Month: January 2019

Иргэд та бүхэн автомашины хулгайн гэмт хэргээс урьдчилан сэргийлээрэй!!!

БНСУ-ын Хууль зүйн яамны харьяа Цагаачлалын албанаас 2018 оны 10 дугаар сарын 1-нээс 2019 оны 3 дугаар сарын 31-ний өдөр хүртэл оршин суух хугацааг хэтрүүлэн хууль бусаар оршин суугаа гадаадын иргэдэд өршөөлийн аян өрнүүлж байна.

Сайн дураар нутаг буцах аянд хамрагдах давуу тал:

Визний хугацаагаа хэтрүүлэн хууль бусаар оршин суугч гадаадын иргэд БНСУ-ын хилээр орж ирэх хоригоос чөлөөлнө.

Хууль бусаар оршин сууж байсан гадаадын иргэн ба ажил олгогчид хүлээлгэх хуулийн хариуцлагаас чөлөөлнө.

Түр саатуулах байранд хорихгүйгээр чөлөөтэй хилээр буцаана.

Эх орондоо буцсаны дараа БНСУ-ын ЭСЯ-наас холбогдох визийг журмын дагуу авч дахин тус улсад ирэх боломжтой. /Өөр хүний бичиг баримтаар орж ирсэн иргэдэд энэхүү өршөөл үйлчилнэ. Харин гэмт хэрэгт холбогдсон гадаадын иргэдэд өршөөл үйлчлэхгүй/

Хэрхэн сайн дураар эх орондоо буцах вэ?

Бусад дэлгэрэнгүй мэдээллийг Гадаад иргэдийн мэдээллийн нэгдсэн лавлах болох 1345, мөн цагаачлалын албаны бусад бүх газар нэгжээс тодруулах боломжтой.

Монгол түмний уламжлалт сар шинийн баяр болж байгаатай холбогдуулан галт тэргээр зорчигчдын тоо сүүлийн өдрүүдэд эрс нэмэгдэж байна. Учир нь баярын ширээг чимэх хүнсний бүтээгдэхүүн болон бэлэгний төрлийн бараа ихээр оруулж ирэхээр иргэд БНХАУ-ын Эрээн хот, Бээжин рүү зорьж байгаа юм. Мөн өмнөх жилүүдэд галт тэрэгний билет шаглах наймаа иргэдийг ихээр хохироож байсан. Шагын буюу иргэний гар дээрээс авсан билет нь галт тэргэнд хүчин төгөлдөр үйлчлэхгүй. Учир нь вагоноор зорчих билет авахдаа тухайн иргэн заавал өөрийн иргэний үнэмлэхээр авсан байх шаардлагатай байдаг бөгөөд эргээд зорчихдоо мөн л иргэний үнэмлэхээ шалгуулдаг. Энэ байдлыг иргэд төдийлөн сайн мэдэхгүй байгаагаас болж билет шаглаж буй иргэдээс худалдан авч, товлосон цагтаа явж чадахгүй хохирдог байна. Иймд Тээврийн цагдаагийн албаны Төмөр дахь цагдаагийн газар урьдчилан сэргийлэх үүднээс “Цагаан сар-2019” арга хэмжээг зохион байгуулж, эргүүлийн цагдааг 24 цагаар ажиллуулж байгаа нь шагын наймааг буруулжээ. Иймд галт тэргээр үйлчлүүлж байгаа иргэд та бүхэн эд зүйлээ хулгайд алдахаас сэргийлж, сонор сэрэмжтэй байх, галт тэргэнд бууж, суух үедээ ачаа тээшээ мартахгүй байх, шөнө оройн цагаар галт тэргэнд унтаж амрахдаа өөрийн эд зүйлээ ил задгай орхихгүй байхыг сэрэмжлүүлж байна.

Японы мэргэжлийн сүмо бөхөөр улсынхаа нэрийг мандуулж яваа монгол залуус эх орондоо хүүхдийн эмнэлэг барих төсөл эхлүүлэхээр болсон байна. Уг төслийг мэргэжлийн сүмогийн 69 дэх Их аварга Хакүхо М.Даваажаргал санаачилжээ. Хүүхдийн эмнэлэг барих ажлын ерөнхий төсөв нь дөрвөн сая гаруй доллар болж байгаа аж. Харин Монголын талаас газар олгох асуудал тулгараад байгаа юм байна. Мөн монгол сүмочдын эхлүүлж буй уг төслийг японы томоохон бизнесмэнүүд дэмжиж, хамтран ажиллахаа илэрхийлжээ.

Булган, Дундговь, Төв, Орхон аймгийн зарим сум, нийслэлийн худалдаа, хоол үйлдвэрлэл, үйлчилгээний газарт гахайн мялзан өвчин амьд гахай болон гахайн мах, махан бүтээнд илэрсэнтэй холбогдуулан өнөөдөр Монгол Улсын Шадар сайд, Улсын Онцгой комиссын дарга Ө.Энхтүвшин Улсын Онцгой комиссын шуурхай хуралдааныг зарлан хуралдууллаа.

Энэ үеэр Мал эмнэлэгийн ерөнхий газрын дарга Д.Түмэндэмбэрэл:

“Улсын мал эмнэлэг ариун цэврийн төв лабораторид үхсэн гахайнаас авсан эдийн дээжээр Гахайн африкийн мялзан өвчин болохыг тогтоосон. Гахайн африкийн мялзан өвчинтэй холбогдуулан холбогдох газруудын хамтарсан ажлын хэсэг ажиллаж байна. Монгол улсын хэмжээнд гахайн мах, махан бүтээгдэхүүн импортоор оруулж ирдэг 10 аж ахуйн нэгж байдаг. Үүнээс дөрвөн байгууллагын агуулахад шинжилгээ хийсэн”хэмээн танилцуулсан юм.

Эрүүл мэндийн сайд Д.Сарангэрэл:

“Томуу, томуу төст өвчний дэгдэлт нэгдүгээр сарын 3-наас эрчимжиж орон нутгаар алаг цоог байдлаар гараад байна. Одоогийн өвчлөлийн байдлыг харвал Цагаан сарын үеэр улсын хэмжээнд олон хүнийг хамарсан дэгдэлт гарах төлөвтэй байна. Эмнэлгийн орны ачаалал нийслэлд нэлээн өндөр байгаа. Батлагдсан 900 гаруй орноос 50 гаруй хувиар хэтэрсэн байдалтай байна. Тиймээс ХУД-ийн нэгдсэн эмнэлэг, Цэргийн эмнэлэг дээр нэмэлтээр тасаг гаргахаар ажиллаж байгаа” хэмээн мэдээллээ.

Мэдээллийн дараа Монгол Улсын Шадар сайд, УОК-ын дарга Ө.Энхтүвшин холбогдох байгууллагын удирдлагуудад үүрэг чиглэл өгсөн юм.

Үүнд:

Хүнс хөдөө аж ахуй хөнгөн үйлдвэрийн сайд Ч.Улаанд:

-БНХАУ, ОХУ, Герман, Польш зэрэг улсаас импортолж буй гахайн мах, өөхийг түр хугацаанд улсын хилээр импортлохыг хориглох,

-Улсын хэмжээнд гахайн африк мялзан өвчнийг илрүүлэх идэвхтэй тандалт, судалгааг 30 хоногийн дотор багтаан хийж, цаашид авч хэрэгжүүлэх арга хэмжээг төлөвлөх,

-Уг өвчинд сонгомол үйлчилгээтэй “иод, лемон гэх мэт” халдваргүйтгэлийн бодисын нөөц бүрдүүлэх, гахайн аж ахуй эрхэлдэг байгууллага, иргэдийн тэжээлийн агуулах, байр, хашаа хороог халдваргүйтгэх ажлыг зохион байгуулах,

-Гахайн африк мялзан өвчнөөр өвчилсөн гахайг холбогдох журам, зааврын дагуу устгах, нэгдсэн цэгт булшлах ажлыг шуурхай зохион байгуулж, удирдлагаар хангаж ажиллах,

Мал эмнэлэгийн ерөнхий газрын дарга Д.Түмэндэмбэрэлд:

-Монгол Улсын Засгийн газрын 2018 оны 266 дугаар тогтоолд хорио цээр, хязгаарлалтын дэглэмийн үед батлагдсан журмын дагуу шаардагдах бүх арга хэмжээг шуурхай зохион байгуулж, хяналт тавьж ажиллах,

-Гахайн африк мялзан өвчнөөс урьдчилан сэргийлэх заавар, зөвлөмжийг олон нийтэд сурталчлан таниулж, хэвлэл мэдээллийн байгууллагатай хамтран мэдээллийг нэг цэгээс үнэн бодитой хүргэх ажлыг МХЕГ-тай хамтран зохион байгуулах,

-Мал, амьтны гоц халдварт өвчний эрсдэлийн тойм судалгааг хийж, гарсан үр дүнд хариу арга хэмжээг төлөвлөх, хэрэгжүүлэх арга замыг тодорхойлох,

Аймаг, нийслэлийн Засаг дарга, Онцгой комиссын дарга нарт:

-Гахайн африк мялзан өвчнөөс урьдчилан сэргийлэх, уг өвчний тархалтыг зогсоох арга хэмжээнд шаардагдах ариутгал, халдваргүйтгэлийн зардлыг 2019 онд батлагдсан аймаг, нийслэлийн Засаг даргын нөөц хөрөнгөөс санхүүжүүлэх,

-Аймаг, нийслэлийн Мал эмнэлгийн байгууллагууд орон нутагтаа ариутгал, халдваргүйтгэлийн ажлыг шуурхай зохион байгуулах,

-Гахайн африк мялзан өвчин гарсан халдварын голомтын бүсээс хүн, мал, амьтан, тээврийн хэрэгслийн шилжилт хөдөлгөөнийг түр хугацаагаар хориглох зэрэг шаардлагатай арга хэмжээг авах,

-Уг өвчний халдвар илэрсэн аж ахуйн нэгж, байгууллага, иргэд, үйлчилгээний газруудад холбогдох заавар, журмын дагуу ариутгал, халдваргүйтгэл хийх ажлыг зохион байгуулах,

Гаалийн ерөнхий газрын дарга Б.Асралт, Мэргэжлийн хяналтын ерөнхий газрын дарга Н.Цагаанхүүд:

-Хил, гааль, хилийн боомтууд дээр ахуйн тээвэр, түүвэр ачаанд тавих хяналт, шалгалтыг эрчимжүүлэх талаарх мэдэгдэл хүргүүлэх,

-Хилээр зорчиж буй иргэдийг гар тээш, ачаандаа хүнсний зориулалтаар гахайн мах, махан бүтээгдэхүүн тээвэрлэж хилээр гаргахгүй байх санамжийг танилцуулж, хяналт тавьж ажиллах,

Эрүүл мэндийн сайд Д.Сарангэрэлд:

-Томуу, томуу төст өвчний дэгдэлтийн үед 0-5 хүртэлх насны хүүхдээ асарсан хөдөлмөр эрхэлж байгаа эцэг, асран хамгаалагчид эмнэлгийн хуудас олгох асуудлыг шийдвэрлэх,

-Хүүхдийн эмнэлгийн орны тоог 500-гаар нэмэгдүүлэх асуудлыг судалж шийдвэрлэх,

-Томуу, томуу төст өвчний амбулаторийн үзлэгийн хувиас шалтгаалж үзвэр үйлчилгээ, нийтийн цуглааныг хязгаарлах арга хэмжээг холбогдох байгууллагуудтай хамтран зохион байгуулах,

Дэлхийн эрүүл мэндийн байгууллагад захиалсан вирусийн эсрэг тамифлю эмийг яаралтай нийлүүлэх ажлыг зохион байгуулахыг тус тус олгов гэж Онцгой байдлын ерөнхий газраас мэдээллээ.

Эрүүл мэндийн яамнаас томуу, томуу төст өвчний цаг үеийн нөхцөл байдлын талаар мэдээлэл хийлээ. Манай улсад томуугийн А хүрээний H1N1 вирус 11 аймаг болон нийслэлд дэгдээд буй. Өнөөдрийн байдлаар улирлын томуу лабораторийн шинжилгээний 40 хувийг томуу эзэлж байна. Өвчний амбулторийн үзлэг харьцангуй бага байгаа ч хүндэрч, эмнэлэгт хэвтэх тохиолдол нэмэгдсээр буйг Эрүүл мэндийн яамнаас мэдээлж байна.

Нийслэлийн эмнэлгүүдийн хүүхдийн орны ачаалал 53.2 хувиар хэтрээд буй аж. Эмнэлгүүд орны зохицуулалт хийж байгаа ч байдал хүндэрч буй гэнэ. Цаашид цагаан сарын баяртай холбогдуулан томуугийн нөхцөл байдал, орны ачаалал хүндрэх төлөвтэй байгааг ЭМЯ-ны олон нийттэй харилцах тандалт шуурхай удирдлагын хэлтсийн дарга Д.Нарангэрэл мэдээллээ.

Томуугаар өвдөж, хүндэрсэн хүүхдүүд ЭХЭМҮТ-д ихээр ирж буйг н.Цэвэгмид эмч хэллээ. Тус төв нэг тасгаа хааж, амьсгалын замын эмгэгтэй хүүхдүүдийг авч байна. Яаралтай тусламжаар ирж буй хүүхдүүд 39-40 хэм хүрч халуурсан, бөөлжиж суулгасан, нүдний салс үрэвссэн, хоолой үрэвсэн шинж тэмдэгтэй байгаа аж. Тиймээс хүүхэд халуурч эхэлмэгц өрхийн эмчид үзүүлж, гэрийн нөхцөлд дулаан байлган, халуун хоол хүнс хэрэглэх, илүү хөлөргөж, шингэн их уулгах шаардлагатай байгааг эмч анхааруулж байна.

2019 он гарсаар хоёр аймагт амьсгалын замын цочмог хүнд халдварын улмаас хоёр хүүхэд эндсэн байна. Дэлхийд жилд нэг тэрбум хүн улирлын томуугийн халдвар авч, 650 мянган хүн энэ өвчнөөр нас бардаг аж.

Томуугийн А хүрээний дэд хэв шинжийн H1N1 вирусын идэвхжил нэмэгдэж, өвчлөл хүндрэх байдалтай байгаа тул хүүхдийн орны ачаалал цаашид ч нэмэгдэх хандлагатай юм. Өнөөдрийн байдлаар томуугийн вирус лабораторийн шинжилгээний 40 хувийг эзэлж байна. Гол вирус нь томуугийн А хүрээний Н1N1 вирусээр илэрч байгаа. Уламжлалт цагаан сарын баяраар томуугийн дэгдэлт эрчимтэй тархах магадлалтай байгаа талаар ЭМЯ-ны Шуурхай удирдлагын албаны дарга Д.Нарангэрэл тайлбарласан юм. Томуу, томуу төст өвчин ихсэж байгаатай холбогдуулан дүүргийн эрүүл мэндийн төвүүд иргэдэд эмнэлгийн тусламж, үйлчилгээг түргэн шуурхай, хүртээмжтэй байдлаар үзүүлэхээр зорьж байна. Дүүргийн эрүүл мэндийн төвүүдийн хүхдийн кабинетийн зөвлөгөө өгөх утасны жагсаалтыг хүргэж байна.

Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалангаар ахлуулсан нийслэлийн Онцгой комиссын гишүүд өчигдөр Баянзүрх, Чингэлтэй, Сонгинохайрхан дүүргийн хөрсний ус ихээр гарч буй газруудад ажиллав. Нийтийн эзэмшлийн гудамж талбай устаж хөлдсөн, үерийн далан шуудуу дүүрч халиа дошин үүсч нөхцөл байдал хүндэрсэн байна. Баянзүрх дүүргийн 22 дугаар хорооны хоёр айлын хашаан дотроос булаг гарснаар нийтийн эзэмшлийн гудамж талбай, айл өрхийн хашаанд хөлдөлт үүссэн нөхцөл байдалтай байгаа юм. Мөн 5 дугаар хороо Баянзүрх дүүргийн эрүүл мэндийн төвийн хойд үерийн даланг дүүргэж халиа, дошин үүсгээд байгаа аж.

Баянзүрх дүүргийн Засаг даргын орлогч Д.Уламбаяр “Өнгөрсөн жил их хэмжээний бороо орсны улмаас хөрсний ус маш ихээр гарч ирж байна. Манай дүүргийн 5, 22 дугаар хорооны үерийн далан хөрсний усаар дүүрээд байна. Өнгөрсөн арваннэгдүгээр сараас хойш ийм байдал үүссэн. УБЗАА-ны Инженерийн байгууламжийн хэлтсээс гурван хоногт нэг удаа даланг чөлөөлж, мөсийг ачиж, зайлуулах ажлыг хийж байгаа” хэмээн танилцуулав.

Тус дүүргийн 9, 10 дугаар хорооны нутаг дэвсгэрт урсдаг булгийн эхэнд айлууд зөвшөөрөлгүйгээр шороо асган буусан аж. Үүнээс үүдэн булгийн усны урсах голдирол алдагдаж зарим айл усанд автаж гамшгийн түвшинд хүрээд байгаа юм. Үүгээр барахгүй халиа дошин энэ жил ихээр нэмэгдэж Амгалан ДЦС-ын хашаанд тулж ирээд байгаа аж. Яаралтай арга хэмжээ авч, мөсийг цэвэрлэж, зөөж зайлуулахгүй бол станцын үйл ажиллагаа доголдох эрсдэлтэй гэдгийг мэргэжлийн хүмүүс хэлж байсан юм.

Баянзүрх дүүргийн Тохижилт, нийтийн аж ахуйн хэлтсийн дарга Б.Отгонхүү “БЗД-ийн 9, 10 дугаар хорооны нутаг дэвсгэрт дамнасан олон булгийн устай газар байдаг. Энэ нь өвлийн улиралд тогтмол дошин үүсдэг. Өнгөрсөн жилийн үргэлжлэн орсон усархаг борооны улмаас хөрсний ус дээшилж, усны гарц их хэмжээтэй байна. Булгийн гарц дээр ШУА-ийн Цэвдэг судлалын салбараар судалгаа хийлгэсэн. Хөрсөн дээрээ нэг цагт 15 тонн ус гарч ирж байна гэдгийг хэлсэн. Энэ ус Амгалан ДЦС-ийн хойд талд их хэмжээгээр бөөгнөрч дошин үүссэн. Өнгөрсөн өдрүүдэд хүйтний эрч сулрахад энэ дошин задарч 12-ны шөнөөс эхлээд Амгалан ДЦС-ын хойноос хашаа руу нь орж эхлээд байна. Дүүргийн зүгээс хоёр эксковатор, дөрвөн хог тээврийн машинтай ажиллаж байна. Эхний ээлжинд мөсийг тогоолж, ундарч байгаа усыг тогоондоо хураагаад нам дор түвшинтэй газар луу шилжүүлж байна. Нэн даруй молдоктой хүнд тоног төхөөрөмж авч ирж том тогоо үүсгэж мөсийг зөөвөрлөхгүй бол станц руу ус орох нөхцөл үүсээд байна” хэмээлээ.

Нийслэлийн онцгой комиссын гишүүд Чингэлтэй дүүргийн 17, 18 дугаар хороонд ажилласан. Тус хороодод мөн булгийн ус газрын хөрснөөс нэвчин гарч нийтийн эзэмшлийн гудамж талбай, айл өрхийн хашаанд хөлдөлт үүссэн нөхцөл байдалтай байгаа юм.

Чингэлтэй дүүргийн Засаг даргын орлогч Ж.Лхагвасүрэн “Манай дүүргийн 7, 8, 12, 17, 18 зэрэг таван хорооны 27 цэгт булаг ундарсан байдалтай нөхцөл байдал хүндрээд байна.Өнгөрсөн арваннэгдүгээр сарын 20-ноос хойш дүүргийн Засаг даргын захирамжийн дагуу 86 сая орчим төгрөгийн зардал гаргаж, дүүргийн онцгой комисс мөсийг цэвэрлэх, ачиж тээвэрлэх зэрэг үйл ажиллагаа явуулсан” гэв.

Чингэлтэй дүүргийн Үер, ус, хөлдөлт, ус цаг агаарын аюулт үзэгдлийн үед ажиллах шуурхай ажлын хэсэг өндөржүүлсэн бэлэн байдлын зэрэгт шилжин голомтод ажиллаж байгаа аж. Сонгинохайрхан дүүргийн 8 дугаар хороонд мөн адил хөрсний ус нэвчин гарснаас болж айл өрхийн хашаа, гудамж талбайд дошин үүсч нөхцөл байдал хүндэрсэн байна.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр “Өнөөдөр нөхцөл байдал хүндэрсэн газруудад ажиллаж байна. Нөхцөл байдлын талаар нийслэлийн Засаг даргын зөвлөлийн хурлаар яаралтай оруулж, арга хэмжээ авахаар төлөвлөөд байна. Өнгөрсөн жилийн усархаг борооны улмаас хөрсний ус нэмэгдэж, урд нь байгаагүй газраас булаг гарч байна. Зарим газарт үерийн далан сувгийн ажил хийгдэх байсан ч зөвшөөрөлгүй айлууд бууж, газраа чөлөөлж өгөхгүй байгаагаас болоод үерийн далан сувгийн ажил зогсонги байдалтай байна. Иргэд ААН-үүд үерийн далан сувгийг хаах, дээр нь шороо асгаж буух зэргээр усны нэвтрэх чанар, урсгалыг хаан боогдуулснаас болоод усны шууд урсгал саатаж айл өрхүүдэд ихээхэн хэмжээний хохирол учруулж байна. Нийслэлийн зүгээс үерийн суваг шуудууг чөлөөлж, цэвэрлэнэ. Үүссэн мөсийг мөн зөөвөрлөж шар усны үерээс урьдчилан сэргийлж ажиллах болно. Цаашдаа үерийн далан суваг дээр буусан, хөрсний усны ундарга дээр байгаа айлуудыг нүүлгэхгүй бол энэ байдал жилийн жилд давтагдах болно” хэмээв.

Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан “Нийслэлийн Баянзүрх, Чингэлтэй, Сонгинохайрхан дүүргийн хэд хэдэн хороонд хөрсний ус дээшилсэнтэй холбоотойгоор халиа, дошин үүсээд байна. Ийм байдал үүсэхэд иргэд маш ихээр нөлөөлж байна. Байгалийн голдирол, ундарга дээр хууль бусаар буусан, үерийн далан шуудууг тэгшилж байшин барилга барьсан зэрэг асуудал байна. Үүнээс гадна өмнө нь гарч байгаагүй газраас булаг гарч, нөхцөл байдал хүндэрсэн асуудал байна. Нийслэлийн Онцгой комисс яаралтай арга хэмжээ авна” гэлээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.