Монголын урлагийн түүхэнд орчин үеийн хэв шинжийг агуулсан бүтээлүүд үзэгдэх болж, шинэчлэлийн салхи сэвэлзэн орж ирсэн үе нь 70-аад оны сүүлч, 80-аад оны эхэн юм. Энэ үеэс эхлэн уран бүтээлчид намын захиалгат ажлаас чөлөөлөгдөж, 1990 он гэхэд чөлөөт уран бүтээлчдийн тоо эрс нэмэгдсэн юм. Тэд урлагийн шинэ арга барилыг туршин, хязгааргүй сэтгэлгээгээр дахин давтагдашгүй өвөрмөц бүтээлүүд туурвиж, тэр хэрээр Монголын орчин үеийн урлаг цэцэглэн хөгжиж ирсэн тухай урлагийн түүхнээ тэмдэглэгдэн үлджээ.

Нийгэм, урлагийн эргэлтийн энэ үеийн дараахан ХААН Банкны Гүйцэтгэх захирлаар томилогдоод байсан Ж.Питер Морроу олон нийтэд төдийлөн танигдаж амжаагүй уран бүтээлчдийг дэмжин ажиллаж эхэлсэн юм. Тэрээр ХААН Банкинд Монголын орчин үеийн бүтээлүүдийг цуглуулан, ХААН галерейн эхлэлийг тавьсан билээ. Өнөөдөр ХААН галерейд Ж.Питер Морроу агсны хувийн цуглуулгаас сорчилсон “Миний Монгол” үзэсгэлэн нээлтээ хийгээд байна. Тус үзэсгэлэнд Монголын модерн урлагийн нэрт төлөөлөгчдийн бүтээлүүдээс бүрдсэн нийт 20 гаруй уран зургийг дэлгэжээ. Тэдгээрээс онцгойлон дурдвал, уран бүтээлч Л.Бумандоржийн хөндлөн зохиомжтой алдарт “Гэр хороолол” бүтээл, мөн тухайн цаг үедээ шуугиан дэгдээж байсан “Ooгийгийн хөрөг”, Монголын тэргүүний сэхээтнүүд болох ихэр ах дүү Ц.Энхжин, Ц.Мөнхжин нарын бүтээлүүд үзэсгэлэнд тавигджээ.

Ж.Питер Морроу агсны “Миний Монгол” ном 2017 онд англи хэлээр хэвлэгдсэн бол энэ жил монгол хэлээр олны хүртээл болсон билээ. Уг номыг уншигчдад хүргэхэд ХААН Банк Сан дэмжин ажилласан нь мөн л түүний санаачилсан, нийгмийн хариуцлагыг хэрэгжүүлэх ХААН Банкны тусгай нэгж юм.

“Миний Монгол” үзэсгэлэн 2020 оны 10-р сарын 23-ны өдрийг хүртэл ХААН Банк цамхагийн 3-р давхарт байрлах ХААН галерейд олон нийтэд үнэ төлбөргүй хүрэх юм. Ажлын өдөр та бүхэн 10:00-19:00 цагт, амралтын өдрүүдэд 11:00-18:00 цагт үзэсгэлэн үзэх боломжтой.

Ерөнхий сайд У.Хүрэлсүх Барилгын политехник коллеж болон Хөдөлмөр, нийгмийн хамгааллын яаманд ажиллалаа-

Монгол Улсын Ерөнхий сайд У.Хүрэлсүх хөдөлмөр, нийгмийн хамгааллын салбарын ажилтай танилцлаа. Тэрээр Барилгын политехник коллеж болон яаманд ажиллаж Засгийн газрын зорилт, энэ салбарт авч хэрэгжүүлж байгаа арга хэмжээний талаар товч танилцуулж, үүрэг, чиглэл өгөв.

Барилгын политехник коллежийн анхан шатны боловсрол олгох ангид 1583, техникчийн боловсрол олгох ангид 398, үндэсний мэргэжилтэй ажилтан бэлтгэх насанд хүрэгчдийн ангид 157 суралцагч суралцаж байна. Оюутнууд хавар, намартаа цалин, урамшуулалтай дадлага хийдэг бөгөөд төгсөгчдийн 70 орчим хувь нь мэргэжлээрээ ажилладаг тухай коллежийн захирал Г.Нямдулам танилцуулав. Засгийн газар мэргэжилтэй ажилчин бэлтгэх цогц бодлогын хүрээнд Политехникийн коллеж, Мэргэжлийн сургалт, үйлдвэрлэлийн төвүүдийн сургалтыг үнэ төлбөргүй болгож, суралцагчдад сар бүр 200 мянган төгрөгийн тэтгэлэг олгож байгаа. Ажлын байрны олдоц, тэтгэлэг зэрэгтэй холбоотойгоор залуусын суралцах сонирхол эрс нэмэгдсэн, их, дээд сургууль төгссөн хүн ч ирж байгааг захирал Г.Нямдулам хэлэв.

Ерөнхий сайд У.Хүрэлсүх мөн Азийн хөгжлийн банкны санхүүжилтээр барьж байгаа дадлагын байрны ажлын явц, Мэргэжлийн боловсрол, сургалтын салбарын цахимжуулалттай танилцав.

У.Хүрэлсүх: Ирэх дөрвөн жилд 138 мянган ажлын байр шинээр бий болно

Монгол Улсын Ерөнхий сайд У.Хүрэлсүх Хөдөлмөр, нийгмийн хамгааллын яаманд ажиллах үеэрээ харааны бэрхшээлтэй иргэдийн ажиллуулдаг кофе шоп, “Хөгжлийн бэрхшээлтэй иргэдийн оролцоог хангаж, үйлчилгээг сайжруулах төсөл”, хүүхдийн цэцэрлэг, 7777-1289 дуудлагын төвийн ажилтай танилцав. Хүүхдийн цэцэрлэгт тус яам болон ойролцоо байрлах нэр бүхий яам, төрийн байгууллагын ажилтнуудын 60 гаруй хүүхэд хүмүүждэг.

Дуудлагын төв нь иргэдэд нийгмийн даатгалтай холбоотой бүх талын зөвлөгөө, мэдээлэл өгч, өргөдөл, гомдол, саналыг нь хүлээн авч шийдвэрлэж байна. 2021 онд Хөгжлийн бэрхшээлтэй хүний хөгжлийн төвийн барилгыг Архангай, Дархан-Уул, Дорнод, Дундговь, Ховд, Хөвсгөл аймагт ашиглалтад оруулах бол ирэх оноос Улаанбаатар хотод Хөдөлмөр эрхлэлтийн үйлчилгээ, хөгжлийн нэгдсэн төв, тусгай тоноглол бүхий спорт цогцолбор барьж эхлэхээр төлөвлөжээ.

Хөдөлмөр, нийгмийн хамгааллын сайд А.Ариунзаяа салбарын бодлогын шинэчлэл, хийж байгаа ажлынхаа талаар товч танилцууллаа. Яам:

– Нийгмийн даатгалын тогтолцооны шинэчлэл

– Халамжаас хөдөлмөрт шилжих

– Хөдөлмөр эрхлэлтийн динамик загварыг нэвтрүүлэх

– Суралцагч төвтэй бодлогоос Сургууль төвтэй бодлогод шилжих

– Нийгмийн бүлгүүдийн хөгжил, хамгааллын цогц бодлого

– Хөгжлийн бэрхшээлтэй иргэдийн эрх тэгш хөгжих боломжийг ижил тэгш хангах

– Цахим яам болохыг зорьж байна.

Энэ хүрээнд нийгмийн халамжийн www.ehalamj.mn, нийгмийн даатгалтын www.ndaatgal.mn, Мэргэжлийн боловсрол, сургалтын www.mergejil.mn, харааны бэрхшээлтэй иргэдэд зориулсан бичвэрийг ярианд хөрвүүлэх TTS программ хангамж зэргийг нэвтрүүлжээ. Ингэснээр иргэд шимтгэл төлөлтийн лавлагаа, сайн дурын даатгалын үйлчилгээ, Насны хишиг, жирэмсэн эхийн, 0-3 хүртэлх насны хүүхэд асарсаны, ихэр хүүхдийн, өрх толгойлсон эх, эцгийн, одонтой ээжийн тэтгэмжийг цахимаар авч байна. Мөн Мэргэжлийн сургалт, үйлдвэрлэлийн төв, Гадаадад ажиллах хүч зуучлах тусгай зөвшөөрөл олгох программ, Гадаадаас ирж ажиллах хүчний бүртгэл, www.etuslamj.mn зэрэг цахим үйлчилгээг нэвтрүүлж эхэлжээ.

Ерөнхий сайд У.Хүрэлсүх Хөдөлмөр, нийгмийн хамгааллын яамны хамт олонд талархал илэрхийлж, уян хатан, шуурхай, ажил хэрэгч, санаачилгатай байж, нийтийн эрх ашгийг дээдлэн, сайн засаглалыг бэхжүүлэхийн төлөө ажиллахыг захив. Ирэх дөрвөн жилд зам тээвэр, төмөр зам, барилга, хот байгуулалт, уул уурхай, эрчим хүч, аялал жуулчлал, хүнс, хөдөө аж ахуй, хөнгөн үйлдвэрлэл, эрчимжсэн газар тариалангийн салбар дахь бүтээн байгуулалтын үр дүнд 138 мянган ажлын байр шинээр бий болох учир үүнд онцгой анхаарч ажиллахыг чиглэл болгов. Цаашид:

– Хөдөлмөр эрхлэлтийн бодлого, зохицуулалтыг шинжлэх ухааны үндэстэй, тооцоо, судалгаатай болгох

– Халамжийг хэт хавтгайруулах, үнэгүйдүүлэх, үр дүнгүй болгох, иргэдээ халамж шүтсэн хандлагатай болгохгүй байх

– Политехникийн коллеж, Мэргэжлийн сургалт, үйлдвэрлэлийн төвүүдийг чадвартай багш, шаардлагад нийцсэн сургалтын орчин, дадлагын баазтай болгож Сургууль төвтэй болгох

– Тодорхой салбарт мэдлэг, чадварыг нь өвлүүлэх хэлбэрээр ахмад настнуудын хөдөлмөр эрхлэлтийг дэмжих, эрүүл мэнд, нийгмийн халамжийн үйлчилгээний чанар, хүртээмжийг сайжруулах

– Хүүхдүүд аюулгүй орчинд өсч торних, сурч хөгжих нөхцөлөөр хангаж, аливаа эрсдэлээс сэргийлэх, хүүхэд хамгааллын зардлыг бууруулах бус, харин нэмэгдүүлэх

– Хөгжлийн бэрхшээлтэй иргэдэд шаардлагатай нийгмийн халамж, хамгааллыг үзүүлж, жирийн иргэдийн адил нийгмийн харилцаанд орох боломжийг бүрдүүлэх чиглэлээр сайн туршлага, арга хэрэгслийг нэвтрүүлэхийг үүрэг, чиглэл болгов гэж Засгийн газрын Хэвлэл мэдээлэлтэй харилцах хэлтсээс мэдээллээ.

“Маск” продакшны жүжигчин Ж.Мөнхсайхан өнөөдөр Монгол Улсын Гавьяат жүжигчин цол тэмдгээр энгэрээ мялаалаа. Шагнал гардуулах ёслол Төрийн ордны Ёслол, хүндэтгэлийн их танхимд болсон юм.

Ж.Мөнхсайхан нь 1972 оны арваннэгдүгээр сарын 27-нд Говь-Алтай аймагт төрсөн. Тэрбээр СУИС-ийн драмын анги төгссөн бөгөөд “Өнгөт инээд” хамтлагт ажиллаж байгаад “Маск” продакшныг үүсгэн байгуулсан юм.

Зам тээврийн ослын улмаас өнгөрсөн амралтын өдрүүдэд буюу энэ сарын 3-4-нд 2 хүн амиа алдаж, 12 хүн гэмтэж бэртсэн байна.

Тээврийн цагдаагийн албанаас мэдээлснээр, Дундговь аймгийн Хулд сумын “Үл олдохын тал” гэх газарт энэ сарын 3-нд “Kia Rhino” маркийн автомашин онхолдож, 19 настай жолооч Т амиа алджээ.
Мөн энэ өдрийн 20.32 цагийн үед нийслэлийн Баянзүрх дүүрэгт “Шар хад”-ны замын ойролцоо “Mazda Titan” маркийн автомашины жолооч Б хашааныхаа хаалгыг хаах үед автомашин нь өнхөрснөөс бетонон хашаанд хавчуулагдаж амиа алджээ.
Бусад зам тээврийн осолд гэмтэж бэртсэн 12 хүний дөрөв нь хүүхэд байжээ. Эдгээр хэргийг Тээврийн цагдаагийн алба шалгаж байна.

Туркийн фото зурагчин Жемаль Гүлас, Сечил Икиз нарын “Азийн аялал” хэмээх сэдэвт гэрэл зургийн үзэсгэлэн 10 дугаар сарын 2-ны өдрөөс Туркийн Измир хотод нээгдэв.

Энэхүү гэрэл зургийн үзэсгэлэн нь тэдний 2018 онд Монголд хийсэн аяллын зургууд бөгөөд үзэсгэлэнт байгаль, нүүдэлчний амьдралын хэв маягийг тод харуулсан байна.

Жемаль Гүлас АНУ, Голланд, Шинэ Зеланд, ОХУ гэх мэт дэлхийн олон орнуудаар аялж, 1988 оноос хойш хэд арван гэрэл зургийн үзэсгэлэн гаргаж, Land of the clouds хэмээх баримтат киноны зураг авалтын арын хэсэгт өрнөсөн түүхийн талаар 10 үзэгдэлт нэвтрүүлэгийг бэлтгэн Туркийн CNN сувгаар гаргаж байжээ.

1998 онд тэрээр Хойд туйлд аялаж үзсэн аж. “Азийн аялал” гэрэл зургийн үзэсгэлэн 2020 оны 12 дугаар сарын 31-нийг дуустал дэлгэгдэх бөгөөд үзэсгэлэн гаргахад Измир хотын захирагчийн алба дэмжлэг үзүүлж, Турк Улсад суугаа Монгол Улсын ЭСЯ хамтран ажиллажээ.

Монгол Улсын гавьяат цол олгох тухай Ерөнхийлөгчийн зарлигийн дагуу,

• Аж үйлдвэрийн гавьяат ажилтан цолоор Д.Зоригт, Г.Нанзад, Ц.Эрдэнэбилэг,
• Гавьяат багш цолоор Ч.Чанцал, М.Гаамаа, Ц.Гомбо, Ш.Дуламсүрэн, Н.Нямжав, С.Пүрэвжав, Б.Энхбаяр,
• Гавьяат дасгалжуулагч цолоор Н.Дариймаа
• Гавьяат жүжигчин цолоор Х-ТҮЦ продакшны захирал, жүжигчин Н.Онон тус тус хүртээд байна.

Ерөнхийлөгч Х.Баттулга шагнал гардуулсныхаа дараа “Цар тахлын улмаас төрийн дээд цол, одон медаль гардуулах ажиллагаа хойшилсоор өнөөдөр алдар бүтээл, амжилтын эздэдээ цол тэмдгийг нь гардуулж байна. Цагаан сар, Наурызын баяр, Хүүхдийн баяр, Улсын баяр наадмаар олгох ёстой байсан одон, медалиудыг хөл хорио суларсан энэ үед олгож байна. Салбар салбарын гавшгайчид, хөдөлмөрийн манлайлагчид энд цугласан байна. Мөнх тэнгэрийн хүчин дор Монголчууд хөдөлмөр бүтээлээр дүүрэн байх болтугай” гэлээ.

Сумын цолтой болон залуу бөхчүүдийн намрын нээлтийн 91 дэх удаагийн барилдаан өчигдөр /2020.10.04/ Монгол Бөхийн өргөөнд явагдаж өндөрлөлөө. Барилдаанд 512 бөх уран мэх, авхаалж самбаа сорин барилдсанаас Ховд аймгийн Булган сумын харьяат, сумын заан Ганбаатарын Ганхуяг түрүүлж, Өмнөговь аймгийн Манлай сумын харьяат, сумын заан Батхүүгийн Бат-Эрдэнэ үзүүрлэв. Их шөвөгт Өвөрхангай аймгийн Сант сумын харьяат, сумын заан Дамдиннямын Бат-Эрдэнэ, Архангай аймгийн Хашаат сумын харьяат, сумын заан Сүхбаатарын Сүхбат нар шалгарчээ.

Барилдааны үеэр МҮБХ-ны дэд тэргүүн Ц.Магалжавын санаачлагаар уран барилдаант болон уран гараа дэвээт бөхийг шалгаруулсан бөгөөд уран барилдаант бөхийн шагналыг түрүү бөх Г.Ганхуягт гардуулсан бол уран гараа дэвээт бөхийн шагналыг Өмнөговь аймгийн Гурвантэс сумын харьяат, сумын заан Б.Баянсүхэд олгов. Мөн УДЭТ-ын дарга Д.Цэрэнсамбуу түрүү, үзүүрт шалгарсан хоёр бөхийг өчигдөр нээлтээ хийсэн дэлхийн сонгодог “Анна Каренина” жүжгийн хос урилгаар шагнаж урамшуулсан байна.