Month: June 2019

Баянгол дүүрэгт үйл ажиллагаа явуулж буй эмийн сангуудад Нийслэлийн мэргэжлийн хяналтын газраас хяналт шалгалт хийж байгаа аж. Уг шалгалтаар алдаатай болон хуурамч жороор сэтгэцэд нөлөөт эмээр үйлчилсэн зөрчлийг илрүүлж, холбогдох арга хэмжээг авжээ.

Иймд эмч нар стандартын дагуу жор бичих, жор баригч нар эмийн жор хүлээн авахдаа стандартын дагуу бичигдсэн эсэхийг шалгаж, алдаатай, хуурамч жороор үйлчлэхгүй байхыг Нийслэлийн мэргэжлийн хяналтын газраас сэрэмжлүүлж байна.

Ардчилсан эмэгтэйчүүдийн холбооноос санаачлан хэрэгжүүлсэн, Гэр бүлийн тухай хуулийн шинэчилсэн төслийг орон даяар, нийтээр хэлэлцүүлэх “Хамтдаа хэлэлцье’’ аян өндөрлөж буйтай холбогдуулан тус холбооны зүгээс өнөөдөр хэвлэлийн хурал зохион байгууллаа.

Энэхүү аяныг 2019 оны 03 дугаар сарын 01-нээс 06 сарын 01 хүртэл гурван сарын хугацаанд явуулсан бөгөөд нийт 21 аймгаас 19500, 9 дүүргээс 10000, гаруй иргэд саналаа өгсөн байна. Тэдгээр саналуудыг нэгтгэхэд:

-Гэр бүлийн боловсролыг нас насны онцлогт тохируулан албан болон албан бусаар олгох

-Эргэн төлөгдөх нөхцөлтэйгөөр “Хүүхдийн тэтгэлгийн сан”- г байгуулж хүүхдийн эрхийг хангах хүүхдийн тэтгэлгийг насны ялгаваргүйгээр олгох

-Гэр бүлийн асуудлаар дагнан мэргэшсэн шүүгч, өмгөөлөгч, нийгмийн ажилтан, сэтгэл зүйчдийн тоог нэмэгдүүлэх зэрэг саналууд ирсэн хэмээн АЭХ-ны ерөнхийлөгч С. Одонтуяа хэллээ. Түүгээр ч зогсохгүй жилд 4000- 5000 гэр бүл салдаг бөгөөд хүн ам өсгөх бодлого явуулж буй манай улсын хувьд энэ тоо маш их байна гэлээ. Мөн энэхүү аяны хүрээнд эсээ, гар зургийн уралдааныг зарласан бөгөөд өнөөдөр шилдгүүдээ шалгаруулсан юм.

Т.ЛХАМСҮРЭН

Сүүлийн өдрүүдэд үргэлжилсэн бороотой байснаас голын түвшин нэмэгдэж улмаар иргэд голын усанд осолдож нас барах тохиолдол өдөр бүр гарч байна. Өчигдөр буюу энэ сарын 18-нд Ховд аймгийн Булган сум, Булган голын орчим амьдардаг 1,6 настай эрэгтэй хүүхэд ээжийгээ бие засах зуур голын усанд унаж нас барсан харамсалтай хэрэг гарчээ.

Өнөөдөр Үндэсний мэдээллийн төвд “Зээлдэгчдийн холбоо”-ноос арилжааны болон ББСБ-уудын зээлийн хүүг бууруулахыг шаардаж буй талаар мэдээлэл хийлээ.

МУ-ын Үндсэн хуулийн 5-р зүйлийн 4-т “Төр нь үндэсний эдийн засгийн аюулгүй байдал, аж ахуйн бүх хэвшлийн болон хүн амын нийгмийн хөгжлийг хангах зорилгод нийцүүлэн эдийн засгийг зохицуулна” гэж заасан. Тэд Төр Үндсэн хуулийн энэ үүргээ биелүүлэхгүй байна гэж үзжээ.

Уг холбооноос сүүлийн 1-2 сарын дотор Арилжааны банкууд хадгаламжийнхаа хүүг бууруулсан ч бүх төрлийн зээлийн хүүг буулгаагүй, сүүлийн 2 жилээс өмнө авсан зээлийн хүүг одоогийнхтой дүйцүүлж бууруулаагүй, мөн интернет банк, мессеж үйлчилгээ, банк хоорондын шилжүүлгийн хураамж гэх мэт шинэ үйлчилгээ гаргаж маш их хэмжээний ашиг олж байгаа, үйлчилгээний үнийн талаар үйлчлүүлэгчээс санал авдаггүй зэргийг эсэргүүцсэн юм. Тэд зээлийн хүүг бууруулах гол арга бол инфляцыг бууруулах, төгрөгийн ханшийг тогтвортой барих явдал гэв.

“Зээлдэгчдийн холбоо”-ны тэргүүн Ц.Солонгийн хэлснээр арилжааны болон ББСБ-уудад зээлийн хүүг бууруулах, үйлчилгээний хууль бус мөлжлөг явуулахаа зогсоох шаардлагыг холбооны зүгээс хүргүүлэх, хэрэв арга хэмжээ авахгүй бол жагсаал цуглаан зохион байгуулах,шүүхэд хандах зэргээр тэмцэх аж.

Монголд өнөөдөр арилжааны 14 банк, 539 ББСБ үйл ажиллагаа явуулдаг байна. Санхүүгийн зохицуулах хорооны 2018 оны мэдээнээс үзэхэд, Арилжааны банкны зээлийн хүү дунджаар жилийн 25%, ББСБ-38,4%, Хадгаламж зээлийн хоршоо 34,8%, Ломбард 42 % -тай аж.

Э.АМИНАА

Монгол Улсын Ерөнхий сайдын ивээл дор зургаадугаар сарын 21-ний өдөр үе үеийн жагсаалын дарга, бага дарга нарын дурсамж уулзалтыг зохион байгуулах гэж байна. Тус уулзалтын бэлтгэл ажил бүрэн хангагдсан хэмээн НЗДТГ-ын Цэргийн штабын ахлах офицер, хурандаа Т.Мөнхбаяр мэдээллээ.

Тэрээр “Хугацаат цэргийн алба хаах нь Монгол Улсын иргэний хуулиар хүлээсэн үүрэг төдийгүй эх орноо хамгаалах, эх оронч үзлийг бий болгодог хүндтэй алба юм. Хугацаат цэргийн албаа бага дарга, жагсаалын дарга цолтой хаасан иргэдэд зориулан нэгэн өдөр хамтдаа чуулж, дурсамжаа бахархан хуваалцах боломжийг олгох үүднээс энэнхүү уулзалтыг зохион байгуулж байна. Үйл ажиллагаа хөтөлбөр ёсоор зургаадугаар сарын 21-ний өдөр 10:30 цагаас Сүхбаатарын хөшөөнд цэцэг өргөх ёслолоор эхэлж үндсэн арга хэсжээ нь 11 цагаас СТӨ-д болох юм байна. Эрхэм хүндэт жагсаалын дарга, бага дарга та бүхнийг идэвхитэй оролцохыг уриалж байна” хэмээн хэвлэлийн хурлын үеэр онцолж байв.

Б.ОЮУНГЭРЭЛ

Тарваган тахал өвчний эсрэг дархлаажуулалтыг 2019 оны 07 сарны 01-нээс 10-ны өдрүүдэд улсын хэмжээнд зохион байгуулна.

21 аймгийн Эрүүл мэндийн газар, 9 дүүргийн эрүүл мэндийн төвүүдэд 32400 хүн тун вакциныг хүргүүлээд байна. Дархлаажуулалтад заавал харагдах шаардлагатай иргэд харьяа аймаг, сум, дүүргийн Эрүүл мэндийн төв, Зоонозын өвчин судлалын төвүүдэд хандан хамрагдах юм.

Дархлаажуулалтад:

• Тарваган тахлын цэвэр өсгөвөр, халдвартай, халдварын сэжигтэй материал болон туршилтын амьтадтай ажиллагсад;

• Тарваган тахлын голомтот нутагт геологийн хайгуул шинжилгээ, бэлчээр усжуулалт, агнан бэлтгэл эрхэлдэг иргэд;

• Тарваган тахлын голомтот нутагт оршин суугчид, бэлчээрийн мал аж ахуй эрхэлдэг малчид;

• Бүх шатны эрүүл мэндийн байгууллагын ажиллагсад ялангуяа тарваган тахлын байгалийн идэвхтэй голомтот нутгийн эрүүл мэндийн байгууллагын ажиллагсад;

• Хууль сахиулах болон Онцгой байдлын байгууллагын алба хаагчид хамрагдана.

Нэр бүхий хэвлэл мэдээллийн хэрэгсэлд “ЗХЖШ-ын нягтлан 313 сая төгрөгийн хохирол учруулсан хэргийг анхан шатны шүүхэд шилжүүлжээ” гэх гарчиг бүхий нийтлэлтэй холбогдуулан ЗХЖШ дараах албан ёсны хариу тайлбарыг гаргаж байна.

Тус нийтлэлд дурдсан нягтлан Б нь Зэвсэгт хүчний Жанжин штабт огт ажиллаж байгаагүй бөгөөд 2014 оны 10 дугаар сарын 22-ноос 2017 оны 02 дугаар сарын 09-ний өдрийг хүртэл хугацаанд Зэвсэгт хүчний 065, 150 дугаар ангиудын санхүүгийн нягтлан бодогчоор ажиллаж байсан. Тэрээр дээрх Зэвсэгт хүчний ангиудын санхүүгийн нягтлангаар ажиллаж байхдаа гадаад улс руу суралцахаар явсан, өөр анги байгууллага руу шилжсэн, тэтгэвэрт гарсан зэрэг шалтгаанаар тус ангиудад ажиллаагүй нийт давхардсан тоогоор 500 иргэний нэр дээр хий болон илүү цалин бичиж 373,582,668.00 төгрөгийг завшиж, их хэмжээний хохирол учруулсан.

Түүний энэхүү төсвийн хөрөнгө завшсан хууль бус үйлдлийг Зэвсэгт хүчний Жанжин штабын Санхүүгийн хэлтсийн санхүүгийн дотоод аудитын албан тушаалтнууд шалгаж, илрүүлсэн бөгөөд тус хөрөнгө завшсан үйлдлийг шалгуулахаар Авлигатай тэмцэх газарт шилжүүлж, улмаар харьяаллын дагуу Баянзүрх дүүргийн эрүүгийн хэргийн анхан шатны шүүхийн 2018 оны 10 дугаар сарын 30-ны өдрийн 2018/ШЦТ/1486 дугаар тогтоолоор Т.Б-д холбогдох эрүүгийн хэргийг шийдвэрлж, түүний учруулсан хохирлын хэмжээг 310,725,167.00 төгрөгөөр тогтоож, Т.Б-д Эрүүгийн хуулийн 17.4 дүгээр зүйлийн 2.2 дахь заалтад заасны дагуу 4 жилийн хугацаагаар хорих ял оногдуулж, Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.1 дэх заалтад зааснаар гэмт хэргийн хор уршгийг арилгах талаар арга хэмжээ авах үүргийг хүлээлгэхээр шийдвэрлэсэн.

Зэвсэгт хүчний Жанжин штаб нь тус хэрэг хянан шийдвэрлэх ажиллагаанд хууль ёсны хохирогч, иргэний нэхэмжлэгчээр оролцож байгаа бөгөөд эрүүгийн хэргийн анхан шатны шүүх 4 жилийн хугацаагаар хорих ял оногдуулсан шүүхийн шийтгэх тогтоол биелүүлэхийг хоёр жилийн хугацаагаар хойшлуулж шийдвэрлэсэн нь хуулийг буруу хэрэглэж, шийдвэрлэсэн хэмээн үзэж Нийслэлийн эрүүгийн хэргийн анхан шатны шүүхэд давж заалдах гомдол гаргасан хэдий ч 2002 оны Эрүүгийн хуулийн 150 дугаар зүйлийн 150.3 дахь хэсэгт зааснаар зүйлчилж, мөн хуулийн 63 дугаар зүйлийн 63.1 дэх хэсэгт зааснаар шүүхийн шийтгэх тогтоол биелүүлэхийг хойшлуулж шийдвэрлэсэн.

Өөрөөр хэлбэл эрүүгийн хэргийн давж заалдах шатны шүүх мөн адил хуулийг буцаан хэрэглэх үндэслэлийг буруу хэрэглэж, 2002 оны Эрүүгийн хуулийн 63.1 дэх хэсэгт заасны дагуу ял хойшлуулж, шийдвэрлэсэн нь хуулийг буруу хэрэглэсэн шийдвэр гаргасан.

Ийнхүү Зэвсэгт хүчний Жанжин штабын зүгээс эрүүгийн хэргийн давж заалдах шатны шүүхийн магадлалыг эс зөвшөөрч Улсын дээд шүүхийн эрүүгийн хэргийн хяналтын шатны шүүхэд гомдол гаргасны үр дүнд анхан болон давж заалдах шатны шүүхийн тогтоол, магадлалыг “Хуулийг буруу хэрэглэсэн гэх үндэслэлээр хүчингүй болгож, дахин анхан шатны шүүхээр хэлэлцүүлэх”-ээр шилжүүлсэн. Энэ нь Т.Б-д хорих ял оногдуулсан нь буруу байна гэсэн шийдвэр биш бөгөөд зөвхөн ял хойшлуулсан нь хуулийг буруу хэрэглэсэн хэмээн шийдвэрлэсэн болно. Т.Б-д холбогдох эрүүгийн хэргийн анхан шатны шүүх хуралдаан 2019 оны 06 дугаар сарын 21-ний өдөр Баянзүрх дүүргийн эрүүгийн хэргийн анхан шатны шүүхэд болно.

ЗХЖШ-ын зүгээс төсвийн хөрөнгийг хууль бусаар захиран зарцуулсан, завшсан үйлдлийг дотоод аудитын хяналт, шалгалтаар илрүүлж, хууль хяналтын байгууллагад шалгуулахаар шилжүүлэх, цаашид ийм төрлийн зөрчил гаргуулахгүй байх үүднээс шат шатанд анхаарч, санхүүгийн төдийгүй эд хөрөнгө хариуцаж буй албан тушаалтнуудын үйл ажиллагаанд хяналт тавьж ажиллаж байна.

Зэвсэгт хүчний Жанжин штаб

2019.06.19