Month: November 2018

Categories
онцлох-нийтлэл туслах-ангилал

​Нийслэлийн иргэд спортын найман төрлөөр аваргуудаа тодруулна

Энэ оны гуравдугаар сараас эхлээд арваннэгдүгээр сарын 6-ны хооронд нийт есөн сарын хугацаанд нийслэлийн иргэдийн спортын VII их наадам зохион байгуулагдлаа.Уг наадам нь спортын найман төрлөөр таван үе шаттайгаар зохиогдсон юм. Тэгвэл энэхүү наадмын шигшээ тоглолт өнөөдөр “Буянт ухаа ” спорт ордонд болж нээлтээ хийлээ.


Шигшээ тэмцээнийг нээж Нийслэлийн Засаг даргын орлогч Ш.Анхмаа үг хэлэхдээ “Монгол Улсын Биеийн тамир, спортын тухай хуулийн 10 дугаар зүйл, Нийслэлийн засаг дарга бөгөөд Улаанбаатар хотын захирагчийн 2016-2020 оны үйл ажиллагааны хөтөлбөр, нийслэлийн эдийн засаг, нийгмийг 2018 онд хөгжүүлэх үндсэн чиглэл, “Биеийн тамир, спортыг айл өрх, иргэн бүрт” зорилтын хүрээнд нийслэлийн иргэдийн бие бялдрыг чийрэгжүүлэх, хөдөлгөөний хомсдлоос сэргийлэх, хүн амыг биеийн тамир, спортын уралдаан тэмцээнд татан оролцуулах, тэдний идэвх сонирхлыг дэмжих зорилгоор Нийслэлийн иргэдийн спортын VII наадмыг амжилттай зохион байгуулж байна.Нийт есөн сарын хугацаанд зохиосон спортын наадмын шигшээ тэмцээний аваргууд тодрох торгон мөч ирлээ. Тэмцээнд оролцож байгаа нийт тамирчид болон иргэддээ спортын өндөр амжилт хүсэхийн зэрэгцээ эрүүл энх, урт удаан наслахыг ерөөе” хэмээв.

Спортын VII наадам нь “спорт явган аялал, ширээний шагайн наадгай, хийн дасгал, аэробик, олс таталт, софт волейбол, волейбол, сагсан бөмбөг” гэсэн спортын найман төрлөөр зохиогджээ.Өнгөрсөн есөн сарын хугацаанд хэсэг , хороо, бүс, дүүргийн аваргуудыг тодруулсан байна. Харин өнөөдөр дээрх дөрвөн үе шатаас шалгарсан дүүргүүдийн дунд тав дахь шат буюу нийслэлийн аваргуудыг шалгаруулах гэж байна.

2018 оны Иргэдийн спортын VII наадмын хэсэг, хороо, бүс дүүргийн шатанд 4310 байгууллагын 90100 иргэн хамрагдсан байна. Эндээс шалгарсан нийслэлийн шигшээ тэмцээнд есөн дүүргийн 152 хорооноос шалгарсан шилдгийн шилдэг 108 багийн 1638 иргэн оролцож байгаа аж.

Энэхүү наадам нь Нийслэлийн нийтийн биеийн тамир, спортын хорооноос дэвшүүлсэн “Биеийн тамир, спорт ыг ал өрх иргэн бүрт” зорилтын хүрээнд “Өдөр тутмын биеийн тамир-Өнөөгийн нийслэлчүүдийн өнгө төрх” уриан доор явагдаж байна.

Энэ үеэрБаянгол дүүргийн дөрөвдүгээр хорооны иргэн П.Баярсайхан өөрийн сэтгэгдлээ хуваалцлаа. Тэрээр “Биеийн тамир спортоор 1971 оноос хойш хичээллэж байгаа бөгөөд спортын Мастер цолтой аж.

-Ямар төрөлд оролцож байгаа вэ?

-Ахмадуудын хийн дасгал, Аэробек, волейболын тэмцээнд оролцож байгаадаа маш баяртай байна. Ахмадуудыг нас насны ангилалаар хувиарлаж тэмцээнд оролцуулж байгаа нь сайхан санагдаж байна. Манай хийн дасгалынхан нэгдүгээр байранд орсон, Аэробеийн төрлөөр гуравдугаар байранд орсон. Одоогоор волейболоор алтан медалын төлөө тоглох гээд байж байна

-Тэмцээнд хэд дэх жилдээ оролцож байгаа вэ?

-Анх удаагаа оролцож байна. Ер нь бол тэмцээн уралдаанд байнга оролцдог.

-Тэмцээндээ хэрхэн бэлдэж байсан бэ?

-Дүүрэг, хороод нь тэмцээнд оролцогчдоо хувиарлаж өгдөг. Дүүргийн хэсгийн ахлагч нар нь тэмцээнд оролцож байгаа иргэдээ цуглуулаад заал аваад , бэлтгэл хийх газар бэлдэж өгдөг байсан гэв.


Б.ОЮУНЖАРГАЛ

Categories
мэдээ эдийн-засаг

1072 хувьцааны ногдол ашгийг олгохтой холбогдуулан мэдээлэл хийв

“Эрдэнэс Тавантолгой” ХК 1072 хувьцааны ногдол ашгийг энэ онд олгохоор зэхэж буй. Үүнтэй холбогдуулан иргэдэд хувьцаа болон хөрөнгийн зах зээлийн талаарх мэдлэг, ойлголтыг өгөхөөр ажиллаж байна. Тодруулбал, “Монголын хөрөнгийн бирж” ТӨХК нь орон нутгийн иргэдийн үнэт цаасны зах зээлийн талаарх мэдлэг, мэдээллийг дээшлүүлэх зорилгоор “Үнэт цаасны төвлөрсөн хадгаламжийн төв”, “Арилжааны төлбөр тооцооны төв” ТӨХХК, үнэт цаасны компаниуд болон “Эрдэнэс таван толгой” ХК-тай хамтран “Үнэт цаасны зах зээлийн нээлттэй өдөрлөг”-ийг хийв. Уг арга хэмжээг өнгөрсөн дугаар сарын 24-нөөс энэ сарын 1 хүртэл зохион байгуулав.

Өдөрлөгийн үеэр хөрөнгийн зах зээлийн суурь ойлголтууд, хувьцаа, бондын арилжаанд хэрхэн оролцох, хөрөнгийн зах зээлээс компаниуд санхүүжилт татах боломж зэрэг сэдвээр сургалт явуулсан байна. Түүнээс гадна “Эрдэнэс Тавантолгой” ХК-ийн үйл ажиллагаа, иргэдэд олгосон хувьцааны талаарх дэлгэрэнгүй мэдээлэл, 1991 оны хөрөнгө оруулалтын эрхийн бичигтэй холбоотой дансны мэдээллийг шүүх, ногдол ашгийн мэдээллийг өгөх, арилжааны данс нээх, иргэдийн өргөдөл гомдлыг хүлээн авч шийдвэрлэх зэргээр нийт 5000 гаруй иргэдэд нэг цэгийн цогц үйлчилгээг үзүүлжээ.

Дашрамд мэдээлэхэд, Монгол Улсын Засгийн газар 2012 онд “Эрдэнэс Тавантолгой” ХК-ийн нийт хувьцааны 20 хувь болох гурван тэрбум ширхэг хувьцааг тус оны дөрөвдүгээр сарын 11-нээс өмнө төрсөн, иргэний шинэчилсэн бүртгэлд хамрагдсан иргэн бүрт үнэ төлбөргүй эзэмшүүлэхээр болсон. Тухайн үед Засгийн газраас 1072 ширхэг хувьцааг нэг сая төгрөг буюу нэг ширхэг хувьцааны нэрлэсэн үнийг 933 орчим төгрөгөөр үнэлж тооцсон байдаг. “Эрдэнэс Тавантолгой” ХК нийт 15 тэрбум ширхэг хувьцаатай бөгөөд үлдсэн 80 хувийг Засгийн газар, ААН-үүд эзэмшиж, биржид арилжаалахаар анхлан төлөвлөсөн. Одоогоор тус хувьцааг 2.5 сая иргэн эзэмшдэг. Тэдний 623 мянга нь хувьцааны данс нээлгэсэн байна. Үлдсэн 1.8 орчим нь хувьцааны дансаа нээлгээгүй байна. Эдгээр иргэн дансаа нээлгэснээр 1072 хувьцааг эдийн засгийн эргэлтэд оруулах эрх нь үүснэ.

Categories
мэдээ нийгэм

​Малчид, тээвэрчид, иргэдийг цаг агаарын аюултай үзэгдлээс сэрэмжлүүлж байна

7-нд баруун аймгуудын нутаг, төвийн аймгуудын нутгийн баруун хэсгээр, 8-нд төв болон зүүн аймгуудын нутгаар бага зэргийн цас орж, явган шуурга шуурна.

БАРУУН АЙМГУУДЫН НУТГААР: Нутгийн хойд хэсгээр үүлшинэ. Бусад нутгаар багавтар үүлтэй. Цас орохгүй. Салхи баруунаас секундэд 7-12 метр. Алтай, Хангайн уулархаг нутаг, Хүрэн бэлчир, Завхан голын эх, Идэр, Тэс голын хөндийгөөр шөнөдөө 20-25 градус, өдөртөө 3-8 градус, Алтайн өвөр говиор шөнөдөө 6-11 градус хүйтэн, өдөртөө 4-9 градус дулаан, бусад нутгаар шөнөдөө 10-15 градус хүйтэн, өдөртөө 1 градус хүйтнээс 4 градус дулаан байна.

ТӨВИЙН АЙМГУУДЫН НУТГААР: Нутгийн хойд хэсгээр үүлшинэ. Бусад нутгаар багавтар үүлтэй. Цас орохгүй. Салхи баруунаас секундэд 7-12 метр. Дархадын хотгор болон Хангай, Хөвсгөл, Хэнтэйн уулархаг нутаг, Туул, Тэрэлж голын хөндийгөөр шөнөдөө 15-20 градус, өдөртөө 2-7 градус, бусад нутгаар шөнөдөө 10-15 градус хүйтэн, өдөртөө 0-5 градус дулаан байна.

ЗҮҮН АЙМГУУДЫН НУТГААР: Солигдмол үүлтэй. Цас орохгүй. Салхи баруунаас секундэд 6-11 метр. Шөнөдөө 11-16 градус хүйтэн, өдөртөө 1 градус хүйтнээс 4 градус дулаан байна.

ОТРЫН НУТАГ ХЭРЛЭНБАЯН-УЛААН ОРЧМООР: Багавтар үүлтэй. Цас орохгүй. Салхи баруун өмнөөс секундэд 5-10 метр. Шөнөдөө 12-14 градус, өдөртөө 2-4 градус хүйтэн байна.

ГОВИЙН АЙМГУУДЫН НУТГААР: Багавтар үүлтэй. Цас орохгүй. Салхи баруунаас секундэд 7-12 метр. Шөнөдөөө 9-14 градус хүйтэн, өдөртөө 3-8 градус дулаан байна.

УЛААНБААТАР ХОТ: Багавтар үүлтэй. Цас орохгүй. Салхи баруунаас секундэд 6-11 метр. Шөнөдөө 10-12 градус хүйтэн, өдөртөө 1-3 градус дулаан байна.

7-нд баруун аймгуудын нутгийн зарим газар, төвийн аймгуудын нутгийн баруун хэсгээр, 8-нд төв болон зүүн аймгуудын нутгаар, 9-нд зүүн аймгуудын нутгаар, 10-нд баруун аймгуудын нутгийн хойд хэсгээр бага зэргийн цас орж, явган шуурга шуурна. Салхи ихэнх хугацаанд секундэд 6-11 метр, 9-нд Алтайн уулсаар, 10-нд баруун аймгуудын нутгаар секундэд 14-16 метр хүрч ширүүснэ. Дархадын хотгор, Алтай, Хангай, Хөвсгөл, Хэнтэйн уулархаг нутаг, Хүрэн бэлчир, Завхан голын эх, Идэр, Тэс, Туул, Тэрэлж голын хөндийгөөр шөнөдөө 16-21 градус, өдөртөө 3-8 градус, говийн бүс нутгийн өмнөд хэсгээр шөнөдөө 3-8 градус хүйтэн, өдөртөө 3-8 градус дулаан, бусад нутгаар шөнөдөө 10-15 градус хүйтэн, өдөртөө 1 градус хүйтнээс 4 градус дулаан байна.

Categories
мэдээ нийгэм

Хийн түлшний үнэ литр тутам 50 төгрөгөөр нэмэгджээ

Манай улсын хэмжээнд хийн түлш борлуулах 88 станц ажилладаг. Улаанбаатарт 43, Орхон аймагт тав, Дархан-Уул аймагт найм, бусад аймгуудад үлдсэн нь байршдаг. Хийн түлшний хэрэглээ жил бүр нэмэгдэж байгаа. 2010 онд 6700 тонн байсан бол 2017 онд 36 мянган тонн хүржээ. Хийн түлшний 94 хувийг ОХУ-аас, зургаан хувийг БНСУ-аас импортоор оруулж ирдэг аж. Нийт хийн түлшний 82 хувийг автомашин, 18 хувийг иргэд, цайны газар, ресторанууд хэрэглэдэг байна.

Одоогоор автомашины хийн түлш дунджаар 50 төгрөгөөр нэмэгдэж 1300 төгрөгт хүрчээ. Үнэ нэмэгдсэн шалтгааныг валютын ханштай холбон тайлбарлаж байгаа юм. Шатахууны үнэтэй харьцуулахад хийн түлшний үнэ өсөх нь харьцангуй тогтвортой байгаа ажээ.

Categories
мэдээ спорт

Шатар сонирхогчдын улсын аварга шалгаруулах тэмцээн болно

Монгол Улсын Их Хурлын даргын ивээл дор жил бүр уламжлал болгон зохион байгуулдаг шатар сонирхогчдын улсын аварга шалгаруулах тэмцээн орон даяар энэ сарын 10-ны өдрөөс эхлэх гэж байгаатай холбогдуулан Улсын Их Хурлын Тамгын газрын Захиргаа, аж ахуйн асуудал хариуцсан нарийн бичгийн дарга П.Цэрэн, УИХ-ын Тамгын газрын ажилтан, шатрын спортын олон улсын шүүгч Г.Алтан-Оч,УИХ-ын Тамгын газрын Хэвлэл мэдээлэл, олон нийттэй харилцах хэлтсийн дарга С.Батбаатар, Монголын шатрын холбооны Ерөнхий нарийн бичгийн дарга Н.Наранбаатар нар өнөөдөр (2018.11.05) сэтгүүлчдэд мэдээлэл хийлээ.

Улсын Их Хурлын Тамгын газрын Захиргаа, аж ахуйн асуудал хариуцсан нарийн бичгийн дарга П.Цэрэн хэлсэн үгэндээ, Шинэ Үндсэн хууль батлагдсан өдөрт зориулсан олон арга хэмжээг зохион байгуулдагийн нэг нь Монгол Улсын Их Хурлын дарга М.Энхболдын ивээл дор зохион байгуулдаг шатар сонирхогчдын улсын аварга шалгаруулах тэмцээн юм. Тэмцээнийг гурван үе шаттай явуулдаг. Анхан шат буюу сум, дүүргийн аварга шалгаруулах тэмцээнийг 2018 оны арваннэгдүгээр сарын 10-11-нд бүх сум, дүүрэгт нэгэн зэрэг зохион байгуулна. Хагас шигшээ буюу аймаг, нийслэлийн аварга шалгаруулах тэмцээнийг 2018 оны арванхоёрдугаар сарын 08-09-нд, улсын аварга шалгаруулах шигшээ тэмцээнийг 2019 оны нэгдүгээр сарын 05-06-нд Төрийн ордонд зохион байгуулна. Энэхүү тэмцээнийг зохион байгуулахад хамтран ажилладаг аймаг, нийслэл, сум, дүүргийн иргэдийн Төлөөлөгчдийн хурал, Засаг дарга нар, Монголын шатрын холбоо, шатар сонирхогчдод талархал илэрхийлье” гэв.

Өмнөх жилүүдэд тэмцээнд түрүүлсэн аварга шатарчинд спортын дэд мастер цол олгодог байсан. Энэ жилийн тэмцээнд медаль хүртсэн эрэгтэй гурав, эмэгтэй гурван шатарчинд дээрх цолыг олгохоос гадна шатар сонирхогчдын Ази тивийн аварга шалгаруулах тэмцээнд оролцох эрх олгох юм.

Оюуны спортыг улс даяар жигд хөгжүүлж, хичээллэдэг хүмүүсийн тоог нэмэгдүүлье гэсэн зорилгоор энэ тэмцээнийг 2013 оноос УИХ-ын дарга ивээлдээ авч зохион байгуулж ирсэн уламжлалтай. М.Энхболд даргын ивээл дор гурав дахь жилдээ болох гэж байна.

Өнгөрсөн жилийн тэмцээнд 6830 гаруй шатарчин оролцсон. Жилээс жилд оролцогчдын тоо нэмэгдэж байгаа. Мөн энэхүү тэмцээнд БНСУ, ХБНГУ, Унгар, Шведийн Вант Улсад ажиллаж, амьдарч байгаа монголчууд оролцох хүсэлтээ ирүүлснийг Монголын шатрын холбооны Ерөнхий нарийн бичгийн дарга Н.Наранбаатар мэдээлсэн.

Дараа нь УИХ-ын Тамгын газрын ажилтан, шатрын спортын олон улсын шүүгч Г.Алтан-Оч, энэ жилийн тэмцээнд оролцож байгаа шатарчдын чансаа өндөр болсон. Уг тэмцээнд насанд хүрэгчид буюу 18-аас дээш настай, шатрын спортын цолгүй, Монголын шатрын холбооноос гаргасан рейтингийн жагсаалтаар сүүлийн хоёр жилийн хугацаанд 2100-аас дээш гараагүй сонирхогчид оролцох боломжтойг хэллээ.

Сумын аварга шалгаруулах тэмцээнээс эрэгтэй гурав, эмэгтэй нэг шатарчинг шалгаруулан Аймгийн аварга шалгаруулах тэмцээнд, дүүргийн тэмцээнээс эрэгтэй зургаа, эмэгтэй гурван шатарчинг тус тус шалгаруулан Нийслэлийн шатар сонирхогчдын аварга шалгаруулах тэмцээнд оролцуулах эрх олгоно.

Аймгийн шатрын аварга шалгаруулах тэмцээнээс эрэгтэй хоёр, эмэгтэй нэг шатарчинг, нийслэлийн аварга шалгаруулахтэмцээнээс эрэгтэй 18, эмэгтэй есөн шатарчинг тус тус шалгаруулан 2019 оны шатар сонирхогчдын Улсын аварга шалгаруулах шигшээ тэмцээнд оролцуулах эрх олгоно.

Хагас шигшээд шалгарсан шатарчид болон УИХ, Үндсэн хууль тогтоогчдын холбоо, УИХ-д ажлаа тайлагнадаг буюу УИХ-аас томилогддог байгууллага, Төрийн ордонд байрлах бусад төрийн байгууллагуудаас урилгаар 30 хүртэлх шатарчин оролцож оюун ухаанаа сорино гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Categories
мэдээ улс-төр

Сайдын үүрэгт ажлаас чөлөөлөх тогтоолын төсөл өргөн барилаа

Монгол Улсын Засгийн газрын гишүүн-Хүнс, хөдөө аж ахуй, хөнгөн үйлдвэрийн сайдын үүрэгт

ажлаас Батжаргалын Батзоригийг чөлөөлөх тухай УИХ-ын тогтоолын төслийг Монгол Улсын Шадар сайд Ө.Энхтүвшин УИХ-ын дарга М.Энхболдод өргөн барилаа.

Монгол Улсын Ерөнхий сайд У.Хүрэлсүхийн “Санал өргөн мэдүүлэх тухай” албан бичигт “Монгол Улсын Үндсэн хуулийн Гучин есдүгээр зүйлийн хоёр дахь хэсэг, Монгол Улсын Засгийн газрын тухай хуулийн 23 дугаар зүйлийн 1 дэх хэсгийн 1-д заасныг тус тус үндэслэн Батжаргалын Батзоригийг Монгол Улсын Засгийн газрын гишүүн-Хүнс, хөдөө аж ахуй, хөнгөн үйлдвэрийн сайдын үүрэгт ажлаас чөлөөлөх тухай асуудлыг хуульд заасны дагуу Монгол Улсын Ерөнхийлөгчтэй зөвшилцөж, Улсын Их Хуралд өргөн мэдүүлж байна” гэжээ.

Б.Батзориг нь Сайдын үүрэгт ажлаас чөлөөлөгдөх хүсэлтээ 2018 оны аравдугаар сарын 30-ны өдөр Монгол Улсын Ерөнхий сайд У.Хүрэлсүхэд хандан гаргасан билээ.

Categories
мэдээ спорт

Азийн паралимпийн хорооны шилдэг тамирчинд нэр дэвшсэн Э.Содномпилжээг дэмжихийг уриалав

Олон улсын паралимпийн хорооноос “Рио 2016″ олимпийн паралимпийн наадмын хүрэл медальт, Азийн наадмын аварга, Дэлхийн цомын гурван удаагийн аварга, Монгол Улсын гавьяат тамирчин Э.Содномпилжээг аравдугаар сарын шилдэг тамирчинд нэр дэвшүүлжээ. Тус холбоо аравдугаар сарын шилдэг тамирчнаа санал хураалтаар тодруулах бөгөөд эл санал хураалт энэ сарын 8-нд дуусах юм байна. Олон улсын паралимпийн хорооны аравдугаар сарын шилдэг тамирчинд нэр дэвшиж буй Э.Содномпилжээд www.paralympic.org сайт руу орж “Athlete of the month” цэсэнд нэвтэрч Vote хийж, саналаа өгөөрэй.

Тэрбээр өнгөрсөн сард Индонез улсын Жакарта хотноо болсон Азийн паралимпийн наадмын 107 кг-ын жинд ур чадвараа сорьж, алтан медаль хүртсэн. Ингэхдээ 232.5 кг байсан Азийн рекордыг 7.5кг-аар эвдэж 240 кг болгосон. Мөн 243 кг байсан дэлхийн дээд амжилтыг нэг кг-аар эвдэж, 244 кг болгосон юм.

Categories
мэдээ спорт

Гавьяат дасгалжуулагч Д.Банди багшийн нэрэмжит тэмцээн боллоо

Монгол Улсын ардын багш, гавьяат дасгалжуулагч Д.Банди багшийн нэрэмжит “Олимпийн гараа” бага насны улсын аварга шалгаруулах боксын тэмцээн Булган аймагт зохион байгуулагдлаа.

Тус тэмцээний 30 кг-ийн жинд ОБЕГ-ын харьяа “Аврагч” биеийн тамир техник-спортын хорооны тамирчин Ө.Энххүслэн алтан медаль, 38 кг-ийн жинд Ж.Ерөөлт мөнгөн медаль хүртлээ.

Улсын аварга шалгаруулах боксын тэмцээнд 47 байгууллагын 400 гаруй тамирчин оролцож, аваргуудаа шалгаруулсан байна.

Categories
мэдээ нийгэм

“Гэрэлтэй хот” аянаар хотын гэрэлтүүлгийг гурав дахин нэмнэ

“Нэг хот-Нэг стандарт” зорилтын хүрээнд “Гэрэлтэй хот” аяныг Улаанбаатар хотын Захирагчийн ажлын алба хэрэгжүүлж эхэллээ. Энэхүү аяны хүрээнд Улаанбаатар хотын гудамж, зам талбай дахь гэрэлтүүлгийг гурав дахин нэмэгдүүлэх зорилго тавьж, гэрэл унтраах, асаах цагийн хуваарийг улирлын нөхцөлд тохируулан өөрчлөх юм.

“Гэрэлтэй хот” аяны хүрээнд хийгдэх ажлын талаар Нийслэлийн Засаг даргын ахлах зөвлөх Д.Мөнх-Эрдэнэ, Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр нар мэдээлэл өглөө.

“Аз жаргалтай Улаанбаатар” хөтөлбөрийн хүрээнд нийслэлийн Засаг дарга 2018-2019 оны өвөлжилтийн бэлтгэл ажлыг хангах хүрээнд нийтийн эзэмшлийн гудамж, зам талбайн орон сууцны хороолол доторх туслах зам, гэр хорооллын гудамжид байгаа гэрлийн шон, гэрэлтүүлгийг бүртгэж 12 дугаар сарын 1-ны дотор гэрэлтэй болгох болгосон. Улаанбаатар хотын нийтийн эзэмшлийн зам талбай, гудамжны гэрэлтүүлгийн асалтын цагийн хуваарь харилцан адилгүй байдаг. Тухайлбал өвлийн цагт эрт харанхуй болоход гол төв замын гэрэлтүүлэг нэгдсэн байдлаар асдаг ч алслагдсан дүүргийн зам, гудамж талбайн гэрэлтүүлэг асах хуваарь харилцан адилгүй байгаа юм. Үүнийг асах хуваарийг нэгтгэн батлуулах, хяналт тавих үүргийг мөн холбогдох албаныханд өгчээ.

Нийтийн эзэмшлийн гудамж, зам талбайн гэрлийн шон, асахгүй байгаа гэрэлтүүлгийг бүртгэлжүүлэн цаашид 2019-2020 онд нийтийн эзэмшлийн болон орон сууцны дундах, гэр хорооллын гудамж замын гэрэлтүүлгийг нэмэгдүүлэх, эрчим хүчинд хэмнэлттэй гэрэлтүүлэгтэй болгох талаар санал гарган танилцуулах юм.

Нийслэлийн есөн дүүргийн хэмжээнд 90 мянган гэрэлтүүлэг байх ёстойгоос өнөөдрийн байдлаар 61070 гэрэлтүүлгийн шон асалттай байна. Гэрэлтүүлэг бүрэн асалтгүй байгаа нэг шалтгаан нь улсын болон гадаадын зээл тусламж, орон нутгийн хөгжлийн сангийн хөрөнгө оруулалтаар шинээр зам тавихдаа гэрэлтүүлгийг туслан гүйцэтгэгчээр гүйцэтгүүлдэг нь баталгаат хугацаанд нь гэрэлтүүлгийг хариуцах эзэн байдаггүй нь нөлөөлдөг байна.

Тухайлбал, наадамчдын замд НАЗХГ-ын захиалгаар баригдсан замд гэрэлтүүлгийн шонд баталгаад хугацаанд засвар хийгдээгүй. Мөн зуслангийн зам, Дамбадаржаа зэрэг алслагдсан замуудад асалтын засвар үйлчилгээний хүндрэлүүд гарч байна гэлээ.

Улаанбаатар хотын Захирагчийн ажлын албанаас мэргэжлийн бригадуудтай гэрлийн засвар үйлчилгээг газар дээр нь очиж хийх юм. Ирэх 12 дугаар сарын нэгэн гэхэд нийтийн эзэмшлийн гудамж, зам талбайд байгаа 61070 гэрлийн 1600 гэрлийн шонд засвар үйлчилгээ хийж асаах юм. Төв зургаан дүүргийн гэр хорооллын гудамж замд 31643 гэрлийн шон, 35 мянга орчим гэрэлтүүлэг байгаагийн асахгүй байгаа 742 гэрэлтүүлгийн шон толгойг солих ажил хийгдэнэ.

Нийслэлийн Засаг даргын ахлах зөвлөх Д.Мөнх-Эрдэнэ “Нийслэлийн Засаг даргын 2018 оны А/1008 тоот захирамж”- ийн дагуу иргэдийн аюулгүй орчинд амьдрах эрхийг хангах, Нийслэлийн Засаг даргын “Нэг хот, нэг стандарт” зорилтуудын хүрээнд Улаанбаатар хотын нийтийн эзэмшлийн гудамж, зам талбайн гэрэлтүүлгийн бүрэн асалт, ашиглалт, үйлчилгээг сайжруулах цогц арга хэмжээнүүдийг авч хэрэгжүүлэхээр болж байна. Мөн энэхүү аяны хүрээнд Улаанбаатар хотын нэрийн хуудас болсон барилга байгууламж, хөшөө, дурсгалт газруудын гэрэлтүүлгийг олон улсын стандартын дагуу гэрэлтүүлж, гэрэлтүүлэггүй гудамж, нийтийн эзэмшлийн зам талбайн талаарх мэдээллийг иргэдээс авч яаралтай, шуурхай арга хэмжээ авч болно гэдгээ хэллээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ нийгэм

Хугацаа нь дууссан эм, бэлдмэлийг хурааж устгалд оруулжээ

Баян-Өлгий аймгийн Засаг даргын А/784 тоот захирамжаар ЗДТГ, аймгийн Мэргэжлийн хяналтын газар, Цагдаагийн газар, Гаалийн газар, Эрүүл мэндийн газар хамтарсан ажлын хэсэг аймгийн төвд үйл ажиллагаа явуулж байгаа эм хангамжийн байгууллагуудад төлөвлөгөөт бус хяналт шалгалт хийжээ.

Шалгалтаар Монгол Улсын эмийн бүртгэлд бүртгэгдээгүй, хэрэглэх хүчинтэй хугацаа дууссан, үйлдвэрт савласан эмийг эрүүл ахуйн шаардлага хангаагүй нөхцөлд жижиглэнгээр савлаж худалдан борлуулсан зэрэг зөрчлийг илрүүлсэн байна. Зөрчил гаргасан найман аж ахуйн нэгжид Зөрчлийн тухай хуулийн дагуу арга хэмжээ авч, зөрчилтэй 90 төрлийн хоёр сая гаруй төгрөгийн эм бэлдмэлийг хурааж, устгуулжээ.