Month: July 2019

Монгол улсын хэмжээнд орчны цэвэрлэгээ, ариутгал, халдваргүйтгэх шуурхай арга хэмжээ зохион байгуулах ажлыг эрчимжүүлэхээр ажлын хэсгүүдийг долдугаар сарын 02-ны өдрөөс эхлэн зохион байгуулж, бүх аймгуудад ажиллууллаа. Нийт 21 аймгийн хэмжээнд бэлчээрийн талбай малын өвөлжөө хаваржааг ариутгахаас гадна малын түүхий эд бүтээгдэхүүний хадгалах цэг, зоорь агуулах тэжээлийн агуулах түүхий эд бэлтгэн нийлүүлдэг цэг талбай, малын тоног хэрэгсэл, зэргийг нэмж устгасан. Үүнд аймаг орон нутгийн удирдлагууд ихээхэн ач холбогдол өгч ажилласан гэдгийг дурдах нь зөв байх. Улсын хэмжээнд өнөөдрийн байдлаар 163 мянга 728 ширхэг сэг зэмийг устгасан байна. Мөн 439 зоорь агуулах, 18 мянга 795 малын хашаа, 397 худаг, 31 тэжээлийн агуулах, түүхий эд хадгалах 33 цэг, малын 3115 тоног хэрэгсэл ариутгаж нийт улсын хэмжээнд 16.5 сая метр квадрат талбайд ариутгал халдваргүйтгэл хийлээ. Энэхүү ажиллагаанд тэрбум гаруй төгрөг зарцуулсан. Ариутгал халдваргүйжүүлэлт сайн хийснээр малын гоц халдварт өвчин бэлчээрийн бохирдлоос үүсэх өвчний гаралтыг эрс багасгах юм.

Японы олон улсын хамтын ажиллагааны байгууллага-Жайкагаас хэрэгжүүлж буй Улаанбаатар хотын Олон улсын шинэ нисэх онгоцны буудлын хүний нөөц, ашиглалт, менежментийн чадавхийг сайжруулах төслийн хүрээнд шинэ нисэх буудлын газрын үйлчилгээ, үйл ажиллагаанд ашиглагдах заавруудыг хүлээлгэн өглөө. Тус төслийн урт хугацааны зөвлөхөөр 2 жил ажилласан, Жайкагийн мэргэжилтэн-төлийн зохицуулагч Такамура Мицүо өнөөдөр ИНЕГ-ын Тэргүүн дэд дарга Б.Алтанцомтой уулзах үедээ тус заавруудыг гардуулсан юм. Олон улсын агаарын тээвлэгчдийн холбоо/IATA/-ны газрын үйлчилгээний заавруудыг Улаанбаатар хотын Олон улсын шинэ нисэх онгоцны буудлын Ашиглалтын өмнөх захиргаанд хүлээлгэн өгч буй нь нисэх буудлын нүүлгэн шилжүүлэлт хийж байгаагүй бидэнд тун чухал гарын авлага болно хэмээн талархаж буйгаа ИНЕГ-ын Тэргүүн дэд дарга онцоллоо.

Хэнтий аймгийн Батноров сумын 5 дугаар багийн нутаг “Дэлгэрхааны энгэр” гэх газар Говь-Алтай аймгийн харьяат иргэн М, Х нар нь 2019 оны зургадугаар сараас эхлэн 2 ширхэг экскаватор, 1 ширхэг ковш, 2 ширхэг ачааны Хово маркийн автомашинтай хууль бусаар ашигт малтмал олборлож байсныг цагдаагийн газраас илрүүлжээ. Улмаар хэрэг бүртгэлийн хэрэг нээн шалгаж байна.

Цагдаагийн газраас дээрх иргэдийн хууль бусаар ашигт малтмал олборлоход ашигласан техник хэрэгслийг эд мөрийн баримтаар хурааж авсан байна.

Америкийн Нэгдсэн Улсаас Монгол Улсад суугаа Элчин сайд Ноён Майкл С. Клечески болон тус Элчин сайдын яамны холбогдох төлөөлөгчид Монголын хөрөнгийн биржид зочилж, 6,017 дахь удаагийн үнэт цаасны арилжааг нээж цан цохилоо. Энэхүү үйл явдлыг тохиолдуулан Гүйцэтгэх захирал Х.Алтай Элчин Сайд Клеческид МХБ-ийн үйл ажиллагааг танилцуулж, Монголын хөрөнгийн зах зээлийн цаашдын хөгжлийн боломжуудын талаар санал солилцлоо. Ёслолын үйл ажиллагааны үеэр Элчин сайд Майкл С. Клечески “Аливаа улсын эдийн засагт хөрөнгийн зах зээлийн гүйцэтгэх үүрэг асар чухал билээ. Монгол Улсын хөрөнгийн зах зээл идэвхжиж байгаа энэ цаг үед нэгэнт шинэчлэгдэн сайжирсан хууль эрх зүйн орчин, хуримтлуулсан туршлагадаа суурилан төрийн өмч хувьчлалыг МХБ-ээр дамжуулан хэрэгжүүлэх, тэр дундаа МХБ болон тооцооны байгууллагыг хувьчлах нь манай улсын төдийгүй олон улсын хөрөнгө оруулагчдыг татаж, Монголын хөрөнгийн зах зээл олон улсын зах зээл болоход чухал алхам болох юм” хэмээн онцлон тэмдэглээд, МХБ-ийн хүндэт зочны дэвтэрт гарын үсэг зурав.

Баянзүрх дүүргийн нутаг дэвсгэрт оршин суух иргэн Р.Барсболдын гэрт энэ сарын 10-ны өдөр үл таних хүмүүс хутга тулган дээрэмдсэн хэрэг гарсан. Баянзүрх дүүрэг дэх Цагдаагийн I хэлтэс, НЦГ-ын Мөрдөн шалгах газрын Хүнд гэмт хэрэгтэй тэмцэх хэлтсийн алба хаагчид мөрдөн шалгах ажиллагаа явуулж гэмт хэрэг үйлдсэн этгээдүүдийг илрүүлжээ. Академич Р.Барсболд болон түүний эхнэрт хутга тулган дээрэм хийсэн хэргийг эрхэлсэн тодорхой ажилгүй 24 настай Б, 28 настай Ч, 28 настай Б нар үйлдсэн болохыг тогтоож, цагдан хорих таслан сэргийлэх арга хэмжээ авч мөрдөн шалгаж байгаа аж.

Нийслэлийн Засаг даргын зөвлөлийн өнөөдрийн хуралдаанаар Улаанбаатар хотод ашиглагдаж байгаа гүүрэн гарцуудын цэвэрлэгээ, үйлчилгээ, цахилгаан шатны ашиглалтын талаарх танилцуулга болон Үндэсний төв цэнгэлдэх хүрээлэнгийн байршил, зураг төсөл, төсвийн тухай танилцуулгыг хэлэлцэж хурлын тэмдэглэл гаргалаа. Улаанбаатар хотод ашиглагдаж байгаа гүүрэн гарцуудын цэвэрлэгээ, үйлчилгээ, цахилгаан шатны ашиглалтын талаарх танилцуулгыг Улаанбаатар хотын Ерөнхий менежер Т.Гантөмөр танилцуулав. Нийслэлийн хэмжээнд төсвийн хөрөнгөөр байгуулсан таван гүүрэн гарц, гурван нүхэн гарц байдаг. Нийслэлийн Засаг даргын үүрэг болгосны дагуу өнгөрсөн зургаадугаар сард “Улаанбаатар шат” НӨҮГ-ын дарга, ерөнхий инженерээр ахлуулсан ажлын хэсэг Хан-Уул дүүргийн 8 дугаар хороо 120 мянгатад байрлах гүүрэн гарцны цахилгаан шат, Сүхбаатар дүүргийн 10 дугаар хороо, Хан-Уул дүүргийн 19 дүгээр хороололд байрлах гүүрэн гарцны цахилгаан шат, 100 айлд байрлах цахилгаан шатнуудын эвдэрч гэмтсэн тоног төхөөрөмжүүдийг сольж ашиглалтад оруулсан байна. Цаашид гүүрэн гарцны цахилгаан шатнуудыг хариуцах хоёр ээлжийн ажилтан ажиллуулах, шаардлагатай сэлбэг хэрэгслийн нөөц бүрдүүлэх шаардлагатай байгаа талаар Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр танилцууллаа.

Зөвлөлийн гишүүд уг асуудлыг хэлэлцэж нийслэлийн хэмжээнд байгаа гүүрэн гарцуудын цахилгаан шатны засвар болон техникийн бүрэн бүтэн байдлыг “Улаанбаатар лифт” НӨҮГ-ыг хариуцаж ажиллах үүрэг даалгавар өгч хурлын тэмдэглэл гаргалаа.

Мөн зөвлөлийн хурлаар олон улсын жишигт нийцсэн 50-60 мянган хүний суудалтай, битүү дээвэр бүхий Үндэсний төв цэнгэлдэх хүрээлэн барих газрын байршлын талаар нийслэлийн Засаг даргын Тамгын газрын дарга Э.Содномжамц танилцууллаа. Зөвлөлийн гишүүд тодорхой дөрвөн газрын байршилд санал хэлж, үндэсний төв цэнгэлдэх хүрээлэн барих газрыг дахин судалж танилцуулахыг нийслэлийн Газар зохион байгуулалтын албаны дарга А.Энхманлайд үүрэг болголоо. Энэ үеэр хотын Захирагч С.Амарсайхан “Үндэсний төв цэнгэлдэх хүрээлэн барих асуудлыг төр хувийн хэвшлийн оролцоотой, байнгын ажиллагаатай байх зарчим дээр үндэслэж хийх ёстой. Зах зээлийн хэрэгцээг хангасан жилийн дөрвөн улиралд хэвийн үйл ажиллагаа явуулж байдаг цогцолбор болох Үндэсний төв цэнгэлдэх хүрээлэнг байгуулахад хувийн хэвшлийнхний саналыг тусгах хэрэгтэй” хэмээлээ.

Уг асуудалтай холбогдуулан Үндэсний төв цэнгэлдэх хүрээлэнг барьж байгуулахад төр хувийн хэвшлийн хамтын ажиллагааны хүрээнд хэрэгжүүлэх, хувийн хэвшлийн аж ахуйн нэгжүүдтэй санал солилцож танилцуулахыг Хөгжлийн бодлого төлөвлөлтийн хэлтсийн дарга С.Отгонбаярт даалгав.

Энэ сарын 18-нд Хэнтий аймгийн Цэнхэрмандал сумын нутагт зам тээврийн ноцтой осол гарч дөрвөн хүний амь насаа алдсан харамсалтай хэрэг гарчээ. Сүхбаатар аймгийн Баруун-Урт сумаас Улаанбаатар хотын чиглэлд дөрвөн зорчигчтой зорчиж явсан “Латио” загварын суудлын автомашин, Улаанбаатар хотоос Сүхбаатар аймгийн Баруун-Урт сумын чиглэлд дөрвөн зорчигчтой зорчиж явсан “Ланд крузер-200” автомашинтай мөргөлджээ. Ослын улмаас нийслэлийн Баянзүрх дүүргийн 17 дугаар хорооны харьяат иргэн М /55 настай, эрэгтэй/, Б /42 настай, эрэгтэй/, С /32 настай, эмэгтэй/, А /4 настай, эмэгтэй/ нар гэмтсэн байсан тул Багануур дүүргийн Нэгдсэн эмнэлэгт хүргэсэн байна. Харин Нийслэлийн Сонгинохайрхан дүүргийн 26 дугаар хорооны харьяат иргэн Ц /45 настай, эрэгтэй/, Т /45 настай, эмэгтэй/, Б /26 настай, эрэгтэй/, Б /10 настай, эрэгтэй/ нар нас барсан тул цогцсыг гаргаж Хэнтий аймгийн Жаргалтхаан сум дахь сум дундын Цагдаагийн хэлтсийн бүрэлдэхүүнд шилжүүлэн өгчээ.