НИТХ-ын өнөөдрийн хуралдаанаар Нийслэлийн 2019 оны төсвийн төслийг хэлэлцэхээр төлөвлөж, 09:00 цагт товлоод байсан. Гэвч ирц бүрдээгүй хэвээр байна. Улаанбаатар хотын захирагч Су.Батболд энэ сарын 27-нд нийслэлийн төсвийг өргөн мэдүүлсэн. Хуульд зааснаар НИТХ нийслэлийн 2019 оны төсвийн төслийг ирэх арванхоёрдугаар сарын 5-ны дотор багтаан батлах учиртай.
Монгол Улсын Гадаад харилцааны сайд Д.Цогтбаатарын 2018 оны 10 дугаар сарын 29-ний өдрийн 6/41 тоот тушаалаар ХБНГУ-ын иргэн Рудольф Вагнер Монгол Улсын Соёлын элчээр томилогдсон. Элчин сайд Д.Ганбат Монгол Улсын Соёлын элчийн гэрчилгээг Р.Вагнерт 2018 оны 11 дүгээр сарын 27-ны өдөр гардуулан өгөв.
Рудольф Вагнер нь 20-иод жилийн өмнөөс монголын язгуур урлагийн хамтлаг, уран бүтээлчидтэй хамтарч ажиллан, тэдгээрт бүх талын дэмжлэг үзүүлж ирснээс гадна Баваар муж улсын “Миба”, “Донау”, “Уфра” зэрэг үзэсгэлэнг зохион байгуулахаар гар бие оролцож ирсэн.
Соёлын элчийн гэрчилгээг гардуулах ёслолын ажиллагаанд ЭСЯ-ны дипломат ажилтнууд байлцаж Рудольф Вагнерт ажлын өндөр амжилтыг хүсэн ерөөв.
Ерөнхийлөгч, Ерөнхий сайд, УИХ-ын дарга нар маань хоёр тийшээ харж суучихаад түнжин муутай байгааг түмэн олон харж байна. Монгол төрийн түүхэнд Төрийн гурван өндөрлөг ингэж толхилцож байсан удаагүй. Бие биеэ унагаах угсраа мэхийг сөргүүлэн хийцгээж байна. Төрийн ордон дотроо орон даяар шууд цацаж байгаа телевизийн камерийн өмнө, ширээний наана, цаанаас нэгнийгээ доромжлон, тохуурхцгаах боллоо. “Хулгайч”, “Худалч”, “Луйварчин”, “Ард түмнийхээ хөрөнгийг шаадаг” гэж хэрэлдэж байсныг санахгүй юм. Сүүлийн хэдэн хоног, өдөр бүр Төрийн гурван удирдлагынхаа гаргаж байгаа авир, ааш аягийг харж байх нь ээ “Одоо яах бол” гэж өмнөөс нь яс хавталзаж, ичдэг болов.
Засгийн газрыг огцруулах асуудлыг Төрийн байгуулалтын байнгын хороо дэмжчихсэн. Тэгэхээр энэ асуудал өнөө, маргаашгүй чуулганы нэгдсэн хуралдаанаар орно. Хэлэлцэх хуулийн хугацаа нь энэ долоо хоногоор дуусч байгаа. У.Хүрэлсүхийн танхимын хувь заяа чуулганаар шийдэгдэнэ. Энэ үеэр бид үзээгүй юмаа их үзэж, дуулаагүй сонин хачинаа сонсох байх даа.
Ерөнхий сайд нь огцрохгүйн тулд яаж дөвчигнөж, донгосох бол. Өөдөөс нь УИХ-ын дарга М.Энхболд нь ямар, ямар баримтууд гаргаж тавих бол. Ерөнхийлөгч маань У.Хүрэлсүхээ өмөөрч орж ирээд юу, юу гэх бол. Эрх ашгийнхаа төлөө тэмцэлдэж буй олигархуудын ээлжит жүжгийг эндээс л үзнэ дээ. Одоо бид тэднийг юу ч гэж хэлсэн тоохооргүй болсон. Бүгд тавилттай үзүүлбэр гэдгийг мэддэг боллоо.
Ард түмэнд хандаж ганц захих юм нь энэ гурвын зохион байгуулсан үймээн самуунд л битгий автаарай. “Монголчууд үүнийг л хүсч байна” гээд өөрсдийнхөө зорилгыг биелүүлэхийн тулд та, бидний нэрийг барьж нийгмийг өдөөн турхирч мэднэ. Энэ бүгд зохион байгуулалттай жүжиг. Эцэст нь ард түмэн хохирно шүү.
Монгол Улс парламентын засаглалтай, тэрийгээ иргэд, сонгогчдынхоо саналаар шийдчихдэг сонгуультай байхад юм, юмны учир олдоно. Тэр үед энэ гурваас салахаа ард түмэн мэднэ ээ.
Өнгөрсөн мягмар гаригт Төрийн байгуулалтын байнгын хорооны хурал дээр УИХ-ын гишүүн Ж.Бат-Эрдэнэ “Ядууралтай тэмцэхийн тулд бид Жижиг, дунд үйлдвэрлэлийг гаргаж ирсэн. Нэг сайд нь тэрбум тэрбумаар нь аваад явчихсан. 950 сая төгрөгийг хоорондоо ярилцаад авсан нь үнэн шүү дээ. Хоорондоо ярьцгааж байгаад гаргаад авсан” гэж хэлсэн юм. Тэгэхээр Засгийн газрын сайдууд, УИХ-ын зарим гишүүн, МАН-ын генсек нь хүртэл ЖДҮ-ийн 950 сая төгрөгийг өөр хоорондоо ярилцаж байгаад авцгаасан юм байна. Мэдээж, Ерөнхий сайдаасаа нууц ярилцана гэж байхгүй. Ж.Бат-Эрдэнэ гишүүний ярианаас үзвэл Ерөнхий сайд У.Хүрэлсүх мэдэж байхаар барахгүй өөрөө хуваарилсан байх талтай нь харагдаж байна. ХХААХҮ-ийн сайд Б.Батзоригийг ЖДҮ-ийн мөнгийг тэрбум тэрбумаар нь дур мэдэн хуваарилсан гэж буруутган чичилж байсан жүжгийн ард Ерөнхий сайд маань өөрөө сууж байжээ дээ янз нь. Үнэхээр ч бүхэл бүтэн нэг сангийн хөрөнгийг хуйгаар нь найз нөхдөдөө хуваарилах том толгой салбарын сайдад хаанаас байгаа аж. Тус сангаас Засгийн газрын сайдууд, УИХ-ын нэр бүхий гишүүд болон төрийн удирдах албан тушаалтнууд эрх мэдэл албан тушаалаа урвуулан ашиглаж зээл авсан. Дахин сануулахад, УИХ-ын гишүүн Х.Болорчулуун, Г.Солтан, Б.Батзориг, Ж.Энхбаяр, Н.Оюундарь, Б.Ундармаа, А.Сүхбат, Х.Нямбаатар, УИХ-ын гишүүн Н.Учралын аав Н.Ням-Осор, УИХ-ын гишүүн Г.Тэмүүлэнгийн ээж, О.Батнасангийн төрсөн дүү О.Ганбаатар, УИХ-ын гишүүн Б.Наранхүү, Б.Саранчимэг нарын төрсөн дүү нар ЖДҮ-гийн сангаас тэрбум тэрбумаар нь мөнгө зээлжээ. Түүнчлэн ТЕГ-ын дарга асан Б.Хурц, Улсын Ерөнхий прокурорын орлогч Б.Амгаланбаатар, Улсын Ерөнхий аудитор Д.Хүрэлбаатар, МАН-ын Ерөнхий нарийн бичгийн дарга, НИТХ-ын төлөөлөгч Д.Амарбаясгалан, Барилга хот байгуулалтын дэд сайд Ш.Лхамсүрэн нар ч ЖДҮХС-гаас бага хүүтэй мөнгө зээлэгсэд. Сүүлийн өдрүүдэд УИХ-ын гишүүн М.Оюунчимэг, Засгийн газрын хэрэг эрхлэх газрын дарга Г.Занданшатар , Сангийн сайд Ч.Хүрэлбаатар, Барилга, хот байгуулалтын сайд Х.Баделхан, Эрчим хүчний сайд Ц. Даваасүрэн, Уул уурхай, хүнд үйлдвэрийн сайд Д.Сумъяабазар, Байгаль орчин, аялал жуулчлалын сайд Н.Цэрэнбат нарын нэрс ЖДҮ-ийн сангаас зээл авсан гэж сошиалаар шуугиад эхэллээ.
Ерөнхий сайд өөрөө ЖДҮ-ийн зээлийг хуваарилсан учраас “Хууль шүүхээр гэм буруутайг нь батлаагүй байна” хэмээн Засгийн газраа улайран хамгаалж, улдан чангааж байгаа бололтой. Засгийн газар огцорвол Ерөнхий сайдын улс төрийн цаашдын замнал ч бүдэг харагдаж байна. “Намайг ард түмэн дэмжиж байгаа” гэж сайрхах түүний Засгийн газар ард түмэндээ очих мөнгийг нь өөрсдөө хуваагаад идчихсэн болохоор бодит дэмжлэг хэр их байгаа нь ч эргэлзээтэй. Нийтлэлч Баабарын бичсэнээр ард түмэн “Өөрт ногдох юмаа алдсан төдийгүй, хэдэн жилийн горьдлого хүсэл эрмэлзэлээ дээрэмдүүлсэн” болохоор их ууртай байгаа.
ЖДҮ-ийн зээлийн хэрэг бол мөсөн уулын зөвхөн орой гэж олон хүн хэлж байна. Доошлох тусам өнөө ард түмэндээ хайртай улстөрчдийн үнэн төрх улам л илчлэгдэнэ. ЖДҮ-ээс ч илүү хууль бус үйлдлүүд гарч мэднэ. Тэр бүхэнд “гэм буруутай нь батлагдаагүй” гээд ширэн нүүрлээд суух уу. Энэ Засгийн газрын бас нэг заль нь ЖДҮ-чин сайдуудаа хариуцлага тооцсон болж харагдах. Б.Батзориг өөрийн хүсэлтээр сайдаасаа өргөдлөө өгсөн болоод хэл амнаас салж байгаа бололтой. Прокуророос “Түүнийг шалгая, УИХ-ын гишүүний бүрэн эрхээс түдгэлзүүлээд өг” гэхээр МАН-ынхан хамгаалаад аваад үлдсэн. Одоо Б.Батзоригийн араас хоёр гурван сайдыг чөлөөлөх төлөвлөгөө зохиож байгаа дуулдаж байна. Тэгээд л өөрсдийгөө аваад үлдчих бололтой.
Энэ удаа ард түмэн шударга ёсыг нэхэж байна. Хууль бус үйлдлээ улайран хамгаалж буй Засгийн газраас хариуцлага, ес зүйг нэхэж байна. Харин өөдөөс нь нулимах эрх У.Хүрэлсүхийн Засгийн газарт байхгүй.
Г.БОЛОР
Аймгийн удирдлагууд Азийн хөгжлийн банкны суурин төлөөлөгч Ёланда Фернандез Ломмен болон албаны бүрэлдэхүүнийг хүлээн авч уулзлаа.
Уулзалтын үеэр суурин төлөөлөгч Ёланда Фернандез Улаанбаатар-Арвайхээр чиглэлийн 371-431 км-ийн хооронд 60 км авто замын засвар шинэчлэлийн ажлыг 2019 онд хийх талаар мэдээлсэн юм. Баруун аймгуудын тээврийн хэрэгсэл ихээр зорчдог, уул уурхайн хүнд машин механизмуудын хөдөлгөөн ихтэйгээс шалтгаалан дээрх 60 км зам ихээр эвдэрч үүний улмаас зам тээврийн осол багагүй гарч, иргэд амь нас, эрүүл мэнд, эд хөрөнгөөрөө хохирох тохиолдол нэмэгдэж байгаа юм.
“Уг асуудлыг шийдвэрлүүлэхээр аймгийн удирдлагууд, тойргоос сонгогдсон УИХ-ын гишүүдийн зүгээс Монгол Улсын Ерөнхийлөгч, Ерөнхий сайд, Зам, тээврийн хөгжлийн яам, Автотээврийн Үндэсний төв зэрэг холбогдох эрх бүхий байгууллага, албан тушаалтанд удаа дараа хүсэлт тавьж ажилласны үр дүнд уг асуудал шийдэгдэж байна” хэмээн аймгийн Засаг дарга Г.Ганболд уулзалтын үеэр хэлэв.
Зам засварын ажлын хэсгээс замын нөхцөл байдлын үнэлгээ, судалгаа гараад байгаа ба Азийн хөгжлийн банкны санхүүжилтээр улсын чанартай 60 км авто замын засвар, шинэчлэлт 2019 онд хийгдэх юм.
Нийслэлийн 2019 оны төсөв болон мөн ирэх оны газар зохион байгуулалтын төлөвлөгөөг батлах НИТХ-ын ээлжит XX хуралдаан 10.30 цагийн байдлаар эхлээгүй байна.
Өнөөдрийн хуралдаанаар мөн Нийслэлийн өмчөөс 2019 онд хувьчлах хуулийн этгээд, эд хөрөнгийн жагсаалт батлах тухай, Концессийн зүйлийн жагсаалт шинэчлэн батлах тухай асуудлыг тус тус хэлэлцэх юм. Нийслэл хотын зүгээс Нийслэлийн 2019 оны төсвийн төсөл, нийслэлийн өмч хувьчлалын жагсаалт болон газар зохион байгуулалтын төлөвлөгөөг НИТХ-ын даргад өмнө нь өргөн бариад байгаа юм. Ирэх оны Улаанбаатар хотын газар зохион байгуулалтын төлөвлөгөө, концессоор хийх бүтээн байгуулалтын жагсаалт, заалтыг мөн НИТХ-ын даргад өргөн барьсан.
Нийслэлийн зүгээс концесс болон бусад байгуулалттай холбоотойгоор хуримтлагдаад байсан 100 гаруй тэрбум төгрөгийн өрийг энэ онд төлж барагдуулаад байгаагаа мэдэгдсэн. “Одоо концессын гэрээтэй холбоотой зүйл нийслэлд байхгүй.
Цаашид төрийн зүгээс өөрийн хүчээр барих боломжтой сургууль, цэцэрлэг, замын ажлыг концессийн гэрээгээр гүйцэтгэхгүй. Харин цэнгэлдэх хүрээлэн, шарил хадгалах газар зэрэг 10 гаруй томоохон барилгыг концессын гэрээгээр барихаар төлөвлөж жагсаалт гаргаад байна” байгаа талаар мэдээлж байв.
Энэ талаар Нийслэлийн Засаг дарга С.Батболд, “Газрын асуудал хүндрэлтэй, суурьшлын бүс багатай Улаанбаатар хотын хувьд хэдий хэмжээний газрыг иргэн, ААН-үүдэд эзэмшүүлж өмчлүүлэх, хэдийг нь дуудлага худалдаагаар зохицуулу, хэдий хэмжээний орлого олох гээд Газар зохион байгуулалтын төлөвлөгөө чухлаар тавигдаж байна. Хотын төвд байрлаж буй нийслэлийн төр, захиргааны барилгуудыг худалдаж, орлогоор нь нүүлгэн шилжүүлэхтэй холбоотой шинэ захиргааны барилга барина. Барилгуудыг он гараад дуудлага худалдаа явуулж худалдана” гэдгээ мэдэгдээд байна. “Ингэснээр нийслэл хотын түгжрэлийг бууруулж, агаарын бохирдлыг багасгах чиглэлээр хамгийн анхны төвлөрлийг сааруулах арга хэмжээ болох юм” гэдгийг онцолж байна.
Монгол Улсад хавсран суух Онц бөгөөд Бүрэн эрхт зарим Элчин сайд нар өнөөдөр Монгол Улсын Ерөнхийлөгч Х.Баттулгад Итгэмжлэх жуух бичгээ өргөн барив.
Уулзалтын эхэнд Элчин сайд нар Итгэмжлэх жуух бичгийг нь хүлээн авч, ёслол төгөлдөр угтан авсанд талархал илэрхийлж, хоёр улсын хамтын ажиллагааг бүхий л түвшинд өргөжүүлэн хөгжүүлэхэд хичээл зүтгэл гарган ажиллахад бэлэн байгаагаа илэрхийлэв.
Мөн Монгол Улсын Ерөнхийлөгч Х.Баттулга Элчин сайд нарыг Монгол Улсад тавтай морилохыг хүсээд, Элчин сайд нар Бээжингээс хавсран сууж байгаа тул ойр, ойрхон Монгол Улсад тухлан саатаж, нийгэм, эдийн засаг болоод хүн ардынхаа нөхөрсөг харилцааг нэмэгдүүлэхийн тулд хичээл зүтгэл гарган ажиллах хэрэгтэйг санууллаа. Мөн Монгол Улсын Ерөнхийлөгч Х.Баттулга Монгол Улсыг хавсран суух Онц бөгөөд Бүрэн эрх Элчин сайд нартай улс хоорондын харилцан ашигтай хамтын ажиллагааг хөгжүүлэх болоод хэрэгжүүлж буй төсөл хөтөлбөрийн хүрээнд санал солилцов.
ОБЕГ-ын харьяа Үндэсний аврах бригадын Уул уурхайн аврах ангиас Эрүүл мэндийн яам, Дэлхийн эрүүл мэндийн байгууллагатай хамтран зохион байгуулж буй “Уул уурхайн салбарт ашиглагдаж буй химийн хорт бодисын ослын үеийн менежментийг боловсронгуй болгох, оролцогч талуудын чадавхыг бэхжүүлэх” сэдэвт сургалт, дадлага өнөөдөр ОБЕГ-ын Давтан сургалт, сэргээн заслын төвд эхэллээ. Сургалт, дадлагад ОБЕГ-ын Үндэсний аврах бригад, ЭМЯ, УУХҮЯ, БОАЖЯ, ДЭМБ, ХХЕГ, ЦЕГ, ТЕГ, МХЕГ, ГЕГ, НЭМҮТ, Зэвсэгт хүчний 119 дүгээр анги болон Сэлэнгэ, Төв, Баянхонгор, Завхан, Говь-Алтай, Өмнөговь, Дорноговь, Дорнод, Сүхбаатар аймгийн ОБГ, ЭМГ, МХГ-ын нийт 60 гаруй төлөөлөгч оролцож байна. Нээлтийн ажиллагаанд Нийгмийн эрүүл мэндийн үндэсний төвийн дарга Д.Нарантуяа, Улсын Онцгой комиссын нарийн бичгийн дарга, хурандаа М.Энх-Амар, ОБЕГ-ын харьяа Үндэсний аврах бригадын захирагч, хурандаа Д.Намсрай нар оролцлоо. Сургалт, дадлагын эхний өдөр буюу өнөөдөр Шинжлэх ухааны гавьяат зүтгэлтэн, доктор, профессор Ш.Паламдорж “Уул уурхайн салбарт ашиглагдаж буй химийн бодисоос үзүүлэх сөрөг нөлөөг багасгах нь Монголын нийгэмд тулгамдаж буй стратегийн асуудал болох нь” сэдвээр, доктор Б.Баяржаргал “Химийн хорт болон аюултай бодисын гамшгийн менежментийн асуудал” сэдвээр, ОБЕГ-ын Гамшиг судлалын хүрээлэнгийн мэргэжилтэн, ахмад, доктор П.Чимэдцэрэн “Химийн бодисын эрсдэлд суурилсан менежмент, ослын үеийн удирдлагын үйл ажиллагаанд цахим программ хангамжийг ашиглах” сэдвээр илтгэл тавих юм. Мөн хими, химийн технологийн хүрээлэнгийн эрдэм шинжилгээний ажилтан, доктор Б.Баярмаа “Химийн хорт болон аюултай бодисоос хүний эрүүл мэнд, байгаль орчинд үзүүлэх эрсдэл, урьдчилан сэргийлэх, бууруулах арга зам” сэдвээр, Үндэсний аврах бригадын Уул уурхайн аврах ажиллагаа хариуцсан захирагчийн орлогч, хурандаа Г.Буянтогтох “Химийн хорт бодисын холбогдолтой ослын үеийн хариу арга хэмжээний төлөвлөлт ба оролцогч талуудын харилцан ажиллагаа” сэдвээр, Анагаах ухааны доктор, профессор С.Юндэн “Уурхай, уулын үйлдвэрлэлийн ослын үед үзүүлэх эмнэлгийн тусламжийн зарчим” сэдвээр, Зэвсэгт хүчний 119 дүгээр ангийн ерөнхий инженер, хошууч С.Батзориг “Нийтийг хамарсан химийн ослын үед цагийн байдлыг үнэлэх, тооцооллыг хийх” сэдвээр тус тус илтгэл тавьж, хэлэлцүүлэг өрнүүлнэ. Харин сургалт, дадлага маргааш уул уурхайд ашиглагдаж буй химийн хорт бодисын холбогдолтой ослын нөхцөл байдал үүссэн үед аврах, хор уршгийг арилгах ажиллагааг зохион байгуулах дадлага сургуулиар үргэлжлэх юм гэж Онцгой байдлын ерөнхий газраас мэдээллээ.
УИХ-ын гишүүн Л.Оюун-Эрдэнэ цаг үеийн асуудлаар мэдээлэл хийлээ.
Тэрээр “Монголын парламентийн 27 жилийн түүхэнд болж байгаагүй үйл явдал боллоо. Чуулганы эхэнд УИХ-ын дарга хэлэлцэх асуудлаа танилцуулаагүй байж өчигдөр хуралдсан Ёс зүйн хорооны шийдвэр болох “Нэр бүхий УИХ-ын гишүүдийг санал хураалтад оролцуулахгүй” гэх шалтгааныг хэлээд хурлаа хаяад гараад явчихлаа. Хуулийн хүрээнд УИХ-ын дарга гэдэг хүн бол хурал даргалагч. УИХ гэдэг бол М.Энхболд гэдэг хүн биш. Миний бие 2018 наймдугаар сарын 1-ний өдөр тоот дугаартай албан бичгийг Ёс зүйн хорооны дарга С.Бямбацогтод хүргүүлсэн. Энэ албан бичигт “М.Энхболд гэх хүн 60 тэрбумын асуудалтай холбогдсон байна. Үүнийг ёс зүйн хорооны хуралдаанаар хэлэлцүүлж өгөөч” гэсэн. Гэтэл өнөөдрийг хүртэл хариу өгөөгүй. Харин өчигдөр гарсан шийдвэрээр Ёс зүйн хороо хуралдах гэж байна. Энэ үйл явцаас Монгол Улсын парламент хуулийн дагуу биш хувь хүнд тохируулж ажиллаж байгааг харж болно. МАНАН гэх бүлэглэлийн “тоглоом” нурах гээд байгаа учраас хууль хяналтын байгууллагууд М.Энхболд гэдэг хүнийг хамгаалахаар өчигдрөөс бөөнөөрөө ажиллаж байна. УИХ-ын гишүүдийн гэр бүлийг баривчлах ажиллагаа явуулж байна. Бөөнөөрөө гишүүдийг дуудаж уулзаад “Чамайг Засгийн газрыг хамгаалж үлдэх юм бол хэрэгт холбогдуулна” гэж байна. Үндсэн хууль зөрчсөн. Үндсэн хуулийн цэц яаралтай их суудлынхаа хуралдааныг зарлаж энэ асуудлыг хэлэлцэн шийдвэрлэх ёстой. Үгүй бол Цэц өөрөө Үндсэн хуулиа дагахгүй байгаа нөхцөл байдал үүсэж байна” гэв.
Арванхоёрдугаар сарын 25-наас хоёрдугаар сарын 1-ны өдрийг хүртэл сурагчдыг амраана гэж Боловсролын сайд Ц.Цогзолмаа мэдэгдсэн ч албан ёсоор баталгаажаагүй байсан юм.
Уг асуудлыг өчигдөр Засгийн газрын хуралдаанаар хэлэлцэж, сурагчдын хичээлийн жилийн бүтцэд өөрчлөлт оруулах эсэх асуудлыг Ц.Цогзолмаа сайдын эрх мэдлийн хүрээнд шилжүүлэх чиглэл өгсөн байна. Энэ дагуу БСШУС-ын сайд Ц.Цогзолмаа энэ долоо хоногтоо багтаан тушаал гаргаж, сурагчдын амралтын хуваарьт өөрчлөлт оруулахаар бэлтгэж буй талаар албаныхан мэдэгдлээ. Одоогоор тушаалын төсөлд яамны удирдлагын багийн саналыг авч байгаа аж. Санал авч дууссаны дараа Ц.Цогзолмаа сайдын тушаал гарч, сурагчдыг сар гаруйн хугацаанд амраах шийдвэр албан ёсоор баталгаажих юм. БСШУСЯ-наас сурагчдын хоёрдугаар улирлын амралтыг арванхоёрдугаар сарын 22-ноос нэгдүгээр сарын 15-ныг хүртэл гурван долоо хоног байхаар төлөвлөн баталсан. Гэтэл Эрүүл мэндийн яамнаас ханиад томууны дэгдэлт их өвлийн ид хүйтэн, утааны үеэр буюу арванхоёрдугаар сарын 15-наас хоёрдугаар сарын 15-ны өдрийг хүртэл амраах санал гаргасан. Энэ асуудлаар Эрүүл мэндийн яам, БСШУС-ын яамны хамтарсан ажлын хэсэг гарч ажиллаад, сурагчдыг хоёр сар биш сар гаруйн хугацаанд амраах саналд нэгдсэн билээ.