Month: March 2019

Говийн нутгийн зүүн, зүүн аймгуудын нутгийн өмнөд хэсгээр өчигдрөөс /2019.03.19/ эхлэн цасан шуурга шуурга шуурч, ихэнх нутгаар хүйтэн хоножээ. Өнөөдрийн байдлаар баруун аймгууд руу явах зам халтиргаа гулгаа ихтэй, хоёр өдөр цас орсон тул замын нөхцөл байдал сайнгүй байгаа аж.

Цагдаагийн ерөнхий газрын Мэдээлэл, дүн шинжилгээ, шуурхай удирдлагын албанаас улсын хэмжээнд цагдаагийн байгууллагад бүртгэгдсэн гэмт хэрэг, зөрчлийн нөхцөл байдлын статистик үзүүлэлтүүдийг нэгтгэн “Монгол Улсад бүртгэгдсэн гэмт хэрэг, зөрчлийн нөхцөл байдал” товхимлыг жил бүр эрхлэн гаргадаг билээ.

“Монгол Улсад бүртгэгдсэн гэмт хэрэг, зөрчлийн нөхцөл байдал-2018” товхимолд 2018 онд улсын хэмжээнд бүртгэгдсэн гэмт хэрэг, зөрчлийн нөхцөл байдлыг нийслэл, орон нутаг, тодорхой төрлийн гэмт хэрэг, зарим төрлийн гэмт хэргийн онцлог, шалтгаан нөхцөл, гэмт хэрэгт холбогдсон хүний онцлогоор нь тус тус гаргажээ. Мөн 10000 хүнд ногдох гэмт хэргийн түвшин, урьдчилан сэргийлэх чиглэлээр хүргүүлэх зөвлөмжийг бэлтгэж, хэвлүүлэн олны хүртээл болгосон байна.

Цагдаа, дотоодын цэргийн Сургалтын нэгдсэн төвийн сургалтын баг “Иргэний болон харуул хамгаалалтын зориулалттай галт зэвсэг эзэмших, ашиглах, хадгалах аюулгүй ажиллагааны сургалт”-ыг Багануур дүүрэг, Төв аймгийн Эрдэнэ сумын иргэдэд зохион байгуулж байна.

Энэ удаагийн сургалтыг иргэдэд ойртуулж сум, дүүрэгт нь зохион байгуулж, галт зэвсгийн бүтэц, аюулгүй ажиллагаа, сэтгэлзүйн бэлтгэлжилт, эмнэлгийн анхан шатны тусламж, хадгалалт хамгаалалт, ашиглалтын талаарх мэдлэг, ур чадварыг олгож байгаагаар онцлогтой.

Мөн сургалтын үеэр бүртгэлгүй галт зэвсгийг бүртгэлжүүлэх, галт зэвсгээр үйлдэгдэх гэмт хэргээс урьдчилан сэргийлэх ач холбогдол бүхий сургалт юм.

Орон нутгийн нислэг өссөнтэй холбоотойгоор шатахуун тээвэрлэлт нэмэгдэж байгаа гэдгийг Газрын тусгай үйлчилгээний алба/ГТҮА/-ны дарга С.Чинзориг тус албан дээр болсон Үйлдвэрлэлийн шуурхай зөвлөгөөнд танилцуулга хийхдээ онцоллоо.

Өнгөрсөн онд хоёр алба болж салсан боловч ажлын уялдаа холбоог сайжруулж, давхардлыг арилгах үүднээс буцаан нэгтгэж нэг алба болгосон ГТҮА нь ИНЕГ-ын хэмжээнд ашиглагдаж буй 16 орны 35 үйлдвэрийн 95 маркийн 312 автомашин, механизм, төхөөрөмж, тэргэнцэр, чиргүүлийн үйлчилгээний бэлэн байдлыг хариуцан ажиллаж байна.

ГТҮА нь агаарын хөлгийн газрын үйлчилгээ, аэродромын цэвэрлэгээ, үйлчилгээ, автотээврийн үйлчилгээ, шатахуун хангамж, тээврийн үйлчилгээ, техникийн үйлчилгээ, засварын ажлыг хариуцан ажилладаг ба нэгэн зэрэг 4-5 агаарын хөлөгт газрын үйлчилгээ үзүүлэх боломжтой юм. Гадаад дотоодын агаарын тээвэрлэгч нарын агаарын хөлөгт газрын тусгай зориулалтын техникийн үйлчилгээ үзүүлэхийн зэрэгцээ Буянт-Ухаа дахь нисэх буудал болон Хөшигийн хөндий дэх шинэ нисэх буудал руу ажилчдыг тус бүр 4 чиглэлээр нийтийн тээвийн үйлчилгээ үзүүлж байна.

Ойрын өдрүүдэд нийт нутгаар цаг агаар хүйтрэхтэй холбоотойгоор нисэх буудлуудын техник хэрэгслийн бэлэн байдлыг хангаж ажиллахыг Үйлдвэрлэлийн шуурхайгаас үүрэг болголоо.

Онцгой байдлын ерөнхий газар, Гамшиг судалын хүрээлэнгээс Улсын нөөц, хүмүүнлэгийн тусламжийн анги, салбар, цэгийн агрономич, Гамшиг судлалын хүрээлэнгийн Нөөц судлалын төвийн сорт сорилтын байнгын ажиллагаатай ажлын хэсгийн алба хаагчдад сорт сорилтын арга зүйн мэдлэг мэдээлэл өгч, практик дадлагын туршилт хийх сургалтыг зохион байгуулж байна.

ОБЕГ-ын тэргүүн дэд дарга, бригадын генерал Г.Ариунбуян тус сургалтыг нээж хэлсэн үгэндээ “ОБЕГ-ын дэргэдэх Гамшиг судлалын хүрээлэнгийн Нөөц судлалын төв 2018 оноос эхлэн Монгол Улсын стратегийн гол бүтээгдэхүүн болох хөдөө аж ахуйн тарималын сортыг судалж, шинжлэх, түүнийг илрүүлэх замаар гал тэсвэртэй сортыг бий болгох зорилт дэвшүүлэн ажиллаж байна. Байгаль, цаг уурын эрсдэл бүхий манай орны хувьд галд тэсвэртэй таримал ургамлын сорт сорт маш чухал юм. Тиймээс энэ сургалтыг маш чухал ач холбогдолтой сургалт болно гэдэгт итгэлтэй байна” гэв.

Сургалтад хамрагдсан агрономич, мэргэжилтнүүд хамтран шинэ сортын сорилын арга зүйг боловсруулах юм.

Түүнчлэн энэ жил өнгөрсөн жилийн долоон сортыг сорьж үзэхээс гадна гадаадаас үр авчирч сорьж үзэхээр төлөвлөж байгаа юм байна. Ингэхдээ усалгаатай болон усалгаагүй сортыг сорьж үзэх, шинээр гаргаж авсан сортоо үржүүлэх зэрэг олон чухал судалгаа шинжилгээний ажил хүлээж байгааг доктор, профессор П.Даш онцоллоо гэж Онцгой байдлын ерөнхий газраас мэдээллээ.

Он гарсаар улсын хэмжээнд өнөөдрийн байдлаар нийт 1222 удаагийн ахуйн гал түймэр гарч, түймрийн улмаас 17 хүн амь насаа алджээ. Үүний 11 нь том хүн 6 нь хүүхэд байгаа юм.

Гал түймрийн шалтгаан нөхцөл нь айл, өрхүүдэд ашиглагдаж байгаа пийшин, зуухны гэмтэл, хэт галлагаа, ил задгай асгасан цогтой үнс нурам, хараа хяналтгүй орхисон бага насны хүүхэд, иргэдийн болгоомжгүй үйл ажиллагаа, зориулалтын бус цахилгааны утасны ашиглалт, цахилгаан хэлхээний хэт ачаалал зэрэг хувь хүний санамсар болгоомжгүй байдлаас үүдэж байна.

Иймд:

-Бага насны хүүхдийг хараа хяналтгүй гэрт нь цоожилж үлдээхгүй байх, пийшин, зуух яндангийн эвдрэл гэмтлийг засч, хүүхэд хүрч, түлэгдэх, гэмтэхээс сэргийлэх, цахилгааны утас, залгуур, ил гарах зүйлс, шатах, тослох материалыг бага насны хүүхдээс хол байлгах,

-Халуун үнс нурам, галтай хог хаягдлыг хогийн ил цэгт хаяхгүй байх, шингэрүүлсэн шатдаг хийгээр болон цахилгаанаар ажилладаг тулга, зуухыг ашиглахдаа аюулгүй ажиллагааны дүрэм, журмыг баримтлах,

-Пийшин, зуухны янданг дээврийн гадаргуугаас 50 см-ээс багагүй өндөртэйгээр гаргах, дээвэр таазнаас яндан хүртэл 50 см-ээс багагүй зайтай байх, пийшин зуух нь хананаас 1,25 см-ээс багагүй зайтай байх бөгөөд галлагааны амны өмнө 70х50 см-ийн металл хуудас, төмөр байрлуулах,

-Цахилгаан халаагуур, халаагчийг ашиглахдаа цахилгаан ашиглалтын дүрэм, журмыг мөрдөх, аюулгүй ажиллагааны заавар, зааварчилгаа авах, мэргэжлийн цахилгаанчаар холбуулах, холбогдох байгууллагаас өгч байгаа заавар, зөвлөмжийг дагаж мөрдөх,

-Гарааш, ил зогсоолд автомашинаа байрлуулахдаа галын аюулгүйн зайн хэмжээг баримтлах,

-Аж ахуй, нэгж байгууллагууд барилга байгууламжийн галын аюулгүй байдал, гал унтраах автомат тоног төхөөрөмж, дохиолол, гал унтраах анхан шатны багаж хэрэгслийн бэлэн байдлыг хангаж, хяналтын камер, харуул хамгаалалтыг сайжруулах, яаралтай үед холбогдох утасны дугаар жагсаалтыг тодотгох,

-Гал унтраах тусгай зориулалтын автомашин хүрэлцэн очих зам, гарц, барилга байгууламжийн авралтын зам, гарцыг чөлөөтэй байлгахыг Онцгой байдлын ерөнхий газраас анхааруулж байна.

Гэмт хэргээс урьдчилан сэргийлж, хууль хэрэгжүүлэх чиг үүрэгтэй цагдаагийн алба хаагчид хүн мөргөж, хүний эрдэнэт аминд хүрсэн тохиолдол удаа дараа гарч байна.

Тухайлбал, Чингэлтэй дүүргийн 12 дугаар хорооны нутаг дэвсгэрт байрлах 17 авто угаалгын төвийн зүүн замд авто осол гарчээ. Тодруулбал “Toyoto Alphard” загварын машины жолооч согтуугаар тээврийн хэрэгсэл жолоодож, замын хөдөлгөөнд оролцож байх үедээ 67 настай эрэгтэй Б-г мөргөж хүнд гэмтэл учруулсан байна. Тэрээр дээрх ослыг гаргасан жолооч нь Чингэлтэй дүүргийн цагдаагийн хоёрдугаар хэлтсийн ахлах мэргэжилтэн эмэгтэй Б байсан нь хэргийн газар очиход тогтоогджээ.

М.САЙНЗАЯА