Month: May 2019

Эрүүл мэндийн сайд Д.Сарангэрэл сүрьеэ өвчний тархалттай холбогдуулж улс төрийн жагсаал хийж Эрүүл мэндийн дэд сайд асан Ж.Амарсанаагийн зохион байгуулж буй жагсаалын талаар мэдэгдэл хийлээ.

Д.Сарангэрэл сайд мэдэгдэлдээ “Эрүүл мэндийн яамны дэргэдэх мэргэжлийн зөвлөл нь Үндэсний хэмжээнд хийсэн сүрьеэгийн тархалтын анхны судалгааг үндэслэн урьдчилан сэргийлэх үзлэг явуулж байна. Үүний үр дүнд сүрьеэгийн халдвар, өвчлөлийг эрт илрүүлэн эмчилж байна. Хэрвээ энэ үзлэгийг цаг алдалгүй зохион байгуулаагүй бол сурагчдад ямар эрсдэл учрах байсныг таашгүй. 1997 оноос хойш дахин сэргэсэн халдварт сүрьеэ өвчин дэлхий нийтийн асуудал болсон учраас 2017 онд Москва хотод сүрьеэгийн асуудлаар Эрүүл мэндийн сайд нарын Их хурал, 2018 онд НҮБ-ын Ерөнхий ассамблей түүхэндээ анх удаа сүрьеэгийн асуудлыг тусгайлан авч хэлэлцээ. Дэлхийн эрүүл мэндийн байгууллагын судалгаагаар жилд дэлхий дээр 10.8 сая хүн сүрьеэгээр өвдөж, 1.8 сая хүн нас барж байна. Үүний 45 хувь нь Энэтхэг, Орос, Хятад улсад бүртгэгджээ. Монгол Улсын Засгийн газар ч анхаарлаа хандуулж, Эрүүл мэндийн үндэсний хөтөлбөр баталсны дотор сүрьеэгийн асуудлыг онцгойлон авч үзсэн байдаг. Эрүүл мэндийн даатгалын сангаас санхүүжүүлсний дараа орон даяар анх удаа 18-34, 35-45, 46-64, 65-аас дээш насныханд дөрвөн багцаар үзлэг шинжилгээг хийж байна. Энэ дотроос сүрьеэгийн өвчлөл хамгийн их бүртгэгдэж байгаа 18-34 насны иргэдэд анхаарал хандуулж, байгаа бол ЕБС-д газар дээр нь үзлэг шинжилгээ явуулж байна. 90 сургууль хамруулахаас 24-ыг нь хамруулж, 42 тохиолдлыг илрүүлж, эмчиллээ. Эмч мэргэжилтнүүдийн нөр их хөдөлмөрийн үр дүнд сүрьеэгийн тохиолдол жил ирэх тусам буурч байна. 2012-2016 онд 4100 гаруй сүрьеэ өвчний тохиолдол бүртгэгдэж байсан бол 2016 оноос хойш эрчимтэй буурч 3400 гаруй тохиолдол бүртгэгджээ. Цаашдаа ч бодлогын үйл ажиллагааны хүрээнд эрчимтэй бууруулахын төлөө ажиллаж байна” гэлээ. Эрүүл мэндийн яамны зүгээс сүрьеэгийн эмч, мэргэжилтнүүдийн ажлын онцлог, нөхцөл байдлыг харгалзан үзэж цалинг нь 30 хувиар нэмэгдүүлжээ. Сүрьеэгийн эрт илрүүлэг хийхэд зориулж 16 рентген аппарат ашиглаж байгаа бол Засгийн газар дахин 50 аппарат авах хөрөнгийг гаргахаар болжээ. Харин энэ асуудлыг улстөржүүлж буй Эрүүл мэндийн дэд сайд асан Ж.Амарсанаа нь харин өөрийн хувийн лабораториор дамжуулан их хэмжээний мөнгө угаасан гэх баримтыг хууль хяналтын байгууллагад шалгуулахаар өгөөд буйгаа Д.Сарангэрэл сайд мэдэгдэв. Тэрбээр, энэ талаар ярихдаа “Ж.Амарсанаа таныг эрүүл мэндийн салбараар тоглож, өвчнөөр улс төр хийхээ зогсоохыг шаардаж байна. Та дэд сайд байхдаа ХӨСҮТ-ийн эмч, ажилтнуудтай хийсэн уулзалтынхаа үеэр “Та нар сүрьеэ л яриад байх юм. Элэгний С, В вирусыг ярь л даа” гэж хэлээд хурал орхиод гарч байсан протокол үлдсэн байна. Дэд сайд байхдаа сүрьеэгийн асуудлаар хуруугаа ч хөдөлгөөгүй танд салбарын нөхөд чинь тун гомдолтой байдгийг дуулгая. Таны улс төрийн ашиг сонирхлын цаана хувийн эрх ашиг тань нуугдаж байна. Таны хувийн “Хаппи Веритас” лаборатори Засгийн газрын “Элэг бүтэн Монгол” хөтөлбөрт хувь нэмрээ оруулж байгаа. Гэвч элэгний вирусын шинжилгээ сөрөг гарсан 1882 хүн, эмчилгээнд огт ороогүй 4442 хүн нийт 6324 хүнд тусламж үйлчилгээ үзүүлсэн гэх хуурамч баримтаар 700 гаруй сая төгрөг завшсан байх магадлалтай. Энийг бид хууль хяналтын байгууллагад хандсан. Иргэдийн эрүүл мэндийн эсрэг гэмт хэрэг үйлдсэн гэж үзэх үндэслэлтэй. Тиймээс хуулийн байгууллага шалгаж тогтоосны дараа бид олон нийтэд мэдээлэх болно. АН-ын Эрүүл мэндийн бодлогын зөвлөлийн даргаар эрх ашгийн зөрчилтэй, иргэдийн өвчнөөр бах таваа хангаж, бодит байдлыг гуйвуулж улс төрийн ашиг хонжоо хайж байгаад харамсаж байна” гэв.

Монгол Улсын Их Хурлын дарга Г.Занданшатар Европын сэргээн босголт, хөгжлийн банкны дэд ерөнхийлөгч, ноён Алейн Пилоу тэргүүтэй төлөөлөгчдийг хүлээн авч уулзав.

Европын сэргээн босголт, хөгжлийн банкны дэд ерөнхийлөгч Алейн Пилоу тус байгууллага Монгол Улсад идэвхтэй үйл ажиллагаа явуулаад 10 гаруй жил болж байгаа бөгөөд өнгөрсөн хугацаанд 1.4 тэрбум орчим ам.долларын хөрөнгө оруулсан. Тус банкнаас оруулж буй хөрөнгө оруулалт 100 хувь хувийн хэвшил рүү чиглэж ирсэн гэж уулзалтын эхэнд тэмдэглэв.

УИХ-ын дарга Г.Занданшатар Олон Улсын Парламентын Холбоо болон Монгол Улсын Их Хурал хамтран зохион байгуулж буй Тогтвортой хөгжлийн зорилгын хэрэгжилтийн асуудлаарх Олон Улсын Парламентын Холбооны Ази, Номхон далайн бүсийн хоёрдугаар чуулган Улаанбаатар хотноо болж буй талаар мэдээлэв.

Тэрбээр Монгол Улс эдийн засагт үүссэн хүндрэлийг богино хугацаанд даван туулж, эдийн засгийн бүтцийг төрөлжүүлэхэд Европын сэргээн босголт, хөгжлийн банктай тогтоосон хамтын ажиллагаа чухал ач холбогдол үзүүлж байгааг онцолсон юм. Уулзалтын үеэр Европын сэргээн босголт, хөгжлийн банкны дэд ерөнхийлөгч Алейн Пилоу тус банкнаас Монгол Улсад хэрэгжүүлж буй төсөл хөтөлбөрийн санхүүжилтийн талаарх дэлгэрэнгүй мэдээллийг өгөв. Европын сэргээн босголт хөгжлийн банк нь Монгол Улсад баримтлах стратеги төлөвлөгөөндөө тусгасан үндсэн чиглэлийн нэг нь олборлолтын бус буюу уул уурхайн бус салбарыг хөгжүүлэхэд чиглэж буйг онцлов. Тухайлбал, сэргээгдэх эрчим хүч үйлдвэрлэх станцууд барих, Улаанбаатар-Дархан чиглэлийн автозамын бүтээн байгуулалт, хүнсний үйлдвэрлэл, ноос ноолуур, жижиг дунд үйлдвэрлэл, банк санхүү, үйлчилгээний 100 гаруй төсөлд санхүүжилт олгожээ. Цаашид хотын хөгжлийн чиглэлд хатуу хог хаягдал боловсруулах, агаарын бохирдлыг бууруулах, нийтийн тээвэрт дэвшил гаргах, бохир ус цэвэршүүлэх байгууламжийг сайжруулах, дулаан хангамж, хот төлөвлөлтийн талаар хамтран ажиллахаар төлөвлөж байгаагаа танилцууллаа. Европын сэргээн босголт, хөгжлийн банкнаас хувийн хэвшилд оруулсан хөрөнгө оруулалтын томоохон хэсгийг Оюутолгойн хөрөнгө оруулалт эзэлдгийг ноён Алейн Пилоу дурдаад, Монгол Улсын Их Хурлаас баримталж буй бодлого чиглэлийн талаар тодруулж, асуусан юм. УИХ-ын дарга Г.Занданшатар “Миний хувийн байр суурь бол Монгол Улсын Засгийн газар болон салбарын яамны байр суурийг зөв гэж үзэж байгаа. Үүнийгээ ч Ажлын хэсгийнхэнд илэрхийлсэн. Манай талаас “Рио Тинто”-д хоёр талдаа ашигтай шийдлүүдийг санал болгосон. Гэвч тэдний тал ямар нэгэн шийдвэрт хүрэлгүй 1.5 жил болж байна. Үүнээс болж гэрээний нөхцөлийг сайжруулах талаар зөвшилцөлд хүрч чадахгүй байгаа. Бид төслийг сайжруулж үр дүнтэй болгохын тулд үйлдвэрлэл, татварын нөхцөл гээд бүх асуудлыг эв зүйгээр шийдэхийг хичээж байна. Гэрээ зөрчсөн болон татвартай холбоотой асуудлууд ч бий. Гэсэн ч “Рио Тинто” мөн л хүлээн зөвшөөрөхгүй хэвээр байгаа. Тэд ямар нэгэн шийдэл гаргаж, хариу өгвөл Монгол Улсын Засгийн газар аль аль талын ашиг сонирхлыг харгалзан, нээлттэй, эрх тэгш шийдвэрлэхэд бэлэн байгаа гэдгийг хэлье. Дэлхий ертөнц нээлттэй болсон цаг үед бидний бүх зүйл ил тод байх болно. “Рио Тинто”-гийн баримталж буй байр суурьт шүүмжлэлтэй хандаж байгаагаа илэн далангүй хэлье. Мэдээж энэ бол бизнес. Бидний зүгээс ч анхаарах ёстой асуудал бий. Эцсийн дүндээ аль аль талын эрх ашиг хамгаалагдаж, харилцан ашигтай хамтран ажиллах зарчим хэрэгжих ёстой” гэж хэлэв. Ноён Алейн Пилоу “Би таны хэлснийг зөв гэж үзэж байна. “Рио Тинто”-гийн хувьд ямар ч байсан зөвшилцөлд хүрэх нь дамжиггүй. Ямар нэг байдлаар яриа хэлэлцээр болох нь гарцаагүй. Хэрэв та бүхэнд туслалцаа хэрэгцээтэй бол бид туслахад бэлэн байна” гэв.

ОХУ-ын Засгийн газрын орлогч дарга, Монгол-Оросын Засгийн газар хоорондын комисс /ЗГХК/-ын Оросын хэсгийн дарга Алексей Васильевич Гордеев энэ сарын 28-30-ны өдрүүдэд Монгол Улсад айлчилж байна.

Уулзалтын эхэнд Монгол Улсын Ерөнхийлөгч Х.Баттулга ОХУ-ын төлөөлөгчдийг Монгол Улсад тавтай морилохыг хүсээд, манай улсыг сайн мэддэг ноён Гордеевыг хоёр улсын ЗГХК-ын Оросын талыг даргалж байгаад олзуурхууштай буйгаа илэрхийлэв.

Энэ жил Халхын голын ялалтын 80 жилийн түүхэн ой тохиож байгааг ОХУ-тай хамтран тэмдэглэх асуудлаар ОХУ-ын Ерөнхийлөгч В.В.Путинтай ярилцсан талаар Монгол Улсын Ерөнхийлөгч дурдаад, 8 сая еврогийн хөрөнгө оруулалтаар Халх гол сумыг шинэчлэх ажил үргэлжилж байгаа талаар мэдээлэл өгөв. Мөн сум дундын бүтээн байгуулалтын хүрээнд зургаан га талбайд барилгын ажил үргэлжилж байгаа тул Халхын голын ялалтын ойг хамтран тэмдэглэх буюу ОХУ-ын Ерөнхийлөгчийг Монгол Улсад айлчлах үеэр бүтээн байгуулалтын ажил дууссан байна гэлээ.

Мөн Монгол Улсад Тавантолгой-Зүүнбаян чиглэлийн 414.6 км төмөр замын бүтээн байгуулалтын ажил эхэлсэнтэй холбогдуулан “Улаанбаатар төмөр зам”-ын таваарын тээвэр 20-30 сая тонноор нэмэгдэх урьдчилсан тооцоо гарсан талаар холбогдох судалгааг танилцуулав. Энэ нь төмөр замын одоогийн нэвтрүүлэх хүчин чадлыг нэмэгдүүлэх зэргээр төмөр замын шинэчлэлийн асуудлыг зайлшгүй хөндөх учир хөрөнгө оруулалтын эх үүсвэрийн асуудлаар дэлгэрэнгүй ярилцлаа.

Тухайлбал, Монгол Улсын Ерөнхийлөгч Х.Баттулга ОХУ-ын Ерөнхийлөгч В.В.Путинтай 2018 онд тус улсын Владивосток хотод уулзах үеэрээ дээрх асуудлыг ярилцаж, төмөр замыг шинэчлэх ТЭЗҮ-ийг боловсруулсан, 100 тэрбум рублийг ОХУ-аас олгуулахаар ойлголцолд хүрсэн талаар сануулж, энэ асуудалд анхаарал хандуулахыг хүслээ.

Ноён А.В.Гордеев Монгол Улсын Ерөнхийлөгч Х.Баттулгатай дахин уулзаж байгаадаа баяртай байгаагаа илэрхийлж, Тавантолгой-Зүүнбаян чиглэлийн 414.6 км төмөр замын бүтээн байгуулалт эхэлсэн нь зууны бүтээн байгуулалт хэмээн баяр хүргэлээ. Мөн Улаанбаатар төмөр замыг шинэчлэх асуудлыг Монгол-Оросын Засгийн газар хооронд тусгайлан ярилцах зэргээр анхаарал хандуулж ажиллахаа илэрхийлсэн юм.

Мөн 100 тэрбум рублийг олгох асуудлаар ОХУ-ын тал хуралдаж, зээл олгох зарчмын шийдвэр гаргасан байна. Зээлийг ямар байдлаар олгох, юунд зарцуулах асуудлаар тодорхой шийдвэрт хүрээгүй байгаа ч Монгол Улсын Ерөнхийлөгч Х.Баттулгын үзэж буй шиг төмөр замын шинэчлэлийн ажилд зарцуулах боломжтой талаар ноён Гордеев танилцууллаа.

Уулзалтын төгсгөлд Монгол Улсын Ерөнхийлөгч Х.Баттулга ОХУ-ын төлөөлөгчдөд хандан Монгол-Оросын ЗГХК-ын хуралдаан үр дүнтэй болж, олон асуудал шийдэгдэнэ гэдэгт итгэлтэй байгаагаа хэлж, ажлын амжилт хүслээ.

Өнөөдрийн Засгийн газрын хуралдаанаар замбараагүй газар олголтын талаар хэлэлцсэн. Энэ талаар ЗГХЭГ-ын дарга Л.Оюун-Эрдэнэ сэтгүүлчдэд мэдээлэл хийлээ.

Тэрээр: “Өнөөдрийн Засгийн газрын хуралдаанаар нийслэлд замбараагүй газар олгож байгаа асуудлыг цэгцлэх асуудалд анхаарлаа хандууллаа. Аливаа төлөвлөлтгүй асуудал дээр тодорхой хэмжээний захиргааны арга хэмжээ авч байж цаашдаа урт хугацаанд ажил төлөвлөх шаардлага үүсч байгаа. Өнөөдөр Улаанбаатар хотын утаа, түгжрэлтэй холбоотой энэ асуудал ч гэсэн улстөрчдийн оролцсон замбараагүй газар олголтоос үүссэн гэж үзэхээс өөр гарц байхгүй. Тиймээс өнгөрсөн 27 жилийг бүхэлд нь дүгнэж, цэгцлэх олон асуудал гарч ирж байгаагийн нэг нь энэ газар олголтын асуудал юм. Эдгээрийг цэгцлэхгүй бол Улаанбаатар хот төлөвлөлт хийхэд туйлын хүнд байдалд орно.

Өнөөдөр яригдсан өөр нэг зүйл бол “Найрамдал” зуслангийн газартай холбоотой асуудал. Монгол Улсын Засгийн газар тогтоол гаргаж Олон улсын “Найрамдал” хүүхдийн төвийг улсын төсөвт байгууллага болгож бүтэц, чиг үүргийг шилжүүлсэн. Өөрөөр хэлбэл “Найрамдал”-ын талбай дээр 100 гаруй аж ахуйн нэгжид газар олгосон. “Найрамдал” төвийг төрийн онцгой обьект гэж үзэж болно. Энд аж ахуйн нэгжүүд бизнес эрхлэхийг дэмжилгүй яахав. Гэхдээ хүүхдийнхээ “Найрамдал” төв рүү, Улаанбаатар зочид буудлын урд талын саад руу, эсвэл Цэдэнбалын цэцэрлэгт хүрээлэн рүү ингэж орж болохгүй. Хүүхдийн парк руугаа орсон тохиолдол ч бий. Энийг цэгцэлж Улаанбаатар хотын удирдлагуудад, Барилга хот байгуулалтын сайдад, Байгаль орёин, аялал жуулчлалын сайдад өнөөдөр Засгийн газраас Ерөнхий сайд үүрэг өгсөн. Мөн энэ асуудал дээр ажиллах ажлын хэсэг байгуулж байгаа. Зарим зөвшөөрөлгүй барьсан обьектыг буулгахаас өөр аргагүй. Тэгж байд бид сургамж авна. Дэлхийд төв талбайнхаа газрыг авахаар лоббидож байсан, хүүхдийн парк руугаа, хүүхдийн зуслан руугаа орж байсан ийм уваагүй үйлдэл байхгүй. Өнгөрсөн 27 жил төлөвлөлт муутай, замбараагүй явснаа хүлээн зөвшөөрөх хэрэгтэй. ахиад ийм маягаар 25 жил явбал ундны уснаас авахуулаад нийслэл хүнд байдалд орно. тиймээс шат дараалсан арга хэмжээнүүдийг Монгол Улсын Засгийн газар авах үүрэгтэй. Энэ үүргийнхээ дагуу асуудлуудыг шийдэж байна” гэлээ.

Үүний дараа сэтгүүлчдийн асуусан асуултад хариулсан юм.