Month: January 2020

Хуульзүйн байнгын хороо хуралдлаа. Хуралдаанаар Аймаг, нийслэлийн сонгуулийн хуулийн төслийн эцсийн хэлэлцүүлгийг хийлээ. Хэлэлцэж байгаа асуудалтай холбогдуулан гишүүд асуулт тавьж, хариулт авсан юм.

Хуульзүйн байнгын хорооны дарга Х.Нямбаатар:

-Сонгуулийн автоматжуулсан системийн тухай хуульд нэмэлт өөрчлөлт оруулах асуудал байна уу. Үүнд хариуцлагатай холбоотой асуудал үүссэн.

УИХ-ын гишүүн С.Бямбацогт:

-Хууль хоорондын зөрчлийг арилгах зорилгоор санал оруулж байна. Сонгуулийн хуультай холбоотой 36 зөрчлийг арилгах шаардлагатай. Засаг захиргаа, нутаг дэвсгэрийн нэгжтэй холбоотой асуудал байгаа.

УИХ-ын гишүүн Ц.Мөнх-Оргил:

-Нэр дэвшигчээр бүртгэгдсэн этгээд нэр дэвшихээс татгалзсан бол 10 мянган хүртэл нэгжээр торгоно гэж байна. Ер нь урьдчилсан мэдээлэл өгдөг, сонгуулийн дүнгийн талаар. Энэ бүхэнд торгоод байх уу?

Хуульзүйн байнгын хорооны дарга Х.Нямбаатар:

-Өмнө нь байсан заалт. Дүнгийн талаар мэдэгдэл хийсэн бол торгоно гэсэн заалт байгаа. Зөвхөн сонгуулийн байгууллага эхэлж мэдээлэх ёстой.

ХЗДХ-ийн сайд Ц.Нямдорж:

-Манай гишүүд болохгүй зүйл яриад байна. Хар машины дүн гарч ирээд, нам тэдэн санал авлаа гээд зарлаж л байсан. Одоо оруулж байгаа зүйлээр бүгдийг нь торгох нь ээ. Ялагдсан нь хөнжилдөө ороод, ялсан нь баяраа тэмдэглээд явдаг. Албан ёсоор СЕХ 2-3 өдрийн дараа гаргадаг. Дараагаар нь СЕХ Ерөнхийлөгчид өргөн мэдүүлдэг. Гэтэл урьдчилсан мэдээлэл чинь шийтгэлтэй болох нь. Маргаагүй сонгууль гэж байдаггүй. Тухайлбал, 2008 оны сонгуулиар Ц.Элбэгдорж мэдэгдэл хийж, “7 сарын 01”-нийг бий болгосон. Энэ томъёоллоор ялсан нь ч, ялагдсан ч шийтгэгдэх юм байна. Сонгуулийн дараах үеийн нөхцөл байдлыг эвийн журмаар л шийддэг. 2016 оны сонгуулиар би зуслан дээрээ байж байхад сонгуулийн дүн гарсан. 25 минутын дотор миний дүн гараад дуусчихсан байсан.

Ерөнхий прокуророос УИХ-ын гишүүн Н.Номтойбаярын бүрэн эрхийг түдгэлзүүлэх саналыг УИХ-ын Хууль зүйн байнгын хорооны хуралдаанаар хаалттай хэлэлцэж байна. Хуралдаанд Улсын Ерөнхий Прокурор Б.Жаргалсайхан болон УИХ-ын гишүүн Н.Номтойбаяр нар оролцож байгаа аж. Хууль зүйн байнгын хорооны хуралдааны дараа Төрийн байгуулалтын байнгын хороо уг асуудлыг хэлэлцэнэ. УИХ-ын гишүүний Халдашгүй байдлын дэд хороогоор тус асуудлыг хэлэлцээд Н.Номтойбаяр гишүүнийг түдгэлзүүлэх нь зөв гэж үзсэн.

Норвегийн Хаант Улсад ажлын айлчлал хийж байгаа Монгол Улсын Ерөнхийлөгч Х.Баттулга Норвегийн Угсаа залгамжлах Хунтайж Хааконтой уулзлаа.

Угсаа залгамжлагч Хунтайж Хаакон Монгол Улсын Ерөнхийлөгч Х.Баттулгыг Норвегийн Хаант Улсад тавтай морилохыг хүсээд, энэ удаагийн айлчлал хоёр улсын харилцааг өргөжүүлэхэд чухал алхам болно гэдэгт итгэлтэй буйгаа илэрхийлэв.

Монгол Улсын Ерөнхийлөгч Х.Баттулга Норвег Улсын Баялгийн сан, Хөдөө аж ахуйн салбарын хамтын ажиллагааг өргөжүүлэх асуудлыг энэ удаагийн айлчлалаар өргөн хүрээнд ярилцахаар төлөвлөсөн бөгөөд Хунтайж Хааконыг айлчлалаар ярьсан асуудалд анхаарал хандуулж өгөхийг хүссэн юм.

Мөн НҮБ-ын “Тогтвортой хөгжлийн зорилтууд”-ыг дэмжих хүрээнд энэ оны есдүгээр сард Монгол Улсад НҮБ-ын гишүүн 195 орны 18 хүртэлх насны залуучуудын дунд спортын 19 төрлөөр “Ногоон наадам” зохион байгуулахаар төлөвлөсөн тул Хунтайж Хааконыг Монгол Улсад морилон саатахыг хүслээ.

Хуульзүйн байнгын хороо хуралдлаа. Хуралдаанаар Олон Улсын эрүүгийн шүүхийн Ромын дүрмийн “Түрэмгийллийн гэмт хэргийн тухай болон дайны гэмт хэргийн тухай 8 дугаар зүйлийн нэмэлт, өөрчлөлт”-ийг соёрхон батлах тухай хуулийн төслийг хэлэлцлээ. Төслийн танилцуулгийг БХ-ын сайд Н.Энхболд хийв. Хэлэлцэж байгаа асуудалтай холбогдуулан гишүүд асуулт тавьж, хариулт авав.

Хуульзүйн байнгын хорооны дарга Х.Нямбаатар:

-Өнөөдөр бид химийн зэвсэг болон бүлэгт сум хэрэглэсэн тохиолдолд дайны гэмт хэрэг гэж тооцохоор байна гэж ойлголоо. Энэ талаарх ойлголтыг ГХЯ-наас өгч, мэдээллээр хангах шаардлагатай гэлээ.

БХ-ын сайд Н.Энхболд:

-Энэ талаарх НҮБ-ын зөвлөмжийг үндэсний хууль тогтоомжид тусгах шаардлагатай байгаа. Энэ хүрээнд Эрүүгийн хуульд өөрчлөлт оруулна. ГХЯ-наас ирүүлсэн ёстой шинэ мэдээ мэдээлэл, олон улсын хэмжээнд болж байгаа үйл явдлыг тухай тухайд нь хууль тогтоогч, бодлого боловсруулагч нарт өгч байх ёстой хэмээн хариулав.

УИХ-ын гишүүн Ц.Мөнх-Оргил:

-НҮБ дээр хэлэлцсэн асуудлаас гадна Монгол Улсын нэгдсэн орсон конвенциудын хэрэгжилтийг бид олон улсын экспертүүд дээр тайлагнаад, нөгөө экспертүүд нь заалт бүрээр зөвлөмж гаргадаг. Гэтэл тэр зөвлөмж ХНХЯ дээр очоод дуусдаг. Гэтэл бодлого гаргах ёстой хүмүүс нь авч чаддаггүй. Тухайлбал, Албадан хөдөлмөр эрхлэхийг хориглох суурь конвенцийн талаар зөвлөмж өгсөн байдаг. Засгийн газарт өгч байгаа зөвлөмжүүдийг орчуулж амжихгүй бол УИХ-ын Тамгын газарт өгчихмөөр байна. Гол голыг нь УИХ-ын Тамгын орчуулаад гишүүдэд өгөх юм.

Ийнхүү гишүүд уг төслийг хэлэлцэн дэмжив.

Норвегийн Хаант Улсад айлчилж буй Монгол Улсын Ерөнхийлөгч Х.Баттулга тус улсын Гадаад хэргийн яам, Сангийн яам, Төв банк, Төрийн тэтгэврийн сан буюу Баялгийн сангийн удирдлагуудтай уулзаж, чөлөөт ярилцлага өрнүүллээ.

Уулзалтын эхэнд, Монгол Улсын Ерөнхийлөгч Х.Баттулга “Монгол Улс 2012 оноос хойш энэ сангийн үйл ажиллагаа, менежментийг төрийн дээд түвшинд сонирхож, хамтран ажиллах сонирхолтой байгаа. Өнгөрсөн хугацаанд бид үргэлж баялгийн сангийн сайн талыг нь сонирхож байсан бол энэ удаад сөрөг болон учирч болох эрсдэлд бэлэн байхад түлхүү анхаарч баялгийн сантай болохоор эрмэлзэж байгаа” гэдгээ илэрхийлсэн юм.

Уулзалтаар, Баялгийн санг үүсгэн байгуулсан түүх, сангийн хөрөнгө оруулалтын стратеги ба менежмент, Ёс зүйн зөвлөлийн үйл ажиллагаа, Норвегийн эдийн засагт нефть, байгалийн хийн салбарын орлогын оруулж буй хувь нэмэр зэрэг асуудлаар голчлон ярилцлаа. Түүнчлэн Норвегийн Сангийн яам нь Баялгийн сангийн менежмэнтийг хариуцан ажилладаг бөгөөд тус яамны албан тушаалтнууд Монгол Улсын Ерөнхийлөгчийн болон түүнийг дагалдан яваа төлөөлөгдчийн сонирхсон асуултуудад хариулж, санал солилцлоо.

Норвег Улс нь 1969 онд Монгол Улсын адил өөрсдөө хайгуул хийж томоохон орд газруудыг /газрын тосны/ илрүүлсэн бөгөөд 1983 онд баялгийн сан байгуулах санаа гаргаж, 1990 онд хэрэгжүүлж эхэлсэн байна. Улмаар 2007 онд Европын хамгийн өндөр үнэлгээтэй үндэсний баялгийн сан болж, 2019 онд сангийн орлого анх удаагаа их наяд ам.доллар давсан амжилт тогтоосон юм.