Month: December 2019

Монгол Улс 2020 онд АМНАТ-өөс 1.3 их наяд төгрөгийн орлого олохоор төсөвтөө тусгасан. Ашигт малтмалын нөөц ашигласны төлбөрийн орлогын 38.1 хувь буюу 493.4 тэрбум төгрөгийг зэсийн баяжмалаас, 45.9 хувь буюу 593.6 тэрбум төгрөгийг нүүрснээс, 9.8 хувь буюу 126.2 тэрбум төгрөгийг алтнаас төвлөрүүлэхээр тооцсон байна.

Сангийн яамнаас өгсөн мэдээллээр олон улсын нэр хүнд бүхий банк, санхүүгийн байгууллагаас гаргасан эрдэс бүтээгдэхүүний үнийн таамаглал, уул уурхайн салбарт үйл ажиллагаа явуулж байгаа томоохон аж ахуйн нэгжүүдийн 2020 оны олборлолтын төлөвлөгөө, өмнөх онуудын гүйцэтгэл зэрэгт үндэслэн ирэх онд ашигт малтмалын нөөц ашигласны төлбөрийн орлогыг тооцоолсон юм байна.

Монгол Улс 2019 онд АМНАТ-өөс 1.2 их наяд төгрөг олохоор төлөвлөсөн юм. Одоогоор үүний 1.1 их наяд төгрөг нь төсөвт төвлөрчээ.

Боловсрол, соёл, шинжлэх ухаан, спортын яамны Биеийн тамир, спортын бодлогын газар, Засгийн газрын хэрэгжүүлэгч агентлаг Биеийн тамир, спортын газар хамтран зохион байгуулж буй Биеийн тамирын арга зүйчдийн нэгдсэн сургалт өнөөдөр эхэллээ.

Энэхүү сургалт нь биеийн тамирын үйл ажиллагааг жигд, хэвийн үр дүнтэйгээр зохион явуулах, хэрэгжүүлэн ажиллах арга зүйчдэд мэдлэг олгох, эрх зүйн чадамжийг дээшлүүлэх, зорилготой юм.

Сургалтад аймаг, нийслэл, дүүрэг, тусгай газрууд дахь Биеийн тамир, спортын төрийн байгууллагууд, мөн Аймаг, нийслэл, дүүргийн Эрүүл мэндийн байгууллагууд, Аж ахуйн нэгж байгууллага дахь биеийн тамир, спортын хамтлаг, спорт клуб зэрэг байгууллагуудын биеийн тамирын арга зүйч нарын төлөөлөл хамрагдаж байна.

Биеийн тамирын чиглэлээр баримталж буй бодлого, биеийн тамирын арга зүйчдэд мэргэжлийн зэрэг олгох ажлын явц, магадлан итгэмжлэлийн журмын хэрэгжилт, биеийн тамирын чиглэлээр зохиогдох үйл ажиллагаанд баримталж буй бодлого зэрэг сэдвээр холбогдох албаныхан мэдээлэл хийхээс гадна Бээжин дэх спортын их сургуулийн тэмцээн, уралдааны хэлтсийн дарга Мао Вэнжун сургуулийнхаа спортын тэмцээн зохион байгуулах менежментийн туршлагаасаа хуваалцах юм.

Гэрийнхээ ойролцоо явсан хоёр охиныг үл таних залуус хүчээр автомашинд чихэн суулгаад хээр аваачиж хүчирхийлсэн хэрэг гарчээ.

Хэргийг тодруулбал, Арванхоёрдугаар сарын 03-04-нд шилжих шөнө Өвөрхангай аймагт бага насны буюу 12 болон 15 настай хоёр охиныг гэрийнхээ ойролцоо явж байхад нь үл таних залуус аймгийн төвийн хүнгүй газар аваачин хүчирхийлээд хэргийн газарт нь орхиод зугтжээ.

Одоогоор уг хэргийг Өвөрхангай аймгийн сум дундын цагдаагийн хэлтэст Эрүүгийн хэрэг үүсгэн шалгаж байна.

Сүхбаатар дүүргийн эрүүгийн хэргийн анхан шатны шүүхэд Б.Махбалд холбогдох эрүүгийн хэргийн урьдчилсан хэлэлцүүлгийн шүүх хуралдаан 2019.12.06-ны өдрийн 11 цагт эхэлсэн.

Хуралд хохирогч Д.Доржпүрэвийн өмгөөлөгч Н.Баатардорж шүүх хурал давхцсан тул ирэх боломжгүй, мөн уг шүүх хуралд өөрийн биеэр оролцох хүсэлттэй тул шүүх хуралдааныг хойшлуулж өгнө үү гэсэн хүсэлт ирүүлсэн юм.

Иймд шүүх хохирогчийн өмгөөлөгч Н.Баатардоржийн хүсэлтийг хүлээн авч шүүх хуралдааныг 2019.12.13-ны өдрийн 14 цаг хүртэл хойшлууллаа.

Амьжиргааг дэмжих зөвлөл нь иргэнийг нийгмийн халамжийн үйл ажиллагаанд хамруулах эсэх талаар шийдвэр гаргах, нийгмийн халамжийн үйл ажиллагаатай холбогдсон гомдлыг хүлээн авч шийдвэрлэх чиг үүрийг хэрэгжүүлэн ажилладаг орон тооны бус зөвлөл юм.

Хөдөлмөр халамжийн үйлчилгээний ерөнхий газраас Амьжиргааг дэмжих зөвлөлийн гишүүдийг мэргэжил арга зүйгээр хангах, нийгмийн халамжийн үйлчилгээтэй холбогдон шинээр гарсан хууль тогтоомж, шийдвэрүүд, түүнийг хэрхэн хэрэгжүүлэх талаар ойлголт мэдээлэл өгч, мэдлэг олгох, чадавхижуулах сургалтыг 2019 оны арваннэгдүгээр сарын 18-ны өдөр ХХҮХ-ийн сургалтын танхимд зохион байгууллаа. Сургалтад 1,3,4,5,6,7,11,12,15,16 -р хороодын Амьжиргааг дэмжих зөвлөлийн шинэ гишүүд хамрагдлаа.

Сургалтад хамрагдсанаар Амьжиргааг дэмжих зөвлөлийн ажлыг зохион байгуулах арга зүйд суралцах, нийгмийн халамжийн үйлчилгээнд хамрагдах хүсэлт гаргасан өрх, иргэний баримт бичгийг шаардлагын дагуу бүрдүүлэх, нөхцөл байдлыг газар дээр нь судлан үзэж, үнэлгээ дүгнэлтийг зөв хийх, халамжийн үйл ажиллагаатай холбоотой гомдол саналыг хууль журмын шуурхай, бодитой шийдвэрлэх зэрэг мэдлэг, чадвар эзэмшсэн үр дүнтэй сургалт боллоо.

Авлигатай тэмцэх газар (АТГ)-аас хошууч генерал Т.Бадрал, ОБЕГ-ын дэд дарга, бригадын генерал Г.Арвинбуян, Санхүү, хангалт үйлчилгээний газрын даргаар ажиллаж байсан, хурандаа Р.Дадам агсан болон Хангалтын хэлтсийн дарга асан Л.Билэгдэмбэрэл, “Орем трейд” ХХК-ийн захирал Д.Лхагвасүрэн нарыг хууль бусаар 17 тендер явуулахдаа өөрсдийн эрх мэдэл, албан тушаалаа урвуулан ашигласан гэж үзсэн. Ингэхдээ бусдад давуу байдал олгож, төсвийн хөрөнгө завшсан байж болзошгүй гэж буруутган гурван жил гаруйн хугацаанд шалгаж, яллагдагчаар тооцжээ. Яллагдагч, хошууч генерал Т.Бадралын албан тушаалыг түдгэлзүүлж шалгаагүй учир ажлаар хөдөө орон нутаг, гадаадад томилолттой гэсэн шалтгаанаар хэргийг шүүхэд шилжүүлэх боломжгүй байсаар өдийг хүрчээ.

Мөн нэг холбогдогч нь нас барсны улмаас хэрэг шийдвэрлэгдэх боломжгүйд хүрсэн гэсэн мэдээлэл байсан ч прокурорын байгууллагын эх сурвалж “Талийгаачийн бүх мэдүүлэг хавтаст хэрэгт бий. Тиймээс хэргийг шүүхээр шийдвэрлэх боломжтой” хэмээсэн.

АТГ-ын Мөрдөн шалгах хэлтсээс ОБЕГ-ын дарга, хошууч генерал Т.Бадрал нарт холбогдох хэрэгт яллах дүгнэлт үйлдэж, өчигдөр Сүхбаатар дүүргийн Эрүүгийн хэргийн анхан шатны шүүхэд шилжүүлсэн байна.

Онцгой байдлын ерөнхий газрын даргын тушаалаар “Цэргийн хэргийн мэдлэг, бэлтгэл, бэлэн байдал” сэдвийн хүрээнд хээрийн дадлага сургуулийг зохион байгуулж байна.

Офицер, ахлагч бүрэлдэхүүний бэлтгэл, бэлэн байдал, бие бялдар, сэтгэлзүйн тэсвэр хатуужил, цэргийн албыг хэвшүүлэх зорилготой тус сургуульд ОБЕГ, Гамшиг судлалын хүрээлэнгийн нийт алба хаагчид өглөөний 04:00 цагт зарлан мэдээллийн дуут дохиогоор цугларч, бэлтгэл, бэлэн байдлаа шалгууллаа.

Сургуулийн хүрээнд “Цэргийн алба хаагчийн ёсзүй”, “Цэргийн нийтлэг дүрэм”, “Цэргийн дүрэмт хувцас өмсөх хэрэглэх”, “Цэргийн биеийн тамирын заавар” сэдэвт онолын болон дадлага сургуулиуд зохион байгуулагдах юм. Хээрийн дадлага сургууль энэ сарын 08-ныг хүртэл үргэлжилнэ.