Нийслэлийн Онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүй “Нийслэлийн нутаг дэвсгэрт 2020 оны зургадугаар сарын 10-ны өдрөөс өнөөдрийг хүртэл завьт эргүүл гол орчмын бүсүүдэд ажилласаар байна. Тухайлбал БЗД-ийн гүүр Яармаг, Сонсголонгийн гүүр, Тэрэлж, Хэрлэн голын орчимд 7 маршрутад эргүүлүүд гарч байгаа. Гол усанд хүний амь эрстэхээс хамгаалахын тулд нийтдээ 2400 орчим алба хаагчид аврах ажиллагааны эргүүлд гарч байгаа. Мөн 37 байршилд сэрэмжлүүлэх самбар байршуулсан. Одоогийн байдлаар 235 хүний амь насыг аварч голын усанд гацсан 37 машиныг гаргасан.
Тарваган тахлаас сэргийлэхийн тулд хяналт тавигдсаар байна. Тарваган тахлын сэжигтэй тохиолдол шинээр бүртгэгдээгүй.
Өвлийн улирал ойртож айлуудын галлагаа эхлэх гэж байна. Өнгөрсөн өвөл агаарын бохирдлыг бууруулах ажил хийж, шахмал түлш хэрэглэснээр утаа 50 хувьд хүртэл буурсан бол энэ жил 80 хувьд хүргэх төлөвлөгөөтэй байна.
Өнөөдөр өглөө орсон ширүүн борооны үеэр хэд хэдэн газар усанд автаж боогдсон 9 удаагийн ахуйн зөрчлийн дуудлага ирсэн ч ямар нэг байдлаар хүний амь эрсэдсэн дуудлага бүртгэгдээгүй. Иймээс голын ус руу хүүхдийг явуулахгүй байж хараа хяналтаа сайжруулах хэрэгтэй.
Нийслэлийн нутаг захиргааны 6000 гаруй ажилчид өвөлжилтийн бэлтгэл байдлыг хангах үүднээс гэр хорооллын айлуудаар явж угаарын хий мэдрэгч, галлагааны заавар зөвлөгөө өгсөөр байна.
Цаашид түлш нөөцлөх ажлыг эрчимжүүлэх төлөвлөгөөтэй байгаа. Алслагдсан 5 хороо агаарын чанарыг сайжруулах төлөвлөгөөнд багтсан учраас эдгээр дүүрэгт чиглэн ажиллаж байна. Есдүгээр сарын 5-ны өдрөөс эхлэн алслагдсан таван хорооны өрхүүдэд угаарын хий мэдрэгчийг тарааж эхэлнэ” гэлээ.
