Month: January 2020

2020 оны 2-р сарын 2-ны өдрөөс шинэчдэгдсэн Шенгений визийн кодекс хүчин төгөлдөр үйлчилж эхэлнэ. Богино хугацааны/шенгений виз мэдүүлэхэд дор дурьдсан өөрчлөлтүүд орсон болохыг уламжилж байна. Үүнд:

• Шенгений визийн маягтанд хэсэгчилсэн өөрчлөлтүүд орсон бөгөөд шинэ маягтыг (DOCX, 49 KB) татаж авна уу.
• Шенгений визийн хураамж 60 евро байснаас 80 евро болж нэмэгдсэн болно. 6-12 насны хүүхдийн визийн хураамж 35 евро байснаас 40 евро болж харин 0-6 насны хүүхэд болон Европын холбооны иргэний гэр бүлийн гишүүд визийн хураамжаас чөлөөлөгдөж байгаа нөхцөл нь хэвээр үлдэж байгаа болно. Виз мэдүүлгийн төвийн үйлчилгээний хураамжинд өөрчлөлт ороогүй болно.
• Виз мэдүүлгийн өргөдлийг зорчихоор төлөвлөсөн өдрөөс 6 сар хүртэлх хугацааны өмнө мэдүүлэх боломжтой болж байгаа болно. (Визийн кодексийг шинэчлэн найруулааагүй байхад 3 сар хүртэлх хугацааны өмнө мэдүүлэх боломжтой байсан) Мөн зорчихоор төлөвлөсөн өдрөөс хамгийн багадаа 15 хоногийн өмнө виз мэдүүлнэ. Хэрэв дээрх хугацаанд мэдүүлээгүй тохиолдолд Элчин сайдын яамны консулын хэлтэс визийн өргөдлийг хүлээн авахаас татгалзах эрхтэй болно!!!
• 2020 оны хоёрдугаар сарын 2-ны өдрөөс эхлэн Монгол Улсад богино хугацааны шенгений визийн мэдүүлгийг зөвхөн Улаанбаатар хот дахь Виз мэдүүлгийн төвөөр дамжуулан хүлээн авна. Европын Холбооны иргэний гэр бүлийн гишүүн Улаанбаатар хот дахь Бүгд найрамдах Чех улсын Элчин сайдын яаманд хандаж виз мэдүүлэх эрх нь хэвээр үлдэж байгаа болно. Мөн дипломат/албан паспорт эзэмшигчид, төрийн/албан айлчлалын төлөөлөгчид болон хүмүүнлэгийн шалтгааны улмаас нэн яаралтай зорчих гэж буй виз мэдүүлэгчид урьдчилан ЭСЯ-ны Консулын хэлтэстэй утсаар холбогдсоноор хүндэтгэн үзэх шалтгааныг үндэслэн хүлээн авах боломжтой болно. Шенгений визийн асуудлаар бусад Европын холбооны улсыг төлөөлөн виз мэдүүлгийн өргөдлийг хүлээн авч ажиллахад БНЧУ болон Европын холбооны холбогдох улстай байгуулсан засгийн газар хоорондын хоёр талын хэлэлцээрийг мөрдөнө.
• Виз мэдүүлгийн шийдвэрийг 15 хоногийн хугацаанд олгох нь хэвээр үлдэж байгаа боловч шинэчилсэн найруулгаар шийдвэрлэх явцыг нэг удаа хамгийн дээд тал нь 45 хоног хүртэлх хугацаанд сунгах боломжтой болж байна.
• Олон удаагийн нэвтрэх эрхтэй/мулти виз олгох нөхцөл шинэчлэгдэн – 1 жилийн хугацаатай олон удаагийн нэвтрэх эрхтэй визийг 2 жилийн хугацаанд 1 удаагийн нэвтрэх эрхтэй визээр хууль дүрмийн дагуу 3 удаа зорчсон виз мэдүүлэгчид олгох боломжтой, 2 жилийн хугацаатай олон удаагийн нэвтрэх эрхтэй визийг 2 жилийн хугацаанд 1 жилийн олон удаагийн визийг хууль, дүрмийн дагуу ашигласан виз мэдүүлэгчид олгох боломжтой, 5 жилийн хугацаатай олон удаагийн нэвтрэх эрхтэй визийг сүүлийн 2 жилийн хугацаанд 2 жилийн олон удаагийн визийг хууль, дүрмийн дагуу ашигласан тохиолдолд олгох боломжтой болж байна.
• Европын холбооны иргэдийн гэр бүлийн гишүүдийн визийн үйл явцыг хөнгөвчлөх нөхцөл шинэчлэгдсэн болно.

Коронавирусын халдварын тархалтаас сэргийлэх тухай цаг үеийн асуудлаар Улсын Онцгой комисс өнөөдөр Төрийн ордонд хуралдаж дараах шийдвэрийг гаргав.

Тодруулбал, төрийн золголт, нутгийн золгуут, байгууллагын золголт, олныг хамарсан цагаан сар хийхийг хязгаарлах зөвлөмж гаргав.

Мөн “Хотол төгс” хэмээх төмөр хулгана жилийн сар шинийн баярт зориулах хүчит бөхийн барилдааныг цуцласан нь анхны тохиолдол боллоо.

Уг барилдааныг 1963 оны туулай жилээс зохион байгуулж эхэлсэн ба Монгол Улсын хөдөлмөрийн баатар, гавьяат тамирчин, дархан аварга Ж.Мөнхбат улсын заан цолтойдоо түрүүлж байсан билээ.

Өчигдөр буюу энэ сарын 29-ны өдөр 13:30 цагийн үед Баянгол дүүргийн 20 дугаар хорооны нутаг дэвсгэрт байрлах “Эрин” хорооллын 53/9-3 байранд их хэмжээний гал гарчээ.

Уг дуудлага мэдээллийн дагуу Баянгол дүүрэг дэх цагдаагийн газрын хоёрдугаар хэлтсийн эргүүлийн офицер, цагдаагийн дэслэгч Ж.Төгөлдөр, эргүүлийн цагдаа Б.Энх-Амгалан нар түргэн шуурхай ажиллаж галын голомтоос гарах боломжгүй байсан бага насны гурван хүүхэд болон 20 гаруй хүнийг галын аюулаас аварлаа.

Түүнчлэн сургууль, цэцэрлэгийн үйл ажиллагааг зогсоосон энэ цаг үед эцэг эхчүүд болон асран хамгаалагчид хүүхдээ болзошгүй эрсдэлээс урьдчилан сэргийлэхийг цагдаагийн байгууллагаас анхаарууллаа.

Засгийн газраас өнгөрсөн 12 дугаар сарын 02-ны өдөр өргөн мэдүүлсэн Орон сууцны тухай хуулийн шинэчилсэн найруулгын төслийг СӨХ-оос эсэргүүцэж байгаагаа илэрхийлж мэдээлэл хийлээ.

СӨХ-ны нэгдсэн зөвлөлийн дарга Н.Бямбадорж “Орон сууцны тухай шинэчлэгдсэн хууль батлагдвал орон сууц ашиглалтын зардал хоёроос гурав дахин нэмэгдэнэ. Орон сууцны контор СӨХ-ийн бүх үйл ажиллагааг хийж, орон сууцны СӨХ гадна талбайд мод тарих, орчноо цэвэрлэх юм. Энэ үйл ажиллагааны төсвийг шинээр өргөн барьсан орон сууцны хуулинд тусгаж өгөөгүй байна. Тиймээс энэ орон сууцны шинэчлэгдсэн хууль батлагдах аваас СӨХ буяны байгууллага болно. Мөн уг хуулийн төсөлд СӨХ-ийг байгуулж болно, байгуулахгүй ч байж болно гэж тусгажээ. Тэгэхээр СӨХ-дын зөвлөл болон оршин суугчидтай зөвлөлдөж, орон сууцны тухай шинэ хуулийг батлахыг шаардаж байна” гэж мэдэгдлээ.

Тус орон сууцны шинэ хуулийн төслийг санаачилсан Улсын их хурлын гишүүн, засгийн газрын сайд барилга, хот байгуулалтын сайд Х.Баделхан гишүүнд хандаж СӨХ-ны гишүүд болон оршин суугчдын төлөөллүүд “Орон сууцны тухай хуулиар хувийн орон сууцны компаниудыг цэгцлэх ёстой. 2003 оноос хойш хэрэгжиж ирсэн сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай хуулийг дангаар нь засч сайжруулаад бүлэг заалтаар нь нэмэлт өөрчлөлт оруулах ёстой. Гэтэл өнөөдөр орон сууцны тухай хуульд СӨХ-ны тухай хуулийг хүчингүй болгох гэж байна. Энэ хууль зүгээр нэг эрх мэдэлтэй хүний улс төрийн тоглоом боллоо. Хорин жилийн турш хэвийн үйл ажиллагааг доголдуулснаар оршин суугчдын эрх ашгийг зөрчиж байна” хэмээн байр сууриа илэрхийллээ.

Ч.ОЧИРРЭНЧИН

Цаг уурын байгууллагаас ирүүлсэн мэдээгээр маргааш буюу 31-нд төв болон зүүн аймгуудын нутгийн зарим газраар, 2 дугаар сарын 1-нд, Хангай, Хөвсгөлийн уулс болон говийн бүс нутгийн зүүн хэсгээр, 2-4-ний өдрүүдэд баруун аймгуудын нутгийн хойд хэсэг болон төв, зүүн аймгуудын нутгийн зарим газраар цас орж, цасан шуурга шуурч, салхи ихэнх хугацаанд түр зуур 13-15 м/с хүрч ширүүсэх төлөвтэй байна.

Иймд:

Малчин иргэд шуурганд төөрөх, малтайгаа уруудах, осгох, амь насаа алдах зэрэг эрсдэлээс урьдчилан сэргийлж, хүүхдийг хараа хяналтгүй орхихгүй байх, малын бэлчээрлэлтэд онцгойлон анхаарах,

Мөн хүчтэй цасан шуурганы үеэр үзэгдэх орчин хязгаарлагдаж, автозам, даваа цасанд хаагдан халтиргаа гулгаа үүссэний улмаас тээврийн хэрэгсэл саатах, бөөгнөрөл үүсэх зэрэг хүндрэл гардаг.

Тиймээс жолооч нар хүчтэй салхи шуурганы үед замд гарахгүй байх, зайлшгүй шаардлагатай тохиолдолд хол, ойрын замд гарахдаа тээврийн хэрэгслийн найдвартай байдлыг хангаж бензин, шатахууны нөөцтэй, дулаан хувцастай зорчих, цаг агаарын мэдээ, мэдээллийг цаг тухай бүр сонсон мэргэжлийн байгууллагаас өгч буй сэрэмжлүүлэг, анхааруулгыг дагахыг Онцгой байдлын ерөнхий газраас анхааруулж байна.

Нийслэлийн ИТХ-ын ээлжит XXXI хуралдаан өнөөдөр /2020.01.30/ болж байна. Тус хуралдаанаар “Энгийн хог хаягдлыг цэвэрлэх, ангилах, цуглуулах, тээвэрлэх, дахин боловсруулах, сэргээн ашиглах, устгах, булшлах журам”-ын төслийн тухай, Тогтоолд өөрчлөлт оруулах тухай, Монгол Улсын Засгийн газрын 62 дугаар тогтоолын хэрэгжилтийг хангах талаар авч хэрэгжүүлж буй ажлын тухай танилцуулга гэсэн гурван асуудлыг хэлэлцэх товтой.

Хуралдааны эхэнд Коронавирусийн талаарх цагийн үеийн байдал, болзошгүй эрсдэлээс урьдчилан сэргийлэх талаар авч хэрэгжүүлж буй арга хэмжээний талаар Нийслэлийн эрүүл мэндийн газрын дарга Л.Төмөрбаатар мэдээлэл хийв. Шинэ коронавирусийн тохиолдол 28 орчим улсад илэрсэн ч Монгол Улсад өнөөдрийн байдлаар бүртгэгдээгүй байгааг мэдээллийн эхэнд дурдсан. Монгол Улсын Онцгой комисс, Эрүүл мэндийн сайдын тушаал, нийслэлийн Засаг даргын захирамжийг мөрдлөг болгон тодорхой төлөвлөгөөний дагуу ажлууд хийгдэж байгаа гэнэ. Ингэхдээ ЭМЯ-ны болон Нийслэлийн эрүүл мэндийн газрын харьяа байгууллагууд өндөржүүлсэн бэлэн байдалд ажиллаж, тусгаарлах өрөө тасалгааны судалгаа гарган, нийт 995 орыг бэлдээд байгаа аж. Коронавирусийн болзошгүй эрсдэлээс урьдчилан сэргийлэх талаар зөвлөмжийг өдөр тутам нутгийн захиргааны байгууллагууд, иргэдэд тогтмол хүргэж байна. Мөн цахим хурлаар үүрэг чиглэл өгч, 360 эмч мэргэжилтнүүдийг сэргийлэх, халдвар авсан нөхцөлд ажиллахад бэлтгэсэн гэнэ. Эм ханган нийлүүлэх байгууллагуудын амны хаалт, халдваргүйжүүлэлтийн бодис зэргийн хангалтыг нэмэгдүүлэх тал дээр анхаарч ажиллаж байна. Авто замын шалган нэвтрүүлэх есөн цэгүүдэд эрүүл мэндийн хяналт явуулах боломжийг бүрдүүлж байгаа гэлээ.