Month: March 2020

Шинэ коронавируст (COVID-19) халдвар орж ирсэн үед тархах эрсдэлийн салбар хоорондын түргэвчилсэн үнэлгээг Монгол Улсын Шадар сайдын тушаалаар батлагдсан “Эрсдэлийн үнэлгээний аргачлал”-ын дагуу 21 аймагт хийлээ.

Үнэлгээг аймгуудын Онцгой байдлын газар, Эрүүл мэндийн газар, Санхүү төрийн сан, Тагнуулын газар, ХХААГ, Зооноз судлалын төв, Авто тээврийн төв, Цагдаагийн газар, Мэргэжлийн хяналтын газар, болон Боловсрол, соёл, урлагийн газрын хамтарсан “Ажлын хэсэг”-ийн бүрэлдэхүүн хийсэн юм.

Тус үнэлгээгээр Өмнөговь, Дорноговь, Баян-Өлгий аймгууд “Маш өндөр”, бусад аймгууд “Өндөр” эрсдэлтэй тодорхойлогдсон байна. Аймаг тус бүр дээрх үнэлгээний дүн, хэрэгжүүлэх шаардлагатай арга хэмжээний талаарх зөвлөмжийг аймгийн Онцгой комисст уламжлан шийдвэрлүүлэхээр ажиллаж байна.

Гуравдугаар сарын 03-ны өдрийн 06.00 цагт нийслэл рүү орох, гарах хөдөлгөөнийг нээснээр авто тээврийн урсгал, хөл хөдөлгөөн хэвийн үеийнхээс гурав дахин нэмэгдсэн. Үүнтэй холбогдуулан Нийслэлийн Эрүүл мэндийн газраас авто тээврийн шалган нэвтрүүлэх найман товчоодод зохион байгуулж буй Хяналтын цэгт ажиллах эмч, эмнэлгийн мэргэжилтнүүдийн тоог эрс нэмэгдүүлж, иргэдийн хувьд хүлээгдэл чирэгдлийг бууруулах бэлтгэл ажлыг хангаж ажиллалаа.

Хүнд нөхцөлд 24 цагаар жижүүрлэн ажиллаж буй эмч, эмнэлгийн мэргэжилтнүүдийн хувьд нийслэл болон орон нутаг руу чиглэсэн тээврийн хэрэгсэлд 2 талдаа хяналт тавьж, зорчигч бүрийн халууныг хэмжих, эмнэл зүйн асуумж авах, орох гарах хөдөлгөөний талаар асуумж судалгаа хийх, эрүүл мэндийн зөвлөгөө мэдээлэл өгөх, коронавирусын халдвараас урьдчилан сэргийлэх зөвлөмж тараах байдлаар маш өндөр зохион байгуулалтай ажиллаж байгаа юм.

Мөн нийслэлийн Засаг даргын тамгын газраас НҮБ-ын Олон улсын шилжилт хөдөлгөөний байгууллагын Монгол Улс дахь салбартай хамтран хяналтын зургаан цэгт зорчигчдын хөдөлгөөнд тандалт, судалгааг хийж байна.

Монгол Улсын Засгийн газрын Хэрэг эрхлэх газрын дарга, Монгол Улсын сайд Л.Оюун-Эрдэнэ өнөөдөр Монгол Улсын Засгийн газраас боловсруулж, УИХ-д өргөн мэдүүлээд буй “Алсын хараа-2050: Монгол Улсын урт хугацааны хөгжлийн үзэл баримтлал” баримт бичгийг Монголбанкны Ерөнхийлөгч Б.Лхагвасүрэнд гардууллаа. Уг баримт бичиг нь Монгол Улсыг 2050 он хүртэл хөгжүүлэх бодлогын цогц алхмуудыг тусгасан, стратегийн баримт бичиг юм.

Хөгжлийн урт хугацааны бодлогыг хэрэгжүүлэхэд Засгийн газар Төв банк болон бусад мэргэжлийн байгууллагууд, улс төрийн намуудтай нягт хамтран ажиллах хэрэгтэй. Нөгөөтэйгүүр төв банкны мөнгөний бодлого болон Засгийн газрын хөрөнгө оруулалтын бодлогууд харилцан уялдаа холбоотой, нэгдсэн чиг баримжаатайгаар хэрэгжих нь зүйтэй гэж үзсэнээр уг баримт бичгийг Монголбанкинд хүлээлгэн өгч буйгаа сайд Л.Оюун-Эрдэнэ онцолсон юм.

Баримт бичгийг хүлээн авсны дараа Монголбанкны Ерөнхийлөгч Б.Лхагвасүрэн Монголбанкнаас сүүлийн жилүүдэд баримталж буй банкны салбарын шинэчлэлийн бодлого, мөнгөний болон макро зохистой бодлогуудын үр дүн, эдийн засгийн нөхцөл байдал, цаашдын төлөв байдлын талаар товч мэдээлэл өгөв. Мөн улсын хэмжээнд Коронавирусын эрсдэлтэй холбоотойгоор өндөржүүлсэн бэлэн байдал зарлаж, эдийн засагт сөргөөр нөлөөлж болзошгүй байгаа энэ үед төв банк ямар арга хэмжээ авч хэрэгжүүлэх, ЗГ, УИХ-тай хэрхэн хамтран ажиллах талаар санал солилцлоо.

“Сүмбэр коммодитиз” компани нийгмийн хариуцлагын хүрээнд МХЕГ-т 17 ширхэг богино долгионы радио станц бэлэглэлээ. Тус компанийн захирал М.Түвшинсанаа “COVID19 вирусийн халдвараас урьдчилан сэргийлэхэд Мэргэжлийн хяналтын байгууллага хамгийн түрүүнд хил дээр нүүр тулж ажилладаг. Зөвхөн энэ удаад ч биш, цааш нь үргэлжлүүлээд ашиглахийг нь тооцож энэ радио станцыг бэлэглэж байна” гэв.

МХЕГ-ын дэд дарга Д.Энхсайхан хилийн боомтууд дээр ажиллаж буй мэргэжлийн хяналтын албад, хэлтэст шаардлагатай байгаа радио станц бэлэглэж байгаад талархаад, тус компанийн хамт олон ажлын амжилт хүслээ.

“Зорчигч тээвэр-3” ОНӨААТҮГ-ын хамт олон нийгмийн хариуцлагын хүрээнд нэг өдрийн цалингаа нийслэлийн Мэргэжлийн хяналтын газарт хандивлалаа.

“Зорчигч тээвэр-3” ОНӨААТҮГ-ын дарга Б.Цолмон “Дэлхий нийтээр тархаад байгаа халдвараас урьдчилан сэргийлэх арга хэмжээг нийслэлийн удирдлагууд хурдан шуурхай авч хэрэгжүүлж байгаад талархаж байна. Манай байгууллагын хамт олон төр засгаас хэрэгжүүлж байгаа ажлуудыг дэмжиж, хот хоорондын хөдөлгөөнийг хязгаарласан үед тусгай тээврийн хэрэгслээр албан хаагчдад үйлчлэх, нийтийн тээврийн хөдөлгөөнийг тасалдуулахгүйг хичээж, “Бид хамтдаа аян”-г зохион байгуулж ажиллаж байна” хэмээн онцолж хэллээ.

“Зорчигч тээвэр-3” ОНӨААТҮГ өдгөө 343 ажилтан албан хаагчидтай бөгөөд нэг өдрийн цалин болох 10 сая төгрөгийг ийнхүү нийслэлийн Мэргэжлийн хяналтын газрын дарга Л.Эрдэнэчулуунд гардуулан өглөө.

Нийслэлийн Мэргэжлийн хяналтын газрын дарга Л.Эрдэнэчулуун иргэдийнхээ эрүүл мэндийг хамгаалахын төлөө өдөр шөнөгүй ажиллаж байгаа албан хаагчдыг маань ойлгож, бас дэмжиж байгаад талархал илэрхийлээд “Зорчигч тээвэр-3” ОНӨААТҮГ-ын хамт олонд цаашдын ажилд нь өндөр амжилт хүслээ.

Сэлэнгэ аймгийн Алтанбулаг, Сүхбаатар боомтод НМХГ-ын эрүүл ахуй халдвар хамгааллын хяналтын улсын ахлах байцаагчид томилолтоор ажиллаж байна.

Тэд Сэлэнгэ аймаг дахь Хилийн мэргэжлийн хяналтын албаны улсын байцаагчидтай хамтран 2020.03.02-ны 08:00 цагаас 2020.03.04-ний 08:00 цаг хүртэл ОХУ-аас орж буй 153 автомашины 367 зорчигч, Эрхүү-УБ чиглэлийн хоёр цуваа 12 вагоны 81 зорчигчийн эрүүл мэндийн байдалд хяналт хийж “COVID-19” голомттой бүс нутгаар зорчсон сэжигтэй 34 зорчигчийг ажиглалтад тусгаарлаж, Дархан-Уул аймгийн Онцгой комисст шилжүүлжээ.

Бохир гараа ам, хамар, нүдэндээ хүргэх, бусадтай гар барих, биед нь хүрэх зэрэг нь халдварт өртөх эрсдэлийг үүсгэдэг. Тиймээс гараа сайтар савандаж угаах эсвэл спиртэн суурьтай гар халдваргүйжүүлэгч хэрэглээрэй.

Бусад хэвлэлээр 40 хүрсэн мэдээ байна. Ялангуяа, Шинэ Өмнөд Уэльс мужид халдварын тархац нэмэгдэж, гадаад улсад зорчоогүй хүнд халдварласан тохиолдол гарчээ.

Шинэ төрлийн коронавирус буюу Сovid-19 халдварт өвчинтэй тэмцэж байгаа мэргэжлийн албан хаагчдын ажиллах нөхцөлийг сайжруулах, тэдэнд урам зориг өгөх зорилгоор Барилга, хот байгуулалтын сайд Х.Баделхан салбарынхандаа хандаж Улсын онцгой комисст нэг өдрийн цалингаа хандивлах уриалга гаргасан юм.

Энэхүү уриалгын дагуу:

-Барилга, хот байгуулалтын яам,

-Газар зохион байгуулалт, геодези, зураг зүйн газар,

-Барилгын хөгжлийн төв ТӨААТҮГ,

-Төрийн орон сууцны корпораци ТӨХХК,

-Хот суурины усан хангамж, ариутгах татуургын ашиглалт, үйлчилгээг зохицуулах зөвлөл,

-Зүүн өмнөд говийн хот байгуулалт, хилийн ойролцоо суурин газруудын хөгжлийн төсөл L3388-MON төсөл,

– Дархан хотын бохир усны менежментийн МОН-3244/3245 төсөл

-Ногоон нуур 1008 айлын орон сууц төсөл,

-Төв цэвэрлэх байгууламжийг шинээр барих төсөл,

-Монголын барилгын үндэсний ассоциаци,

-Монголын барилгын материал үйлдвэрлэгчдийн холбоо,

-Монголын барилгачдын нэгдсэн холбоо,

-Монголын архитекторуудын эвлэл зэрэг 13 байгууллагын ажилтнуудын нэг өдрийн цалин болох 22,4 сая төгрөгийг өнөөдөр Монгол Улсын Шадар сайд, Улсын Онцгой Комиссын дарга Ө.Энхтүвшинд Барилга, хот байгуулалтын яамны Төрийн нарийн бичгийн дарга С.Магнайсүрэн, Төрийн захиргааны удирдлагын газрын дарга Д.Баярсайхан, Газар зохион байгуулалт, геодези, зураг зүйн газрын дарга Ц.Ганхүү, Барилгын хөгжлийн төвийн захирал Ц.Амарсанаа нар гардуулан өглөө.

Мөн энэ үеэр шинэ төрлийн коронавирусийн халдвараас урьдчилан сэргийлэхэд шаардлагатай арга хэмжээг авч цаг наргүй ажиллаж байгаа мэргэжлийн байгууллагуудад талархал илэрхийлэхийн сацуу барилгын салбарт үйл ажиллагаа явуулдаг 80 гаруй мянган ажиллагсадтай найман мянга орчим аж ахуйн нэгж, байгууллага уриалгыг дэмжиж энэхүү аянд нэгдэхээр болсныг Барилга, хот байгуулалтын яамны Төрийн нарийн бичгийн дарга С.Магнайсүрэн онцоллоо.