Month: March 2019

СЭМҮТ-ийн эмч, мэргэжилтнүүд 2019 оны гуравдугаар сарын 19-нд Дархан-Уул аймгийн ЭМГ-ын хүсэлтээр “Өсвөр үеийн сэтгэцийн эрүүл мэнд” сэдэвт сургалт хийлээ. Сургалтанд тус аймгийн Өрхийн эрүүл мэндийн төвийн эмч, цэцэрлэг, сургуулийн эмч, багш, нийгмийн ажилтан, сэтгэлзүйч нийтдээ 70 гаруй хүн хамрагдсан.

Сургалтын агуулгад Сэтгэцийн эрүүл мэндийн тухай ойлголт, хүүхэд-өсвөр үеийн насны онцлог, сэтгэл зүйн хөгжил, донтох эмгэгт хүргэж буй сэтгэцийн тулгамдсан асуудлууд багтсан бөгөөд сургалтанд хамрагдагсдад “Өсвөр үеийнхэнд үзүүлэх сэтгэцийн эрүүл мэндийн тусламж үйлчилгээ” гарын авлага 100 ширхэгийг тараасан.

Эрүүл мэндийн тусламж үйлчилгээний хүртээмж хангалтгүй байгаа төвөөс алслагдсан болон эмзэг бүлгийн хүн амд сум, өрхийн эмч мэргэжилтнүүдээр дамжуулан хүргэж байгаа эрүүл мэндийн тусламж үйлчилгээний төрөл, хэлбэрийг өргөжүүлэх хэрэгцээ шаардлага нь “Эрүүл мэндийн анхан шатны тусламж, үйлчилгээнд мобайл технологийн хэрэглээг өргөжүүлэх нь“ төслийг хэрэгжүүлэх үндэслэл болсон юм. Төслийн гол зорилго нь: Эрүүл мэндийн анхан шатны тусламж, үйлчилгээний чанар, хүртээмжийг нэмэгдүүлэх замаар ялангуяа эмзэг бүлгийн хүн ам болон орон нутгийн газар зүйн байдлаас үүдэн тусламж, үйлчилгээнээс орхигдох магадлалтай иргэдэд хүрч очин, цогц тусламж, үйлчилгээ үзүүлэх юм.

Эрүүл мэндийн яам, Дэлхийн эрүүл мэндийн байгууллага хамтран Солонгосын олон улсын эрүүл мэндийн сан болон Солонгосын иргэдийн сангийн санхүүжилтээр “Эрүүл мэндийн анхан шатны тусламж үйлчилгээнд болон олон нийтийн түвшинд мобайл технологийг нэвтрүүлэх нь” туршилтын төслийг 2016 онд Өмнөговь аймгийн 3 сум, Сонгинохайрхан дүүргийн 2 хороонд амжилттай хэрэгжүүлсэн.

Одоо ДЭМБ-ын санхүүгийн болон техникийн дэмжлэгтэйгээр 2019 онд уг төслийг хэрэгжүүлэх 9 аймгийн 12 сум, нийслэлийн 2 дүүргийн 2 хорооны өрхийн эрүүл мэндийн төвийн нийт 60 эмч, мэргэжилтэнг 7 хоногийн сургалтад хамруулж, мобайл тоног төхөөрөмж болох зөөврийн зүрхний цахилгаан бичлэгийн аппарат, зөөврийн ЭХО, цусны даралт хэмжигч аппарат, сахар, холестрол хэмжигч, 4 төрлийн хурдавчилсан оношлуур, шинжилгээ авахад хэрэглэгдэх эмнэлгийн хэрэгсэл, Samsung tablet 28 Ipad 1 зэрэг тоног төхөөрөмжөөр хангаад байна.

Мөн 2019 оны 4-5 дугаар сард Солонгосын олон улсын эрүүл мэндийн сангийн санхүүжилтээр 4 аймгийн 4 сум, нийслэлийн 2 дүүргийн 2 өрхийн эрүүл мэндийн төвд тус төслийг хэрэгжүүлнэ. Ингэснээр төслийн хүрээнд 21 аймаг, нийслэлийн 9 дүүрэгт бүрт 1-3 анхан шатны нэгжид төсөл хэрэгжиж байгаа юм.

Эрүүл мэндийн анхан шатны тусламж үйлчилгээний чанар, хүртээмжийг сайжруулах, шатлал хоорондын зохицуулалтыг боловсронгуй болгох замаар Дэлхийн эрүүл мэндийн байгууллагын зөвлөмж болгож байгаа “Хэнийг ч орхигдуулахгүй байх” зарчмыг баримтлан “Бүх нийтийн эрүүл мэндийн хамралт”-ыг хэрэгжүүлж, “Хүн төвтэй тусламж үйлчилгээний цогц загвар”-ыг бий болгохыг ЭМЯ-аас зорин ажиллаж байна.

Баянзүрх дүүргийн 53 дугаар сургуулийн 480 хүүхдийн хүчин чадалтай өргөтгөлийн барилгын шав тавих ёслолын үйл ажиллагаа өнөөдөр боллоо. Сургуулийн өргөтгөл ашиглалтад орсноор 3 ээлжээс бүрэн гарах нөхцөл бололцоо бүрдэж байна.

Сургуулийн шав тавих ёслолын арга хэмжээнд монголын талаас БСШУСЯ-ны Төрийн нарийн бичгийн дарга Б.Баярсайхан, Нийслэлийн нийгмийн хөгжлийн асуудал хариуцсан төслүүдийн удирдагч-Нийслэлийн Засаг даргын орлогч Ш.Анхмаа, БСШУСЯ-ны Санхүү, хөрөнгө оруулалтын дарга С.Нансалмаа, нийслэлийн Боловсролын газрын дарга Ж.Гантулга, НИТХ-ын төлөөлөгч Б.Сүхбаатар, Япон Улсаас Монгол Улсад суугаа Элчин сайд Масато Такаока, Япон Улсаас Монгол Улсад суугаа Элчин сайдын яамны гуравдугаар нарийн бичгийн дарга Томоюуки Мацухаши, Жайкагийн Монгол дахь төлөөлөгчийн газрын дарга хатагтай Эрико Тамура болон бусад албаны хүмүүс оролцлоо.

Япон улсын Засгийн газрын буцалтгүй тусламжийн хөрөнгөөр “Бага боловсролын барилга, тоног төхөөрөмжийг сайжруулах” төслийн нэгдүгээр шат 1999-2002 онд, хоёрдугаар шат 2003-2007 онд, гуравдугаар шат нь 2004-2008 онд, дөрөвдүгээр шатны үйл ажиллагаа нь 2009-2013 онд хэрэгжиж дууссан. Дээрх 4 үе шаттай төслийн хүрээнд Улаанбаатар хотод нийт 45 сургууль болон сургуулийн өргөтгөлийг шинээр барьж, ашиглалтад оруулсан.

Мөн Япон Улсын “Жайка” олон улсын байгууллага 2017 оны 1 дүгээр сараас “Улаанбаатар хотын бага дунд боловсролын сургуулийн барилга байгууламжийг сайжруулах” төслийн судалгааны ажлыг гүйцэтгэж, 2017 оны 11 дүгээр сарын 30-ны өдөр Монгол улсын Засгийн газар, “Жайка” олон улсын байгууллага төслийг хэрэгжүүлэх гэрээнд гарын үсэг зурсан.

Төслийн хүрээнд Япон Улсын Засгийн газрын буцалтгүй тусламжаар нийслэлд 2 сургууль, 2 өргөтгөлийн барилга угсралтын ажлыг эхлүүлээд байна. Үүнд:

Сүрьеэтэй тэмцэх дэлхийн өдөрт зориулсан “Сүрьеэгүй Улаанбаатар” өдөрлөг энэ сарын 25-нд Монголын хүүхдийн ордонд амжилттай зохион байгуулагдлаа. Энэ хүрээнд ЕБС-ийн сурагчдын дунд зарласан “Сүрьеэ өвчин миний нүдээр” гар зургийн уралдаан, “Сүрьеэгүй нийгмийг бүтээхэд иргэдийн оролцоо” зохион бичлэгийн уралдаанд нийт 300-гаад бүтээл ирсэн бөгөөд шилдэг 50 бүтээлээр үзэсгэлэн дэлгэсэн юм.

Мөн шалгарсан бүтээлийн эздэд Нийслэлийн Хүүхэд, гэр бүлийн хөгжлийн газрын дарга Ө.Ган-Өлзий, Нийслэлийн Эрүүл мэндийн газрын Нийгмийн эрүүл мэндийн хэлтсийн дарга О.Энхзаяа, Монголын хүүхдийн ордны дарга Б.Цэнгэлмаа, “Глобал лаб” ХХК-ийн захирал С.Ананд, “Монголын эрүүл мэндийн үүсгэл” байгууллагын гадаад харилцаа, олон нийт хариуцсан захирал Ц.Энхжаргал нар гардуулж өглөө.

ЭССЭ БИЧЛЭГИЙН УРАЛДААНД ТЭРГҮҮЛСЭН СУРАГЧИД:

I байр – У.Элбэгзаяа – Ирээдүй цогцолбор нэгдүгээр ахлах сургууль

II байр – А.Наранцацралт – 11 дүгээр сургууль

III байр – Ө.Шинэчимэг – Эрдмийн өргөө цогцолбор

ТУСГАЙ БАЙР :

М. Тэргэл, Багануур дүүрэг, Нийслэлийн лаборатори боловсрол цогцолбор сургууль

ГАР ЗУРГИЙН УРАЛДААНД ТЭРГҮҮЛСЭН СУРАГЧИД:

I байр – О. Явуу, 4 дүгээр сургуулийн 10б анги

II байр – Б. Дуламсүрэн, Ирээдүй цогцолбор нэгдүгээр ахлах сургуулийн 9е анги

III байр –А. Анар, 79 дүгээр сургуулийн 7б анги

ТУСГАЙ БАЙР:

А. Жаргалан, Ирээдүй цогцолбор нэгдүгээр ахлах сургуулийн 9е анги

Х. Халиун, 84 дүгээр сургуулийн 5 анги

Энэ өдөр АШУҮИС-ийн оюутан залуус сүрьеэ өвчин, түүнээс урьдчилан сэргийлэх видео контентуудыг танилцуулсан бөгөөд сурагчдад сүрьеэгийн талаар мэдээлэл олгох өртөөг зохион байгуулж, эрүүл амьдрах хэв маяг, дасгал хөдөлгөөний ач холбогдлыг сурталчилсан флаш моб хийлээ. Мөн ХӨСҮТ-ийн тэргүүлэх зэргийн их эмч П.Янжиндулам үрьеэ өвчнөөс өөрийгөө болон гэр бүлээ хэрхэн хамгаалах, энэ өвчний талаар иргэн хүний зайлшгүй мэдэх ёстой зүйлсийн талаар мэдээлэл өгөв.

Тус өдөрлөгийг Нийслэлийн Хүүхэд, гэр бүл хөгжлийн газар, Нийслэлийн Эрүүл мэндийн газар, Монголын хүүхдийн ордон, Нийслэлийн Боловсролын газар, “Монголын эрүүл мэндийн үүсгэл” НҮТББ /MHI/, Анагаахын шинжлэх ухааны үндэсний их сургууль, Халдварт өвчин судлалын үндэсний төв, Нийгмийн эрүүл мэндийн үндэсний төв, “Хүүхдийн эрх, хамгаалал, хөгжлийн төв” ТББ, “Глобал лаб”, “Unitel” группээс хамтран зохион байгуулсан юм.

“Эрүүл амьдралын үндэс нь урьдчилан сэргийлэлт” гэж үздэг XXI зуунд ч урьдчилан сэргийлж, эдгэрэх боломжтой сүрьеэ өвчнөөр хүмүүс нас барсаар байна. Угтаа бол иргэн бүр энэ өвчнөөс өөрийгөө болоод хайртай дотны хүмүүсээ хамгаалж чадна. Иймээс энэ жилийн сүрьеэтэй тэмцэх өдрийг дэлхий даяар “Цаг нь болсон!” уриатайгаар тэмдэглэн өнгөрүүлж байгаа төдийгүй сүрьеэ өвчнийг устгах амлалтаа биелүүлж, урьдчилан сэргийлэх ажлаа эрчимжүүлж хамтдаа тэмцэх цаг нь болсон гэдгийг илэрхийлж байна.

Идэвхитэй илрүүлэг, эмчилгээ, үйл ажиллагааны үр дүнд 2000-2015 оны байдлаар нас баралт 22 хувиар буурсан боловч цаашид энэ тоог 2020 онд 35 хувь, 2035 онд 95 хувиар, шинэ тохиолдлыг 90 хувиар бууруулах зорилтыг дэвшүүлсэн юм.

Дашрамд дуулгахад, сүрьеэгээр өвдсөн хойно нь биш өвдөхөөс өмнө урьдчилан сэргийлэх нь эдийн засаг, эрүүл мэндийн хувьд чухал ач холбогдолтой болохыг дэлхий нийтээрээ ойлгон хэрэгжүүлж байна. Үүний нэг жишээ нь Нийслэлийн Эрүүл мэндийн газар, Харвардын их сургуулийн судалгааны нэгж болох “Монголын эрүүл мэндийн үүсгэл” ТББ-аас хамтран санаачилсан “Сүрьеэгүй Улаанбаатар” хөтөлбөр юм.

Анх 2012 онд Харвардын эрдэмтэн судлаачид болон нийгмийн эрүүл мэндийн нөлөө бүхий манлайлагчид Дубай хотноо цугларч, хүн төрөлхтөн сүрьеэ өвчинтэй одоогийн байдлаар үргэлжлүүлэн тэмцвэл 200 жилийн дараа л өнөөгийн Америкийн түвшинд хүрнэ. Тиймээс энэ өвчнийг үндсээр нь устгах зорилготой “Zero TB Cities Initiative” буюу СҮРЬЕЭГ ТЭГЛЭХ хотуудын санаачилгыг гаргасан. Энэ санаачилгын гол зорилго нь ИЛРҮҮЛ, ЭМЧИЛ, СЭРГИЙЛ гэсэн нотолгоонд суурилсан цогц аргачлал бүхий, сүрьеэгээс шалтгаалсан нас баралтыг ТЭГЛЭХ, хүн амыг мэдээ мэдээллээр хангаж, сүрьеэгийн ялгаварлан гадуурхалт болон энэ өвчнөөс айж, ичих байдлыг үгүй болгох, сүрьеэгийн халдварын гинжин хэлхээг таслан зогсоох явдал юм.

Манай улсын нийслэлд нийт сүрьеэгийн бүртгэгдэж байгаа тохиолдлын 50 гаруй хувь, улсын хэмжээнд бүртгэгдсэн тохиолдлын 30 хувийг Сонгинохайрхан, Баянзүрх дүүргийн өвчлөл эзэлж байна. Мөн төвийн 6 дүүрэг Нийслэлийн өвчлөлийн 95 хувь, улсын өвчлөлийн 57 хувийг бүрдүүлж байгаа тул эдгээр дүүргийн өвчлөлд онцгой анхаарал хандуулж, арга хэмжээ авч чадвал Монгол Улсын хэмжээнд сүрьеэг хазаарлахад тодорхой амжилт олох боломжтой юм.

Гуравхан сая хүн амтай, хүн амын талаас илүү нь нийслэл хотдоо оршин суудаг, эрүүл мэндийн харьцангуй сайн тогтолцоотой манай улсын хувьд “Сүрьеэгүй Улаанбаатар” цаашлаад “Сүрьеэгүй Монгол” улсыг бий болгох бүрэн боломжтой. Хүн төрөлхтөн үүссэн цагаас бидэнтэй хамт байсаар ирсэн, хөгжлийг хойш нь татагч цагаан тахал гэгддэг энэ өвчинтэй бага балчир гэлтгүй хүн нэг бүр тэмцэх ЦАГ НЬ БОЛСОН!

Монгол улсад интернет хэрэглэгчдийн тоо 2012 онд дөнгөж 654 мянга байсан бол 2018 онд 3.1 саяд хүрч 4.5 дахин нэмэгдсэн судалгаа байна.

Монгол Улс өнөөдөр фэйсбүүк хэрэглээгээрээ Азидаа нэгд, дэлхийд 10 дугаар байрт жагсаж байгаа нь иргэдийн цахим хэрэглээхэрхэн өргөжсөнийг харуулж байна.

Энэхүү цахим хэрэглээг даган цахим орчин дахь хууль бус үйлдлүүд /бусдын нэр хүндийг санаатайгаар, үндэслэлгүй гутаан доромжлох, иргэд, хэрэглэгчдийг төөрөгдүүлэх, хууран мэхлэх явдал/ ихээр гарах болсонтой холбогдуулан Хэрэглэгч таны мэдлэгт дараах мэдээллийг хүргэж байна.

Үүнд:

-Сошиал медиагийн шинэ найзаа яаж таних вэ?

-Таны хүүхэд цахим орчинд

-Хүүхдийн дэлгэц ашиглах тохиромжтой хугацаа

-Цахилгаан соронзон орон хүний эрүүл мэндэд сөрөг нөлөөтэй юу?

Эцэг, эхчүүд, хэрэглэгч Та бүхэн цахим орчин дахь хууль бус үйлдэл, болзошгүй эрсдлээс өөрийгөө болон хүүхэд, багачуудаа хамгаалж цахим орчны зөв, соёлтой хэрэглээг хэвшүүлэхийг зөвлөж байна.