Month: May 2019

Саяхан Филиппиний Засгийн газар байгаль орчинд ээлтэй нэгэн сонирхолтой хуулийг хэлэлцжээ. Энэ нь төгсөх ангийн хүүхдүүд 10,10 ширхэг мод тарь байж сургуулиа төгсөх эрхтэй болох хууль юм. Энэхүү хууль нь бага, дунд, ахлах ангийболон их дээд сургуулиудад ч үйлчлэх аж.

Хуулийг санаачлагч нь Филиппиний Конгрессын гишүүн Гари Алехано. Тэрбээр хүүхэд залуусыг байгаль дэлхийгээ хайрлан хамгаалах үүргээ ухамсарлаж байгаасай хэмээн хүсдэг гэнэ.

Түүний хэлж буйгаар 175 сая мод ургамлыг хүүхдүүд тарих юм байна. Тарьсан бүх модны ердөө 10 хувь нь цааш тэсч үлдээд ургалаа гэхэд л 525 сая мод ургамалтай болж үлдэнэ хэмээн тооцоолжээ.

А.МӨНХЗУЛ

Мэргэжлийн хяналтын байгууллагаас эрүүл мэндэд тустай гэх тодотголтой “Хар зайрмаг”-т будагч бодисыг ашигласан, нянгийн бохирдол илэрсэн тул 3 тонн гаруй бүтээгдэхүүнийг хурааж, устгажээ.

Мөн худалдаанд нийлүүлсэн бүтээгдэхүүнээ татан авах талаар үйлдвэрт үүрэг, чиглэл өгсөн бөгөөд татан авсны дараа устгалд оруулах юм.

Тухайн бүтээгдэхүүнийг үйлдвэрлэхдээ Засгийн газрын 2011 оны 304 тоот тогтоолоор баталсан “Сүү, сүүн бүтээгдэхүүний үйлдвэрлэлд мөрдөх техникийн зохицуулалт”-ын 8.3 “Сүү боловсруулах үйлдвэрт хэрэглэж байгаа хүнсний нэмэлт нь MNSСАС 192 “Хүнсний нэмэлтийн ерөнхий стандарт, шаардлага”-ыг хангасан, … бөгөөд тэдгээрийн хэмжээнд тогтоосон нормтой нийцсэн байна” гэсэн заалтыг зөрчсөн тул дээрх арга хэмжээг авсан байна. Нянгийн бохирдолтой холбогдуулан үйлдвэрлэлийн үйл ажиллагаанд эрүүл ахуйн зохистой дадлыг нэвтрүүлж, ариун цэврийн нөхцлийг сайжруулах, түүхий эдийн сонголтод анхаарах талаар мэргэжил арга зүйн зөвлөгөө өгчээ.

Үүнтэй холбогдуулан импортоор оруулж ирж буй зайрмагт хяналт тандалт хийхэд эрүүл ахуйн аюулгүй үзүүлэлтийн шаардлагыг хангасан дүнтэй байна. Тухайн хүнсний нэмэлттэй зайрмагийг гурван компани импортолдог бөгөөд энэ онд 2 тонн импортолжээ. Энэ төрлийн зайрмагийн орцонд ордог хүнсний нэмэлт /vegetable carbon Black буюу Уголь растительный Е-153/ нь Монгол Улсад одоогоор мөрдөж буй “Хүнсний нэмэлтийн ерөнхий стандарт, MNS САС 192-2015”-д тусгагдаагүй, улсын бүртгэлд бүртгэгдээгүй тул “Хүнсний тухай” хуулийн 16.1-д заасны дагуу Хүнс, Хөдөө аж ахуй, хөнгөн үйлдвэрийн яамнаас улсын бүртгэлд бүртгүүлэх хүртэл хугацаагаар импортыг түр хязгаарлаад байна.

МХЕГ цаашид хүнсний нэмэлт бүтээгдэхүүний стандартад нэмэлт өөрчлөлт оруулах, хүнсний нэмэлт бүтээгдэхүүнийг бүртгэх асуудлыг холбогдох төрийн захиргааны төв байгууллагад тавьж, хамтран ажиллахаар төлөвлөжээ.

ШӨХТГ-аас мэдээлэл хийж шатахууны үнэ, махны үнэ, сурагчдын үдийн цай зэрэг асуудлуудаар мэдээлэл хийлээ. 2017, 2018 онуудад иргэдээс гомдол санал ихээр ирдэг байсан бол 2019 онд иргэдээс зөвлөмж, зөвлөгөө хүссэн хүсэлт ирэх болжээ. Иргэдээс ирсэн гомдлын дийлэнх нь жижиглэн худалдаатай холбоотой гомдол байжээ. ШӨХТГ-ын дарга Б.Лхагва, “Үдийн цай хөтөлбөртэй холбогдуулж олон төрлийн шалгалтыг хийж байгаа. Зөрчил дутагдал гарсан хэвээр байна. Бүтээгдэхүүний чанар, гарал үүслийн гэрчилгээ хангалтгүй, бэлтгэн нийлүүлэгчидтэй хийсэн гэрээ хангалтгүй зэрэг нь тогтоогдсон гэв. Махны үнийн өсөлтийн талаар “Махны үнэ өнгөрсөн долоо хоногоос буурч байна. Махны үнэ өсөхөөр манай агентлаг хянадаг гэж ойлгодог ч бидэнд үнэ хянах эрх байдаггүй. Бид зөвхөн монополь ААН-үүдийн үнийг хянах эрхтэй. Гэхдээ бид махны үнийн өсөлттэй холбоотой шалгалт хийж дүгнэлт гаргасан. Эмээлт зах, Хүчит шонхор худалдааны төвүүдэд шалгалт хийсэн.

Шалгалтын явцад үнэ өсөхөд малчдаас шууд худалдан авах үйл явц саадтай хэвээр байна. Өөрөөр хэлбэл, олон дамжлага байсаар байна. Жилд багадаа 12 мянган тонн мах нөөцөлдөг байсан ч энэ жил дөрөвхөн мянган тонн мах нөөцөлсөн. Мөн экспортын квотын эрхтэй компаниуд их хэмжээний мах нөөцөлсөн учир үнэ нэмэгдсэн гэж үзсэн. Шатахууны үнийн асуудлын тухайд IV сард хоёр, энэ сард нэг удаа үнээ нэмсэн. Шатахуун жижиглэнгийн үнэ төрөл тус бүрээс хамаарч 97-161 төгрөгөөр өссөн байна.

Үүнийг бид хилийн үнэ, худалдан авч буй “Роснефть” компанийн үнийг судлахад жижиглэн борлуулалтын үнийг өсгөх нөхцөл үүсээгүй гэж үзэж байна. Холбогдох шаардлагуудыг тавьсан. Мөн төрийн байгууллагуудад холбогдох саналыг хүргүүлсэн” гэлээ.

Дотоодын цэргийн штабын дарга, даргын зөвлөлийн гишүүд Дотоодын цэргийн 05, 805 дугаар ангийн хамгаалалтад байгаа улсын онц чухал объектуудын хамгаалалтын нөхцөл байдалтай газар дээр нь танилцаж, илэрсэн зөрчил, дутагдлыг арилгуулан, хамгаалуулагч байгууллагын удирдлагатай ажил хэргийн уулзалтыг зохион байгууллаа.

Энэ үеэр объектын хамгаалалтыг боловсронгуй болгох, харуулын бүрэлдэхүүний албан үүрэг гүйцэтгэх нөхцлийг сайжруулахад чиглэсэн ажил, арга хэмжээг хамтран тодорхойлох зорилгоор 2019 оны 5 дугаар сарын 28-ны өдрөөс эхлэн хуваарийн дагуу улсын онц чухал объектыг хамгаалалтын үйл ажиллагаатай танилцсан юм.

Цагдаа, дотоодын цэргийн байгууллагын ахлагч албан тушаалын сул орон тоог нөхөх, нөөц бүрдүүлэх зорилгоор Дотоод хэргийн их сургуулийн Ахлагчийн сургуультай хамтран эргүүл, харуул, жижүүр, хамгаалалтын цагдаа, цагдаа зохицуулагч, цагдаа-жолооч, Дотоодын цэрэгт жолооч, эргүүлчин, харуулчны ажлын байранд хугацаат цэргийн алба хаасан, бүрэн дунд болон түүнээс дээш боловсролтой иргэдийг шалгаруулан суралцуулах ажлыг зохион байгуулах гэж байна.

Тавигдах ерөнхий шаардлага:

• Монгол Улсын иргэн байх,
• Монгол хэлний ярианы болон бичгийн чадвартай байх, /Монгол хэл бичгийн дүрэм, үг зүй, найруулга зүйн зохих мэдлэгтэй/,
• Гэмт хэрэг үйлдэж, ял шийтгүүлж байгаагүй,
• Сэтгэцийн өвчин, эмгэггүй байх,
• Бүрэн дунд болон түүнээс дээш боловсролын зэрэгтэй байх,
• Хуулийн дагуу цэргийн жинхэнэ жинхэнэ алба хаах үүрэг хүлээсэн иргэн үүргээ биелүүлсэн байх /хугацаат цэргийн албыг биеэр хаасан болон оюутан цэрэг, дүйцүүлэх алба хаасан/,

Тавигдах тусгай шаардлага:

• Биеийн өндөр эр 170 см буюу түүнээс дээш, 30 хүртэл настай,
• Цагдаагийн алба хаагчийн сахилга, ёс зүйг сахиж, тогтвор суурьшилтай хариуцлагатай ажиллах,
• Нөхцөл байдлыг зөв үнэлж, шийдвэр гаргах, багаар ажиллах, иргэдтэй зөв боловсон харилцах ур чадвар эзэмшсэн байх, хувийн зохион байгуулалт сайтай, ажлын ачаалал даах чадвартай байх,
• Автомашины засвар үйлчилгээ, оношлогоо хийх /цагдаа жолооч/,
• 3-аас доошгүй жил тээврийн хэрэгсэл жолоодсон туршлагатай байх, жолооны В, С ангилалтай байх,

Албан тушаал /ажлын байр /-д дээр дурдагдсан ерөнхий болон тусгай шаардлагыг хангаж байгаа бол цагдаа, дотоодын цэргийн байгууллагад ажиллахыг хүссэн иргэд бүртгэл, судалгаанд хамрагдана. Үүнд:

Нэгдүгээр үе шат: Бүртгэл

– Улаанбаатар хотод Нийслэлийн цагдаагийн газар, Нийтийн хэв журам хамгаалах, олон нийтийн аюулгүй байдлыг хангах албаны Эргүүл, хамгаалалтын газар, Дотоодын цэргийн 05, 805 дугаар анги, Дотоодын цэргийн штаб, Автобаазад,

– Аймаг орон нутагт нутаг дэвсгэрийнхээ цагдаагийн байгууллагад хандан бүртгэл, судалгаанд тус тус хамрагдана.

Бүртгэл явагдах хугацаа: 2019 оны 05 дугаар сарын 30-ны өдрөөс 06 дугаар сарын 21-ний өдөр.

Хоёрдугаар үе шат: Судалгаа Бүртгэлд хамрагдсан иргэд 2019 оны 07 дугаар сарын 01-ний өдөр /Даваа гараг/-ийн 09:00 цагаас Дотоодын цэргийн 05 дугаар анги дээр очиж нэгдсэн бүртгэлд хамрагдаж, шалгалтад орох эрхээ авна.

Дараах бичиг баримтыг бүрдүүлж, бүртгэл, судалгаанд хамрагдана. Үүнд:

• Өргөдөл
• Биеийн байцаалт (Төрийн албаны зөвлөлийн 2019 оны 05 дугаар тогтоолын 1-6 дугаар хавсралтаар баталсан “Төрийн албан хаагчийн анкет”-ын дагуу бүрэн бичсэн байх);
• Бүрэн дунд, дээд боловсролын диплом, сурагчийн хувийн хэрэг; /нотариатаар баталгаажуулсан хуулбарын хамт/
• Иргэний үнэмлэх; /нотариатаар баталгаажуулсан хуулбарын хамт/
• 3 үеийн намтар;
• Оршин суугаа хаягийн тодорхойлолт;
• Цэргийн үүрэгтний үнэмлэх /нотариатаар баталгаажуулсан хуулбарын хамт/
• 3х4, 4х6 хэмжээний 4% зураг;
• Урьд нь ажил, хөдөлмөр эрхэлж байсныг гэрчлэх баримт /нийгмийн даатгалын дэвтэр, хөдөлмөрийн дэвтэр/-ийн эх хувь; албанаас чөлөөлөгдсөн бол тушаалын хувь; архивын лавлагаа,

Суралцахыг хүссэн иргэдийн анхаарах зүйлс. Үүнд:

• Шалгалтад орохоор бүртгүүлж байгаа иргэн өөрийнхөө тухай үнэн зөв мэдүүлэх үүрэгтэй бөгөөд шаардлагатай нэмэлт материалыг гаргуулан авна,
• Биеийн ил харагдах хэсэгт болон 18-аас дээшгүй хувьд шивээс, нүүрэнд илэрхий сорви, мэс заслын оёдолтой, гажиггүй байх,
• Хууль, эрх зүйн шалгалт авах тул Үндсэн хууль, Төрийн албаны тухай хууль, Цагдаагийн албаны тухай хуулийг уншиж, судлах,
• Эрүүл мэндийн үзлэгийг Төрийн тусгай албан хаагчдын нэгдсэн эмнэлэгийн нарийн мэргэжлийн эмч нарын комисс хийх ба ЭХО, Сүрьеэ, цээжний зураг /флюр жижиг/, Цусны дэлгэрэнгүй /элэгний үйл ажиллагаа/, Шээсний дэлгэрэнгүй шинжилгээ, ДОХ /БЗХӨ/, элэгний В, С вирус, зүрхний бичлэгийг урьдчилан Нийслэлд Төрийн тусгай албан хаагчдын нэгдсэн эмнэлэгт, орон нутагт харъяа Нэгдсэн эмнэлэгт хийлгүүлж, шинжилгээний хариуг авсан байх,

Ажлын байр /албан тушаал/-д ерөнхий болон тусгай шаардлага, “Цагдаа, дотоодын цэргийн байгууллагын төрийн тусгай албан тушаалд анх орох иргэнээс мэргэшлийн шалгалт авах журам”-ыгЦагдаагийн байгууллагын цахим хуудас www.police.gov.mn /веб сайт-Хүний нөөц-Төрийн албаны салбар зөвлөл-зарлал мэдээлэл/, “Цагдаагийн ерөнхий газрын Хэвлэл Мэдээллийн Төв” гэсэн цахим хаяг /facebook/ хаяг, орон нутгийн цагдаагийн байгууллагын цахим хаягуудад байршуулсан тул Та бүхэн танилцахын зэрэгцээ шаардлагатай тохиолдолд Хүний нөөцийн хэлтсийн 70191041, 70191043 дугаарын утсаар холбогдож лавлана уу.

Шалгалтад тэнцсэн иргэд Дотоод хэргийн их сургуульд 3 сарын дамжаанд суралцана.

Анхаарах зүйлс:

• Суралцах хугацаандаа Хууль зүйн сайдын 2015 оны А/148 дугаар тушаалаар баталсан “Хууль сахиулахын их сургуулийн дүрэм”-ийг баримтлах,
• Бусад хууль, дүрэм, журмыг чанд сахих,
• Суралцагч нь дүрэмт хувцсаар хангагдаж, хээрийн болон усанд сэлэх, мотоцикл жолоодох, бие хамгаалах урлаг гэх мэт ур чадварын сургалтад хамрагдах тул төлбөрийн зохих хэсгийг гаргахыг анхаарах,
• Хичээл сургалтын явцад шаардагдах ном, дэвтэр, үзэг, цүнх бусад хэрэглэгдэхүүнийг суралцагч хариуцах,
• Сургалтын явцад суралцагчийг дотуур байраар хангах бололцоогүй тул суралцагч өөрөө түр амьдрах байраа олж аюулгүй байдлаа хариуцна,
• Дамжаа амжилттай төгссөн иргэдийг нөөцөд бүртгэж, онооны дарааллыг харгалзан цагдаагийн байгууллагын ахлагч ажлын байр /албан тушаал/-д томилон ажиллуулна.

Монгол Улсын санхүүгийн тогтолцооны тогтвортой байдлыг хангах үндсэн чиг үүрэг бүхий Санхүүгийн тогтвортой байдлын зөвлөл нь 2019 оны 5 дугаар сарын 14-ний өдрийн ээлжит хуралдаанаараа Улсын Их Хурлын гишүүн С.Эрдэнийн санаачилсан “Зээлийн хүүгийн дээд хязгаар тогтоох болон мөнгө хүүлэлттэй тэмцэх тухай хуулийн төсөл“-ийг авч хэлэлцэн, зөвлөмж гаргалаа. Уг зөвлөмжид, зээлийн хүүгийн дээд хязгаарыг хатуу тогтоох нь санхүүгийн салбарын тогтвортой байдалд нөлөөлж болзошгүй хэмээн үзсэнээ илэрхийлсэн байна. Зөвлөмжийг Монгол Улсын Их Хурлын дарга, Эдийн засгийн байнгын хороо, Төсвийн байнгын хороо, Хууль зүйн байнгын хороо, Монгол Улсын Их Хурал дахь Монгол Ардын намын бүлэг, Монгол Улсын Их Хурал дахь Ардчилсан намын зөвлөл, Монголын банкны холбоонд тус тус албан тоот бичгээр хүргүүлээд байгаа юм.