Month: October 2019

Монгол, Индонезийн Гадаад харилцааны яамд хоорондын зөвлөлдөх уулзалт Ази, Номхон далайн орнуудын газрын захирал нарын түвшинд болов. Жакарта хотноо 2015 онд онд болсон Монгол, Индонезийн хамтын ажиллагааны Засгийн газар хоорондын комиссын анхдугаар хуралдааны мөрөөр хийгдсэн ажлуудыг дүгнэж, цаашид хүлээгдэж буй ажлыг эрчимжүүлэх чиглэлээр талууд ярилцав.

Ази, Номхон далайн бүс нутгийн орнуудтай харилцаа, хамтын ажиллагааг өргөжүүлэх бодлогын хүрээнд Зүүн өмнөд Ази, АСЕАН-ы хамгийн том зах зээл бүхий Индонез Улстай улс төрийн харилцааг бэхжүүлж, худалдаа, эдийн засаг, соёл хүмүүнлэгийн чиглэлээр хамтын ажиллагааг өргөжүүлэх эрмэлзэлтэйг илэрхийлж, бүс нутгийн интеграцид нэгдэх манай улсын зорилтыг хэрэгжүүлэхэд тус улсын улсын дэмжлэг бидэнд тун чухал болохыг манай тал онцлон тэмдэглэв.

Өдгөө хоёр улсын хооронд улс төр, батлан хамгаалах, иргэд хоорондын харилцаа харьцангуй идэвхтэй өрнөж байгааг талууд сайшааж, улмаар худалдаа, эдийн засгийн хамтын ажиллагааг өргөжүүлэх, бизнесийн түншлэлийг дэмжих чиглэлээр тодорхой санал солилцлоо.

Өнөөдрийн байдлаар 43.3 мянган га-г ангилан хадаж нийтдээ 87.7 мянган га-гаас 113.0 мянган тонн үр тариа, үүнээс 105.7 мянган тонн улаанбуудай, 11.2 мянган га-гаас 131.1 мянган тонн төмс, 4.6 мянган га-гаас 51.1 мянган тонн хүнсний ногоо тус тус хураан авснаар үр тарианы хураалт 25.1 хувь, хүнсний ногооны хураалт 58.1 хувь, төмсний хураалт 75.1 хувийн явцтай байна.

2019 онд улсын хэмжээнд 364.8 мянган га-д үр тариа, үүнээс 340.0 мянган га-д улаанбуудай, 14.8 мянган га-д төмс, 8.0 мянган га-д хүнсний ногоо, 82.4 мянган га-д тосны, 42.0 мянган га-д тэжээлийн ургамал, нийтдээ 512.0 мянган га-д тариалалт хийсэн.

Урьдчилсан балансаар 441.9 мянган тонн үр тариа, үүнээс 420.0 мянган тонн буудай, 176.8 мянган тонн төмс, 91.2 мянган тонн хүнсний ногоо, 38.0 мянган тонн тосны ургамал, 80.4 мянган тонн малын тэжээлийн ургамал тус тус хураан авах урьдчилсан баланс гарчээ.

Иргэн, хуулийн этгээдийн эзэмшилд байгаа галт зэвсгийг бүртгэж тоолох, гэрчилгээжүүлэх зорилго бүхий “Зэвсэг-2019” нэгдсэн арга хэмжээ улсын хэмжээнд явагдаж байна. Энэ хүрээнд Увс аймагт оршин суугаа галт зэвсэг эзэмшигч иргэн, аж ахуйн нэгжүүдийг харъяа сум орон нутгийнхаа хэсгийн төлөөлөгч, хэсгийн байцаагч нар дээр очиж бүртгэл тооллогод яаралтай хамрагдахыг аймгийн Цагдаагийн газраас анхааруулж байна.

Хэрвээ галт зэвсгээ тооллогод хамруулахгүй бол Зөрчлийн тухай хуулиар иргэнийг 40, аж ахуйн нэгж байгууллагыг 400 нэгжтэй тэнцэх хэмжээний мөнгөн дүнгээр торгох юм байна. Галт зэвсгийн улсын тооллого 9-р сарын 20-ноос ирэх 11-р сарын 20 хүртэл үргэлжлэх аж.

“Зэвсэг-2019” нэгдсэн арга хэмжээ нь галт зэвсгээр үйлдэгдсэн гэмт хэргийг олж илрүүлэх, алдагдсан галт зэвсгийг олох, хууль бусаар галт зэвсэг, сум худалдаалах гэмт хэргийг таслан зогсоох гэх мэт олон талын ач холбогдолтой ажил юм.

Өнөө шөнө Төв аймгийн хойд хэсэг, Булган, Сэлэнгэ аймгийн нутгаар хөрсөн дээр цочир хүйтрэх тул, ил задгай төмс, хүнсний ногоо хайрагдаж болзошгүйг Цаг уур, орчны шинжилгээний газар малчид, иргэд, тээвэрчид, тариаланчдад сэрэмжлүүлж байна. Өнөө, маргаашдаа зарим газраар цас орж, цаашдаа ихэнх нутгаар сэрүүн байхыг анхаарууллаа.

2019 оны 10 дугаар сарын 3-7-ныг хүртэлх цаг агаарын урьдчилсан төлөв танилцуулж байна.

Энэ сарын 3-нд төв, говь болон зүүн аймгуудын нутгийн зарим газраар, 4-нд зүүн аймгуудын нутгийн зүүн хэсгээр, 5-нд Алтай, Хангайн уулархаг нутгаар, 6-нд төвийн аймгуудын нутгийн зүүн хойд хэсэг, зүүн аймгуудын нутгийн хойд хэсгээр хур тунадас, уулархаг нутгаар цас орж, зөөлөн цасан шуурга шуурна. Салхи 3-нд нутгийн өмнөд хэсгээр секундэд 14-16 метр хүртэл ширүүсч шороон шуурга шуурна. Алтай, Хангай, Хөвсгөл, Хэнтэйн уулархаг нутаг, Завхан голын эх, Хүрэн бэлчир орчим, Идэр, Тэс, Туул, Тэрэлж голын хөндийгөөр шөнөдөө 8-13 градус хүйтэн, өдөртөө 0-5 градус дулаан, говийн бүс нутгийн өмнөд хэсгээр шөнөдөө 2 градус дулаанаас 3 градус хүйтэн, өдөртөө 9-14 градус дулаан, бусад нутгаар шөнөдөө 3-8 градус хүйтэн, өдөртөө 4-9 градус дулаан байна. 6-нд нутгийн баруун хэсгээр өдөртөө бага зэрэг дулаарна.

Монгол Улс, БНХАУ-ын хооронд дипломат харилцаа тогтоосны 70 жилийн түүхт ойг хамтран тэмдэглэх төлөвлөгөөнд улс төр, эдийн засаг, хүмүүнлэг болон орон нутгийн харилцааны чиглэлээр олон ажил, арга хэмжээг тусгасны дагуу амжилттай хэрэгжүүлж байна. Энэхүү төлөвлөгөөний хүрээнд “Монгол, Хятадын харилцааны шинэ эрин: боломж ба сорилт” сэдэвт Монгол, Хятадын эрдэмтдийн хамтарсан эрдэм шинжилгээний хурал өчигдөр Улаанбаатар хотноо ГХЯ-ны “Зөвшилцөл” танхимд болов.

Гадаад харилцааны сайд Д.Цогтбаатарын санаачилгаар зохион байгуулагдсан энэхүү хамтарсан эрдэм шинжилгээний хурлын зорилго нь Монгол Улс, БНХАУ-ын хооронд дипломат харилцаа тогтоосны 70 жилийн ойн босгон дээр хоёр орны эрдэмтэд хуран цуглаж, Монгол-Хятадын орчин үеийн харилцааны хөгжлийн боломжийг нэмэгдүүлэх, харилцан ойлголцлыг бэхжүүлэх, цаашдын харилцааны чиг хандлагаа зөвөөр тодорхойлох, тулгарч буй сорилтоо хамтдаа даван туулж, хамтдаа хөгжих шинжлэх ухаанч гаргалгааг ажил хэрэгчээр эрэлхийлэхэд чиглэгдсэн юм.

Хоёр улсын эрдэмтэд энэхүү эрдэм шинжилгээний хурлаар Монгол Улс, БНХАУ-ын харилцааны 70 жилийн түүхэн хөгжил, туулсан замналыг эргэн харж, цаашдын хамтын ажиллагааны ирээдүйн боломжийг эрэлхийлэхийн зэрэгцээгээр Зүүн хойд Азийн бүс нутгийн хөгжлийн үйл явцын талаар ч хөндөн хэлэлцлээ.

Хуралд ГХЯ-ны Төрийн нарийн бичгийн дарга болон ахмад дипломатууд, БНХАУ-аас Монгол Улсад суугаа ЭСЯ-ны Элчин зөвлөх Ян Чиндун тэргүүтэй диплома ажилтнууд, хоёр улсын монгол, хятад судлалын эрдэмтэн судлаачид, тухайлбал, Монгол Улсын ШУА-ийн Олон улс судлалын хүрээлэн, Стратеги судлалын хүрээлэн, МУИС, ШУТИС-ийн болон Хятадын Нийгмийн Шинжлэх ухааны академи, Орчин үеийн олон улсын харилцааны судлалын хүрээлэн, Бээжингийн Их Сургууль, Өвөр Монголын Их Сургуулийн төлөөлөгчид оролцов.

Төлөвлөгөөт бус шалгалтаар Сүхбаатар дүүргийн 3 дугаар хороонд байрлах дутуу баригдсан барилга буюу зориулалтын бус байранд БНХАУ-д үйлдвэрлэсэн хаяг шошгын зөрчилтэй, гарал үүсэл нь тодорхойгүй, ургамал, амьтны гаралтай түүхий эд, савласан хүнсний бүтээгдэхүүн их хэмжээгээр хадгалж худалдаалж байсан зөрчлийг илрүүллээ.

Иймд тус үйл ажиллагааг эрхэлж байсан Зун Шун Фа ХХК-д зөрчлийн хэрэг нээж, зөрчил хянан шийдвэрлэх үйл ажиллагаа явуулж байна.

Нийслэлийн авто замын хөгжлийн газраас мэдээлснээр Хан-Уул дүүргийн 15 дугаар хороо Гандийн гудамжнаас Хурд хороолол орох 0.5 км авто замыг 2019 оны аравдугаар сарын 2-ны өдрөөс 23-ны хооронд хааж, авто замын засвар шинэчлэлтийн ажил хийж гүйцэтгэх аж.

Иймд тус замаар зорчих иргэд Нийслэл хүрээ өргөн чөлөөний авто замыг сонгон хөдөлгөөнд оролцохыг зөвлөж байна. Мөн тус ажлын хүрээнд борооны ус зайлуулах шугам сүлжээ, авто зам, явган замын шинэчлэлт, гэрэлтүүлгийн ажлууд хийгдэх юм. Авто замын шинэчлэлтийг “Эко тогтол“ ХХК гүйцэтгэж байна.

Монгол Улсын Их Хурлын дарга Г.Занданшатарын урилгаар энэ өдрүүдэд Монгол Улсад албан ёсны айлчлал хийж буй Бүгд Найрамдах Чех Улсын Сенатын танхимын дарга Ярослав Кубератай өнөөдөр /2019.10.01/ Монгол Улсын Гадаад харилцааны дэд сайд Б.Батцэцэг уулзлаа.

Уулзалтын эхэнд Гадаад харилцааны дэд сайд Б.Батцэцэг Сенатын дарга Я.Кубераг Монгол Улсад тавтай зочлохыг хүсч,энэхүү айлчлал нь хоёр улсын улс төрийн харилцааг өргөжүүлэхийн сацуу худалдаа, эдийн засгийн хамтын ажиллагааг хөгжүүлэхэд өндөр ач холбогдолтой болж байгааг цохон тэмдэглэв.

Монгол Улс нь Чех Улсыг Азийн орнуудтай, Чех Улс нь Монгол Улсыг Европын орнуудтай холбосон чухал гүүр болох боломжтой гэдэгт талууд санал нэгдэж, Монгол, Чехийн уламжлалт найрсаг харилцаа, хамтын ажиллагааг эдийн засгийн агуулгаар баяжуулах боломжийг эрэлхийлж, хоёр улсын хувийн хэвшил хоорондын хамтын ажиллагааг дэмжиж ажиллахаар тохиров.

Европын орнуудын дотор Чех Улсад хамгийн их буюу 9000 гаруй монгол иргэн оршин сууж байна. Эдгээр иргэдийн нийгмийн асуудлыг шийдвэрлэхээр өнгөрсөн 5 дугаар сард байгуулсан баримт бичгийн мөрөөр гүйцэтгэх ажлыг эрчимжүүлэхээр ярилцав.Айчлалын хүрээнд Монголын Үндэсний худалдаа, аж үйлдвэрийн танхим, Улаанбаатар дахь Чехийн Элчин сайд яамны хамтран өнөөдөр зохион байгуулах Монгол, Чехийн бизнес форум нь 2012 оноос эхлэн жил бүр болж байгаа бөгөөд Чехийн 20 орчим, Монголын 50 гаруй бизнес эрхлэгчид оролцохоор бүртгүүлээд байна.