Month: September 2019

Халхын голын байлдааны ялалтын 80 жилийн ойг тэмдэглэн өнгөрүүлэх тухай Засгийн газрын 2018 оны 195 дугаар тогтоолыг хэрэгжүүлэх ажлын хүрээнд Засгийн газрын хэрэгжүүлэгч агентлаг Соёл, урлагийн газраас Дорнод аймгийн Чойбалсан хотноо байрлах Монгол дайчдын хөшөөний өмнөх 60м2 талбайд “Халхын гол” сэдэвт монументаль ханын чимэглэл, шигтгэмэл цуврал зургийн цогцолборыг бүтээх ажлыг санаачлан хэрэгжүүллээ.

Нээлтийн үйл ажиллагааг Засгийн газрын хэрэгжүүлэгч агентлаг Соёл, урлагийн газрын дарга Г.Эрдэнэбат, Дорнод аймгийн Засаг даргын орлогч, Халх гол Дорнод аймаг дахь ойг зохион байгуулах комиссын дарга Ш.Ёл нар нээв. Нээлтэнд хүрэлцэн ирсэн албаны хүмүүс, ойг зохион байгуулах комиссын гишүүд болон Дорнод аймгийн ард иргэд энэхүү бүтээн байгуулалтыг орон нутагт нь бүтээсэн явдалд сайшаан талархал илэрхийллээ.

Улаанбаатар-Дархан чиглэлийн авто замыг засварлахаар өнгөрсөн зургадугаар сард хааж, түр зам гаргасан байгаа билээ. Энэ жилийн хувьд бороо хур ихтэй байсан учир гаргасан түр зам эвдрэл ихтэй, автомашин зорчиход хүндрэлтэй, машин эвдэрч байгаа талаар иргэд шүүмжлэлтэй хандсаар байгаа юм. Тэгвэл өнөөдрөөс эхлэн Дархан чиглэлийн хуучин болон түр замыг бүр хаажээ. Эрдэнэт, Булган, Хөвсгөл чиглэлийн хот хоорондын нийтийн тээврийн хэрэгслүүд Төв аймгийн Дашинчилэн сумаар явуулахаар болжээ. Хэдий хэр хугацаанд хаах нь одоогоор тодорхойгүй байна.

Нийслэлийн Засаг дарга бөгөөд Улаанбаатар хотын Захирагч С.Амарсайхан Чингэлтэй дүүргийн 15 дугаар хорооны нутаг дэвсгэрт гэр хорооллын дахин төлөвлөлтийн хүрээнд баригдаж байгаа орон сууцны барилгын ажилтай Дүүргийн Засаг дарга Ж.Эрдэнэбатын хамт газар дээр нь очиж ажиллалаа. Гүйцэтгэгч компанийн төлөөллөөс тулгамдсан асуудлыг нь сонсож, удаашралтай байгаа барилгын ажлыг шуурхайлах үүрэг чиглэл өглөө.

Барилгын ажлыг гүйцэтгэж буй “Буурал сутай” компанийн захирал Д.Одбаяр “Гэр хорооллын дахин төлөвлөлтийн хүрээнд 48 айлын орон сууц баригдаж байна. Үүнээс газраа чөлөөлж өгсөн иргэдэд 18 айлын орон сууцыг өгнө. Барилгын ажил дуусах шатандаа орсон. Есдүгээр сард комисс хүлээж авснаар ашиглалтад орно. Дэд бүтцийн асуудал шийдэгдсэн” хэмээв.

Хотын Захирагч С.Амарсайхан “Дахин төлөвлөлтөд орсон аж ахуйн нэгжүүд төлөвлөлтийн дагуу ажлуудаа хийх хэрэгтэй. Тохижилт, ногоон байгууламжийн ажлууд хаягдаад орчны бохирдол, хаягдал үүссэн нөхцөл байдалтай байж таарахгүй. Хичнээн сайхан орон сууц барьсан ч орчны тохижилт, зам талбайн цэвэрлэгээ, гэрэлтүүлгийн ажлыг орхигдуулж, иргэд, оршин суугчдын ая тухыг алдуулж болохгүй. Газрын чөлөөлж авчихаад бүхэл бүтэн таван жил барилга байшин нь ашиглалтад ордоггүй иргэдийг хохироодог асуудал байх ёсгүй. “Буурал сутай”, “Асар өргөө” танай хоёр компани ажлаа шуурхайлж, барилгын ажлыг дуусган, гадна орчны тохижилт, ногоон байгууламжийн ажлаа хийх хэрэгтэй” гэсэн юм.

Шинэ хичээлийн жил эхэлж, нийслэлд хөл хөдөлгөөн нэмэгдсэн байгаа эл өдрүүдэд халаасны хулгайн гэмт хэрэг ихэссэн байгаа талаар цагдаагийн байгууллагаас мэдээлж байна. Ялангуяа хөдөө орон нутгаас оюутан болж ирсэн хүүхдүүд, мөн хүүхдүүдээ авч ирсэн ар гэрийнхэн нь хайхрамжгүй хэнэггүй байдлаасаа болж хулгайчид эд зүйлсээ алдаж, энэ төрлийн гэмт хэргийн хохирогч болдог.

Тухайлбал, иргэд автобусанд сууж, буухдаа халаасны хулгайд их өртөж, гар утсаа, түрүүвчээ алдлаа гэсэн дуудлага цагдаагийн байгууллагад их ирж байна.
Тиймээс олон нийтийн газраар явахдаа өөрийн эд зүйлсдээ сонор сэрэмжтэй, анхаарал болгоомжтой явахыг, хулгайч нарт боломж олгохгүй байхыг цагдаагийн байгууллагаас анхааруулж байна.

Улсын гуравдугаар төв эмнэлгийн зүрхний мэс заслын алба үүсгэн байгуулагдсаны 50 жилийн ойд зориулсан “Зураг түүх өгүүлнэ” сэдэвт гэрэл зургийн галерейг нээжээ. Нэг жилийн хугацаанд үргэлжлэх тус галерей нь зүрх судасны мэс заслын тасгийн 50 жилийн хөгжлийн хугацаан дахь онцлох үйл явдлыг гэрэл зургийн хальснаа буулган харуулжээ. Энэ үзэсгэлэнгээр түүхт он жилүүдийг харуулсан 90 гаруй гэрэл зургуудыг онцлон дэлгэж байгаа юм.

ОХУ-ын Ерөнхийлөгч Владимир Владимирович Путин Монгол Улсад есдүгээр сарын 03-ны өдөр албан ёсны айлчлал хийнэ. Гэхдээ тэрбээр өнөөдөр /2019.09.02/орой Улаанбаатарт газардах юм. Айлчлалтай холбоотойгоор өнөөдөр ажлын цагаар замын хөдөлгөөн хэвийн үргэлжилнэ.

Харин зочныг Улаанбаатарт газардах үеэр Чингис хаан нисэх онгоцны буудлаас Шангри-Ла зочид буудал хүрэх замыг тодорхой хугацаагаар хэсэгчлэн хаах ажээ.

ОХУ-ын Ерөнхийлөгч В.В.Путины айлчлал маргааш албан ёсоор эхэлнэ. Энэ хүрээнд доорх замыг хаана гэдгийг цагдаагийн байгууллагаас анхааруулж байгаа тул иргэд та бүхэн ажил, албаа зохицуулж, замын хөдөлгөөнд соёлтой оролцохыг зөвлөж байна.

Есдүгээр сарын 03-ны Мягмар гариг

• Наадамчдын гудамж
• Энхтайваны өргөн чөлөө
• Чингисийн өргөн чөлөө
• Уулын зам
• Амарын гудамж
• Залуучуудын гудамж зэрэг замуудын тодорхой хэсгийг хэсэгчлэн тус тус хаах бөгөөд цагдаагийн байгууллагаас хаагдах замын талаар тухайн бүрт нь хэвлэл мэдээллийн хэрэгслээр дамжуулан мэдээлэх болно.

Өчигдөр буюу есдүгээр сарын 1-ний 14 цаг 19 минутад Ховд аймгийн Чандмань сумаас зүүн хойд зүгт 36 км-т орших Хүрмийн нуруу хэмээх газарт 4.5 магнитудын хүчтэй газар хөдлөлт бүртгэгджээ. Газар хөдлөлтийн тухай мэдээллийг 14 цаг 31 минутад Одон орон геофизикийн хүрээлэнд ирүүлсэн байна. Аймгийн удирдлагуудын мэдээлснээр энэ газарт айл нутагладаггүй болохоор иргэдэд чичирхийлэл мэдрэгдээгүй, хохирол учраагүй ажээ. Үүний өмнө наймдугаар сарын таванд Баян-Өлгий аймгийн Булган суманд 4.1 магнитудын хүчтэй газар хөдлөлт болсон юм.

Замын Үүдийн боомтыг бүтээн байгуулалтын ажилтай холбогдуулан ѳнѳѳдрѳѳс ТҮР ГОРИМд шилжүүллээ.

Замын-Үүд боомтын шинэчлэлийн бүтээн байгуулалтын ажил эхэлж байгаатай холбогдуулан 2019 оны 9 дүгээр сарын 1-ний өдрөөс боомтын үйл ажиллагааг нэг жилийн хугацаагаар түр горимд шилжүүлж байна.

Түр горимд шилжүүлж байгаатай холбогдуулан хил, гаалийн байгууллагын хэвийн үйл ажиллагаанд шаардагдах дэд бүтэц, зам талбай, түр байгууламжуудын бэлэн байдлыг хангаж, иргэд, аж ахуйн нэгжүүдэд хүндрэл учруулахгүйгээр зохион байгууллаа.

Энэ хугацаанд суудлын болон УАЗ автомашинаар зорчигчид хуучин боомтын баруун хойд талд байрлах Замын-Үүд чөлөөт бүсийн зам талбайгаар нэвтэрнэ.

Түр горимоор зорчих маршрут болон түр байгууламжуудын байршлын зургийг танилцуулж байна.

Иймд иргэд Та бүхэн хүлээцтэй хандан боомтын бүтээн байгуулалтын ажлыг дэмжиж хамтран ажиллахыг хүсье.

Жич: Ачаа тээврийн хэрэгслүүдийн хувьд хуучин маршрутад өөрчлөлт орохгүй болно.