Month: April 2019

“Монгол цэргийн нэгдсэн холбоо” төрийн бус байгууллага өнөөдөр /2019.04.04/ анхдугаар хуралдаанаа Төрийн ордонд хийлээ. Тус төрийн бус байгууллага нь эх оронч үндэсний үзэл, бахархлыг хөгжүүлэн, ард түмнээ соён гэгээрүүлж, Монгол улсын тусгаар тогтнол, аюулгүй байдлын оюуны дархлаа, үнэт зүйлсийг хамгаалан бэхжүүлэх үйлсэд төр, иргэний нийгмийн байгууллагуудтай хамтран зүтгэх зорилготой бөгөөд 1000 гаруй гишүүнтэй аж.

Монголын цэрэг, хүчний байгууллагын нийт 27 төрийн бус байгууллага байдаг бөгөөд эдгээр холбоодыг нэгтгэж нийгэмд дуу хоолойгоо нэгтгэх, үндэсний аюулгүй байдлын эрх ашигт нийцүүлэх хэрэгжүүлсэн үйл ажиллагааг хэрэгжүүлэх, байр суурийг бэхжүүлэн нийгэмд үйлчилдэг төрийн болон төрийн бус байгууллагуудтай нягт хамтран ажиллах гэнэ. Мөн Монгол улсын төрийн цэргийн байгууллагуудын цэргийн жинхэнэ албан хаагчид, үндэсний аюулгүй байдлыг хангах тусгайлсан чиг үүрэгтэй байгууллагуудын ажилтан, албан хаагчид, түрүүч, байлдагчид болон иргэдийн сайн дурын үүсгэл санаачлагын байгууллага аж. Холбоо нь их хурал, бага хурал, удирдах зөвлөл тэргүүнээс бүрдэх бөгөөд төв салбар Улаанбаатарт байх бөгөөд орон нутагт салбар нэгжтэй байж болохыг дүрэмд тусгажээ. Мөн холбооны ээлжит их хурлыг зургаан жилд нэг удаа, ээлжит бус чуулганыг холбооны тэргүүний шийдвэрээр хуралдуулж болох дүрэмтэй. Тус холбоог шүүхийн шийдвэр болон гишүүдийн олонхын саналаар татан буулгах боломжтой гэнэ.

Түүнээс гадна холбоо нь гишүүдийн татвар, иргэд, аж ахуй нэгж, дэмжигч байгууллагын хандив тусламж дэмжлэг, дүрмийн зорилоо хэрэгжүүлэхтэй холбогдсон үйл ажиллагааны орлого, гадаадын хандив, тусламж, дэмжлэг, холбооны гишүүдийн татварыг Удирдах зөвлөлийн хурлаар жил бүр ялгавартай тогтоох зэргийг дүрэмдээ тусгаж өгчээ.

Ийнхүү анхдугаар хуралдаанаар холбооны дүрэм, бүтцийг баталж, Бага хурлын гишүүд болон тэргүүнээ сонгосон юм. Анхдугаар хуралдаанд нийт 950 төлөөлөгч оролцож байгаа бөгөөд хуралдаан даргалагчийн зүгээс холбооны тэргүүнд Монгол Улсын Ерөнхий сайд У.Хүрэлсүхийг нэр дэвшүүлсэн бөгөөд 100 хувийн саналаар томилов.

Нийслэлийн мэргэжлийн хяналтын газрын өнөөдрийн /2019.4.4/ хуралдаанаар Налайх дүүрэгт нүүрс олборлох тусгай зөвшөөрөл эзэмшигч аж ахуйн нэгжүүдийн тусгай зөвшөөрлийг нь цуцлах хүсэлт гаргалаа.

Налайх дүүрэгт нүүрс олборлох 22 тусгай зөвшөөрөл байгаа ажээ. Шалгалтаар 12 нь тусгай зөвшөөрөл олгогдсоноос хойш газраа ашиглаагүй байсан аж. Харин есөн тусгай зөвшөөрөл эзэмшиж буй аж ахуйн нэгж нь нүүрсний 83 ам буюу цооногт нүүрс олборлох үйл ажиллагаа ялуулж байгаа юм байна. Тэдний 70 амыг “Сүмбэрхудаг” хариуцлагатай хувьцаат компани эзэмшиж байгаа аж. Шалгалтаар тусгай зөвшөөрөл авсан ч гурван жилээс дээш хугацаанд ашиглаагүй, үйл ажиллагаа явуулж байгаа ч нөхөн сэргээлт хийгээгүй байсан нь тогтоогдсон тул НМХГ-ын хуралдаад дараах шийдвэрт хүрчээ. Нэг компанид олон тусгай зөвшөөрөл олгосон байгаа тул Засаг даргын Тамгын газарт энэ талаарх зохих арга хэмжээг авч, шаардлага хүргүүлэхээр боллоо. Мөн Налайх дүүрэгт үйл ажиллагаа явуулж буй нүүрс олборлолтын компанийн тусгай зөвшөөрлийг цуцлах хүсэлтийг Уул уурхай, хүнд үйлдвэрийн яамны Ашигт малтмалын газар, Нийслэлийн Засаг даргад хүргүүлэхээр болсон юм. Налайх дүүрэгт нүүрс олборлолтын улмаас сүүлийн 10 жилд 137 осол гарч, 274 хүн ослоос аврагдаж, 126 хүн амиа алдсан байна.

Монголын үндэсний олимпийн хороо /МҮОХ/-ны Ерөнхий нарийн бичгийн дарга Э.Бадар-Ууган Хөнгөн атлетикийн мастеруудын ДАШТ-ээс медаль хүртсэн тамирчдыг өчигдөр хүлээн авч хүндэтгэл үзүүлэн, Монголын Үндэсний Олимпын Хорооны одонг зүүж өгчээ.

Тодруулбал, Бүгд найрамдах Польш улсын Торун хотноо гуравдугаар сарын 24-30-ны өдрүүдэд Хөнгөн атлетикийн мастеруудын Дэлхийн аварга шалгаруулах тэмцээн /ДАШТ/ зохион байгуулагдсан билээ.

45, 50, 60, 70, 80, 90 насны ангиллаар дэлхийн 88 орны 500 гаруй тамирчид өрсөлдсөн тэмцээнд Монгол Улсаа төлөөлөн 13 тамирчин оролцов.

Өдгөө 85 настай иргэн Ц.Раднаа 400 метр, 60 метрийн саадтай гүйлт, гурвын харайлтын төрөлд аваргын алтан медалийг хүртэж, 400 метрт дэлхийн рекорд шинэчлэн тогтоосон бол 81 настай иргэн Т.Цэрэндолгор нь шидэлтийн таван төрлөөр 1 алт, 4 мөнгөн медаль хүртсэн юм.

Ардчилсан Намаас энэ сарын 5-ны өдөр бүх нийтийн эсэргүүцлийн жагсаал зохион байгуулах гэж байгаа талаараа өмнө нь мэдээлсэн. Энэхүү жагсаалыг Ардчилсан эмэгтэйчүүдийн холбооноос дэмжиж оролцохоо дуулгаж, мэдээлэл хийлээ.

Тус холбооноос УИХ-ын ээлжит сонгууль өнгөрөөд гурван жил өнгөрсөн ч амлалтаа биелүүлээгүй байгаа. Иймд эрх баригчдаас амлалтаа биелүүлэхийг өнөөдрөөс эхлэн шаардаж тэмцэнэ гэдгээ мэдэгдэв.

Энэ талаар тус холбооны тэргүүн С.Одончимэг хэлэхдээ, “Эдийн засаг өслөө гэж гэдэгт энэ өсөлт айл өрхүүдийн хаалгаар орсонгүй. Харин ч ядуурал нэмэгдэж байна. Мөн хүний эрхийн зөрчил маш их гарч байна. Энэ дээр хариуцлага тооцохыг шаардана. Ялангуяа хүүхэд хамгааллын асуудал дээр хүүхдийн эрхийн улсын байцаагч гэдэг албан тушаалыг бий болгосон. Тэр хүүхдийн эрхийн байцаагч нар хаана явна вэ. Тийм учраас Ардчилсан эмэгтэйчүүдийн холбоо хүний эрх, хүүхэд эмэгтэйчүүдийн эрхийн төлөө тэмцэж, хяналт тавих болно.

МАН-ын сонгуулийн мөрийн хөтөлбөрт хүүхэд, эмэгтэйчүүдтэй холбоотой асуудлыг хэрхэн тусгасныг сонирхуулъя. Тухайлбал, эх, нялхсын эндэгдлийг бууруулна, тав хүртлэх насны хүүхдийн эмийн зардлыг Эрүүл мэндийн даатгалын сангаас хариуцдаг болгоно, бага насны хүүхдийн осол эндэгдлийг хоёр дахин бууруулна, хүүхдийн мөнгийг ялгаваргүй олгоно гэсэн заалтууд байна. Эдгээр заалт биелсэнгүй. Хүүхэд бүрийг цэцэрлэгт хамруулна гэсэн ч хэрэгжсэнгүй” гэлээ.

Иймд МАН-ын энэ мөрийн хөтөлбөрт итгэж саналаа өгсөн ээжүүд, эмэгтэйчүүдийг дөрөвдүгээр сарын 5-ны жагсаалд нэгдэж, амлалтаа биелүүлэхийг шаардацгаая хэмээн уриаллаа.

Сэлэнгэ аймгийн Сүхбаатар сумын Хонгорморьт багийн “Нүхэн гүүр”-ийн урд Орхон голд иргэн О живсэн харамсалтай хэрэг гарчээ.

Тус аймгийн Онцгой байдлын газрынхан дуудлагын дагуу осолдсон газраас Хөвдөг гүүр хүртэл хоёр км газарт 8 удаа 4-5 метр гүнд шумбалт хийж, 16 км газарт усаар, голын хоёр эргээр осолдсон газраас “Мөндөлтэй хошуу” хүртэл 3 км-т 5 удаа нийт 15 км эрэн хайх ажиллагааг зохион байгуулсан боловч үр дүнд хүрээгүй байна. Тиймээс өнөөдөр 08:00 цагт эрэн хайх ажиллагааг дахин эхлүүлжээ.

Гоо сайхны хагалгаанд ороод эрүүл мэндээрээ хохирсон өчнөөн хүн байдаг. Тэгвэл ийм төрлийн хагалгаанд ороод амиа алдсан харамсалтай хэрэг гарчээ. Тодруулбал, Хан-Уул дүүргийн 15-р хорооны нутаг дэвсгэрт байрлах хувийн эмнэлэгт гуравдугаар сарын 26-ны өдөр гоо сайхны хагалгаанд орсон 29 настай эмэгтэй нас баржээ. Тэрээр өөх соруулах хагалгаанд орж байгаад зүрх нь зогсож улмаар яаралтай түргэн тусламжаар Улсын нэгдсэн нэгдүгээр эмнэлгийн Эрчимт эмчилгээний тасагт хэвтэн эмчлэгдэж байгаад дөрөвдүгээр сарын 01-ний өдөр нас барсан байна. Хэргийг Хан-Уул дүүргийн цагдаагийн нэгдүгээр хэлтэст шалгаж байгаа бөгөөд тус гоо сайхны мэс засал хийсэн эмнэлэгт шалгалт явуулж байгаа ажээ.

Гачууртын уулзвараас Налайх-Чойрын уулзвар хүртэлх 20.9 км авто замыг 2019 оны энэ сарын 15-ны өдрөөс 11 дүгээр сарын 30-ны өдрийг хүртэлх хугацаанд түр хааж, замыг шинэчлэн засахаар болсон.

Тус Замын хөдөлгөөнийг хаахтай холбогдуулан тухайн чиглэлийн авто замын хөдөлгөөнийг дараах байдлаар зохицуулах зураглал гаргасан байна. Хүнд даацын ачааны автомашин болон автобус нь Зуунмодын замаар зорчих бол бусад тээврийн хэрэгслүүд түр замаар зорчихоор зохицуулалт хийж буй тухай Тээврийн цагдаагийн албанаас мэдээлэв.

• Зүүн болон өмнөд бүсийн Хэнтий, Дорнод, Сүхбаатар, Дорноговь, Говьсүмбэр аймгууд, нийслэлийн алслагдсан Багануур, Багахангай, Налайх дүүрэг, Тэрэлж-Горхийн аялал жуулчлалын бүсээс Улаанбаатар чиглэлд хөдөлгөөнд оролцох тээврийн хэрэгслийн бүх жин нь 3.5 тн-оос дээш ачааны машин, 8-аас дээш хүний суудалтай зорчигч тээврийн хэрэгслийн хөдөлгөөнийг “Налайх, Чойрын уулзвар-дөрөвдүгээр зөрлөг-Төв аймгийн Зуунмод-Улаанбаатар”, “Улаанбаатар-Зуунмод-дөрөвдүгээр зөрлөг-Налайх, Чойрын уулзвар” гэсэн чиглэлээр явуулахаар болов.
• Нийт жин нь 3.5 тн-оос дээш ачааны автомашин болон 8-аас дээш хүний суудалтай зорчигч тээврийн хэрэгслээс бусад тээврийн хэрэгслүүд Гачууртын уулзвараас-Налайх, Чойрын уулзвар хүртэлх чиглэлд гаргасан түр замаар зорчино.

Тээврийн цагдаагийн албанаас автозамын барилгын ажлыг гүйцэтгэх ажилтай холбогдуулан дээрх чиглэлүүдийн автозамын хөдөлгөөний аюулгүй байдлыг ханган ажиллана. Иргэд мэдээлэх самбар, тэмдэг, тэмдэглэлийн дагуу хөдөлгөөнд оролцохыг зөвлөж байгаа юм.