Month: September 2020

АНУ-ын Кентукки муж улсын Луисвилл хотод орон нутгийн цагаар лхагва гаргийн орой өрнөсөн эсэргүүцлийн жагсаалын үеэр цагдаагийн хоёр ажилтан буудуулж шархадсан гэж тус хотын Цагдаагийн газраас мэдээллээ.

Африк-Америк гаралтай, 26 настай Бреонна Тейлор энэ оны гуравдугаар сарын 13-нд мансууруулах бодисын нэгжлэгийн үеэр цагдаа нарт буудуулсны улмаас гэртээ амь насаа алдсан юм. Уг хэрэгтэй холбоотой цагдаа нарт ял ногдуулахгүй байх шүүхийн шийдвэр гарсны дараа ийнхүү жагсаал өрнөжээ.

“Цагдаа нарын нэг нь мэс засалд орсон бөгөөд хоёулангийнх нь биеийн байдал тогтвортой байна” гэж Луисвилл хотын Цагдаагийн газрын даргын үүргийг түр орлон гүйцэтгэгч Роберт Шроедер мэдээлжээ. Мөн сэжигтнийг баривчилсан гэж тэрбээр нэмж хэлжээ. Цагдаа нарын хэн болохыг одоогийн байдлаар олон нийтэд дэлгээгүй байна.

Улсын Их Хурлын Нийгмийн бодлогын байнгын хороо, Хууль зүйн бодлогын байнгын хороо, Улсын Их Хурлын эмэгтэй гишүүд болон Хууль зүй, дотоод хэргийн яам хамтран Архидан согтуурахтай тэмцэх тухай хуульд нэмэлт, өөрчлөлт оруулах тухай хуулийн төслийн хэлэлцүүлгийг зохион байгуулав.

Улсын Их Хурлын гишүүн, Засгийн газрын гишүүн, Хууль зүй, дотоод хэргийн сайд Х.Нямбаатар “Манай яамнаас Архидан согтуурахтай тэмцэх тухай хуулийн шинэчилсэн найруулгын төслийг бэлтгэж, яамдаас санал авч байгаа. Ирэх сард Улсын Их Хуралд өргөн мэдүүлэх юм. Улсын Их Хурлын эмэгтэй гишүүд нэмэлт, өөрчлөлтийн дээрх төслөө өргөн мэдүүлсний дараа Засгийн газар болон уг төслүүдийг Монгол Улсын Их Хурлын чуулганы нэгдсэн хуралдааны дэгийн тухай хуульд заасны дагуу хэлэлцэх эсэхийг тусад нь шийдвэрлэх болно. Хууль санаачлагч талууд хоёр төслийг нэгтгэх боломжтой гэж зөвшилцсөн тохиолдолд төслүүдийг нэгтгэн хэлэлцэх зохицуулалттай. Хууль санаачлагчдын төслийн үзэл баримтлал ижил, олон талаараа давхцаж байгаа. Засгийн газар, Хууль зүй, дотоод хэргийн яамны зүгээс “Алсын хараа-2050” Монгол Улсын урт хугацааны хөгжлийн бодлогын баримт бичгийн 2.2-т дэвшүүлсэн “Эрүүл дадал хэвшилтэй, идэвхтэй амьдралын хэв маягтай иргэнийг төлөвшүүлэн эрүүл мэндийн чанар, хүртээмж, үр дүнтэй тогтолцоог хөгжүүлнэ” гэв.

Сэтгэцийн эрүүл мэндийн үндэсний төвийн ерөнхий захирал, анагаах ухааны доктор, профессор Л.Насанцэнгэл “4 хүний 1 нь амьдралынхаа хугацаанд ямар нэг сэтгэцийн эмгэгт нэрвэгддэг бол хөдөлмөрийн чадвар алдагдалтад хүргэдэг 10 өвчний 5 нь сэтгэцийн эмгэг байдаг байна. Манай улсын хувьд 1984-1992 оны судалгаатай харьцуулбал стрессийн шалтгаант сэтгэцийн эмгэг 10 дахин, архинд донтох эмгэг 40 дахин нэмэгдсэн. Сэтгэцийн эрүүл мэндийн үндэсний төвийн 2019 оны “Зонхилон тохиолдох сэтгэцийн эмгэгийн тархалтын судалгаа”-нд сэтгэл түгшилт, нойргүйдэл, архаг ядаргаа, биеийн хэлбэрийн эмгэг, архинд донтох эмгэг, сэтгэл гутрал хэмээн эрэмбэлэгдсэн байна. Архинд донтох эмгэгээр эрэгтэйчүүд нь эмэгтэйчүүдээс 13 дахин их, гэр бүл салсан байх нь гэр бүлтэй хүнээсээ 3 дахин их өртдөг” гэжээ.

Цагдаагийн байгууллагаас дараах саналуудыг тусгахаар ажиллаж байна

Согтууруулах ундааны эргэлтэд хяналт тавих, архидан согтуурахтай тэмцэх тухай хууль /шинэчилсэн найруулга/-ийн төсөлд цагдаагийн байгууллагаас дараах саналуудыг тусгуулахаар ажиллаж байгаа аж.

Тухайлбал, архины үйлдвэрлэл, импортоор оруулж ирж буй архи, согтууруулах ундааны тоо хэмжээ, савлагааны хэмжээг бууруулах; согтууруулах ундаа худалдах, түүгээр үйлчлэх цэгийн тоог тухайн нутаг дэвсгэрийн хүн амын тоо, нягтаршил, эрүүл мэнд, соёл, боловсролын байгууллага, хүүхэд, залуучуудын хөгжлийн болон орон сууц, нийтийн байрны байршилтай уялдуулан бууруулах саналыг гаргажээ. Мөн үйлдвэрлэсэн, импортоор оруулсан согтууруулах ундааны литр тутамд худалдан борлуулж буй зах зээлийн үнийн дүнгийн 2 хувьтай тэнцэх хэмжээний орлогыг Архидан согтуурахтай тэмцэх санд төвлөрүүлж, архидан согтуурахтай тэмцэх, урьдчилан сэргийлэх ажилд зарцуулах нь зүйтэй гэдэг саналыг цагдаагийн байгууллагаас гаргасан байна.

Түүнчлэн архидан согтуурахтай тэмцэх тухай хууль тогтоомж зөрчсөн иргэн, хуулийн этгээдэд хүлээлгэх хариуцлагыг чангатгах; согтууруулах ундаа худалдах, түүгээр үйлчлэхэд хямдрал урамшуулал зарлах, хөнгөлөлттэй үнэ, нөхцөлөөр худалдан борлуулах, үйлчлэхийг хориглох; уламжлалт зан заншил, архины зохисгүй хэрэглээ, түүний хор уршгийн талаар иргэд, олон нийтэд ухуулан таниулах, нийгэмд архинаас татгалзах эерэг хандлагыг төлөвшүүлэх нөлөөллийн ажил, арга хэмжээг үе шаттай авч хэрэгжүүлэх; 21 насанд хүрээгүй гэх үндэслэл байгаа тохиолдолд согтууруулах ундаа худалдах, түүгээр үйлчлэх тусгай зөвшөөрөлтэй аж ахуйн нэгжийн ажилтан нь согтууруулах ундаа худалдах, түүгээр үйлчлэхийн өмнө хуулиар зөвшөөрөгдсөн насанд хүрсэн эсэхийг шалгадаг байх зохицуулалтыг төсөлд тусгуулах саналтай байгаа аж.

Түүнчлэн ням гариг бүр согтууруулах ундааг худалдаалахгүй байх санал гаргажээ.

НМХГ-аас барилга угсралтын үйл ажиллагаа эрхэлж буй компаниудад хийсэн хяналт шалгалтын дүнг өнөөдөр танилцууллаа.

Шалгалтыг 2020 оны 4 дүгээр сараас хийж эхлэсэн бөгөөд 10 дугаар сарын 15-ныг дуустал гүйцэтгэлийн хяналт шалгалт үргэлжлэх юм байна.

Улаанбаатар хотын нутаг дэвсгэрт шинээр баригдаж буй 985 барилгад хяналт шалгалт хийхэд зөвшөөрөлгүй 127 барилга, байгууламж, архитектур төлөвлөлтийн даалгаваргүй 33, батлагдсан зураг төсөлгүй 37, барилгын норм дүрм зөрчсөн 39 байгууллага байжээ.

Эдгээр аж ахуйн нэгж байгууллагуудад Зөрчил шалган шийдвэрлэх тухай хуулийн дагуу эрх бүхий албан тушаалтны 53 албан даалгавар хүргүүлж Зөрчлийн тухай хуулийн дагуу 18 зөрчлийн хэрэг нээж, хялбаршуулсан журмаар 35-ыг шийдвэрлэж 29 иргэнд 22,700,000 төгрөг, 24 ААН байгууллагад 186,000,000 төгрөг, нийт 208,700,000 төгрөгийн шийтгэл ноогдуулсан байна.

Буулгах шаардлагатай 26 барилга байгууламжийн саналыг Мэргэжлийн хяналтын Ерөнхий газар, Захиргааны хэргийн шүүх, Нийслэлийн Засаг дарга, Нийслэлийн хот байгуулалт хөгжлийн газарт

Барилгын ажил гүйцэтгэгчийн чиг үүргийг зөрчин барилга угсралтын үйл ажиллагаа явуулж байгаа 7 барилга байгууламжийн захиалагч иргэн аж ахуйн нэгжүүдийн газрын эрхийг цуцлуулах саналыг Байгаль орчин, аялал жуулчлалын яаманд

Зөрчлийг арилгуулсаны дараа барилга угсралтын ажлыг үргэлжлүүлэх боломжтой 92 барилга байгууламжийн саналыг Нийслэлийн Засаг дарга, Нийслэлийн Хот байгуулалт, хөгжлийн газар, Нийслэлийн Газар зохион байгуулалтын албанд тус тус хүргүүлэхээр болжээ.

Энэ сарын 22-ны өдөр Ражив Гандийн нэрэмжит Үйлдвэрлэл урлалын политехник коллежийн оюутнууд нэгнийгээ хутгалсан хэрэг гарчээ.

Энэ талаар цагдаагийн байгууллагаас тодруулахад “Өнгөрсөн мягмар гарагт тус сургуулийн Авто машин засварын нэгдүгээр дамжааны оюутан 17 настай, эрэгтэй Б нь хоёрдугаар дамжааны оюутан Б-тэй маргалдсаны улмаас цаасны хутгаар хутгалсан байна. Харин энэ үед тэднийг салгахаар оролдсон авто машин засварын нэгдүгээр дамжааны оюутан 15 настай Б, хоёрдугаар дамжааны оюутан Т нар цаасны хутгаар гар болон толгой хэсэгтээ зүсүүлсэн. Хэргийг шалгаж байгаа тул дэлгэрэнгүй мэдээлэл өгөх боломжгүй” гэлээ.

“Хийморь” морьт харвааны олон улсын тэмцээнийг Жаргалантын ам, “Чингисийн хүрээ” цогцолборт ирэх амралтын өдрүүдэд (есдүгээр сарын 26-27-нд) зохион байгуулах тухай Нийслэлийн аялал жуулчлалын газраас мэдээллээ. Цар тахлын халдварын онцгой үе ч аялал жуулчлалыг сэргээх зорилгоор энэ ажлыг зохион байгуулж байгаа аж. “Хийморь” морьт харвааны ОУТ-ийг хоёр дахь удаагаа зохион байгуулж байна.

Харин хөл хорионы үеэр гадны тамирчид тэмцээнд оролцох боломжгүй учраас Олон улсын морьт харвааны холбоотой хамтарч онлайнаар зохион байгуулах юм. Есдүгээр сарын 26-ны өдрийн тэмцээнд Монголын тамирчид оролцож, гурван төрлөөр аваргаа тодруулна. Шалгарсан есөн тамирчны оноолт, дүн, тэмцээний материалыг Олон улсын морьт харвааны холбоонд хүргүүлж дүгнэгдэх ажээ.

Гэрээгээр 11 дүгээр сард дуусгах байсан “Эрчим хүчний гудамж” буюу Сонсголонгийн замыг Ажилчдын гудамжтай холбож байгаа “Дулааны цахилгаан станц-4”-ийн урд талын 6 км авто замын зорчих хэсгийн хөдөлгөөнийг өчигдөр орой нээлээ.

Иргэд, аж ахуйн нэгжүүдээс замын ажлыг түргэсгэх талаар өргөдөл, санал ирснээр хүн, хүч, техникээ олшруулж, ажлыг нь шахсанаар ийнхүү амжуулжээ. Явган хүний зам, гэрэлтүүлэг зэрэг үлдсэн тохижилтыг гэрээний хугацаандаа дуусгах аж. Нийслэлийн Авто замын хөгжлийн газрын дарга Б.Индра “Хүндрэлтэй нь гэвэл “ДЦС-4”-ийн урд, хойд хэсгээр маш олон үйлдвэр байдаг. Ийш орж, гарч буй хүнд даацын автомашины дугуйнд шороо, шавар наалдан, зам эвдэх магадлал өндөр байна. Тиймээс нэгдсэн журмаар үйлдвэр, аж ахуйн нэгжүүдийг гадна талбайгаа засаж сайжруулах шаардлага хүргүүлэх хэрэгтэй. Мөн үйлдвэрийн машинууд даац хэтрүүлсэн тээвэрлэлт хийж байгаа”-г Хотын Захирагчийн үүрэг гүйцэтгэгч Ж.Батбаясгалан дээрх автозамын засварын ажилтай танилцах үеэр уламжилсан юм.

Ж.Батбаясгалан “Нээгээд нэг хонож байхад замын зорчих хэсэг шороо, чулуутай болжээ. Их өртгөөр авто зам барьчихаад арчлалтаа сайжруулахгүй бол болохгүй. Иргэд өөрсдийн татварын хөрөнгөөр барьж буй замаа хайрлах хэрэгтэй” гээд өнөөдрөөс нийслэлийн Авто замын хөгжлийн газар, Замын цагдаагийн газруудад авто замын арчлалт, хамгаалалт болон иргэд, аж ахуйн нэгжүүдэд тавих хяналтаа чангатгаж ажиллахыг үүрэг болгов.

Сидней-Улаанбаатар чиглэлийн тусгай үүргийн онгоц өнөөдөр хуваарийн дагуу 21:20 цагт “Буянт-Ухаа” олон улсын нисэх буудалд газардана. Тус онгоцоор 216 иргэн эх орондоо ирэх юм.

Иргэдийг ХӨСҮТ, ЦТЭ, “Энхсаран”, “Ивээлэн” сувиллууд болон “White House” зочид буудалд тусгаарлана гэж УОК-ын Шуурхай штабаас мэдээллээ.

Хүйтний улирал ирж байгаатай холбогдуулан айлууд галлагаагаа буруу хийснээс болж угаартах хэрэг цагдаагийн байгууллагад цөөнгүй бүртгэгддэг.

Өнгөрсөн шөнө гэхэд угаартсан нэг хэрэг бүртгэгджээ. Тодруулбал, Сүхбаатар дүүргийн 19 дүгээр хороонд 79 настай эмэгтэй Ц угаартсан байна. Тэрбээр хөнгөн зэргийн хордлоготой бөгөөд эмчилгээ хийлгээд гарсан байна.

Угаартсан хэргийг Сүхбаатар дүүргийн цагдаагийн хоёрдугаар хэлтэст шалгаж байгаа аж.

“МҮХАҮТ-ын 60 жилийн ойн шилдэг бүтээлийн уралдаанд зориулав”

Төрийн ордонд өчигдөр нэг хэлэлцүүлэг боллоо. Цар тахлын аюулыг олон талт хамтын ажиллагаагаар давах нь гэсэн агуулгатай байв уу даа, их л сүрхий сэдэв сонсогдоотхов. Тахлын аюулыг олноороо яаж давах тухай хөндөнө, тэгээд бүр хэлэлцүүлэг гэхээр нь чих тавилаа.

Тахлын үеийн эдийн засагт хэрэгтэй санаа оноо, шийдлийг засгийн түвшинд яаж харж байгаа нь хэнд ч сонин. Тэнд оролцож суугаа танил эдийн засагч руугаа хэлэлцүүлгийн сонин сонсох санаатай залгатал “Коммунист намын хуралд ирсэн мэт сэтгэгдэл л төрж байна. Тахлын аюулыг яаж давах тухай түй ч санаа оноо, гарц шийдэл ярьсангүй.

Энд яг социализмын үеийн уур амьсгал мэдрэгдлээ. Төрийн байгууллагууд нь тахалтай яаж тэмцэж байгаагаа баатарлагаар илтгээд, хэлэлцүүлэгт оролцогчид нь таг дуугүй сууцгаасан шигээ л байна. Зарим нэг нь алга ташиж ч байх шиг. Чиний асуугаад байгаа тахлыг давах арга шийдэл, хувийн хэвшлийг дэмжих бодлого төлөвлөгөө, ханшийн өөрчлөлт тойрсон халуун мэтгэлцээн энд огт алга. Төсөв ч ярихгүй байна. Энд тэндгүй камер, зургийн аппарат тачигнуулсан зурагчид. Тахалтай ингэж тэгж тэмцлээ гэсэн пиараа л хийж байх шиг” гэж ам таглав. Итгэж өгсөнгүй “Хувийн хэвшлийнхэн ингэж тэгж хэцүүдсэн гэж ч ярихгүй байна уу. Иргэдийн ажилгүйдлийг ч үү” гэж лавлатал “Тийм яриа хөөрөө огт алга. Би харин хэлэлцүүлэг гэхээр нь нэлээд халуун яриа хөөрөө өрнөх нь гээд ирсэн юм. Горьдлого талаар боллоо. Бас нэг сонин юм анзаарагдлаа. Төрийн ордонд ажилладаг ганц хоёр хүнтэй үг сольсон чинь манай улс цар тахлыг харин ч дажгүй давж байна, эдийн засаг ер нь давгүй байгаа юм биш үү гэсэн утгатай үгийг жигтэйхэн итгэл үнэмшилтэй хэлээд байх юм” гэж байна. За ингээд цар тахлыг яаж мэнд давах тухай ганц ч өгүүлбэр сонсож чадсангүй утсаа тавилаа. Коммунист алга ташилтаар ковидыг давахгүй л дээ.

Бизнесийн орчин ямархуу байгааг хамгийн сүүлийн судалгаанаас харцгаая. МҮХАҮТ-аас хоёр жилд нэг удаа “Бизнесийн итгэлийн индекс” гэсэн судалгаа хийж, бизнес эрхлэгчдийн бодол санааг танддаг юм. Энэ жилийнх нь дүн гарчихаж. Өнөө жилийн судалгаанд 1800 аж ахуйн нэгжийг хамруулжээ. Бизнес итгэлийн индексийг бизнесийн орчин, ашиг, орлогын өөрчлөлт, хөрөнгө оруулалт, макро эдийн засгийн орчин гэсэн үндсэн дөрвөн үзүүлэлтээр тооцож гаргадаг юм. Судалгаанд оролцсон баялаг бүтээгчдийн 42 хувь нь бизнес эрхлэх орчин өмнөх жилээс тодорхой хэмжээнд муудсан гэсэн хариу өгчээ. Гэхдээ бизнес эрхлэгчид цар тахал дөнгөж эхэлж байхад буюу энэ оны гуравдугаар сард ийм хариу өгсөн гэдгийг онцолъё. Цар тахал үргэлжилсэн хэвээр байгаа яг өдийд энэ хувь мэдрэгдэхүйц өссөн гэдэгт эргэлзэх юм алга. Судалгаанд оролцсон бизнес эрхлэгчдийн 63 хувь нь ажилгүйдэл өснө гэж харцгааж. 40 хувь нь инфляци өснө гэсэн бол 42 хувь нь бизнестээ хөрөнгө оруулалт хийх боломжгүй гэж. Компаниудын 50-60 хувь нь ашиг орлого өснө гэдэгт итгэхгүй яваагаа хэлсэн байх юм. Судалгаанд оролцогчдын ердөө 31-хэн хувь нь өнөө жил бизнесийн орчин сайжирна гэсэн хариу өгчээ. Хувийн хэвшил рүү хандсан жаахан ч гэсэн дэмжлэг анзаарагдахгүй байгаа энэ үед бизнес эрхлэгчдийн бараг 90 хувь бизнесийн орчин сайжирна гэсэн итгэлгүй болчихсон суугаа гэчихэд үнэнээс зөрөхгүй.

Цар тахал хэзээ дуусах нь өнөө хэр бүрхэг байна. Дэлхий дахинд “COVID-19” цар тахлыг дор хаяж хоёр жилийн хямрал, бүр цаашилбал 3-5 жилийн хямрал гэж харж байна. 2020 оны хямралын нөлөө нь 2021 он, цаашлаад дараа онуудад бүрэн арилахгүй гэж харж байгаа учраас таван жил гэсэн том тоо сонсогдоод байгаа юм.COVID дэлхийн, Азийн, Монгол Улсын эдийн засагт огцом хямрал учруулж байгаа. ДНБ-ий агшилт газар сайгүй ажиглагдах нь нэгэнт тодорхой болчихсон трэнд.АХБ Азийн эдийн засаг 1960-аад оноос хойш анх удаагаа агшина гээд төсөөлчихлөө. Монголын эдийн засаг 2020 оны эцэст агшилттай гарна гэдгийг ОУВС, Дэлхийн банк, Азийн хөгжлийн банк, зээлжих зэрэглэл тогтоодог агентлагууд, Монголбанк, бүр Засгийн газар өөрөө хүртэл бүгд мэдэгдлээ. Ийм үед яг юу болоод байна вэ? Хатуухан хэлэхэд, Төрийн ордонд биенээ дөгөөсөн коммунист алга ташилт л сонсогдож байна.

Эдийн засаг 2020 оны эхний зургаан сард -9.7 хувиар агшсаныг хүн бүр мэдэж байгаа ч, цаана нь хичнээн ажлын байр байхгүй болж, хэдэн хүн гудамжинд гарсныг хэн ч ярихгүй, мэдсэн нь мэдээгүй дүр эсгэж яваа. Ялангуяа манай Засгийн газар нүдэн балай, чихэн дүлий суугаа. Үндэсний Статистикийн Хорооны мэдээгээр оны эхний зургаан сарын дотор зочид буудал, байр, сууц болон нийтийн хоолны үйлчилгээний салбарт 9.9 мянга, боловсруулах үйлдвэрлэлийн салбарт 7.6 мянга, тээвэр ба агуулахын үйл ажиллагааны салбарт 4 мянга, урлаг, үзвэр, тоглоомын чиглэлээрх үйлчилгээний салбарт 6.3 мянган ажлын байр аль хэдийнэ алга болчихсон. Энэ бол албан ёсны тоо. Гэтэл албан бусаар хэдэн хүн ажилгүй болсон бол?

Аливаа хямрал болоход хамгийн түрүүнд ажлын байруудыг хамгаалдаг. Энэ бол дэлхийн аль ч улсын хэрэглэдэг жам ёсны арга. Олон улс орон яг ийм арга хэрэглэж, эдийн засгаа элгээр нь хэвтүүлчихгүйхэн шиг авч яваа. Гэтэл Монголд ажлын байрны тухай, ажил эрхлэлтийн тухай, хичнээн хүн гудамжинд гарсан тухай ярьж суугаа сайд, дарга, улстөрч нэг ч алга. Зөвхөн гадаадаас зээл авч бэлэн мөнгө тараахыг хямралаас гаргах бодлого гээд ойлгочихсон Засгийн газартай байгаа нь хатуу ч гэсэн үнэн. Ажил эрхлэлтийн тухай, санхүүгийн тогтвортой байдлын тухай ярьдаггүй, үг унагадаггүй Ерөнхий сайд, Сангийн сайдтай улсыг нэрлээч гэвэл ганц Монгол л байна гэчихэд хэтрүүлсэн болохгүй. Хамгийн түрүүнд хувийн хэвшлээ хүү багатай хөнгөн нөхцөлтэй зээл, санхүүжилтээр дэмжиж байж ажилгүй иргэдээ орлоготой болгоно гэдгийг Ерөнхий сайдад дахин дуулгая. Арилжааны банкуудаа дарамталж, буланд шахаж биш аж ахуйн нэгжүүдээ хүү багатай санхүүжилтээр тэтгэж байж л тахлын үеийг улсаараа мэнд давж чадна.

Яг одоо дэлхийн улс орнууд цар тахлыг өөрөөр амьдрах, түүний тулд бодлогоо өөрчлөх сургамж гэж харж байна. Нэг жишээ хэлье. Үр ашиг гэдэг юмыг одоо л яг бодитой авч үзэх цонх үе гараад ирлээ. Монголд үр ашиггүй юм маш их. Улсын төсвийн зарцуулалт, төсвийн тендер, төрийн албаны нүсэр бүтэц гээд тоочвол урт жагсаалт гарна. Ковидыг энэ алдаануудаа засах боломж гэж хараад зүтгэвэл боломж бий. Дотоодод хөгждөггүй, хөгжүүлэхийг хүсдэггүй байсан орхигдсон салбаруудаа босгох боломж ч ирчихээд байна. Цар тахлын үеийг ашиглаад хөдөө аж ахуй, аялал жуулчлалын салбараа хөгжүүлбэл тахлын дараа аятайхан хөгжөөд явчих боломжтой.

Хил хаагдчихсан, хэзээ нээгдэх нь бүр ч тодорхойгүй ийм цаг үед ядаж төмс хүнсний ногоо, хүлэмжийн аж ахуйг дэмжих, мал аж ахуйдаа хөрөнгө оруулах, дэд бүтцээ тордсон шигээ амьдарвал илүү ухаалаг бодлого болно.

Гэтэл цар тахлын эсрэг улсын төсвийн зарцуулалтад ирээдүйд өгөөжөө өгөх ийм хөрөнгө оруулалт өнөөхөндөө лав алга. Өнөөх л мөнгө тараалт, төсвийн тендерээр үр ашиггүй шавар тагз дутуу дулимаг барих, түүндээ холбоотой компаниудаа хавчуулж шахаа хийх, болж өгвөл ЖДҮ авч завших санаатай харанхуй бодлого үргэлжилсээр байна.

Эцэст нь хэлэхэд, хувийн хэвшлээ л тэтгэсэн бодлого барьж байж тахлын үеийг улсаараа дажгүй давж гарна. Яг өнөөдрийнх шигээ хувийн хөрөнгийг хураана, банкны хүүг хүчээр бууруулна, ингэж тэгж ийм тийм халамж, хувь хишиг тараана гэсэн шигээ аж төрвөл ирэх жилүүдэд эдийн засаг элгээрээ хэвтэх том эрсдэл л биднийг хүлээж байгаа.