Month: April 2021

Categories
мэдээ эдийн-засаг

Нийт хадгаламжийн 53.2 хувийг эмэгтэйчүүд эзэмшиж байна

Санхүүгийн хүртээмжийн үзүүлэлтүүдийг жендерийн тэгш байдалтай уялдуулан тооцон гаргаж байгаа олон улсын жишгээр Монголбанк банкны салбарын гол үзүүлэлт болох иргэдийн зээл, харилцах, хадгаламжийн үзүүлэлтийг хүйсээр ангилсан тоон мэдээллийг нэгтгэн танилцуулж байна.

Банкуудын 2020 оны эцсийн байдлаарх иргэдийн зээл, харилцах, хадгаламжийн үлдэгдэл, эдгээрийн дансны тоог үндсэн данс эзэмшигчийн хүйсийн ангиллаар болон байршлаар гаргаж эмэгтэй харилцагчдаар төлөөлүүлж танилцууллаа.

1. Харилцах

Тайлант оны эцсийн байдлаар иргэд нийт 5.5 сая дансны 1,561.1 тэрбум төгрөгийн харилцахын үлдэгдэлтэй байгаагийн 44.6 хувийг эмэгтэйчүүд эзэмшиж байна. Иргэдийн нийт харилцахын 43.9 хувь буюу 476.2 тэрбум төгрөг орон нутагт байршиж байгаагийн 44.3 хувийг эмэгтэйчүүд эзэмшиж байна. Нийслэлийн иргэдийн нийт харилцахын үлдэгдэл 1,084.9 тэрбум төгрөг байгаа бөгөөд 44.8 хувь нь эмэгтэйчүүдийн дансанд байршжээ.

2. Хадгаламж

Иргэд нийт 3.5 сая дансны 15,284.3 тэрбум төгрөгийн хадгаламжийн үлдэгдэлтэй байгаагаас эмэгтэйчүүд иргэдийн нийт хадгаламжийн үлдэгдлийн 53.2 хувийг эзэмшиж байна. Иргэдийн нийт хадгаламжийн 22.0 хувь буюу 3,357.0 тэрбум төгрөг орон нутагт байршсаны 51.1 хувийг эмэгтэйчүүд, нийслэлийн иргэдийн нийт хадгаламжийн үлдэгдэл 11,927.4 тэрбум төгрөг байгаагийн 53.8 хувийг эмэгтэйчүүд эзэмшиж байна. Орон нутгийн иргэдийн хадгаламжийн 74.9 хувь нь хугацаат хадгаламж байгаа бөгөөд нийслэлийн иргэдийн хадгаламжийн 77.8 хувь буюу 9,278.5 тэрбум төгрөг нь хугацаатай байршжээ.

3. Зээл

Иргэд нийт 1.3 сая зээлийн дансны 8.488.1 тэрбум төгрөгийн зээлийн үлдэгдэлтэй байна. Иргэдийн нийт зээлийн үлдэгдлийн 42.4 хувь нь орон нутагт олгогдсоны 42.8 хувь нь эмэгтэйчүүдэд олгогджээ. Орон нутгийн иргэдийн нийт зээлийн үлдэгдэл 3,599.3 тэрбум төгрөг байгаагаас 40.9 хувь нь эмэгтэй зээлдэгчдэд олгогдсон байна. Нийслэлийн иргэдийн нийт зээлийн үлдэгдэл 4,888.8 тэрбум төгрөг байгаагаас 44.3 хувь нь эмэгтэйчүүдэд олгогджээ.

4. Банк

Үйл ажиллагаа явуулж буй 12 банк 2020 оны эцсийн байдлаар Монгол улсын хэмжээнд нийт 15,935 ажилтан 1,398 салбар нэгжтэйгээр үйл ажиллагаа явуулж байна. Үүнд банкны 264 салбар, 1037 тооцооны төв болон 97 бусад нэгж багтжээ. Нийт салбар нэгжийн 70.0 хувь нь орон нутагт байршиж байгаа бол банкны салбарт ажиллагсдын 36.7 хувь буюу 5,844 хүн орон нутаг дахь салбаруудад ажиллаж байна. Орон нутаг дахь банкуудын салбар, нэгжүүдэд ажиллаж байгаа ажилтнуудын 70.5 хувийг эмэгтэйчүүд бүрдүүлж байна.

Нийслэлд банкуудын 419 салбар нэгж байршиж байгаагаас банкны 161 салбар, 192 тооцооны төв болон 66 бусад нэгж үйл ажиллагаа явуулж байна. Банкны салбарт ажиллагсдын 63.3 хувь буюу 10.091 хүн нийслэл дэх салбар, нэгжүүдэд ажиллаж байгаа бөгөөд 64.7 хувь нь эмэгтэйчүүд байна.

Эх сурвалж: Монголбанк

Categories
мэдээ нийгэм цаг-үе

Ундны усны аюулгүй байдлыг хангахад БНСУ-тай хамтарч ажиллана

Нийслэлийн Засаг дарга бөгөөд Улаанбаатар хотын Захирагч Д.Сумъяабазар өчигдөр БНСУ-аас Монгол Улсад суугаа Соёлын элч Ким Гуан Шин, Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр болон албаны хүмүүсийг хүлээн авч уулзлаа.

Энэхүү ажлын хүрээнд Улаанбаатар хотын Захирагчийн ажлын алба болон БНСУ-ын “Сеннипан” ХХК 2020 оны нэгдүгээр сард Хамтран ажиллах санамж бичгийг байгуулсан бөгөөд орон сууцны байруудын дундах халуун, хүйтэн усны инженерийн шугам сүлжээний зэв хагийг арилгахад хамтарч ажиллах юм.

БНСУ-ын дэвшилтэт тоног төхөөрөмжөөр Улаанбаатар хотын ус хангамжийн шугам сүлжээг цэвэрлэх, зэвийг арилгах төслийг нэвтрүүлэх талаар ярилцсан юм.

Тодруулбал, 2018 онд Баянгол дүүргийн дөрөвдүгээр хорооны нутаг дэвсгэрт байрлах Ус, дулаан дамжуулах төвийн 12 байрны 671 өрхийн 3047 хүн ам, 72 аж ахуйн нэгж, байгууллагыг хангадаг хүйтэн усны 469 метр урт шугам сүлжээний зэвийг азотын хий ашиглан арилгах туршилтыг амжилттай туршсан байна.

Туршилтын үр дүнд шугам угаахаас өмнө усан дахь төмрийн агууламж 0.027 мг/л байсан нь 0.015 мг/л болж, өнгө булингарын агууламж багасаж, айл өрхийн цоргон дахь усны даралт нэмэгджээ.

Энэ үеэр Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Улаанбаатар хотын иргэдийн цэвэр усны аюулгүй байдалд анхаарал хандуулж, хөрөнгө оруулалт хийж байгаад талархаж, хамтарч ажиллахаа илэрхийллээ.

НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС

Categories
гадаад мэдээ

2020 он түүхэн дэх хамгийн халуун жилүүдийн нэг болжээ

Өнгөрсөн он цаг уурын ажиглалтын түүхэн дэх хамгийн халуун гурван жилийн нэг болжээ.

“Цар тахалтай холбоотой эдийн засгийн удаашрал уур амьсгалын өөрчлөлтийг зогсоож чадсангүй. “Ла-Нинья” үзэгдлийн улмаас бага зэрэг сэрүүн байсан ч 2020 он цаг уурын ажиглалтын түүхэн дэх хамгийн халуун гурван жилийн нэг байлаа” гэж Дэлхийн цаг уурын байгууллагын “Дэлхийн уур амьсгал” тайланд дурджээ.

Уур амьсгалын дулаарал нь улс орнуудын ард иргэд, эдийн засагт нөлөөлсөн байгалийн гамшигт үзэгдэл дагуулж байгааг Дэлхийн цаг уурын байгууллагын ерөнхий нарийн бичгийн дарга Петтери Таалал тайлантай холбогдуулан хийсэн хэвлэлийн бага хурлын үеэр анхааруулав. “Дэлхийн дулаарлыг тогтоон барихад амжилтад хүрч эхэлсэн ч уур амьсгалын өөрчлөлтийн сөрөг нөлөө хэдэн арван жил үргэлжилнэ. Энэ нөхцөлд дасан зохицох хамгийн сайн аргуудын нэг бол байгалийн гамшгийг ажиглах, урьдчилан сэрэмжлүүлэх арга хэрэгсэлд хөрөнгө оруулах юм” гэжээ.

Дэлхийн дундаж температур одоо аж үйлдвэржилтийн өмнөх үеийнхээс 1.2 хэмээр дулаан байгааг тайланд тэмдэглэжээ. “2011-2020 он цаг уурын ажиглалтын түүхэн дэх хамгийн халуун жилүүд байсан” гэж тайланд дурдсан байна.

Categories
мэдээ нийгэм

Т.Чимгээ, Б.Содномдаржаа нар ирэх сард батлан даалтаар суллагдана

С.Зоригийн амь насыг хөнөөсөн хэрэгт буруутгагдсан ял эдэлж байгаа Т.Чимгээ, Б.Содномдаржаа нар ирэх сард батлан даалтаар суллагдах аж.

Тодруулбал, Б.Содномдаржаа, Т.Чимгээ нарыг нар эрүүдэн шүүсэн хэрэгт Б.Хурц нарт ял оноосон шүүхийн шийдвэрийг үндэслэн Улсын ерөнхий прокурорын газраас шинээр илэрсэн нөхцөл байдлын улмаас Т.Чимгээ, Б.Содномдаржаа нарт ял оноосон шүүхийн шийдвэрийг хүчингүй болгох тухай Прокурорын дүгнэлт үйлдэж Дээд шүүх рүү хүргүүлсэн байна.

Энэ дүгнэлтийг үндэслэн Дээд шүүх Т.Чимгээ, Б.Содномдаржаа нарт ял оноосон шүүхийн шийдвэрийг хүчингүй болгосноор хэрэг мөрдөн байцаалтанд буцах юм. Тэгснээр шийтгүүлсэн хүмүүс батлан даалтаар суллагдах боломж бүрдэх юм.

Categories
гадаад мэдээ

Владимир Путин өнгөрсөн онд 9.9 сая рублийн орлого олжээ

ОХУ-ын Ерөнхийлөгч Владимир Путин 2020 онд 9.994 сая рублийн орлоготой байсан нь өнгөрсөн баасан гаригт нийтлүүлсэн ашиг орлогын мэдүүлэгт дурджээ.

Путин 2019 онд 9.726 сая рубль, өмнөх 2018 онд 8.648 сая рублийн ашигтай байжээ.

Тэгвэл Ерөнхий сайд Михаил Мишустин 2020 онд 199 сая рублийн орлого олсноо мэдүүлсэн байна. БХЯ-ны сайд Сергей Шойгу 15.9 сая рубль, Гадаад хэргийн сайд Сергей Лавров ойролцоогоор 1.,2 сая рубль, Эрүүл мэндийн сайд Михаил Мурашко 26.3 сая рубль, Сангийн сайд Антон Силуанов 34.9 сая рублийн ашигтай байснаа тус тус мэдүүлжээ

Categories
мэдээ нийгэм

Сансар болон 100 айл, Бөмбөгөр, 120 мянгат, 19 дүгээр хорооллын гүүрэн гарцуудыг угааж, цэвэрлэжээ

Нийслэлийн Засаг дарга бөгөөд Улаанбаатар хотын Захирагч Д.Сумъяабазар Нийслэлийн удирдах ажилтнуудын шуурхай зөвлөгөөнөөр зам засвар, арчлалтын ажлыг эрчимжүүлэх үүрэг өгсөн.

Дөрөвдүгээр сарын 17-19-ний хооронд Сансарын нүхэн гарц болон 100 айл, Бөмбөгөр, 120 мянгат, 19-р хорооллын гүүрэн гарцуудын гадна, дотор шилэн фасад, тоноглолуудыг бүрэн угааж, цэвэрлэжээ.

Цэвэрлэгээний ажилд нийт хоёр техник, 23 ажилтан ажилласан байна.

Энэ хүрээнд “Улаанбаатар зам засвар, арчлалтын газар” ОНӨААТҮГ нь гамшгаас хамгаалах бүх нийтийн бэлэн байдалд шилжсэн хугацаанд зам засвар, арчлалт, үйлчилгээний ажлуудыг үе шаттайгаар хийж байна.

Categories
мэдээ нийгэм

“Цэргийн албатай холбоотой зөрчлийн үндэс шалтгааныг олж, таслан зогсоохын тулд онцгой анхаарч ажиллаж байна” гэв

Зэвсэгт хүчний жанжин штабаас мэдээлж байна.

ЗХЖШ-ын дарга, хошууч генерал Ц.Ганзориг “Зэвсэгт хүчний нийт бие бүрэлдэхүүн нь эх орноо харийн түрэмгийлэгчдээс хамгаалах, аж үйлдвэрлэл, улс орны аж ахуйг хөгжүүлэх зэрэг цаг ямагт манлайлсаар ирсэн.

Бид сүүлийн үед цахим орчинд өрнөсөн цэргийн албатай холбоотой зөрчлийн үндэс шалтгааныг олж, таслан зогсоохын тулд онцгой анхаарч ажиллаж байна.

Зэвсэгт хүчнээ улс төржүүлэх, улс төрийн үйл ажиллагаандаа татан оруулснаар иргэний дайнд хүргэж, улс орноо мөхөөх хүртэлх түүх олон бий. Энэ гашуун түүх манай Монголд бүү тохиолдоосой гэдгийг ЗХЖШ-ын даргын хувьд хэлье.

Ард түмнээс сонгогдсон УИХ-ын гишүүдийг бид хүндэтгэдэг. Гэхдээ зэвсэгт хүчинтэй холбоотой нээлттэй хэлэлцүүлэг хийсэн нь төрийн болон албаны нууцыг алдагдуулах нөхцөл үүссэн гэж үзэж байгаа.

Өчигдөр Монгол Улсын Ерөнхийлөгч төрийн ордонд мэдээлэл хийснийхээ дараа ЗХЖШ дээр ирсэн. Ингэхдээ гурван чиглэлээр үүрэг өгсөн. Үүнд,

-Цэргийн албыг сайжруулах асуудлаар гаргасан ажлын хэсгийн үйл ажиллагааны талаар ярилцсан.

-Зэвсэгт хүчний 100 жилийн ойг тэмдэглэн өнгөрүүлэхийг хойшлуулж, хэзээ хаана ямар арга хэмжээ зохион байгуулах боломжтой талаар санал солилцсон.

-Цэргийн нэгдсэн холбоотой хамааралтай үйл ажиллагааны талаар лавлаж асуусан. Гэтэл өчигдөр орой Монгол Ардын Намаас мэдээлэл хийхдээ, Ерөнхийлөгчийн ЗХЖШ дээр ирсэн асуудлыг улс төрийн өнгө аястай болгож ярьж байгааг ЗХЖШ-аас албан ёсоор няцааж байна” гэв.

Categories
мэдээ улс-төр

ХЗБХ: Ерөнхийлөгч дахин нэр дэвших эрхгүй гэсэн Цэцийн дүгнэлтийг дэмжив

УИХ-ын Хууль зүйн байнгын хорооны өнөөдрийн хуралдаанаар Үндсэн хуулийн цэцийн 2021 оны 02 дугаар дүгнэлт буюу Ерөнхийлөгчийн сонгуулийн тухай хуультай холбоотой Цэцийн дүгнэлтийг хэлэлцлээ.

Хуралдаанд оролцсон гишүүдийн олонх нь Үндсэн хуулийн цэцийн дүгнэлтийг хүлээн авах нь зүйтэй гэж үзлээ. Ингэснээр байнгын хорооны санал дүгнэлтийг энэ долоо хоногт УИХ-ын чуулганы нэгдсэн хуралдаанд танилцуулахаар боллоо.

Үндсэн хуулийн цэц “Ерөнхийлөгчөөр сонгогдож байсан болон ерөнхийлөгчөөр ажиллаж буй хүн дахин нэр дэвших болоод Ерөнхийлөгчийн сонгуулийн тухай хуулийн 3.1-ийн 2. 5.4 дэх заалтууд нь Үндсэн хуулийн 1.2, 30.2, 70.1 гэсэн заалтуудыг тус тус зөрчинө” гэсэн дүгнэлтийг гаргасан.

Categories
мэдээ нийгэм

Монгол-Японы эмнэлэгт 74 ор бэлтгэж, хүндэвтэр болон хүнд өвчтөн авч эхэлжээ

Өчигдөр Монгол-Япон эмнэлэгт “ковид19”-ийн өвчтөн хүлээн авч эхэлжээ. Тус эмнэлэг 74 ор бэлтгэж хүндэвтэр, хүнд хүмүүсийг авах бөгөөд одоогоор 30 гаруй хүнийг хүлээн авч эмчилгээг эхлүүлсэн байна.

Мөн АШУҮИС-ийн оюутны байранд 450 орчим хүн авах бэлтгэл ажлын явцыг шалгах чиглэлийг Эрүүл мэндийн сайд С.Энхболд өгчээ.

Түүнчлэн ахмадын эмнэлэгт 100 ор гаргаж коронавирусийн халдварт өвчтөн авахаар болжээ. Тус эмнэлэг хүчилтөрөгчийн хангамжтай зургаан ор бэлдсэн байна. Нэмж дөврөн ор бэлтгэхийг үүрэг болгож шаардлагатай зардлыг шийджээ.

Categories
мэдээ нийгэм

Нийслэлийн болон төрийн өмчийн байгууллагын том оврын 40 автобусыг явуулын цэг болгожээ

Нийслэлийн болон төрийн өмчийн байгууллагын том оврын 40 автобусыг явуулын цэг болгосон байна.

Мөн вакцин хийлгэсэн иргэдийг ажиглах, эрүүл мэндийн үзлэг, бүртгэл хийх, эмч ажилчид ашиглах автобусыг ч бэлджээ. Явуулын цэг хүн ам ихтэй хэсэг болон алслагдсан хороодод ажиллах юм.

Монгол Улсын Шадар сайд, Улсын онцгой комиссын дарга С.Амарсайхан дархлаажуулалтын цэгийн ачааллыг бууруулах, хүртээмжийг нь нэмэх, ахмад настан, хөгжлийн бэрхшээлтэй иргэдийг зөөвөрлөхтэй холбоотой шийдэл гаргахыг холбогдох албаныханд үүрэг болгосон. Тэрбээр “Зорчигч тээврийн нэгтгэл”-д өнөөдөр ажиллан явуулын цэгийн бэлэн байдлыг шалгасныг Шадар сайдын Ажлын албанаас мэдээллээ.