Өмнөговь аймгийн Гурван тэс сумын Засаг дарга О.Баттогтохын захирамжаар тус сумын нутаг Тост, Тосон бумбын нуруунд үйл ажиллагаа явуулдаг “Баатарван транс” ХХК-ийн үйл ажиллагааг түр хугацаанд зогсоолоо.
Энэ сарын 18-ны өдөр нутгийн иргэд болон уурхайн ажилчдын хооронд маргаан үүсэж, эмх замбараагүй байдал үүссэний улмаас 15 иргэн хүнд, хөнгөн хэлбэрээр гэмтэж бэртсэн нөхцөл байдалтай холбогдуулан дахин эмх замбараагүй байдал үүсэхээс урьдчилан сэргийлэх зорилгоор захирамж гаргажээ.
Манзуширын хийдийн туурин дээр баригдах “Манзушир” соёл, шашин, аялал жуулчлалын цогцолборын төслийг өнөөдөр нээж байна.
Манзушир хийдийг түүхэн дурсгалт, соёл, шашин, аялал жуулчлалын төв болгох ажлын техник, эдийн засгийн үндэслэл, зураг төсөв боловсруулах ажлыг дуусгаж төслийг өнөөдрөөс эхлүүллээ. Гүйцэтгэгчээр “Арчер” ХХК ажиллаж байгаа бөгөөд хийдийн хуучин туурийг шашин соёл, түүхийн төв Манзушир бурхны орон болгон сэргээн засварлаж хөгжүүлэх ба шинээр тодорсон Манзушир хутагтын номын өргөөг байгуулахаар төлөвлөжээ.
Мөн аялал жуулчлалыг хөгжүүлэх хүрээнд Манзуширын хийдээс Цэцээ гүний оргил хүртэлх 5.6 км, Баруун ширээт 6.3 км, Зайсан толгой 4.7 км үргэлжлэх нийт 16.6 км үргэлжлэх “Cable car” буюу агаарын кабель машины үйлчилгээг нэвтрүүлэхээс гандна явган аялалын амралтын цэгүүдийг байгуулах юм.
БОАЖ-ын сайд Н.Цэрэнбат Засгийн газрын өнөөдрийн хуралдаанаас гарсан зарим шийдвэрийн талаар мэдээлэл хийлээ. Тэрбээр, Зарим газар нутгийг тусгай хамгаалалтад авах, хилийн заагт өөрчлөлт оруулах тухай тогтоолын төсөл баталж, УИХ-д өргөн мэдүүлэхээр боллоо. Тодруулбал, Онон, Балжийн байгалийн цогцолборт газрын хилийн заагт, Хэнтий аймгийн Дадал, Биндэр сумын зарим хэсгийг, Дэвэлийн арлын байгалийн нөөц газрын хилийн заагт, Увс аймгийн Ховд, Бөхмөрөн сум, Баян-Өлгий аймгийн Ногооннуур сумын дунд орших Ачит нуурыг хамруулан өргөтгөж, байгалийн цогцолборт газрын ангиллаар, Завхан аймгийн Хомын талыг байгалийн цогцолборт газрын ангиллаар, Хэнтий аймгийн Батширээт, Биндэр сумын нутагт орших Гутайн даваа, Хөмөл голын эхийг байгалийн цогцолборт газрын ангиллаар, Баянхонгор аймгийн Галуут сумын Хан-Уул орчмын газрыг хангайн нурууны байгалийн цогцолборт газрын өргөтгөлөөр, Алтан хөхий уулын байгалийн нөөц газрын хилийн заагт Ховд аймгийн Мянгад сумын зарим хэсгийг хамруулан өргөтгөлөөр, Баянхонгор аймгийн Гурванбулаг, Завхан аймгийн Отгон сумын нутагт орших Хөх нуурт, Бумбат орчмын газрын байгалийн нөөц газрын ангиллаар, Хэнтий аймгийн Өмнөдэлгэр, Биндэр, Батширээт сумын нутагт орших Хурах, Хүйтний хөндий орчмын газрыг байгалийн нөөц газрын ангиллаар, Баянхонгор аймгийн Галуут сумын нутагт орших Баянхонгор, Хайрхан уулыг дурсгалт газрын ангиллаар өргөтгөн авч, Орхоны хөндийн байгалийн цогцолборт газрын хязгаарлалтын бүс дэх Өвөрхангай аймгийн Бат-Өлзий сумын орчмын гурван мянга гаруй га газрыг Улсын тусгай хамгаалалттай газраас чөлөөлөх тогтоол баталлаа. Ингэснээр нийт зургаан аймгийн 13 сумын нутаг дэвсгэрийг хамарч, Улсын тусгай хамгаалалтад авсан газрын хэмжээ 1.2 сая гагаар нэмэгдсэн. Энэ нь нийт газар нутгийн 0.83 хувь гэсэн үг юм. Ингэснээр Монгол Улсын хэмжээнд 32.8 сая га газрыг Улсын тусгай хамгаалалтад авлаа. Мөн Хөвсгөл нуур орчмыг эко аялал жуулчлалын бүс болгон баталлаа. Цаашид Хөвсгөл нуурийн эрэг орчимд аялал жуулчлалын чиглэлээр газар олгохгүй. Харин тухайн бүс нутгийг хөгжүүлэх үүднээс Улсын төсөв, Азийн хөгжлийн банкны хөрөнгө оруулалтаар цахилгаан, дэд бүтцийн асуудлыг нь шийдэх юм. Ерөнхий сайдын уул уурхайн үйл ажиллагаа явуулахдаа хууль зөрчсөн ААН-ийн тусгай зөвшөөрлийг цуцлах саналыг УУХҮЯ-д хүргүүлсэн. Үүний дагуу 19 ААН-ийн 23 тусгай зөвшөөрөл цуцлах шийдвэр гарсан” гэсэн юм.
Жүдо бөхийн насанд хүрэгчдийн ДАШТ Япон Улсын нийслэл Токио хотод энэ сарын 25-31-ний өдрүүдэд болно.
Энэ жилийн тэмцээнд Монгол Улсын хөдөлмөрийн баатар, гавьяат тамирчин Н.Түвшинбаяр, гавьяат тамирчин Д.Амартүвшин, М.Уранцэцэг нар оролцох бол гавьяат тамирчин Г.Болдбаатар, ОУХМ Д.Төмөрхүлэг, Г.Хэрлэн нар өнжихөөр болоод байгаа билээ.
Дэлхийн аваргад өрсөлдөх Монголын жүдочид:
ЭМЭГТЭЙ:
48 кг: М.Уранцэцэг, Г.Наранцэцэг
52 кг: Б.Хорлоодой,
Л.Сосорбарам
57 кг: Л.Энх-Отгон
63 кг: Б.Мөнгөнчимэг, Б.Ганхайч
70 кг: Ц.Энхчимэг
78 кг: О.Мөнхцэцэг
ЭРЭГТЭЙ:
60 кг: Д.Амартүвшин
66 кг: Ё.Басхүү
73 кг: Г.Одбаяр, Ц.Цогтбаатар
81 кг: О.Ууганбаатар
90 кг Г.Алтанбагана
100 кг Л.Отгонбаатар
+100 кг Н.Түвшинбаяр,
АНУ анх удаа ийнхүү ойрын зайн тусгалтай газар дээр байрлах далавчит пуужинг энэ сарын 19-нд туршсан. АНУ нь дээрх гэрээний дагуу сүүлийн 32 жилийн турш дунд болон ойрын зайн пуужин харваж байгаагүй юм. Дунд болон ойрын зайн тусгалтай пуужингуудыг устгах тухай гэрээний нөхцөлийг зөрчсөн гэж НҮБ үзжээ. Тиймээс АНУ-ын пуужингийн хөгжүүлэлтийн асуудлаар НҮБ-ын Аюулгүйн Зөвлөл пүрэв гарагт ээлжит бус хуралдаан хийхээр болжээ. Яаралтай хуралдаан явуулах хүсэлтийг Орос болон Хятад улс тавьсан гэж НҮБ-д суугаа ОХУ-ын байнгын төлөөлөгч Дмитрий Полянский мэдэгджээ. “Дунд зайн тусгалтай пуужингуудыг хөгжүүлэх, байрлуулахаар төлөвлөж байгаа тухай АНУ-ын мэдэгдэлтэй холбогдуулан бид Хятад улстай хамтран НҮБ-ын Аюулгүйн Зөвлөлд яаралтай хуралдаан явуулах хүсэлтийг илгээсэн. Хуралдаан пүрэв гарагт болно” хэмээн тэрбээр мэдэгдсэн байна. Дунд болон ойрын зайн тусгалтай пуужингуудыг устгах тухай гэрээнээс гарснаас хойш АНУ анх удаа тус баримт бичигт хориотой хэмээн тусгасан газар суурьтай далавчит пуужинг туршжээ. Пуужин 500 гаруй км зайд ниссэн юм.
НҮБ-ын Аж үйлдвэр хөгжлийн байгууллага Европын Холбооны санхүүжилттэй “Монгол Улсад хөдөлмөр эрхлэлтийг дэмжих” төслийн хүрээнд Дэлхийн Сав баглаа боодлын байгууллага, Монголын Сав баглаа, боодол үйлдвэрлэгчдийн нэгдсэн холбоо болон Хүнс, хөдөө аж ахуй, хөнгөн үйлдвэрийн яамтай хамтран “Хүнсний бүтээгдэхүүний сав баглаа, боодол ба брендинг-маркетинг” сэдвээр олон улсын сургалтыг 2019 оны 8-р сарын 27, 29-нд зохион байгуулна.
Сургалтын зохион байгуулах талууд уулзаж санал солилцлоо. Уулзалтад ХХААХҮ-ийн дэд сайд Ж.Сауле, Сайдын зөвлөх Р.Жадамбаа, ХҮХБЗГ-ын дарга Т.Гантогтох тэргүүтэй албаны төлөөлөл оролцов.
НҮБ-ын аж үйлдвэр хөгжлийн байгууллага нь ДСБББ-тай байгуулсан Харилцан ойлголцлын санамж бичгийнхээ хүрээнд Дэлхийн сав баглаа боодлын байгууллагын Дэд Ерөнхийлөгч, эксперт Соха Аталла болон Ерөнхий нарийн бичгийн дарга, эксперт Йоханес Берхмаер нарыг Монголд ажиллуулж хүнсний аюулгүй байдлын хүрээнд сав баглаа боодлыг олон улсын стандарт, шаардлагын дагуу хэрхэн үйлдвэрлэх, хэрэглэх талаар болон сав баглаа, боодол нь өөрөө брендинг, маркетингийн хэрэгсэл болох тухай нийт 6 Модуль сургалт хийх юм. Сургалтад хүнсний бүтээгдэхүүн үйлдвэрлэгчид, ялангуяа сүү, бяслаг, мах, махан бүтээгдэхүүн үйлдвэрлэгч компаниуд болон Монголын сав баглаа боодол үйлдвэрлэгчдийн нэгдсэн холбооны гишүүн аж ахуйн нэгжүүдийг хамруулах юм.
Сургалтыг 2 хэсэгтэйгээр буюу 8-р сарын 27-нд Монголын Бяслаг урлаачдын холбооны гишүүн үйлдвэрлэгчдэд Фромажери кафед, харин 8-р сарын 29-нд мах, сүү болон сав баглаа, боодол үйлдвэрлэгчдэд зориулан сургалтыг ХХААХҮЯ-д зохион байгуулна.
Мэргэжилтнүүд 2019 оны 8-р сарын 20-31-нд Монголд ажиллах үеэрээ ХХААХҮЯ, мэргэжлийн холбоод, мах, сүү, бяслаг үйлдвэрлэгчид болон сав баглаа, боодол үйлдвэрлэгчидтэй биечлэн уулзаж мэргэжлийн зөвлөгөө өгнө. Мөн малчин айлд очиж Монголын уламжлалт сав баглаа, боодлын хэрэглээтэй танилцана.
Монгол улсад сав баглаа боодлын үйлдвэрлэл хэрхэн хөгжиж буй талаар болон “Уламжлалт сав баглаа боодлын онцлог” сэдвээр тус яамны хөнгөн үйлдвэрийн сав баглаа боодол хариуцсан мэргэжилтэн Д.Эрдэнэтуяа илтгэл тавьж хэлэлцүүлнэ. Түүнчлэн энэ үеэр МСББҮНХ-ны хүсэлтээр ДСБББ-д албан ёсны гишүүнээр элсэх талаар хэлэлцэх юм.
Төрийн цэргийн болон Үндэсний аюулгүй байдлыг хангах тусгайлсан чиг үүрэг бүхий байгууллагуудын ажил үүргийн онцлогийг таниулах, эх оронч иргэн болгон төлөвшүүлэх зорилгоор “Эх оронч үзэл, үндэсний бахархал” сэдэвт хүүхдийн танин мэдэхүй, амьдрах ухааны хоёрдугаар ээлжийн сургалтыг Олон Улсын хүүхдийн Найрамдал зуслангийн 11 дүгээр ээлжийн хүүхдүүдэд зохион байгуулж байна.
Сургалтыг НОБГ болон Баянзүрх, Багануур, Налайх дүүргийн Онцгой байдлын хэлтсийн мэргэжилтнүүд зохион байгуулж байгаа бөгөөд сургалтад 600 хүүхэд хамрагдаж байгаа юм.
Сургалтаар Онцгой байдлын байгууллагын үйл ажиллагаа, албаны онцлогийг танилцуулж, хүүхдүүдийн дунд гамшиг осол, гал түймрээс урьдчилан сэргийлэх мэдлэгийг сорих асуулт хариултын тэмцээн зохион байгуулан ерөнхий мэдлэгийн түвшинг тогтоож, гамшгийн үед өөртөө болон бусдад анхны тусламж үзүүлэх, гал түймрээс урьдчилан сэргийлэх, гал унтраах, ахуйн хэрэглээний химийн бодисын зохистой хэрэглээ, ой, хээрийн түймрээс урьдчилан сэргийлэх сэдвийн хүрээнд дадлага сургалтыг явуулж байна.
Мэргэжлийн хяналтын газрын шалгалтаар 2019 оны 08 дугаар сарын 20-ны өдөр Эмээлтийн автотээврийн шалган нэвтрүүлэх товчоогоор 8472 УНК улсын дугаартай ачааны автомашинд иргэн Б.Б Булган аймгийн Хялгант сумаас хэмжээ хэтэрсэн мод тээвэрлэж явсан зөрчлийг илрүүлжээ. Хэргийг Эрүүгийн тухай хуульд заасны дагуу Цагдаагийн байгууллагад шилжүүлсэн байна.
Энэ сарын 19-ний өдөр нийслэлийн Шуурхай удирдлагын төвийн 310005 тоот утсанд Баянгол дүүргийн 14 дүгээр хороо “Ачлал их дэлгүүрийн арын замд могой байна” гэсэн мэдээлэл иргэнээс иржээ.
Мэдээллийн дагуу газар дээр нь очиход бамбай хоншоорт могой ил анзаарагдах гэмтэл бэртэлгүй байсан тул барьж байгальд нь эргүүлэн тавьсан байна.
Нийслэл хот орчимд бамбай хоншоорт болон рашааны гэх хоёр зүйлийн могой тархсан байдаг. Рашааны могой нь хоргүй, бамбай хоншоорт могой нь хортой зүйл учир суурьшлын бүсэд могой орж ирсэн тохиолдолд мэргэжлийн байгууллагад мэдээлэх нь зүйтэй.
Ойрын хугацаанд хур бороо их орж байгаагаас шалтгаалан үер усаар дамжин суурьшлын бүсэд могой орж ирэх тохиолдлууд их гарч байгаа аж.
Өнөөдрийн Засгийн газрын хуралдаанаар шинээр болон өргөтгөлөөр 9 газрыг Улсын тусгай хамгаалалтад авах УИХ-ын тогтоолын төслийг дэмжлээ.
Тэр дундаа Гутайн даваа-Хөмүүл голын эхийг байгалийн цогцолборт газрын ангиллаар тусгай хамгаалалтад авснаар Онон голын эхэд үйл ажиллагаа явуулж байгаа уул уурхайнуудыг таслан зогсоох боломж бүрдлээ.
Ингэснээр Улсын тусгай хамгаалалттай газар нутаг 1.2 сая га буюу 0.83 хувиар нэмэгдэж байгаа юм.
1/ Онон Балжийн байгалийн цогцолборт газрын хилийн заагт Хэнтий аймгийн Дадал, Биндэр сумын зарим хэсгийг хамруулан өргөтгөлөөр,
2/ Дэвэлийн аралын байгалийн нөөц газрын хилийн заагт Увс аймгийн Ховд, Бөхмөрөн сум, Баян-Өлгий аймгийн Ногооннуур сумын нутагт орших Ачит нуурыг хамруулан өргөтгөж байгалийн цогцолборт газрын ангиллаар,
3/ Завхан аймгийн Дөрвөлжин сумын нутагт орших Хомын талыг байгалийн цогцолборт газрын ангиллаар,
4/ Хэнтий аймгийн Батширээт, Биндэр сумын нутагт орших Гутайн даваа-Хөмүүл голын эхийг байгалийн цогцолборт газрын ангиллаар,
5/ Баянхонгор аймгийн Галуут сумын нутагт орших Хан уул орчмын газрыг Хангайн нурууны байгалийн цогцолборт газрын өргөтгөлөөр,
6/ Алтан хөхий уулын байгалийн нөөц газрын хилийн заагт Ховд аймгийн Мянгад сумын зарим хэсгийг хамруулан өргөтгөлөөр,
7/ Баянхонгор аймгийн Гурванбулаг, Завхан аймгийн Отгон сумын нутагт орших Хөх нуур-Бумбат орчмын газрыг байгалийн нөөц газрын ангиллаар,
8/ Хэнтий аймгийн Өмнөдэлгэр, Батширээт, Биндэр, Баян-Адрага сумын нутагт орших Хурх хүйтний хөндий орчмын газрыг байгалийн нөөц газрын ангиллаар,
9/ Баянхонгор аймгийн Галуут сумын нутагт орших Баянхонгор хайрхан уулыг дурсгалт газрын ангиллаар