Month: March 2020

Өнөөдөр /2020.03.01/ жүжигчин М.Баярмагнай Япон улсад үйлдвэрлэсэн 10 мянган ширхэг нэг удаагийн бээлийг ЭМЯ-нд хандив болгон өглөө.

Энэ үеэр М.Баярмагнай хэлэхдээ “Коронавирусийн халдварын халуун цэгт ажиллаж буй эмнэлгийнхэн, эмч, сувилагч нартаа зориулж Япон улсад үйлдвэрлэсэн, нэг удаагийн 10.000 ширхэг бээлийг хувиасаа бэлэглэж байна. Энэ бээлий Монголд хараахан орж ирээгүй байгаа. Монголд минь энэ аюулт халдвар хэзээ ч битгий орж ирээсэй гэж залбирч байна” гэлээ.

Мөн “Сувилахуйн амьдрал” төвийн хамт олон 10 сая төгрөгийн хандив болон эмч ажилчдын дархлааг дэмжих “Зөв” аарцны ундаа өгсөн юм.

Шинэ коронавирусийн халдварын эрсдэлээс урьдчилан сэргийлэх чиглэлээр Улсын Онцгой комисс яг одоо хуралдаж байна. Хурлаар тусгаарлах байр болон гадаад улс оронд амьдарч буй монголчуудын нөхцөл байдал, улс хоорондын зорчигч тээврийн хязгаарлалтын арга хэмжээг нээхтэй холбогдуулан авах арга хэмжээ болон нүүрс, газрын тосны экспортыг эхлүүлэхтэй холбоотой арга хэмжээнүүдийг ярих аж.

Нийслэлийн онцгой комиссын шийдвэрийн хүрээнд коронавирусээс урьдчилан сэргийлэх зорилгоор нийтийн тээврийн үйлчилгээний цагийн хуваарьт хоёрдугаар сарын 27-ны өдрөөс холбогдох өөрчлөлтийг оруулсан. Ажлын өдрүүдэд нийтийн тээврийн үйлчилгээний 95 чиглэл хуваарийн дагуу буюу 06:40 цагаас 22:40 цагийн хооронд үйлчилгээ үзүүлж байгаа бөгөөд өглөө, оройн ачаалал ихтэй цагуудад 700 орчим автобус, өдрийн цагаар буюу ачаалал багатай цагуудад үйлчилгээнд ажиллах тээврийн хэрэгслийн тоог бууруулан ажиллаж байна.

Өнөөдөр буюу Ням гаригт 08:00-22:30 цаг хүртэл 580 орчим автобус үйлчилгээнд ажиллах ажээ. Мөн хот орчмын ХО:4 Тэрэлж, ХО:5 Налайх, ХО:6 Өлзийт, ХО:7 Туул тосгон, ХО:9 Био комбинат, ХО:10 Эмээлт, ХО:11 Хонхор, ХО:12 Мал бордох, ХО:13 Баруун түрүү гэсэн 9 чиглэлд амралтын өдрүүдэд өглөө 8:00-09:30, орой 18:20-19:50 цагуудад үйлчилгээ үзүүлнэ гэж НЗДТГ-ын Хэвлэл мэдээлэлтэй харилцах хэлтсээс мэдээллээ.

Засгийн газрын 2020 оны 64 дүгээр тогтоолын дагуу коронавирус (COVID-19)-ийн халдвараас урьдчилан сэргийлэх, эрсдэлийг бууруулах зорилгоор улсын хэмжээнд гамшгаас хамгаалах өндөржүүлсэн бэлэн байдлын зэрэгт хэсэгчилсэн байдлаар шилжүүлсэн хугацааг 2020 оны 3 дугаар сарын 30-ны өдрийг хүртэл сунгасантай холбогдуулан нийгмийн даатгалын байгууллагаас иргэдийг олноор цуглуулахгүй байх, зарим төрлийн үйлчилгээг цахимаар үзүүлэх арга хэмжээг хэрэгжүүлж эхэллээ.

Тухайлбал, ажил олгогчийн хоёрдугаар сарын нийгмийн даатгалын шимтгэл төлөлтийн тайланг хуулийн хугацаанд цахимаар болон шуудангаар авч, хөл хорионы хугацаа дууссаны дараа НД-7, НД-8 цаасан тайланг хүлээн авна.

Мөн сайн дурын даатгалын гэрээний хугацаа дууссан тохиолдолд заавал хэлтэс дээр очиж сунгуулах шаардлагагүй дараа сарын шимтгэлээ төлснөөр сунгагдсанд тооцно.

Салбар болон орон нутгийн Эмнэлэг хөдөлмөрийн магадлах комиссын хурлаар даатгуулагчийн хөдөлмөрийн чадвар алдалтын хувь, хугацааг тогтоохдоо тухайн иргэнийг заавал оролцуулахгүй амбулаторийн карт, төрөлжсөн мэргэжлийн эмчийн үзлэг, шинжилгээний дүн, эмнэлэг хяналтын комиссын саналыг үндэслэн цахим болон бичиг баримтад тулгуурлан сунгаж, тогтооно. Харин шинээр тогтоолгож байгаа тохиолдолд Эмнэлэг хөдөлмөрийн магадлах комиссын хуралд төрөлжсөн мэргэжлийн эмч танилцуулж, шийдвэрлүүлэх юм.

Мөн хугацаанд аж ахуйн нэгж рүү чиглэсэн хяналт, шалгалтын ажлыг түр зогсоож байгаагаас гадна нийгмийн даатгалын хэлтсүүдийн лавлах утсыг тасралтгүй ажиллуулах, нийгмийн даатгалын нэгдсэн лавлах 7777-1289 утасны мэдээллийн ажилтны тоог нэмэгдүүлж, дуудлага алдалгүй зөвлөгөө өгөх зэргээр иргэдийг олноор төвлөрүүлэхгүй байх арга хэмжээг авч хэрэгжүүлж байна.

Замын-Үүдэд тусгаарласан байсан 104 иргэнийг гэрт нь явуулжээ. Тэднийг Замын-Үүдийн нутагт гурван байршилд 14 хоногийн хугацаанд ажиглалтын дэглэмд тусгаарлаж байсан бөгөөд энэ хугацаанд шинэ коронавирусийн шинж тэмдгийн тохиолдол илрээгүй тул Сумын Онцгой комиссын шийдвэрийг үндэслэн хоёрдугаар сарын 29-ний 09.00 цагаас тухайн бүсүүдэд тогтоосон дэглэмийг цуцалж, тусгай хяналт дор Замын-Үүдээс Улаанбаатар хот руу явуулсан байна.

БНСУ-д ням гарагт шинэ коронавирусээр халдварласан 376 шинэ тохиолдол бүртгэгдэж нийт халдвартай хүний тоо 3526 хүрчээ. Мөн уг халдварын улмаас нийт 17 хүн нас барсан байна. Шинээр бүртгэгдсэн тохиолдлуудын 333 нь Дэгү хотод, 26 нь Умард Гёнсан мужид илэрсэн гэж Өвчинд хяналт тавих, урьдчилан сэргийлэх төвөөс мэдээлжээ. Мөн Сөүл хотод 5, Бусан хотод 1 тохиолдол бүртгэгдсэн байна. Харин эдгэрсэн хүний тоо 30 болж нэмэгджээ. Дэгү хотын сүмийн 210 мянга гаруй гишүүнийг шинжилгээнд хамруулж байгаа тул халдвар авсан хүний тоо огцом нэмэгдэх төлөвтэй байгааг анхааруулжээ.

Баянгол дүүргийн нутаг дэвсгэрт байрладаг нийтийн хоолны газарт улсын байцаагчийн ажлын хувцастай, өөрийгөө Сэрэнжав гэж танилцуулсан этгээд өмсөж үнэмлэх үзүүлэн шалгалтаар явж байгаагаа хэлжээ. Нийслэлийн Мэргэжлийн Хяналтын газарт Сэрэнжав нэртэй улсын байцаагч ажилладаггүй бөгөөд энэ асуудлыг цагдаагийн байгууллагад шилжүүлсэн байна. Мэргэжлийн хяналтын байгууллагаас төлөвлөгөөт болон удирдамжтай шалгалт хийх, зөвлөн туслах үйлчилгээ үзүүлэхээр очихдоо аж ахуй нэгж байгууллагад урьдчилан мэдэгддэг. Түүнчлэн торгууль, шийтгэврийг тавихдаа бэлэн мөнгөөр бус, дансанд төвлөрүүлдэг. Иймээс аж ахуй нэгж байгууллага, иргэд мэргэжлийн хяналтаас явж байна гээд бэлэн мөнгө нэхэх, дансны дугаар өгвөл, удирдамж болоод биеийн байцаалтыг шалгах, харьяалах мэргэжлийн хяналтын хэлтсээс утасдаж лавлах, Нийслэлийн Мэргэжлийн хяналтын газрын 70128012 дугаарт яаралтай холбогдох шаардлагатай. Мөн тус хэргийн хохирогч болсон, мэдүүлэг өгөх иргэд байвал Баянгол дүүргийн Цагдаагийн хэлтэст яаралтай хандахыг НМХГ-аас анхаарууллаа.