Month: October 2020

Монгол Улсын Шадар сайд Тавантолгой-Гашуунсухайт чиглэлийн 240 км төмөр замын бүтээн байгуулалтын ажилтай танилцлаа. Өмнөговь аймгийн Цогтцэций, Баян-Овоо, Ханбогд сумын нутаг дэвсгэрээр 240 км төмөр зам тавигдана.

1 дүгээр зэрэглэлийн гэдгээрээ онцлогтой. 16 гүүр, 126 хоолой, 8 малын гарцтайгаар баригдах юм. Одоогоор төсөлд 1801 инженер, техникийн ажилтан болон ажилчид,770 гаруй машин механизм ажиллаж байна.

АН болон МАХН намууд сонгуулийн хар машинтай холбоотой асуудлаар мэдээлэл хийлээ.

Ардчилсан намын үндэсний бодлогын хорооны гишүүн О.Чулуунбилэг, нийслэлийн намын хорооны дарга Ж.Эрдэнэжамъян, “Хэвтүүл” хөдөлгөөний ерөнхий зохицуулагч А.Цэрэнбат нар мэдээлэл хийлээ. “Хэвтүүл” хөдөлгөөний зохицуулагч А.Цэрэнбат: Сонгуулийн хар машинд хакерууд хэрхэн халдаж, үр дүнд хэрхэн нөлөөлж байгааг бодитоор, нотлох баримт дээр тулгуурлан мэдээлэх болно. Бидэнд гурван бичлэг бий. Нэг бичлэг дээр МАН-аас Баянгол дүүрэгт нэр дэвшиж байгаа хүнтэй холбогдоод хар машин дээр ажиллагаа явуулж, үнээ тохирвол тойрогт чинь дэмжлэг үзүүлж чадна гэж ярьж байгаа юм. Мөн л санал тоолох хар машины санал тоолох явцад нөлөөлж чадна гэж ярьж байгаа бөгөөд өнгөрсөн хаврын сонгуулийн үеэр ч ажиллаж байсан гэж хэлж байгаа юм. Ингэхдээ саналын хуудас болон дижитал тоог тэнцүүлэх талаар ярьсаныг энэ бичлэгээс үзэж болно. Эдгээр баримтыг үзэхэд санал тоолох машинд нэлээд зүйл болдог байх нь ээ гэлээ.

АН-ын Үндэсний бодлогын хорооны гишүүн О.Чулуунбилэг: Өмнөх УИХ-ын сонгуулиар тодорхой тойргуудад хар машиныг хакердсан нь батлагдаж байна. Орон нутгийн сонгуульд ч мөн үүнийг ашиглаж байгаа нь тодорхой боллоо. Хүмүүсийн сонгоогүй хүмүүс төрийн эрхэнд гараад шийдвэр гаргаж байгаа нь хэр зүйтэй вэ. Энэ хүмүүс хар машины сервер гадаадад байдаг учраас түүн дээр нь ажиллана гэдгийг хэлж байна. Сонгогчдын эрхэнд халдаж байгаа нь технологийн терроризм болж байна. Бид хэнийг сонгох вэ гэж ярьдагч сонгуулийн санал авахаас өмнө шийдвэр гарчихсан байдаг. Тиймээс үүнийг таслан зогсоох ёстой.

Нийслэлийн МАХН-ын хорооны дарга Ж.Эрдэнэжамъян: Дөрвөн жилийн өмнө 60 тэрбум төгрөгийн бичлэг гарахад намайг дэлхийд ч байхгүй шахуу хүний дуу бичлэгийг дуурайж хийсэн гэж хэлж байсан. Энэ бол баримттай яг тэр хүмүүсийнх нь яриа. Үүнээс ч олон байгаа байх. Бид захыг нь гаргаж тавилаа, зух нь удахгүй гарна биз. Энэ бол сонгуулийн сурталчилгаатай холбоогүй. Энэ бол Монгол Улсад ардчилал байгаа эсэх, төрийн эсрэг гэмт хэрэг үйлдэж байгаа юм биш биз гээд бид үүнийг дэлгэж байна.

Тэд үзүүлсэн бичлэгээ Тагнуулын ерөнхий газрын гүйцэтгэх ажиллагааны дүнд олдсон бичлэг гэж үзэж буйгаа илэрхийлээд үүнийг ҮАБЗ-ийн хэмжээнд үүнийг нягталж үзэх шаардлагатай гэдгийг хэлсэн юм.

А.СҮРЛЭГМАА

Баянзүрх дүүргийн 11 дүгээр хороо Хонхор шалган нэвтрүүлэх хяналтын цэгээр Kia bongo маркын ачааны авто машинаар түүхий нүүрс зөвшөөрөлгүй тээвэрлэн Улаанбаатар хот уруу нэвтрүүлэхийг завдсан зөрчилд Зөрчлийн тухай хуулийн холбогдох заалтын дагуу торгуулийн арга хэмжээ авч 39,6 кг түүхий нүүрсийг Амгалан дулааны станцад хүлээлгэн өгч ажиллалаа. Иймд Улаанбаатар хот руу түүхий нүүрс оруулахгүй байхыг Нийслэлийн Мэргэжлийн хяналтын газраас анхааруулж байна.

Монгол Улсын Ерөнхий сайд У.Хүрэлсүх энэ сарын 8-нд Говь-Алтай аймгийн Дэлгэрэх, Алтай сумдад албан томилолтоор ажиллав.Энэ үеэр тэрбээр Алтай сумын иргэдтэй уулзаж, Засгийн газрын ирэх дөрвөн жилийн үйл ажиллагааны хөтөлбөр болон нийгэм эдийн засгийн чиглэлээр баримталж буй бодлогоо танилцуулсан байна.Тодруулбал Монгол Улсын Засгийн газраас 4-12 жилийн хугацаанд шийдвэрлэвэл зохих тулгамдсан 8 салбар асуудлыг дараах байдлаар гаргаснаа Говь- Алтай аймгийн иргэдэд танилцуулав.

1. Эрчим хүчний хараат байдлаас гарах. Эрчим хүчний импортыг бууруулах, дотооддоо эрчим хүчээ үйлдвэрлэж, хэрэглээгээ хангах, экспортод цаашдаа гаргахаар зорьж буй. Энэ хүрээнд 10 аймагт цахилгаан станц байгуулах улстөрийн шийдвэр гарсан. Дархан, Эрдэнэт, Говь-Алтай, Ховд аймагт бүтээн байгуулалтын ажил эхэлсэн. Мөн Тавантолгой, Оюутолгойн бүлэг ордуудыг түшиглэн цахилгаан станцыг тус тус байгуулах ажил хийгдэж байна.

2. Нефтийн бүтээгдэхүүнээ дотооддоо үйлдвэрлэх. Дорноговь аймгийн Алтанширээ суманд Газрын тосны боловсруулах үйлдвэр байгуулж байна. Дэд бүтцийн бүтээн байгуулалтууд хийгдэж, үйлдвэрийн үндсэн барилгын ажлыг ирэх оны хавар эхлүүлнэ. Санхүүжилт шийдвэрлэгдсэн. Жилд 1,5 сая/тн газрын тос олборлож бүтээгдэхүүн үйлдвэрлэнэ.

3. Хүнсний үйлдвэрлэлийг нэмэгдүүлж, дотоодын хэрэглээгээ бүрэн хангах. Улаанбуудай, гурилын хэрэгцээгээ дотооддоо бүрэн хангаж чадсан. Энэ онд гурил экспортлоно. Хөдөө аж ахуй, газар тариалангийн хөгжлийг дэмжиж, эрчимжсэн мал аж ахуй, газар тариаланг бий болгосноор хүнсний хэрэглээг 100 хувь дотодоосоо хангах боломжтой гэж Засгийн газар түзэж байна.

4. “Цахим-Монгол” болно. Мэдээлэл, харилцаа холбооны хөгжлийг дэмжинэ. Төрийн болон бусад үйлчилгээг цахимжуулна. E-mongolia үйлчилгээг нэвтрүүлж, төрийн 180 гаруй үйлчилгээг иргэд гар утаснаасаа авах боломжтой болсон.

5. Боловсруулах үйлдвэрүүдийг олноор байгуулна. Импортлогч биш, экспортлогч орон болно. Төр хувийн хэвшлийн түншлэлийг дэмжинэ. Баялаг бүтээгч, үндэсний үйлдвэрлэгчдээ бүх талаар ажиллах боломжоор хангах бодлого явуулна. Ажилгүйдлийг бууруулахын төлөө байна.

6. Хийн хоолой. ОХУ-БНХАУ руу Монгол Улсын нутаг дэвсгэрийг дайруулан Хийн хоолой барихаар шийдвэрлэсэн. Энэ нь Монгол Улсын эдийн засагт эерэг өөрчлөлт авч ирнэ. Гурван улсын эдийн засгйин коридор байгуулах зорилгоо биелүүлнэ.

7. Нийгэмд шударга ёсыг тогтооно. Төрийн албанд болон нийгмийн бүхий л салбарт сахилга, хариуцлага дэг журмыг тогтооно.

8. Соён гэгээрүүлэх ажлыг эрчимжүүлнэ. Соёлын яамыг татан буулгаснаас хойшхи 28 жилд дахин сэргээн байгууллаа. Ар иргэдээ соён гэгээрүүлэхэд, хүүхэд залуусыг сургахаас гадна хүмүүжүүлэхэд анхаарна гэв.

“Ирэх 4-12 жилийн хугацаанд Засгийн газраас бид энэ зорилтыг хэрэгжүүлж чадвал Монгол Улс цаашид эрчимтэй хөгжих суурь бүрдэнэ гэж үзэж байна. Айл бүрийн амьдрал тэнхлүүн сайхан, амар амгалан аз жаргалтай байгаасай. Үүний тулд улстөрийн талцалаа орхиж, эв нэгдэлтэй байхыг хичээнгүйлэн хүсэж байна” гэсэн юм.

Эх сурвалж: Засгийн газрын Хэвлэл мэдээлэлтэй харилцах хэлтэс

А.Сүрлэгмаа

Аймаг, нийслэлийн иргэдийн Төлөөлөгчдийн хурлын ээлжит сонгуулийн санал авах өдөр 2020 оны аравдугаар сарын 15-ны пүрэв гаригт байна.

Ээлжит сонгуулийн санал авах өдөр бүх нийтээр амарна. Мөн санал авах өдөр согтууруулах ундаагаар үйлчлэх, худалдах; соёл урлаг, үзвэр, спортын зэрэг олныг хамарсан аливаа арга хэмжээ зохион байгуулах; гадаа болон битүү талбайд үйл ажиллагаа явуулдаг худалдаа, үйлчилгээний төв ажиллах зэрэг үйл ажиллагааг хориглодог.

Энэ өдөр сонгогч саналаа өгөхөөр ирэхдээ иргэний үнэмлэхтэйгээ очих бөгөөд гарын хурууны хээгээ даран өөрийн иргэний бүртгэлийн мэдээллийн улсын сан дахь сонгогчийн бүртгэл, сонгогчийн нэрийн жагсаалтын цахим хубилбартай таарч байгаа эсэхээ тулган шалгуулаад сонгогчийн бүртгэлийн хуудсаа хүлээн авна.

Эрүүл мэндийн байдал, хөгжлийн бэрхшээл болон, боловсролын түвшингээс шалтгаалан саналаа биечлэн өгөх чадваргүй сонгогч өөрийн итгэмжилсэн сонгуулийн эрх бүхий иргэний туслалцаатайгаар санал өгч болдог.

“Багшийн туслах аппликейшн” Монголын боловсролын салбарт цахим сургалтыг анхлан нэвтрүүлж, цар тахлаас үүдэлтэй хөл хорионы үед сурагчдыг үр дүнтэй суралцах боломжийг олгосон билээ. Тэдний бэлтгэн хүргэсэн цахим хичээлээр нийт 17,000 гаруй сурагч ЭЕШ-даа бэлдэж, чамлахааргүй үр дүнг гаргасан нь ЭЕШ-2020-д 800 оноо авсан 196 сурагчийн 60 нь тус аппликейшний хэрэглэгч байсан ажээ.

“Боловсролыг хүүхэд бүрт тэгш хүртээх” зорилготой “Багшийн туслах”-ын хамт олон дахин нэгэн үйл ажиллагааг эхлүүлсэн нь “Багшийн туслах сан” НҮТББ аж. Засгийн газраас “Хосолсон сургалтын систем” рүү шилжиж байгаатай уялдуулан “Сайн багшаас сайн шавь төрдөг” гэх үзэл санааны хүрээнд тэдний хөгжлийг дэмжсэн цахим сургалтын цогц үйл ажиллагааг явуулахаар энэхүү нийгэмд үйлчлэх Төрийн бус байгууллагыг байгуулж байгаа аж. Өчигдөр энэхүү сангийн нээлтийг албан ёсоор хийсэн юм. Мөн “Багшийн туслах”-ын нэрэмжит “Шилдэг бүтээлч багш”-ийг шагнах ёслол ч боллоо. Түүнээс гадна, Багшийн туслах аппликейшнээс зарласан “Багшаа баярлуулъя” уралдааны шилдэг анги хамт олныг шагнаж, урамшуулсан юм.

Үйл ажиллагаа нээж “Багшийн туслах” ХХК-ийн Дэд захирал Г.Ганчимэг үг хэлсэн юм. Тэрбээр “Өнөөдөр бид энд ёслолын үйл ажиллагаа зохион байгуулахын зэрэгцээ багш нарын баярыг давхар тэмдэглэж байна гэж хэлж болно. “Багшийн туслах” санг бид өнөөдөр нээж байна. Багш нарыг чадавхижуулах, тэднийг урамшуулдаг байх, залуу хойч үеэ бэлтгэх чиглэлд илүүтэй анхаарахыг зорьж байгаа. Залуу багш нар маань мэргэжлээрээ бахархах сэтгэлийг төрүүлэх, урам өгөхийн төлөө ажиллах болно. Мөн бидний зүгээс сар болгон багшийг чадавхижуулах, сурагчдын идэвхи санаачилга, сурах хүслийг нэмэгдүүлэх үйл ажиллагааг сошиал уралдаан хэлбэрээр зохион байгуулна. Энэ удаад “Багшаа баярлуулъя” уралдааныг зохион байгуулсан. Шагналт байр эзэлсэн хүүхдүүд маань бүгдээрээ хөдөө орон нутгаас тодорсон. Зарим хүүхдүүд бүр ангиараа хүрээд ирсэн байна.

Манай хамт олны зүгээс мөн “Шилдэг бүтээлч багш”-ийг шалгаруулсан. “Багшийн туслах”-тай өмнө нь хамтарч ажиллаж байсан гурван багшийг шалгаруулж, шагнаж, урамшуулж байна. Цаашид бид шилдэг анги, сурагчийг шалгаруулж, гадаадад аялах эрхийн бичгээр шагнаж байхаар зорьж байгаа. Мөн шилдэг багш нарыг шалгаруулж, 10 сая төгрөгөөр шагнах болно” хэмээлээ.

Түүний дараа “Багшаа баярлуулъя” уралдааны шилдгээр шалгарсан анги, хамт олонд шагналыг нь гардуулж өглөө. Энэ удаагийн уралдааны тэргүүн байрт Говь-Алтай аймгийн Есөнбулаг сумын Нэгдүгээр сургуулийн 12в ангийн хамт олон шалгарч, 2 сая төгрөгөөр шагнууллаа. Шагналыг 12в ангийн дарга Г.Отгонбаяр төлөөлөн ирж, гардаж авлаа. Харин хоёрдугаар байрт Өвөрхангай аймгийн Хархорин сумын II сургуулийн 12а ангийн хамт олон шалгарч, 1 сая төгрөгөөр шагнуулав. Шагналыг ангийн багш С.Норовбанзад, ангийн дарга Б.Сайнбилэг нар гардаж авлаа. Хархорин сумын хоёрдугаар сургуулийн 12а ангийнхаа анги хамт олноороо хүрэлцэн ирсэн байсан юм. Тэгвэл гуравдугаар байрт Өвөрхангай аймгийн Баян-Өндөр сумын сургуулийн Д.Мөнхнаст багштай 12а ангийнхан шалгарч, 500 мянган төгрөгөөр шагнуулав.

Тэгвэл Багшийн туслахын нэрэмжит “Шилдэг бүтээлч багш”-аар гурван багшийг шалгаруулж, шагнаж урамшууллаа. Нийслэлийн 33 дугаар сургуулийн математикийн багш Б.Ариунаа, “Жэт” бүрэн дунд сургуулийн нийгмийн судлалын багш Э.Баасанцэрэн нарыг 1 сая төгрөгөөр шагнаж, урамшуулсан. Шилдгийн шилдгээр Нийслэлийн 117-р сургуулийн биологийн багш Ж.Жаргалзаяа шилдгээр шалгарч, 10 сая төгрөг гардаж авсан юм. Тэрбээр шагналаа гардаж авахдаа “Шилдгээр шалгарна гэж бодоогүй байсан, гэнэтийн бэлэг боллоо. Тулгамдаад хэлэх үг олдохгүй байна. “Багшийн туслах” аппликэйшнтэй хамтарч ажилладагтаа маш их баяртай байдаг. Анх энэ саналыг хүлээж авахад баярлахын зэрэгцээ маш том хариуцлага ирж байгааг ухаарсан. Монголд маш мундаг олон багш бий. Дараа дараачийн удаа мөн олон багшийг шагнаж багш хүний хөдөлмөрийг үнэлж, нэр алдрыг нь цуурайтуулаасай гэж хүсэж байна” хэмээлээ.

Цаашид “Багшийн туслах сан” нь Монголын нийт ЕБС-ийн багш нарт зориулсан ур чадвар, заах арга зүйг дээшлүүлэх үйл ажиллагааг цахимаар зохион байгуулах, шилдэг багш нараар дамжуулж, залуу багш нарыг чадавхжуулах шат дараатай сургалтууд зохион байгуулах, жил бүр уламжлал болгож “Шилдэг бүтээлч багш” шалгаруулах ёслолын арга хэмжээг зохион байгуулж, шилдэг багш нарыг тус бүр 10 сая төгрөгөөр шагнаж байхаа мэдэгдсэн юм.
Дашрамд дуулгахад Багшийн туслах сангийн дэмжлэгтэйгээр тус аппликейшнийг ЕБС-ийн бүх багш нар үнэ төлбөргүй ашиглах боломжтой болж байгаа бөгөөд харин сурагчид сард ердөө 4950 төгрөөр авч хэрэглэж болох юм байна.

Багшийн туслах Монголын хамгийн шилдэг, заах арга зүйн өндөр ур чадвартай, салбартаа нэр хүндтэй 150 гаруй багш нарыг сонгон хамтран ажиллаж байна. Тэд шилдэг багш нарын заах арга зүйн ур чадвар дээр үндэслэн, их дээд сургуульд элсэгчдэд зориулсан ЭЕШ, ЕБС-ийн дунд, ахлах ангийн хичээл болон гадаад хэлний мэдлэгийн түвшин тогтоох TOPIK, TOEFL, HSK, JPLT шалгалтад бэлдэх хичээлүүд зэрэг олон төрлийн боловсролын цогц контентуудыг бүтээж байна.

А.Сүрлэгмаа

Нийслэлийн Гэр бүл, хүүхэд, залуучуудын хөгжлийн газраас “Өнгө нэмье” гар зургийн уралдааныг зарлажээ.

Та бүхнийг идэвхтэй оролцож өөрийн бүтээлээ олон нийтэд сурталчлах боломжийг бид олгож байна.

Бүтээлийг Нийслэлийн засаг захиргааны 5 дугаар байрны 107 тоотод хүлээн авах юм.

Богино зайд буцаж эргэх эргэлт олон байгаа нь нэг чигийн хөдөлгөөний эрчмийг сулруулж, түгжрэл үүсгэж байгаа судалгааг Тээврийн цагдаагийн албанаас гаргажээ. Иймд Улаанбаатар хотын Захирагчийн ажлын алба, Замын хөдөлгөөний төлөвлөлт, зохицуулалт, инженерчлэлийн газар авто замын гурван байршилд буцаж эргэх хэсгийг хаасан байна.

Хүннүгийн гудамж буюу Баянзүрх дүүргийн 26 дугаар хороо, Ноme Plaza-ийн уулзвараас Дүнжингаравын уулзвар хүртэлх 1,5 км нэг чигийн хөдөлгөөнд зөвшөөрөлтэй, зөвшөөрөлгүй нийт 11 эргэж буцах эргэлт байдгийг ийнхүү хаажээ.

Зүүн эргэхийн тулд хоёр талын хөдөлгөөнийг зогсоож авто замын зохиомол түгжрэлийг үүсгэж буй аж. Замын хөдөлгөөний төлөвлөлт,зохицуулалт, инженерчлэлийн Инженерчлэл, төлөвлөлтийн хэлтсийн дарга Х.Өнөржаргал “Баянмонгол хорооллоос зүүн тийш эргэхийг хориглож, нэг чигийн хөдөлгөөнд саад учруулахгүй болсон. Хүннүгийн гудамж маань нарийхан учраас буцаж эргэх хөдөлгөөн бүрт авто замын түгжрэл үүсдэг. Тиймээс хөдөлгөөнийг саадгүй зорчуулах үүднээс холбогдох албаныхан судалгаа хийж, буцаж эргэх хэсгийг хаасан байгаа” хэмээв.

Эх сурвалж: Нийслэлийн ЗДТГ-ын Хэвлэл мэдээлэлтэй харилцах хэлтэс

Өнгөрсөн амралтын өдрүүдэд Тээврийн цагдаагийн алба нийт 605 дуудлага мэдээлэл хүлээн авснаас зам тээврийн ослын шинжтэй 470 дуудлага мэдээллийг хүлээн авч шийдвэрлэснийг мэдээллээ. Ослын улмаас дөрвөн хүн гэмтэж, ноцтой зам тээврийн ослын улмаас орон нутагт хоёр хүний амь нас хохирсон байна.