Month: January 2020

Хэрлэн гол дагуу байршуулсан хөдөлгөөн мэдрэгч автомат камерын тусламжтай зохих эрхийн бичиг, зөвшөөрөлгүй, хориглосон арга хэрэгслээр загас барьж, зөрчил үйлдсэн 3 иргэнийг илрүүлж, “Зөрчлийн тухай хууль”-ийн дагуу торгууль ногдуулж, нөхөн төлбөр төлүүлсэн. Мөн 2020 оны 1 сарын 1-5 хооронд үйлдэгдсэн 2 зөрчлийг илрүүлж, хуулийн байгууллагад шилжүүлээд байна.

Өнөөдрийн Засгийн газрын хуралдаанаар жилд 600 мянган тонн сайжруулсан түлш үйлдвэрлэх хүчин чадалтай үйлдвэрийг нийслэлийн зүүн бүсэд барих тухай асуудлыг сайд Ц.Даваасүрэн танилцуулжээ.

Тус үйлдвэрийг Баянзүрх дүүрэгт барих бөгөөд барилга байгууламж, дэд бүтэц, машин механизм, тоног төхөөрөмж зэрэгт шаардагдах хөрөнгийг “Эрдэнэс Тавантолгой” компани гаргах юм байна.

Найман шугамтай энэ үйлдвэр сард 52.8 мянган тонн сайжруулсан түлш үйлдвэрлэх бөгөөд барилга угсралтын ажлыг гуравдугаар сард эхлэхээр төлөвлөжээ. Үйлдвэр наймдугаар сарын 15-наас бүрэн хүчин чадлаараа ажиллах бөгөөд ондоо багтаан 303 мянган тонн сайжруулсан түлш үйлдвэрлэх юм.

2020 оны нэгдүгээр сарын 3-наас БНХАУ-ын Хубэй мужийн Ухань хотод шалтгаан нь тодорхойгүй уушгины хатгалгаа өвчин бүртгэгдэж, зарим тохиолдлын биеийн байдал хүнд байгаа бөгөөд хавьтлуудыг хяналтад авсан талаар ДЭМБ-аас мэдээлжээ.

2020 оны 1 сарын 5-ны байдлаар өвчлөлд өртөгсдийн тоо нэмэгдэж, 59 тохиолдол болсон ба 163 хавьтлыг эмнэлгийн хяналтад авсан байна.

Өвчтөнд амьсгалын замын халдварын шинж тэмдгүүд, халуурах, амьсгалахад хүндрэлтэй болох зэрэг шинж тэмдэг илэрчээ.

Үүсгэгчийг тодорхойлох, шалтгааныг тогтоох тандалт, судалгаа, шинжилгээ үргэлжилж байгааг ДЭМБ-аас мэдээлсэн байна.

ШАЛТГААН НЬ ТОДОРХОЙГҮЙ УУШГИНЫ ХАТГАЛГАА ӨВЧНӨӨС СЭРГИЙЛЭХ ЗӨВЛӨМЖ:

• Уушгины хатгалгаа, халдварын шалтгаан тодорхойгүй байгаа ч амьсгалын замын цочмог халдварын үеийн эрсдэлийг бууруулах үндсэн зарчмуудыг баримтлах нь зүйтэй юм.
• Амьсгалын замын цочмог халдвартай хүмүүстэй ойр дотно харьцахаас зайлсхийх, болгоомжлох
• Гараа байнга угаах, ялангуяа өвчтэй хүмүүс эсвэл түүний хүрээлэн буй орчинтой шууд харьцсаны дараа
• Өвчтэй амьтад фермийн эсвэл зэрлэг амьтантай ойр дотно харьцахаас зайлсхийх
• Амьсгалын замын цочмог халдварын шинж тэмдэгтэй хүмүүс ханиалгын дэглэмийг сахих хэрэгтэй (зайгаа барьж, ханиалгах, найтаах үед)
• Аялал жуулчлалын үеэр эсвэл дараа нь амьсгалын замын өвчнөөр өвчилсөн шинж тэмдэг илэрвэл аялагчид эмнэлгийн тусламж авах, аялалын түүхээ эрүүл мэндийн байгууллагатайгаа хуваалцахыг зөвлөж байна.

Нийслэлийн Цагдаагийн удирдах газрын Төлөвлөлт, хяналт, шинжилгээ үнэлгээний хэлтсийн дарга, хурандаа Б.Даваадорж “Өнгөрсөн 14 хоногт нийслэлийн Цагдаагийн удирдах газар хэв журам хамгаалах чиглэлээр нийслэл хотын хэмжээнд явган эргүүлийн 2382 чиглэлд 4764 алба хаагч үүрэг гүйцэтгэж, эргүүлийн чиглэлд үйлдэгдсэн 33 гэмт хэргийн халуун мөрөөр нь илрүүлсэн. Зөрчил гаргасан 4384 хүнд 269 сая 660 мянган төгрөгийн торгууль ногдуулсан. Архидан согтуурч зөрчил гаргасан 1307 хүнийг эрүүлжүүлсэн байна.

Шинэ жилийн баярыг тэмдэглэн өнгөрүүлэхтэй холбогдуулан 2019 оны 12 дугаар сарын 30-ны 18:00 цагаас 2020 оны 01 дүгээр сарын 02-ны 08:00 цагийн хооронд нийслэлийн Цагдаагийн удирдах газар, харьяа байгууллагын бие бүрэлдэхүүн өндөржүүлсэн бэлэн байдлын 2 дугаар зэрэглэлд шилжин ажилласан. “Шинэ жил” нэгдсэн арга хэмжээний хүрээнд Нийслэл, дүүргийн мэргэжлийн хяналтын газар, хэлтсийн улсын байцаагч, Нийслэл, дүүргийн хүнс, худалдаа үйлчилгээний хэлтсийн мэргэжилтнүүдтэй хамтран зургаан удаагийн хяналт шалгалтыг зохион байгуулж, 41 зөрчил илрүүлэн, 292 шил архи, 54 шил дарс, 221 литр шар айраг, 900 хайрцаг тамхи хураан авч, Зөрчлийн тухай хуульд зааснаар хариуцлага тооцсон.

“Улаанбаатарын мөнгөн үдэш” цэнгүүний хэв журмын хамгаалалт болон гэмт хэргээс урьдчилан сэргийлэх чиглэлээр хоёр төрлийн сэрэмжлүүлэг, гурван текстэн мэдээ, 31 фото зураг байгууллагын цахим хуудас болон олон нийтийн сүлжээ хуудсанд байршуулсныг давхардсан тоогоор 530.0 мянга гаруй хэрэглэгч үзсэн байна” гэв.

2020 оны 01 дүгээр сараас эхлэн Өрхийн мэдээллийн нэгдсэн санд бүртгэлтэй буюу Өрхийн амьжиргааны түвшинг тогтоох судалгаанд хамрагдсан өрхийн хүүхдүүдэд амьжиргааны түвшин харгалзахгүй Хүүхдийн мөнгөн тэтгэмжийг олгохоор боллоо. Ийм иргэд та бүхэн Өрхийн мэдээллийн нэгдсэн санд бүртгэлтэй эсэхээ хэлтсийн Өрхийн мэдээллийн нэгдсэн сангийн судалгаа хариуцсан мэргэжилтэнд хандаж шалгуулна уу.

2018, 2019 онуудад Хүүхдийн мөнгөн тэтгэмж аваагүй иргэд дараах мэдээллийг анхаарна уу! Үүнд:

-Шинэ төрсөн хүүхдүүд Өрхийн мэдээллийн нэгдсэн санд бүртгэлтэй байгаа эсэхийг шалгуулах
-Арилжааны банкинд данстай эсэх, хуучин авч байсан данс идэвхтэй эсэхийг шалгуулах
-Өрхийн амьжиргааны түвшинг тогтоох судалгаанд хамрагдаагүй бол Өрхийн мэдээллийн нэгдсэн сангийн судалгаа хариуцсан мэргэжилтэнд хандан, хүсэлтээ гаргах

Жич: Хүүхдийн мөнгөн тэтгэмжээ сар бүр хэвийн авч байгаа өрх хүүхдүүддээ хүсэлт гаргах шаардлагагүй.

Засгийн газрын хуралдаанаар сурагчдын амралтыг долоо хоног сунгах шийдвэр гарсантай холбогдуулан 42 жилийн түүхтэй хүүхдийн “гүрэнт улс” болох Найрамдал цогцолбор 2-р улирлын нэмэлт захиалгаа авч эхэллээ.

Монгол Улсын Хүн ам, орон сууцны ээлжит тооллого 2020 оны нэгдүгээр сарын 9-15-ны хооронд орон даяар нэгэн зэрэг явагдана. Уг тооллогыг явуулснаар засаг захиргааны анхан шатны нэгжийн түвшинд ард түмнийхээ аж байдлыг өрх, иргэн бүрээр тодорхойлж, өнгөрсөн 10 жилийн ололт, амжилтыг дүгнэх, ирэх жилүүдийн бодлого хөтөлбөрийг төлөвлөх суурь мэдээллийг бий болгох юм.

Хүн ам, орон сууцны тооллогын тухай хуулийн 8.3-т заасны дагуу ээлжит тооллогыг товлосон өдрөөс эхлэн долоо хоногт багтаан явуулахаар заасан байдаг. Уг заалтын дагуу Хүн ам, орон сууцны Улсын ээлжит тооллогыг 2020 оны нэгдүгээр сарын хоёр дахь долоо хоног буюу энэ сарын 9-нөөс 15-ны өдрийн 22.00 цаг хүртэл мэдээлэл цуглуулалтыг явуулна.

Иргэн та өөрийн өрхийн бүртгэлтэй баг, хороондоо хандан мэдээллээ хянан баталгаажуулж, тооллогодоо идэвхитэй хамрагдана уу.