Month: May 2019

ОХУ-ын Засгийн газрын орлогч дарга, Монгол-Оросын Засгийн газар хоорондын комисс /ЗГХК/-ын Оросын хэсгийн дарга Алексей Васильевич Гордеев энэ сарын 28-30-ны өдрүүдэд Монгол Улсад айлчилж байна.

Монгол-Оросын ЗГХК-ын хуралдаанд оролцохоор ирсэн ноён А.В.Гордеев өнөөдөр Монгол Улсын Ерөнхийлөгч Х.Баттулгад бараалхав.

Уулзалтын эхэнд Монгол Улсын Ерөнхийлөгч Х.Баттулга ОХУ-ын төлөөлөгчдийг Монгол Улсад тавтай морилохыг хүсээд, манай улсыг сайн мэддэг ноён Гордеевыг хоёр улсын ЗГХК-ын Оросын талыг даргалж байгаад олзуурхууштай буйгаа илэрхийлэв.

Энэ жил Халхын голын ялалтын 80 жилийн түүхэн ой тохиож байгааг ОХУ-тай хамтран тэмдэглэх асуудлаар ОХУ-ын Ерөнхийлөгч В.В.Путинтай ярилцсан талаар Монгол Улсын Ерөнхийлөгч дурдаад, 8 сая еврогийн хөрөнгө оруулалтаар Халх гол сумыг шинэчлэх ажил үргэлжилж байгаа талаар мэдээлэл өгөв. Мөн сум дундын бүтээн байгуулалтын хүрээнд зургаан га талбайд барилгын ажил үргэлжилж байгаа тул Халхын голын ялалтын ойг хамтран тэмдэглэх буюу ОХУ-ын Ерөнхийлөгчийг Монгол Улсад айлчлах үеэр бүтээн байгуулалтын ажил дууссан байна гэлээ.

Мөн Монгол Улсад Тавантолгой-Зүүнбаян чиглэлийн 414.6 км төмөр замын бүтээн байгуулалтын ажил эхэлсэнтэй холбогдуулан “Улаанбаатар төмөр зам”-ын таваарын тээвэр 20-30 сая тонноор нэмэгдэх урьдчилсан тооцоо гарсан талаар холбогдох судалгааг танилцуулав. Энэ нь төмөр замын одоогийн нэвтрүүлэх хүчин чадлыг нэмэгдүүлэх зэргээр төмөр замын шинэчлэлийн асуудлыг зайлшгүй хөндөх учир хөрөнгө оруулалтын эх үүсвэрийн асуудлаар дэлгэрэнгүй ярилцлаа.

Тухайлбал, Монгол Улсын Ерөнхийлөгч Х.Баттулга ОХУ-ын Ерөнхийлөгч В.В.Путинтай 2018 онд тус улсын Владивосток хотод уулзах үеэрээ дээрх асуудлыг ярилцаж, төмөр замыг шинэчлэх ТЭЗҮ-ийг боловсруулсан, 100 тэрбум рублийг ОХУ-аас олгуулахаар ойлголцолд хүрсэн талаар сануулж, энэ асуудалд анхаарал хандуулахыг хүслээ.

Ноён А.В.Гордеев Монгол Улсын Ерөнхийлөгч Х.Баттулгатай дахин уулзаж байгаадаа баяртай байгаагаа илэрхийлж, Тавантолгой-Зүүнбаян чиглэлийн 414.6 км төмөр замын бүтээн байгуулалт эхэлсэн нь зууны бүтээн байгуулалт хэмээн баяр хүргэлээ. Мөн Улаанбаатар төмөр замыг шинэчлэх асуудлыг Монгол-Оросын Засгийн газар хооронд тусгайлан ярилцах зэргээр анхаарал хандуулж ажиллахаа илэрхийлсэн юм.

Мөн 100 тэрбум рублийг олгох асуудлаар ОХУ-ын тал хуралдаж, зээл олгох зарчмын шийдвэр гаргасан байна. Зээлийг ямар байдлаар олгох, юунд зарцуулах асуудлаар тодорхой шийдвэрт хүрээгүй байгаа ч Монгол Улсын Ерөнхийлөгч Х.Баттулгын үзэж буй шиг төмөр замын шинэчлэлийн ажилд зарцуулах боломжтой талаар ноён Гордеев танилцууллаа.

Уулзалтын төгсгөлд Монгол Улсын Ерөнхийлөгч Х.Баттулга ОХУ-ын төлөөлөгчдөд хандан Монгол-Оросын ЗГХК-ын хуралдаан үр дүнтэй болж, олон асуудал шийдэгдэнэ гэдэгт итгэлтэй байгаагаа хэлж, ажлын амжилт хүслээ.

Монгол Улсын Шадар сайд Ө.Энхтүвшин БНХАУ-ын Нийгмийг аюулаас хамгаалах яамны Тэргүүн дэд сайд Ван Шиао Хун тэргүүтэй төлөөлөгчдийг хүлээн авч уулзав.

Монгол Улс нь БНХАУ-тай сайн хөршийн найрсаг харилцаа, тэгш эрх, харилцан ашигтай хамтын ажиллагааг урт хугацаанд тогтвортой хэрэгжүүлэх бодлогыг тууштай баримталж ирснийг Шадар сайд тэмдэглэв. Харилцаа, хамтын ажиллагаа бүх салбарт өргөжин хөгжиж, улс төрийн итгэлцэл, харилцан ойлголцол гүнзгийрэн, Иж бүрэн стратегийн түншлэлийн харилцаа тогтоон хөгжүүлж байгаад сэтгэл хангалуун байдгаа илэрхийлэв. Мөн Монгол Улсын “Хөгжлийн зам” хөтөлбөр, БНХАУ-ын “Бүс ба зам” санаачилгыг уялдуулан хөгжүүлэх нь чухал гэж үздэгээ тодотгов. Монгол Улсын Хууль зүй, дотоод хэргийн яам, БНХАУ-ын НАХЯ хамтран гэмт хэрэг, тэр дундаа хар тамхи, хүний наймаатай тэмцэх, урьдчилан сэргийлэх чиглэлээр идэвхтэй ажиллана гэдэгт найдаж байгаагаа Шадар сайд Ө.Энхтүвшин хэлэв. Хоёр улсын, ялангуяа хууль сахиулах, аюулгүй байдлын байгууллага хоорондын харилцаа, хамтын ажиллагаа эрчимжиж байгааг БНХАУ-ын НАХЯ-ны Тэргүүн дэд сайд Ван Шиао Хун тэмдэглэв. Цаашид яамдын удирдлагуудын харилцан айлчлалын давтамжийг хадгалах, гэмт хэрэгтэй тэмцэх, мэдээлэл солилцох, хил орчмын хууль сахиулах, аюулгүй байдлын байгууллага хоорондын хамтын ажиллагааг шинэ түвшинд гаргахын төлөө ажиллахаа илэрхийлэв гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Оюутолгой ордыг ашиглах хөрөнгө оруулалтын гэрээний хэрэгжилтийг шалгаж, санал, дүгнэлт гаргах үүрэг бүхий УИХ-ын ажлын хэсгийн тайланг яг одоо УИХ-ын Эдийн засгийн байнгын хорооны хуралдаанаар хэлэлцэж байна.

УИХ-аас Оюутолгой ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах үүрэг бүхий ажлын хэсгийг өнгөрсөн оны гуравдугаар сарын 23-нд байгуулсан. Ажлын хэсгийг УИХ-ын гишүүн Д.Тэрбишдагва ахалж, дэд ахлагчаар УИХ-ын гишүүн Н.Амарзаяа, О.Баасанхүү, Б.Бат-Эрдэнэ, Б.Жавхлан, З.Нарантуяа, Я.Содбаатар, А.Ундраа нар ажилласан. Түүнчлэн ажлын хэсэгт туслалцаа үзүүлэх мэргэжлийн баг байгуулан ажиллаж, шалгалтын дүнг УИХ-д танилцуулахыг даалгасан билээ.

Ажлын хэсгийн ахлагч Д.Тэрбишдагва: “Оюутолгой компанийн татварын ачаалал Монгол Улсын татварын ачаалал тав дахин байгаа. Энгийн хувьцааг өмчлөх гэдэг үгийг хэрэглэсэн боловч “Дубай”-н гэрээгээр өмчлөх гэдгийг эзэмших гэдгээр засчээ. ТЭЗҮ-ийг эрхзүйн хувьд заавал мөрдөх баримт биш гэж “Дубай”-н гэрээнд өөрчлөлт оруулсан нь Монголын талын үр ашгийг бууруулах үндэс болжээ.

Нөөцөд суурилсан тооцооллоор Монголын талын 34 хувийн хувьцааны өр хүүгийн хамт 1.4 тэрбум ам.доллар бөгөөд ирээдүйд ногдол ашгаа суутгасаар 2039 онд нэг тэрбум ам.долларын өрийн үлдэгдэлтэй хоцорч болзошгүй байна.

Далд уурхайн санхүүжилтэд авах зээлийн барьцаанд “Оюутолгой” төслийн А лиценз, бүхий л эрхүүд, үл хөдлөх хөрөнгийг барьцаалагдахыг зөвшөөрсөн байна. Энэ нь Монгол Улсын орд, баялгийг барьцаалж авсан зээл боловч хөрөнгө оруулагчдад давхар хүү төлөхөөр болсон нь шударга бус болжээ.

Хөрөнгө оруулагч тал одоогоор Монголын талын 34 хувиас бусад “Оюутолгой” лиценз, өмч хөрөнгө, ирээдүйн мөнгө гүйлгээ зэрэг бусад зүйлийг барьцаанд тавьсан төслийг цаашид үргэлжлүүлэхэд эргэлзээ төрүүлж байна. Өөрөөр хэлбэл эрсдэл гарлаа гээд хөрөнгө оруулагч тал гарахад бэлэн байна.

Дөрвөн жилийн хугацаанд эрчим хүчний хэрэглээгээ дотоодоос хангана гэсэн гэрээ хангагдаагүй. Монголын талын хүртэх үр ашиг 31 хувь байхаар төсөөлөлтэй байна. Гэтэл хөрөнгө оруулалтын төлөвлөгөөгөөр Монголын талын хүртэх ашиг 53 хувь байхаар заасан.

“Оюутолгой” төслийн хөрөнгө оруулалтын гэрээ, хувь нийлүүлэгчдийн гэрээнд УИХ, Засгийн газрын чиглэлийг баримталж ажиллаагүй байна. Дахин тодолтгосон хувь нийлүүлэгчдийн гэрээнд нэмэлт өөрчлөлт оруулах шаардлагатай. Дубайн гэрээ холбогдох зүйл заалтыг зөрчсөн учир нягтлан судалж, хүчингүй болгох шаардлагатай гэж үзэж байна” гэлээ. Ингээд Д.Тэрбишдагва гишүүний дүгнэлтийг сонссоны дараагаар асуулт хариулт үргэлжлэв.

Монгол Улс, ОХУ, БНХАУ-ын Гадаад харилцааны дэд сайд нарын түвшний ээлжит уулзалт 2019 оны 5 дугаар сарын 28-ны өдөр Бээжин хотноо болов. Уулзалтад Монгол Улсын Гадаад харилцааны дэд сайд Б.Батцэцэг, ОХУ-ын Гадаад хэргийн орлогч сайд И.В.Моргулов, БНХАУ-ын Гадаад хэргийн дэд сайд Жан Ханьхуй нар гурван талын төлөөлөгчдийг тэргүүлж оролцов. Уулзалтад гурван улсын ГХЯ болон холбогдох бусад байгууллагын төлөөлөл оролцов. Гадаад харилцааны дэд сайд нар гурван талын транзит тээвэр, гааль, аялал жуулчлал зэрэг салбарын хамтын ажиллагаанд тодорхой ахиц гарч буйг тэмдэглэхийн зэрэгцээ хамтын ажиллагааг цаашид худалдаа, эдийн засаг, соёл, боловсрол, хүмүүнлэг зэрэг бүхий л салбарт өргөжүүлэн хөгжүүлж, бодит агуулгаар баяжуулахын тулд салбарын яамд, байгууллагууд, аж ахуйн нэгжүүдийн үйл ажиллагаанд ГХЯ-дын зүгээс идэвхтэй дэмжлэг үзүүлж ажиллахаа илэрхийлэв. Талууд 2019 оны 6 дугаар сард хийхээр төлөвлөж буй Монгол Улс, ОХУ, БНХАУ-ын Төрийн тэргүүн нарын ээлжит уулзалтын бэлтгэл, тус уулзалтын үеэр гарын үсэг зурах боломжтой баримт бичгүүдийн талаар ярилцаж, тодорхой ойлголцолд хүрэв. Гадаад харилцааны дэд сайд нар түүнчлэн бүс нутаг, олон улсын харилцааны харилцан сонирхсон асуудлаар санал солилцов.