Month: January 2019

Зүүнбаянгийн цэргийн ангид амь насаа алдсан байлдагч А-гийн хэргийн өмгөөлөгчид мэдээлэл хийлээ.

Хэрэгт өмгөөлөгчөөр ажиллаж буй Э.Билгүүн: Дорноговь аймгийн Зүүнбаянгийн 336 дугаар цэргийн ангийн байлдагч Б.Алтантулга амь насаа алдсан хэрэгт цагдаагийн байгууллагаас Эрүүгийн хэрэг хянан шийдвэрлэх тухай хуульд заасан мөрдөн шалгах ажиллагаа хийлгүйгээр хэргийг “золгүй явдал” хэмээн мэдээлж байгаа нь хууль бус бөгөөд олонд ташаа мэдээлэл хүргэж буйд харамсалтай байна гэлээ.

Талийгаачийг кросс гүйлтэнд гүйж байгаад бахардаж унахад цэргийн ангийн удирдлагууд битгий байшлаад бай гээд дээрээс нь хөлөөрөө дэвсэж, харгисаар зодсоныг хамт гүйж байсан цэргүүд гэрчилжээ.
Камерын бичлэгт байгаагаар Б.Алтантулгыг тэнхээгүй болтол гүйлгэж, зодсоны дараа өрөөнд орж ирж хувцсаа өлгөөд ухаан алдаад унах үед талийгаачийг чирээд камертай бүсээс аваад явжээ. Үүнээс хойш цаг гаруй хугацаанд хаана байсан нь тодорхойгүй. Харин цаг гаруй хугацааны дараа цэргийн ангийн эмчийг үзэхэд нас барсан байжээ. Цагдаагийн байгууллагаас А-г гадны нөлөөгүй нас барсан гэсэн мэдээллийг өгсөнд харамсаж байна.

Өмгөөлөгч нар өчигдөр Эрдэнэт хотод очиж талийгаачийн ар гэрийнхэнтэй уулзаж, цогцосыг харсан. Ингэхэд нуруун хэсэгт нь үүссэн байсан хүүрийн толбо биш, гадны нөлөөллөөр үүсэх боломжтой гэж үзэж байна. Хөлний шилбэ хөхрөлттэй, баруун мөрний дээд хэсэгт шарх сорвитой, баруун гар гадны нөлөөтэй шалбарсан шарх сорвитой байсан” гэв.

Мөн өмнө нь талийгаач дарамт, шахалтад орж байна гэх мэдээллийг Тангарагийн ёслолын үеэр ээждээ өгсөн бөгөөд дарга нар нь зодож байгаа тул намайг эндээс аваач гэж хэлж байсан гэдгийг өмгөөлөгч Э.Билгүүн онцолж байлаа.

Ахтайгаа утсаар ярихдаа ч дарамт их байгааг хэлж байсан бөгөөд энэ цэргийн ангид өмнө нь мөн л дарамт, зодууртай холбоотой хэрэг гарсан. Дарамтлуулснаас болоод хөлийн хуруугүй болсон хэрэг хоёр жилийн өмнө гарсан. Энэ хэрэг яаж шийдэгдсэн нь одоо хүртэл тодорхойгүй байна гэдгийг хэлсэн юм.

Талийгаачийн биеийн гадна харагдах нуруун хэсэгт үүссэн улайлт нь хүүрийн толбо биш, гаднын нөлөөтэйгээр бий болсон гэмтэл, шарх гэж үзэж байна.

Өмгөөлөгч Б.Өлзийцэрэн: “Биеийн зарим хэсэгт гадны нөлөөтэй үүссэн шарх, сорви байсан. Талийгаач амьсгалын дутагдалд ороод бахардсан байхад нь баашилж байна гээд зодсон байгаа. Энэ нь амь насаа алдахад нь нөлөөлсөн. Яаралтай тусламж үзүүлээгүй эмч, тухайн гэмт хэргийг таслан зогсоогоогүй цэргийн ангийн албан тушаалтнуудад эрүүгийн хэрэг үүсгэхээр гомдол гаргасан. Цэргийн ангийн камерт бичигдсэн бичлэгийг хавтаст хэрэгт хавсаргасан.

Талийгаач айлын бага, хоёр ахтай. Ээжтэйгээ хамт амьдардаг байсан. Цагдаагийн байгууллагаас үнэнийг тогтоох ёстой байтал хэт нэг талыг барьсан мэдээлэл хийсэн нь хохирогчийг нэмж хохироосон гэж үзэж байна.

Цаашид уг асуудалд өмгөөлөгчдийн зүгээс хүний амь насыг хохироосон цэргийн ангийн албан хаагч шүүхээр ял шийтгэлээ хүлээх хүртэл хуулинд заасан бүх арга хэмжээг авч ажиллаж болно.

Нийслэлийн цагдаагийн газарт ЦЕГ-аас сүүлийн үед гарсан дуулиант гэмт хэргүүдийн талаар мэдээлэл хийлээ.

Мөрдөн байцаах албаны дарга, цагдаагийн хурандаа Д.Отгонжаргал: Дорноговь аймгийн Зүүнбаян дахь 336 дугаар ангид алба хааж байсан хугацаат цэрэг нас барсан хэрэг гарсан. Шүүх шинжилгээний үндэсний хүрээлэн үхлийн шалтгааныг тогтоох үүрэгтэй. Амь насаа алдсан байлдагчийн бие дээр толбо гарсан талаар зураг цахимаар тарсан байсан. Мөрдөн байцаагч нарт анагаах ухааны ойлголт бий. Зүрхний үйл ажиллагаа зогсоход цогцос аль талаар байгаагаас хамаарч цус тунарч, хар хүрэн өнгөтэй болж толбо гардаг. Нүүр нь доошоо хэрэв харсан байрлалтай байвал нүүр хэсгээрээ толбо болно гэсэн үг.

Мөрдөгч цогцост үзлэг хийхдээ шинжээч болон эмчийг оролцуулдаг. Дорноговь аймагт хийсэн шинжээчийн дүгнэлт дээр гаднаа ил гарах шархгүй гэж бичсэн байсан. Үүн дээр дахин шинжээч томилж, үзлэг хийж байна. Шалгалтын комисс Дорноговь аймагт ажиллаж байна.

Эхний байдлаар цэргийн алба хаагчид бие биедээ гар хүрсэн нөхцөл байдал тогтоогдож байгаа Энэ нь цэргийн алба хаагчийн амь хохироход нөлөөлсөн эсэхийг шалгаж байна. Ээлжийн ахлагч цэргийн алба хаагчид гар хүрч байгаа нь бичлэгт үлдсэн байсан. Энэ нь амь нас хохироход нөлөөлсөн эсэхийг тогтооно гэлээ.

Загвар өмсөгч Ч.Чамин-Эрдэнийн хувьд өмнө нь бусдад зодуулж байсан, хүчирхийлэлд өртөж байсан уу гэдгийг цагдаагийн нэгдсэн бүртгэлээс бид хайсан. Ямар нэгэн бүртгэл, баримт байхгүй байсан. Хэргийг шалгаж дууссан тул талийгаачийн өмгөөлөгч өчигдрөөс хавтаст хэргийн материалтай танилцаж эхэлсэн байна. Хэрэг гарснаас хойших гурван сарын хугацаанд мөрдөн байцаагчид талийгаачийн хувийн харилцаа, хань, хамсаатнуудын талаар өргөн хүрээтэй шалгах ажиллагаа явуулсан.

Гадуур яригдаж байгаа сэжиг, таамгуудыг бүгдийг шалгасан. Хохирогчийн ээжийг хүлээн авч уулзсан. Цагдаа нар хэргийг бүрэн шалгахгүй байгаа, өндөр албан тушаалтны хүүхэд холбогдсон зэрэг олон нийтийн сүлжээгээр цацагдаж байгаа шиг цагдаагийн байгууллага бусдын нөлөөнд автаж, нотлох баримтыг нууж хаасан зүйл огт байхгүй. Сэжиглэгдэж байгаа бүх хүнийг шалгасан. Эрүүгийн хэргийн оролцогчдыг нэр дурдах боломжгүй байдаг. Хэрэг бүртгэлт мөрдөн байцаалтын нууц гэж бий. Эрүүгийн байцаан шийтгэх тухай хуулиар хүний эрх, хууль ёсны ашиг сонирхлыг хамгаалах үүрэгтэй гэсэн юм.

Нийслэлийн Засаг даргын Тамгын газраас нийслэлийн нутгийн захиргааны байгууллагуудын төрийн албан хаагчдын зөвлөгөөн зохион байгууллаа. Улаанбаатар хотын есөн дүүрэг, Нийслэлийн Засаг даргын Тамгын газар болон харьяа 33 агентлагт нийтдээ гурван мянга гаруй төрийн албан хаагч тангараг өргөн, албаа хашиж байна. Нийслэлийн нутгийн захиргааны байгууллагын төрийн албан хаагчдын онцлог нь иргэний бүртгэлээс өгсүүлээд хот тохижилт, ногоон байгууламж, бүтээн байгуулалт, газрын харилцаа, ерөнхий төлөвлөгөө, цагдаа, онцгой, эрүүл мэнд гээд алхам тутамдаа хүний амьдралтай холбоотой санал гомдол шийдвэрлэх, дээд шатны шийдвэр гаргах зэрэг нийгмийн харилцаанд байнга ордгоор онцлог юм. Тиймээс ч энэ удаагийн зөвлөгөөнд өндөр ач холбогдол өгч, Монгол Улсын Ерөнхий сайд У.Хүрэлсүх, НИТХ-ын дарга С. Амарсайхан, Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан нар оролцож, төрийн албан хаагчдад хандан үг хэллээ.

Хурлын эхэнд Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан хэлэхдээ “Нийслэлийн нутгийн захиргааны байгууллагын төрийн албан хаагчдын ур чадварыг дээшлүүлэх, хуулийг ягштал баримтлах, авлигагүй, хүнд сурталгүй, цомхон, ил тод, цахим төрийн үйлчилгээг иргэддээ хүргэхэд анхаарч ирсэнийг онцолсон. Тухайлбал, өнгөрсөн хоёр жилийн хугацаанд нийслэл хот төрийн 47 үйлчилгээг цахим хэлбэрт шилжүүлсэн. Төлбөр хураамж болон бүртгэл лавлагаатай холбоотой үйлчилгээг аль болох цахимжуулах бодлого баримталж байгаа төдийгүй 7 хороонд төрийн олон төрлийн үйлчилгээг хүргэх ажлыг эхлүүлсэн. Мөн нэг цэгийн үйлчилгээний нэгдсэн төвийн тоог нэмэгдүүлэхийн зэрэгцээ үйлчилгээний хүртээмж, тоог ч олшруулж байгаагонцоллоо. “Иргэдийн оролцоо”-г нийслэл хот эрхэмлэж байна. Нийслэлчүүдийнхээ санал шүүмжлэл, өргөдөл гомдлын мөрөөр чамгүй ажил хийсэн. Түүнчлэн төсөв төлөвлөгөөгөө батлахаас өгсүүлээд авто замын бүтээн байгуулалт, сургуулийн цэцэрлэгийн хүртээмжинд ч иргэн бүрийн санал бодлыг тусгахыг эрхэмлэж байна. 2019 оны хувьд Нийслэл хотод “Өндөр хариуцлагатай жил” байх болно. Учир нь Нийслэл хот үүсэн байгуулагдсаны 380 жилийн тэгш ой тохиож байгаа бөгөөд Монгол Улсын Засгийн газраас “Иргэн төвтэй төрийн үйлчилгээний жил” болгон зарласан. Нийслэл хот “Иргэдийн оролцоотой хөгжлийн жил” гэдгээ тодотгоод байгаа энэ үед өмнөө тавьсан зорилт, бодлогоо хэрэгжүүлэхэд төрийн албан хаагчдын үүрэг оролцоо их” гэдгийг дурьдлаа.

“Нийслэлийн нутгийн захиргааны байгууллагуудын төрийн албан хаагчдын сахилга хариуцлага, нэр хүнд, ажилдаа хандах хандлага, хүнтэй харьцах харьцаа болон төрийн албаны хуулийг ягштал мөрдөх зарчмууд шууд хамаарна гэдгийг тодотгон хэлмээр байна. Учир нь Нийслэлийн нутгийн захиргааны байгууллагын төрийн албан хаагчид нь Монгол Улсын нийт хүн амын талаас илүү хувьд нь үйлчилгээ үзүүлж, иргэдээ мэдээллээр хангаж, ажиллаж, амьдрах нөхцөлтэй нь шууд харилцдаг. Тэр утгаараа та бүхэн бол Монгол төрийн нүүр царай.

Монголын төрийн нүүр царай болсон нийслэлийн нутгийн захиргааны байгууллагын төрийн албан хаагчдаас Монгол төрийн нэр хүнд шууд хамаарна гэдгийг ямагт санаж, хууль дээдлэн, шударга ёсоо ягштал мөрдөх учиртай гэдгийг энэхүү индэрээс дахин сануулья” гэж Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан хэллээ.

XVII жарны ‘’Урвуулагч’’ хэмээх ‘’Шороон гахай’’ жилийн сар шинийн баярын босгон дээр Баянзүрх дүүргийн Засаг даргын Тамгын газрын хамт олон дүүргийнхээ хөгжил цэцэглэлт, бүтээн байгуулалтад гар бие оролцож явсан ахмад ажилчдаа хүлээн авч, хүндэтгэл үзүүллээ.

Хүндэтгэлийн арга хэмжээний үеэр дүүргийн Засаг даргын орлогч Д.Уламбаяр‘’Дүүргийнхээ хөгжил цэцэглэлтэд өөрийн хүч хөдөлмөр, залуу нас, мэдлэг чадвараа харамгүй зориулсан ахмадуудтайгаа уулзаж байгаадаа баяртай байгаагаа илэрхийлээд,ахмадууддаасар шинийн баярын мэндчилгээ дэвшүүлж, уламжлалт уулзалтад хүрэлцэн ирсэнд талархал илэрхийлсэн юм.

Уг арга хэмжээнд дүүргийн Засаг даргын Тамгын газрын дарга Б.Амартүвшин, Төрийн захиргааны удирдлагын хэлтсийн дарга Ж.Батжавхлан болон албаны бусад хүмүүс оролцож 120 ахмад ажилтнууддаа хүндэтгэл үзүүлж, санал хүсэлтийг нь сонссон байна хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Иргэн Б.Батбаатар өнөөдөр хэвлэлийн хурал зохион байгуулж, МҮЭХ-г шинэчлэн байгуулахыг тус холбооны гишүүд, дэмжигчдэд уриаллаа. Эдүгээ 100 жилийн түүхт МҮЭХ нийгмийн өмнө хүлээсэн үүргээ хангалттай биелүүлж чадахгүй байгаа хэмээн тэрбээр үзэж байгаа аж.

Иргэн Б.Батбаатар, “МҮЭХ “нийгэмд үйлчлэх ашгийн бус байгууллага байна” хэмээн дүрмэндээ заасан. Өөрөөр хэлбэл, зөвхөн цалин, тэтгэврийн асуудал бус орлогын тэгш бус байдал, ажилгүйдэл, ядуурал, үйлдвэрлэлийн осол гэмтлийг бууруулах зэрэг олон чиглэлд анхаарч ажиллах ёстой. Гэвч сүүлийн дөрвөн жилийн Хөдөлмөр, ниймгийн зөвшлийн гурван талт үндэсний хорооны хуралдааны үеэр цалин хөлсийг нэмэх шаардлага л тавьж ирсэн. Тиймээс нийгмийн өмнө хүлээсэн үүргээ биелүүлж чадахгүй байгаа МҮЭХ-г хөдөлмөрчдийн хөгжлийн төлөө ажилладаг болгон шинэчлэх шаардлагатай юм” гэлээ.

Өчигдөр өглөөнөөс хойш хуралдсан Монголын морин спорт уяачдын холбооны VII их хурал өнөө өглөөний үүрийн 05:00 цагийн орчимд дуусчээ. Хурлаас гарсан шийдвэрийг 16:00 цагт Монгол ньюс мэдээллийн төвд хэвлэлийн хурал хийж мэдэгдэх болсон байна.

Хүннү Эйр ХХК-ийн 2013 оны долдугаар сарын 26-наас Монгол Улсад ашиглаж эхэлсэн JU-8883 бүртгэлийн дугаартай Фоккер 50 маягийн агаарын хөлөг өнөөдөр сүүлийн нислэгээ Улаанбаатар-Говь-Алтай-Завхан-Улаанбаатар чиглэлд үйлдлээ.
Үүгээр 2003 оноос Монгол Улсад нисч эхэлсэн Фоккер 50 маягийн агаарын хөлгийн нислэгийн үйл ажиллагаагаа зогсоож байна.
Өнгөрсөн оны сүүлээр мөн Аэромонголиа авиа компанид ашиглагдаж байсан энэ төрлийн агаарын хөлөг үйл ажиллагаагаа зогсоосон билээ.
Хүннү Эйр компаний Фоккер-50 агаарын хөлөг нь Голланд улсад 1990 оны дөрөвдүгээр сард үйлдвэрлэгдсэн бөгөөд ашиглагдаж эхэлснээсээ хойш нийт 46,930 цаг ниссэнээс Монголын орон нутаг болон бүс нутгийн хэмжээнд 13,467 цагийн 8,162 удаагийн буулт үйлдэж олон мянган зорчигч тээвэрлэсэн 28 жилийн түүхтэй агаарын хөлөг юм.
Монгол Улсад Фоккер 50 маягийн нийт 7 агаарын хөлөг нислэг үйлдэж байсан нь Ан-2, Ан-24 онгоцнуудын дараа гуравдугаарт орох үзүүлэлт бөгөөд хөөрөлт, буултын гүйлтийн зай харьцангуй бага, шороон зурвас дээр бууж хөөрөх боломжтой, орчин үеийн нислэгийн автомат удирдлага, хяналт навигацийн электрон системүүдээр тоноглогдсон манай орны нөхцөлд гойд тохирсон, зорчигч олны талархалыг хүлээсэн агаарын хөлөг байлаа.
Энэхүү агаарын хөлгөөр Монголын үе үеийн нисгэгч нар нисч байсан бөгөөд одоо энэхүү агаарын хөлгөөс нислэгийн гараагаа эхэлсэн бөгөөд олон нисгэгчид Boeing-767, Boeing-737, ATR-72, ERJ-145 агаарын хөлгүүдээр амжилттай нисч байна.