Month: May 2019

Манай улс 10 жилд нэг удаа хүн амаа тоолдог. Энэ дагуу 2020 онд хүн ам, орон сууцны тооллого хийх ёстой.Одоогоор урьдчилсан тооллого хийж байгаа юм. Тус ажлын хэсэг өнөөдөр хуралдсан байна. Тооллогыг одоогоор аймгийн хэмжээнд зохион байгуулж байгаа. Одоогоор Хүн ам, орон сууцны улсын тооллогын комиссынхон Дорноговь аймагт ажиллаж байгаа юм байна. Ингэхдээ урьдчилсан байдлаар аймгийн комиссын гишүүдтэй уулзаж, тооллогын удирдлага зохион байгуулалт, онцлог, зорилго, ач холбогдол, арга зүйн талаар мэдээлэл өгч байгаа гэнэ. Энэ удаагийн хүн амын тооллого нь 11 дэх удаагийн ээлжит тооллого аж.

Цаг агаарын нөхцөл байдлаас шалтгаалан хаврын тариалалт хоцроод буй. Өнөөдрийн байдлаар улсын хэмжээгээр 259.6 мянган га-д үр тариа суулгажээ. Үүнээс 250.8 мянган га-д улаанбуудай, 9.6 мянган га-д төмс, 2.7 мянган га-д хүнсний ногоо, 6.2 мянган га-д тэжээлийн, 13.8 мянган га-д тосны ургамал, нийтдээ 292.1 мянган га-д тариалалт хийснээр үр тарианы тариалалтын явц 68.2 хувьтай, төмс 69.8 хувь, хүнсний ногоо 30.3 хувьтай явагдаж байна. Хаврын тариалалтад зориулан 242 аж ахуйн нэгж, иргэнд 10.3 мянган тонн үрийн буудайг 30 хувийн, 383 аж ахуйн нэгж, иргэнд 1.57 мянган тонн шатахууныг 50 хувийн урьдчилгаатай зээлээр олгожээ.

Удахгүй болох Олон улсын хүүхдийн эрхийг хамгаалах өдрийг тохиолдуулан нийслэлийн холбогдох байгууллагуудаас Хүүхдийн баярын нэгдсэн арга хэмжээг тавдугаар сарын 29, 30 болон зургадугаар сарын 1-ний өдөр зохион байгуулах гэж байна. Эдгээр өдрүүдэд ямар ямар ажлууд зохиогдох талаар холбогдох мэргэжилтнүүд өнөөдөр мэдээлэл сонсгосон юм.

НИТХ-ын тогтоолоор жил бүрийн тавдугаар сарын 29-нийг Улаанбаатар хот “Хүүхдээ сонсох өдөр” болгон зарласан. Энэ жилээс энэ арга хэмжээг илүү өргөтгөж байгаа аж. Хүүхдийг зөвхөн хүүхдийн баяраар эсвэл нэг өдөр л сонсоод өнгөрөх биш тогтмол сонсдог байя гэж эцэг, эхчүүд, багш сурган хүмүүжүүлэгчдэдээ уриалах нь өдөрлөгийн гол зорилго ажээ.

Нийслэлээс энэ жилийг эцэг, эхийн үүрэг хариуцлагыг сайжруулах жил болгоод зорилт, хөтөлбөрүүдээ ийш нь чиглүүлсэн байгаа аж. Эцэг, эхчүүд үүрэг хариуцлагаа сайжруулсан цагт хүүхдийн эрхийг зөрвсөн асуудлууд арилна гэж мэргэжилтнүүд үзэж байгаа юм байна.

Харин тавдугаар сарын 30-ны өдөр Нийслэлийн хүүхдийн төлөөх зөвлөл хуралдах юм байна. Энд өмнөх хурлаар гарсан шийдвэр, түүний хэрэгжилт болон энэ жилийн анхаарвал зохих ажлуудыг ярилцах гэнэ.

Зургадугаар сарын нэгэнд уламжлал ёсоор Сүхбаатарын талбайд хүүхдийн баярын нэгдсэн арга хэмжээ болно. Нийслэлийн соёл, урлагийн газар энэхүү арга хэмжээний ажлын хэсгийн нарийн бичгийн даргаар ажилладаг. Сүүлийн хоёр жил энэхүү нэгдсэн арга хэмжээг “Монгол хүүхдүүд” сэдвийн дор зохион байгуулж ирсэн. Энэ жил ч мөн энэ сэдвээр хүүхдийн баяраа тэмдэглэн өнгөрүүлэхээр ажиллаж байгаа юм байгаа бөгөөд Монголын хүүхэлдэйн театртай хамтарч ажиллаж байгаа. Нийт 1500 хүний бүрэлдэхүүнтэй баг бэлтгэл ажлаа хийгээд явж байна хэмээн Нийслэлийн соёл урлагийн газрын дарга Ж.Дамдинцэрэн мэдээллийн үеэр хэлж байв.

Харин Нийслэлийн цагдаагийн газраас хүүхдийн баяын арга хэмжээний үеэр хүүхдүүдийн аюулгүй байдлыг хангах үүднээс эхнээс нь авахуулаад дуусан дуустал 24 цагийн хамгаалалт авч ажиллах болно гэдгээ мэдэгдлээ. Мөн бага насны хүүхдэдээ тавих анхаарал халамжаа сайжруул, гараас нь байнга хөтөлж яваарай хэмээн анхааруулсан юм. Энэ үеэр аав, ээж асран хамгаалагчийнх нь гар утасны дугаарыг бичсэн гарын бугуйвчийг хүүхдүүдэд зүүж өгөх юм байна.

Нийслэлийн эрүүл мэндийн газраас жил бүрийн хүүхдийн баярын өдөрлөгөөр эрүүл мэндийн тусламж үйлчилгээ үзүүлэн ажилладаг. Энэ жилийн хувьд 18 эмч, эмнэлгийн ажилтан хүүхдийн баяраар ажиллахаар бэлтгэл ажлаа хангаад байгаа бөгөөд яаралтай тусламжийн хоёр цэгийг Сүхбаатарын талбайд байрлуулах аж. Мөн Үндэсний соёл амралтын хүрээлэн болон Үндэсний цэцэрлэгт хүрээлэнд эмч нар ажиллах юм байна. Тухайн өдөр +22 градусын дулаантай байх урьдчилсан мэдээ гарсан. Тиймээс хүүхдээ наршихаас хамгаалах болон баталгаагүй хүнс идүүлэхээс сэргийлээрэй хэмээн анхааруулж байлаа.

Түүнчлэн хүүхэд төөрсөн тохиолдолд асран хамгаалагчтайгаа уулзтал байлгах түр хамгаалах байрыг Сүхбаатарын талбай болон Үндэсний цэцэрлэгт хүрээлэнд байршуулах аж.

Нийслэлийн мэргэжлийн хяналтын газраас 189 байцаагчаар хүүхдийн паркийн тоглоомуудыг шалгах ажил зохион байгуулжээ.

Баярын өдөр хүүхдүүд гол дээр очиж тоглож, сэрүүцэх дуртай байдаг. Энэ үеэр эцэг эхийн хараа хяналт суларснаар хүүхдүүд амь насаа алдах тохиолдол гардаг. Иймээс энэ дээр анхаарч ажиллана хэмээн Нийслэлийн онцгой байдлаас мэдэгдсэн.

Нийслэлийн тээврийн цагдаагийн газраас иргэдийг хүүхдийн баярын өдөр аль болох нийтийн тээврээр үйлчлүүлэхийг зөвлөсөн юм. Энэ нь түгжрэл гацааг багасгах, цаашлаад хүүхдийн аюулгүй байдалд нөлөөлөх сайн талтай гэж онцолж байлаа. Учир нь энэ өдөр хүүхэд, тээврийн хэрэгсэл нь холилдоод зам ачааллаа даахаа больдог. Яг ийм үзэр аваар осол их гардаг, хохирогчид нь бага насны хүүхдүүд байдаг гэнэ. Хувийн машинаа зайлшгүй унах шаардлагатай бол жирийн үеийнхээс 10-20 км цагаар хурдаа багасгаж, замын хөдөлгөөний дүрмийн дагуу хөдөлгөөнд оролцоорой гэж анхаарууллаа.

Хүүхдийн баяр нь нэг өдөр хүслээр нь байлгаж, хоол бус хор болох амттан авч өгөх өдөр биш. Харин хүүхэд санал бодлоо чөлөөтэй илэрхийлж, эрхээ эдэлж, эцэг эхчүүд үүргээ ухамсарлаж, хариуцлагатай хандах өдөр. Хүүхдэдээ өгөх бэлгэндээ ч эрүүл хүнс, тэднийг хөгжүүлэх зүйлсийг сонгоорой хэмээн холбогдох албаныхан зөвлөж байсан юм.

А.МӨНХЗУЛ

Б.САРУУЛ

2019 оны 6 дугаар сарын 1-ний өдөр буюу “Олон улсын хүүхдийн эрхийг хамгаалах өдөр” Бямба гарагт тохиож байгаа ч бүх нийтийн баярын өдөр юм. Тиймээс энэ өдөр Монгол, Хятадын хилийн авто замын боомтууд ажиллахгүй. Харин олон улсын галт тэрэг болон нисэх онгоц хуваарийн дагуу зорчино. Мөн Сэлэнгэ аймгийн Алтанбулагийн авто замын боомт ажиллана гэж Хил Хамгаалах Ерөнхий Газраас мэдээллээ. “Хилийн боомт тэдгээрийн дэглэмийн тухай” Монгол Улс, БНХАУ-ын Засгийн газрын 2004 оны хэлэлцээрийн 4.3-т:

• Талуудын хууль ёсны баяр, амралтын өдрүүдэд хилийн боомтыг хаана.
• Төмөр замын боомт нь Талуудын хоорондын холбогдох хэлэлцээрт заасан төмөр замын цагийн хуваарийн дагуу ажиллах бөгөөд баяр, амралтын өдрүүд болон боомтын ажиллах хугацааны хязгаарлалтад хамрагдахгүй гэж заасан байдаг.

Энэ сарын 05 сарын 23-ны өдөр СХД-ийн 32 дугаар хороо, Эмээлтэд байрлах “ТМ Эко хүнс” ХХК-ийн эзэмшлийн махны үйлдвэрт гарал үүсэл нь тодорхойгүй, мэдрэхүйн үзүүлэлтээр үхсэн малынх байж болзошгүй, 20 гаран тонн үхрийн мах байсныг СХД дэх Мэргэжлийн хяналтын хэлтэс, Цагдаагийн 1 дүгээр хэлтэс, Эрүүгийн цагдаагийн газрын хамтарсан шалгалтаар илрүүлсэн. Тус махнаас 7 дээж авч Улсын Мал Эмнэлгийн Ариун Цэврийн Төв лабораторид шинжлүүлэхэд махны өнгө гүн улаан хүрэн, бага зэргийн нэгширсэн үнэртэй, махны биелэг байдал зөөлөндүү, гадаргуу дээр дарахад хонхорхой нь тэгшрэхгүй ба үхсэн болон өвчтэй малын махыг ялгах шинжилгээгээр хүнсэнд зориулан бэлтгээгүй үхэж, хорогдсон малын мах болохыг тогтоолоо. Иймд тус махыг бусад төрийн байгууллага, хөндлөнгийн гэрчийг байлцуулан устгалд оруулж, ариутгал халдваргүйтгэлийн ажил хийгдэнэ.

Ардчилсан намаас энэ сарын 30-нд зохион байгуулах “Бүх ард түмний эсэргүүцлийн жагсаал”-д Ардчилсан оюутны холбоо /АОХ/ нэгдэнэ гэдгээ мэдэгдэв.

Тэдний зүгээс “Төрөөс оюутны сургалтын төлбөрийг нэмэхгүй байхаар тогтсон ч үүнийг олон сургууль хэрэгжүүлээгүй. Ирэх жил дахиад сургалтын төлбөрийг нэмэх хандлагатай байна. Эрх баригч намын сонгуулийн мөрийн хөтөлбөрт гадаадад тэтгэлэгтэй суралцах оюутны тоог даруй хоёр дахин нэмэгдүүлнэ гэсэн ч амлалтдаа хүрээгүй. Тиймээс оюутан залуус дуу хоолойгоо илэрхийлж, энэ сарын 30-нд болох Бүх ард түмний эсэргүүцлийн жагсаалд нэгдэнэ. Жагсаалд нэгдэхийг оюутан залуустаа уриалж байна” гэлээ. АН-аас улс төрийн тэмцлийн хэлбэрт шилжиж, Д.Сүхбаатарын талбайд “Бүх ард түмний эсэргүүцлийн жагсаал”-ыг энэ сарын 30-нд зохион байгуулна хэмээн УИХ-ын гишүүн, АН-ын дарга С.Эрдэнэ энэ сарын 22-нд мэдээлсэн билээ.

Гаалийн Ерөнхий Газрын харьяа Замын-Үүд дэх гаалийн газрын гаалийн хяналтын бүсээр 2019 оны тавдугаар сарын 20-ны өдөр Монгол Улсад бүртгэлтэй “С” ХХК-ийн импортлож буй цемент дунд “полиэтиленгликолийн лав” гэх их хэмжээний химийн бодис нуусан байсныг гаалийн хяналт шалгалтаар илрүүлжээ. Тус компани 11.7 тонн химийн бодисыг гаалийн байгууллагад “цемент” гэж мэдүүлэн улсын хилээр хууль бусаар нэвтрүүлэхийг завдсан үйлдлийг шалгаж прокурорын байгууллагад шилжүүлсэн байна.