Month: March 2021

Categories
мэдээ улс-төр

Шүүхийн сахилгын хорооны шүүгч бус гишүүнийг сонгон шалгаруулах журам батлав

Улсын Их Хурлын Хууль зүйн байнгын хороо өнөөдөр хуралдаж “Шүүхийн ерөнхий зөвлөлийн болон шүүхийн сахилгын хорооны шүүгч бус гишүүнийг сонгон шалгаруулах журам” батлах тухай Байнгын хорооны тогтоолын төслийг хэлэлцлээ.

Монгол Улсын шүүхийн тухай хууль энэ сарын 1-нээс хэрэгжиж эхэлсэн ба үүнтэй холбогдуулан Шүүхийн ерөнхий зөвлөлийн болон шүүхий сахилгын хорооны шүүгч бус гишүүнд тавих шаардлагыг хамгийн сайн хангасан иргэнийг сонгон шалгаруулах, томилуулах тухай уг журам боловсруулагдсан хэмээн Байнгын хорооны дарга С.Бямбацогт хуралдааны эхэнд танилцуулав.

Хэлэлцэж буй асуудалтай холбогдуулан Улсын Их Хурлын гишүүн Ш.Раднаасэд, Ж.Сүхбаатар, Н.Алтанхуяг, Д.Ганбат нар тус журамд заасан зарим зүйл, заалт нь Шүүхийн тухай хуультай зөрчилдөж байгаа эсэх тухай тодруулга авч, зарим заалтуудыг нэгтгэх, найруулгын чанартай өөрчлөлт оруулах тухай санал хэлсэн.

Байнгын хорооны дарга гишүүдээс гарсан санал, зарчмын зөрүүтэй томьёоллыг судлах, журамд тусгах эсэх тухай үүргийг Ажлын хэсэгт өгч, хэлэлцсэний дараа “Шүүхийн ерөнхий зөвлөлийн болон шүүхийн сахилгын хорооны шүүгч бус гишүүнийг сонгон шалгаруулах журам”-ыг батлах тухай Байнгын хорооны тогтоолын төсөл хуралдаанд оролцсон гишүүдийн 72,7 хувийн дэмжлэгтэйгээр батлагдлаа.

Үргэлжүүлэн Монгол Улсын шүүхийн тухай хууль /шинэчилсэн найруулга/-ийн хэрэгжилтийг хангах үүрэг бүхий Ажлын хэсэг байгуулах тухай асуудал хэлэлцлээ. Хэлэлцэж буй асуудалтай холбогдуулан үг хэлэх, санал хэлэх гишүүн байгаагүй ба Байнгын хорооны тогтоолын төсөл 72,7 хувийн саналаар батлагдав.

Ажлын хэсгийн ахлагчаар Улсын Их Хурлын гишүүн Ж.Сүхбаатар, бүрэлдэхүүнд Улсын Их Хурлын дөрвөн гишүүн, Шүүхийн ерөнхий зөвлөлийн гишүүн С.Атарцэцэг, Хууль зүй, дотоод хэргийн яамны Төрийн нарийн бичгийн дарга Б.Баасандорж, Улсын Дээд шүүхийн Тамгын газрын дарга С.Амардэлгэр, Ажлын хэсгийн нарийн бичгийн даргаар Улсын Их Хурлын Хууль зүйн байнгын хороо хариуцсан ахлах зөвлөх М.Үнэнбат нар ажиллахаар тогтов.

Дараа нь “Сонгон шалгаруулалтын бүртгэлийн хугацааг тогтоож, хүсэлт, материал хүлээн авах тухай” Байнгын хорооны тогтоолын төслийг хэлэлцэв.

Монгол Улсын Их Хурлын тухай хуулийн 25 дугаар зүйлийн 25.6 дахь хэсэг, Монгол Улсын шүүхийн тухай хууль /шинэчилсэн найруулга/-ийн 77 дугаар зүйлийн 77.1.2 дахь заалтыг тус тус үндэслэн Шүүхийн ерөнхий зөвлөлийн болон шүүхий сахилгын хорооны гишүүнд нэр дэвшигчийг 2021 оны гуравдугаар сарын 10-ны өдрөөс 2021 оны гуравдугаар сарын 31-ний өдрийн 17 цаг 30 минут хүртэл бүртгэх, Сонгон шалгаруулалтын зарыг олон нийтэд мэдээлэх, нэр дэвшигчийн хүсэлт, материалыг хүлээн авах ажлыг холбогдох хууль тогтоомжийн хүрээнд зохион байгуулах тухай Байнгын хорооны тогтоолын төсөл хуралдаанд оролцсон гишүүдийн олонхын саналаар батлагдав.

Хуралдааны төгсгөлд Мөрдөн шалгах, хяналт тавих байгууллагын үйл ажиллагаатай танилцаж, Гүйцэтгэх ажлын тухай хуулийн хэрэгжилтийг хангах явцад хүний үндсэн эрх, эрх чөлөө зөрчигдөхөөс урьдчилан сэргийлэх, хяналт тавих, хариуцлага тооцох чиглэлээр хэрхэн ажиллаж байгаад үнэлгээ хийж, санал, дүгнэлт гаргах, холбогдох эрх зүйн зохицуулалтыг боловсронгуй болгох тухай хууль тогтоомжийн төслийг боловсруулах үүрэг бүхий Ажлын хэсэг байгуулах тухай асуудал хэлэлцэв.

Хэлэлцэж буй асуудалтай холбогдуулан Улсын Их Хурлын гишүүн Н.Алтанхуяг, Б.Энхбаяр, Б.Пүрэвдорж, Б.Энх-Амгалан, Д.Ганбат нар санал, үг хэлсэний дараа Ажлын хэсэг байгуулах тухай Байнгын хорооны тогтоолын төсөл хуралдаанд оролцсон гишүүдийн 80,0 хувийн саналаар батлагдав. Ажлын хэсгийн ахлагчаар Хүний эрхийн дэд хорооны дарга, Улсын Их Хурлын гишүүн Б.Энхбаяр, гишүүдээр Улсын Их Хурлын гишүүн Н.Атанхуяг, С.Бямбацогт, Д.Ганбат, Б.Энх-Амгалан нар ажиллахаар тогтлоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Categories
мэдээ нийгэм

Ц.Мөнхцэцэг: Эмэгтэй хууль тогтоогчид тэгш бус байдлыг багасгах, эрүүл мэндийг дэмжих бодлогыг хэрэгжүүлж үр дүн гаргаж чаддаг

Олон улсын эмэгтэйчүүдийн эрхийг хамгаалах өдрийг угтан “Эмэгтэйчүүдийн улс төрийн оролцооны үнэ цэнэ” сэдэвт онлайн хэлэлцүүлэг өнөөдөр зохион байгууллаа.

Хэлэлцүүлгийг нээж Япон Улсаас Монгол Улсад суугаа Онц бөгөөд Бүрэн эрхт Элчин сайд Кибояши Хироюки, УИХ-ын гишүүн Ц.Мөнхцэцэг нар нээж үг хэлсэн юм.

Япон Улсаас Монгол Улсад суугаа Онц бөгөөд Бүрэн эрхт Элчин сайд Кибояши Хироюки “Япон Улсын Засгийн газар, Японы хөгжлийн хамгийн том нөөц бололцоо болгох үүднээс “Эмэгтэйчүүдийн хүч”-ийг ашиглан эмэгтэйчүүдийн хөдөлмөр эрхлэлтийг дэмжих асуудлыг нэн чухал асуудлын нэгд оруулахаар дэвшүүлж байна. Япон Улсын ГХЯ-ны тухайд ч мөн 2014 оноос хойш WAW буюу “Дэлхийн эмэгтэйчүүдийн чуулга уулзалт”-ыг 5 удаа зохион байгуулж ирсэн. Түүнчлэн НҮБ-ийн Эмэгтэйчүүдийн байгууллага зэрэгтэй хамтран ажиллаж дэлхийн бүхий л улс оронд жендерийн тэгш байдлыг хангах болон эмэгтэйчүүдийн эрх мэдлийг нэмэгдүүлэхийг сурталчлах, дэмжлэг үзүүлэх төсөл хөтөлбөрүүдийг хэрэгжүүлж байна.

Дэлхийн эдийн засгийн форумаас жил бүр гаргадаг “Жендерийн зөрүүтэй байдлын индекс”-ийг авч үзвэл, 2019 онд Япон Улс 153 орноос 121-р, Монгол Улс 79-р байранд орсон байна. Японы жендерийн зөрүүтэй байдлын индексийн тухайд ялангуяа, улс төр, бизнесийн салбарт өөрчлөлт хийх хэрэгтэй хэмээн тэмдэглэсэн байна. Энэ семинар нь эдгээр асуудлыг шийдвэрлэхэд бага ч байтугай хувь нэмрээ оруулна хэмээн найдаж байна. Мөн энэ үйл ажиллагаагаар дамжуулан хоёр орны өнөөгийн нөхцөл байдал болоод тулгарч буй асуудлын талаархи ойлголтыг гүнзгийрүүлж талууд харилцан суралцах, эрдэмтэн судлаачдын санал бодлоо солилцох энэ талбар нь цаашдын хоёр орны хамтын ажилагааг өрнүүлэх боломж болох аваас туйлын их баяртай байна” гэв.

-Эмэгтэй хууль тогтоогчид тэгш бус байдлыг багасгах, боловсрол, эрүүл мэндийг дэмжих бодлогыг хэрэгжүүлж үр дүн гаргаж чаддаг-

Харин УИХ-ын гишүүн Ц.Мөнхцэцэг “Монгол Улс дахь Японы Элчин сайдын яамнаас “Эмэгтэйчүүдийн улс төрийн оролцооны үнэ цэнэ” онлайн хэлэлцүүлгийг хамтран зохион байгуулах санал тавьсанд УИХ дахь Хүний эрхийн дэд хорооны гишүүний хувиар талархан хүлээж авсан. Энэ дашрамд талархал илэрхийлье. Дэлхийн улс орон, бүс нутгийн хэмжээнд хүний эрх, тэгш эрхийг хангаж, ялгаварлан гадуурхалттай тэмцэх орчин хангалттай сайн бүрдээгүй боловч Япон болон Монгол Улсад харьцангуй сайн үнэлгээтэй байгаа. Гэхдээ улс төрийн болон шийдвэр гаргах түвшинд төдийлөн сайн биш буюу жендерийн тэгш эрхийг хангах квотдоо хүрээгүй байна. Эмэгтэйчүүд улс төрд оролцсоноор төрийн бодлогод чанарын өөрчлөлт гардаг төдийгүй авлигын түвшин буурдаг гэх судалгааны үр дүн бий. Тиймээс бид шийдвэр гаргах, бодлого боловсруулах түвшинд эмэгтэйчүүдийн төлөөллийг нэмэгдүүлж, манайлагч эмэгтэйчүүдээ дэмжих, хүчтэй дуу хоолой болгоход нөлөөлөл үзүүлэх шаардлагатай байгаа юм. Эмэгтэйчүүдийн эрх бол хүний эрх, хүний эрх бол эмэгтэйчүүдийн эрх билээ.

Ингээд энэхүү хэлэлцүүлэгт хүндэт зочноор оролцож буй Япон Улсаас Монгол Улсад суугаа Элчин сайд Кибояши Хироюки болон зочдод сонирхолтой сэдвээр илтгэх тавих Японы Софиа их сургуулийн профессор, доктор Мари Миүра, зохиолч, сэтгүүлч Б.Шүүдэрцэцэг нарт талархал илэрхийлэхийн сацуу Олон улсын эмэгтэйчүүдийн эрхийг хамгаалах өдрийн баярын мэндийг хүргэе” гэв.

Мөн тэрбээр “Тэгш бус байдлыг бууруулахын төлөө эмэгтэйчүүдийн улс төр дэх төлөөллийг нэмэгдүүлэх нь” сэдвээр илтгэл тавьсан юм. Энэ үеэр УИХ-ын гишүүн Ц.Мөнхцэцэг “Гэр бүлийн хүчирхийлэл, нийгмийн халамж, эрүүл мэнд, боловсролтой холбоотой нийгмийн тулгамдсан асуудалд зөвхөн эмэгтэйчүүд анхаарах ёстой мэтээр ташаа ойлголт хандлага олон нийтийн дунд түгээмэл байна. Олон нийтийн дунд байгаа нийгмийн ёс суртахуунгүй байдал, ажилгүйдэл, ядуурал, хүчирхийллийн буруутан нь эмэгтэйчүүд өөрсдөө гэх ташаа төсөөллийг өөрчлөх, жендэрийн боловсролд анхаарах цаг иржээ. Дэлхийн улс төрийн практикаас үзэхэд эмэгтэйчүүд улс орны нийтлэг эрх ашгийн төлөө нам, үзэл баримтлал, шашин шүтлэг зэрэг ялгааг давж ажиллах магадлал өндөр байдаг. Эмэгтэй хууль тогтоогчдын эзлэх хувь өндөр парламент хүний эрх, гэр бүлийн хүчирхийлэл, бэлгийн дарамтын эсрэг хуулиудыг багтаасан жендэрийн тэгш байдлыг хангах хууль тогтоомжийг баталж хэрэгжүүлдэг. Мөн эмэгтэй хууль тогтоогчид тэгш бус байдлыг багасгах, боловсрол, эрүүл мэндийг дэмжих бодлогыг хэрэгжүүлж үр дүн гаргаж чаддаг” гэдийг онцолсон юм.

Үүний дараа Японы Софиа их сургуулийн профессор, доктор Мари Миүра “Жендэрийн тэгш байдлын төлөөх эмэгтэйчүүдийн хѳдѳлгѳѳн: соёлын шилжилт ба хууль эрх зүйн өөрчлөлт” сэдвээр илтгэл тавьсан бөгөөд тэрбээр Японд эмэгтэйчүүд ажил хөдөлмөр эрхлэх явцдаа улс төрийн ажилд оролцож болдоггүй хатуу дүрэм үйлчилдэг нь эмэгтэйчүүдийг шийдвэр гаргах түвшинд оролцоотой байхад сөргөөр нөлөөлдөг гэдгийг илтгэлийнхээ үеэр дурдлаа.

Мөн Зохиолч, сэтгүүлч Б.Шүүдэрцэцэг “Эмэгтэйчүүдийн талаарх хэвлэл мэдээлэл ба олон нийтийн хандлага: Социализмын болон түүний дараах үед” сэдвээр тавьсан юм. Тэрбээр илтгэлдээ “Хэвлэл мэдээллийн хэрэгсэлд мэдээллийн гол баатрууд дийлэнхдээ эрэгтэйчүүд байгаа нь нийгэм дэх эмэгтэйчүүдийн дүр төрх, эмэгтэйчүүдийг үнэлэх үнэлэмжид сөргөөр нөлөөлж байна. Нийгмийн сүлжээнд ч, ХМХ-д ч улстөрч, шийдвэр гаргагч эмэгтэйчүүдийг илүү сөрөг талаас нь дүрслэх, эмэгтэй хүн олон хүүхэд төрүүлж эх болох, хохирогч байвал илүү эерэгээр ханддаг байдал арилахгүй үргэлжилсээр л байна. Монголын хэвлэл мэдээллээр цацаж буй зар сурталчилгаанд хүртэл эмэгтэйчүүдийг гал тогооны хэрэгсэл эзэмшигч, эх, гэрийн эзэгтэйн үүрэгтэйгээр үзүүлэх нь буурахгүй байгаа бөгөөд хоёр жилийн өмнө ягаан өнгөтэй хайруулын тавгийг Мартын 8-ны шилдэг бэлэг гэсэн сурталчилгаа фэйсбүүкт цацагдаад эмэгтэйчүүдийн эсэргүүцлээр устгаж байсан удаатай” гэдгийг онцолсон юм.

Харин оролцогчдын зүгээс шийдвэр гаргах түвшинд эмэгтэйчүүдийн оролцоог нэмэгдүүлж, бүхий л салбарт жендерийн мэдрэмжтэй манлайлал бий болгох нь зүйтэй гэдэг байр суурьтай байлаа. Эмэгтэйчүүдээ дэмжиж, улс төр, нийгмийн хөгжилд шинэ хандлага, соёл бий болгож, оролцоо, тэгш төлөөллийг нэмэгдүүлэх гарцын талаар зөвлөлдсөн энэхүү хэлэлцүүлгийг Жендерийн үндэсний хороо, Монголын эмэгтэйчүүдийн холбоо, Нийгмийн ардчилал монголын эмэгтэйчүүдийн холбоо дэмжин оролцов.

Categories
гадаад мэдээ

Шинэ Зеландын эрэгт 8.1 магнитудын хүчтэй газар хөдөлжээ

Шинэ Зеландын эрэгт 8.1 магнитудын хүчтэй газар хөдлөлт
болсон талаар тус улсын Гамшгаас хамгаалах үндэсний агентлаг мэдээлжээ.

Газар
хөдлөлтийн голомт тус улсын Факатане хотоос 1100 километрт бүртгэгдсэн байна.
Газар хөдлөлтийн улмаас цунамийн аюул нүүрлэж болзошгүй талаар тус улсын
Гамшгаас хамгаалах үндэсний агентлаг мэдээлжээ. Улмаар оршин суугчдыг эргийн
бүс нутгийг орхин явж, голоос аль болох хол байхыг анхааруулсан байна.

АНУ-ын
Геологийн албанаас мэдээлснээр өнгөрсөн хоногт Шинэ Зеландад 6.5 болон 7.4
магнитудын хүчтэй газар хөдлөлт дөрвөн ч удаа бүртгэгджээ. Шинэ Зеландын эрэгт
байнга газар хөдөлдөг. Өнгөрсөн нэгдүгээр сард 5.8 магнитудын хүчтэй газар
хөдөлсөн бөгөөд голомт нь Данидин хотоос баруун өмнө зүгт 851 км-т, Блафф
хотоос 680 км-т тус тус бүртгэгдсэн байна. 2019 оны дундуур Л Эсперанс арлаас
зүүн хойд зүгт 103 км-т 7.2 магнитудын хүчтэй газар хөдөлж байжээ.

Categories
мэдээ нийгэм

Тусгаарлах байрны төлбөр буцаах болон зөрүү авах иргэдийн анхааралд

Тусгаарлах байрны төлбөр буцаах болон зөрүү авах иргэд бичиг баримтыг obeg.sankhuu@gmail.com хаягаар явуулна.

Иргэд өргөдөл, шилжүүлгийн баримт болон иргэний үнэмлэхний хуулбарын хамт илгээнэ гэж Онцгой байдлын ерөнхий газраас мэдээллээ.

Categories
мэдээ нийгэм

“Тогтвортой хөдөө аж ахуй” төслийн удирдах хорооны хурал боллоо

Герман-Монголын хамтын ажиллагааны “Тогтвортой хөдөө аж ахуй” төслийн ээлжит Удирдах хорооны хурлыг өнөөдөр цахимаар зохион байгууллаа.

Тус хурлаар өнгөрсөн хугацаанд төслийн хүрээнд хуримтлуулсан мэдлэг туршлагыг илүү олон тариаланчдад хүргэх ажлыг эрчимжүүлэх, зорилтот бүлгүүдийн хэрэгцээ шаардлагад тулгуурласан ажлуудаа үргэлжлүүлэхээр тогтлоо.

Хуралд Хүнс, хөдөө аж ахуй, хөнгөн үйлдвэрийн яамны Газар тариалангийн бодлогын хэрэгжилтийг зохицуулах газрын дарга, Удирдах хорооны дарга В.Үнэнбат, Холбооны Хүнс, хөдөө аж ахуйн яамны “Олон улсын төсөл хөтөлбөр” хариуцсан 624-р рефератын дарга Б.Хоффштадт, төсөл хамтран хэрэгжүүлэгч монгол, герман талын албаны болон эрдэм шинжилгээ, сургалтын байгууллагуудын төлөөллүүд оролцов. Хурлаар төслийн гуравдугаар үе шатны хэрэгжилтийн үр дүнгийн тайланг хэлэлцэж, 2021 онд хэрэгжүүлэх үйл ажиллагааны төлөвлөгөөний төслийг танилцуулж, баталсан юм.

Тус төслийн зорилго нь Монгол Улсын хүнс, хөдөө аж ахуйн салбарын эдийн засаг, нийгэм, экологийн тогтвортой хөгжилд дэмжлэг үзүүлэхэд оршино. Энэхүү зорилгын хүрээнд салбарын төрийн бодлогын хэрэгжилтийг хангахад газар тариалангийн холбогдох хууль эрх зүйн орчныг боловсронгуй болгох, таримал ургамлын сорт сорилт, үр үржүүлгийн системийг бий болгох, тариалангийн хөрсний үржил шимийг сайжруулах, газар тариалангийн зохистой дадал, ургамал хамгааллын зохистой хэрэглээг төлөвшүүлэх, газар тариалангийн үйлдвэрлэлийг үр ашигтай эрхлэх зэрэг чиглэлээр судалгаа, мэргэжлийн зөвлөгөө, сургалт, семинар, хэлэлцүүлгийг байнга зохион байгуулж иржээ.

Монгол Улсын гадаад бодлогын үзэл баримтлалд Монгол Улсын төрийн гадаад бодлогын нэг хэсэг нь “гуравдагч хөрш”-ийн бодлого хэмээн заасан байдаг бөгөөд ХБНГУ-ыг түншлэлийн харилцаа, хамтын ажиллагааныхаа гурав дахь хөрш, Европ тив дэх гол хамтрагчаа гэж үздэг. Хоёр улсын хамтын ажиллагаа олон салбарт амжилттай хэрэгжиж байгаагийн нэг нь хүнс, хөдөө аж ахуйн салбар билээ. Одоогоос арваад жилийн өмнө Холбооны ХХААЯ-ны Төрийн нарийн бичгийн дарга Мюллерын Монгол Улсад хийсэн айлчлалын үеэр хамтарсан төсөл хэрэгжүүлэх тухай яриа хэлэлцээг хийж тохиролцсон байдаг. Анх 2013 онд хамтран эхлүүлсэн “Тогтвортой хөдөө аж ахуй” төсөл өнөөдөр гурав дахь үе шатандаа амжилттай хэрэгжиж байна.

Төслийн үндсэн чиглэлүүд, хэрэгжүүлсэн үйл ажиллагааны талаар дэлгэрэнгүй мэдээллийг www.dmknl.de/mn цахим хуудаснаас үзнэ үү.

Categories
мэдээ нийгэм цаг-үе

Х.Чимгээ: Нийслэлд 6700 орчим аж ахуйн нэгж, байгууллага, иргэн үйл ажиллагаа явуулж байна

Өнгөрсөн хоёрдугаар сарын 23-наас хөл хорионы дэглэмийг сулруулж, аж ахуй нэгжүүдийн үйл ажиллагааг эхлүүлсэн.

УОК-оос Коронавируст халдварын цар тахлаас урьдчилан сэргийлэх, тэмцэх, нийгэм эдийн засагт үзүүлэх, сөрөг нөлөөллийг бууруулах тухай хууль, Засгийн газрын 2021 оны 45 дугаар тогтоолыг тус тус үндэслэн УОК-ын даргын түр журам батлах тухай тушаал гарсан.

Энэ шийдвэрийн хүрээнд НМХГ-аас аж ахуйн нэгж, байгууллага, иргэдэд зөвлөн туслах үйлчилгээ үзүүлж байна.

НМХГ-ын ХАБХААХХ-ийн Хүнсний чанар, стандартын улсын байцаагч Х.Чимгээ “Бүх нийтийн бэлэн байдлаас өндөржүүлсэн бэлэн байдалд шилжсэнтэй холбогдуулан УОК-оос гарсан түр журам, түүнийг дагалдан гарсан “Тусгай нөхцөл шаардлага”-ыг нийслэлийн хэмжээнд үйл ажиллагаа явуулж байгаа хүнсний худалдаа эрхлэгч аж ахуй нэгжүүдэд хүргүүлээд байна. Есөн дүүргийн хэмжээнд 6700 орчим хүнсний худалдаа эрхлэгч аж ахуйн нэгж, байгууллага, иргэн /ТҮЦ/ үйл ажиллагаа явуулж байгаа.

Худалдаа, үйлчилгээний газрууд нь өдөр тутмын үйл ажиллагаанд халдвар хамгаалын дэглэмийг мөрдүүлэх, худалдааны танхим, лангуу тавиур, тасаг, павильон, худалдан авагчийн зорчих хэсэг, үйлчлүүлэх хэсэг, тооцооны цэг бүрт “QR” код байршуулж бүртгэл хийх, үйлчлүүлэгчдийн бөөгнөрөл үүсгэхгүй байхад чиглэсэн тэмдэг, тэмдэглэгээг хийх, агаар сэлгэлтийг тогтмол хийж хэвшүүлэх, мөн худалдааны газрын тусгай нөхцөл шаардлагыг хангаж ажиллах талаар зөвлөмж хүргүүлэн, зөвлөн туслах үйлчилгээ үзүүлэн ажиллаж байна.

Өнөөдрийн байдлаар “Түр журам”, түүнийг дагалдан гарсан “Тусгай нөхцөл шаардлага”-ыг биелүүлэн, даган мөрдөж байгаа жишиг аж ахуй нэгжүүд олон бий. Тухайлбал, томоохон зах худалдааны төв, хүнсний дэлгүүрүүд нь иргэд үйлчлүүлэгчдийн болон, ажилчдын аюулгүй байдлыг хангаж, халдваргүйжүүлэгч хаалга, ухаалаг халуун хэмжигч суурилуулан, хүн хоорондын зайг тэмдэглэгээгээр тодотгож өгсөн, QR код уншуулах дотоодын ажилтан томилж, түүнд хяналт тавих, үйлчилгээний газрууд кассын хэсэгт тусгаарлагч шилэн хаалт байршуулсан. Мөн лифтний товч, урсдаг шатны бариул, хаалга, үүдний бариул зэргийг хоёр цаг тутам ариутгаж цэвэрлэн, халдваргүйжүүлэлт хийж, шууд иргэдийн гарт хүрэх хүнсний бүтээгдэхүүнийг савлан борлуулж, халдвараас сэргийлэх зэргээр зөвлөн туслах үйлчилгээг дагаж мөрдөн ажиллаж байна” гэв.

НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС

Categories
мэдээ эдийн-засаг

“Үхэр жил” дурсгалын мөнгөн зоос худалдаанд гарлаа

Монголбанкны Эрдэнэсийн сангаас энэ онд Цөөвөр хэмээх цагаагчин үхэр жилд зориулан “Үхэр жил” 1 унцын 999 сорьцтой мөнгөн зоосыг худалдаанд гаргажээ.

Тус дурсгалын зоосыг хамгийн сүүлийн үеийн Smartminting технологиор урлаж, хэсэгчлэн алтаар бүрсэн байна.

Монголбанкны Эрдэнэсийн сангаас дурсгалын зоос, алт, мөнгөн гулдмай, үрлэн мөнгийг худалдан борлуулж байгаа аж.

Categories
мэдээ нийгэм цаг-үе

ЦЕГ: Гэр бүлийн хүчирхийллийн 108 дуудлага бүртгэгджээ

Энэ сарын 4-нд буюу өчигдөр цагдаагийн байгууллагын 102 дугаарын утсанд нийт 1540 гомдол мэдээлэл иржээ.

Үүнээс зөрчлийн дуудлага мэдээлэл 1265, хулгайтай холбоотой 13, гэр бүлийн хүчирхийллийн дуудлага 108, гэмт хэргийн шинжтэй 69 мэдээлэл ирсэн байна.

Үүнээс гадна автомашин согтуу жолоодсон 62, олон нийтийн газар зүй бусаар биеэ авч явж, танхайрсан 124, хүний биед халдсан 54, Архидан согтуурахтай тэмцэх тухай хууль зөрчсөн 61, эрүүлжүүлэгдсэн 212, оршин суугчдын амгалан тайван байдал алдагдуулсан 75 тохиолдол гарчээ.

Categories
мэдээ нийгэм

Франц улсаас цар тахалтай тэмцэхэд зориулан 184 сая төгрөгийн үнэ бүхий тусламж олголоо

Бүгд Найрамдах Франц болон Европын холбооноос олгох тусламжийг хүлээлгэн өгөх ёслолын арга хэмжээ болов.

Тус арга хэмжээнд Эрүүл мэндийн сайд С.Энхболд, Европын Холбооноос Монгол Улсад суугаа Элчин Сайд Траян Лауренцю Христей, Бүгд Найрамдах Франц Улсаас Монгол Улсад суугаа Онц Бөгөөд Бүрэн Эрхт Элчин Сайд Филипп Мэрлин нар оролцлоо.

Монгол Улс, Бүгд Найрамдах Франц Улсын Эрүүл мэндийн салбар дахь харилцаа, хамтын ажиллагаа, тогтвортой хөгжиж байгаад, ялангуяа ГССҮТ болон Франц Улсын эрүүл мэндийн байгууллага хоорондын хамтын ажиллагаа өргөжиж байгаад миний бие баяртай байна гэж Эрүүл мэндийн сайд С.Энхболд онцоллоо.

Гэмтэл согог судлалын үндэсний төвд 20 гаруй жилийн турш Франц Улсын эмч, мэргэжилтнүүд ирж, орчин үеийн оношилгоо, эмчилгээний шинэ арга барилыг монгол эмч нарт зааж сургах, Франц Улсад дадлагажуулах, эмнэлэгт нэн шаардлагатай тоног төхөөрөмж ханган нийлүүлэх, сэхээн амьдруулах тасаг, яаралтай тусламжийн тасгуудыг шинэчлэх зэрэг бодитой олон ажлуудыг хийсэн байна.

Өнөөдөр Европын Холбоогоор дамжуулан Бүгд Найрамдах Франц Улсаас “КОВИД-19” цар тахалтай тэмцэхэд зориулан 54 мянган евро буюу 184 сая төгрөгийн үнэ бүхий тусламжийг манай улсад олгож байна. Энэхүү тусламж нь цар тахалтай тэмцэхэд төдийгүй өвчтөнүүдийн хүчилтөрөгчийн хангамжийг нэмэгдүүлэхэд цаг үеэ олсон, чухал ач холбогдолтой юм.

Дэлхий нийтийг хамарсан цар тахлын энэ хүнд хэцүү үед Монгол Улсад үүсч буй сорилт бэрхшээлүүдийг шийдвэрлэхэд тусламж үзүүлж буй Европын холбоо, Бүгд Найрамдах Франц Улс болон Францын ард түмэнд гүн талархал илэрхийлж байна.

Categories
мэдээ энтертаймент-ертөнц

Жилийн дотор амьдралыг өөрчлөх хорин дадал

Хүн бүрийн толгойд өөрийгөө өөрчлөх тухай бодлууд эргэлддэг. Гэвч хаанаас, яаж эхлэхээ төдийлэн мэддэггүй. Элдэв сугалаа гэнэтийн азанд найдахаас илүү жижиг дадлууд хувь хүнийг өөрчлөлтөд хөтөлдөг гэдэг. Үг үйлдэл болж, үйлдэл дадал болдог. Харин зөв дадал таны амьдралыг өөрчлөх болно.

Ингээд тэдгээр дадлууд юу болохыг харцгаая.

1. Хүмүүстэй харилцахыг хичээ

Тэд таны хамтран ажиллахыг мөрөөддөг хүн, боломжит түнш, хуучны танил гээд хэн ч байж болно. Хүмүүстэй холбоо тогтоох нь гайхалтай боломж, шинэ үүд хаалга нээх чухал зам юм. Та эхний алхмыг хийхгүй бол “Үгүй” гэдэг хариултыг өөртөө өгч байна гэсэн үг.

2. Өдөр бүр хэдэн өгүүлбэр бич

Бизнес төлөвлөгөө, хэзээ нэгэн цагт гаргахыг мөрөөддөг ном, бодрол эргэцүүлэл гээд юу ч байж болно. Өдөрт ердөө хэдэн өгүүлбэр бичих нь таны хүсэж буй бүтээлийг бага ч болов урагшлуулахын дээр, бичих дадалд сууснаар таны сэтгэн бодох, төлөвлөх чадвар илүү дээшлэх юм.

3. Дансаа шалга

Банкны дансаа өдөр бүр шалгаж хэвших нь санхүүгийн нөхцөл байдалдаа илүү өндөр анхаарал болгоомжтой байхад тустай. Одоо ямар байгаа, ирээдүйд ямар болох талаар төсөөллөө ийнхүү шинэчилж байх нь таны санхүүгийн хариуцлагыг нэмэгдүүлдэг.

4. Урсгал зүйлсийг цаг алдалгүй хий

Аяга таваг угаах, гэр цэвэрлэхээс эхлээд эрүүл хоолны дэглэм барих, дасгал хөдөлгөөн хийх, ажлаа тууштай хийх нь үүнд хамаарна. Эдгээр үйлдлүүд нь тухайн үедээ төдийлөн их аз жаргал өгдөггүй боловч сэтгэл санааг амар тайван байлгах, урт хугацааны эерэг үр дүнг бий болгох гайхалтай чадвартай.

5. Одоогийн тав тух бус ирээдүйн амар амгалангийн төлөө зүтгэ

Одоогийн нөхцөл байдлаа тохитой тавлуун болгох бус, ирээдүйн мөрөөдөлд чинь хүргэх зүйлийг хийж хэвших нь тун чухал. Хүн зөвхөн цаг зуурын аз жаргалаа бодож эхлэхэд ирээдүйн амжилт бүтээлд хүрэх зам замхарч эхэлдэг..

6. Сэтгэлийн хөөрлөөр аливаад хандахаас болгоомжил

Уур хилэн, уйтгар гунигт өөрийгөө эзэмдүүлэхийн өмнө чухам яагаад тэрхүү сэтгэл хөдлөлийг мэдэрч буйгаа тогтоохыг хичээ. Энэ сэтгэл хөдлөл таны дараа нь харамсах зүйлийг хийхэд хүргэх эрсдэлтэй юу?

7. Цагийг хамт өнгөрүүлдэг хүмүүсээ болгоомжтой сонго

Таны орчин таны хэн болохыг тодорхойлдог. Найзууд, онлайнаар дагадаг хүмүүс, таны гэр орон ч үүнд хамаатай. Тиймээс эерэг хүмүүстэй нийлж, сөрөг бичвэрүүдийг хааж, гэрээ цэвэрлэж байгаарай.

8. Хүсч байгаа зүйлийнхээ төлөө идэвхтэй алхам хий

Хүний толгойд гайхалтай санаа үе орж ирдэг боловч тархи түүнийг нь дараагийн өгөгдлөөр сарниулан арилгадаг. Тиймээс чухал бодлыг орж ирсэн даруйд үйл хөдлөл, ажил хэрэг, цаасан дээрх тэмдэглэл болгоорой.

9. Хүсэхгүй байсан ч ажиллаж сур

Ямар нэг зүйлийг хийх хүсэл байхгүй байвч та чадалгүй боллоо гэсэн үг биш. Тиймээс хүсэхгүй байвч хийх ёстойгоо хийдэг дадалд суралцах нь танд хэрэгтэй чадвар болох юм.

10. Илүү их унш

Орчин үед бүтэн ном уншиж дуусгах боломжтой хүн ховор болжээ. Хэдий тийм боловч өөрийгөө хөгжүүлж болох олон материал бидний эргэн тойрон дунд байна. Сонирхолтой харах өнцөгтэй хүмүүс, хэрэгцээтэй үзэл санааг илэрхийлдэг нийтлэл, мэдээ мэдээллийг уншихаа зогсож болохгүй.

11. Өдөр тутмын үйл хэргээ цэгнэж бод

Муу зуршил, өөрт хортой үйлдлийг үгүйсгэж, өөрийгөө хатуугаар цагдан хянах нь учир дутагдалтай. Үүнийг шийдвэрлэхийн тулд уг зүйлсийг бий болоход ямар хүчин зүйлүүд нөлөөлдөг болохыг анхаарч тэмдэглэх нь чухал юм. Ингэснээр та ирээдүйд сөрөг үйлдэлд хүргэж болох шинж тэмдгүүдийг анзааран зайлсхийж чадна.

12. “Үгүй” гэж хэлж сур

Хүн бүрт хязгаарлагдмал хэмжээний эрч хүч байдаг. Тиймээс түүнийг зөвхөн өөрт чухал зүйлсэд зарцуулах нь чухал юм. Өөрт хэрэгцээгүй, таны зорилгод шаардлагагүй зүйлсээс өөрийгөө тусгаарлах нь таны эрч хүч, эрүүл мэндийг хамгаалах тустай.

13. Анхаарлаа чиглүүлж сур

Гутрангуй, сөрөг бодлуудад төвлөрөх нь түүнд шийдэл олоход огт нөлөөлдөггүй байна. Өөрийгөө бусад зүйлсэд түр шилжүүлж, ухаан бодлоо сарниулах нь сөрөг хэмнэлээс сэргийлж, эрүүлээр бодоход тусалдаг ажээ.

14. Шинэ бодол санаагаа хүмүүстэй хуваалц

Хүн бүрт гайхалтай шинэ санаа төрдөг. Гэвч түүнийгээ бусдад илэрхийлэх, хэрэгжүүлэх талаар арга хэмжээ авдаггүй бол ямар хэрэг байх билээ?

15. Гарын доорх нөөц боломжоо ашигла

Дэлгүүрт харагдаж байгаа аятайхан өмсгөлийг авах, гадуур хооллохын оронд гэрт байгаа зүйлсээ ашиглаарай. Энэ нь таны цаг завыг хэмнэж, эрч хүчийг хадгалах гайхалтай үйлчлэлтэй.

16. Амттан идэхээ цөөрүүл

Усны тоонд дээр нэг ширхэг аяганы хүч их байдгийн адилаар, эрүүл мэндэд хортой хүнсийг цөөрүүлэхэд ч нэгийн тоо чухал юм. Нарийн төлөвлөгөөтэй хоолны дэглэм, хүнсний хориг бус, идэж буй зүйлээ нэгээр цөөрүүлэх илүү хялбар шүү дээ.

17. Сошиал хаягаа идэвхтэй хөтөл

Одоо цагт таны дижитал амьдрал таны шинэ нэрийн хуудас болжээ. Хувийн вэб сайтаа хөгжүүлэх, олон нийтийн сүлжээнд мэдээллээ шинэчилж байх нь танд шинэ үүд хаалгыг ямагт нээх болно.

18. Өдөр бүрийг “Амьдралаа дээшлүүлэхийн төлөө өнөөдөр би юу хийж чадах вэ” гэдэг асуултаар эхлүүл

“Өнөөдрийн ажлаа яаж давна даа” гэж суухын оронд өдөр бүр өөрт хэрэгтэй ямар нэг зүйл бүтээж болохыг санаарай. Таны хичээл зүтгэл, боломжийг ашиглах чадвар л амьдралыг тань өөрчлөх болно.

19. Нойр хоолоор дутаж болохгүй

Машинд масло тос шаардагддагийн адилаар хүний биед ч байнгын засвар арчилгаа хэрэгтэй байдаг. Өлссөн үедээ ид, ядарсан бол унтаж амар. Бие мах бодийн суурь хэрэгцээгээ үл ойшоох нь ирээдүйд эвдрэл гэмтлийг авч ирдэг.

20. Ус тогтмол уу

Өдөрт найман аяга ус уухыг мэргэжилтнүүд зөвлөдөг. Та наймын тоонд бус, харин нэг аяга ус илүү уухдаа л анхаарлаа төвлөрүүлээрэй.