Month: April 2020

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр тэргүүтэй албаныхан өнөөдөр Чингэлтэй дүүргийн 4 дүгээр хороонд байгуулж буй бичил цэцэрлэг байгуулах ажлын явцыг шалгалаа. Нийслэлийн Засаг дарга бөгөөд Улаанбаатар хотын Захирагч С.Амарсайхан хууль бусаар эзэмшиж буй болон эзэмшил газраа зориулалтын дагуу ашиглаагүй газруудыг чөлөөлж, олон нийтийн эзэмшилд авч бичил цэцэрлэгт хүрээлэн байгуулж тохижуулах үүргийг хотын Ерөнхий менежер Т.Гантөмөрт үүрэг болгосон юм. Хотын Захирагчийн өгсөн үүрэг даалгаврын хүрээнд өнөөдөр 12 байршилд газар чөлөөлөлт хийж, бичил цэцэрлэгт хүрээлэн байгуулж байна.

Дипломат 95-р байрны хойд талын байрнуудын дунд олон жил барилгын суурь ухагдаж орхигдсон 2000 метр квадрат тус талбайг ийнхүү чөлөөлж олон нийтийн эзэмшил болгож тохижуулж буй нь энэ юм. Өнгөрсөн оны 10 дугаар сард бичил цэцэрлэг байгуулах ажил эхэлсэн бөгөөд ирэх тавдугаар сарын 1-нд ашиглалтад ороход бэлэн хэмээн гүйцэтгэгч компанийн зүгээс мэдээлэл өглөө.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр “Хотын Захирагчийн өгсөн үүргийн дагуу Чингэлтэй дүүргийн 4 дүгээр хороонд эзэмшил газраа олон жил ашиглаагүй газрыг чөлөөлж бичил цэцэрлэг байгуулж байна. Тохижилтын явц 90 хувьтай явж байна.Урд нь энэ хэсэгт барилгын суурь ухаад хашаа татаад орхичихсон байсан. Орчны аюулгүй байдлыг хангаагүй, хогоор дүүрсэн газрыг тохижуулж бичил цэцэрлэг байгуулж байгаад иргэд талархал илэрхийлж байгаа” гэв.

Цаашид бичил цэцэрлэгийг Чингэлтэй дүүргийн ТҮК бүрэн хариуцаж, арчлалт хамгаалалтын ажлыг хийх юм байна.

Ард Аюушийн өргөн чөлөөний олон жил сул шороон хөрстэй байсан замын гол хэсгийг иж бүрэн тохижуулж байна.

Өнөөдөр Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр тэргүүтэй албаныхан ажлын явцыг шалгаж, гүйцэтгэгч компанийн ажилчидтай уулзав. Гүйцэтгэгчээр “Охь мандал” компани ажиллаж байгаа бөгөөд бүтээн байгуулалтын ажил тавдугаар сарын 15 гэхэд дуусна гэдгийг холбогдох албаны хүмүүст хэлсэн юм.

Улаанбаатар хотын Захирагчийн ажлын албанаас 2019 онд Ард Аюушийн өргөн чөлөө буюу Саппорогийн уулзвараас хойш Өргөө кинотеатрын уулзвар хүртэлх зам дагуу 1,350 ширхэг бортоготой гацуур мод тарьжээ. Энэ онд 1.6 км урт уг замын голын булеварын ногоон байгууламж дагуу иргэдэд зориулсан явган хүний зам, сандал, хогийн сав, троссон хашлага бүхий иж бүрэн тохижилт бүтээн байгуулалтын ажлыг хийж байна.

Өргөөгийн уулзвараас уруудаад Саппорогийн уулзвар хүртэл 2.2 км ногоон зурваст нийт 5,925 м.кв явган зам, 4,700 метр троссон хашлага хийгдэх бөгөөд 1,610 метр квадрат талбайг шинээр зүлэгжүүлэх аж. Мөн 21,924 метр квадрат талбайд ногоон байгууламж, мод бут сөөг тарьж суулгах бөгөөд гүйцэтгэгч компанийн зүгээс гурван жилийн хугацаанд ногоон байгууламжийн арчлалт тордолгоог бүрэн хариуцах аж.

Нийслэлийн Засаг даргын Хог хаягдал, орчны бохирдлыг бууруулах зарим арга хэмжээний тухай захирамж, Бүх нийтийн их цэвэрлэгээ зохион байгуулах тухай Улаанбаатар хотын Ерөнхий менежерийн тушаалын дагуу өнөөдөр бүх нийтийн их цэвэрлэгээг зохион байгууллаа.

Жил бүрийн өдийд “Их хотын цэвэрлэгээний 90 минут” уриатай бүх нийтийн цэвэрлэгээг хийдэг уламжилтай бөгөөд энэхүү арга хэмжээг жилдээ 5-6 удаа зохион байгуулдаг юм.

Дэлхийн олон улсад тархаад буй коронавирусийн халдварын дэгдэлттэй холбоотойгоор олон нийтийг хамруулахгүй байх үүднээс энэ жилийн бүх нийтийн цэвэрлэгээг цэвэрлэгээний чиглэлээр үйл ажиллагаа явуулдаг мэргэжлийн байгууллагууд хийж байна. Зарим хувийн аж ахуйн нэгж байгууллагууд болон иргэд нийгмийн хариуцлагаа ухамсарлан өөрийн байгууллагын гадна орчныг цэвэрлэж байгаа юм.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр “Нийслэлийн нутаг дэвсгэрт үйл ажиллагаа явуулдаг төрийн болоод төрийн бус бүхий л байгууллага, ААН болон иргэд их цэвэрлэгээг нэг цагт эхлээд 90 минутын турш үр дүнтэй, үр бүтээлтэй хийхийг уриалдаг. Энэ жилийн хувьд олон хүнийг төвлөрүүлэхгүй байх үүднээс мэргэжлийн байгууллагууд их цэвэрлэгээг хийж байна.Сүүлийн үед иргэдээс энэ их цэвэрлэгээний арга хэмжээг дэмжин сар бүр тогтмол хугацаанд хийж иргэдэд дадал зуршил бий болгооч гэсэн санал, хүсэлт их ирэх болсон. Өнгөрсөн жил “Их цэвэрлэгээний 90 минут” арга хэмжээг хийсэн нь маш их үр дүнд хүрсэн” хэмээлээ.

Улаанбаатар хотын Захирагчийн ажлын албанаас коронавирусийн халдвараас урьдчилан сэргийлэх үүднээс нийслэлийн хэмжээнд халдваргүйжүүлэлтийн арга хэмжээг хоёрдугаар сараас эхлэн зохион байгуулж эхэлсэн бөгөөд өнөөдрийг хүртэл нийт 8,646 км замд хоёр удаа халдваргүйжүүлэлт хийжээ.

Гурав дахь удаагийн халдваргүйжүүлэлт ирэх даваа гарагт нийслэлийн гол гудамж руу чиглэсэн байдлаар хийгдэх юм. Түүний зэрэгцээ машин хүрэх боломжгүй булан тохой, хүүхдийн тоглоомын талбай, амралтын газрын сүүдрэвч зэрэг байршлуудад халдваргүйжүүлэлтийн ажил хийгдэж байна. Халдваргүйжүүлэлтийн ажиллагааг энэ сарын 30 хүртэл хийнэ хэмээн Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр онцоллоо. Бүх нийтийн их цэвэрлэгээ амралтын хоёр өдөр үргэлжлэх аж.

Улсын Онцгой комиссын хурлын тэмдэглэл гарч, Засгийн газрын 139 дүгээр тогтоол батлагдаж, бүх шатны боловсролын байгууллага, сургалтын төвийн танхимын сургалтын үйл ажиллагааг 2020 оны 9 дүгээр сарын 1-ний өдрийг хүртэл зогсоосонтой холбогдуулан Боловсрол, соёл, шинжлэх ухаан, спортын сайдын “Их, дээд сургууль, коллежийн хичээл, сургалтын үйл ажиллагаанд зарим зохицуулалт хийх тухай” А/195 дугаар тушаалыг батлав. Тушаалаар ямар зохицуулалт хийсэн талаараа Боловсрол, соёл, шинжлэх ухаан, спортын сайд Ё.Баатарбилэг энэ сарын 21-ны өдөр мэдээлэл хийсэн.

Элсэлтийн хувьд: 2019-2020 оны хичээлийн жилийн эхний статистик мэдээгээр 95 их, дээд сургууль, коллежид 148,5 мянган оюутан суралцаж байгаагаас төрийн өмчийн 21 сургуульд 82,9 мянган оюутан, хувийн өмчийн 71 сургуульд 66,4 мянган оюутан, гадаадын их сургуулийн салбар 3 сургуульд 190 оюутан тус тус суралцаж байна.

2020-2021 оны хичээлийн жилд бакалаврын зэргийн хөтөлбөрт их, дээд сургууль, коллежид оюутан элсүүлэх ерөнхий шалгалтын Үндэсний хэмжээний босго оноог төрийн өмчийн их, дээд сургуульд 480, төрийн бус өмчийн их, дээд сургууль, коллежид 410, орон нутгийн их, дээд сургууль, коллежид 400 оноо байхаар тус тус тогтоолоо.

Улсын хэмжээнд ЭЕШ өгөхөөр бүртгүүлсэн XII анги төгсөгч 27983 сурагчдад ЭЕШ-д бэлтгэхэд нь дэмжлэг үзүүлэх зорилгоор интернэтэд үнэ төлбөргүй орох дата эрх олгох ажлыг аймаг, дүүргийн БСУГ, орон нутгийн удирдлагуудын дэмжлэгтэйгээр зохион байгуулж, үүрэн телефоны операторууд үнэгүй дата бүхий дугаарыг олгох ажлыг зохион байгуулж эхэлсэн” хэмээлээ.

Түүнчлэн энэ жилээс сувилагчийн сургуульд элсэн суралцагч амжилттай суралцвал төлбөрийг нь төрөөс даах шийдвэрийг Засгийн газрын хуралдаанаас гаргасан байна.

Төгсөлтийн хувьд: Энэ хичээлийн жилд 22,387 суралцагч төгсөх бөгөөд нийт төгсөгчдийн 17,420 нь бакалаврын, 4,572 нь магистрын, 395 нь докторын зэрэгтэй төгсөнө.

Засгийн газрын 2014 оны 71 дүгээр тогтоолоор батлагдсан “Дээд боловсролын сургалтын байгууллагад суралцагчид суралцагчийн тэтгэлэг олгох журам”-ын 4.1 дэх хэсэгт заасан оюутнуудыг хичээл сонголт болон төгсөлтийн шалгалтад бүрэн хамруулах үүрэг өгсөн. Энэхүү заалтад бүтэн өнчин суралцагч, хөгжлийн бэрхшээлтэй суралцагч, хөдөлмөрийн чадвараа бүрэн алдсан өрхийн гишүүнтэй 1 суралцагч, Засгийн газар хоорондын гэрээгээр суралцагч, багш мэргэжлээр суралцагч, нэг өрхийн 3 ба түүнээс дээш хүүхэд зэрэг суралцаж байгаа өрхийн 1 суралцагч, цаатан өрхийн суралцагч тус тус хамрагдана. Энэхүү буцалтгүй тусламж олгоход 2020 оны төсөвт 8,460 оюутанд 16,6 тэрбум төгрөг батлагдсан гэлээ.

2019-2020 оны хичээлийн жилийн эхний улиралд их, дээд сургууль, коллежийн 51 дотуур байранд 11,8 мянган оюутан амьдарч байсан. Одоогийн байдлаар 51 оюутны байранд нийт 412 оюутан амьдарч байна. Оюутны дотуур байранд амьдардаг оюутан, суралцагчийн эд зүйлсийг 2020 оны 5 дугаар сарын 15-ны өдөрт багтаан хүлээлгэн өгөх арга хэмжээ авахыг их, дээд сургууль, коллежийн захирал нарт үүрэг болгожээ.

Эрүүл мэндийн яамнаас шинэ коронавирусний халдварын нөхцөл байдлын мэдээллийг 2020 оны дөрөвдүгээр сарын 25-ны 11:00 цагийн байдлаар мэдээллээ. Өнөөдрийн байдлаар “COVID-19” халдвар дэлхийн 213 улс, бүс нутагт бүртгэгдээд байна. Шинэ коронавирусний халдвараар 197 245 хүн нас баржээ. Халдвар авсан хүний тоо 2 830 051-д хүрсэн бол 798 772 хүн эдгэрсэн байна.

Олон улсын стандартад нийцсэн хөл бөмбөгийн талбайн тохижилтын ажил 85 орчим хувьтай байна. Ажлын явцыг шалгахад сагсан бөмбөгийн талбайг зориулалтын резинээр бүрэх ажил, явган хүний замын хавтан суурилуулах, хөлбөмбөгийн талбайн шугам будгийн ажил дууссан байна. Хүүхдийн тоглоомын талбай байгуулах ажил, орох, гарах постны дотоод засал, угаалгын өрөөний ажлууд хийгдэж байна.

Баянзүрх дүүргийн дөрөвдүгээр хорооны нутаг дэвсгэр буюу Хил хамгаалах ерөнхий газрын баруун урд хөлбөмбөгийн талбайг стандартын дагуу тохижуулж байна. Нийт 1.8 га газарт цэцэрлэгт хүрээлэн, гүйлтийн зам, хөлбөмбөг, сагсан бөмбөг, волейболын талбай, гэрэлтүүлэг, автомашины зогсоол, угаалгын өрөө бүхий иж бүрэн спортын талбай байгуулж байна. Спортын талбайг ирэх сарын 15-нд ашиглалтад оруулахаар ажиллаж байна.

Монгол Улсаас АНУ-д суугаа Элчин сайд Ё.Отгонбаяр 2020 оны дөрөвдүгээр сарын 24-ний өдөр Төрийн департаментын Зүүн Ази, Номхон далайн орнуудын асуудал хариуцсан Туслах ТНБД-ын орлогч Ж.Фриц-тэй видео хурал хийж, Монгол, Америкийн харилцаа, хамтын ажиллагааны өнөөгийн байдал хийгээд цаг үеийн бусад асуудлаар санал солилцов.

Элчин сайд Ё.Отгонбаяр Монгол Улсын Засгийн газрын зүгээс шинэ коронавирусын тархалтаас урьдчилан сэргийлэх талаар авч хэрэгжүүлж буй арга хэмжээ болон сүүлийн үеийн нөхцөл байдлын талаар танилцуулж, манай талын энэхүү хүч чармайлтыг дэмжиж америкийн талаас 1.2 сая ам.долларын тусламж үзүүлсэнд Засгийн газрын нэрийн өмнөөс чин сэтгэлийн талархал илэрхийлэв.

Талууд ГХЯ, Төрийн департамент хоорондын ээлжит зөвлөлдөх уулзалтыг Улаанбаатарт зохион байгуулах ажлын бэлтгэлийн талаар ярилцсан бөгөөд коронавирусын тархалтын нөхцөл байдал нь хоёр талын эдийн засаг, консулын хамтын ажиллагааны ач холбогдлыг илтгэж байна гэдгийг тэд нэгтэй тэмдэглэв.

Коронавирусын халдвар тархахаас урьдчилан сэргийлэх зорилгоор Засаг захиргааныхаа зүгээс хэрэгжүүлж буй арга хэмжээний хүрээнд АНУ-ын Төрийн департамент нь “telework” буюу алсын зайны горимоор ажиллаж байгаа юм.

Эрүүл мэндийн яамнаас коронавирусийн талаар хийсэн ээлжит мэдээллийн үеэр цар тахлын үеийн бэлэн байдлаа хэрхэн хангаж буй талаар П.Н.Шастины нэрэмжит Улсын гуравдугаар төв эмнэлгийн дарга Ц.Төмөр-Очир мэдээллээ.

Тэрбээр “Коронавирусийн цар тахлын үед бэлэн байдлыг хангах чиглэлээр тохиолдлын удирдлагын тогтолцоонд бүрэн шилжиж, өндөржүүлсэн бэлэн байдалд ажиллаж байна. Нийт давхардсан тоогоор 2,400 эмч, ажилтнаа таван чиглэлээр 44 удаагийн сургалтад холбогдох газруудтай нийлж, хамруулан дадлагажуулсан.

Тухайлбал, хувийн хамгаалах хувцас хэрэгсэл өмсөж тайлах бэлтгэл дадлага сургуулилт энэ халдварын үед чухал арга хэмжээ тул 2,500 эмч ажилтнуудаа сургалтад хамруулсан.

Эмнэлгийн орох гарах гурван гарцад хяналтын пост тогтмол ажиллуулж байгаа. Мөн эм, эмнэлгийн хэрэгслийн бэлэн байдлыг хангах хүрээнд нийт 730 орчим сая төгрөгийн нэг сарын эм, хэрэглэлийн нөөцийг үүсгэсэн. Нийт 1,000 хүний иж бүрдэл, хувийн хамгаалах хэрэгслийн нөөц болон халдварын дэлгэлтийн үед хэрэглэх хамгаалах хэрэгслийн бэлэн байдлыг хангасан. Эмч мэргэжилтнүүдийнхээ сэтгэл зүйн бэлэн байдлыг хангах үйл ажиллагаа зохион байгуулж байна.

ЭМЯ-наас гуравдугаар төв эмнэлэгт 300 орчим сая төгрөгийн тоног төхөөрөмж, халдвар хамгааллын хувцас хэрэгслийг дэмжлэгээр олгосон.

Эрүүл мэндийн сайдын холбогдох тушаал, коронавирустэй холбоотой албан даалгаврын дагуу тус эмнэлэг нийт тусгаарлан эмчлэх 200 ор, эрчимт эмчилгээний 50 орыг дэлгэн ажиллуулах бэлтгэлээ хангасан.

Дараагийн нэг тулгарч байгаа зүйл нь энэ хүнд цар тахлын үед эмч мэргэжилтнүүд тохиолдлын удирдлагын тогтолцоонд шилжин цаг наргүй ажиллаж байгаа билээ. Харамсалтай нь зарим иргэд үйлчлүүлэгчдийн зүгээс үл хүндэтгэж, доромжлон хүндрэл учруулах асуудлууд гарч байгааг онцлох нь зүйтэй.

Мөн эмнэлгийн байгууллагаар олноороо явж байна. Бага насны хүүхдүүдээ дагуулж явах, маскгүй үйлчлүүлэх, эргэлтийн цагийг баримтлахгүй байх зэрэг асуудлууд тулгарч байна. Эрүүл мэндийн байгууллагуудаас өгч буй заавар зөвлөмжийг дагаж мөрдөөд цар тахлыг хамтдаа даван туулах нь чухал билээ” гэв.