Нарийн мэргэжлийн зүрх судасны эмчээсээ зөвлөгөө авч ирээрэй” гэж хэлж явуулсан. Ингээд 9-ний өдөр Улаангом сумын Ерөнхий боловсролын дөрөвдүгээр сургууль дээр вакцин хийж байхад талийгаач Б.Л вакцин хийлгэхээр ирсэн. Би тэр хүнээс “та эмчээсээ асуусан уу” гэхэд “зүгээр гэнэ ээ хурдан хийгээд өгчих ахын дүү” гэж хэлж байсан. Тухайн үед талийгаач Б.Лхагважавын даралт, пульс, сатурацийг үзэхэд хэвийн байсан тул тусгай программд бэлтгэсэн коронавирустай холбоотой тухайн үеийн биеийн байдлыг тодорхойлох асуумжыг талийгаачаас авсан. Нэмэлтээр амьсгаадах, зүрх дэлсэх, цээж бачимдах, зүүн гар дагасан өвдөлттэй байгаа эсэхийг нь асуусан.

-Тухайн үед ямар нэгэн зовиуртай байсан уу?

-Цээжний зүүн талд болон хөл гарын эрээн булчингууд өвдөж байгаа эсэх, ямар нэгэн зовуурь өгч байна уу гэж асуусан. Энэ бүх асуултуудад талийгаач нь “үгүй” гэсэн хариулт өгч “одоогоор надад ямар нэгэн зовиур байхгүй” гэж хэлсэн. Тиймээс ерөнхий үзлэгтээ орсон.

-Талийгаачийн хувьд зүрх, судасны өвчтэй байсан гэлээ. Биеийн ерөнхий байдал нь хэр байсан бэ?

-Талийгаачийн биеийн ерөнхий байдал сайн, ухаан санаа саруул, орчиндоо харьцаатай хөдөлгөөн идэвхтэй, нүүр царайны байдал тайван, уушги чагналтаар хоёр талдаа цулцангийн амьсгалтай, зүрхний авиа тод хэм жигд, хэвлий тэмтрэхэд зөөлөн байсан.Үзлэг дуусч дээрх хүний биеийн байдал, амин үзүүлэлтүүд хэвийн байсан учир өөрийнх нь хүсэлтээр вакцинжуулалтад хамруулсан.

Вакцин хийсний дараа 30 минутын хугацаанд ажиглалтын байранд тухайн хүнийг байлгаж ажигласан. Тэр үед ямар нэгэн сөрөг шинж тэмдэг илрээгүй тул вакцин хийсний дараа толгой өвдөх, булчин өвдөх, дотор муухайрах, ямар нэгэн хөл гарын үеэр өвдөх, архаг хууч өвчин сэдрээдэг учир деклоденк, парацетамол ууж болно. Ибупрофен ууж болохгүй, халуун бүлээн шингэн зүйл ойр ойрхон уух, архи дарс хэрэглэж болохгүй халуун ногоотой шарсан хуурсан хоол хэрэглэж болохгүй гэсэн зөвлөгөө өгсөн.

-Талийгаачийн хувьд ковидын вакцины хоёрдугаар тундаа хамрагдахад биеийн байдал нь хэр байсан бэ?

-2021 оны тавдугаар 4-ний өдөр 10 цагийн орчимд талийгаач нь цагдаагийн газар дээр коронавирусийн эсрэг веросел вакцины хоёрдугаар тунг хийлгэхээр ирсэн. Би вакцины дараах хариу урвалууд ямар байдлаар илэрсэн талаар ерөнхий асуумжийг программын дагуу нэг бүрчлэн асуусан. Тухайн үед ямар нэг хариу урвал илрээгүй гэж үгүйсгэсэн. Нэмэлтээр зүрхээр хатгуулах, амьсгаадаж байна уу, хөл гарын эрээн булчингаар өвдөж байна уу, зүрхээр дэлсэж өвдөж байгаа эсэх асуултуудыг нэг нэгээр тавихад “өөр ямар нэгэн зовиур алга, нэгдүгээр тунгийн вакцинжуулалтад ямар нэгэн зовуурь илрээгүй тул хоёрдугаар тунг хийлгэмээр байна” гэж хэлсэн. Ерөнхий үзүүлэлт болох даралт, пульс, сатурацийг үзэхэд хэвийн байсан тул вакцинжуулалтад өөрийнх нь хүсэлтээр хамруулсан.

Вакцин хийлгэсний дараа 30 минут ажиглалтын байранд сувилагч Жаргалантуул, Чимгээ нар ажиглахад сөрөг шинж тэмдэг илрээгүй. Дээрх зөвлөгөөнүүдийг дахин өгөөд явуулсан. Өөрт нь ямар нэгэн зовиур илэрсэн тохиолдолд яаралтай 103-д хандаарай гэж зөвлөсөн.

-Талийгаач зүрхний стент тавиулаад хэр удаж байсан юм бол?

-Талийгаачийн хувьд зүрхний стент тавиулаад таван жил болж байгаа гэж хэлсэн. Вакцин хийх үед зүрхний архаг дутагдлын хүндрэл байгаагүй, биеийн ерөнхий байдал сайн ухаан санаа саруул, орчиндоо харьцаатай хөдөлгөөн идэвхтэй, амин үзүүлэлтүүд хэвийн байсан ба Веросел вакцины хориглох заалтад хамаарахгүй байсан тул өөрийнх нь хүсэлтээр вакцинд хамруулсан болно.

П.БАТЗАЯА

Categories
мэдээ улс-төр цаг-үе

УИХ-ын гишүүд долоо дахь өдрөө өлсгөлөн зарлаад байна

Сонгуулийн ерөнхий хорооны шийдвэрийг эсэргүүцэн, АН-ын бүлгийн зарим гишүүд тавдугаар сарын 5-ны оройноос эхлэн төв талбай дээр нойтон өлсгөлөн зарлаж буй юм.

Өчигдөр орой өлсгөлөн зарлаж буй гишүүд дээр үзлэг хийсэн эмч нар очиж, УИХ-ын гишүүн С.Ганбаатарын сахар унасан тул зайлшгүй шаардлагаар эмнэлэг рүү шилжүүлэх хэрэгтэй гэсэн. Харин С.Ганбаатар гишүүн эмнэлэг рүү явахгүй, эндээ байна хэмээн хариу мэдэгдсэн юм.

Categories
мэдээ нийгэм онцлох-нийтлэл туслах-ангилал

Ковидын бидэнд үлдээж байгаа сургамж

Сар шахам үргэлжилсэн хөл хорио өнгөрсөн бямба гаригт дуусч, нийслэлийн хөл хөдөлгөөн эрс нэмэгдээд байна. Өдөрт хэдэн зуун өвчлөл бүртгэгдэж, нас баралтын тоо буурахгүй байгаа энэ үед хөл хориог үргэлжлүүлэх нь зөв байсан ч юм болов уу. Арав, хориороо нас барсаар байхад хөл хориог цуцалж байгаа нь үнэндээ санаа амар суухын аргагүйд хүргэж байна. Ажил хэцүүдлээ, бидний ашиг орлогод төр засгийн шийдвэр тээг саад боллоо гэж цамнахаас тахлаас айж, эгдүүцэж байгаа нь ч үгүй бололтой. Ажил олгогчдын дарамт шахалтаас эмээж Засгийн газар ч үг дуугүй хөл хориог цуцлахаас өөр аргагүйд хүрсэн байх. Яг жинхэнэдээ Монголд ажил хийдэг нь, ажлын байр бий болгодог нь хэд билээ дээ. Ажил хийдэг хүн байхгүйтэй адил гэчихэд бараг хатуудахгүй биз.

Ямартаа ч бид ковид гээчтэй нүүр тулаад хоёр жил боллоо. Энэ хугацаанд саар болоод санаж явах, бодож тунгаах олон зүйлстэй нүүр туллаа. Хичнээн хугацаанд ковидтой тэмцэж, үүсгэсэн шинэ амьдралын хэв маягт нь дасан зохицож амьдрахыг тааварлашгүй ч ковид бидэнд ямар сургамж үлдээж байна вэ гэдгийг бодож үзье. Зорилтот бүлгийнхээ дийлэнх хувийг дархлаажуулсан учраас “хонгилын үзүүрт гэрэл” гэгч болж энэ талаар тунгааж байгаа хэрэг юм шүү.

Ер нь хүний амьдралд маш бага зүйл хэрэгтэй аж. Тэр багахан хэрэгцээгээ бүрдүүлчихэд нэг их зовж, зүдрээд байхгүй амьдарчихдаг юм байна. Жишээ нь, ковидтой нүүр тулснаараа бид гэрээсээ гарч, том унаа хөлөглөн хотын түгжрэлд цаг заваа үрэхгүйгээр ажиллаж, амьдарч болдог гэдгийг мэдэж авлаа. Хуучин 06:00 цагт босож, ажлын цагтайгаа уралдан хүүхдүүдээ цэцэрлэг, сургууль руу нь хүргэж өгөх гэж автомашины дохиоллоо хангинуулаад л, арайхийж ажилдаа амжиж очоод өдөржин завгүй холхиод л, ажлын цаг дуусав уу үгүй юү хүүхдүүд рүүгээ яарч тэвдээд л. Түгжирсээр гэртээ харуй бүрийд ирж, өлсөж ядарснаа гайхан хүнд махан хоол зооглож, ходоодоо шөнөжин ажиллуулж, тухтай амарсан ч юмгүй өглөө чадан ядан өндийж өнөөх л нэгэн хэвийн амьдрал давтсаар. Монголчууд бид бүгд яг л ийм амьдралын хэвшилтэй байв. Одоо бол бүх зүйл дээр дурдсан шиг байх албагүй гэдгийг нийтээрээ ойлгосон болов уу.

Ажлаа амжуулж байгаа нь энэ гээд бүтэн өдрөө зориулаад байх шаардлагагүй юм байна. Бага цагт их бүтээмжтэй ажиллаж болохыг бид мэдэрлээ шүү дээ. Үлдсэн цагаа гэр бүлдээ зарцуулж, тэр хэрээрээ аз жаргал ундардгийг харлаа. Мөн давхар ажил эрхэлж ч болохоор. Зөв хооллож, эрт унтаж, явган алхсанаараа бие болоод сэтгэл санаа хэрхэн сэргэдгийг ч бүгдээрээ сэхээрлээ. Хүүхдүүд сургууль, цэцэрлэгтээ явж байгаа нь энэ гэж замын түгжрэлд гацсанаараа хичнээн их ядардаг болох нь ч анзаарагдлаа. Энэ бүхэн “Амьдралын хэвшлээ өөрчлөх хэрэгтэй” гэх зөвлөгөө зүгээр ч нэг хий хоосон үг биш болохыг нотолж чадлаа.

Цаашдаа энэ хэмнэлийг үргэлжлүүлэхийн тулд сургууль, цэцэрлэг, дэлгүүр хоршоо, ууш, цэнгээний газар, кино театр цөм гэрийн ойр байх нь юу юунаас чухал болж байна. Монголын нөхцөлд ийм боломж ховор л доо. Гадны зарим улс оронд иргэд амьдардаг дүүргээсээ хотынхоо бусад дүүрэг рүү очих шаардлага бараг л гардаггүй гэх. Учир нь ажлын байр болоод дээр дурдсан бүх л үйлчилгээний газрууд нь амьдарч буй дүүрэгт нь байдаг учир заавал хэдэн дүүрэг дамжин түгжирч, автобус унаа гэх шаардлага гардаггүй байна. Манай улс ч үүнээс жишээ авч төрийн бодлогоор ухаалаг зохион байгуулалт хийх хэрэгтэй. Нэг хөндийд бөөгнөрөн байдаг нийслэлчүүдэд дүүрэг битгий хэл хороондоо ч бүхий л шаардлагатай үйлчилгээний газруудыг ойрхон, цогцоор нь байгуулах боломжтой. Төлөвлөж чадаагүйнхээ горыг амсаж, түгжрээнд байдаг цагаа барж, өөрсдөдөө ажил үүсгэн стресс, бухимдлаар дүүрэн явдаг цаг удахгүй ард хоцрох биз ээ. Тэгж чадвал унаа хөлөглөж хотын төв рүү зүглэж, түгжрэх шаардлага яахан гарах билээ. Ер нь иргэд автомашинаа долоо хоногт хоёр удаа унадаг болсон ч болохоор байна. Огт унахгүй байснаас хамаагүй дээр гэдгийг бид амьдрал дээр харлаа шүү дээ. Энэ нь явган алхах боломжийг бүрдүүлж, түгжрэлээс болж бухимдал үүсгэхгүй байх сайн талтайг бид мэддэг болсон, ийм байдлаар амьдраад сурчихсан. Өмнө нь хотын төвийн бүс рүү нэвтрэхэд тарифтай болъё гэхэд иргэд яаж хориглож, эсэргүүцэж байлаа. Одоо бол ийм шийдвэр гаргахад нэг их эсэргүүцээд байхгүй болов уу. Учир нь байх л ёстой үзэгдэл мэт хүлээж авах сэтгэл зүйтэй болсон байна, бид. Дээрээс нь болж л өгвөл машин унахгүй байх нь байгаль орчинд ч, эрүүл мэндэд ч, эдийн засагт ч ашигтай юм билээ. Арав хүрэхүй км өргөнтэй, гуч хүрэхгүй кмийн урттай хотод энэ олон машины хэрэг үнэндээ байхгүй юм билээ шүү.

Монголчууд бид энэ цаг үед аливаад хүлээцтэй хандах дадалд бага ч атугай суралцлаа. Нийтдээ гэж хэлэхгүй ч хэсэг бүлэг хүмүүс бидний хэлдгээр “юм үзсэн юм шиг” байж сурчээ. Хөл хориог тогтоох анхны шийдвэр гарахад манайхан хичнээн ичгэвтэр байдалтай байсныг та бүхэн тод санаж байгаа байх. Гурил будаа, хүнсний ногоо, мах гээд бүхий л нэн шаардлагатай хүнсний нөөц хангалттай байгаа, дэлгүүр хоршоо хэвийн ажиллана гээд байхад л өнөөх гай дагуулаад байгаа цар тахлаа ч умартан зах, худалдааны төвүүдээр чихэлдэцгээсэн. Бид сүүлийн 300 жилд, хэдэн үеэрээ алагчилсан нийгэмд хоосон, ядуу амьдарч ирсэн учраас нэг тийм өлмөн зэлмэн болчихсон. Үүнээс болоод түрүүлж дайрч байж л багахан юмтай үлдэнэ, үгүй бол хоосон хоцорно гэсэн сэтгэхгүй бидэнд нэвт шувт шингэчихсэн. Хоол хүнс элбэг дэлбэг энэ цаг үед ч тэр зан нь хэвээрээ гэдгийг цар тахлын эхэн үеийн хөл хорио харуулсан л даа. Харин өнөөдөр бид заавал урт дараалал үүсгэх шаардлагагүй, хэд хоногийн дараа очсон ч авах гэсэн зүйл минь шинэхэнээрээ сонголт дүүрэн хэвээрээ байна, тэр болгон тэвдэж сандарч гүйх шаардлагагүй юм байна гэдгийг ойлгодог болж байна. Ийм ойлголттой нэг хэсэг бий болсон нь илтэд мэдрэгдэж байгаа хэрэг. Дээр дурдсан бултаараа сандарч, тэвддэг шок биднийг хичнээн жижигхэн сэтгэхгүйтэй, жижиг ард түмэн болохыг харуулчихдаг уршигтай эд л дээ. Ер нь хүлээцтэй хандах, зай барьж, оочерлож сурах, бусдыгаа хүндэтгэх гээд энгийн мэт боловч маш чухал цөөн хэдэн дадлыг зөвхөн нэг хэсэг нь бус нийтээрээ сурмаар байгаа юм. Тэгж байж л бид өөрсдийн амьдралын хэв маягийг илүү хялбар, стрессгүй байдлаар бүрдүүлнэ шүү дээ. Маш бага хугацаанд тэсээд тэвчээд сурчих, нэг хүнийг өнгөрөөгөөд өөрөө дараа нь явах гэх мэтчлэнгийн суурин газрын алтан дүрмийг эзэмших хэрэгтэй юм байна гэдгийг энэ зай барих, дараалалд зогсох гэх мэт үйлдэл бидэнд маш тодоор орой руу ортол харууллаа.

Цар тахлын үед хөгшин настай иргэд гадуур ямар их явдаг байсан нь анзаарагдав. Дийлэнхдээ л үр хүүхдүүдийнхээ гар хөлийн үзүүрт зарагдаж, олны хөлөнд дарагдчих гээд автобус унаа хүлээж зогсдог байсан биз. Цар тахал гарснаар тэдний хөл хөдөлгөөн эрс цөөрч, өнөөх нийтийн тээврүүд бараг л суларч байгаа нь ажиглагдсан. Хүний зэрэгт хүргээд өгсөн ачийг нь санаж ижий, ааваа өтөл насанд нь санаан зоргоор нь амраачихдаг болоосой билээ. Цар тахлаас ухаарч үлдэх ёстой нэг сургамж бол яах аргагүй өндөр настнуудаа хайрлаж, халамжлах явдал байлаа.

Мэдээж эмч, эмнэлэгийн ажилчид, цаашлаад төрийн албан хаагч, шийдвэр гаргагчидтай холбоотой сургамж олонтаа байлаа. Бид эрүүл мэндийн салбарын чанар чансаа, эмч, эмнэлгийн ажилчдын чадвар, ёс зүй зэрэгт онцгой анхаарах ёстой болжээ. Эрүүл мэндийн шинжлэх ухааны хувьд бид дэлхийн жишигтэй харьцуулахад чигчий хурууных нь дайнд ч хүрэхээргүй байна. Үүнийг анхааралдаа авч сайн хөгжүүлэх, хөрөнгө мөнгө гаргах хэрэгтэй байдаг аж. Эрүүл мэндийн удирдах ажилтнуудын хувьд дээрээсээ эхлээд хамгийн доод албан тушаалтан хүртлээ хийж буй ажлаасаа ашиг хонжоо хайж, үүнээс надад ямар ашиг унах вэ, энэ нөхөр надад юу өгөх бол гэх хандлагатай байгаа нь үнэхээр сэтгэл гонсоймоор байлаа. Өнөөх л өлмөн зэлмүүн сэтгэхүй тэдэнд нэвт шувт шингэж. Ур чадварын гэхээсээ илүү сэтгэлгээний хоцрогдолд оржээ, тэд. Угтаа төр засгаас эрүүл мэндийн салбарынханд нэмэгдэл хөлс зэргийг чадах, ядахаараа л олгож байгаа. Гэлээ ч тэдний хандлага энэ хүнд цаг үед ч огтоос өөрчлөгдөөгүй байна. Цалин мөнгийг нь дэлхийн жишигт өгөх, төлбөр тооцоог нь дэлхийн жишигт хүргэж мөн эмчилгээ, эм хангамжийг ч дэлхийн хэмжээнд аваачих нь монголчуудын хувьд амь амьдралын хэрэг болжээ.

Шийдвэр гаргагчид, удирдах албан тушаалтнуудын тухайд ч үнэхээр сэтгэл дундуур үлдлээ. Ажил хийж сураагүй, амьдрал мэдэхгүй худал цэцэрхэгчид төр толгойлдог болсон нь маргаангүй батлагдаж байгаа юм. Тэд мэдлэг чадвартай, ухаалаг хүний үг авдаггүй юм уу, үг хэлэх хүн олддоггүй юм уу нэг л их хий хоосон амьдралгүй шийдвэрүүд “үйлдвэрлэх” юм. Хөгжингүй улс орнуудын жишээг тэд эш татах дуртай. Тэгвэл ядаж бусад улс орнуудын төрийн шийдвэр судалгааны багийн боловсруулсан тооцоо судалгаан дээр үндэслэж гардаг болохыг мэддэг баймаар юм. Цаашдаа шийдвэр гаргагчид хажуудаа судалгааны багтай байгууштай. Үүнд нь шаардлагатай төсөв мөнгийг хангалттай шийдэж, хашир туршлагатай хүн ажиллуулах хэрэгтэй. Үгүй бол удирдлага, төр засгийн менежмэнт муу, сэтгэлийн хөөрлөөр шийдвэр гаргадгаас нь болж иргэд амь насаараа хохирч байна. Тэдний чаддаг нь л хорьж, цагдах болж хувирсан. Яваандаа байдал хүндэрвэл буудаж эхлэх байсан биз гэхэд хилсдэхгүй. Азаар вакцин орж ирсэн нь сайн хэрэг болсон. Улс төрийн зөв нүүдэл хэзээд үр дүнгээ өгдгийг вакцины нийлүүлэлт харуулж байгааг дурдах нь зүйтэй байх. Үнэндээ урд хөршдөө ядарсан үед нь 30 мянган хонь аваачиж өгсөн нь үнэхээр зөв алхам болж, монголчуудын аминд орлоо. Энэ алхмыг зориг гарган хийгээгүй бол урд хөрш мөнгийг нь төллөө ч вакциныг ийм ихээр нь өгч чадахгүй байсан болов уу. Бусад улс орнууд мөнгийг нь төлөөд ч олж авч чадахгүй байгаа нь бодит үнэн шүү дээ. Монгол Улсын Ерөнхийлөгч Х.Баттулгын хийсэн энэ уран нүүдлээс төрд гарахыг санаархагчид сургамж авах л хэрэгтэй.

Categories
мэдээ нийгэм цаг-үе

Өнөөдөр ажиллах дархлаажуулалтын цэгийн байршил

Өнөөдөр буюу 2021 оны тавдугаар сарын 11-ний өдөр Нийслэлд суурин 41 цэгт, 10 явуулын автобусаар 92 багийн 664 эмч, ажилтан ажиллаж, 13911 иргэнийг дархлаажуулахаар төлөвлөжээ.

Дархлаажуулалтын цэгийг дүүрэг тус бүрээр танилцуулж байна.

нэг буюу түүнээс олон хүн болон бичвэр гэх мэтийн зураг байж болнонэг буюу түүнээс олон хүн болон бичвэр гэх мэтийн зураг байж болно
Зургийн тодорхойлолт алга байна.Зургийн тодорхойлолт алга байна.
нэг буюу түүнээс олон хүн болон бичвэр гэх мэтийн зураг байж болнонэг буюу түүнээс олон хүн болон бичвэр гэх мэтийн зураг байж болно
Зургийн тодорхойлолт алга байна.Зургийн тодорхойлолт алга байна.
бичвэр гэх мэтийн зураг байж болнобичвэр гэх мэтийн зураг байж болно
нэг буюу түүнээс олон хүн болон бичвэр гэх мэтийн зураг байж болнонэг буюу түүнээс олон хүн болон бичвэр гэх мэтийн зураг байж болно
"нийслэлийн онцгой комисс #UB дуурэг д/д хамтдаа цэгийн байршил коронавируст халдварын эсрэг дархлаажуулалтын дугаар сарын 11-ний едрийн теловлелт ажиллах 10O хуний астразенека θργγη мэндий дэмжих хамрагдах хороод багануур эργγη мэндийг дэмжих TOB вероцел астразенека вакцин хиилгэсэн иргэдиин давтан тун тун багануур эмтов корпус дээш насны иргэд вероцел 30 багахангай баγаханг нийт синофарм хорооны спутник-ѵ дээш астразенека давтан астразенека хуучин баир наланх эργγη мэндиин TOB спутник тун стразенека вакцин хиилгэсэн иргэдиин давтан гун BEPOuEл дээш насны иргэд TOB хорооны иргэд ргэд хуухэд ниит 40 астразенека вакцины давтан, вероцел вакцины 1, 2-P тун болон насны иргэдийн спутник вакцины 1-P тун хийгдэнэ" гэсэн бичвэр гэх мэтийн зураг байж болно
Categories
мэдээ онцлох-нийтлэл туслах-ангилал улс-төр

Д.Ганбат: Нэг нам, нэг хүний дарангуйлал руу өдөр өдрөөр ойртож байна

УИХ-ын гишүүн Д.Ганбаттай ярилцлаа.

-Та бүхний өлсгөлөн зургаа дахь өдрөө үргэлжилж байна. Ямар үр дүнд хүрнэ гэж өлсгөлөн зарлаж байгаа юм бэ?

-Улс орны хувьд ч, дэлхий нийтийн хувьд ч ер нь их амаргүй нөхцөлд байна. Цар тахал Монголд бүртгэгдээд хоёр жил боллоо. Үүний эсрэг УИХ, Засгийн газрын авч хэрэгжүүлж байгаа үйл ажиллагаа, арга хэмжээнд сэтгэл хангалуун бус байна. Энэ хүнд хэцүү үеийг ашиглаад нэг нам, нэг хүний дарангуйлал руу өдөр өдрөөр ойртож байна л даа. Тухайлбал, Улаанбаатар хотод 28 хоног хөл хорио тогтоосон. Гэтэл энэ хөл хорио тогтоосон нь үр дүнтэй болсон уу, үгүй юү. Ер нь шийдвэр, цаашид яах нь тодорхой биш. Хөл хорио тогтооно, тогтоохгүй гээд иргэдийг баахан төөрөгдүүлсэн. Засгийн газраас авч хэрэгжүүлж байгаа арга хэмжээ нь шинжлэх ухаанч биш, ард түмнийг чирэгдүүлсэн, цар тахалд зарж байгаа төсөв, хүн хүчний нөөц бололцоогоо зөв хуваарилж чадахгүй байна. Эмнэлгийн ажилчдыг өдөр шөнөгүй ажиллуулчихаад цалин урамшууллын нэмэгдэлгүй. Цагдаа, эмнэлгийн албан хаагч, ард түмэн туйлдаж байна. Үүний хажуугаар шударга бус байдал ноёллоо. Үүнийг нь эсэргүүцэж УИХ-д хэлж, ярилаа. “Ковид-19” цар тахлын нөхцөл байдал гээд үг хэлэх хугацааг хоёр минут болгочихсон. Олон санал санаачилга хэлж байгаа ч бидний гаргасан саналыг авахгүй байна. Нөхцөл байдал хэцүү байна. “Цар тахалтай тэмцэх бүтэц байгуулаач ээ. Хуучин бүтэц чинь ажиллаж чадахгүй байна” гэж аль дээрээс л хэлж, ярьж байсан. Үүнээс гадна “Та нар өөрсдөө сэтгээд ажил хийж чадахгүй бол олигтойхон хийчихдэг израиль, еврейчүүдийг дуурайгаад хийгээдэхээч. Тэд юу хийж байна, тэрийг нь дагаад хийхэд л цар тахлын ард гарна” гээд хэлээд байхад үг авсангүй. “COVAX хөтөлбөрт итгэж байна. Бид үнэгүй, хямд авна” гэж явсаар маш их цаг хугацаа алдчихлаа. Бусад улс орнуудад хүүхдүүд нь сургууль, цэцэрлэгтээ явж байна. Бүх байгууллагууд нь хэвийн ажиллаад эхэлчихлээ. Гэтэл манай хүүхдүүд хоёр жил сургууль, цэцэрлэгтээ суусангүй. Боловсролын хувьд 10, 20 жилээр хоцрогдчихсон байна. Ийм л хүнд хэцүү байдалтай болж эхэлж байна. Хичээл хоцрогдлыг дараа нь арилгахад их хэцүү, бүр ч их мөнгө төгрөг зарна. Ийм алдагдсан нэг үе гарч ирэх гээд байна.

-Өлсгөлөн зарласнаар ямар үр дүнд хүрнэ гэж бодож байна?

-Бид нэг намын даран-гуйлал, нэг хэсэг дарангуйллыг хүлээн зөвшөөрөхгүй. Цар тахалтай тэмцэж байгаа арга хэлбэр чинь эдийн засгийг унагаасан, эрүүл мэндийг үгүй хийсэн энэ байдалдаа хариуцлага хүлээ гэж байгаа. Нас барсан иргэдийн ар гэрт нөхөн олговор олго. Мөн ард түмний сонголтыг бүрэн тусгах сонгуулийг бий болго. Наад сонгуулиа шударга, хуулийн дагуу явуул. Тухайлбал, Ерөнхийлөгчийн сонгуулийг аваад үзье. Эхлээд одоогийн Ерөнхийлөгч Х.Баттулга гэдэг хүнтэй манай намын дарга өрсөлдөхгүй. Энэ хүнийг соль гээд Үндсэн хуулийн Цэц дээр хууль өөрчилж байгаад сольчихож байна. Дараа нь С.Ганбаатар гэдэг хүнтэй өрсөлдөхгүй гээд намын удирдлагуудад нь албан тушаал амлаад намыг нь худалдаад авчихаж байна. Ингээд ялах магадлал бүхий хүмүүсээ зайлуулж байна. Дараа нь Н.Алтанхуяг гэдэг хүн дэвшинэ гэхээр Сонгуулийн Ерөнхий хороон дээр унагааж байгаа юм уу яаж байгаа юм. Энэ хүмүүсийн дэвших дэвшихгүй нь бүр дараагийн асуудал. Хамгийн гол нь иргэдийн сонгох, сонгогдох эрхийг зөрчиж байна. Манайх УИХ-д суудалтай, дээрээс нь бүлэгтэй нам шүү дээ. Сөрөг хүчнийхээ хэлэх үгийг хааж, боож байна. Сөрөг хүчнээ талбай дээр гаргачихсан, үг хэлүүлдэггүй, санал бодлыг нь тоодоггүй, тэгсэн хэрнээ улс орных нь амьдрал уначихсан, иргэдийн 30 хувь нь ядуу байна. Хөл хорионоос болоод бараг 40, 50 хувь нь ядуу болчихлоо. Хөргөгч нь хоосорчихлоо. Махны үнэ 14, 15 мянга болчихлоо гэх мэт олон зүйлийг хэлж болно. Үүнд дорвитой арга хэмжээ авахгүй байна. Гадаадад байгаа иргэдээ олигтой татаж авахгүй байж, мутацид орсон вирустэй 35 хүн Энэтхэгээс аваад ирж байх жишээний. Мутацид орсон вирус нь тархвал бид дийлэхгүй шүү дээ.

-Хөл хорио гээд иргэд гэрээсээ ч гарч чадахгүй байхад хууль баталдаг, дагаж мөрдөхийг үлгэрлэдэг УИХ-ын гишүүд нь дэглэмээ зөрчиж байгаа нь хэр зөв юм бэ гэдэг зүйл их яригдаж байна…?

-Хөл хориогоор далим-дуулж хоёр жил улсын төсөв мөнгийг гамгүй цацсан ч үр дүн гарсангүй. Улсын мөнгө ч үгүй, эрүүл мэнд ч үгүй боллоо. Ингэж хэмжээ хязгааргүй зарцуулж болохгүй. Бид энэ байдалтай эвлэрээд сууж болохгүй. Бид хязгаартаа тулаад гарч ирж байна шүү дээ. Түүнээс биш цар тахалтай үед ард түмнийг цуглуулахгүй гэсэн байр суурьтай байгаа. Зөвхөн өөрсдөө талбай дээр гарч ирье л гэсэн. Парламентын танхимаас биднийг үг хэлүүлэхгүй, микрофон хааж байна. Өвчин тахлаар далимдуулж дарангуйлдаг боллоо. УИХ-ын гишүүд гэдэг чинь ард түмний эрх ашгийг хамгаалж, ард түмний өмнөөс асуудлыг шийдэхийн тулд УИХ-ын гишүүний эрхийг эдэлдэг. Иргэдээ төлөөлж УИХ-ын индэрт үг хэлэх эрх байхгүй болчихоод байна шүү дээ. Гишүүдийн микрофоныг яаж хааж байгааг орон даяар харж байгаа байх. Тиймээс талбай дээр гарч ирж үгээ хэлж, санал бодлоо илэрхийлж байна.

-Нэр дэвшигчийг бүртгэхээс өмнө та бүхэн зөвшилцөж, ойлголцолд хүрэх боломжтой байсан юм биш үү. Нөгөөтэйгүүр Ардчилсан эмэгтэйчүүдийн холбооноос зөвшилцөх саналыг ч гаргасан. Нэр дэвшигчээ бүртгүүлэхээсээ өмнө та бүхэн зөвшилцлийн ширээнд суусан уу?

-МАН төрийн эрх мэдлийг бараг бүгдийг нь авчихсан. Энэ хүмүүс намуудыг худалдаж авахыг нь худалдаад, хуваахыг нь хуваагаад байна. Албан тушаалаар МАН-ыг худалдаад авчихсан. Ерөнхийлөгчийн сонгуульд дэвшиж байгаа ХҮН-аар Үндсэн хуулийн Цэцэд өргөдөл гаргуулсан. ХҮН гэж тоглоомын нам байгуулаад байна гэж өмнө нь хардаж хэлж л байсан. Энэ бүх зүйл нь өөрсдийнх нь үйлдлээр амьдрал дээр нотлогдоод байна. Төрийн байгууллагуудаа ашиглаж хамгийн нэр хүнд муутай, өмнөх сонгуулиар намаа ялагдуулсан хүнийг дэвшүүлж байна. Тэрийг дэвшүүл, энийг дэвшүүлэхгүй гэсэн маягтай ажлыг хийгээд байна. Яаж ч уран донгодож, юу ч гэсэн энэ бүхэн нь иргэдийн нүдний өмнө ил байна л даа.

-УИХ-ын гишүүн Н.Алтанхуяг, С.Ганбаатар нар АН-аас нэр дэвших эрхгүй гэдгийг М.Тулгат даргын талаас мэдэгдсэн. Танай намын дүрмээр бол намд элсээд зургаан сар болсны дараа нэр дэвших эрх нь нээгдэх юм биш үү?

-Ерөнхийлөгчийн сонгуульд нам бус хүн нэр дэвшиж болно шүү дээ. Хуулиараа хориогүй. Дүрэм журмыг намын даргаас, эсвэл сунгаа явуулсан хүнээс асуух нь зөв болов уу. Ардчилсан нам УИХ-д 11 гишүүнтэй байснаа 13-уулаа болж бүл нэмж байна. Бид намаа, сунгаагаа нэгтгэчих юмсан, нэг нэр дэвшигч гаргачих юмсан гээд хооронд нь нийлүүлэх гэж явлаа. Хэнийг ч буланд шахаж, ялгаварлан гадуурхаад байж болохгүй. Хэн ч алдаа гаргах эрхтэй. Би сунгаанд мөнгө төгрөгийг нь төлөөгүй, оролцоо ч үгүй. Сунгаагаа хийчихээч гээд эцэс хүртэл нь явлаа, болсонгүй. Болохгүй бүтэхгүй байгаа зүйлийн цаана эрх барьж байгаа нам байна л даа. Сонгуульд өрсөлдөгчөө захиалж байна.

-Нөгөө талаас зөвшилцье гэдэг саналыг тавьсан юм биш үү. С.Эрдэнэ дарга “Намын даргын санал хураах өдрийг нэг өдөр байхаар болгож наашлуулсан” гэж мэдээлж байсан?

-Хэн хэн нь амаараа ярьдаг юм. Үйлдэл дээрээ байхгүй болчихоод байгаа юм. Би энэ хүмүүсийг нэгтгээд уулзаж үзсэн л дээ. Улс төрийн намуудыг хардаг, ажигладаг хүмүүс мэдэж байгаа байх. Хэвлэл мэдээллийн хэрэгслээр ч мэдээлэл нь гарч байсан. Тухайн үед нэгтгэчих гээд явсан. Уг нь манайхан нэгдчихмээр юм шиг байгаа юм. Гэвч цаанаас нь мөнгө, төгрөгтэй, эрх мэдэлтэй нам захиалаад байхаар зовлонтой юм. С.Эрдэнэ дарга өөрөө “Прокурор дээр хэрэг шалгагдаж байгаа. Хоёр сар болоод хүчингүй болоод хоёр сар болоод буцаад мөрдөгдөөд байна” гэж ярьсан шүү дээ. Энэ мэт байдлыг харахад захиалчихаж байгаа юм. Намаа авч яваад 2020 оны УИХ-ын сонгуульд ялагдчихлаа шүү дэ. Тиймээс дүрэм журмаараа хариуцлага хүлээх ёстой.

-Та бүхний ард хэн нэгэн эрх мэдэлтэй хүн байна уу гэдэг хардлага нийгмийн дунд байна?

-Та нар гэж хэнийг хэлээд байгаа юм.

-Өлсгөлөн зарлаж байгаа гишүүдийн ард?

-Миний хувьд хэн нэгэн хүн байхгүй. Манай гишүүдийн ард ч байхгүй байх гэж бодож, найдаж байна. Гэхдээ би ямар бүх зүйлийг мэдэх биш. Хамгийн нэн түрүүний эрх ашиг бол ард түмний эрх ашгийг өмнөө тавьж, өргөсөн тангаргаа санаж байгаа байх гэж бодож байна.

-Өлсгөлөн хэзээ дуусах юм бэ?

-Бидний шаардлагуудыг биелүүлсний дараа дуусна.

Р.ЖАРГАЛ

Categories
зурхай мэдээ нийгэм цаг-үе

Шарагчин хонь өдөр

Аргын тооллын тавдугаар сарын 11, Ангараг гариг. Билгийн тооллын 30, Гоё хүүхэн одтой, шарагчин хонь өдөр. Өдрийн наран 5:19 цагт мандан, 20:18 цагт жаргана. Тухайн өдөр гахай, туулай жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр худалдаа арилжаа хийх, бизнес эхлэх, хүү сангийн эх хатгах, эд агуурс авах, зээл авах, арвижуулах, дэлгэрүүлэх үйлийг эхлэх, лус тахих, мал худалдан авах, мал түгээх, огторгуйн үүдийг боох, их хүмүүнтэй уулзахад сайн. Цөөрөм байгуулах, сахил санваар авах, хануур төөнүүр хийлгэх, балгадын суурь тавих, нохой худалдан авахад муу. Өдрийн сайн цаг нь бар, туулай, могой, бич, нохой, гахай болой. Хол газар яваар одогсод зүүн хойш мөрөө гаргавал зохистой.

Үс шинээр үргээлгэх буюу засуулахад тохиромжгүй.
Categories
мэдээ нийгэм цаг-үе

Улаанбаатар хотод өдөртөө 8-10 хэм дулаан байна

УЛААНБААТАР ХОТ ОРЧМООР: Шөнөдөө үүлшиж, ялимгүй хур тунадас орно. Өдөртөө үүл багасна, хур тунадас орохгүй. Салхи баруун хойноос секундэд 6-11 метр, зарим үед секундэд 13-15 метр хүрч ширүүсэж, шороон шуурга шуурна. Шөнөдөө 0 градус орчим, өдөртөө 8-10 градус дулаан байна.

Хур тунадас: Ихэнх нутгаар солигдмол үүлтэй. Шөнөдөө төвийн аймгуудын нутгийн зарим газар, зүүн аймгуудын ихэнх нутаг, өдөртөө баруун аймгуудын нутгийн баруун, төвийн аймгуудын нутгийн зүүн хэсэг, зүүн аймгуудын нутгийн зарим газраар бороо, нойтон цас орж, цасан шуурга шуурна.

Салхи: Нутгийн өмнөд хэсгээр баруун өмнөөс баруун хойш эргэж, бусад нутгаар баруун хойноос секундэд 7-12 метр, говь, тал, хээрийн нутгаар секундэд 18-20 метр хүртэл ширүүсэж, шороон шуурга шуурна.

Агаарын температур: Шөнөдөө сэрүүсэж Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Онон, Туул, Тэрэлж голын хөндийгөөр 4-9 градус хүйтэн, Их нууруудын хотгор, говийн бүс нутгийн хойд хэсгээр 2-7 градус, Дарьгангын тал нутаг, говийн бүс нутгийн өмнөд хэсгээр 8-13 градус, бусад нутгаар 2 градус дулаанаас 3 градус хүйтэн, өдөртөө Хангай, Хөвсгөл, Хэнтэйн уулархаг нутаг, Туул, Тэрэлж, Хэрлэн, Онон голын хөдийгөөр 5-10 градус, Их нууруудын хотгор, Алтайн өвөр говиор 21-26 градус, Хангайн нурууны өвөр бэл болон говийн бүс нутгийн зүүн өмнөд хэсгээр 16-21 градус, бусад нутгаар 9-14 градус дулаан байна.

БАГАНУУР ОРЧМООР: Шөнөдөө үүлшиж, ялимгүй хур тунадас орно. Өдөртөө үүл багасна, хур тунадас орохгүй. Салхи баруун хойноос секундэд 7-12 метр, зарим үед түр зуур секундэд 15-17 метр хүрч ширүүсэж, шороон шуурга шуурна. Шөнөдөө 0-2 градус хүйтэн, өдөртөө 9-11 градус дулаан байна.

ТЭРЭЛЖ ОРЧМООР: Шөнөдөө үүлшиж, ялимгүй хур тунадас орно. Өдөртөө үүл багасна, хур тунадас орохгүй. Салхи баруун хойноос секундэд 6-11 метр, зарим үед секундэд 14-16 метр хүрч ширүүсэж, шороон шуурга шуурна. Шөнөдөө 4-6 градус хүйтэн, өдөртөө 6-8 градус дулаан байна.

Categories
мэдээ нийгэм онцлох-нийтлэл туслах-ангилал

Өдрийн сонинд “Ерөнхийлөгчийн сонгуулийн өмнөх их улстөржилт” хэмээн өгүүллээ

Өглөө бүр тантай хамт байдаг “Өдрийн сонин”-ы мягмар гаригийн дугаар 12 нүүрээр хэвлэгдэж, та бүхний гар дээр хүрч байна.

Өдрийн сонины тэргүүн нүүрт Л.Оюун-Эрдэнэ “Намын дүрмээр Ерөнхий сайд
намын дарга байх ёстой. Энэ
дагуу асуудлууд яригдана
гэдэгт итгэлтэй байгаа” гэснийг “Улс төр” нүүрээс уншаарай.

“Өдрийн сонин”-ы нийтлэлийн бодлогыг тодорхойлогч, ард түмний дуу хоолой болдог “Баримт, үзэл бодол”-ын гуравдугаар нүүрт “Ерөнхийлөгчийн сонгуулийн
өмнөх их улстөржилт” хэмээн өгүүллээ.

Хуульч Д.Үүрцайх “Онц болон дайны байдал
зарласан нөхцөлд сонгууль
явуулах боломжгүй болбол
УИХ-ын шийдвэрээр ээлжит
сонгуулийг хойшлуулж болно” гэлээ.

“Энхсаран” сувиллын талаар мэдээлсэн иргэн Д.Мөнхбат “Коронагийн нөхцөл байдлын
талаар үнэнийг хэлснийхээ
төлөө би цаг хугацаа, сэтгэл
санаа, мөнгө санхүү, эрүүл
мэндээрээ хохирсоор л байна” гэснийг “Баримт, үйл явдал”-ын VII нүүрээс уншаарай.

“Эх орны дөрвөн хязгаарын
сумдын эмнэлэгт ажил ингэж
өрнөж байна” гэв.

Дэлгэрэнгүй мэдээллүүдийг уншихыг хүсвэл дараах линкээр бүртгүүлж уншина уу. https://admin.dnn.mn/plugins/news/login/

Эдгээр болон бусад цаг үеийн мэдээ мэдээлэл, ярилцлага, сурвалжлагыг “Өдрийн сонин”-ы мягмар гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудангийн салбаруудаас болон сонин борлуулах цэгүүд, Хэвлэлийн биржээс худалдан авах боломжтой. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдан авч болохыг дуулгая. Түүнчлэн “Өдрийн сонин”-ы өөрийн байранд ирж худалдан авч болно. Уншигч та “Өдрийн сонин”-ыг захиалан уншихыг хүсвэл 9911-2954, 8811-1375 дугаарт холбогдоно уу.

Цахим хэлбэрээр нь захиалахыг хүсвэл 99726725 дугаарт холбогдож дэлгэрэнгүй мэдээллийг аваарай.

“Өдрийн сонин”-той холбоотой мэдээ мэдээллийг 19001987-гоос лавлана уу.

“ӨДРИЙН СОНИН” ӨГЛӨӨ БҮР ТАНТАЙ ХАМТ

Categories
мэдээ нийгэм цаг-үе

Уснаас 21 настай эрэгтэй болон 2 сартай хүүхдийн хамт аварчээ

Багануур дүүргийн 4-р хороо Ахмадын амралтын хойно Хэрлэн голд Субару маркын авто машин живж байна гэсэн дуудлага өнөөдөр /2021.05.10/ дүүргийн Онцгой байдлын хэлтэст 13:15 цагт ирсэн байна. Дуудлагын дагуу дүүргийн Онцгой байдлын хэлтсийн Гал түймэр унтраах, аврах 64 дүгээр ангийн аврах бүрэлдэхүүн хүрэлцэн очиход Субару маркын авто машин живсэн байдалтай байжээ. Аврах ажиллагааг цаг алдалгүй шуурхай зохион байгуулж машинд байсан 21 настай эрэгтэй, 2 сартай эрэгтэй хүүхдийн амь насыг нь авран хамгаалж ажиллалаа. Түүнчлэн автомашиныг голоос гаргаж аюулгүй газар байрлууллаа гэж Багануур дүүргийн Онцгой байдлын хэлтсээс мэдээллээ.

Categories
мэдээ энтертаймент-ертөнц

“Clubhouse”-ийн Android хувилбар АНУ-д гарлаа

Дэлхий нийт төдийгүй монголчуудын хувьд цар тахлын үед хамгийн их сонирхол татсан апп болоод байсан “Clubhouse” платформын “Android” хувилбар гарчээ.

Гэхдээ эхний удаад зөвхөн АНУ-д оршин суудаг хэрэглэгчид татан ашиглах боломжтой гэнэ. Бусад улс орны хэрэглэгчид ирэх долоо хоногоос шат дараатайгаар татаж авах боломжтой болох гэнэ. “Clubhouse”-ийн зах зээлийн үнэлгээг хөрөнгө оруулагчид нь дөрвөн тэрбум ам.доллараар үнэлээд байна.

Гарсан даруйдаа хоёр сая хүн татан аваад байсан энэхүү платформыг сонирхох нь сүүлийн саруудад буурчээ.